ಪೇಪರ್ ಬಾಯ್, ಜೆಸಿಬಿ ಡ್ರೈವರಾದ್ ಬೇಲೆ ಮಲ್ಪುನ 28 ವರ್ಷದ ಅಖಿಲ್ ಮೆರೆನ ಸಾಹಿತ್ಯನ್ ಕೇರಳ ಸರ್ಕಾರ ಗುರುತಿಸಾದ್ಂಡ್.
ಕೇರಳ ಸಾಹಿತ್ಯ ಅಕಾಡೆಮಿ ಮೆರೆನ ನೀಲಚದಯನ್ ಪನ್ಪುನ ಎಲ್ಯ ಕಥಾ ಪುಸ್ತಕಗಾದ್ ವಾರ್ಷಿಕ ಪ್ರಶಸ್ತಿ-2022 ನ್ ಕೊರ್ದು ಗೌರವಿಸಾದ್ಂಡ್.
ನೀಲಚದಯನ್ ಬೂಕು ಮುದ್ರಣಗ್ 20 ಸಾರ ಖರ್ಚ್ ಆತ್ಂಡ್ ಪಂದ್ ಅಖಿಲ್ ತೆರಿಪಾದೆರ್. ಅಖಿಲ್ ಮೆರೆನ ಬರವುಲು ಮಲಯಾಳಂ ಆತ್ಂಡ್. ಈ ಬರವುಗ್ ಬರವುಗಾರೆ ಬಿಪಿನ್ ಚಂದ್ರನ್ ಮೆರೆನ ಮೆಚ್ಚುಗೆ ತಿಕ್ಕ್ ದ್ಂಡ್.
ಕುಡ್ಲ: ಬಸ್ ಬೊಕ್ಕ ಕಾರ್ ಆಕ್ಸಿಡೆಂಟ್ ಆಯಿನ ಘಟನೆ ಮುಡಿಪು ಜಂಕ್ಷನ್ ಡ್ ಕೋಡೆ ರಾತ್ರೆ ನಡತ್ಂಡ್.
ಈ ಘಟನೆಡ್ ಕಾರ್ ಡ್ರೈವರ್ ಪವಾಡಸದೃಶ ರೀತಿಡ್ ಬಚಾವ್ ಆತೆರ್. ಕುಡ್ಲರ್ದ್ ಬಿ.ಸಿ ರೋಡ್ ಗ್ ಪೋವೊಂದು ಇತ್ತಿನ ಎನ್.ಎಸ್ ಟ್ರಾವೆಲ್ಸ್ ಬಸ್ಸ್ ಮುಡಿಪು ಜಂಕ್ಷನ್ ಡ್ ತಿರ್ಗ್ ನಗ, ಭಾರತಿ ಶಾಲೆದ ಕಡೆರ್ದ್ ಬರೊಂದು ಇತ್ತಿನ ಝೆನ್ ಕಾರ್ ಗ್ ಗುದ್ದುಂಡು.
ಮೀರಾ ಡಹಾಣು ಬಂಟ್ಸ್ (ರಿ.) ಮುತಾಲಿಕೆಡ್ ಆಟಿದ ಕೂಟ ಬೊಕ್ಕ ಪ್ರತಿಭಾ ಪುರಸ್ಕಾರ ಲೇಸ್ ಜುಲೈ 22 ಸನಿಯಾರ ಮಧ್ಯಾಹ್ನ 3 ಗಂಟೆರ್ದ್ ರಾತ್ರೆ 8 ಗಂಟೆ ಮುಟ್ಟ TAPS 3&4 ಕಮ್ಯೂನಿಟಿ ಹಾಲ್ (ತಾರಾಪುರ್ ರೋಡ್) ಬೊಯಿಸರ್ ಡ್ (ಬೊಂಬೈ) ನಡತ್ಂಡ್.
