Tulu News

ಪಟ್ಲ ಫೌಂಡೇಶನ್ ಟ್ರಸ್ಟ್ ಅಭಿವೃದ್ದಿದ ಪಥಡ್ ಸಾಗಡ್: ಉಳಿ ಯೋಗೇಂದ್ರ ಭಟ್

ಪಟ್ಲ ಸಂಭ್ರಮದ ಲೆಪ್ಪೋಲೆ ಬುಡುಗಡೆ

ಕುಡ್ಲ: ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್ ಅಭಿವೃದ್ದಿದ ಪಥಡ್ ಸಾಗಡ್. ಮೇ 28 ಕ್ಕ್ ಅಡ್ಯಾರ್ ಗಾರ್ಡನ್ ಡ್ ನಡಪರೆ ಇಪ್ಪುನ ಪಟ್ಲ ಸಂಭ್ರಮ ಗೌಜಿಡ್ ನಡಪಡ್, ಸಂಘಟನೆಡ್ ವೈವಿಧ್ಯತೆ ಉಂಡು ಪಂದ್ ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್ ದ ಯುಎಸ್ ಎ ಘಟಕದ ಸಂಚಾಲಕೆರ್ ಉಳಿ ಯೋಗೀಂದ್ರ ಭಟ್ ತೆರಿಪಾಯೆರ್.

ಮೇರ್ ಬಲ್ಲಾಲ್ ಬಾಗ್ ಕೈತಲ್ ದ ಪತ್ತುಮುಡಿಟ್ಟ್ ಪಟ್ಲ ಫೌಂಡೇಶನ್ ಟ್ರಸ್ಟ್ ದ ಮುತಾಲಿಕೆಡ್ ನಡಪುನ ಪಟ್ಲ ಸಂಭ್ರಮದ ಲೆಪ್ಪೋಲೆನ್ ಬುಡುಗಡೆ ಮಲ್ತ್ ದ್ ಪಾತೆರಿಯೆರ್.

ಅಯಿರ್ದ್ ಬೊಕ್ಕ ಆಟದ ಕಲಾವಿದೆರ್ ಉಜಿರೆ ಅಶೋಕ್ ಭಟ್ ಪಾತೆರ್ದ್, ಪಟ್ಲ ಸಂಭ್ರಮ ವೈವಿದ್ಯತೆ ಇಪ್ಪುನ ಲೇಸ್, ವೈಭವದ ಮುಖೇನ ಪ್ರಕಾಶಮಾನವಾದ್ ನಡಪಡ್ ಪಂದ್ ಪಂಡೆರ್. ಭಾಗವತ ಪಟ್ಲ ಸತೀಶ್ ಮೆರೆರ್ದ್ ಯಕ್ಷಗಾನ ಕ್ಷೇತ್ರದ ವ್ಯಾಪ್ತಿ ವಿಸ್ತಾರ ಆತ್ಂಡ್. ಪಟ್ಲೆರ್ ಆಟಗ್ ಪೊಸ ರೂಪ ಕೊರ್ತೆರ್. ಪೊಸ ಜನಾಂಗನ್ ಸೃಷ್ಟಿ ಮಲ್ದೆರ್ ಪಂದ್ ತೆರಿಪಾಯೆರ್.

ಪಟ್ಲ ಫೌಂಡೇಶನ್ ಟ್ರಸ್ಟ್ ದ ಸ್ಥಾಪಕಾಧ್ಯಕ್ಷೆರ್ ಪಟ್ಲ ಸತೀಶ್ ಶೆಟ್ಟಿ ಪ್ರಾಸ್ತಾವಿಕವಾದ್ ಪಾತೆರಿಯೆರ್. ಸಂಘಟನಾ ಕಾರ್ಯದರ್ಶಿ ಕದ್ರಿ ನವನೀತ ಶೆಟ್ಟಿ ಪಟ್ಲ ಸಂಭ್ರಮದ ರೂಪು ರೇಶೆನ್ ತೆರಿಪಾಯೆರ್.

ಈ ಪೊರ್ತುಡು ಭುಜಬಲಿ ಧರ್ಮಸ್ಥಳ, ಡಾ.ಪ್ರಭಾಕರ ಜೋಷಿ, ಪ್ರಧಾನ ಕಾರ್ಯದರ್ಶಿ ಪುರುಷೋತ್ತಮ ಭಂಡಾರಿ ಅಡ್ಯಾರ್, ಕೋಶಾಧಿಕಾರಿ ಸುದೇಶ್ ಕುಮಾರ್ ರೈ, ಉಪಾಧ್ಯಕ್ಷೆರ್ ಮನು ರಾವ್, ಜತೆ ಕಾರ್ಯದರ್ಶಿ ರವಿಚಂದ್ರ ಶೆಟ್ಟಿ, ಸಂಘಟನಾ ಕಾರ್ಯದರ್ಶಿ ಜಗನ್ನಾಥ ಶೆಟ್ಟಿ ಬಾಳ, ಪ್ರದೀಪ್ ಆಳ್ವ ಕದ್ರಿ, ಮಹಿಳಾ ಘಟಕದ ಪದಾಧಿಕಾರಿ ಆರತಿ ಆಳ್ವ, ಪೂರ್ಣಿಮಾ ಯತೀಶ್ ರೈ, ಬೇತೆ ಬೇತೆ ಘಟಕದ ಅಧ್ಯಕ್ಷೆರ್ ಬೊಕ್ಕ ಪದಾಧಿಕಾರಿಲು ಇತ್ತೆರ್.

