Tulu News

Gas Cylinder burst in Telangana kills two persons, many injured ಗ್ಯಾಸ್ ಪುಡಾದ್ ರಡ್ಡ್ ಜನ ತೀರ್ ಪೋಯೆರ್: ಸುಮಾರ್ ಜನಕ್ಕ್ ಪೆಟ್ಟ್

ತೆಲಂಗಾಣ: ಖಮ್ಮಂ ಜಿಲ್ಲೆಡ್ ಬಿಆರ್‌ಎಸ್ ಸಭೆತ್ತ ಪೊರ್ತುಡು ಪಟಾಕಿ ಪುಡಾದ್ ನೆರ್ದಾವರ ತೂ ಪೊತ್ ದ್ ಗ್ಯಾಸ್ ಸಿಲಿಂಡರ್ ಪುಡಾದ್ ರಡ್ಡ್ ಜನ ಜಾಗೆಡೇ ತೀರ್ ಪೋಯಿನ ಘಟನೆ ವೈರಾ ವಿಧಾನಸಭಾ ಕ್ಷೇತ್ರ ವ್ಯಾಪ್ತಿದ ಕಾರೇಪಲ್ಲಿ ಮಂಡಲದ ಚೀಮಲಪಾಡು ಗ್ರಾಮಡ್ ನಡತ್ಂಡ್.

ಈ ಘಟನೆಡ್ ಪೊಲೀಸ್ ಬೊಕ್ಕ ಪತ್ರಕರ್ತೆರ್ ಸೇರ್ದ್ ಸುಮಾರ್ ಜನಕ್ಕ್ ಪೆಟ್ಟಾತ್ಂಡ್. ಅತ್ತಂದೆ ನೆಟ್ಟ್ ಪೆಟ್ಟಾಯಿನ ಒಂಜಿ ದಂಪತಿಲು ತನ್ನ ಕೈಕಾರ್ ನ್ ಕಳೆವೊಂದೆರ್ ಪಂದ್ ತೆರಿದ್ ಬೈದ್ಂಡ್.

ಭಾರತ್ ರಾಷ್ಟ್ರ ಸಮಿತಿ (BRS)ದ ನಡಪಾವೊಂದು ಇತ್ತಿನ ಆತ್ಮೀಯ ಸಮ್ಮೇಳನದ ಸಭೆಟ್ಟ್ ಕೆಲವು ಪಕ್ಷದ ಕಾರ್ಯಕರ್ತೆರ್ ಪಟಾಕಿ ಪುಡಾತಿನ ಪರಿಣಾಮ ಈ ಘಟನೆ ನಡತ್ ದ್ಂಡ್. ಮೊಕುಲು ಖಮ್ಮಂ ಸಂಸದೆರ್ ನಾಮ ನಾಗೇಶ್ವರ ರಾವ್, ಶಾಸಕೆರ್ ರಾಮುಲು ನಾಯ್ಕ್ ಸೇರಿನಂಚೆನೆ ಪಕ್ಷದ ಮುಖಂಡೆರೆನ್ ಎದ್ಕೊನಿಯೆರೆ ಪಟಾಕಿ ಪುಡತ್ ದೆರ್ ಪಂದ್ ವರದಿ ಆತ್ಂಡ್.

ನೆಟ್ಟ್ ತೀರ್ ಪೋಯಿನಕುಲು ಬೋನುತ್ ರಮೇಶ್ ಬೊಕ್ಕ ಅಂಗೋಟು ಮಂಗು ಪಂದ್ ತೆರಿದ್ ಬೈದ್ಂಡ್. ಅತ್ತಂದೆ ನೆಟ್ಟ್ ಪೆಟ್ಟಾಯಿನಕ್ಲೆನ್ ಬಿಆರ್‌ಎಸ್ ಮುಖಂಡೆರೆನ ಗಾಡಿಡ್ ಸರ್ಕಾರಿ ಆಸ್ಪತ್ರೆಗ್ ಲೆತೊಂದು ಪೋತೆರ್. ಆಂಡ ಈ ಘಟನೆಗ್ಲಾ ಪಕ್ಷದ ಸಭೆಕ್ಲಾ ಒವ್ವೇ ಸಂಬಂಧ ಇಜ್ಜಿ ಪಂದ್ ನಾಗೇಶ್ವರ ರಾವ್ ಮಾಧ್ಯಮ ಪ್ರತಿನಿಧಿಲೆಗ್ ತೆರಿಪಾದೆರ್.

