Tulu News

ಎ.30-ಮೇ3: ಬಳ್ಳಮಂಜ ಶ್ರೀ ಸತ್ಯಚಾವಡಿ ಇಲ್ಲ್ ಮಾನ್ಯ ಕೋಟ್ಯಾನ್ ಬರಿತ್ತ ತರವಾಡ್ ಇಲ್ಲ್ ದ ಒಕ್ಕೆಲ್

ಬೊಲ್ತೇರ್: ಮಚ್ಚಿನ ಗ್ರಾಮದ ಬಳ್ಳಮಂಜ ಶ್ರೀ ಸತ್ಯಚಾವಡಿ ಇಲ್ಲ್ ಮಾನ್ಯ ಕೋಟ್ಯಾನ್ ಬರಿತ್ತ ತರವಾಡ್ ಇಲ್ಲ್ ದ ಒಕ್ಕೆಲ್, ಧರ್ಮದೈವ ಶ್ರೀ ಧೂಮಾವತೀ, ಬಂಟ ಪರಿವಾರ ದೈವೊಲೆನ ಬೊಕ್ಕ ಜಾಗೆದ ದೇವತಾ ಸಾನಿಧ್ಯಲೆನ ಪುನರ್ ಪ್ರತಿಷ್ಠಾ ಬ್ರಹ್ಮಕಲಶ ಉಚ್ಚಯ ಎ.30 ರ್ದ್ ಮೇ3 ಮುಟ್ಟ ನಡಪರೆ ಉಂಡು.

ಕೆ.ವಿ ದಾಮೋದರ ತಂತ್ರಿಲೆನ ಮಗೆ ನೀಲೇಶ್ವರ ಅತವತ್ತ್, ಕೆ.ವಿ ಪದ್ಮನಾಭ ತಂತ್ರಿಲೆನ ಮುತಾಲಿಕೆಡ್ ಇಲ್ಲ್ ಒಕ್ಕೆಲ್ ಬೊಕ್ಕ ಕುಟುಂಬದ ಧರ್ಮದೈವ ಶ್ರೀ ಧೂಮಾವತೀ, ಬಂಟ, ಕುಪ್ಪೆ ಪಂಜುರ್ಲಿ, ವರ್ಣಾರ ಪಂಜುರ್ಲಿ, ಕೊರತಿಅಮ್ಮ, ಕಲ್ಕುಡ, ಕಲ್ಲುರ್ಟಿ, ಮೂಕಾಂಬಿ ಗುಳಿಗ, ಕಲ್ಲಾಲ್ತ ಗುಳಿಗ, ಅದಿಗುರು ಕುಂಟಲ್ತಾಯನ ಮುಡಿಪು ಬೊಕ್ಕ ಜಾಗೆದ ಮಹಾಕಾಳೀ, ರಕ್ತೇಶ್ವರಿ, ಬಂಟಗುಳಿಗ, ಕೊಡಮಣಿತ್ತಾಯಿ, ಮಹಿಷಂದಾಯ, ಕ್ಷೇತ್ರಪಾಲ, ಕೊರಗಜ್ಜ, ಮಾಳದ ಕೊರವ, ಮಾಳದ ಕೊರತಿ ದೈವೊಲೆಗ್ ಪುನರ್ ಪ್ರತಿಷ್ಠಾ ಬ್ರಹ್ಮಕಲಶ ಉಚ್ಚಯ ನಡಪರೆ ಉಂಡು.

ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್, ಶ್ರೀಮುಡಿ ಗಂಧ ಪ್ರಸಾದ ದೆತೊಂದು ಶ್ರೀ ದೈವ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಆಡಳಿತ ಸಮಿತಿದ ಅಧ್ಯಕ್ಷೆರ್, ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರ್, ಬ್ರಹ್ಮಕಲಶ ಉಚ್ಚಯ ಸಮಿತಿದ ಅಧ್ಯಕ್ಷೆರ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿಯಾದ್ ವಕೀಲೆರ್ ಪದ್ಮರಾಜ್‌ ನೇಮಕ

ಕರ್ನಾಟಕ ಪ್ರದೇಶ ಕಾಂಗ್ರೆಸ್‌ ಸಮಿತಿದ ಪ್ರಧಾನ ಕಾರ್ಯದರ್ಶಿಯಾದ್ ವಕೀಲೆರ್, ಯುವ ಬಿಲ್ಲವ ಮುಖಂಡೆರ್ ಪದ್ಮರಾಜ್‌ ಮೆರೆನ್ ನೇಮಕ ಮಲ್ದ್ಂಡ್.

ಪದ್ಮರಾಜ್‌ ಮೇರ್ ಕುಡ್ಲ ದಕ್ಷಿಣ ವಿಧಾನಸಭೆ ಕ್ಷೇತ್ರದ ಕಾಂಗ್ರೆಸ್‌ ಟಿಕೆಟ್‌ ಆಕಾಂಕ್ಷಿ ಆದಿತ್ತೆರ್. ಆಂಡ ಅಕೇರಿಗ್ ಮೆರೆನ ಬದಲ್ ಗ್ ಜೆ. ಆರ್‌. ಲೋಬೋ ಮೆರೆಗ್ ಟಿಕೆಟ್‌ ತಿಕ್ಂಡ್. ಅವ್ವೇ ರೀತಿ ಬೊಲ್ತೇರ್ ದ ಕಾಂಗ್ರೆಸ್‌ ಮುಖಂಡೆರ್, ಮಾಜಿ ಸಚಿವೆರ್ ಗಂಗಾಧರ ಗೌಡ ಮೆರೆನ್ ಉಪಾಧ್ಯಕ್ಷೆರಾದ್ ನೇಮಕ ಆತೆರ್.

ಮೇ2-8: ಅಡ್ಡೂರು ಶ್ರೀ ಮುಖ್ಯಪ್ರಾಣ ದೇವಲ್ಯಡ್ ಪ್ರತಿಷ್ಠಾಂಗ ಅಷ್ಟಬಂಧ ಬ್ರಹ್ಮಕಲಶಾಭಿಷೇಕ

ಪೊಳಲಿ: ಅಡ್ಡೂರು ಶ್ರೀ ಮುಖ್ಯಪ್ರಾಣ ದೇವಲ್ಯಡ್ ಪ್ರತಿಷ್ಠಾಂಗ ಅಷ್ಟಬಂಧ ಬ್ರಹ್ಮಕಲಶಾಭಿಷೇಕ ಮೇ2-8 ಮುಟ್ಟ ನಡಪರೆ ಉಂಡು.