ಈ ಲೇಸ್ ಡ್ ಕಟೀಲ್ ಮೇಳದ ಕಲಾವಿದೆರ್ ಮವ್ವಾರು ಬಾಲಕೃಷ್ಣ ಮಣಿಯಾಣಿ ಬೊಕ್ಕ ಬಪ್ಪನಾಡ್ ಮೇಳದ ಕಲಾವಿದೆರ್ ಪಡುಮಲೆ ನಾಗಪ್ಪ ಮೆರೆಗ್ ಇಲ್ಲ್ ಕಟ್ಟೆರೆ ಪನವುದ ಸಕಾಯ ಮಲ್ತೆರ್.

ಪುರುಷೋತ್ತಮ‌ ಭಂಡಾರಿ ಎದ್ಕೊಂದು, ಲೇಸ್ ಸುಧಾರಿಕೆ ಮಲ್ತೆರ್. ರವಿಚಂದ್ರ ಶೆಟ್ಟಿ ಸೊಲ್ಮೆ ಸಂದಾಯೆರ್.

ನಾಮಪತ್ರ ಸಂದಾಯೆರ್ ಪುತ್ತೂರ್ ಕಾಂಗ್ರೆಸ್ ಅಭ್ಯರ್ಥಿ ಅಶೋಕ್ ಕುಮಾರ್ ರೈ

ಪುತ್ತೂರ್: ವಿಧಾನಸಭೆ ಕ್ಷೇತ್ರದ ವೋಟುಗು ಪುತ್ತೂರ್ ಕಾಂಗ್ರೆಸ್ ಅಭ್ಯರ್ಥಿ ಅಶೋಕ್ ಕುಮಾರ್ ರೈ ಕೋಡಿಂಬಾಡಿ ಮೇರ್ ಬುಧಾರ ಸಾರರ್ದ್ ಎಚ್ಚ ಕಾರ್ಯಕರ್ತೆರ್, ಬೆಂಬಲಿಗೆರ್, ಹಿತೈಷಿಲೆನೊಟ್ಟಿಗೆ ಮಲ್ಲ ಮೆರವಣಿಗೆದ ಮುಖೇನ ಬತ್ತ್ ದ್ ಮಿನಿವಿಧಾನಸೌಧಡ್ ನಾಮಪತ್ರ ಸಂದಾಯೆರ್.

ಕೋಡಿಂಬಾಡಿ ಶ್ರೀ ಮಹಿಷಮರ್ಧಿನಿ, ಪುತ್ತೂರ್ ಮಹಾಲಿಂಗೇಶ್ವರ ದೇವಲ್ಯಡ್ ಪ್ರಾರ್ತನೆ ಸಂದಾದ್, ದರ್ಬೆರ್ದ್ ಮೆರವಣಿಗೆಡ್ ಸಾರರ್ದ್ ಎಚ್ಚ ಕಾಂಗ್ರೆಸ್ ಕಾರ್ಯಕರ್ತೆರ್ ಪಕ್ಷದ ಧ್ವಜ ಪತ್ತೊಂದು ಜಯಘೋಷ ಪಾಡೊಂದು ಕಿಲ್ಲೆ ಮೈದಾನಗ್ ಬತ್ತೆರ್.‌ ಮೊಕ್ಲೆನೊಟ್ಟಿಗೆ ಕಲಾ ಪ್ರಕಾರ ಕೂಟಲು, ಚೆಂಡೆ ಬಳಗ, ನಾಸಿಕ್ ಬ್ಯಾಂಡ್ ಇತ್ಂಡ್.

ಬೊಕ್ಕ ಅಭ್ಯರ್ಥಿ ಅಶೋಕ್ ಕುಮಾರ್ ರೈ ಪಾತೆರ್ದ್, ಕರಿನ ಐನ್ ವರ್ಷದ ಬಿಜೆಪಿ ಆಡಳಿತಡ್ ಅಕ್ರಮ-ಸಕ್ರಮ, 94ಸಿ ಡ್ ಬಡವೆರೆನ್ ಲೂಟಿ ಮಲ್ದ್ಂಡ್. ಶಾಸಕೆಯಾದ್ ಆಯ್ಕೆ ಆಯಿನ ಬೊಕ್ಕ ಭ್ರಷ್ಟಾಚಾರ ಮುಕ್ತ ಆಡಳಿತ ಕೊರ್ದು, ಸರ್ವ ಸಮಾಜದ ಹಿತಕ್ಕಾದ್ ಬೆನ್ಪೆ ಪಂದ್ ಪಂಡೆರ್.

ಈ ಪೊರ್ತುಡು ವಿಧಾನಪರಿಷತ್ ಸದಸ್ಯೆರ್ ಮಂಜುನಾಥ ಭಂಡಾರಿ, ಕಾಂಗ್ರೆಸ್ ವಕ್ತಾರೆ ಭವ್ಯ ನರಸಿಂಹಮೂರ್ತಿ, ದ.ಕ.ಜಿಲ್ಲಾ ಕಾಂಗ್ರೆಸ್ ಅಧ್ಯಕ್ಷೆರ್ ಹರೀಶ್ ಕುಮಾರ್, ಮಾಜಿ ಶಾಸಕಿ ಶಕುಂತಲಾ ಟಿ ಶೆಟ್ಟಿ, ಜಿಲ್ಲಾ ಉಸ್ತುವಾರಿ ಶಿಭಾ ರಾಮಚಂದ್ರನ್, ಜಿಲ್ಲಾ ಮಹಿಳಾ ಕಾಂಗ್ರೆಸ್ ಅಧ್ಯಕ್ಷೆರ್ ಶಾಲೆಟ್ ಪಿಂಟೊ ಇತ್ತೆರ್.