ಈ ಲೇಸ್ ದ ಗುರ್ಕಾರ್ಮೆನ್ ಮೀರಾ ಡಹಾಣು ಬಂಟ್ಸ್ ದ ಅಧ್ಯಕ್ಷೆರ್ ಪ್ರಕಾಶ್ ಎಂ. ಹೆಗ್ಡೆ ಒಯಿಸೊಂದಿತ್ತೆರ್. ಮಲ್ಲ ಬಿನ್ನೆರಾದ್ ತಾರಾಪುರ ಕೈಗಾರಿಕಾ ಉತ್ಪಾದಕರ ಸಂಘ TIMA ದ ಉಪಾಧ್ಯಕ್ಷೆರ್ ಜಗನ್ನಾಥ ಭಂಡಾರಿ, ಆಲ್ ಡೆಲ್ ಎಜ್ಯುಕೇಶನ್ ಟ್ರಸ್ಟ್ ಪಾಲ್ಫರ್ St.John ದ ಜಿಎಂ ಸತೀಶ್ ಶೆಟ್ಟಿ, ಆಪರೇಷನ್ ಹೆಡ್ ಸಿಇಒ ಅಸೋಸಿಯೇಟೆಡ್ ಕ್ಯಾಪ್ಸೂಲ್ಸ್ ಪ್ರೈವೆಟ್ ಲಿಮಿಟೆಡ್ ದ ಲಕ್ಷ್ಮಣ್ ಲೋಕು ಶೆಟ್ಟಿ, ಮೀರಾ ಡಹಾಣು ಬಂಟ್ಸ್ ದ ಮಾನಾದಿಗೆದ ಗುರ್ಕಾರ್ಲು ಶಂಕರ ಬಿ. ಶೆಟ್ಟಿ ವಿರಾರ್, ಉಪಾಧ್ಯಕ್ಷೆರ್ ಕರ್ನೂರ್ ಶಂಕರ ಆಳ್ವ, ಮಾಜಿ ಅಧ್ಯಕ್ಷೆರ್ ಕೆ. ಭುಜಂಗ ಶೆಟ್ಟಿ, ಸಂಚಾಲಕೆರ್ ನಾಗರಾಜ ಎನ್ ಶೆಟ್ಟಿ, ಟ್ರಸ್ಟಿ ಸುರೇಶ್ ಶೆಟ್ಟಿ ಗಂಧರ್ವ, ಗೌರವ ಪ್ರಧಾನ ಕಾರ್ಯದರ್ಶಿ ಸುಕೇಶ್ ವಿ. ರೈ, ಖಜಾಂಚಿ ರವಿ ರೈ ಬೊಯಿಸರ್, ಮಹಿಳಾ ವಿಭಾಗದ ಕಾರ್ಯಾಧ್ಯಕ್ಷೆ ಸುಜಾತ ಜಿ. ಶೆಟ್ಟಿ, ಯುವ ವಿಭಾಗದ ಕಾರ್ಯಾಧ್ಯಕ್ಷೆರ್ ಮುಕೇಶ್ ಶೆಟ್ಟಿ ವಿರಾರ್ ಪಾಲ್ ಪಡೆದಿತ್ತೆರ್.
ಅಂಚೆನೆ ಈ ಲೇಸ್ ದೊಟ್ಟಿಗೆ ಸಾಂಸ್ಕೃತಿಕ ಲೇಸ್ ಲ ನಡತ್ಂಡ್. ಈ ಲೇಸ್ ಡ್ ಒವ್ವೇ ಒಂಜಿ ಅಡ್ಡಿ ಬಾರಂದಿಲೆಕ್ಕ ಅವೆನ್ ವಿಘ್ನದ ಅಧಿಪತಿ ಗಣಪತಿ ದೇವೆರೆನ ಸುಗಿಪುನ್ ಯಶೋಧ ಬಿ. ಶೆಟ್ಟಿ ಮಲ್ತೆರ್. ಬೊಕ್ಕ ಬತ್ತಿ ಬಿನ್ನೆರೆನ್ ಪ್ರಕಾಶ್ ಶೆಟ್ಟಿ ಎದ್ಕೊನಿಯೆರ್. 80% ರ್ದ್ ಜಾಸ್ತಿ ಮಾರ್ಕ್ ಬೈದಿನ ಜೋಕುಲೆಗ್ ಮಾನಾದಿಗೆದ ಓಲೆ ಕೊರ್ದು ಮಾನಾದಿಗೆ ಮಲ್ತೆರ್.