Gas Cylinder burst in Telangana kills two persons, many injured

Telangana: At a BRS( Bharat Rashtra Samithi) meeting in Kamam district of Telangana; crakers were burst which resulted in a gas cylinder catching fire and killing two persons and injuring many . Police personnel and journalists were those among the injured.

Modi to give call letters to 71,000 people !! 71 ಸಾರ ಜನಕ್ಕ್ ಬೇಲೆದ ನೇಮಕಾತಿ ಪತ್ರ ಕೊರಿಯೆರೆ ಉಲ್ಲೆರ್ ಮೋದಿ

71 ಸಾರ ಜನಕ್ಕ್ ಪ್ರಧಾನಿ ಮೋದಿ ಇನಿ ಬೇಲೆದ ನೇಮಕಾತಿ ಪತ್ರ ಕೊರಿಯೆರೆ ಉಲ್ಲೆರ್.

ರೋಜಗಾರ್ ಮೇಳದ ಯೋಜನೆದಡಿಟ್ಟ್ ಬೊಲ್ಪುಗು ಮೋದಿ ವಿಡಿಯೋ ಕಾನ್ಫರೆನ್ಸ್ ಡ್ ನೇಮಕಾತಿ ಪತ್ರನ್ ಕೊರ್ಪೆರ್. ಬೊಕ್ಕ ಪೊಸತಾದ್ ನೇಮಕ ಆಯಿನ ಉದ್ಯೋಗಿಲೆನೊಟ್ಟಿಗೆ ಪಾತೆರಿಯೆರೆ ಉಲ್ಲೆರ್ ಪಂದ್ ಪ್ರಧಾನಮಂತ್ರಿ ಕಾರ್ಯಾಲಯ ತೆರಿಪಾದ್ಂಡ್. ಈ ಯೋಜನೆದಡಿಟ್ಟ್ 10 ಲಕ್ಷ ಜವನೆರೆಗ್ ಬೇಲೆ ಕೊರಿಯೆರೆ ಸರ್ಕಾರ ಯೋಚನೆ ಮಲ್ದ್ಂಡ್. ಈ ವರ್ಚುವಲ್ ಸಭೆಟ್ಟ್ ದೇಶದ ಬೇತೆ ಬೇತೆ ಪೇಂಟೆದ ಕೇಂದ್ರ ಸಚಿವೆರ್ ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ವರದಿ ಆತ್ಂಡ್.

Modi to give call letters to 71,000 people !!

The PM Narendra Modi will hand over job call letters to 71,000 people today. The call letters will be handed over through video conferencing under the Rozgar Yojana Scheme.

He will also address the candidates said sources from the PM’s office. Plans are afoot to give employment to ten lakh people under this scheme.

ರೇಡಿಯೊ ಮಣಿಪಾಲ್ ಡ್ ‘ಚಿಣ್ಣರ ದನಿ’ ಲೇಸ್

ಮಣಿಪಾಲ: ರೇಡಿಯೊ ಮಣಿಪಾಲಡ್ ಸಮುದಾಯ ಬಾನುಲಿ ರೇಡಿಯೊ ಮಣಿಪಾಲ್ ಬೊಕ್ಕ ವಾಯ್ಸ್ ಆಫ್ ಆರಾಧನಾ ಸಂಸ್ಥೆದ ಒಟ್ಟುಸೇರಿಗೆಡ್ ‘ಚಿಣ್ಣರ ದನಿ’ ಲೇಸ್ ಎ.12 ಕ್ಕ್ ಬುಧಾರ 5.30 ಕ್ಕ್ ಪ್ರಸಾರ ಆಪುಂಡು.

