1992 ಟ್ಟ್ ಅಯೋಧ್ಯೆಡ್ ವಿವಾದಿತ ಕಟ್ಟಡ ಧ್ವಂಸಆಯಿನ ಬೊಕ್ಕ ಅವ್ವೆ ಜಾಗೆ ಡ್ ತಾತ್ಕಾಲಿಕ ಶೆಡ್ ಮಲ್ತ್ ದ್ ಅವ್ವೆತೋ ಸಾಧು ಸಂತೆರ್ ಲಕ್ಷಾಂತರ ಕರಸೇವಕೆರ್ನ ಒಟ್ಟು ಸೇರಿಗೆಡ್ ಆ ಶೆಡ್ ಡ್ ಶ್ರೀ ರಾಮಲಲ್ಲಾನ ವಿಗ್ರಹನ್ ಶ್ರೀ ವಿಶ್ವೇಶತೀರ್ಥ ಶ್ರೀಪಾದೆರ್ ಪ್ರತಿಷ್ಠೆ ಮಲ್ಪುನ ಪೊರ್ತುಡು ಯಾನ್ ಅಲ್ಪ ಇತ್ತ್ ದ್ ಐಕ್ ಸಾಕ್ಷಿ ಆಯಿನವು ಎನ್ನ ಈ ಜನ್ಮದ ಪುಣ್ಯ ಪಂದ್ ಮುಖ್ಯಮಂತ್ರಿ ಬಿಎಸ್ ಯಡ್ಯೂರಪ್ಪ ಪಂಡೆರ್.
ಶ್ರೀ ಪೇಜಾವರ ಮಠದ ಕೀರ್ತಿಶೇಷ *ಶ್ರೀ ಶ್ರೀ ವಿಶ್ವೇಶತೀರ್ಥ ಶ್ರೀಪಾದೆರ್ನ 82 ನೇ ಸನ್ಯಾಸ ಪೀಠಾರೋಹಣ ವರ್ಧಂತಿ ಸಂಸ್ಮರಣಾರ್ಥ* ಬೆಂಗಳೂರು ಕತ್ರಿಗುಪ್ಪೆದ ಶ್ರೀ ಪೂರ್ಣಪ್ರಜ್ಞ ವಿದ್ಯಾಪೀಠಡ್ ಉಪ್ಪುನ ಶ್ರೀಕುಲ್ನ ವೃಂದಾವನ ಸನ್ನಿಧಿಡ್ ಗುರುವಾರ ಶ್ರೀ ವಿಶ್ವಪ್ರಸನ್ನ ತೀರ್ಥ ಶ್ರೀಪಾದೆರ್ನ ಸಾನ್ನಿಧ್ಯಡ್ ನಡತಿನ ಕಾರ್ಯಕ್ರಮಡ್ ಆರ್ ಪಾಲ್ ಪಡೆದ್ ಪಾತೆರ್ಯೆರ್. 8 ವರ್ಷದ ಎಲ್ಯ ಪ್ರಾಯೋಡೆ ಸನ್ಯಾಸ ಸ್ವೀಕಾರ ಮಲ್ತ್ ದ್ 80 ವರ್ಷದ ಸುದೀರ್ಘ ಅವಧಿಗ್ ದ್ವೈತ ವೇದಾಂತ ಸಾಮ್ರಾಜ್ಯ ನ್ ಪರಿಶುದ್ಧ ಚಾರಿತ್ರ್ಯ , ಕಠಿಣ ತಪಸ್ಸು ಸ್ವಾಧ್ಯಾಯ , ವಿದ್ವತ್ತು ಬೊಕ್ಕ ಮಾನವೀಯ ಕಳಕಳಿಯ ಅಸಂಖ್ಯ ಸೇವಾಕಾರ್ಯರ್ದ್ ಯಶಸ್ವಿಯಾದ್ ದುಂಬು ಕೊನೊಂದು ಕೋಟ್ಯಂತರ ಭಕ್ತೆರ್ನ ಶ್ರದ್ಧೆ ನಂಬಿಕೆಗ್ ಪಾತ್ರೆರಾಯಿನ ಶ್ರೀ ವಿಶ್ವೇಶತೀರ್ಥೆರ್ ಈ ದೇಶ ತೂಯಿನ ಮಹಾನ್ ಯೋಗಿ , ಸಾಧಕೆ ಯತಿ ಪಂದ್ ಪುಗರ್ಯೆರ್ . ಪೇಜಾವರ
ಸಭಾಕಾರ್ಯಕ್ರಮರ್ದ್ ದುಂಬು ವಿದ್ಯಾಪೀಠ ಆವರಣಡ್ ಉಪ್ಪುನ ಶ್ರೀ ವಿಶ್ವೇಶತೀರ್ಥ ಶ್ರೀಪಾದೆರ್ನ ನೂತನ ವೃಂದಾವನ ದರ್ಶನ ಪಡೆದ್ ಶ್ರೀ ವಿಶ್ವಪ್ರಸನ್ನತೀರ್ಥೆರ್ ಮಲ್ತಿನ ಮಂಗಳಾರತಿನ್ ತೂದು ಭಕ್ತಿ ಸಮರ್ಪಣೆ ಮಲ್ತೆರ್ .
ಈ ಪೊರ್ತುಡು ಪೇಜಾವರ ಶ್ರೀ ಪಾತೆರ್ದ್ ಗುರುಕುಲ್ನೊಟ್ಟಿಗೆ ಯಡ್ಯೂರಪ್ಪಗ್ ಇತ್ತಿನ ಸುದೀರ್ಘ ಒಡನಾಟ ಬಾಂಧವ್ಯ , ರಾಮಜನ್ಮಭೂಮಿ ಆಂದೋಲನಡ್ ಅಕುಲು ರಡ್ಡ್ ಜನ ಪಾಲ್ ಪಡೆಯಿನ ಅಂಚನೇ ಅಧಿಕಾರಡ್ ಉಪ್ಪುನಗ ಉಡುಪಿದ ಅಭಿವೃದ್ಧಿಗ್ ಬೊಕ್ಕ ಉಡುಪಿ ಮಠಕ್ ವಿಶೇಷ ಸಹಕಾರ ಕೊರ್ತಿನೆನ್ ನೆಂಪು ಮಲ್ತೆರ್.
ಕರಿನ ವರ್ಷ ಗುರುಕುಲ್ನ ಅನಾರೋಗ್ಯದ ಪೊರ್ತುಡು ಉಡುಪಿಡೇ ಇತ್ತುದು, ಗುರುಕುಲು ತೀರ್ ಪೋದು ಬೊಕ್ಕ ಬಳಿಕ ಉಡುಪಿಡ್ ಬೊಕ್ಕ ಬೆಂಗಳೂರ್ ಡ್ ನಡತಿನ ಆರ್ನ ಅಂತ್ಯಕ್ರಿಯೆನ್ ಬಾರಿ ಪೊರ್ಲುಡೆ ಸರಕಾರಿ ಗೌರವದ ಸಹಿತ ನಡಪಾವುನಲ್ಪ ಮುಖ್ಯಮಂತ್ರಿ ಕೊರಿನ ಸಹಕಾರನ್ ನೆಂಪು ಮಲ್ತೆರ್.