ಸಾರರ್ದ್ ಎಚ್ಚ ಕಾರ್ಯಕರ್ತೆರೆನೊಟ್ಟಿಗೆ ನಾಮಪತ್ರ ಸಂದಾಯಿನ ಪುತ್ತೂರ್ ಬಿಜೆಪಿ ಅಭ್ಯರ್ಥಿ ಆಶಾ ತಿಮ್ಮಪ್ಪ ಗೌಡ

ಪುತ್ತೂರ್: ವಿಧಾನಸಭೆ ಕ್ಷೇತ್ರದ ವೋಟುಗು ಕೋಡೆ ಬಿಜೆಪಿ ಅಭ್ಯರ್ಥಿ ಆಶಾ ತಿಮ್ಮಪ್ಪ ಗೌಡ ಮೇರ್ ಸಾರರ್ದ್ ಎಚ್ಚ ಕಾರ್ಯಕರ್ತೆರೆನೊಟ್ಟಿಗೆ ಮೆರವಣಿಗೆಡ್ ಪೋದು ಬಿಜೆಪಿ ರಾಜ್ಯಾಧ್ಯಕ್ಷೆರ್ ನಳಿನ್ ಕುಮಾರ್ ಕಟೀಲ್ ನೊಟ್ಟಿಗೆ ನಾಮಪತ್ರ ಸಂದಾಯೆರ್.

ಮಹಾಲಿಂಗೇಶ್ವರ ದೇವಲ್ಯರ್ದ್ ಪಿದಾಡಿನ ಮೆರವಣಿಗೆಡ್ ಬಿಜೆಪಿ ಸ್ಟಾರ ಪ್ರಚಾರಕೆರ್ ನಟಿ ಶೃತಿ, ಬಿಜೆಪಿ ಯುವ ಮೋರ್ಚಾ ಅಧ್ಯಕ್ಷೆರ್, ಸಂಸದೆರ್ ತೇಜಸ್ವಿ ಸೂರ್ಯ ಪಾಲ್ ಪಡೆದಿತ್ತೆರ್.

ಪುತ್ತೂರ್ ಜಾತ್ರೆ ಸಂಪನ್ನ

ಪುತ್ತೂರ್ ಮಹತೋಭಾರ ಶ್ರೀ ಮಹಾಲಿಂಗೇಶ್ವರ ದೇವಲ್ಯದ ಜಾತ್ರೆ ಎ.20 ಕ್ಕ್ ಮುಗಿಂಡ್.

ಎ.20 ಕ್ಕ್ ದೇವಲ್ಯಡ್ ರಾತ್ರೆ ಪೂಜೆದ ಬೊಕ್ಕ ದೇವಲ್ಯದ ತಂತ್ರಿಲು ಕುಂಟಾರು ರವೀಶ ಮೇರ್ ಮಂತ್ರಾಕ್ಷತೆನ್ ಭಕ್ತೆರ್ ಗ್ ಕೊರಿಯೆರ್. ಬೊಕ್ಕ ದೇವೆರೆನ ನಿತ್ಯ ಬಲಿ ಉಚ್ಚಯ, ವಸಂತ ಕಟ್ಟೆ ಪೂಜೆ ನಡತ್ಂಡ್.

ಈ ಪೊರ್ತುಡು ದೇವಲ್ಯದ ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಮುಳಿಯ ಕೇಶವ ಪ್ರಸಾದ್, ಸಮಿತಿ ಸದಸ್ಯೆರ್ ವಿ.ಎಸ್ ಭಟ್, ರವೀಂದ್ರನಾಥ ರೈ ಬಳ್ಳಮಜಲು, ಶೇಖರ್ ನಾರಾವಿ, ರಾಮಚಂದ್ರ ಕಾಮತ್, ಬಿ.ಐತ್ತಪ್ಪ ನಾಯ್ಕ್, ರಾಮ್‌ದಾಸ್ ಗೌಡ, ವೀಣಾ ಬಿ.ಕೆ. ಡಾ. ಸುಧಾ ಎಸ್ ರಾವ್, ದೇವಲ್ಯದ ಕಾರ್ಯನಿರ್ವಹಣಾಧಿಕಾರಿ ನವೀನ್ ಕುಮಾರಿ ಭಂಡಾರಿ ಹೆಚ್, ಕಚೇರಿ ವ್ಯವಸ್ಥಾಪಕೆರ್ ಹರೀಶ್ ಶೆಟ್ಟಿ, ದೇವಲ್ಯದ ವಾಸ್ತು ಇಂಜಿನಿಯರ್ ಪಿ.ಜಿ.ಜಗನ್ನಿವಾಸ ರಾವ್ ಇತ್ತೆರ್.

ಅಂಚೆನೆ ದೇವಲ್ಯದ ಪೂಜೆದ ಸುರುಕ್ಕ್ ಜಾತ್ರೆ ಉಚ್ಚಯಡ್ ಬೇತೆ ಬೇತೆ ಸೇವಾ ಕಾರ್ಯಡ್ ಪಾತ್ರರಾಯಿನ ದೇವಲ್ಯದ ಅರ್ಚಕೆರ್, ಪರಿಚಾರಕ ವರ್ಗಗ್ ಸಂಪ್ರದಾಯದಂಚೆನೆ ಪೊಸ ಡ್ರೆಸ್ ನ್ ದೇವಲ್ಯದ ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಮುಳಿಯ ಕೇಶವಪ್ರಸಾದ್ ಕೊರಿಯೆರ್.