ಇನಿ ಪ್ರಸಾರ ಆಪುನ ಈ ಲೇಸ್ ದ ನಾಲ್ ನೇ ಸಂಚಿಕೆಡ್ ಬಾಲ ಪ್ರತಿಭೆ ಅನನ್ಯ ಉಡುಪ ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ರೇಡಿಯೊ ಮಣಿಪಾಲದ ಪ್ರಕಟಣೆ ತೆರಿಪಾದ್ಂಡ್. ನನ ಎ.13 ಕ್ಕ್ ಗುರುವಾರ ಮಧ್ಯಾಹ್ನ 1.30ಕ್ಕ್ ಕುಡೂರ ಪ್ರಸಾರ ಆಪುಂಡು.

ಎ.14-18: ಮಧೂರು ವರ್ಷಾವಧಿ ಜಾತ್ರೆ

ಕಾಸ್ರೋಡು: ಮಧೂರು ಶ್ರೀ ಮದನಂತೇಶ್ವರ ಸಿದ್ಧಿವಿನಾಯಕ ದೇವಲ್ಯಡ್ ವರ್ಷಾವಧಿ ಜಾತ್ರೆ ಎ.14-18 ಮುಟ್ಟ ನಡಪರೆ ಉಂಡು.

ಎ.14 ಕ್ಕ್ ಬೊಲ್ಪುಗು ವೇದ ಪಾರಾಯಣ ಆದ್ ಕೊಡಿ ಏರುಂಡು. ಬೊಕ್ಕ ಸಹಸ್ರ ಕುಂಭಾಭಿಷೇಕ ನಡಪರೆ ಉಂಡು. ಮಧ್ಯಾಹ್ನ ತುಲಾಭಾರ ಸೇವೆ, ಮಹಾಪೂಜೆ, ಬಯ್ಯಗ್ ತಾಯಂಬಕ, ದೀಪಾರಾಧನೆ, ಉಚ್ಚಯ ಬಲಿ ನಡಪರೆ ಉಂಡು.

ಎ.15 ಕ್ಕ್ ಕಾಂಡೆ ದೀಪ ಉಚ್ಚಯ, ವಿಷುಕಣಿದ ಇಸೇಸ ಬಲಿ, ರಾಜಾಂಗಣ ಪ್ರಸಾದ, ಪಂಚವಾದ್ಯ, ಮಧ್ಯಾಹ್ನ ತುಲಾಭಾರ ಸೇವೆ, ಮಹಾಪೂಜೆ, ಬಯ್ಯಗ್ ತಾಯಂಬಕ, ದೀಪಾರಾಧನೆ, ಉಚ್ಚಯ ಬಲಿ ನಡಪರೆ ಉಂಡು.

ಎ.16 ಕ್ಕ್ ರಾತ್ರೆ ನಡುದೀಪ ಉಚ್ಚಯ, ಉಚ್ಚಯ ಬಲಿ, ಸೇವೆ, ಸುತ್ತುಲು ನಡಪರೆ ಉಂಡು.

ಎ.17 ಕ್ಕ್ ಬಯ್ಯಗ್ ಮೂಲತಾನ ಉಳಿಯತ್ತಡಗ್ ಶ್ರೀ ದೇವೆರೆನ ಘೋಷಯಾತ್ರೆ, ರಾತ್ರೆ ಮೂಲತಾನ ಉಳಿಯತ್ತಡ್ಕಡ್ ಕಟ್ಟೆ ಪೂಜೆ, ಬೆಡಿಮರ್ದ್ ಪ್ರದರ್ಶನ, ಶಯನ, ಕವಾಟ ಬಂಧನ ನಡಪರೆ ಉಂಡು.

