Tulu News

Identical twins get the same number of marks in their second puc exams!! ಪಿಯುಸಿಡ್ ಒಂಜೇ ಲೆಕ ಮಾರ್ಕ್ ಪಡೆಯಿನ ಅಮರ್ ಜೋಕುಲು!

ಬೊಲ್ತೇರ್ ತಾಲೂಕ್ ದ ನೆರಿಯ ಗ್ರಾಮದ ಪುಣ್ಕೆದಡಿತ್ತ ಅಮರ್ ಪೊಣ್ಣು ಜೋಕುಲು ಪಿಯುಸಿ ಪರೀಕ್ಷೆಡ್ ಒಂಜೇ ಲೆಕ ಮಾರ್ಕ್ ಪಡೆದ್ ಇಸೇಸ ಸಾಧನೆ ಮಲ್ದೆರ್.

ಉಮೇಶ್ ಗೌಡ ಪಿ.ಹೆಚ್ ಬೊಕ್ಕ ಗೀತಾ ದಂಪತಿಲೆನ ಅಮರ್ ಜೋಕುಲಾಯಿನ ಸ್ಪಂದನಾ ಬೊಕ್ಕ ಸ್ಪರ್ಷಾ ಸೆಕೆಂಡ್ ಪಿಯುಸಿ ಪರೀಕ್ಷೆಡ್ (ವಾಣಿಜ್ಯ ವಿಭಾಗಡ್ ) ರಡ್ಡ್ ಜನಲ 600 ಟ್ಟ್ 594 ಸಮಾನ (ಶೇ. 99)ಮಾರ್ಕ್ ಪಡೆತೆರ್. ಮೊಕುಲು ಉಜಿರೆ ಎಸ್ ಡಿಎಂ ಕಾಲೇಜ್ ದ ಕಲ್ಪಾರ್ಥಿಲು.

ಜೋಕುಲೆನ ಈ ಸಾಧನೆಗ್ ಪೋಷಕೆರ್ ಕುಸಿ ಆತೆರ್. ಕಾಲೇಜ್ ಆಡಳಿತ ಮಂಡಳಿ, ಪ್ರಾಧ್ಯಾಪಕೆರ್ ಮೆಚ್ಚಿದೆರ್.

Identical twins get the same number of marks in their second puc exams !!

Twins Spandana and Sparsha from Neriya village in Bheltangady taluk from the commerce section got 594/600 in their second puc exams. Both were students of SDM College Ujjire .

April 25th -29th: Shri Ambika Annapoorna eshwari temple, Sunkadakatte- Annual Jatra celebration ಎ.25-29: ಸುಂಕದಕಟ್ಟೆ ಶ್ರೀ ಅಂಬಿಕಾ ಅನ್ನಪೂರ್ಣೇಶ್ವರೀ ದೇವಲ್ಯಡ್ ವಾರ್ಷಿಕ ಜಾತ್ರೆ ಉಚ್ಚಯ

ಬಜಪೆ: ಸುಂಕದಕಟ್ಟೆ ಶ್ರೀ ಅಂಬಿಕಾ ಅನ್ನಪೂರ್ಣೇಶ್ವರೀ ದೇವಲ್ಯಡ್ ವಾರ್ಷಿಕ ಜಾತ್ರೆ ಉಚ್ಚಯ ಎ.25-29 ಮುಟ್ಟ ನಡಪರೆ ಉಂಡು.

ಈ ಲೇಸ್ ಶ್ರೀ ನಿರಂಜನ ಸ್ವಾಮೀಜಿನ ಆಶೀರ್ವಾದದೊಟ್ಟಿಗೆ, ಕುಡುಪು ನರಸಿಂಹ ತಂತ್ರಿಲೆನ ಮುತಾಲಿಕೆಡ್ ಉಚ್ಚಯ ನಡಪರೆ ಉಂಡು.

ಎ.25 ಅಂಗಾರೆ ಬೊಲ್ಪುಗು ತೋರಣ ಮೂರ್ತ, ಉಗ್ರಾಣ ಮೂರ್ತ, ಶ್ರೀ ಅಂಬಿಕಾ ಅನ್ನಪೂರ್ಣೇಶ್ವರೀ ದೇವಿಗ್ ಬೊಕ್ಕ ಸಪರಿವಾರ ದೈವ ದೇವೆರೆಗ್ 49 ಕಲಶಾಭಿಷೇಕ, ಮಧ್ಯಾಹ್ನ ಕೊಡಿ ಏರಿಯೆರೆ, ಮಹಾಪೂಜೆ, ರಾತ್ರೆ ಭಜನೆ, ಬಲಿ ಉಚ್ಚಯ, ಪಲ್ಲಕ್ಕಿ ಉಚ್ಚಯ, ಬೊಕ್ಕ ಸುಂಕದಕಟ್ಟೆ ಶ್ರೀ ಅಂಬಿಕಾ ಅನ್ನಪೂರ್ಣೇಶ್ವರೀ ದಶಾವತಾರ ಯಕ್ಷಗಾನ ಮಂಡಳಿ ಮೊಕ್ಲೆರ್ದ್ “ಅಪ್ಪೆ ಮಂತ್ರದೇವತೆ” ಆಟ ನಡಪರೆ ಉಂಡು. ‌