ಆಟಿದ ಪೊಲಬುನ್ ಶಂಕರ ಅಳ್ವೆರ್ ಕೊರಿಯೆರ್ ಈ ಲೇಸ್ ನ್ ಚಂದ್ರಶೇಖರ್ ಸುಧಾರಿಕೆ ಮಲ್ತೆರ್.ಸುಕೇಶ್ ವಿ ರೈ ವಸೈ ಸೊಲ್ಮೆ ಸಂದೈತ ಮಲ್ತೆರ್. ಈ ಲೇಸ್ ದ ಅಕೇರಿಗ್ ವನಸ್ ದ ವ್ಯವಸ್ಥೆ ಇತ್ತ್ಂಡ್. ನೆಟ್ಟ್ 23 ರ್ದ್ ಎಚ್ಚ ಬಗೆತ್ತ ಆಟಿದ ತೆನಸ್ ನ್ ಅಟ್ಟಣೆ ಮಲ್ತ್ ದ್ ಇತ್ತೆರ್.
ದಕ್ಷಿಣಕನ್ನಡ ಬೊಕ್ಕ ಒಡಿಪು ಜಿಲ್ಲೆಡ್ ಪುಷ್ಯೆ ಬರ್ಸದ ಆರ್ಭಟ ಜೋರ್ ಅವೊಂದುಂಡ್. ಹವಾಮಾನ ಇಲಾಖೆ ಈ ರಡ್ಡ್ ಜಿಲ್ಲೆ ಬೊಕ್ಕ ಉತ್ತರ ಕನ್ನಡ ಜಿಲ್ಲೆಡ್ ರೆಡ್ ಅಲರ್ಟ್ ಘೋಷಣೆ ಮಲ್ತ್ ದ್ಂಡ್.
ಅಂದಾಜಿ 204.4 ಮಿಲಿ ಮೀಟರ್ ಬರ್ಸ ಆಪಿನ ಸಾಧ್ಯತೆ ಉಂಡು ಪಂದ್ ಇಲಾಖೆ ತೆರಿಪಾದ್ಂಡ್.
ಕುಡ್ಲ : ಬೆಂಗರೆ ವಿದ್ಯಾರ್ಥಿ ಸಂಘ ಯುವಕ ಮಂಡಲ ಬೊಕ್ಕ ಬೆಂಗರೆ ವಿದ್ಯಾರ್ಥಿ ಸಂಘ ಅಮೃತೋತ್ಸವ ಸಮಿತಿ ನೆತ್ತ ಒಟ್ಟುಸೇರಿಗೆಡ್ ಬೆಂಗ್ರೆ ರುದ್ರ ಭೂಮಿಡ್ ಸ್ವಚ್ಛತಾ ಲೇಸ್ ಬೊಕ್ಕ ವನಮಹೋತ್ಸವ ಲೇಸ್ ಬೆಂಗ್ರೆ ವಿದ್ಯಾರ್ಥಿ ಸಂಘ ನೆತ್ತ ಅಧ್ಯಕ್ಷೆರ್ ಸಂಜಯ್ ಸುವರ್ಣ ಬೆಂಗ್ರೆ ಮೆರೆನ ಮುತಾಲಿಕೆಡ್ ನಡತ್ಂಡ್.