ಎ.18 ಕ್ಕ್ ರಾತ್ರೆ ಕ್ಷೇತ್ರದ ಕೆರೆಟ್ಟ್ ಶ್ರೀ ದೇವೆರೆನ ಅವಧೃಥ ಸ್ನಾನ, ಬಟ್ಟಲ್ ಕಾಣಿಕೆ, ರಾಜಾಂಗಣ ಪ್ರಸಾದ ಆದ್ ಕೊಡಿ ಜವೆರೆ ಉಂಡು.

ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.

ರಾಜಸ್ಥಾನದ ಸುರುತ್ತ ವಂದೇ ಭಾರತ್ ರೈಲ್ ನ್ ಉದಿಪನ ಮಲ್ತಿನ ಮೋದಿ

ರಾಜಸ್ಥಾನದ ಸುರುತ್ತ ವಂದೇ ಭಾರತ್ ಎಕ್ಸ್‌ಪ್ರೆಸ್‌ ರೈಲ್ ನ್ ಪ್ರಧಾನಿ ಮೋದಿ ಉದಿಪನ ಮಲ್ತೆರ್.

ಈ ರೈಲ್ ಡೆಲ್ಲಿ ಕಂಟೋನ್ಮೆಂಟ್ ಬೊಕ್ಕ ಅಜ್ಮೇರ್ ಮಾರ್ಗಡ್ ಸವಾರಿ ಮಲ್ಪುಂಡು. ಉಂದು ಜೈಪುರ, ಅಲ್ವಾರ್ ಬೊಕ್ಕ ಗುರ್ ಗಾಂವ್ ಡ್ ಉಂತುಂಡು. ಅತ್ತಂದೆ ಈ ರೈಲ್ 5 ಗಂಟೆ 15 ನಿಮಿಷಡ್ ಡೆಲ್ಲಿರ್ದ್ ಅಜ್ಮೇರ್ ಗ್ ಎತ್ತುಂಡು.

ರಾಜಕೀಯಗ್ ನಿವೃತ್ತಿ ಘೋಷಣೆ ಮಲ್ತಿನ ಎಸ್.ಅಂಗಾರ

ಸುಳ್ಯ ವಿಧಾನಸಭಾ ಕ್ಷೇತ್ರದ ಹಾಲಿ ಶಾಸಕೆರ್, ಸಚಿವೆರ್ ಎಸ್.ಅಂಗಾರ ರಾಜಕೀಯಗ್ ನಿವೃತ್ತಿ ಘೋಷಣೆ ಮಲ್ದೆರ್.

ಇನಿ ಮೆರೆನ ಇಲ್ಲಡ್ ಸುದ್ದಿ ಸಂದರ್ಶನಡ್ ಪಾತೆರ್ದ್, ಪಕ್ಷ ಟಿಕೆಟ್ ಕೊರಂದಿನ ಬಗೆಟ್ ಎನ್ನ ಅಸಮಾಧಾನ ಅತ್ತ್, ಆಂಡ ಇತ್ ವರ್ಷೊ ಪಕ್ಷಗಾದ್ ಬೊಕ್ಕ ಸಮಾಜಗಾದ್ ಒವ್ವೇ ಕಪ್ಪು ಚುಕ್ಕೆ ಬಾರಂದಿಲೆಕ್ಕ ಮಲ್ತಿನ ಸೇವೆನ್ ಗೌರವಿಸುನ ಕ್ರಮ ಉಂದು ಅತ್ತ್. ಪ್ರಾಮಾಣಿಕ ರಾಜಕಾರಣಗ್ ಇನಿ ಬೆಲೆ ಇಜ್ಜಂದಿಲೆಕ್ಕ ಅತ್ಂಡ್. ಎನ್ನ ಪ್ರಾಮಾಣಿಕತೆಯೇ ಎಂಕ್ ಮುಳ್ಳು ಆಂಡ್. ಲಾಭ ಮಲ್ಪುನೇ ಎನ್ನ ಗುಣ ಆದಿಜ್ಜಂಡ್. ಅವ್ವೇ ಎಂಕ್ ಹಿನ್ನಡೆ ಆಂಡ್ ಪಂದ್ ಪಂಡಿನ ಅಂಗಾರೆರ್, ಯಾನ್ ನನ ರಾಜಕಾರಣಡ್ ಇಜ್ಜಿ. ಚುನಾವಣಾ ಪ್ರಚಾರಡ್ಲಾ ಇಜ್ಜಿ. ಪೊಸ ಅಭ್ಯರ್ಥಿ ಬೊಕ್ಕ ಅಕುಲು ಗೆಂದುನೆನೇ ಪಕ್ಷನೇ ತೂವು ಪಂದ್ ಪಂಡೆರ್.