ಎ.26 ಬುಧಾರ ಬೊಲ್ಪುಗು ಭಜನೆ, ಮಧ್ಯಾಹ್ನ ಮಹಾಪೂಜೆ ಬಯ್ಯಗ್ ಭಜನೆ, ಬಲಿ ಉಚ್ಚಯ, ಪಡುಪೆರಾರ ಸವಾರಿ, ರಾತ್ರೆ ಶ್ರೀ ನಿರಂಜನ ಸ್ವಾಮಿ ಪ್ರೌಢಶಾಲೆದ ಹಳೆವಿದ್ಯಾರ್ಥಿಲೆನ ಯಕ್ಷ ನಿರಂಜನ ಕೂಟದಕ್ಲೆರ್ದ್ ಶ್ರೀ ಕೃಷ್ಣ ಲೀಲಾಮೃತ ಆಟ ನಡಪರೆ ಉಂಡು.

ಎ.27 ಗುರುವಾರ ಬೊಲ್ಪುಗು ಭಜನೆ, ಮಧ್ಯಾಹ್ನ ಮಹಾಪೂಜೆ, ಬಯ್ಯಗ್ ಭಜನೆ, ಉಚ್ಚಯ, ಬಜಿಪೆ ಸವಾರಿ, ರಾತ್ರೆ ವಿಧಾತ್ರೀ ಕಲಾವಿದೆರ್ ಕೈಕಂಬ ಕುಡ್ಲ (ರಿ.) ಅಭಿನಯದ ನಾಟಕ ಛೇ….! ನಡಪರೆ ಉಂಡು.

ಎ.28 ಸುಕ್ರಾರ ಬೊಲ್ಪುಗು ಭಜನೆ, ಮಧ್ಯಾಹ್ನ ಮಹಾಪೂಜೆ, ತೇರ್ ಒಯಿಪೆರೆ ಉಂಡು. ಬಯ್ಯಗ್ ಭಜನೆ ತೇರ್ ಉಚ್ಚಯ, ಭೂತಬಲಿ, ಶಯನಪೂಜೆ ನಡಪರೆ ಉಂಡು.

ಎ.29 ಸನಿಯಾರ ಬೊಲ್ಪುಗು ಕವಾಟ ಉದಿಪನ, ಬೊಂಡದ ಅಭಿಷೇಕ, ಚಂಡಿಕಾಯಾಗ, ಮಧ್ಯಾಹ್ನ ಮಹಾಪೂಜೆ, ಬಯ್ಯಗ್ ಎಸ್ ಎನ್ ಎಸ್ ಯೂತ್ ಕ್ಲಬ್ ಸುಂಕದಕಟ್ಟೆ ಮೊಕ್ಲೆನ ಸಂಗೀತ ರಸಸಂಜೆ, ರಾತ್ರೆ ಬಲಿ ಉಚ್ಚಯ, ಪಲ್ಲಕ್ಕಿ ಉಚ್ಚಯ, ಓಕುಳಿ, ಅವಭೃತ ಉಚ್ಚಯ, ಕಲ್ಕುಡ ದೈವ ಬೊಕ್ಕ ಅಣ್ಣಪ್ಪ ಪಂಜುರ್ಲಿ ದೈವೊಲೆಗ್ ನೇಮ ಆದ್ ಕೊಡಿ ಜಾವರೆ ಉಂಡು.

ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್, ಗಂಧ ಪ್ರಸಾದ ದೆತೊಂದು ಶ್ರೀ ಅಂಬಿಕಾ ಅನ್ನಪೂರ್ಣೇಶ್ವರೀ ಅಮ್ಮನ ಕೃಪೆಗ್ ಪಾತ್ರರಾವೊಡು ಪಂದ್ ಶ್ರೀ ಕ್ಷೇತ್ರ ಸುಂಕದಕಟ್ಟೆದ ಆಡಳಿತ ಮೊಕ್ತೇಸರೆರ್ ನಾರಾಯಣ ಎನ್ ಪೂಜಾರಿ, ಸುಂಕದಕಟ್ಟೆ ಶ್ರೀ ಅಂಬಿಕಾ ಅನ್ನಪೂರ್ಣೇಶ್ವರೀ ಸೇವಾ ಸಮಿತಿದ ಅಧ್ಯಕ್ಷೆರ್ ಬೊಕ್ಕ ಸರ್ವಸದಸ್ಯೆರ್, ವ್ಯವಸ್ಥಾಪಕೆರ್ ಭಾಸ್ಕರ ಕೋಟ್ಯಾನ್ ಲೆಪ್ಪೋಲೆಡ್ ತೆರಿಪಾದೆರ್.

Brahmavara- Four persons who go fishing drown in the river ಬ್ರಹ್ಮಾವರ : ಮೀನ್ ಪತ್ತರೆ ಪೋಯಿನ ನಾಲ್ ಜನ ನೀರ್ ಪಾಲ್!

ಬ್ರಹ್ಮಾವರ: ತುದೆಟ್ಟ್ ಮೀನ್ ಪತ್ತರೆ ಪೋಯಿನ ನಾಲ್ ಜನ ನೀರ್ ಪಾಲಾಯಿನ ಘಟನೆ ಒಡಿಪು ಜಿಲ್ಲೆದ ಬ್ರಹ್ಮಾವರ ತಾಲೂಕ್ ದ ಕುಕ್ಕುಡೆ ಕಿಣಿಯೆರೆ ಕುದ್ರುದ ಕೈತಲ್ ದ ತುದೆಟ್ಟ್ ನಡತ್ಂಡ್.