ಈ ಲೇಸ್ ಕ್ಷೇತ್ರದ ತಂತ್ರಿವರೇಣ್ಯೆರಾಯಿನ ಆಗಮ ಪ್ರವೀಣ್ ಪೊಳಲಿ ಕೋಡಿಮಜಲ್, ವಿದ್ವಾನ್ ಕೆ.ಅನಂತ ಪದ್ಮನಾಭ ಉಪಾಧ್ಯಾಯೆರೆನ ಮುತಾಲಿಕೆಡ್ ನಡಪರೆ ಉಂಡು.

ಮೇ2 ಅಂಗಾರೆ ಮಧ್ಯಾಹ್ನ ಪೊಳಲಿ ಶ್ರೀ ರಾಜರಾಜೇಶ್ವರೀ ದೇವಲ್ಯರ್ದ್ ಪುದೆ ಕಾಣಿಕೆ ಕೊನೊಯೆರೆ ಉಂಡು. ಬಯ್ಯಗ್ ಸಾಮೂಹಿಕ ಪ್ರಾರ್ತನೆ, ತೋರಣ ಮೂರ್ತ, ಉಗ್ರಾಣ ಮೂರ್ತ, ಶ್ರೀ ವಿದ್ಯಾವಿಲಾಸ ಪೆರಿಯ ಪ್ರಾಥಮಿಕ ಶಾಲೆ ಪೊಳಲಿ ಜೋಕುಲೆರ್ದ್ ಬೇತೆ ಬೇತೆ ವಿನೋದಾವಳಿ ರಾತ್ರೆ ನೃತ್ಯಂ ಕೈಕಂಬ ಶಾಖೆದ ಶಿಷ್ಯೆರೆರ್ದ್ ನೃತ್ಯಾರ್ಪಣಂ ಭರತನಾಟ್ಯ ಬೊಕ್ಕ ಜಾನಪದ ನೃತ್ಯಲೆನ ಸಂಗಮ, ಶ್ರೀ ಗುರುಕೃಪಾ ನೃತ್ಯಕಲಾ ಕೇಂದ್ರ ಸೋಮೇಶ್ವರ ಉಚ್ಚಿಲ ಕಲಾವಿದೆರೆರ್ದ್ ನೃತ್ಯ ವೈಭವ, ರಾಜಶ್ರೀ ಮೋಕೆದ ಕಲಾವಿದೆರ್ ಪೊಳಲಿ ಮೊಕ್ಲೆನ ಪಿರ ಬನ್ನಗ ತುಳು ನಾಟಕ ನಡಪರೆ ಉಂಡು.

ಮೇ3 ಬುಧಾರ ಬೊಲ್ಪುಗು ಗಣಹೋಮ, ಪವಮಾನ ಉಪನಿಷತ್ ಹೋಮ, ಭಜನೆ, ಮಧ್ಯಾಹ್ನ ಪೂಜೆ, ಬಯ್ಯಗ್ ವಾಸ್ತುಬಲಿ, ಸಿಂಚನ ಕೂಟದಕ್ಲೆರ್ದ್ ಸಾಂಸ್ಕೃತಿಕ ಲೇಸ್, ಧಾರ್ಮಿಕ ಸಭಾ ಲೇಸ್ ಬೊಕ್ಕ ಹವ್ಯಾಸಿ ಯಕ್ಷಗಾನ ಮಂಡಳಿ ಪೊಳಲಿ ಕಾವೇಶ್ವರ ಮೊಕ್ಲೆರ್ದ್ ಹನುಮದ್ವಿಲಾಸ ನಡಪರೆ ಉಂಡು.

ಮೇ4 ಗುರುವಾರ ಬೊಲ್ಪುಗು 108 ತಾರಾಯಿದ ಗಣಹೋಮ, ಗ್ರಹಯಾಗ, ನಾಗಗ್ ಕಲಶಾಭಿಷೇಕ, ಆಶ್ಲೇಷಾ ಬಲಿ, ಭಜನೆ ಮಧ್ಯಾಹ್ನ ಪೂಜೆ, ಬಯ್ಯಗ್ ಅಂಕುರ ಪೂಜೆ, ದುರ್ಗಾಪೂಜೆ, ಮಂಡಲ ಪೂಜೆ, ಕಲಶಾಧಿವಾಸ ಪೂಜೆ, ಪೊಳಲಿ ರಾಜೇಶ್ವರೀ ಮಹಿಳಾ ಮಂಡಲ ಮೊಕ್ಲೆರ್ದ್ ಸಾಂಸ್ಕೃತಿಕ ಲೇಸ್, ಧಾರ್ಮಿಕ ಸಭಾ ಲೇಸ್, ತೆಲಿಕೆದಬೊಳ್ಳಿ ಡಾ. ದೇವದಾಸ್ ಕಾಪಿಕಾಡ್ ರಚನೆ, ನಟನೆ ಮಲ್ತ್ ದ್ ನಿರ್ದೇಶನ ಮಲ್ತಿನ ಚಾ ಪರ್ಕ ಕಲಾವಿದೆರೆರ್ದ್ ನಾಯಿದ ಬೀಲ ತುಳು ನಾಟಕ ನಡಪರೆ ಉಂಡು.

ಮೇ5 ಸುಕ್ರಾರ ಬೊಲ್ಪುಗು ಗಣಹೋಮ, ಜೀವಕಲಶಾಭಿಷೇಕ, ಭಜನೆ, ಪೂಜೆ ಮಧ್ಯಾಹ್ನ ಯಕ್ಷಗಾನ ತಾಳಮದ್ದಳೆ, ಬಯ್ಯಗ್ ದುರ್ಗಾಪೂಜೆ, ಅಂಕುರಪೂಜೆ, ಧೂಮಾವತಿ ಕಲಶಾಭಿಷೇಕ, ಬೊಕ್ಕ ಜಾನಪದ ನೃತ್ಯ, ಧಾರ್ಮಿಕ ಸಭಾ ಲೇಸ್ ರಾತ್ರೆ ಸನಾತನ ನಾಟ್ಯಾಲಯ ಬೊಕ್ಕ ಮೊಕ್ಲೆರ್ದ್ ಪುಣ್ಯಭೂಮಿ ಭಾರತ ಸಾಂಸ್ಕೃತಿಕ ಲೇಸ್ ನಡಪರೆ ಉಂಡು.

ಮೇ6 ಸನಿಯಾರ ಬೊಲ್ಪುಗು ಗಣಹೋಮ, ಕಲಶಮಂಡಲ ರಚನೆ, ಭಜನೆ, ಪೂಜೆ ಮಧ್ಯಾಹ್ನ ಯಕ್ಷ ಗಾನ ವೈಭವ ಬಯ್ಯಗ್ ಕಲಶಾಧಿವಾಸ, ಅಧಿವಾಸಹೋಮ, ಸಾಂಸ್ಕೃತಿಕ ಲೇಸ್ ಶ್ರೀ ಓಂಕಾರೇಶ್ವರ ಹವ್ಯಾಸಿ ಮಹಿಳಾ ಯಕ್ಷಗಾನ ವೃಂದ ಕಂಕನಾಡಿ ಮೊಕ್ಲೆರ್ದ್ ವೀರಮಣಿ ಕಾಳಗ ಆಟ, ಧಾರ್ಮಿಕ ಸಭಾ ಲೇಸ್ ನಡಪರೆ ಉಂಡು.

ಮೇ7 ಐತಾರ ಬೊಲ್ಪುಗು ಗಣಹೋಮ, ಮುಖ್ಯಪ್ರಾಣ ದೇವೆರೆಗ್ ಬ್ರಹ್ಮಕಲಶಾಭಿಷೇಕ, ಭಜನೆ, ಮಹಾಪೂಜೆ, ಪಲ್ಲಪೂಜೆ, ಶ್ರೀ ದುರ್ಗೇಶ್ವರೀ ಯಕ್ಷಗಾನ ಸಂಘ ಕುಪ್ಪೆಪದವು ಮೊಕ್ಲೆರ್ದ್ ಯಕ್ಷಗಾನ ತಾಳಮದ್ದಳೆ, ಬಯ್ಯಗ್ ತೀರ್ಥ ಪೊಳಲಿ ಕೂಟದಕ್ಲೆರ್ದ್ ತುಳುನಾಡ ವೈಭವ, ಸಾಂಸ್ಕೃತಿಕ ನೃತ್ಯ, ರಂಗಪೂಜೆ, ಧಾರ್ಮಿಕ ಸಭಾ ಲೇಸ್ ಬೊಕ್ಕ ನಮ್ಮ ಕಲಾವಿದೆರ್ ಬೆದ್ರ ಅಭಿನಯದ ಕುಸಲ್ದ ಗೊಬ್ಬು ತುಳು ನಾಟಕ ನಡಪರೆ ಉಂಡು.

ಮೇ8 ಸೋಮಾರ ಬೊಲ್ಪುಗು ಶ್ರೀ ರಾಮಜಪ ಯಜ್ಞ, ಭಜನೆ, ರಾತ್ರೆ ಶ್ರೀ ಕ್ಷೇತ್ರ ಧೂಮಾವತಿ ಬಂಟ ಪರಿವಾರ ದೈವೊಲೆಗ್ ನೇಮ ನಡಪರೆ ಉಂಡು.

ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಧನಂಜಯ ಭಟ್ ಗಂದಾಡಿ, ಗೌರವಾಧ್ಯಕ್ಷೆರ್ (ಮೊಕ್ತೇಸರೆರ್) ನೂಯಿ ಬಾಲಕೃಷ್ಣ ರಾವ್, ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರ್ ರವಿಶಂಕರ್ ರಾವ್ ನೂಯಿ, ಗೌರವಾಧ್ಯಕ್ಷೆರ್ ಪದ್ಮನಾಭ ಶೆಟ್ಟಿ ಅಡ್ಡೂರುಗುತ್ತು, ಬ್ರಹ್ಮಕಲಶ ಉಚ್ಚಯ ಸಮಿತಿದ ಅಧ್ಯಕ್ಷೆರ್ ಮ.ಉ.ವಿ.ಸ. ಕ್ಷೇತ್ರ ಅಧ್ಯಕ್ಷೆರ್ ಡಾ.ವೈ ಭರತ್ ಶೆಟ್ಟಿ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಬಿಜೆಪಿದ ಒಬಿಸಿ ಕಾರ್ಯದರ್ಶಿ ಗೋವಿಂದ ಬಾಬು ಪೂಜಾರಿ

ಬೈಂದೂರು ವಿಧಾನಸಭಾ ಮತಕ್ಷೇತ್ರದ ಬಿಜೆಪಿ ಟಿಕೆಟ್ ಆಕ್ಷಾಂಕ್ಷಿ ಆದಿತ್ತಿನ ಸಾಮಾಜಿಕ ಕಾರ್ಯಕರ್ತೆ, ಯುವ ಉದ್ಯಮಿ ಗೋವಿಂದ ಬಾಬು ಪೂಜಾರಿ ಮೆರೆನ್ ಕರ್ನಾಟಕ ಬಿಜೆಪಿ ಹಿಂದುಳಿದ ವರ್ಗಲೆನ ಮೋರ್ಚಾ ಕಾರ್ಯದರ್ಶಿಯಾದ್ ನೇಮಕ ಮಲ್ದ್ಂಡ್.

ಹಿಂದುಳಿದ ವರ್ಗದ ರಾಜ್ಯಾಧ್ಯಕ್ಷೆರ್ ನೆ.ಲ ನರೇಂದ್ರಬಾಬು ಈ ಆದೇಶ ಮಲ್ದೆರ್.

ರೇಡಿಯೊ ಮಣಿಪಾಲ್ ಡ್ ಹೊಂಬೆಳಕು-ವ್ಯಕ್ತಿತ್ವ ವಿಕಸನ ಸರಣಿ ಲೇಸ್

ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಜೆಸಿಐ ಕಲ್ಯಾಣಪುರದ ಮುತಾಲಿಕೆಡ್ ಹೊಂಬೆಳಕು-ವ್ಯಕ್ತಿತ್ವ ವಿಕಸನ ಸರಣಿ ಲೇಸ್ ದ 4ನೇ ಸಂಚಿಕೆ ಎ.25 ಕ್ಕ್ ಅಂಗಾರೆ ಬಯ್ಯಗ್ 5.30 ಕ್ಕ್ ಪ್ರಸಾರ ಆಪುಂಡು.

ಈ ಲೇಸ್ ಡ್ ಶಿಕ್ಷಕೆರ್, ಬರವುಗಾರೆ ನರೇಂದ್ರ ಕುಮಾರ್ ಕೋಟ ಪಾಲ್ ಪಡೆಯೆರೆ ಉಲ್ಲೆರ್. ನನ ಎ.26 ಕ್ಕ್ ಮಧ್ಯಾಹ್ನ 1.30ಕ್ಕ್ ಕುಡೊರ ಪ್ರಸಾರ ಆಪುಂಡು.

ಬಿರುವೆರ್ ಕುಡ್ಲ ದುಬೈ ಕೂಟದ ಮುತಾಲಿಕೆಡ್ ತುಲುವಪ್ಪೆನ ಜೋಕುಲೆರ್ದ್ (ಯುಎಇ) ದುಬೈಡ್ ಬಿರ್ದ್ ದ ಪಿಲಿನಲಿಕೆ

ಪಿಲಿ ನಲಿಕೆ ತುಳುನಾಡ್ ದ ಮಾಮಲ್ಲ ಜನಪದ ಕಲೆ. ಅಂಚನೆ ಅವೆಕ್ ಅವೆತನೆ ಆಯಿನ ಹಿನ್ನೆಲೆ ಉಂಡು.