ಮೆಕ್ಯಾನಿಕ್ ಗ್ 328 ಕೋಟಿ ಲಾಟರಿ

ಅಮೆರಿಕದ ಡುಬುಕ್ ದ ಅರ್ಲ್ ಲ್ಯಾಪಿ ಪನ್ಪುನ ಮೆಕ್ಯಾನಿಕ್ ಎ.11 ಕ್ಕ್ ಐಯೋವಾ ಲಾಟರಿ ಟಿಕೆಟ್ ದೆತೊಂದೆರ್.

ಮೇರ್ ದೆತೊನ್ನ ಈ ಟಿಕೆಟ್ ಗ್ 40 ಮಿಲಿಯನ್ ಡಾಲರ್ (328 ಕೋಟಿ ರೂ.) ಇನಾಮು ಬೈದ್ಂಡ್. 40 ಮಿಲಿಯನ್ ಡಾಲರ್ ಲೆನ್ 29 ವರ್ಷ ಮುಟ್ಟ ಕಂತುಡು ಕೊರಿಯೆರೆ ಆಪುಂಡು. ಆಂಡ ಒಂಜೇ ಸರ್ತಿ ಇನಾಮುಗ್ ಬೇಡಿಕೆ ದೀಯಿರ್ನೆದಾವೆರ 21.28 ಮಿಲಿಯನ್ ಡಾಲರ್ (174 ಕೋಟಿ ರೂ. ಮಾತ್ರ ತಿಕ್ ದ್ಂಡ್.

ತೋಡಾರು ನವಚೇತನ ಸೇವಾ ಬಳಗ (ರಿ.) ದ ವತಿರ್ದ್ ಬಡಪತ್ತ್ ಕುಟುಂಬಗ್ 10ಸಾರ ರೂ. ಪನವುದ ಸಕಾಯ

ತೋಡಾರು ನವಚೇತನ ಸೇವಾ ಬಳಗ (ರಿ.) ದ ವತಿರ್ದ್ 75ನೇ ಯೋಜನೆದ ಅಂಗವಾದ್ ಒಂಜಿ ಬಡಪತ್ತ್ ಕುಟುಂಬಗ್ 10 ಸಾರ ರೂ. ಪನವುದ ಸಕಾಯನ್ ಮಲ್ತೆರ್.

ಕುಪ್ಪೆಪದವು ಕುಲವೂರು ಗ್ರಾಮದ ಅಟ್ಟೆ ಪದವು ನಿವಾಸಿ ಆಯಿನ ನಮಿತಾ ಸತೀಶ್ ಪೂಜಾರಿ ದಂಪತಿಲೆನ ಎಲ್ಯ ಮಗಲಾಯಿನ ನವ್ಯ ಮೇರ್ ಎಲುತ್ತ ಕ್ಯಾನ್ಸರ್ ರ್ದ್ ನರಲೊಂದು ಉಲ್ಲೆರ್.