ಮೇ 3-5: ಶಂಭೂರ್ ದಕ್ಷಿಣದ ಶ್ರೀ ಶಿರ್ಡಿ ಸಾಯಿ ಮಂದಿರಡ್ ಬ್ರಹ್ಮಕಲಶ ಉಚ್ಚಯ

ಶಂಭೂರ್ ದಕ್ಷಿಣದ ಶ್ರೀ ಶಿರ್ಡಿ ಸಾಯಿ ಮಂದಿರಡ್ ಉದಿಪನ ಲೇಸ್, ಬ್ರಹ್ಮಕಲಶ ಉಚ್ಚಯ ಬೊಕ್ಕ ಪ್ರತಿಷ್ಠಾ ಉಚ್ಚಯ ಮೇ 3-5 ಮುಟ್ಟ ನಡಪರೆ ಉಂಡು.

ಈ ಲೇಸ್ ಶಿರ್ಡಿ ಸಂಸ್ಥಾನದ ಪಂಡಿತೆರ್ ಉಪೇಂದ್ರ ತುಕಾರಾಮ ಪಾರಕ್ ಮೆರೆನ ಕೈಟ್ಟ್, ಮಂದಿರದ ತಂತ್ರಿಲು, ಪುರೋಹಿತೆರ್ ಕೇಶವ ಶಾಂತಿ ನಾಟಿ ನರಿಕೊಂಬು ಮೆರೆನ ಮುತಾಲಿಕೆಡ್ ವೈದಿಕ, ವಿಧಿ ವಿಧಾನ ಗೌಜಿಡ್ ನಡಪರೆ ಉಂಡು.

ಮೇ 3 ಬುಧಾರ ಮಧ್ಯಾಹ್ನ ಋತ್ವಿಜರ ಬರಿಯೆರೆ, ಬೊಕ್ಕ 3 ಗಂಟೆಗ್ ಶ್ರೀ ರಕ್ತೇಶ್ವರಿ ದೇವಿ ದೇವಲ್ಯರ್ದ್ ಸುರು ಆಪುನ ಪುದೆಕಾಣಿಕೆದೊಟ್ಟಿಗೆ, ಬಾಬಾರ ಪಲ್ಲಕ್ಕಿ, ಪಾದುಕೆ, ಬೊಳ್ಳಿ, ಕಿರೀಟ, ಬೊಳ್ಳಿ ರುದ್ರಾಕ್ಷಿ ಮಾಲೆನ್ ಮೆರವಣಿಗೆದ ಮುಖೇನ ಮಂದಿರಗ್ ಕನಯೆರೆ ಉಂಡು. ಬೊಕ್ಕ ಉಗ್ರಾಣ ಮೂರ್ತ, ಬಯ್ಯಗ್ ಸಾಂಸ್ಕೃತಿಕ ಲೇಸ್, ಸಭಾ ಲೇಸ್, ರಾತ್ರೆ ಖರ್ಚಿಗ್ ಕಾಸ್ ಇಜ್ಜಿ ತುಳು ನಾಟಕ ನಡಪರೆ ಉಂಡು.

ಮೇ 4 ಗುರುವಾರ ಮಧ್ಯಾಹ್ನ ದಾಸ ಸಂಕೀರ್ತನೆ, ಬಯ್ಯಗ್ ಜೋಕುಲೆರ್ದ್ ಸಾಂಸ್ಕೃತಿಕ ಲೇಸ್, ಸಭಾ ಲೇಸ್ ರಾತ್ರೆ ಭಕ್ತಿ ಪ್ರಧಾನ ನಾಟಕ ಶಿವಧೂತ ಗುಳಿಗ ನಡಪರೆ ಉಂಡು.

ಮೇ 5 ಸುಕ್ರಾರ ಮಧ್ಯಾಹ್ನ ಭಜನೆ ಸೇವೆ, ಸ್ಯಾಕ್ಸೋಪೋನ್ ಬೊಕ್ಕ ಕೊಳಲುವಾದನ, ಬಯ್ಯಗ್ ಪಲ್ಲಕ್ಕಿ ಉಚ್ಚಯ ನಡಪರೆ ಉಂಡು.

ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್, ಸೇವೆ ಸಂದಾದ್, ಪ್ರಸಾದ ದೆತೊಂದು ಶ್ರೀ ಸಾಯಿಬಾಬಾನ ಕೃಪೆಗ್ ಪಾತ್ರರಾವೊಡು ಪಂದ್ ಶಂಭೂರ್ ದಕ್ಷಿಣದ ಶ್ರೀ ಶಿರ್ಡಿ ಸಾಯಿ ಮಂದಿರ, ಕುಡ್ಲ ಶ್ರೀ ಸಾಯಿ ಟ್ರಸ್ಟ್ (ರಿ.) ದ ಅಧ್ಯಕ್ಷೆರ್, ಸಾಯಿ ಭಕ್ತೆರ್ ಬೊಕ್ಕ ಮಂದಿರದ ಜೋಕುಲು ಲೆಪ್ಪೋಲೆಡ್ ತೆರಿಪಾದೆರ್.

ಎಲ್ಲೆರ್ದ್ ಚಾರ್ ಧಾಮ್ ಯಾತ್ರೆ ಸುರು

ಎಲ್ಲೆರ್ದ್ ಚಾರ್ ಧಾಮ್ ಯಾತ್ರೆ ಸುರು ಆಪುಂಡು.

ಗಂಗೋತ್ರಿ ಬೊಕ್ಕ ಯಮುನೋತ್ರಿ ದೇವಲ್ಯ ಸನಿಯಾರ ಓಪನ್ ಆಪುಂಡು. ಕೇದಾರನಾಥ ದೇವಲ್ಯ ಎಪ್ರಿಲ್ 25 ಕ್ಕ್ ಬೊಕ್ಕ ಬದರಿನಾಥ ದೇವಲ್ಯ ಎಪ್ರಿಲ್ 27 ಕ್ಕ್ ಓಪನ್ ಆಪುಂಡು.

