ಕಾರ್ಲ: ಇರ್ವತ್ತೂರು ಶ್ರೀ ಲಕ್ಷ್ಮೀ ಜನಾರ್ದನ ಸ್ವಾಮಿ ದೇವಲ್ಯಡ್ ವಾರ್ಷಿಕ ಜಾತ್ರಾ ಮಹೋಚ್ಚಯ ಬೊಕ್ಕ ಬ್ರಹ್ಮರಥೋತ್ಸವ
ಕಾರ್ಲದ ಎಳ್ಳಾರೆ ಮಹತೋಭಾರ ಇರ್ವತ್ತೂರು ಶ್ರೀ ಲಕ್ಷ್ಮೀ ಜನಾರ್ದನ ಸ್ವಾಮಿ ದೇವಲ್ಯಡ್ ಏ.8-ಏ.18 ಮುಟ್ಟ ಶ್ರೀ ಕ್ಷೇತ್ರಡ್ ವಾರ್ಷಿಕ ಜಾತ್ರಾ ಮಹೋಚ್ಚಯ ಬೊಕ್ಕ ಬ್ರಹ್ಮರಥೋತ್ಸವ ಭಾರೀ ಗೌಜಿಡ್ ನಡಪರೆ ಉಂಡು.
ಮಸ್ತ್ ಧಾರ್ಮಿಕ ಅಂಚನೆ ಸಾಂಸ್ಕೃತಿಕ ಕಾರ್ಯಕ್ರಮದ ಒರೊಟ್ಟ್ ಈ ಲೇಸ್ ನಡಪರೆ ಉಂಡು.
ದೇವಲ್ಯದ ಪರಪೋಕು
ಪರಶುರಾಮ ಸೃಷ್ಟಿದ ಪುಣ್ಯ ಮಣ್ಣ್ ಡ್ ನಮ ಬೇತೆ ಬೇತೆ ವಿಶಿಷ್ಟ ಕಾರಣಿಕ ಧಾರ್ಮಿಕ ಶ್ರದ್ಧಾ ಕೇಂದ್ರಲೆನ್ ತೂತ. ಅಂಚಿನ ಕಾರ್ಣಿಕ ಕ್ಷೇತ್ರಡ್ ಕಾರ್ಲ ತಾಲ್ಲೂಕ್ ದ ಎಳ್ಳಾರೆ ಗ್ರಾಮಡ್ ಇಪ್ಪುನ ರಡ್ದನೆ ವೈಕುಂಠ ಪುಗರ್ತೆದ ಶ್ರೀ ಕ್ಷೇತ್ರ ಇರ್ವತ್ತೂರು ಶ್ರೀ ಲಕ್ಷ್ಮೀ ಜನಾರ್ಧನ ದೇವಲ್ಯಲ ಒಂಜಿ. ಮುಲ್ಪ ಪ್ರಮುಖ ದೇವೆರಾದ್ ಶ್ರೀ ಲಕ್ಷ್ಮೀ ಜನಾರ್ಧನ ದೇವೆರ್ ಅಂಚನೇ ಪರಿವಾರ ದೇವೆರಾದ್ ಶ್ರೀ ಮಹಾಗಣಪತಿ ಅಂಚನೆ ಶ್ರೀ ಜಲದುರ್ಗೆ ಬೊಕ್ಕ ಪರಿವಾರ ದೈವಲು ಇತ್ತ್ ದ್, ಏಪಲ ತ್ರಿಕಾಲ ಪೂಜೆ ಬೊಕ್ಕ ನೈವೇದ್ಯನ್ ಸದ್ಭಕ್ತೇರ್ದ್ ಸ್ವೀಕಾರ ಮಲ್ತ್ ದ್, ಪ್ರಸನ್ನತೆ ಪಡೆದ್ ಭಕ್ತೆರೆಗ್ ಅನುಗ್ರಹ ಕೊರೊಂದುಲ್ಲಲ್.