ದೇರಳಕಟ್ಟೆದ ಯೆನಪೂಯ ಆಸ್ಪತ್ರೆಡ್ ಚಿಕಿತ್ಸೆ ಪಡೆವೊಂದು ಇಪ್ಪುನ ಈ ಬಾಲೆದ ಚಿಕಿತ್ಸೆದ ಕರ್ಚಿಗ್ ತೋಡಾರು ನವಚೇತನಾ ಸೇವಾ ಕೂಟದ ವತಿರ್ದ್ 10 ಸಾರ ರೂ. ನ್ ಬಾಲೆದ ಇಲ್ಲಗ್ ಪೋದು ಬಾಲೆದ ಪೊಪ್ಪನ ಕೈಟ್ಟ್ ಕೊರಿಯೆರ್. ಈ ಪೊರ್ತುಡು ಕೂಟದ ಸದಸ್ಯೆರ್ ಇತ್ತೆರ್.

ಬಿಜೆಪಿದ ಸುರುತ್ತ ಪಟ್ಟಿಡ್ 8 ಪೊಂಜೋವ್ ನಕ್ಲೆಗ್ ಟಿಕೆಟ್

ಬೆಂಗ್ಲೂರ್: ಕರ್ನಾಟಕ ವಿಧಾನಸಭಾ ವೋಟುಗು ಬಿಜೆಪಿ ಅಂಗಾರೆ ರಾತ್ರೆ (ಏ.11) ಸುರುತ್ತ ಅಭ್ಯರ್ಥಿಲೆನ ಪಟ್ಟಿ ಪ್ರಕಟ ಮಲ್ದ್ಂಡ್. ಒಟ್ಟು 189 ಅಭ್ಯರ್ಥಿಲೆನೆಟ್ಟ್ 8 ಪೊಂಜೋವ್ ನಕ್ಲೆಗ್ ಟಿಕೆಟ್‌ ಘೋಷಣೆ ಮಲ್ದ್ಂಡ್.

ಘೋಷಣೆ ಆಯಿನ ಅಭ್ಯರ್ಥಿಲೆನ ಪಟ್ಟಿಡ್ ಮೂಜಿ ಹಾಲಿ ಶಾಸಕಿಯೆರ್ ಬಿಜೆಪಿ ಟಿಕೆಟ್‌ ಪಡೆಪುನೆಟ್ಟ್ ಯಶಸ್ವಿ ಆತೆರ್. ಶಶಿಕಲಾ ಜೊಲ್ಲೆ, ಪೂರ್ಣಿಮಾ ಶ್ರೀನಿವಾಸ್‌ ಬೊಕ್ಕ ರೂಪಾಲಿ ಸಂತೋಷ್‌ ನಾಯ್ಕ್‌ ಹಾಲಿ ಶಾಸಕೆರ್. ಈ ಸರ್ತಿ ವೋಟುಡು 52 ಪೊಸ ಮೋನೆಗ್ ಬಿಜೆಪಿ ಟಿಕೆಟ್‌ ಘೋಷಣೆ ಮಲ್ದ್ಂಡ್.

ಎರೆಗ್ ಒಲ್ಪ ಬಿಜೆಪಿ ಟಿಕೆಟ್?

1. ನಿಪ್ಪಾಣಿ- ಶಶಿಕಲಾ ಜೊಲ್ಲೆ
2.ಹಿರಿಯೂರು- ಪೂರ್ಣಿಮಾ ಶ್ರೀನಿವಾಸ್
3.ಸವದತ್ತಿ- ರತ್ನಾ ವಿಶ್ವನಾಥ್‌ ಮಾಮನಿ
4.ಕಾರವಾರ- ರೂಪಾಲಿ ನಾಯ್ಕ್
5.ಸಂಡೂರು- ಶಿಲ್ಪಾ ರಾಘವೇಂದ್ರ
6.ನಾಗಮಂಗಲ- ಸುಧಾ ಶಿವರಾಮೇಗೌಡ
7.ಪುತ್ತೂರ್- ಆಶಾ ತಿಮ್ಮಪ್ಪ ಗೌಡ
8.ಸುಳ್ಯ- ಭಾಗೀರಥಿ ಮುರುಳ್ಯ