ತುಳುನಾಡ್ ಡ್ ಪಿಲಿ ನಲಿಕೆ ತೂಯೆರೆ ತಿಕ್ಕುನ ಸಾಮಾನ್ಯ ಆಂಡ ಕಡಲಾಯೆರೆದ ಕೊಲ್ಲಿ ರಾಷ್ಟ್ರೊಲೆಡ್ ಪಿಲಿ ನಲಿಕೆ ತೂಯೆರೆ ತಿಕ್ಕುನ ಬಾರಿ ಅಪರೂಪ.

ಅಂದ್ ದುಬೈಡ್ ಇಪ್ಪುನ ತುಳು ಅಪ್ಪೆನ ಜೋಕುಲು ಸೇರೊಂದು ಪಿಲಿನಲಿಕೆದ ಕೂಟ ಕಟ್ಟ್ ದ್ ದುಬೈದ ತುಳುವೆರೆಗ್ ಪಿಲಿ ನಲಿಕೆ ನಲಿತ್ ದ್ ತೋಜಾಯೆರ್.

ದುಬೈಡ್ ನಡಪುನ ದುಬೈ ಬಿಲ್ಲವೋತ್ಸವ ಬೊಲ್ಲಿ ಪರ್ಬೊದ ಪ್ರಯುಕ್ತ ದುಬೈಡ್ “ಬಿರುವೆರ್ ಕುಡ್ಲ ದುಬೈ” ಕೂಟದ ಮುತಾಲಿಕೆಡ್ ಪಿಲಿನಲಿಕೆ ನಲಿತ್ ದ್ ತೋಜಾಯಿನ ಕೂಟ ಇತ್ತೆ ಊರೊರ್ಮೆ ಪುಗರ್ತೆನ್ ಪಡೆಯೊಂದು ತುಲುವೆರೆನ ಉಡಲ್ ಗೆಂದ್ಂಡ್.

ಜೀವನ್ ಕುತ್ತಾರ್ ಮೆರೆನ ಮುಂದಾಳತ್ವಡ್ ನಡತಿನ ಈ ಪಿಲಿನಲಿಕೆ ದುಬೈಡ್ ನಮ್ಮ ತುಳುನಾಡ್ದ ಮಣ್ಣ್ ದ ಕಮ್ಮೆನನ್ ಪಸೆರಾದ್ ಮಾತೆರ್ನಲ ಪುಗರ್ತೆನ್ ಪಡೆಯೊಂದುಂಡು. ಈ ಕೂಟಡ್ ಪೊಣ್ಣು ಪಿಲಿಕುಲು ತೋಜಿದ್ ಬತ್ತಿನ ವಿಶೇಷ ಆದ್ ಇತ್ತ್ಂಡ್. (ಪವಿತ್ರ, ಪೂಜಾ, ನಕ್ಷತ್ರ) ಕೊಂಡಾಟದ ಕಿನ್ಯ ಕಿನ್ಯ ಪಿಲಿಕುಳು ತ್ರಿನಭ್ ದಾರ್ವಿಕ್ ಅರವ್ ವೇದಿಕೆಡ್ ಆಕರ್ಷಣಿಯ ಪಿಲಿಕುಲಾದ್ ಇತ್ತೆರ್. ಅಂಚನೆ ಬಾಯಿಡ್ ತುಚ್ಚಿದ್ ಅರಿತ ಮುಡಿ ದೆರ್ಪುನ, ಪಂದಳದ ಕಂದ ಮಣಿಕಂಠೆ (ಅಯ್ಯಪ್ಪ) ಪಡಿ ಮಿತ್ತರಿನ ಇಂದು ಮಾತಾ ತೂಪಿನಕ್ಲೆಗ್ ಮೈ ಇರ್ಮೆನ ಆಪುಲೆಕ ಮಲ್ತ್ಂಡ್.

ದುಬೈಡ್ ಇಂದುವೆ ಸುರುತ ಸಲ ಪೊಣ್ಣು ಪಿಲಿಕುಲೆನ ನಲಿಕೆ ತೂಯೆರೆ ತಿಕ್ಕ್ಂಡ್ ಪನ್ಪೆರ್ ಪ್ರೇಕ್ಷಕೆರ್. ದೂರದ ಊರುಡು ಇತ್ತ್ಂಡಲ ಊರುದ ಪುದರ್ ನ್ ಅರಲಾದ್ ಅಂಚನೆ ತುಳುವ ಅಪ್ಪೆನ ಸೇವೆನ್ ಮಲ್ಪುನ ಈ ಕೂಟದ ಮಾತಾ ಪದುಕೆರೆಗ್ ಉಡಲ್ ದಿಂಜಿ ಸೊಲ್ಮೊಲು. ಇಂಚೆನೆ ದುಂಬಗ್ ಲ ಇಂದುವೇ ರೀತಿಡ್ ನಿಕ್ಲೆನ ಈ ಕಲಾ ಸೇವೆ ದುಂಬರಿತೊಂದು ಪೋವೊಡು ಪನ್ಪಿನ ಅಂಗಲಾಪು ಮಾತಾ ತುಳು ಬಂಧುಲೆನವು.

✍🏻ಕಿಶೋರ್ ಕುಸಲ್ ನಗರ

“ಎನನ್ ಕಿಡ್ನಾಪ್ ಮಲ್ತ್ ದ್ ನಾಮಪತ್ರ ವಾಪಸ್ ದೆತೊನುಲೆಕ್ಕ ಮಲ್ತೆರ್”: ಜೆಡಿಎಸ್ ಅಭ್ಯರ್ಥಿ ಅಲ್ತಾಫ್ ಕುಂಪಲ ಆರೋಪ

ಕುಡ್ಲ: “ಕುಡ್ಲ ವಿಧಾನಸಭಾ ಕ್ಷೇತ್ರದ ಅಭ್ಯರ್ಥಿಯಾದ್ ವೋಟುಗು ಪಕ್ಷರ್ದ್ ಉಂತಿನ ಎನನ್ ಕಾಂಗ್ರೆಸ್ ಪಕ್ಷದಕುಲು ಕಿಡ್ನಾಪ್ ಮಲ್ತ್ ದ್ ಬಲವಂತವಾದ್ ನಾಮಪತ್ರ ಪಿರ ದೆತೊನುಲೆಕ್ಕ ಮಲ್ದೆರ್” ಪಂದ್ ಕುಡ್ಲ ಕ್ಷೇತ್ರದ ಜೆಡಿಎಸ್ ಅಭ್ಯರ್ಥಿ ಅಲ್ತಾಫ್ ಕುಂಪಲ ಆರೋಪ ಮಲ್ದೆರ್.