ಆಂಡ ಕೋಡೆ ಬತ್ತಿನ ಬರ್ಸಗ್ ಚಾರ್ ಧಾಮ್ ಯಾತ್ರೆಗ್ ತೊಂದರೆ ಆತ್ಂಡ್. ಕುಡೊಂಜಿ ಕಡೆಟ್, ಹಿಮ, ಬರ್ಸ ಬೊಕ್ಕ ಶೀತ ಗಾಳಿರ್ದ್ ಚಮೋಲಿ ಬೊಕ್ಕ ರುದ್ರಪ್ರಯಾಗ ಜಿಲ್ಲೆಡ್ ತಾಪಮಾನ ಕನಿಷ್ಠ ಮಟ್ಟಡ್ ಉಂಡು.

ಸೆಕೆಂಡ್ ಪಿಯುಸಿ ರಿಸಲ್ಟ್ ಪ್ರಕಟ: ದಕ್ಷಿಣ ಕನ್ನಡ ಜಿಲ್ಲೆ ಫಸ್ಟ್

ಬೆಂಗ್ಲೂರ್: 2022-23ನೇ ಶೈಕ್ಷಣಿಕ ಸಾಲ್ ದ ಸೆಕೆಂಡ್ ಪಿಯುಸಿ ರಿಸಲ್ಟ್ ಪ್ರಕಟ ಆಂಡ್.

ಪಿಯು ಮಂಡಳಿ ನಿರ್ದೇಶಕೆರ್ ಸುದ್ದಿಗೋಷ್ಠಿ ನಡಪಾದ್ ರಿಸಲ್ಟ್ ಪ್ರಕಟ ಮಲ್ದೆರ್.

ಈ ರಿಸಲ್ಟ್ ನ್ https://karresults.nic.in ವೆಬ್‌ಸೈಟ್‌ಡ್ ಕಲ್ಪಾರ್ಥಿಲು ಹಾಲ್‌ ಟಿಕೆಟ್‌ ನಂಬರ್ ಬೊಕ್ಕ ಪುಟ್ಟುನ ತಾರೀಕ್ ಪಾಡ್ದ್ ತೂವೊಲಿ.

ಈ ರಿಸಲ್ಟ್ ಡ್ ಕಲಾ ವಿಭಾಗಡ್ ಶೇ.61.22, ವಾಣಿಜ್ಯ ವಿಭಾಗಡ್ ಶೇ.75.89, ವಿಜ್ಞಾನ ವಿಭಾಗಡ್ ಶೇ.85.71 ಬೈದ್ಂಡ್.

ದಕ್ಷಿಣ ಕನ್ನಡ ಜಿಲ್ಲೆ ಸುರುತ್ತ ತಾನ ಪಡೆತ್ಂಡ್. ಒಡಿಪು ರಡ್ಡನೇ, ಕೊಡಗು ಮೂಜಿನೇ ಬೊಕ್ಕ ಉತ್ತರ ಕನ್ನಡ ನಾಲ್ ನೇ ತಾನ ಪಡೆತ್ಂಡ್. ಯಾದಗಿರಿ ಜಿಲ್ಲೆ ಅಕೇರಿದ ತಾನಡ್ ಉಂಡು.

ಮಾ.9 ರ್ದ್ 29 ಮುಟ್ಟ ರಾಜ್ಯದ 1,109 ಕೇಂದ್ರಲೆಡ್ ಪರೀಕ್ಷೆ ನಡತ್ ದ್ಂಡ್. ಒಟ್ಟು 7,27,387 ಕಲ್ಪಾರ್ಥಿಲು ಪುದರ್ ನೊಂದಣಿ ಮಲ್ದೆರ್. 725,821 ಕಲ್ಪಾರ್ಥಿಲು ಆಯಿಟ್ಟ್ ಅರ್ಹರಾತೆರ್. 23,724 ಕಲ್ಪಾರ್ಥಿಲು ಪರೀಕ್ಷೆಗ್ ಗೈರುಹಾಜರಾತೆರ್. 702,067 ಕಲ್ಪಾರ್ಥಿಲು ಪರೀಕ್ಷೆ ಬರೆತೆರ್. 524,209 ಕಲ್ಪಾರ್ಥಿಲು ಪರೀಕ್ಷೆಡ್ ಉತ್ತೀರ್ಣರಾತೆರ್.

ಕುಡ್ಲ ವಿಧಾನಸಭೆ ಕ್ಷೇತ್ರದ ಬಿಜೆಪಿ ಅಭ್ಯರ್ಥಿಯಾದ್ ಇನಿ ನಾಮಪತ್ರ ಸಂದಾಯಿನ ಸತೀಶ್ ಕುಂಪಲ

ಕುಡ್ಲ ವಿಧಾನಸಭೆ ಕ್ಷೇತ್ರದ ಬಿಜೆಪಿ ಅಭ್ಯರ್ಥಿಯಾದ್ ಸತೀಶ್ ಕುಂಪಲ ಮೇರ್ ಇನಿ ನಾಮಪತ್ರ ಸಂದಾಯೆರ್.