ವಿಶ್ವಕರ್ಮ ಕಮ್ಮಾರ ಗುಡಿ ಕೈಗಾರಿಕಾ ಸಂಘದ ಜಿಲ್ಲಾ ಸಮಿತಿ ರಚನಾ ಸಭೆ, ಉದಿಪನ ಲೇಸ್

ವಿಶ್ವಕರ್ಮ ಕಮ್ಮಾರ ಗುಡಿ ಕೈಗಾರಿಕಾ ಸಂಘದ ಜಿಲ್ಲಾ ಸಮಿತಿ ರಚನಾ ಸಭೆ ಬೊಕ್ಕ ಉದಿಪನ ಲೇಸ್ ಸುಳ್ಯ ಶ್ರೀ ರಾಮ ಭಜನಾ ಮಂದಿರದ ಸಭಾಭವನಡ್ ಕೋಡೆ (ಎ.9) ಕ್ಕ್ ನಡತ್ಂಡ್.

ಈ ಲೇಸ್ ಮೋಹನ ಆಚಾರ್ಯ ಕೆದಿಕ್ಕಾನ ಮೆರೆನ ಪ್ರಾರ್ತನೆದೊಟ್ಟಿಗೆ ಸುರು ಆಂಡ್. ಸಂಘದ ಪೊಸ ಸಮಿತಿನ್ ಹರೀಶ್ ಬೂಡುಪನ್ನೆ, ವಕೀಲೆರ್ ತುಡರ್ ಅರ್ಲಾದ್ ಉದಿಪನ ಮಲ್ತೆರ್.

ಈ ಪೊರ್ತುಡು ಚಾವಡಿಡ್ ಜಿಲ್ಲಾ ಅಧ್ಯಕ್ಷೆರ್ ಸತೀಶ್ ಆಚಾರ್ಯ ಚೊಕ್ಕಾಡಿ, ತಾಲೂಕ್ ಅಧ್ಯಕ್ಷೆರ್ ವಾಸುದೇವ ಆಚಾರ್ಯ ಮರ್ಕಂಜ, ಕಾನೂನು ಸಲಹೆಗಾರೆರ್ ಹರೀಶ್ ಬೂಡುಪನ್ನೆ, ಸಂಘದ ತಾಲೂಕ್ ಕಾರ್ಯದರ್ಶಿ ಜನಾರ್ದನ ಆಚಾರ್ಯ ಪಂಜ, ಕರ್ನಾಟಕ ರಾಜ್ಯ ರೈತಸಂಘ ಹಸಿರು ಸೇನೆ ಸುಳ್ಯ ತಾಲೂಕ್ ಅಧ್ಯಕ್ಷೆರ್ ಸತ್ಯ ಶಾಂತಿ ತ್ಯಾಗ ಮೂರ್ತಿ ಕುಕ್ಕಂದೂರು ಇತ್ತೆರ್.