ಇಬಾಜ್, ಫಜಾನ್, ಸೂಫಾನ್, ಫರಾನ್​ ತೀರ್ ಪೋಯಿನಕುಲು. ಮೊಕುಲು ಒಡಿಪು ಬೊಕ್ಕ ಚಿಕ್ಕಮಗಳೂರು ಜಿಲ್ಲೆ ಶೃಂಗೇರಿದ ಮೂಲದಕುಲು ಪಂದ್ ತೆರಿದ್ ಬೈದ್ಂಡ್. ರಂಜಾನ್ ಪರ್ಬಗ್ ಬ್ರಹ್ಮಾವರದ ಸಂಬಂಧಿಕೆರೆನ ಇಲ್ಲಗ್ ಬತ್ತಿತ್ತೆರ್.

ವೋಡಡ್ ಮೀನ್ ಪತ್ತೆರೆ ಏಳ್ ಜನ ಪೋದಿತ್ತೆರ್. ಆಯಿಟ್ಟ್ ನಾಲ್ ಜನ ತುದೆಟ್ಟ್ ನೀರ್ ಎಚ್ಚಾದ್ ಕೊಚ್ಚಿದ್ ಪೋಯಿನ ಅಂದಾಜಿ ಉಂಡು ಪಂದ್ ವರದಿ ಆತ್ಂಡ್. ಈ ಘಟನೆದ ಬಗೆಟ್ ಅಗ್ನಿಶಾಮಕ ದಳ, ಪೊಲೀಸೆರ್, ಕೈತಲ್ ದಕುಲು ಕಾರ್ಯಚರಣೆ ಮಲ್ತೊಂದು ಉಲ್ಲೆರ್. ‌

Special rituals at Shri Kshetra-PadyaraGuttu Yedapadavu today ಇನಿ ಶ್ರೀ ಕ್ಷೇತ್ರ ಪಾಡ್ಯಾರ ಗುತ್ತುಡ್ ಪ್ರಶ್ನಾ ಚಿಂತನೆ

ಎಡಪದವುದ ಶ್ರೀ ಕ್ಷೇತ್ರ ಪಾಡ್ಯಾರ ಗುತ್ತುಡ್ ಶ್ರೀ ದೈವ ಕೊಡಮಣಿತ್ತಾಯ ಬೊಕ್ಕ ಬ್ರಹ್ಮಬೈದರ್ಕಳ ಧರ್ಮ ಚಾವಡಿದ ಸಮಗ್ರ ಜೀರ್ಣೋದ್ಧಾರದ ಬಗೆಟ್ (ಇನಿ) ಎ.24ಕ್ಕ್ ಸೋಮಾರ ಬೊಲ್ಪುಗು 8 ಗಂಟೆರ್ದ್ ದೈವಜ್ಞೆರೆರ್ದ್ ಪ್ರಶ್ನಾ ಚಿಂತನೆ ನಡಪರೆ ಉಂಡು.

ಈ ಲೇಸ್ ಗ್ ಕುಟುಂಬಸ್ಥೆರ್ ಬೊಕ್ಕ ಊರುದ ಪರವೂರುದ ಭಕ್ತಾದಿಲು ಉಪಸ್ಥಿತಿಡ್ ಇತ್ ದ್, ನಿಕುಲೆನ ಸಲಹೆ ಸೂಚನೆನ್ ಕೊರ್ದು, ಶ್ರೀ ಧರ್ಮ ದೈವೊಲೆನ ಸಂಕಲ್ಪದ ಕಾರ್ಯಲೆಡ್ ಕೈ ಜೋಡಿಸಾವೊಡು ಪಂದ್ ಲೆಪ್ಪೋಲೆಡ್ ಬಿನ್ನಾಪು ಮಲ್ದೆರ್.

SSLC results to be announced in the second week of May ಮೇ 2ನೇ ವಾರಡ್ SSLC ರಿಸಲ್ಟ್

ಬೆಂಗ್ಲೂರ್: ಮೇ 2ನೇ ವಾರಡ್ SSLC ರಿಸಲ್ಟ್ ಪ್ರಕಟ ಆಪಿನ ಅಂದಾಜಿ ಉಂಡು.

ಏಪ್ರಿಲ್ 24 ರ್ದ್ ಎಸ್‌ಎಸ್ಎಲ್‌ಸಿ ಪರೀಕ್ಷೆದ ಉತ್ತರ ಪತ್ರಿಕೆದ ಮೌಲ್ಯಮಾಪನ ಕಾರ್ಯ ಸುರು ಆಪುಂಡು. ನೆಕ್ಕಾದ್ 73 ಸಾರ ಶಿಕ್ಷಕೆರೆನ ನಿಯೋಜನೆ ಮಲ್ದ್ಂಡ್. ಮೌಲ್ಯಮಾಪನ ಕಾರ್ಯಗ್ ಬೊಡಾಯಿನ ಮತ ವ್ಯವಸ್ಥೆಲ ನಡತೊಂದು ಉಂಡು.