“ಯಾನ್ ಒಡೆಗ್ಲಾ ಬಲಿತಿಜಿ, ಎನನ್ ಕಿಡ್ನಾಪ್ ಮಲ್ತ್ ದ್ ಎನರ್ದ್ ನಾಮಪತ್ರ ಪಿರ ದೆತೊನುಲೆಕ್ಕ ಮಲ್ದೆರ್. ಎಂಕ್ ಒವ್ವೇ ರೀತಿಡ್ ಆಮಿಷ ಕೊರ್ತಿಜೆರ್. ಅತ್ತಂದೆ ಈ ಬಗೆಟ್ ಪೊಲೀಸ್ ಕಮಿಷನರ್ ಗ್ ಭದ್ರತೆ ಕೊರಿಯೆರೆ ಬಿನ್ನಾಪು ಮಲ್ದೆ” ಪಂದ್ ಪಂಡೆರ್.

ಬೊಕ್ಕ ಜೆಡಿಎಸ್ ರಾಜ್ಯ ವಕ್ತಾರೆರ್ ಎಂ.ಬಿ. ಸದಾಶಿವ ಮೇರ್ ಪಾತೆರ್ದ್, “ಈ ಸರ್ತಿ ಎರ್ನ ಸಕಾಯಲ ಇಜ್ಜಂದೆ ಸ್ವತಂತ್ರವಾದ್ ನಮ್ಮ ಜೆಡಿಎಸ್ ಪಕ್ಷ ಅಸ್ತಿತ್ವಗ್ ಬರ್ಪುಂಡು. ಎಂಕುಲು ಜನಪರವಾಯಿನ ಪಂಚರತ್ನ ಯೋಜನೆದ ಮುಖೇನ ಜನಕುಲೆನ ಮನಸ್ಸ್ ಗ್ ಕೈತಲ್ ಆತ. ಜೆಡಿಎಸ್ ಪಂಡಿನ ಜನಪರ ಲೇಸ್ ನ್ ಆಡಳಿತಗ್ ಬತ್ತಿನ ಮರುಕ್ಷಣನೇ ಜಾರಿಗ್ ಕನಯೆರೆ ಎಂಕುಲು ರಡಿ ಉಲ್ಲ. ಜನಕುಲೆನ ನಡುಟ್ ಗೊಂದಲ, ವೈಷಮ್ಯ ಮೂಡಿಸಾವುನ ರಾಜಕೀಯ ನ್ ಎಂಕುಲು ಎಪಲ ಮಲ್ತಿಜ. ಕುಮಾರಸ್ವಾಮಿ ಮೇರ್ ರಾಜ್ಯದ ನನದ ಮುಖ್ಯಮಂತ್ರಿಯಾದ್ ಪ್ರಮಾಣವಚನ ಸ್ವೀಕಾರ ಮಲ್ಪುನೇ ಖಂಡಿತ. ಜಿಲ್ಲೆಡ್ 8 ಕಡೆಟ್ ಅಭ್ಯರ್ಥಿಲೆನ್ ವೋಟುಗು ಉಂತಾದ್ಂಡ್. ಕುಡ್ಲ ಉತ್ತರ ಕ್ಷೇತ್ರಡ್ ಮಾಜಿ ಶಾಸಕೆರ್, ಕಾಂಗ್ರೆಸ್ ಪೆರಿಯ ಮುಖಂಡೆರ್ ಮೊಯಿದೀನ್ ಬಾವಾ ಮೇರ್ ವೋಟುಗು ಉಂತುದೆರ್. ಗೆಂದುನ ವಿಶ್ವಾಸ ಎಂಕ್ಲೆಡ ಉಂಡು.
ವಿಷಾದದ ಸಂಗತಿ ದಾದ ಪಂಡ ಜಿಲ್ಲೆದ 8 ಕ್ಷೇತ್ರಡ್ ಅಭ್ಯರ್ಥಿಲೆನ್ ಪಾಡ್ದ್ಂಡ್.

ಕುಡ್ಲ ಕ್ಷೇತ್ರಡ್ ಜನಸಾಮಾನ್ಯರೆಗ್ ಬೋಡಾಯಿನ ಅಲ್ತಾಫ್ ಕುಂಪಲ ಪನ್ಪುನ ಒರಿ ವ್ಯಕ್ತಿನ್ ಅಕ್ಲೆನ ಸಮಾಜಸೇವೆನ್ ಗುರುತಿಸಾದ್ ಟಿಕೆಟ್ ಕೊರ್ತೆರ್. ಆಂಡ ರಡ್ಡ್ ದಿನತ ಪಿರವು ಮೇರ್ ಪರ್ಬದ ದಿನ ಪಲ್ಲಿರ್ದ್ ಪಿದಯಿ ಬನ್ನಗ ಮೆರೆನ್ ಪೋಡಿಪಾದ್ ಚುನಾವಣಾಧಿಕಾರಿನ ಕೈತಡೇ ಲೆತೊಂದು ಪೋದು ನಾಮಪತ್ರ ಪಿರ ದೆತೊಲೆಕ್ಕ ಮಲ್ದ್ಂಡ್. ಉಂದು ಮತೆರ್ಲಾ ಯೋಚನೆ ಮಲ್ಪೊಡಾಯಿನ ಇಸಯ ಆತ್ಂಡ್. ದಾಯೇ ಪಂಡ ಒರಿ ಸಾಮಾನ್ಯ ಕಾರ್ಯಕರ್ತನ್ ಎದುರಿಸಾಯೆರೆ ಅವಂದಿನಕುಲು ಸಮಾಜದ ಜನಕುಲೆನ್ ಎಂಚ ನಡಪಾವೆರ್?” ಪಂದ್ ಪಂಡೆರ್.

ಪತ್ರಿಕಾಗೋಷ್ಠಿಡ್ ನಜೀರ್ ಉಳ್ಳಾಲ್, ವಸಂತ ಪೂಜಾರಿ, ಅಶ್ರಫ್ ಸಾಜೀದ್, ಆಶ್ರಪ್ ಖಾಜಿ, ಯುವ ಜನತಾದಳದ ಅಕ್ಷಿತ್ ಸುವರ್ಣ ಇತ್ತೆರ್.