ಈ ಪೊರ್ತುಡು ಬೆಂಗ್ರೆ ವಿದ್ಯಾರ್ಥಿ ಸಂಘ ಅಮೃತೋತ್ಸವ ಸಮಿತಿದ ಅಧ್ಯಕ್ಷೆರ್ ಚೇತನ್ ಬೆಂಗ್ರೆ, ಉಪಾಧ್ಯಕ್ಷೆರ್ ಪುಂಡಲಿಕ ಮೈಂದನ್, ಸಂಚಾಲಕೆರ್ ಭಾಸ್ಕರ್ ಪುತ್ರನ್, ಕಾರ್ಯದರ್ಶಿ ಪುಷ್ಪರಾಜ್, ಬೆಂಗರೆ ವಿದ್ಯಾರ್ಥಿ ಸಂಘದ ಪದಾಧಿಕಾರಿಲಾಯಿನ ಹರೀಶ್ ಸುವರ್ಣ, ಜ್ಯೋತಿ ಹರೀಶ್, ರಾಕೇಶ್ ಸುವರ್ಣ ಅಮೃತೋತ್ಸವ ಸಮಿತಿದ ಸದಸ್ಯೆರ್ ಸಚಿನ್ ಸುವರ್ಣ, ಲೋಕೇಶ್ ಸುವರ್ಣ, ಬಾಬು ಪ್ರಭಾಕರ್, ಹರೀಶ್ ಕಾಂಚನ್, ರಾಜೇಶ್ ಬೆಂಗ್ರೆ, ರಮೇಶ್ ಡಿ ಕರ್ಕೇರ, ತುಕಾರಾಂ ಸಾಲಿಯಾನ, ಪ್ರಶಾಂತ್ (ಸೋನು ), ಬೆಂಗ್ರೆ ವಿದ್ಯಾರ್ಥಿ ಸಂಘ ಯುಎಇ ದುಬೈದ ಸದಸ್ಯೆರ್ ಕಿಶೋರ್ ಬೆಂಗರೆ ಇತ್ತೆರ್. ಈ ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರಿಯೆರ್. ವನಮಹೋತ್ಸವ ಲೇಸ್ ನ್ ಹಿರಿದ ಸದಸ್ಯೆರ್ ಸುರೇಂದ್ರ ಸಾಲಿಯನ್ ಮಿತ್ತ ಮನೆ ಉದಿಪನ ಮಲ್ತೆರ್. ಈ ಪೊರ್ತುಡು ಮೆರೆನೊಟ್ಟಿಗೆ ಮಹಾನಗರ ಪಾಲಿಕೆದ ಸ್ವಚ್ಛತಾ ಕಾರ್ಮಿಕೆರ್ ಇತ್ತೆರ್.
ಉದ್ಯೋಗಿಲೆನ ಭವಿಷ್ಯ ನಿಧಿ ಸಂಸ್ಥೆ (EPFO) 2022-23 ತ್ತ ಹಣಕಾಸು ವರ್ಷಡ್ EPF ದ ಬಡ್ಡಿದ ರೇಟ್ 8.15 % ಕ್ಕ್ ಎಚ್ಚ ಮಲ್ದ್ಂಡ್.
ನೆರ್ದ್ ದುಂಬು ಅವು ಶೇ.8.10 % ಇತ್ತ್ಂಡ್. ಉದ್ಯೋಗಿಲೆನ ಭವಿಷ್ಯ ನಿಧಿ ಸಂಸ್ಥೆದ ಮಂಡಳಿ 2022-23 ತ್ತ ಆರ್ಥಿಕ ವರ್ಷಗ್ ಇಪಿಎಫ್ ಎಕೌಂಟ್ ಗ್ ಶೇ 8.15 % ಬಡ್ಡಿದ ಕಾಸ್ ನ್ ನಿಗದಿ ಮಲ್ತ್ ದ್ ಆಯಿನ್ ಅನುಮೋದನೆಗಾದ್ ಹಣಕಾಸ್ ಸಚಿವಾಲಯಗ್ ಕಡಪಾದ್ಂಡ್. ಆಗಸ್ಟ್ ತಿಂಗೊಲ್ ರ್ದ್ ಎಚ್ಚ ಬಡ್ಡಿದ ಕಾಸ್ ನಿಕ್ಲೆನ ಎಕೌಂಟ್ ಗ್ ಬೂರುಂಡು.
ಪುತ್ತೂರ್: ಬೈಕ್ ಸ್ಕಿಡ್ ಆದ್ ಜವನೆಯೊರಿ ಬೂರ್ದು ಅಲ್ಪನೆ ತೀರ್ ಪೋಯಿನ ಘಟನೆ ಉಬಾರ್- ಪುತ್ತೂರ್ ರೋಡ್ ದ ಕೆಮ್ಮಯಿದ‌ಲ್ಪ ಕೋಡೆ ರಾತ್ರೆ ನಡತ್ಂಡ್.
ಸೇಡಿಯಾಪು ನಿವಾಸಿ ಚೈತ್ರೇಶ್(20ವ) ತೀರ್ ಪೋಯಿನಾರ್.