ರಾಜ್ಯ ಇಡೀ 236 ಕೇಂದ್ರಲೆಡ್ 8.42 ಲಕ್ಷರ್ದ್ ಎಚ್ಚ ಕಲ್ಪಾರ್ಥಿಲೆನ 50 ಲಕ್ಷರ್ದ್ ಎಚ್ಚ ಉತ್ತರ ಪತ್ರಿಕೆಲೆನ ಮೌಲ್ಯಮಾಪನ ನಡಪರೆ ಉಂಡು. ಬೊಕ್ಕ ಮೇ ರಡ್ಡನೇ ವಾರಡ್ ರಿಸಲ್ಟ್ ಪ್ರಕಟ ಆಪುಂಡು.

ಅಂಚೆನೆ ವೋಟುದ ತಾರೀಕ್ ಬೊಕ್ಕ ಲೆಕ್ಕ ದಿನನ್ ತೂದು ಎಸ್ಎಸ್​ಎಲ್​ಸಿ ಪರೀಕ್ಷೆದ ರಿಸಲ್ಟ್ ನ್ ಪ್ರಕಟ ಮಲ್ಪರೆ ಆಪುಂಡು ಪಂದ್ ಮಂಡಳಿ ಅಧ್ಯಕ್ಷೆರ್ ರಾಮಚಂದ್ರನ್ ತೆರಿಪಾದೆರ್.

April 24-27: Annual Jatra celebration at Mahalingeshwara temple, Suragiri ಎ.24-27: ಸುರಗಿರಿ ಮಹಾಲಿಂಗೇಶ್ವರ ದೇವಲ್ಯಡ್ ವರ್ಷಾಧಿದ ಜಾತ್ರೆ

ಸುರಗಿರಿ ಶ್ರೀ ಮಹಾಲಿಂಗೇಶ್ವರ ದೇವಲ್ಯಡ್ ವರ್ಷಾಧಿದ ಜಾತ್ರೆ ಎ.24-27 ಮುಟ್ಟ ನಡಪರೆ ಉಂಡು.

ಎ.24 ಸೋಮಾರ ಬಯ್ಯಗ್ ಅತ್ತೂರು ಪಡುಬಾಳಿಕೆ ಲಲಿತಾ ರಾಮಣ್ಣ ಶೆಟ್ಟಿ ಹೋಟೆಲ್ ರಾಜ್ ಮಹಲ್ ಪೂನಾ ಮೊಕ್ಲೆರ್ದ್ ಕಟೀಲ್ ಶ್ರೀ ದುರ್ಗಾಪರಮೇಶ್ವರೀ ಪ್ರಸಾದಿತ ದಶಾವತಾರ ಯಕ್ಷಗಾನ ಮಂಡಳಿದ ಆಟ ನಡಪರೆ ಉಂಡು.

ಎ.25 ಅಂಗಾರೆ ಬಯ್ಯಗ್ ಶೀಮತಿ ಬೊಕ್ಕ ಶಿವರಾಮ ಭಂಡಾರಿ ಕೆಮ್ರಾಲ್ ಗುತ್ತು ಮೊಕ್ಲೆನ ವತಿರ್ದ್, ಕಟೀಲ್ ಶ್ರೀ ದುರ್ಗಾಪರಮೇಶ್ವರೀ ಪ್ರಸಾದಿತ ದಶಾವತಾರ ಯಕ್ಷಗಾನ ಮಂಡಳಿ ಮೊಕ್ಲೆರ್ದ್ ಶ್ರೀ ಕಟೀಲ್ ಕ್ಷೇತ್ರ ಮಹಾತ್ಮೆ ನಡಪರೆ ಉಂಡು.

ಎ.26 ಬುಧಾರ ರಾತ್ರೆ ಸುರಗಿರಿ ಮಹಿಳಾ ಮಂಡಳಿದ ವಾರ್ಷಿಕ ಉಚ್ಚಯದ ಲೆಕ್ಕೊಡು ಕೈತಲ್ ದ ಪ್ರತಿಭೆಲೆರ್ದ್ ನೃತ್ಯ ವೈವಿಧ್ಯಮಯ ಲೇಸ್, ಕಿನ್ನಿಗೋಳಿ ವಿಜಯ ಕಲಾವಿದೆರೆರ್ದ್ ಹರೀಶ್ ಪಡ್ಡೆದ್ರ ಮೆರೆನ ತುಳು ಸಾಂಸಾರಿಕ ನಾಟಕ ತೊಟ್ಟಿಲ್ ನಡಪರೆ ಉಂಡು.

ಎ.27 ಗುರುವಾರ ರಾತ್ರೆ ಕೈತಲ್ ದ ಪ್ರತಿಭೆಲೆರ್ದ್ ನೃತ್ಯ ವೈವಿಧ್ಯಮಯ ಲೇಸ್, ಸುರಗಿರಿ ಯುವಕ ಮಂಡಲ (ರಿ.) ನೆತ್ತ 53 ನೇ ವಾರ್ಷಿಕ ಉಚ್ಚಯದ ಲೆಕ್ಕೊಡು ಕಾಪು ರಂಗತರಂಗ ಕಲಾವಿದೆರೆರ್ದ್ ಬುಡೆದಿ ತುಳು ನಾಟಕ ನಡಪರೆ ಉಂಡು ಪಂದ್ ಸುರಗಿರಿ ಯುವಕ ಮಂಡಲ (ರಿ.) ದಕುಲು ಲೆಪ್ಪೋಲೆಡ್ ತೆರಿಪಾದೆರ್.

