ಮುಲ್ಕಿ ಅರಮನೆ ವೆಲ್ಪೇರ್ ಬೊಕ್ಕ ಚಾರಿಟೇಬಲ್ ಟ್ರಸ್ಟ್ (ರಿ.) ಪಡುಪಣಂಬೂರು ಬೊಕ್ಕ ಪ್ರಿಯದರ್ಶಿನಿ ಕೋ ಆಪರೇಟಿವ್ ಸೊಸೈಟಿ ಹಳೆಯಂಗಡಿ ಒಟ್ಟುಸೇರಿಗೆಡ್ ಡಿ.24 ಕ್ಕ್ ಮುಲ್ಕಿ ಅರಮನೆಟ್ಟ್ ಸಾಂಸ್ಕೃತಿಕ ವೈಭವ ನಡಪರೆ ಉಂಡು.
ಈ ಲೇಸ್ ಮುಲ್ಕಿ ಸೀಮೆ ಅರಸು ಕಂಬುಲದ ಪೊರ್ತುಡು ವಾಯ್ಸ್ ಆಫ್ ಆರಾಧನಾ ಬೊಕ್ಕ ಕೈತಲ್ ದ ಪ್ರತಿಭೆಲೆರ್ದ್ ನಡಪುಂಡು.
ಕಾಪು: ನಾಗಸ್ವರ ವಾದಕೆರ್ ಶೇಖ್ ಜಲೀಲ್ ಸಾಹೇಬ್ (56) ಮೇರ್ ಸೋಮಾರ ತಿಗಲೆ ಬೇನೆಡ್ ತೀರ್ ಪೋಯೆರ್.
ಇನಿ ಬೊಲ್ಪುಗು ನಾಗಸ್ವರ ಪುಗೆಲ್ ದೀವೊಂದು ಇಲ್ಲರ್ದ್ ಪಿದಯಿ ಬೈದೆರ್. ಬೊಕ್ಕ ಹೋಟೇಲ್ ಡ್ ಚಾ ಪರಿಯೆರೆ ಕುಲ್ಲುನಗ ತಿಗಲೆ ಬೇನೆ ಬೈದ್ಂಡ್. ಆಂಡ, ಆಸ್ಪತ್ರೆಗ್ ಲೆತೊಂದು ಪೋನಗ ಮೇರ್ ತಾದಿಡ್ ತೀರ್ ಪೋತೆರ್ ಪಂದ್ ತೆರಿದ್ ಬೈದ್ಂಡ್.
ಮೇರ್ ಸನಿಯಾರ ಕೊಪ್ಪಲಂಗಡಿಡ್ ನಡತಿನ ಮುಳ್ಳಮುಟ್ಟೆ, ಐತಾರ ಕಾಪು ಶ್ರೀ ಲಕ್ಷ್ಮೀ ಜನಾರ್ದನ ದೇವಲ್ಯಡ್ ತುಡರ್ ಪರ್ಬ ಬೊಕ್ಕ ಬಲಿ ಪಿದಾಡುನ ಪೊರ್ತುಡು ನಾಗಸ್ವರ ಸೇವೆ ಕೊರ್ತೆರ್. ಮೇರ್ ಕಾಪು ಸಾರ ಸೀಮೆದ ಒಡೆಯೆ ಶ್ರೀ ಲಕ್ಷ್ಮೀ ಜನಾರ್ದನ ದೇವೆರೆನ ಸನ್ನಿಧಿ, ಕಾಪು ಮೂಜಿನೇ ಮಾರಿಗುಡಿ, ಕಾಪು ಮಾರಿಯಮ್ಮ ದೇವಿ ಸನ್ನಿಧಿ ಬೊಕ್ಕ ಕಾಪು ಸಾರ ಸೀಮೆದ ಸುಮಾರ್ ದೇವಲ್ಯ, ಗರಡಿಡ್ ನಾಗಸ್ವರ ವಾದಕೆರಾದ್ ಸೇವೆ ಕೊರೊಂದು ಇತ್ತೆರ್. ಮೆರೆಗ್ ಬೊಡೆದಿ, ಮಗಲ್, ಸಹೋದೆರೆಗ್, ಬಂಧು ಮಿತ್ತೆರ್, ಅಭಿಮಾನಿಲು ಉಲ್ಲೆರ್.