ರೋಡ್ ಡ್ ನೀರ್ ಉಂತುದ್ ಎದುರ್ ಡ್ ಬತ್ತಿನ ಲಾರಿದ ಬೊಲ್ಪುಗ್ ರೋಡ್ ತೋಜಂದೆ ಬೈಕ್ ಸ್ಕಿಡ್ ಆದ್ ಬೂರ್ದು ತರೆಕ್ ಜೋರಾಯಿನ ಪೆಟ್ಟ್ ಆದ್ ಅಲ್ಪನೇ ತೀರ್ ಪೋತೆರ್.
ಈ ಘಟನೆದ ಜಾಗೆಗ್ ಪುತ್ತೂರ್ ಸಂಚಾರಿ ಪೊಲೀಸ್ ಬತ್ತ್ ದ್ ಪರಿಶೀಲನೆ ಮಲ್ದೆರ್.
ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಯೋಗ ಸುಯೋಗ ಸರಣಿ ಲೇಸ್ ದ 17ನೇ ಸಂಚಿಕೆ ಜುಲೈ 24 ಕ್ಕ್ ಸೋಮಾರ ಬಯ್ಯಗ್ 4.15 ಕ್ಕ್ ಪ್ರಸಾರ ಆಪುಂಡು.
ಈ ಲೇಸ್ ಡ್ ಒಡಿಪು ಚಿಟ್ಪಾಡಿದ ಶ್ರೀ ಗುರುಕೃಪಾ ಯೋಗ ವಿದ್ಯಾ ಪ್ರತಿಷ್ಠಾನದ ಯೋಗ ಶಿಕ್ಷಕೆರ್ ಆರ್ ಶಿವಕುಮಾರ್ ಪಾಲ್ ಪಡೆಯೆರೆ ಉಲ್ಲೆರ್. ಜುಲೈ 25 ಕ್ಕ್ ಮಧ್ಯಾಹ್ನ 12.15 ಕ್ಕ್ ಕುಡೊರ ಪ್ರಸಾರ ಆಪುಂಡು.
ಅಮಲ್ ಸೊತ್ತುನ್ ಮಾರಾಟ ಮಲ್ತೊಂದು ಇತ್ತಿನಾಯನ್ ಕುಡ್ಲ ಸಿಸಿಬಿ ಪೊಲೀಸೆರ್ ಕಾರ್ಯಾಚರಣೆ ನಡಪಾದ್ ಅರೆಸ್ಟ್ ಮಲ್ದೆರ್.
ಈ ಆರೋಪಿ, ಬೆಂಗ್ಲೂರ್ ರ್ದ್ ಕುಡ್ಲಗ್, ಅಮಲ್ ಸೊತ್ತು ಎಂಡಿಎಂಎನ್ ದೆತೊಂದು ಕುಡ್ಲ ಪೇಂಟೆದ ಪಡೀಲ್ ಕೆಂಬಾರ್ ಪರಿಸರಡ್ ಸಾರ್ವಜನಿಕೆರೆಗ್ ಮಾರಾಟ ಮಲ್ತೊಂದು ಇತ್ತೆ. ಈ ಇಸಯ ತೆರಿದ್ ಕುಡ್ಲ ಸಿಸಿಬಿ ಘಟಕದ ಎಸಿಪಿ ಆಯಿನ ಪಿ ಎ ಹೆಗಡೆ ಮೆರೆನ ಮುತಾಲಿಕೆದ ಸಿಸಿಬಿ ಪೊಲೀಸೆರ್ ಕುಡ್ಲ ವಿ.ಹೆಚ್.ಜೆ ಕಾಂಪೌಂಡ್ ದ ಹರ್ಷಿತ್ ಶೆಟ್ಟಿ (29) ನ್ ಅರೆಸ್ಟ್ ಮಲ್ದೆರ್.
ಈ ಆರೋಪಿಡ ಇತ್ತಿನ ಒಟ್ಟು 25 ಗ್ರಾಂ ತೂಕದ ರೂ. 1,25,000/- ಬಿಲೆತ್ತ ಎಂಡಿಎಂಎ ಅಮಲ್ ಸೊತ್ತು, 1 ಮೊಬೈಲ್ ಫೋನ್, ಬೊಕ್ಕ ಡಿಜಿಟಲ್ ತೂಕ ಮಾಪನನ್ ವಶಕ್ಕ್ ಪಡೆತೆರ್. ಈ ಬಗ್ಗೆ ಕಂಕನಾಡಿ ನಗರ ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.