ಮಾಜಿ ಸಚಿವೆರ್ ಗಂಗಾಧರ ಗೌಡ ಮೆರೆನ ಇಲ್ಲಗ್ ಐಟಿ ರೈಡ್

ಬೊಲ್ತೇರ್: ಮಾಜಿ ಸಚಿವೆರ್, ಕೆಪಿಸಿಸಿ ಉಪಾಧ್ಯಕ್ಷೆರ್ ಗಂಗಾಧರ ಗೌಡ ಮೊಕ್ಲೆನ ಮೂಜಿ ಜಾಗೆಗ್ ಇನಿ ಬೊಲ್ಪುಗು ಐಟಿ ಅಧಿಕಾರಿಲು ದಾಳಿ ಮಲ್ತ್ ದ್ ಪರಿಶೀಲನೆ ನಡಪಾದೆರ್.

ಬೊಲ್ತೇರ್ ತಾಲೂಕ್ ಸಾರ್ವಜನಿಕ ಆಸ್ಪತ್ರೆದ ಕೈತಲ್ ಇಪ್ಪುನ ಇಲ್ಲ್, ಲಾಯಿಲಡ್ ಇಪ್ಪುನ ಪ್ರಸನ್ನ ಇನ್ಸಿಟ್ಯೂಷನ್, ಇಂದಬೆಟ್ಟುಡ್ ಇಪ್ಪುನ ಇಲ್ಲ್ ದ ಮಿತ್ತ್ ಇನಿ ಬೊಲ್ಪುಗು ಇನೋವಾ ಕಾರ್ ಡ್ ಪೊಲೀಸೆರೆನೊಟ್ಟಿಗೆ ಐಟಿ ಅಧಿಕಾರಿಲು ಬತ್ತ್ ದ್ ದಾಳಿ ಮಲ್ದೆರ್. ಈ ಬಗೆಟ್ ಕಾರ್ಯಚರಣೆ ನಡತೊಂದು ಉಂಡು.

ದುಬೈದ ಸೌಹಾರ್ದ ಲಹರಿ ವತಿರ್ದ್ ನೆತ್ತೆರ್ ಉಂಬೊಲಿ ಶಿಬಿರ

ದುಬೈದ ಸೌಹಾರ್ದ ಲಹರಿದ ವತಿರ್ದ್ ಎ.20 ಕ್ಕ್ ರಾತ್ರೆ 7 ಗಂಟೆರ್ದ್ 10 ಗಂಟೆ ಮುಟ್ಟ ದುಬೈ ಡಿ ಎಚ್ ಎ ಡ್ ನೆತ್ತೆರ್ ಉಂಬೊಲಿ (ದಾನ) ಶಿಬಿರ ನಡತ್ಂಡ್.

ಈ ಶಿಬಿರಡ್ ಸುಮಾರ್ 25 ರ್ದ್ ಎಚ್ಚ ಜನ ಸದಸ್ಯೆರ್ ಪಾಲ್ ಪಡೆದ್ ನೆತ್ತೆರ್ ದಾನ ಮಲ್ತೆರ್. ಬಾಲಕೃಷ್ಣ ಸಾಲಿಯಾನ್ ನೆತ್ತೆರ್ ಉಂಬೊಲಿ ಶಿಬಿರ ಮಲ್ಪೆರೆ ಸಕಾಯ ಮಲ್ತೆರ್. ಸೌಹಾರ್ದ ಲಹರಿ ಅಧ್ಯಕ್ಷೆರ್ ಅಶೋಕ್ ಬೈಲೂರ್ ರಕ್ತದಾನಿಲೆಗ್ ಸೊಲ್ಮೆ ಸಂದಾಯೆರ್.

ಈ ಪೊರ್ತುಡು ಬಿನ್ನೆರಾದ್ ನೋಯೆಲ್ ಅಲ್ಮೆಡ, ಮನೋಜ್ ಬೊಕ್ಕ ಸೌಹಾರ್ದ ಸದಸ್ಯೆರ್ ಮಹೇಶ್ ಅತ್ತಾವರ್, ಸುರೇಶ ಶೆಟ್ಟಿ, ಯಶವಂತ ಕರ್ಕೇರ ಬೊಕ್ಕ ಯುವರಾಜ್ ದೇವಾಡಿಗ ಲೇಸ್ ಡ್ ಪಾಲ್ ಪಡೆದಿತ್ತೆರ್.

Scholarship to merited students will boost their aptitude – Dr Vishwanath Sherigar ಕಲ್ಪುನ ಜೋಕುಲೆಗ್ ವಿದ್ಯಾರ್ಥಿ ವೇತನದ ಸಕಾಯ ತಿಕ್ಂಡ ಅಕ್ಲೆಗ್ ಆಸಕ್ತಿ ಎಚ್ಚಾಪುಂಡು: ಡಾ.ವಿಶ್ವನಾಥ ಶೇರಿಗಾರ್

ಹಳೆಯಂಗಡಿ: “ಕಲ್ಪಾರ್ಥಿಲೆಗ್ ಅಕ್ಲೆನ ಪ್ರತಿಭೆಗ್ ಸರಿಯಾದ್ ವಿದ್ಯಾರ್ಥಿ ವೇತನ ಕೊರ್ಂಡ ಮಾನಸಿಕ ಸ್ಥೈರ್ಯ ಎಚ್ಚಾಪುಂಡು. ಕಲಿಕಾ ಪ್ರವೃತ್ತಿ ಬುಲೆಪುಂಡು” ಪಂದ್ ಕುಡ್ಲ ಎ.ಜೆ.ಆಸ್ಪತ್ರೆದ ಕ್ಯಾನ್ಸರ್ ತಜ್ಞೆರ್ ಡಾ.ವಿಶ್ವನಾಥ ಶೇರಿಗಾರ್ ಪಂಡೆರ್.

ಮೇರ್ ಎ.23 ಕ್ಕ್ ಪಾವಂಜೆ ಶ್ರೀ ಮಹಾಲಿಂಗೇಶ್ವರ ಮಹಾಗಣಪತಿ ದೇವಲ್ಯಡ್ ಪಾವಂಜೆ ದೇವಾಡಿಗ ಸಂಘದ ಆಶ್ರಯಡ್ ನಡತಿನ ತಮ್ಮನ ಬೊಕ್ಕ ವಿದ್ಯಾರ್ಥಿವೇತನ ಕೊರ್ಪುನ ಲೇಸ್ ನ್ ಉದಿಪನ ಮಲ್ತ್ ದ್ ಪಾತೆರಿಯೆರ್.