ಈ ಪೊರ್ತುಡು ಅಭ್ಯರ್ಥಿನೊಟ್ಟಿಗೆ ಬಿಜೆಪಿ ರಾಜ್ಯಾಧ್ಯಕ್ಷೆರ್ ದ.ಕ.ಸಂಸದೆರ್ ನಳಿನ್ ಕುಮಾರ್ ಕಟೀಲ್, ಬಿಜೆಪಿ ಕುಡ್ಲ ಮಂಡಲ ಅಧ್ಯಕ್ಷೆರ್ ಚಂದ್ರಹಾಸ ಪಂಡಿತ್‌ಹೌಸ್, ಬಿಜೆಪಿ ಜಿಲ್ಲಾ ಉಪಾಧ್ಯಕ್ಷೆರ್ ಸಂತೋಷ್ ಕುಮಾರ್ ಬೋಳಿಯಾರ್ ಬೊಕ್ಕ ಮಾಜಿ ಸಚಿವೆರ್ ಕೃಷ್ಣ ಜೆ ಪಾಲೆಮಾರ್ ಇತ್ತೆರ್.

ಜೂ.4 ಕ್ಕ್ ನಡಪರೆ ಇಪ್ಪುನ ‘ಯಕ್ಷ ಸಂಭ್ರಮ-2023’ ಲೇಸ್ ದ ಲೆಪ್ಪೋಲೆ, ಟಿಕೆಟ್ ಬುಡುಗಡೆ

ದುಬೈ: ಪೇಂಟೆದ ಊದ್ ಮೇತದ ಬಿರಿಯಾನಿಡ್ 2020 ಟ್ಟ್ ಎಪ್ರಿಲ್18 ಕ್ಕ್ ನಡತಿನ ಯಕ್ಷಮಿತ್ರರು ಲೇಸ್ ದ 20ನೇ ವರ್ಷದ ಲೆಕ್ಕೊಡು ಜೂ.4 ಕ್ಕ್ ನಡಪರೆ ಇಪ್ಪುನ ‘ಯಕ್ಷ ಸಂಭ್ರಮ-2023’ ಲೇಸ್ ದ ಲೆಪ್ಪೋಲೆ ಬೊಕ್ಕ ಟಿಕೆಟ್ ಬುಡುಗಡೆ ಆಂಡ್.

ಈ ಲೇಸ್ ಡ್ ಮಲ್ಲ ಬಿನ್ನೆರಾದ್ ಉದ್ಯಮಿ ಕಲಾಪೋಷಕೆರ್ ಚಲನಚಿತ್ರ ನಿರ್ಮಾಪಕೆ ಹರೀಶ್ ಶೇರಿಗಾರ್ ಪಾತೆರ್ದ್, ಕರಿನ 20 ವರ್ಷೊದಿಂಚ ಯಕ್ಷಮಿತ್ರರು ದುಬೈ ಕೂಟಗ್ ಸಂಪೂರ್ಣ ಸಹಕಾರ ಕೊರೊಂದು ಬೈದ. ನನ ದುಂಬಗ್ಲಾ ಎನ್ನ ಸಂಪೂರ್ಣ ಸಹಕಾರ ಯಕ್ಷಮಿತ್ರರು ಕೂಟಗ್ ಉಂಡು ಪಂದ್ ಪಂಡೆರ್. ಅತ್ತಂದೆ ಎನ್ನ ಉದ್ಯಮ ಸಂಸ್ಥೆ ಸುರು ಆಯಿನ ಪೊರ್ತುಡು ಯಕ್ಷಮಿತ್ರರು ಕೂಟ ಸುರು ಆತ್ಂಡ್. ಇತ್ತೆ ಯಕ್ಷಮಿತ್ರರು ಕೂಟಗ್ 20 ಆಂಡ್. ಅಂಚೆನೆ 20 ವರ್ಷದ ಕಾಲ ಈ ಸಂಸ್ಥೆನ್ ನಡಪಾವೊಂದು ಬತ್ತಿನ ಸ್ಥಾಪಕ ಸದಸ್ಯೆರೆಗ್ ಅಭಿನಂದನೆನ್ ಸಂದಾವೊಂದು ಉಲ್ಲೆ. ಈ ಸಂಸ್ಥೆಗ್ ಎನ್ನ ಸಂಪೂರ್ಣ ಸಹಕಾರ ದುಂಬುಲ ಕೊರ್ತೆ ನನಲ ಕೊರ್ಪೆ. ಅಂಚೆನೆ ಯು.ಎ.ಇ.ಡ್ ಇಪ್ಪುನ ಯಕ್ಷ ಅಭಿಮಾನಿಲು ಈ ಕೂಟಗ್ ಸಹಕಾರ ಕೊರೊಡು ಬೊಕ್ಕ ಜೂ.4 ಕ್ಕ್ ನಡಪರೆ ಇಪ್ಪುನ ಯಕ್ಷ ಸಂಭ್ರಮನ್ ಯಶಸ್ವಿ ಮಲ್ತ್ ದ್ ಕೊರೊಡು ಪಂದ್ ಬಿನ್ನಾಪು ಮಲ್ತೆರ್.

ಬೊಕ್ಕ ಗಣ್ಯೆರ್ ತುಡರ್ ಅರ್ಲಾದ್, ಯಕ್ಷಮಿತ್ರರು ದುಬೈದ ಲಾಂಛನನ್ ಉದಿಪನ ಮಲ್ತೆರ್.