ಇಂಚಗು ರಾಜ್ಯಡ್ ಗೋಹತ್ಯಾ ನಿಷೇಧ ಕಾನೂನ್ ಗ್ ಶಾಸನಸಭೆಟ್ ಅಂಗೀಕಾರ ದೆತೊಂದು ಕೋಟ್ಯಂತರ ಹಿಂದೂಲೆನ, ಗೋಪ್ರೇಮಿಲೆನ ಆಗ್ರಹಗ್ ಮನ್ನಣೆ ಕೊರ್ತಿನೆಕ್ಕ್ ಸೊಲ್ಮೆ ಸಂದಾಯಿತ ಮಲ್ತೆರ್. ಈ ಕಾನೂನ್ ನು ಬಾರಿ ಪರಿಣಾಮ ಕಾರಿಯಾದ್ ಅನುಷ್ಟಾನಗ್ ಕನವೊಡು ಪಂದ್ ಒತ್ತಾಯ ಮಲ್ಪುವ ಬೊಕ್ಕ ಗೋಹತ್ಯಾ ನಿಷೇಧದಾತೆ ಗೋರಕ್ಷಣೆ ದ ಕಾರ್ಯಗ್ ಲಾ ಬಲ ಜಿಂಜಾವೊಡು ಪಂದ್ ಒತ್ತಾಯ ಮಲ್ತಿನ ಶ್ರೀಕುಲು
ಕೋವಿಡ್ ವಿಪತ್ದ ಪೊರ್ತುಡು ಬಾರಿ ತಾಳ್ಮೆ ಡ್ ಇಡೀ ರಾಜ್ಯ ಆ ವಿಪರೀತ ಪರಿಸ್ಥಿತಿ ನ್ ಸಮರ್ಥವಾದ್ ಎದುರಿಸಾಯರೇ ಬೊಕ್ಕ ರಾಜ್ಯಡ್ ಪರಿಸ್ಥಿತಿನ್ ಸರಿ ಮಲ್ಪರೆ ಬಾರಿ ಕಷ್ಟ ಬತ್ದ್ ಬೇಲೆ ಮಳ್ತೊಂದುಪ್ಪುನ ಮುಖ್ಯಮಂತ್ರಿಲೆನ್ ವಿಶೇಷವಾದ್ ಮಾನದಿಗೆ ಮಲ್ತೆರ್. ಮುಖ್ಯಮಂತ್ರಿಲೆಗ್ ಶಾಲ್ ಫಲಪುಷ್ಪ ಪ್ರಸಾದ ಕೊರ್ದು ಮಾನದಿಗೆ ಮಲ್ತೆರ್ .
ಅಯೋಧ್ಯೆ ರಾಮಮಂದಿರ ನಿರ್ಮಾಣ ಕಾರ್ಯಡ್ ಮಾತಾ ರೀತಿದ ಸಹಕಾರ ಕೊರೊಡು ಪಂದ್ ಶ್ರೀಕುಲು ಮುಖ್ಯಮಂತ್ರಿಲೆಗ್ ಪತ್ರಕ ಕೊರಿಯೆರ್ .
ಶಾಸಕರಾಯಿನ ರವಿಸುಬ್ರಹ್ಮಣ್ಯ , ಕೆ ರಘುಪತಿ ಭಟ್ ಪಾಲ್ ಪಡೆದಿತ್ತೆರ್ .ವಿದ್ವಾನ್ ಪ್ರಭಂಜನಾಚಾರ್ಯ ಪ್ರಸ್ತಾವನೆ ಮಲ್ತೆರ್.ವಿದ್ಯಾಪೀಠದ ಪರವಾದ್ ವ್ಯವಸ್ಥಾಪಕೆರಾಯಿನ ಕೇಶವಾಚಾರ್ಯ , ವಿದ್ವಾಂಸೆರಾಯಿನ ಆನಂದತೀರ್ಥ ಆಚಾರ್ ನಾಗಸಂಪಿಗೆ , ಸತ್ಯನಾರಾಯಣಾಚಾರ್ಯ , ಬದರೀನಾಥಾಚಾರ್ಯ , ಗುರುರಾಜ ಕಲ್ಕೂರ್ ಬೊಕ್ಕ ಶ್ರೀಕುಲ್ನ ಆಪ್ತರಾಯಿನ ಕೃಷ್ಣ ಭಟ್ ವಿಷ್ಣುಮೂರ್ತಿ ಆಚಾರ್ಯ ಪೂರ ಮುಖ್ಯಮಂತ್ರಿಲೆನ್ ಸಾಂಪ್ರದಾಯಿಕ ಗೌರವದೊಟ್ಟುಗು ಎದ್ಕೊಂಡೆರ್ .