ಮೇ2-5: ಮೀಯಪದವು ಬ್ರಹ್ಮಶ್ರೀ ಮೊಗೇರ ಮಹಾಂಕಾಳಿ ದೈವೊಲ್ಯಡ್ ಪುನರ್ ಪ್ರತಿಷ್ಠಾ ಬ್ರಹ್ಮಕಲಶ ಉಚ್ಚಯ, ನೇಮ

ಮೀಯಪದವು ಬ್ರಹ್ಮಶ್ರೀ ಮೊಗೇರ ಮಹಾಂಕಾಳಿ ದೈವೊಲ್ಯಡ್ ಪುನರ್ ಪ್ರತಿಷ್ಠಾ ಬ್ರಹ್ಮಕಲಶ ಉಚ್ಚಯ ಬೊಕ್ಕ ನೇಮ ಮೇ 2-5 ಮುಟ್ಟ ನಡಪರೆ ಉಂಡು.

ಮೇ 2 ಅಂಗಾರೆ ಬಯ್ಯಗ್ ಪುದೆಕಾಣಿಕೆ ಕೊನೊಯೆರೆ, ತಂತ್ರಿಲು ಬರಿಯೆರೆ, ಸಾಮೂಹಿಕ ಪ್ರಾರ್ತನೆ, ರಕ್ಷೋಘ್ನ ಹೋಮ, ವಾಸ್ತು ಹೋಮ, ವಾಸ್ತುಪೂಜೆ, ಪ್ರಕಾರ ಬಲಿ, ನೃತ್ಯ ವೈಭವ, ರಾತ್ರೆ ಸಭಾ ಲೇಸ್ ಬೊಕ್ಕ ಗೀತ್ ಸಂಗೀತ್ ಉಪ್ಪಳ‌ ಮೊಕ್ಲೆನ, ರಂಜಿತ್ ಬಾಬಾ ಕೋಡಿಬೈಲ್ ಬೊಕ್ಕ ಕೂಟದಕ್ಲೆರ್ದ್ ಮ್ಯೂಸಿಕಲ್ ನೈಟ್ಸ್ 2023 ನಡಪರೆ ಉಂಡು. ‌

ಮೇ 3 ಬುಧಾರ ಬೊಲ್ಪುಗು ಗಣಹೋಮ, ಕಲಶಪೂಜೆ, ಪ್ರತಿಷ್ಠಾ ಪ್ರಧಾನ ಹೋಮ, ಶ್ರೀ ದೈವೊಲೆನ ಪುನರ್ ಪ್ರತಿಷ್ಠಾ ಬ್ರಹ್ಮಕಲಶ ಉಚ್ಚಯ, ಧಾರ್ಮಿಕ ಸಭಾ ಲೇಸ್, ಮಧ್ಯಾಹ್ನ ತಂಬಿಲ, ಮಹಾಪೂಜೆ, ಬಯ್ಯಗ್ ಭಂಡಾರ ಏರಿಯೆರೆ, ಶ್ರೀ ಗುಳಿಗ ದೈವೊದ ನೇಮ, ರಾತ್ರೆ ಅಭಿನಯ ಕಲಾವಿದೆರ್ ಒಡಿಪು ಮೊಕ್ಲೆರ್ದ್ ಶಾಂಭವಿ ತುಳು ನಾಟಕ, ಶ್ರೀ ಮಹಾಂಕಾಳಿ ದೈವೊದ ನೇಮ ನಡಪರೆ ಉಂಡು.

ಮೇ 4 ಗುರುವಾರ ಬೊಲ್ಪುಗು ಶ್ರೀ ಮಹಾಂಕಾಳಿ ದೇವಿಡ ತನ್ನ ಅನಿಸಿಕೆದ ಬಗೆಟ್ ಪರಕೆ ಮಲ್ತೊಂದು ಶ್ರೀ ದೇವಿನ ಗಂಧ ಪ್ರಸಾದ ದೆತೊನಿಯೆರ್. ಬೊಕ್ಕ ಧೂಪಾರಾಧನೆ, ಬಯ್ಯಗ್ ಭಂಡಾರ ಏರುಂಡು. ರಾತ್ರೆ ಶ್ರೀ ಕೊರಗತನಿಯ ದೈವೊದ ನೇಮ, ಕೈತಲ್ ದ ಪ್ರತಿಭೆಲೆರ್ದ್ ನೃತ್ಯ ವೈಭವ, ಬ್ರಹ್ಮಶ್ರೀ ಮೊಗೇರ ದೈವೊದ ನೇಮ, ಶ್ರೀ ತನ್ನಿಮಾನಿಗ ದೈವೊದ ಅಂಗಣ ಪ್ರವೇಶ ಅವೆರೆ ಉಂಡು.

ಮೇ 5 ಸುಕ್ರಾರ ಬೊಲ್ಪುಗು ಶ್ರೀ ದೈವೊಲೆಡ ಭಕ್ತಾದಿಲೆನ ಪರಕೆ ಬೊಕ್ಕ ದೈವೊದ ಗಂಧ ಪ್ರಸಾದ ದೆತೊನಿಯೆರೆ, ಶ್ರೀ ದೈವೊದ ಭಂಡಾರ ಜಪ್ಪೆರೆ ಉಂಡು.