ಈ ಕೇಸ್ ದ ಕಾರ್ಯಾಚರಣೆಡ್ ಸಿಸಿಬಿ ಘಟಕದ ಎಸಿಪಿ ಪಿ ಎ ಹೆಗಡೆ, ಪೊಲೀಸ್ ನಿರೀಕ್ಷಕೆರ್ ಶ್ಯಾಮ್ ಸುಂದರ್ ಹೆಚ್ ಎಂ, ಪಿಎಸ್ಐ ನರೇಂದ್ರ ಬೊಕ್ಕ ಸಿಸಿಬಿ ಸಿಬ್ಬಂದಿಲು ಇತ್ತೆರ್.
ಕುಕ್ಕೆ ಸುಬ್ರಹ್ಮಣ್ಯ: ಸುಬ್ರಹ್ಮಣ್ಯ ಪರಿಸರ ಸೇರಿನಂಚೆನೆ ಘಟ್ಟ ಪ್ರದೇಶಡ್ ಭಾರೀ ಬರ್ಸ ಬೈದ್ಂಡ್.
ಸನಿಯಾರರ್ದ್ ಐತಾರ ಬೊಲ್ಪು ಮುಟ್ಟ ಬತ್ತಿನ ಭಾರೀ ಬರ್ಸಗ್ ಕುಮಾರಧಾರ ತುದೆ ನೀರ್ ರ್ದ್ ದಿಂಜಿದ್ಂಡ್.
ನೇರ್ದಾವೆರ ಕುಮಾರಧಾರಾ ಸ್ನಾನಘಟ್ಟ ಮುರ್ಕುದುಂಡು. ಅತ್ತಂದೆ ಲಗೇಜ್ ಕೋಣೆ, ಶೌಚಾಲಯ ಸೇರಿನಂಚೆನೆ ಮಾತಲ ಮುರ್ಕುದುಂಡು. ಕುಮಾರಧಾರದ ಉಪನದಿ ದರ್ಪಣತೀರ್ಥಡ್ ನೀರ್ ದಿಂಜಿದ್ ಮಂಜೇಶ್ವರ- ಸುಬ್ರಹ್ಮಣ್ಯ ರಾಜ್ಯ ಮಾರ್ಗಗ್ ಬೈದ್ಂಡ್. ನೆರ್ದ್ ಮಾರ್ಗಡ್ ಗಾಡಿ ಸಂಚಾರಗ್ ತೊಂದರೆ ಆತ್ಂಡ್.
ಕೃಷಿ ತೋಟಗ್ ನೀರ್ ಬತ್ತ್ ದ್, ಸುಬ್ರಹ್ಮಣ್ಯ, ಕೊಲ್ಲಮೊಗು, ಬಿಸಿಲೆ, ಅಡ್ಡಹೊಳೆ, ಸೋಮಾರಪೇಟೆಡ್ ಭಾರೀ ಬರ್ಸದಾವೆರ ಕುಮಾರಧಾರಾ ತುದೆಟ್ಟ್ ನೀರ್ ದ ಮಟ್ಟ ಎಚ್ಚಾತ್ಂಡ್. ಅಂಚಾದ್ ತುದೆತ್ತ ಬರಿಕ್ಕ್ ಪೋಯೆರೆ ಬಲ್ಲಿ ಪಂದ್ ದೇವಲ್ಯದ ಭಕ್ತೆರೆಗ್ ಸೂಚನೆ ಕೊರ್ತೆರ್. ಮುಲ್ಪ ಪೊಲೀಸೆರೆನ್, ಗೃಹರಕ್ಷಕ ದಳರ್ದ್ ಸ್ನಾನ ಘಟ್ಟ ಮುಟ್ಟ ಕಾವಲ್ ಉಂತಾದೆರ್. ಗೃಹರಕ್ಷಕ, ಎಸ್‌ಡಿಆರ್‌ಎಫ್ ಕೂಟನ್ ಆಯೋಜನೆ ಮಲ್ದೆರ್.