ಬೊಂಬೈದ ಉದ್ಯಮಿ ಸುಧಾಕರ ದೇವಾಡಿಗ ಕಾರ್ಲ ಮಲ್ಲ ಬಿನ್ನೆರಾದ್ ಬತ್ತ್ ದ್ ಪಾತೆರ್ದ್, “ಸಂಘ ಎಂಕ್ ದಾದ ಕೊರ್ತುಂಡು ಪನ್ಪುನೆರ್ದ್ ಸಂಘಗ್ ಯಾನ್ ದಾದ ಕೊರ್ತೆ ಪಂದ್ ತೆರಿವೊಂದು ಜವನೆರ್ ಸ್ವಜಾತಿ ಸಂಘಟನೆಡ್ ಪಾಲ್ ಪಡೆವೊಡು” ಪಂದ್ ಪಂಡೆರ್.

ದೇವಾಡಿಗ ಸಮಾಜ ‌ಸೇವಾ ಸಂಘ (ರಿ.) ಪಾವಂಜೆ ನೆತ್ತ ಅಧ್ಯಕ್ಷೆರ್ ರಾಮದಾಸ್ ಪಾವಂಜೆ ಲೇಸ್ ದ ಗುರ್ಕಾರ್ಮೆನ್ ಒಯಿಸೊಂದಿತ್ತೆರ್.

ಈ ಲೇಸ್ ಗ್ ಧರ್ಮಶಾಸ್ತ ಭಕ್ತ ವೃಂದ, ಬಾಂದ್ರ, ಬೊಂಬೈ ನೆತ್ತ ಅಧ್ಯಕ್ಷೆರ್ ರಾಮಣ್ಣ ದೇವಾಡಿಗ ತೋಕೂರು, ನವೋದಯ ಸಂಘ ಬೆಂಗ್ಲೂರ್ ಮಹಿಳಾ ವೇದಿಕೆದ ಅಧ್ಯಕ್ಷೆರ್ ರಾಜೇಶ್ವರೀ ಹರಿ ದೇವಾಡಿಗ, ಬೆಂಗ್ಲೂರ್ ನವೋದಯ ಸಂಘದ ಸ್ಥಾಪಕಾಧ್ಯಕ್ಷೆರ್ ಹರಿ ದೇವಾಡಿಗ ಬೆಂಗ್ಲೂರ್ ಬೊಕ್ಕ ಸಪ್ತಸ್ವರ ಸಹಕಾರ ಸಂಘ ತಲ್ಲೂರ್ ನೆತ್ತ ಕಾರ್ಯನಿರ್ವಹಣಾಧಿಕಾರಿರವಿ ತಲ್ಲೂರು ಮಲ್ಲ ಬಿನ್ನೆರಾದ್ ಬತ್ತಿತ್ತೆರ್.

ಬೊಕ್ಕ ಕಟ್ಟಡ ಸಮಿತಿದ ಗೌರವಾಧ್ಯಕ್ಷೆರ್, ಬೊಂಬೈ ದೇವಾಡಿಗ ಸಂಘದ ಮಾಜಿ ಅಧ್ಯಕ್ಷೆರ್ ರವಿ ಎನ್.ದೇವಾಡಿಗ, ಬೊಂಬೈ ಸಂಘದ ಗೌರವ ಸಲಹೆಗಾರೆರ್ ವಿಶ್ವ ದೇವಾಡಿಗ ಮಹಾಮಂಡಲದ ಪ್ರಧಾನ ಕಾರ್ಯದರ್ಶಿ ಹಿರಿಯಡ್ಕ ಮೋಹನದಾಸ್ ಬೊಕ್ಕ ದೇವಾಡಿಗ ಸಂಘ (ರಿ.) ಬೊಂಬೈ ನೆತ್ತ ಅಧ್ಯಕ್ಷೆರ್ ಪ್ರವೀಣ್ ನಾರಾಯಣ್ ಪೂಜೆದ ಪೊರ್ತುಡು ಇತ್ತ್ ದ್ ಲೇಸ್ ಗ್ ಎಡ್ಡೆಪ್ಪು ಬಯಕಿಯೆರ್.

ಲೇಸ್ ಡ್ ಪೆರಿಯ ನಿವೃತ್ತ ಶಿಕ್ಷಕಿ ಮೋಹಿನಿ ಕೆ. ಕಾಮೆರೊಟ್ಟು, ಕೃಷಿ ಜನಪದ ಕಲಾವಿದೆರ್ ರಮೇಶ್ ದೇವಾಡಿಗ ಪಾವಂಜೆ, ಪ್ರಗತಿಪರ ಕೃಷಿಕೆರ್ ವಾಸು ದೇವಾಡಿಗ ಎಳತ್ತೂರು ಮೊಕ್ಲೆಗ್ ತಮ್ಮನ ಕೊರ್ದು, ತಮ್ಮನ ಮಲ್ತೆರ್. ಅತ್ತಂದೆ, ಕಿನ್ನಿಗೋಳಿ ದಿ. ಉಮ್ಮಕ್ಕ ಮೊಯಿಲ್ದಿ ಸ್ಮರಣಾರ್ಥ ಮೆರೆನ ಮಗೆ ಯಾದವ ದೇವಾಡಿಗ ಮೆರೆನ ಕೊಡುಗೆಡ್ ಎಸ್.ಎಸ್.ಎಲ್.ಸಿ. ಬೊಕ್ಕ ಪಿ.ಯು.ಸಿ.ದ ಒಟ್ಟು 17 ಜನ ಕಲ್ಪಾರ್ಥಿಲೆಗ್ ವಿದ್ಯಾರ್ಥಿವೇತನ ಕೊರಿಯೆರ್.

2021-22ನೇ ಸಾಲ್ ಡ್ ಎಸ್.ಎಸ್.ಎಲ್.ಸಿ.ಡ್ ಶೇ.95.84 ಮಾರ್ಕ್ ಪಡೆಯಿನ ಕು.ಮನಿಷಾ ಎನ್.ದೇವಾಡಿಗ ಪಾವಂಜೆ ಮೆರೆಗ್ ದಿ.ಬಿ.ಜಿ.ದೇವಾಡಿಗ ಪದ್ಮನೂರು ಸ್ಮರಣಾರ್ಥ ಪ್ರತಿಭಾ ಪುರಸ್ಕಾರ, ಪಿ.ಯು.ಸಿ.ಡ್ ಶೇ.95 ಮಾರ್ಕ್ ಪಡೆಯಿನ ಕು.ಪ್ರತೀಕ್ಷ ಜಿ.ದೇವಾಡಿಗ, ಪದ್ಮನೂರು ಮೆರೆಗ್ ದಿ.ಕಮಲ ಬೊಕ್ಕ ದಿ.ಕೊರಗ ದೇವಾಡಿಗ ಸ್ಮರಣಾರ್ಥ ಪ್ರತಿಭಾ ಪುರಸ್ಕಾರ ಬೊಕ್ಕ ಬಿ.ಕಾಂ. ಪದವಿ ಪರೀಕ್ಷೆಡ್ ಶೇ.94.5 ಮಾರ್ಕ್ ಪಡೆಯಿನ ಕು.ನೇಹಾ ವೈ.ದೇವಾಡಿಗ ಮೆರೆಗ್ ದಿ.ಶೀನ ಶ್ರೀಯಾನ್ ಪಡುಪಣಂಬೂರು ಸ್ಮರಣಾರ್ಥ ಪ್ರತಿಭಾ ಪುರಸ್ಕಾರ ಕೊರ್ದು ಮಾನಾದಿಗೆ ಮಲ್ತೆರ್.