ಈ ಲೇಸ್ ಗ್ ಮಾತೆರ್ಲಾ ಎಚ್ಚದ ಸಂಖ್ಯೆಡ್ ಬತ್ತ್ ದ್ ಶ್ರೀ ದೈವೊಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಬ್ರಹ್ಮಕಲಶ ಉಚ್ಚಯ ಸಮಿತಿದ ಅಧ್ಯಕ್ಷೆರ್ ರಘುನಾಥ ಶೆಟ್ಟಿ ಕೊಮ್ಮಂಗಳ, ಗೌರವಾಧ್ಯಕ್ಷೆರ್ ಡಾ.‌ಚಂದ್ರಶೇಖರ ಚೌಟ, ಆಡಳಿತ ಸಮಿತಿದ ಅಧ್ಯಕ್ಷೆರ್ ಸಂಜೀವ ಮೀಯಾಪದವು ಲೆಪ್ಪೋಲೆಡ್ ತೆರಿಪಾದೆರ್.

ಕುಡ್ಲ ಉತ್ತರ ಕ್ಷೇತ್ರಗ್ ನಾಮಪತ್ರ ಸಂದಾಯಿನ ಕಾಂಗ್ರೆಸ್ ಅಭ್ಯರ್ಥಿ ಇನಾಯತ್

ಕುಡ್ಲ ಉತ್ತರ ಕ್ಷೇತ್ರಗ್ ಕಾಂಗ್ರೆಸ್ ಟಿಕೆಟ್ ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಇನಾಯತ್ ಆಲಿ ಮೆರೆಗ್ ತಿಕ್ ದ್ಂಡ್. ಮೇರ್ ಗುರುವಾರ ಪಕ್ಷದ ನಾಯಕೆರ್, ಮುಖಂಡೆರ್, ಕಾರ್ಯಕರ್ತೆರ್ ಬೊಕ್ಕ ಅಭಿಮಾನಿಲೆನೊಟ್ಟಿಗೆ ಮಲ್ಲ ಜನಸಂಖ್ಯೆದ ಪಾದಯಾತ್ರೆಡ್ ಬತ್ತ್ ದ್ ಮಿನಿ ವಿಧಾನಸೌಧದ ಚುನಾವಣಾಧಿಕಾರಿ ಕಚೇರಿಡ್ ನಾಮಪತ್ರ ಸಂದಾಯೆರ್.

ನೇರ್ದ್ ದುಂಬು ಪೇಂಟೆದ ಕಾವೂರು ಜಂಕ್ಷನ್ ಡ್ ಪಕ್ಷದ ಸಾರ್ವಜನಿಕ ಸಭೆ ನಡತ್ಂಡ್. ಬೊಕ್ಕ ಪಕ್ಷದ ಅಭ್ಯರ್ಥಿ ಇನಾಯತ್ ಆಲಿ ಮೇರ್ ಸಾರ್ವಜನಿಕ ಸಭೆನ್ ಉದ್ದೇಶಿಸಾದ್ ಪಾತೆರಿಯೆರ್.

ಭಾರಿ ಸಂಖ್ಯೆಡ್ ಪಕ್ಷದ ಕಾರ್ಯಕರ್ತೆರ್ ಬೊಕ್ಕ ಅಭಿಮಾನಿಲು ಇತ್ತೆರ್. ಮಾಜಿ ಶಾಸಕೆರ್ ಮೊಯ್ದೀನ್ ಬಾವಾ ಬೊಕ್ಕ ಆಲಿ ಮೆರೆನ ನಡುಟ್ಟ್ ಟಿಕೆಟ್ ಗಾದ್ ಜಿದ್ದಾಜಿದ್ದಿ ನಡತ್ ಇತ್ಂಡ್. ಆಂಡ ಅಕೇರಿಗ್ ಟಿಕೆಟ್ ಇನಾಯತ್ ಆಲಿ ಮೆರೆಗೇ ತಿಕ್ ದ್ಂಡ್.

ಜಾತ್ಯತೀತ ಮನೋಭಾವದ ಇನಾಯತ್ ಅಲಿ ಮೇರ್ ಕಾಂಗ್ರೆಸ್ ಪಕ್ಷದ ಶಿಸ್ತ್ ದ ಸಿಪಾಯಿ. ಕಲ್ಪಾರ್ಥಿ ದಿಸೆರ್ದೆ ಕಾಂಗ್ರೆಸ್ ಪಕ್ಷಡ್ ಎಪಲ ಗುರುತಿಸಾಯಿನ ಕಾಂಗ್ರೆಸ್ ಕಲ್ಪಾರ್ಥಿ ಘಟಕ ಆಯಿನ ಎನ್ ಎಸ್ ಯುಐ ಮುಖೇನ ಸುಮಾರ್ ಕಲ್ಪಾರ್ಥಿ ಪೊರ್ಂಬಾಟಡ್ ದುಂಬು ಇತ್ತೆರ್. ಬೊಕ್ಕ ಮೇರ್ ಕೈತಲ್ ದ ಮಟ್ಟರ್ದ್ ರಾಷ್ಟ್ರಮಟ್ಟಡ್ ಕಾಂಗ್ರೆಸ್ ಪಕ್ಷಕ್ಕಾದ್ ಸೇವೆ ಮಲ್ದೆರ್.