ಅವೆರ್ದ್ ಬೊಕ್ಕ 20 ವರ್ಷದ ಲೋಕಾಭಿರಾಮ ಪ್ರಸಂಗದ ಲೆಪ್ಪೋಲೆ ಬೊಕ್ಕ ಟಿಕೆಟ್ ಬುಡುಗಡೆ ಮಲ್ತಿನ ಗಣ್ಯೆರ್, ಹೋಟೆಲ್ ಉದ್ಯಮಿ ವಾಸುದೇವ ಭಟ್ ಪುತ್ತಿಗೆ, ಬಿಲ್ಲವಾಸ್ ದುಬೈದ ನಿಕಟಪೂರ್ವ ಅಧ್ಯಕ್ಷೆರ್ ಸತೀಶ್ ಪೂಜಾರಿ, ಇತ್ತೆದ ಅಧ್ಯಕ್ಷೆರ್ ಪ್ರಭಾಕರ ಸುವರ್ಣ, ಉದ್ಯಮಿ ಚಲನಚಿತ್ರ ನಿರ್ಮಾಪಕೆರ್ ಹರೀಶ್ ಬಂಗೇರ, ಕಲಾ ಪೋಷಕೆರ್ ಪದ್ಮರಾಜ ಎಕ್ಕಾರ್, ದಿವಾಕರ ಶೆಟ್ಟಿ, ಕರ್ನಾಟಕ ಸಂಘ ದುಬೈದ ಅಧ್ಯಕ್ಷೆರ್ ಶಶಿಧರ್ ನಾಗರಾಜಪ್ಪ ಮೊಕುಲು ಜೂನ್ 4 ಕ್ಕ್ ನಡಪರೆ ಇಪ್ಪುನ ಲೇಸ್ ಗ್ ಎಕ್ಲೆನ ಮಾತೆರ್ನಲ ಸಹಕಾರ ಉಂಡು ಪಂದ್ ಪಂಡ್ಂದ್, ಲೇಸ್ ಯಶಸ್ವಿಯಾದ್ ನಡಪಡ್ ಪಂದ್ ಎಡ್ಡೆಪ್ಪು ಬಯಕಿಯೆರ್.

ಬೊಕ್ಕ ಬಯ್ಯಗ್ 4.30 ಕ್ಕ್ ನಗರದ ಊದು ಮೇತದ ಶೇಖ್ ರಷೀದ್‌ ಆಡಿಟೋರಿಯಂದ ಬೊಟ್ಟಿಕೆರೆ ಪುರುಷೋತ್ತಮ ಪೂಂಜೆರೆನ ಚಾವಡಿಡ್ ದಿ.ಪುರುಷೋತ್ತಮ ಪೂಂಜ ವಿರಚಿತ ‘ಲೋಕಾಭಿರಾಮ’ ಆಟ ನಡಪರೆ ಉಂಡು.

ಈ ಪ್ರಸಂಗಡ್ ಬಿನ್ನೆರ್ ಕಲಾವಿದೆರಾದ್ ಭಾಗವತೆರಾದ್ ದಿನೇಶ್ ಅಮ್ಮಣ್ಣಾಯ, ಗಣೇಶ್ ಕುಮಾರ್ ಹೆಬ್ರಿ, ಚೆಂಡೆ ಮದ್ದಲೆಡ್ ರೋಹಿತ್ ಉಚ್ಚಿಲ್, ಶ್ರೀಧರ್ ವಿಟ್ಲ, ಮುಮ್ಮೆಳ ಕಲಾವಿದೆರಾದ್ ರಾಧಕೃಷ್ಣ ನಾವಡ ಮದೂರು, ಜಯಪ್ರಕಾಶ್ ಶೆಟ್ಟಿ ಪೆರ್ಮುದೆ, ಮೋಹನ್ ಕುಮಾರ್ ಅಮ್ಮುಂಜೆ, ಚಂದ್ರಶೇಖರ ಧರ್ಮಸ್ಥಳ, ಅರುಣ್ ಕೋಟ್ಯಾನ್, ಅಕ್ಷಯ್ ಭಟ್, ವೇಷಭೂಷಣಡ್ ಜಯಂತ ಪೈವಳಿಕೆ ಬೊಕ್ಕ ಮೊಕ್ಲೆನೊಟ್ಟಿಗೆ ನಮ್ಮ ಯಕ್ಷಮಿತ್ರರು ಕೂಟದ ಸರ್ವ ಕಲಾವಿದೆರ್ ರಂಗಡ್ ಮೆರೆಯರೆ ಉಲ್ಲೆರ್ ಪಂದ್ ಯಕ್ಷಮಿತ್ರರು ದುಬೈದ ಗುರುಕುಲು ರವೀಂದ್ರ ಉಚ್ಚಿಲ ಮೇರ್ ವಿವರಣೆ ಕೊರ್ದು, ‘ಲೋಕಾಭಿರಾಮ’ ಪ್ರಸಂಗದ ಎಲ್ಯ ಪೊಲಬುನ್ ತೆರಿಪಾಯೆರ್.

ಈ ಪೊರ್ತುಡು ಯು.ಎ.ಇ.ದ ಸುಮಾರ್ ಸಂಘ ಸಂಸ್ಥೆದ ಮುಖಂಡೆರ್, ಯಕ್ಷಮಿತ್ರರು ದುಬೈದ ಸದಸ್ಯೆರ್ ಸದಸ್ಯೆರ್, ಕಲಾವಿದೆರ್ ಬೊಕ್ಕ ಜೋಕುಲು ಇತ್ತೆರ್.

ಮಾ.ಮಯೂರ್ ಗಣೇಶ್ ಬೊಕ್ಕ ಮಾ.ದಿಯಾನ್ ಗಣೇಶ್ ಪ್ರಾರ್ತನೆ ಪಂಡೆರ್. ರಿತೇಶ್ ಅಂಚನ್ ಕುಲಶೇಖರ ಲೇಸ್ ದ ಸುಧಾರಿಕೆ ಮಲ್ತ್ ದ್, ಎದ್ಕೊಂದು ಸೊಲ್ಮೆ ಸಂದಾಯೆರ್.

