ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ, ಜೈ ತುಲುನಾಡ್ (ರಿ.) ಅಕ್ಷಯ ಯುವಕ ಮಂಡಲ (ರಿ.) ನೆಟ್ಟಾರ್ ಬೊಕ್ಕ ಅಕ್ಷತಾ ಮಹಿಳಾ ಮಂಡಲ ನೆಟ್ಟಾರ್ ಮೊಕ್ಲೆನ ಒಟ್ಟು ಸೇರಿಗೆಡ್ ಸುಳ್ಯ ತಾಲೂಕ್‌ದ ನೆಟ್ಟಾರ್ ದ.ಕ.ಜಿ.ಪಂ.ಹಿ.ಪ್ರಾ.ಶಾಲೆಡ್ ನವೆಂಬರ್ 29, 2020 ಐತಾರೊದಾನಿ “ಬಲೆ ತುಲು ಲಿಪಿ ಕಲ್ಪುಗ” ಕಜ್ಜಕೊಟ್ಯದ ಮುಗಿತಲ ಲೇಸ್ ನಡತ್ಂಡ್. ಲೇಸ್‌ನ್ ಮಲ್ಲ ಬಿನ್ನೆರ್, ಜೆ.ಸಿ.ಐ ಬೆಳ್ಳಾರೆದ ದುಂಬುದ ಗುರ್ಕಾರ್ಲು ಆಯಿನ ಶ್ರೀ ಪ್ರದೀಪ್ ಕುಮಾರ್ ರೈ ಪನ್ನೆ ತುಡರ್ ಪೊತ್ತಾದ್ ಉದಿಪನ ಮಲ್ತೆರ್. ಬೊಕ್ಕ ಪಾತೆರ್‌ನ ಆರ್ ತುಳು ಲಿಪಿ, ತುಳು ಬಾಸೆದ ಬುಲೆಚ್ಚಿಲ್‌ಡ್ ಊರ ಕೂಟೊಲೆದ ಕೈಸೇರಿಗೆ ಮಸ್ತ್ ಅಗತ್ಯೊ ಉಪ್ಪುನವು, ಈ ದಿಟ್ಟಿಡ್ ಕೂಟೊಲೊಟ್ಟು ಸೇರ್ದ್ ತುಳುಬೆನ್ನಿ ಬೆನೊಡು ಪಂದ್ ಪಂಡೆರ್. ಜೈ ತುಲುನಾಡ್ (ರಿ.) ಸಂಘಟನೆದ ದುಂಬುದ ಒತ್ತು ಗುರ್ಕಾರ್ಲು ಶ್ರೀ ಯತೀಶ್ ಪುತ್ತೂರು ಪಾತೆರ್ದ್ ತುಳುವೆರೆನ ಮಿತ್ತ್ ಆವೊಂದಿಪ್ಪುನ ದಬ್ಬಾಳಿಕೆನ್ ತುಳುವೆರ್ ಮೊಟ್ಟುದ್ ಉಂತೊಡ್ ಪಂದ್ ಪಂಡೆರ್.
ಲೇಸ್‌ದ ಗುರ್ಕಾರ್ಮೆಡ್ ಇತ್ತಿನ ಅಕ್ಷಯ ಯುವಕ ಮಂಡಲದ ಗುರ್ಕಾರ್ಲು ಶ್ರೀ ವೆಂಕಟರಮಣ ಗೌಡ ತುಳು ಲಿಪಿ ಪರೀಕ್ಷೆ ಬರೆದ್ ಉತ್ತೀರ್ಣ ಆಯಿನಗ್ಲೆಗ್ ಆಜ-ಓಲೆ (ಪ್ರಮಾಣಪತ್ರೊ) ಪಟ್ಯೆರ್, ಅಂಚೆನೆ ತುಳು ಲಿಪಿ ಪರೀಕ್ಷೆ ಬರೆದ್ ಮಾತೆರ್ಲ ಉತ್ತೀರ್ಣ ಆದ್, 100 ಶೇಕಡಾ ಫಲಿತಾಂಶ ಬತ್ತ್‌ನ ನಮಕ್ ಪೆರ್ಮೆ ಪಂದ್ ಪಂಡೆರ್. ಲೇಸ್‌ಡ್ ತುಳು ಲಿಪಿ ಕಲ್ಪಾದಿಲಾಯಿನ (ಶಿಕ್ಷಕ) ಜಗದೀಶ ಗೌಡ ಕಲ್ಕಳ ಮೆರೆಗ್ ಆಯೋಜಕರೆನ ಪರವಾದ್‌ ಮಾನಾದಿಗೆ ಮಲ್ತೆರ್. ಮಿತ್ತರ್ಮೆಡ್ ಶಾಲಾಭಿವೃದ್ಧಿ ಸಮಿತಿದ ಗುರ್ಕಾರ್ದಿ ಶ್ರೀಮತಿ ಉಷಾ ಯೋಗೀಶ್, ಅಕ್ಷತಾ ಮಹಿಳಾ ಮಂಡಲೊದ ಗುರ್ಕಾರ್ದಿ ನಳಿನಿ ಶಶಿಕಾಂತ್ ಕಜೆ, ತುಳು ಲಿಪಿ ಕಲ್ಪಾದಿ ನಿಶ್ಚಿತ್ ರಾಮಕುಂಜ ಇತ್ತೆರ್. ಈ ಸಂದರ್ಭೊಡ್ ಜೈ ತುಲುನಾಡ್ (ರಿ.) ಸಂಘಟನೆರ್ದ್ ನನ ದುಂಬುದ ಲೇಸ್‌ದ ಲೆಪ್ಪೋಲೆಡ್ ಬೊಕ್ಕ ಲೇಸ್‌ಡ್ ಆಯಿನಾತ್ ತುಳು ಬಾಸೆ, ತುಳು ಲಿಪಿನ್ ಗಲಸೊಡ್ ಪಂದ್ ಅಕ್ಷಯ ಯುವಕ ಮಂಡಲ ಬೊಕ್ಕ ಅಕ್ಷತಾ ಮಹಿಳಾ ಮಂಡಲದಕ್ಲೆಡ ಅರಿಕೆ ಮಲ್ತೆರ್.
Editorial