ಮೇರ್ ಸುರುತ್ತ ಸರ್ತಿ 1997 ಟ್ಟ್ ಎನ್ ಎಸ್ ಯುಐ ಬ್ಲಾಕ್ ಅಧ್ಯಕ್ಷೆರಾದ್ ಆಯ್ಕೆ ಆಯೆರ್. ಬೊಕ್ಕ 2000ನೇ ಇಸವಿಡ್ ಎನ್ ಎಸ್ ಯುಐ ರಾಜ್ಯ ಉಪಾಧ್ಯಕ್ಷೆರಾದ್, 2003 ಟ್ಟ್ ರಾಷ್ಟ್ರೀಯ ಕಾರ್ಯದರ್ಶಿಯಾದ್, 2005 ಟ್ಟ್ ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿಯಾದ್, 2009 ಟ್ಟ್ ಕರ್ನಾಟಕ ಪ್ರದೇಶ ಯುವ ಕಾಂಗ್ರೆಸ್ ಸಮಿತಿದ ಪ್ರಧಾನ ಕಾರ್ಯದರ್ಶಿಯಾದ್, ಇತ್ತೆ ಕರ್ನಾಟಕ ಪ್ರದೇಶ ಕಾಂಗ್ರೆಸ್ ಸಮಿತಿದ ಪ್ರಧಾನ ಕಾರ್ಯದರ್ಶಿಯಾದ್ ಮಾತ್ರ ಅತ್ತಂದೆ ಎನ್ ಎಸ್ ಯುಐ ರಾಜ್ಯ ಉಸ್ತುವಾರಿಯಾದ್ ಸೇವೆ ಮಲ್ತೊಂದು ಉಲ್ಲೆರ್.

ಬೇಲೆಡ್ ಮೇರ್ ಒರಿ ಯಶಸ್ವಿ ಉದ್ಯಮಿ. ಮೇರ್ ದುಂಬುರ್ದೆ ಪ್ರತಿಫಲಾಪೇಕ್ಷೆ ಬಯಸಂದೆ ಸಮಾಜ ಸೇವೆ ಚಟುವಟಿಕೆಡ್ ಎಪಲ ಇತ್ತಿನಾರ್. ತನ್ನ ಸಾಮಾಜಿಕ ‌ಸೇವೆ ಕಾರ್ಯಲಯಗಾದ್ ನೋಂದಾಣಿದ ಐಎಎಮ್ ಫೌಂಡೇಶನ್ ಸಂಸ್ಥೆನ್ ಸ್ಥಾಪನೆ ಮಲ್ತ್ ದ್ ಈ ಸಂಸ್ಥೆದ ಮುಖೇನ ಕರಿನ ಸುಮಾರ್ ವರ್ಷೊದಿಂಚ ಬಡಪತ್ತ್ ಜನಕ್ಕ್ ಶೈಕ್ಷಣಿಕ, ಆರೋಗ್ಯ, ವಸತಿ ಬೊಕ್ಕ ಅಕ್ಲೆನ ಅಗತ್ಯಲೆಗ್ ಸ್ಪಂದಿಸಾದೆರ್. ಅತ್ತಂದೆ ಅವೆತೊ ಬಡಪತ್ತ್ ಕುಟುಂಬದ ಪೊಣ್ಣು ಜೋಕುಲೆನ ಮದಿಮೆಗ್ ಜಾತಿ-ಮತ ತೂವಂದೆ ಸಕಾಯ ಮಲ್ದೆರ್. ತನ್ನ ಸೇವೆದ ಚಟುವಟಿಕೆದ ಮುಖೇನ ಪುದರಾಯಿನ ಮೇರ್ ಈ ಸರ್ತಿ ಕುಡ್ಲ ಉತ್ತರ ವಿಧಾನಸಭೆ ಕ್ಷೇತ್ರಡ್ ವಿರೋಧ ಪಕ್ಷಲೆಗ್ ಪ್ರಬಲ ಪ್ರತಿಸ್ಪರ್ಧಿ ಅವೆರೆ ಉಲ್ಲೆರ್ ಪಂದ್ ರಾಜಕೀಯ ತಜ್ಞೆರೆನ ಅಭಿಪ್ರಾಯ ಆತ್ಂಡ್.

ಎ.24-ಮೇ 3: ಬಳ್ಳಮಂಜ ಮಹತೋಭಾರ ಶ್ರೀ ಅನಂತೇಶ್ವರ ಸ್ವಾಮಿ ದೇವಲ್ಯಡ್ ಬ್ರಹ್ಮಕಲಶ ವಾರ್ಷಿಕ ದಿನಾಚರಣೆ, ವಾರ್ಷಿಕ ಮೇಷ ಜಾತ್ರೆ ಉಚ್ಚಯ

ಬೊಲ್ತೇರ್: ಬಳ್ಳಮಂಜ ಮಹತೋಭಾರ ಶ್ರೀ ಅನಂತೇಶ್ವರ ಸ್ವಾಮಿ ದೇವಲ್ಯಡ್ ಬ್ರಹ್ಮಕಲಶ ವಾರ್ಷಿಕ ದಿನಾಚರಣೆ ಬೊಕ್ಕ ವಾರ್ಷಿಕ ಮೇಷ ಜಾತ್ರೆ ಉಚ್ಚಯ ಎ.24 ರ್ದ್ ಮೇ 3 ಮುಟ್ಟ ನಡಪರೆ ಉಂಡು.