ವರದಿ: ವಿಜಯಕುಮಾರ್ ಶೆಟ್ಟಿ ಗಾಣದಮೂಲೆ ಮಜಿಬೈಲ್ (ದುಬೈ)
ಪೋಟೋ: ಅಶೋಕ್ ಬೆಳ್ಮಣ್

ನೃತ್ಯ ಶಿಕ್ಷಕಿ ಶಾರದಾ ದಾಮೋದರ್ ಮೆರೆಗ್ ತಮ್ಮನ

ಪುತ್ತೂರ್: ಕರ್ನಾಟಕ ಸಾಂಸ್ಕೃತಿಕ ಪರಿಷತ್ತ್ ಬೊಕ್ಕ ಸೃಷ್ಟಿ ಶಕ್ತಿ ಸಂಸ್ಥೆದ ಒಟ್ಟುಸೇರಿಗೆಡ್ ಬೇತೆ ಬೇತೆ ಕ್ಷೇತ್ರದ ಸಾಧಕೆರೆಗ್ ಪ್ರಶಸ್ತಿ ಪ್ರದಾನ ಲೇಸ್ ಎ.9 ಕ್ಕ್ ಐತಾರ ಬೊಲ್ಪುಗು 10.1 ಕ್ಕ್ ಕನ್ನಡ ಸಾಹಿತ್ಯ ಪರಿಷತ್ತ್ ದ ಆವರಣಡ್ ಇಪ್ಪುನ ಅಕ್ಕಮಹಾದೇವಿ ಸಭಾಂಗಣಡ್ ನಡತ್ಂಡ್.

ಈ ಲೇಸ್ ಡ್ ದಕ್ಷಿಣ ಕನ್ನಡದ 4 ಜನಕ್ಕ್ ಪಂಡ ಅಯಿಟ್ಟ್ ಪುತ್ತೂರ್ ದ ಮೇಘ ಕಲಾ ಆರ್ಟ್ಸ್ ಬೊಕ್ಕ ಮೇಘ ಡಾನ್ಸ್ ಸ್ಟುಡಿಯೋದ ನೃತ್ಯ ಶಿಕ್ಷಕಿ ಶಾರದಾ ದಾಮೋದರ ಅರತೋಳಿ ಮೆರೆಗ್ ಕರ್ನಾಟಕ ರಾಜ್ಯ ಪ್ರಶಸ್ತಿ, ಚಿಂತಾಮಣಿ ಡಾನ್ಸ್ ಕ್ರ್ಯೂ ಕಡೇಶಿವಾಲಯ ಮಹೇಶ್ ಕುಲಾಲ್‌ ಮೆರೆಗ್ ಅಬ್ದುಲ್ ಕಲಾಂ ಪ್ರಶಸ್ತಿ, ಬೊಕ್ಕ ವಿಟ್ಲದ ಪಡೀಬಾಗಿಲು ಅದಿತಿ ಪ್ರಶಾಂತ್ ಮೆರೆಗ್ ಕನ್ನಡ ಧಾರವಾಹಿ ಬೊಕ್ಕ ಸುಮಾರ್ ನೃತ್ಯ ಸಾಧನೆಗ್ ರಾಜ್ಯ ಮಟ್ಟದ ಪ್ರಶಸ್ತಿನ್ ಪ್ರದಾನ ಮಲ್ತೆರ್.

ಅಂಚೆನೆ ಕರ್ನಾಟಕ ರಾಜ್ಯ ಪ್ರಶಸ್ತಿ ಪಡೆಯಿನ, ಕಡಬ ತಾಲೂಕ್ ದ ಕಾಯಿಮಣ ಗ್ರಾಮದ ನಿವಾಸಿ, ಮೇಘ ಕಲಾ ಆರ್ಟ್ಸ್ ಬೊಕ್ಕ ಮೇಘ ಡಾನ್ಸ್ ಸ್ಟುಡಿಯೋದ ನೃತ್ಯ ಶಿಕ್ಷಕಿ ಶಾರದಾ ದಾಮೋದರ್ ಮೆರೆಗ್ ಗಿನ್ನೆಸ್ ಪ್ರಶಸ್ತಿ ಪುರಸ್ಕೃತ ಶಾಂತಿವನ ಟ್ರಸ್ಟ್ ಬೊಕ್ಕ ಶ್ರೀ ಧ. ಮಂ. ಯೋಗ ಬೊಕ್ಕ ನೈತಿಕ ಶಿಕ್ಷಣ ಯೋಜನೆದ ವತಿರ್ದ್ ತೆಂಕಿಲ ಆಂಗ್ಲ ಮಾಧ್ಯಮ ಶಾಲೆಡ್ ನಡತಿನ ಲೇಸ್ ಡ್ ತಮ್ಮನ ಮಲ್ತೆರ್.

ನೃತ್ಯ ಶಿಕ್ಷಕಿದೊಟ್ಟಿಗೆ ಜೋಕುಲೆನ ಪ್ರತಿಭೆಗ್ ಸಂಬಂಧ ಪಟ್ಟಿನ ಡ್ರೆಸ್ ಲೆನ್ ರಡಿ ಮಲ್ತ್ ದ್ ಕೊರ್ಪಿನ ಮೇರ್ ಸರಕಾರಿ ಶಾಲೆದ ಜೋಕುಲೆಗ್ ಧರ್ಮಗ್ ಡ್ಯಾನ್ಸ್ ಕಲ್ಪಾವೊಂದು ಇತ್ತೆರ್.

ಅಂಚೆನೆ ಜೋಕುಲೆನ ಸಾಂಸ್ಕೃತಿಕ ರಂಗ್ ಗ್ ಇಸೇಸ ಕೊಡುಗೆ ಕೊರೊಂದು ಬತ್ತಿನ ಮೆರೆನ ಕಲಾ ಸೇವೆನ್ ಗೌರವಿಸಾದ್ ತಮ್ಮನ ಮಲ್ತೆರ್.