ವಿಶ್ವ ಬಂಟರ ಸಮ್ಮೇಳನದ ಲೆಪ್ಪೋಲೆ ಬುಡುಗಡೆ

ಮುಲ್ಕಿ : ಜಾಗತಿಕ ಬಂಟರ ಸಂಘಲೆನ ಒಕ್ಕೂಟ (ರಿ.) ಕುಡ್ಲ ನೆತ್ತ ಆಡಳಿತ ಮಂಡಳಿದ ಸದಸ್ಯೆರೆನ ಸಭೆ ಮುಲ್ಕಿದ ಶ್ರೀ ಕನ್ಯಾನ ಸದಾಶಿವ ಶೆಟ್ಟಿ ಸಂಕೀರ್ಣಡ್ ಇಪ್ಪುನ ಪ್ರವೀಣ್ ಭೋಜ ಶೆಟ್ಟಿ ಆಡಳಿತ ಕಚೇರಿಡ್ ಇಂಚೊಗು ನಡತ್ಂಡ್.

ಸಭೆತ್ತ ಗುರ್ಕಾರ್ಮೆನ್ ಒಕ್ಕೂಟದ ಅಧ್ಯಕ್ಷೆರ್ ಐಕಳ ಹರೀಶ್ ಶೆಟ್ರ್ ಒಯಿಸ್ ದಿತ್ತೆರ್. ಸಭೆಟ್ಟ್ ದುಂಬುದ ಆಡಳಿತ ಮಂಡಳಿ ಸಭೆತ್ತ ನಿರ್ಣಯನ್ ದಾಖಲ್ ಮಲ್ತೆರ್. ಬೊಕ್ಕ ಲೆಕ್ಕಪತ್ರ ಮಂಡನೆ ಬೊಕ್ಕ ಮಂಜೂರಾತಿ ಪಡೆಯೆರ್. ಜತೆ ಕಾರ್ಯದರ್ಶಿ ಪ್ರವೀಣ್ ಭೋಜ ಶೆಟ್ಟಿ ಮೆರೆನ ತಾನಗ್ ಚಂದ್ರಹಾಸ ಶೆಟ್ಟಿ ರಂಗೋಲಿ ಮೆರೆನ್ ನೇಮಕ ಮಲ್ತೆರ್. ಪ್ರಧಾನ ಕಾರ್ಯದರ್ಶಿ ಜಯಕರ ಶೆಟ್ಟಿ ಇಂದ್ರಾಳಿ ಮೇರ್ ಎದ್ಕೊಂದು ವರದಿ ಓದಿಯೆರ್. ಕೋಶಾಧಿಕಾರಿ ಉಳ್ತೂರು ಮೋಹನದಾಸ ಶೆಟ್ಟಿ ಮೇರ್ ಲೆಕ್ಕಪತ್ರನ್ ಓದಿಯೆರ್.

ಗುರ್ಕಾರ್ಮೆನ್ ಒಯಿಸೊಂದು ಐಕಳ ಹರೀಶ್ ಶೆಟ್ಟಿ ಮೇರ್ ಪಾತೆರ್ದ್, ಜಾಗತಿಕ ಬಂಟರ ಸಂಘಲೆನ ಒಕ್ಕೂಟ ಸಮಾಜದ ಅಭಿವೃದ್ದಿ ಬೊಕ್ಕ ಏಳಿಗೆಗಾದ್ ಕೆಲಸ ಮಲ್ತೊಂದು ಉಂಡು. ನೆಕ್ಕ್ ದಾನಿಲು ಎಡ್ಡೆ ರೀತಿಡ್ ಸಹಾಕಾರ ಕೊರ್ದು, ಸ್ಪಂದಿಸಾದೆರ್ ಪಂದ್ ಪಂಡೆರ್. ಬೊಕ್ಕ ಉಪಾಧ್ಯಕ್ಷೆರ್ ಕರ್ನಿರೆ ವಿಶ್ವನಾಥ್ ಶೆಟ್ಟಿ ಮೇರ್ ಅಕ್ಟೋಬರ್ ತಿಂಗೊಲ್ ಡ್ ನಡಪರೆ ಇಪ್ಪುನ ವಿಶ್ವ ಬಂಟರ ಸಮ್ಮೇಳನದ ಬಗೆಟ್ಟ್ ಪಾತೆರಿಯೆರ್.

ಸಭೆಟ್ಟ್ ಪಾಲ್ ಪಡೆದಿತ್ತಿನ ಒಕ್ಕೂಟದ ಮಹಾದಾನಿ ಕನ್ಯಾನ ಸದಾಶಿವ ಶೆಟ್ಟಿ ಮೇರ್ ಅ.28 ಬೊಕ್ಕ 29 ಕ್ಕ್ ಒಡಿಪುದ ಅಜ್ಜರಕಾಡು ಮೈದಾನಡ್ ನಡಪುನ ವಿಶ್ವ ಬಂಟರ ಸಮ್ಮೇಳನದ ಲೆಪ್ಪೋಲೆನ್ ಬುಡುಗಡೆ ಮಲ್ತೆರ್. ಸಮ್ಮೇಳನಡ್ ನಡಪುನ ಸಾಂಸ್ಕೃತಿಕ ಪಂತೊ ಬೊಕ್ಕ ಕ್ರೀಡಾಕೂಟದ ಪಂತೊಗು ಸಮಾಜ ಬಾಂಧವೆರೆನ ಸಹಕಾರ ಬೋಡು ಪಂದ್ ಪಂಡೆರ್.