ಎ.24 ಸೋಮಾರ ಬೊಲ್ಪುಗು ಬೊಂಡಲ ಅಭಿಷೇಕ, ಮಹಾಪೂಜೆ ರಾತ್ರೆ ಕೊಡಿ ಏರಿಯೆರೆ, ಮಹಾಪೂಜೆ, ಉಚ್ಚಯ, ವಸಂತ ಸೇವೆ ನಡಪರೆ ಉಂಡು. ಎ.25 ಅಂಗಾರೆ ಮಧ್ಯಾಹ್ನ ಮಹಾಪೂಜೆ, ರಾತ್ರೆ ಉಚ್ಚಯ ನಡಪರೆ ಉಂಡು. ಎ.26 ಬುಧಾರ ಮಧ್ಯಾಹ್ನ ಮಹಾಪೂಜೆ, ಬಯ್ಯಗ್ ಶ್ರೀ ದೇವಲ್ಯರ್ದ್ ಭಂಡಾರ ಪಿದಾಡ್ ದ್ ಪಿಲಿಚಾಮುಂಡಿ ದೈವೊದ ನೇಮ, ಮಹಾಪೂಜೆ, ಉಚ್ಚಯ ನಡಪರೆ ಉಂಡು. ಎ.27 ಗುರುವಾರ ಮಧ್ಯಾಹ್ನ ಮಹಾಪೂಜೆ, ಬಯ್ಯಗ್ ಕೊಪ್ಪರಿಗೆ ಏರಿಯೆರೆ, ಬಯ್ಯದ ಬಲಿ ಸುರು, ವಸಂತ ಸೇವೆ, ಮಹಾಪೂಜೆ ನಡಪರೆ ಉಂಡು. ಎ.28 ಸುಕ್ರಾರ ಮಧ್ಯಾಹ್ನ ಮಹಾಪೂಜೆ, ರಾತ್ರೆ ಆಯನ ಉಚ್ಚಯ ನಡಪರೆ ಉಂಡು.

ಎ.29 ಸನಿಯಾರ ಮಹಾಪೂಜೆ, ಬಯ್ಯಗ್ ಉಚ್ಚಯ, ಮೂಡುಕಟ್ಟೆ ಸವಾರಿ, ವಸಂತ ಸೇವೆ, ಮಹಾಪೂಜೆ ನಡಪರೆ ಉಂಡು. ಎ.30 ಐತಾರ ಬೊಲ್ಪುಗು ಬ್ರಹ್ಮಕಲಶ ದಿನಾಚರಣೆದ ಲೆಕ್ಕೊಡು ಗಣಯಾಗ, ಏಕದಶಾರುದ್ರಾಭಿಷೇಕ, ಪವಮಾನಹೋಮ, ಆಶ್ಲೇಷ ಬಲಿ, ಶ್ರೀ ಅನಂತೇಶ್ವರ ಸ್ವಾಮಿಗ್ ಇಸೇಸ ಕಲಶಾಭಿಷೇಕ, ಶ್ರೀ ಗಣಪತಿ ದೇವೆರೆಗ್ ಕಟಾಹ ಅಪೂಪ ನೈವೇದ್ಯ ಸಮರ್ಪಣೆ, ಮಧ್ಯಾಹ್ನ ಮಹಾಪೂಜೆ, ಬಯ್ಯಗ್ ಚಂದ್ರಮಂಡಲ ಉಚ್ಚಯ, ಮಹಾಪೂಜೆ ನಡಪರೆ ಉಂಡು.

ಮೇ 1 ಸೋಮಾರ ಬೊಲ್ಪುಗು ದರ್ಶನ ಬಲಿ, ಮಧ್ಯಾಹ್ನ ಮಹಾಪೂಜೆ, ಬಯ್ಯಗ್ ಮಲ್ಲ ತೇರ್ ಉಚ್ಚಯ, ಮಹಾಪೂಜೆ, ಶ್ರೀಧೂತ ಬಲಿ ನಡಪರೆ ಉಂಡು. ಮೇ 2 ಅಂಗಾರೆ ಬೊಲ್ಪುಗು ಕವಾಟ ಉದಿಪನ, ವಸಂತ ಸೇವೆ, ಮಧ್ಯಾಹ್ನ ಮಹಾಪೂಜೆ ಬಯ್ಯಗ್ ಅವಭೃತ, ರಾತ್ರೆ ಕೊಡಿ ಜವೆರೆ ಉಂಡು. ಮೇ 3 ಬುಧಾರ ಮಹಾಸಂಪ್ರೋಕ್ಷಣೆ, ಮಧ್ಯಾಹ್ನ ಮಹಾಪೂಜೆ, ಅನ್ನಸಂತರ್ಪಣೆ ನಡಪರೆ ಉಂಡು.

ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ಗಂಧ ಪ್ರಸಾದ ದೆತೊಂದು ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಅನುವಂಶೀಯ ಆಡಳಿತ ಮೊಕ್ತೇಸರೆರ್ ಲೆಪ್ಪೋಲೆಡ್ ತೆರಿಪಾದೆರ್.