ಕಾನೂನು ಸಲಹೆ ಕೊರ್ನ ಹರೀಶ್ ಬೂಡುಪನ್ನೆ ಮೇರ್ ಸಂಘದ ಸದಸ್ಯೆರೆನ ಕೆಲವು ಪ್ರಶ್ನೆಲೆಗ್ ಕಾನೂನು ರೀತಿದ ತಿಳುವಳಿಕೆ ಪೊಲಬುನ್ ಕೊರಿಯೆರ್. ಬೊಕ್ಕ ಜಿಲ್ಲಾ ಸಮಿತಿಡ್ ಅಧ್ಯಕ್ಷೆರಾದ್ ಸತೀಶ್ ಆಚಾರ್ಯ ಚೊಕ್ಕಾಡಿ, ಉಪಾಧ್ಯಕ್ಷೆರಾದ್ ರಮೇಶ್ ಆಚಾರ್ಯ ಕಡೆಶಿವಾಲಯ, ಕೇಶವ ಆಚಾರ್ಯ ಕಾವಲು ಕಟ್ಟೆ, ಸಂಚಾಲಕೆರಾದ್ ರಜನೀಶ್ ಆಚಾರ್ಯ ಬಂಟ್ವಾಳ, ಪ್ರಧಾನ ಕಾರ್ಯದರ್ಶಿಯಾದ್ ಚಂದ್ರಶೇಖರ ಆಚಾರ್ಯ ತೊಡಿಕಾನ, ಜತೆ ಕಾರ್ಯದರ್ಶಿಯಾದ್ ಜನಾರ್ದನ ಆಚಾರ್ಯ ಪಂಜ, ಕೋಶಾಧಿಕಾರಿಯಾದ್ ರೋಹಿತ್ ಆಚಾರ್ಯ ಚೀಮುಲ್ಲು, ಸಂಘಟನಾ ಕಾರ್ಯದರ್ಶಿಯಾದ್ ಭವಾನಿಶಂಕರ ಆಚಾರ್ಯ ಅಡ್ಡನಪಾರೆ, ಸದಸ್ಯೆರಾದ್ ರವಿ ಆಚಾರ್ಯ ಸಿದ್ಧಕಟ್ಟೆ, ಸುಂದರ ಆಚಾರ್ಯ ಬೊಲ್ತೇರ್, ಪ್ರಸನ್ನ ಆಚಾರ್ಯ ಪುತ್ತೂರ್, ಜಗನ್ನಾಥ ಆಚಾರ್ಯ ಪುತ್ತೂರ್, ಜಗದೀಶ ಆಚಾರ್ಯ ಕಡಬ, ಹರೀಶ್ ಆಚಾರ್ಯ ಬೆದ್ರ, ಸೀತಾರಾಮ ಆಚಾರ್ಯ ಮುಡಿಪು, ಉದಯ ಆಚಾರ್ಯ ಅರೆಕಲ್ಲು, ಆಯ್ಕೆ ಆಯೆರ್.

ಲೇಸ್ ದ ರೂಪುರೇಷೆನ್ ಕರ್ನಾಟಕ ರಾಜ್ಯ ರೈತಸಂಘ ಹಸಿರು ಸೇನೆ ಸುಳ್ಯ ತಾಲೂಕ್ ಅಧ್ಯಕ್ಷೆರ್ ಸತ್ಯ ಶಾಂತಿ ತ್ಯಾಗ ಮೂರ್ತಿ ಕುಕ್ಕಂದೂರು ಮಲ್ತೆರ್. ಕಮಲಾಕ್ಷ ಆಚಾರ್ಯ ಗೂನಡ್ಕ ಲೇಸ್ ದ ಸುಧಾರಿಕೆ ಮಲ್ತೆರ್. ಪ್ರಧಾನ ಕಾರ್ಯದರ್ಶಿ ಚಂದ್ರಶೇಖರ ಆಚಾರ್ಯ ತೊಡಿಕಾನ ಸೊಲ್ಮೆ ಸಂದಾಯೆರ್. ಈ ಲೇಸ್ ಡ್ ದಕ್ಷಿಣ ಕನ್ನಡ ಜಿಲ್ಲೆ ಬೊಕ್ಕ ಮಡಿಕೇರಿ ತಾಲೂಕ್ ದ ವಿಶ್ವಕರ್ಮ ಸಮಾಜದ ಕಮ್ಮಾರ ಬೇಲೆ ಮಲ್ತೊಂದು ಇಪ್ಪುನ ಸದಸ್ಯೆರ್ ಹಾಜರ್ ಇತ್ತ್ ದ್, ಸಲಹೆ ಸೂಚನೆಲೆನ್ ಕೊರ್ದು, ಪೊಲಬು ಪಡೆಯೆರ್.