ಕ್ರೀಡೋತ್ಸವ ಸಮಿತಿದ ಸಂಚಾಲಕೆರ್, ಒಕ್ಕೂಟದ ಪೋಷಕ ಸದಸ್ಯೆರ್ ಗಿರೀಶ್ ಶೆಟ್ಟಿ ತೆಳ್ಳಾರ್ ಪಾತೆರ್ದ್, ಕಬ್ಬಡಿ, ವಾಲಿಬಾಲ್, ಬಲ್ಲ್ ಒಯಿಪುನ, ತ್ರೋಬಾಲ್, ಪಂದ್ಯಾಟಗ್ ಎಡ್ಡೆ ನಗದು ಇನಾಮುನ್ ಕೊರಿಯೆರೆ ಉಂಡು. ಅತ್ತಂದೆ ಪಥ ಸಂಚಲನಡ್ ಪಾಲ್ ಪಡೆಪುನ ಕೂಟಲೆಗ್ ಪಂತೊ ಉಂಡು. ಸುರುತ್ತ ಇನಾಮು 1 ಲಕ್ಷ ರೂಪಾಯಿ, ರಡ್ಡನೇ ಇನಾಮು 75 ಸಾರ, ಮೂಜಿನೇ ಇನಾಮು 50 ಸಾರ ಬೊಕ್ಕ ನಾಲ್ ನೇ ಇನಾಮು 25 ಸಾರ ನಗದು ಕೊರಿಯೆರೆ ಉಂಡು ಪಂದ್ ಪಂಡೆರ್.

ಸಾಂಸ್ಕೃತಿಕ ಸಮಿತಿದ ಸಂಚಾಲಕೆರ್, ಒಕ್ಕೂಟದ ಪೋಷಕ ಸದಸ್ಯೆರ್ ಚಂದ್ರಹಾಸ ಡಿ.ಶೆಟ್ಟಿ ಪಾತೆರ್ದ್, ಸಾಂಸ್ಕೃತಿಕ ಸಮಿತಿಗ್ ಸದಸ್ಯೆರೆನ್ ಸೇರ್ಸಾದ್ ಒಂಜಿ ಕೂಟನ್ ರಚನೆ ಮಲ್ದ್ಂಡ್. ಐನ್ ನಿಮಿಷದ ಕಾಲಾವಧಿದ ನೃತ್ಯ ಪಂತೊಡು ಸುರುತ್ತ ಒಂಜಿ ಲಕ್ಷ ರೂಪಾಯಿ, ರಡ್ಡನೇದ 75 ಸಾರ, ಮೂಜಿನೇದ 50 ಸಾರ ಬೊಕ್ಕ ನಾಲ್ ನೇ ಬೊಕ್ಕ ಐನ್ ನೇ ಪ್ರಶಸ್ತಿನ್ ಕೊರಿಯೆರೆ ಉಂಡು ಪಂದ್ ಸಭೆಕ್ಕ್ ತೆರಿಪಾಯೆರ್.

ಈ ಪೊರ್ತುಡು ಮಹಾ ಪೋಷಕೆರ್ ಶಶಿಧರ್ ಶೆಟ್ಟಿ ಇನ್ನಂಜೆ, ಪೋಷಕೆರ್ ಪುರುಷೋತ್ತಮ ಶೆಟ್ಟಿ, ನಾಗೇಶ್ ಹೆಗ್ಡೆ, ಸುಧೀರ್ ಶೆಟ್ಟಿ, ಅಶೋಕ್ ಕುಮಾರ್ ಶೆಟ್ಟಿ ಮೈರ್ಮಾಡಿ, ಶ್ರೀಧರ್ ಶೆಟ್ಟಿ ಆರೂರು ಬೊಕ್ಕ ಸುಮಾರ್ 50 ಬಂಟರ ಸಂಘಲೆನ ಅಧ್ಯಕ್ಷೆರ್, ಪದಾಧಿಕಾರಿಲು, ಸಾಂಸ್ಕೃತಿಕ ಬೊಕ್ಕ ಕ್ರೀಡಾ ಸಮಿತಿದ ಸದಸ್ಯೆರ್, ಮಹಿಳಾ ವಿಭಾಗದ ಅಧ್ಯಕ್ಷೆರ್, ಸದಸ್ಯೆರ್ ಪಾಲ್ ಪಡೆದಿತ್ತೆರ್.