ಶ್ರೀ ಕ್ಷೇತ್ರ ಆರ್ಥಿಕವಾದ್ ಪಿರ ಇತ್ತ್ಂಡಲ ಮುಲ್ಪ ದೇವೆರ್ನ ಇಚ್ಛೆದಂಚನೆ ಏಪಲ ನುಪ್ಪುಸೇವೆ ನಡತ್ತೊಂದ್ ಇಪ್ಪುನವ್ ವಿಶೇಷ. ಉಂದೆಕ್ಕ್ ಕಾರಣ ಶ್ರೀ ದೇವೆರ್ ಒಂಜಿ ಕೈಟ್ ನುಪ್ಪುದ ಮುದ್ದೆನ್ ಪತ್ತ್ ದ್ ನೆಲೆಯಾಯಿನವ್. ತುಳುನಾಡ್ ದ ಪುಣ್ಯ ಮಣ್ಣ್ ದ ಈ ಕ್ಷೇತ್ರಡ್ ನೆಲೆಯಾಯಿನ ದೇವೆರ್ ಅಂಗೈಡ್ ನುಪ್ಪುದ ಮುದ್ದೆನ್ ಪತ್ತ್ ದ್ ಉಂತುದೆರ್. ಉಂದೆನ್ ತೂಯಿನ ಭಕ್ತೆರ್ ಶ್ರೀ ಕ್ಷೇತ್ರಡ್ ಸ್ವಯಂ ಸ್ಫೂರ್ತಿಡ್ ಅಮೃತ ಪಡಿ ಸೇವೆಗ್ ಕಾರಣಿಕರ್ತೆರಾದ್ ಶ್ರೀ ದೇವೆರ್ನ ನೈವೇದ್ಯಗಾದ್ ಅರಿನ್ ಕೊರೊಂದುಲ್ಲೆರ್. ಅಮೃತ ಪಡಿ ಸೇವೆ ಅಂಚನೆ ಶಾಶ್ವತ ಪೂಜೆ ಕೊರೊಂದಿಪ್ಪುನೆಡ್ದಾವರ ಶ್ರೀ ದೇವೆರ್ ನಮಕ್ಕ್ ಆಯುರಾರೋಗ್ಯ ಸಕಲಭಾಗ್ಯನ್ ಕರುಣಿಸಾವೊಂದ್ ಉಲ್ಲೆರ್ ಪನ್ಪಿನವ್ ಮುಲ್ಪದ ಭಕ್ತೆರ್ನ ಪಾತೆರ ಆತ್ಂಡ್.
ಶ್ರೀ ಕ್ಷೇತ್ರ ಇರ್ವತ್ತೂರು ಎಳ್ಳಾರೆ ಶ್ರೀ ಲಕ್ಷ್ಮೀ ಜನಾರ್ಧನ ದೇವಲ್ಯ ಸುಮಾರ್ 1400 ವರ್ಷದ ಪಿರವು ಆಲೂಪೆರ್ನ ಆಳ್ವಿಕೆಡ್ ನಿರ್ಮಾಣ ಆಯಿನ ಬಗ್ಗೆ ದೇವಲ್ಯದ ಪ್ರಾಂಗಾಣ ಅಂಚನೆ ಸುತ್ತ ಇಪ್ಪುನ ಶಿಲಾಶಾಸನಡ್ ಉಲ್ಲೇಖ ಉಂಡು. ಆಯಿಬೊಕ್ಕ ಕ್ರಿ.ಶ.1413 ಟ್ ವಿಜಯನಗರ ಸಾಮ್ರಾಜ್ಯದ ಅಧೀನಡ್ ಇತ್ತಿನ ಬಾರ್ಕೂರು ಸಾವಂತೆರ್ ಕಾಲಡ್ ಈ ದೇವಲ್ಯ ಪುನರ್ ನಿರ್ಮಾಣ ಆಂಡ್ ಪನ್ಪಿನವ್. ಶಾಸನಡ್ ಉಲ್ಲೇಖ ಉಂಡು. ಕ್ರಿ.ಶ.1448ದ ಡಿಸೆಂಬರ್ ತಿಂಗೋಲ್ ಡ್ ಬತ್ತಿನ ಆಮಾವಾಸ್ಯೆ ಅಂಚನೆ ಸೂರ್ಯಗ್ರಹಣದ ಪರ್ವಕಾಲಡ್ ಬಾರುಕೂರ್ದ ರಾಜ್ಯಪಾಲೆರ್ ಬಾನಪ್ಪ ಒಡೆಯೆರ್ ವಿಜಯನಗರ ಚಕ್ರವರ್ತಿ ಮಲ್ಲಿಕಾರ್ಜುನ ರಾಯನ ಪುದರ್ ಡ್ ಈ ದೇವಲ್ಯದ ನಿತ್ಯ ಪೂಜೆ, ಪರ್ವಕಾಲದ ಪೂಜೆ, ಕಾಲಾಧಿಬೋಗದ ಪೂಜಾ ಕಾರ್ಯಲೆನ್ ವಿಧಿವತ್ತಾದ್ ತಪ್ಪದೇ ನಡಪಾಯರೆ ಬೋಡಾದ್ ಎಳ್ಳಾರೆ ಗ್ರಾಮನ್ ಅಂಚನೆ ಗ್ರಾಮದ ಉತ್ಪತ್ತಿಗಾದ್ ದಾನವಾದ್ ಕೊರ್ದ್ ರಾಜ್ಯಪಾಲ ಬಾನಪ್ಪ ಒಡೆಯೆರ್ ಇರ್ವತ್ತೂರ್ ಎಳ್ಳಾರೆ ಈ ದೇವಲ್ಯಗ್ ಭೇಟಿಕೊರ್ದ್ ಕ್ರಿ.ಶ.1449 ಫೆಬ್ರವರಿ 25ಕ್ಕ್ ಈ ದಾನ ಸಂಬಂಧ ಪುದರ್ ದೀತೆರ್ ಪಂದ್ ಶಿಲಾಶಾಸನಡ್ ತೆರಿದ್ ಬರ್ಪುಂಡ್.