ಅಂಚೆನೆ ಕರಾಟೆಡ್ ಇಸೇಸ ಸಾಧನೆ ಮಲ್ತಿನ ಸುಶಾಂತ್ ದೇವಾಡಿಗ ತೋಕೂರು, ಶ್ರವಣ್ ಸಂಜಯ್ ದೇವಾಡಿಗ ಸಂತೆಕಟ್ಟೆ, ಭರತ ನಾಟ್ಯ ವಿದ್ವತ್ ಪಡೆಯಿನ ವಿದುಷಿ ನೇಹಾ ವೈ.ದೇವಾಡಿಗ, ಚಲನಚಿತ್ರದ ಬಾಲನಟಿ ಕು.ಚಿತ್ರಿತಾ ಎಂ.ದೇವಾಡಿಗ ಕಾಮೆರೊಟ್ಟು ಬೊಕ್ಕ ಜಿಲ್ಲಾ ಮಟ್ಟದ ಚಿತ್ರಕಲಾ ಸ್ಪರ್ಧೆಡ್ ಸುರುತ್ತ ಇನಾಮು ಪಡೆಯಿನ ದನಿಶ್ ವಿ.ದೇವಾಡಿಗ ಮೊಕ್ಲೆಗ್ ಪ್ರತಿಭಾ ಪುರಸ್ಕಾರ ಕೊರ್ದು ಮಾನಾದಿಗೆ ಮಲ್ತೆರ್. ಬೊಕ್ಕ ವಾರ್ಷಿಕ ಕ್ರೀಡಾಕೂಟಡ್ ಪಾಲ್ ಪಡೆದ್ ಗೆಂದಿನಕ್ಲೆಗ್ ಇನಾಮುನ್ ಕೊರಿಯೆರ್.

ಈ ಪೊರ್ತುಡು ಪಾವಂಜೆ ದೇವಾಡಿಗ ಸಂಘದ ಕಟ್ಟಡ ಸಮಿತಿದ ಪ್ರಧಾನ ಕಾರ್ಯದರ್ಶಿ ಜನಾರ್ದನ್ ಪಡುಪಣಂಬೂರು, ದೇವಾಡಿಗ ಯುವ ವೇದಿಕೆದ ಅಧ್ಯಕ್ಷೆರ್ ಅಶ್ವಿನ್ ಪಾವಂಜೆ, ದೇವಾಡಿಗ ಸೇವಾ ಟ್ರಸ್ಟ್‌ ದ ಅಧ್ಯಕ್ಷೆರ್ ರಮೇಶ್ ದೇವಾಡಿಗ ತೋಕೂರು, ದೇವಾಡಿಗ ಮಹಿಳಾ ವೇದಿಕೆದ ಅಧ್ಯಕ್ಷೆರ್ ವಿಮಲ ಕೆ.ದೇವಾಡಿಗ ಇತ್ತೆರ್.

ಜಯಶ್ರೀ ಯಾದವ್, ನಿಖಿಲ್ ದೇವಾಡಿಗ ಹಳೆಯಂಗಡಿ, ರಮೇಶ್ ದೇವಾಡಿಗ, ಅನುಪಮಾ ಅಶೋಕ್ ಪಾವಂಜೆ ಬೊಕ್ಕ ಸತೀಶ್ ಎನ್. ಇಂದಿರಾನಗರ ಮೊಕುಲು ತಮ್ಮನ ಬೊಕ್ಕ ಬೇತೆ ಪಟ್ಟಿಲೆನ್ ತೆರಿಪಾಯೆರ್. ಮಹಿಳಾ ವೇದಿಕೆದ ಕ್ರೀಡಾ ಬೊಕ್ಕ ಸಾಂಸ್ಕೃತಿಕ ಕಾರ್ಯದರ್ಶಿ ವಿಜಯಲಕ್ಷ್ಮಿ ಜನಾರ್ಧನ್ ಇನಾಮುದ ಪಟ್ಟಿನ್ ಓದಿಯೆರ್.

ಲೇಸ್ ದ ಪೂರ್ವಡ್ ಸಾಮೂಹಿಕ ಶ್ರೀ ಸತ್ಯನಾರಾಯಣ ಪೂಜೆ ಬೊಕ್ಕ ಶ್ರೀ ಶನೀಶ್ವರ ಪೂಜೆ ನಡತ್ಂಡ್. ಕು.ನೇಹಾ ಯಾದವ್ ಬೊಕ್ಕ ಕು.ಮನಿಷಾ ಜನಾರ್ಧನ್ ಮೊಕ್ಲೆನ ಪ್ರಾರ್ತನೆದೊಟ್ಟಿಗೆ ಸುರು ಆಯಿನ ಲೇಸ್ ಡ್ ಕಟ್ಟಡ ಸಮಿತಿದ ಕಾರ್ಯದರ್ಶಿ ಜನಾರ್ದನ್ ಪಡುಪಣಂಬೂರು ಪ್ರಾಸ್ತಾವಿಕ ಭಾಷಣ ಮಲ್ತ್ ದ್ ಎದ್ಕೊನಿಯೆರ್. ಸಂಘದ ಆಡಳಿತ ಸಮಿತಿದ ಪ್ರಧಾನ ಕಾರ್ಯದರ್ಶಿ ಜಗದೀಶ್ ಪಲಿಮಾರ್ ಸೊಲ್ಮೆ ಸಂದಾಯೆರ್. ಕಟ್ಟಡ ಸಮಿತಿದ ಕಾರ್ಯಾಧ್ಯಕ್ಷೆರ್ ಯಾದವ ದೇವಾಡಿಗೆರ್ ಲೇಸ್ ಸುಧಾರಿಕೆ ಮಲ್ತೆರ್.

Scholarship to merited students will boost their aptitude – Dr Vishwanath Sherigar

Haleangadi: ” Talented students should be encouraged and scholarship given to merited students will increase their confidence” said Dr Vishwanath Sherigar, Cancer specialist from A J hospital and research centre.

He was speaking at a scholarship distribution program organised by Pavanje Sri Mahalingeshwara temple – Pavanje Devadiga Sangha. Sudhakar Devadiga Karla from Mumbai was the guest of honour.