ಜೈ ತುಲುನಾಡ್ (ರಿ ) ಸಂಘಟನೆದ ಬರವುದ ಬಿತ್ತ್ ಲ್ ತುಲು ಸಾಹಿತ್ಯ ಕೂಟ ಉದಿಪನ
ಅಪ್ಪೆ ಭಾಸೆದ ಬುಲೆಚಿಲ್ ಬೊಕ್ಕ ಅವೆನ್ ಒರಿಪಾವರೆ ಕಜ್ಜ ಮಲ್ಪುನ ತುಲುನಾಡ್ (ರಿ ) ಸಂಘಟನೆದ ಕಜ್ಜ ಪುಗಾರ್ತೆದ ವಿಚಾರ. ಸಾಹಿತ್ಯ ಕೂಟದ ಒರುಟು ಬರೆಪುನಕುಲೆಗ್ ಸಾದಿ ಮಲ್ತ್ ಕೊರ್ಪುಂಡು ಪಂದ್ ಕಿನ್ನಿಗೋಳಿ ರೋಟರಿ ಕ್ಲಬ್ ಗುರ್ಕಾರ್ಲು ಸಾಯಿನಾಥ್ ಶೆಟ್ಟಿ ಮುಂಡೇರ್ ಪಂಡೆರ್.
ಆರ್ ಜ 18 ಐತಾರದಾನಿ ಕಿನ್ನಿಗೋಳಿದ ರೋಟರಿ ರಜತ ಭವನಡ್ ಬರವುದ ಬುಲೆಚ್ಚಿಲ್ ಗ್ ತುಲುನಾಡ್ (ರಿ ) ಸಂಘಟನೆದ ಅಂಗ ಸಂಸ್ಥೆ ಬರವುದ ಬಿತ್ತ್ ಲ್ ತುಲು ಸಾಹಿತ್ಯ ಕೂಟ ಉದಿಪನ ಮಲ್ತ್ ಪಾತೆರಿಯೆರ್.
ಜೈ ತುಲುನಾಡ್ (ರಿ ) ಸಂಘಟನೆದ ಗುರ್ಕಾರ್ಲು ಉದಯ ಪೂಂಜಾ ತಾರಿಪಾಡಿ ಗುತ್ತು ಲೇಸ್ ದ ಗುರ್ಕಾರ್ಮೆ ವೈಸೊಂದು ಪಾತೆರ್ದ್ ಸಂಘಟನೆ ಶಾಲಾ ಕಾಲೇಜಿಡ್ ತುಲು ಭಾಸೆದ ಬಗೆಟ್ ತರಗತಿಲು ಮಲ್ದ ಅಂಚೆನೆ ನನ ದುಂಬುಲ ಸಾಹಿತ್ಯ ಕೂಟರ್ದ್ ಬರೆಪುನಕುಲೆಗ್ ಅವಕಾಶ ಕೊರೊಂದು ತುಲು ಭಾಸೆದ ಬುಲೆಚ್ಚಿಲ್ ಗ್ ಬೆನ್ನಿ ಬೆನ್ಪ ಪಂದ್ ಪಂಡೆರ್.
ಈ ಲೇಸ್ ಡ್ ಯುಗಪುರುಷ ಭುವನಾಭಿರಾಮ ಉಡುಪ, ಮುಲ್ಕಿ ಕ ಸಾ ಪ ಗುರ್ಕಾರ್ಲು ಮಿಥುನ್ ಉಡುಪ ಕೊಡೆತ್ತೂರು, ತಾ ಪಂ ಮಾಜಿ ಪದುಕೆರ್ ದಿವಾಕರ ಕರ್ಕೇರ, ಪೆರಿಯ ಸಾಹಿತಿ ಕುಶಲಾಕ್ಷಿ ವಿ ಕಣ್ವತೀರ್ಥ, ಸುಕುಮಾರ್ ಎನ್ ಶೆಟ್ಟಿ ತಾಳಿಪಾಡಿ ಗುತ್ತು, ಕಟೀಲ್ ಕನ್ಸ್ಟ್ರಕ್ಷನ್ ದ ಮಾಲಕೆರ್ ಅಭಿಲಾಷ್ ಶೆಟ್ಟಿ ಕಟೀಲ್, ಬರವುದ ಬಿತ್ತ್ ಲ್ ತುಲು ಸಾಹಿತ್ಯ ಕೂಟದ ನಿಯೋಜಿತ ಗುರ್ಕಾರ್ಲು ಸವಿತಾ ಕರ್ಕೇರ ಕಾವೂರು ಉಪಸ್ಥಿತರಿತ್ತೆರ್.
ಸಂಘಟನೆದ ತಾಪಕ ಸಮಿತಿ ಪದುಕೆರ್ ಕಿರಣ್ ತುಳುವೆ ಎದ್ಕೊಂಡೆರ್, ಕೇಂದ್ರ ಸಮಿತಿ ಪ್ರಧಾನ ಕಾರ್ಯಂತೆರ್ ಪೂರ್ಣಿಮ ಬಂಟ್ವಾಳ ಸೊಲ್ಮೆ ಸಂದಾಯ ಮಲ್ತೆರ್. ಜೈ ತುಲುನಾಡ್ ಬಂಟ್ವಾಳ ಎಗ್ಗೆದ ಸಂಘಟನಾ ಕಾರ್ಯಂತೆರ್ ರೇಣುಕಾ ಕಣಿಯೂರು ಲೇಸ್ ಸುದಾರಿಕೆ ಮಲ್ತೆರ್.