ಶಾಸನದ ಪ್ರಕಾರ ಶ್ರೀ ಕ್ಷೇತ್ರ ಇರ್ವತ್ತೂರು ಸುಮಾರ್ ಇರ್ವ ಊರುಲೆಗ್ ಸಂಬಂಧಪಟ್ಟ್ ದಿತ್ತ್ ದ್, ಕ್ರಿ.ಶ.1413 ಜನವರಿಡ್ ರಚನೆ ಮಲ್ತಿನ ಶಿಲಾ ಶಾಸನಡ್ ಈ ಕ್ಷೇತ್ರಗ್ “ಇರ್ವತ್ತೂರ್ ನಾಡ್” ಪಂದ್ ಪುದರ್ ದೀತೆರ್.
ಈ ಕ್ಷೇತ್ರದ ವ್ಯಾಪ್ತಿ ಏಳರೇ ಮಾಗಣೆಡ್ ಇತ್ತ್ ದ್, ಮುಖ್ಯವಾದ್ ಎಳ್ಳಾರೆ, ಕುಕ್ಕುಜೆ, ಕಡ್ತಲ, ಬೈರಂಪಳ್ಳಿ, 41ನೇ ಶಿರೂರು, ಹರಿಖಂಡಿಗೆ, ಪಂಚನಬೆಟ್ಟು, ಬೊಮ್ಮೆರ್ ಬೆಟ್ಟು ಗ್ರಾಮದ ಅರ್ಧಭಾಗ, ಎರ್ಲಪಾಡಿ, ಮರ್ಣೆ, ಅಜೆಕಾರು, ಮುಟ್ಲುಪಾಡಿ, ಅಂಡಾರು, ಎಣ್ಣೆಹೊಳೆ, ಶಿರ್ಲಾಲು, ಕೆರ್ವಾಶೇ, ವರಂಗ, ಮುನಿಯಾಲು, ಮುದ್ರಾಡಿ, ಕಬ್ಬಿನಾಲೆ, ನಾಡ್ಪಾಲು, ಸೋಮೇಶ್ವರ, ಚಾರ, ಹೆಬ್ರಿ, ಶಿವಪುರ, ಕಜಾನೆ ಇಂಚಿನ ಇರ್ವ ಊರುಲೆಗ್ ಸಂಬಂಧ ಪಟ್ಟಿನ ಕ್ಷೇತ್ರನೇ ಇರ್ವತ್ತೂರ್. ಅಂಚಾದ್ ಈ ಕ್ಷೇತ್ರಗ್ ಸಂಬಂಧ ಪಟ್ಟಿನ ಊರುಡ್ ಇಪ್ಪುನ ಇಲ್ಲಡ್ ಒವ್ವೆ ಶುಭ ಕಾರ್ಯಕ್ರಮ, ದೈವಲೆನ ನೇಮೋಚ್ಚಯ ನಡಪುನ ಪೊರ್ತುಡ್ ಶ್ರೀ ದೇವೆರೆಗ್ ಕಾಣಿಕೆ, ತಾರಾಯಿ ದೆದ್ದೀದ್ ಪ್ರಾರ್ಥನೆ ಮಲ್ತ್ ದ್ ಕ್ಷೇತ್ರದ ಸಿರಿಮುಡಿ ಗಂಧ ಪ್ರಸಾದನ್ ದೆತೊಂದ್ ಪೋಪಿನವ್ ಮುಲ್ಪದ ರೂಢಿ.