ಬೈಂದೂರು: ತಾಲೂಕ್ ದ ಗಂಗೊಳ್ಳಿಡ್ ಲಂಗರು ಪಾಡಿನ ಬೋಟ್ ಗ್ ಆಕಸ್ಮಿಕವಾದ್ ತೂ ಪೊತ್ತ್ ದ್ ಕರೆಂಚಿದ್ಂಡ್.
ತುಡರ್ ಪರ್ಬದ ಲೆಕ್ಕೊಡು ಮೀನುಗಾರೆರ್ ಪೂಜೆ ಮಲ್ಪುನಗ ತೂ ಪೊತ್ತ್ ದ್ಂಡ್ ಪಂದ್ ಪ್ರತ್ಯಕ್ಷದರ್ಶಿಲು ತೆರಿಪಾದೆರ್.
ಒಂಜಿ ಬೋಟ್ ಗ್ ಪತ್ತಿನ ತೂ ಬೊಕ್ಕ ಪತ್ತೊಂದು, ಪತ್ತೊಂದು ಏಳ್ ಮೀನುಗಾರಿಕಾ ಬೋಟುಗ್ ಪತ್ತ್ ದ್ಂಡ್. ನೆರ್ದ್ ಕೋಟಿರ್ದ್ ಎಚ್ಚ ರೂ. ನಷ್ಟ ಆತ್ಂಡ್.
ಪುತ್ತೂರು: ಕೆಲವು ದಿನತ್ತ ಪಿರವು ಕೊಲೆ ಆಯಿನ ಅಕ್ಷಯ್ ಕಲ್ಲೇಗ ಮೆರೆನ ಇಲ್ಲಗ್ ಸಂಸದೆರ್ ನಳಿನ್ ಕುಮಾರ್ ಭೇಟಿ ಕೊರ್ದು ಕುಟುಂಬಸ್ಥೆರೆಗ್ ಸಾಂತ್ವನ ಪಂತೆರ್.
ಈ ಪೊರ್ತುಡು ಅಕ್ಷಯ್ ನ ಅಮ್ಮೆರ್ ಚಂದ್ರಶೇಖರ್, ಕೊಲೆ ಕೇಸ್ ದ ಆರೋಪಿಲೆಗ್ ಶಿಕ್ಷೆ ಕೊರೊಡು ಪಂದ್ ನಳಿನ್ ಕುಮಾರ್ ಡ ಆಗ್ರಹ ಮಲ್ತೆರ್. ಮೆರೆನೊಟ್ಟಿಗೆ ಮಾಜಿ ಶಾಸಕೆರ್ ಸಂಜೀವ ಮಠಂದೂರು ಇತ್ತೆರ್.
ನವೆಂಬರ್ 6 ಕ್ಕ್ ಬಯ್ಯಗ್ ಪುತ್ತೂರುದ ನೆಹರು ನಗರಡ್ ಕಲ್ಲೇಗ ಟೈಗರ್ಸ್ ಪಿಲಿಏಸ ಕೂಟದ ಮುಖ್ಯಸ್ಥೆ ಅಕ್ಷಯ್ ಕಲ್ಲೇಗನ ಕೊಲೆ ಆತ್ಂಡ್.
ಬೆಂಗ್ಲೂರು: ತುಡರ್ ಪರ್ಬದ ಲೆಕ್ಕೊಡು ಕೋಡೆ ರಾತ್ರೆ ಪಟಾಕಿ ಬುಡುನಗ ಬೆಂಗ್ಲೂರ್ ಡ್ 26 ಜನಕ್ಕ್ ಪೆಟ್ಟಾಯಿನ ಘಟನೆ ನಡತ್ಂಡ್.
ಪೆಟ್ಟಾಯಿನಕ್ಲೆನೆಟ್ಟ್ 22 ಜನ ನಾರಾಯಣ ನೇತ್ರಾಲಯಡ್ ಚಿಕಿತ್ಸೆ ಪಡೆವೊಂದು ಉಲ್ಲೆರ್. ನೆಟ್ಟ್ 10 ಜನತ್ತ ಸ್ಥಿತಿ ಗಂಭೀರ ಆತ್ಂಡ್ ಪಂದ್ ಆಸ್ಪತ್ರೆದ ಮುಖ್ಯಸ್ಥೆರ್ ರೋಹಿತ್ ಶೆಟ್ಟಿ ತೆರಿಪಾದೆರ್. ಒರಿನ 4 ಜನ ಬೆಂಗ್ಲೂರ್ ದ ಮಿಂಟೋ ಆಸ್ಪತ್ರೆಡ್ ಚಿಕ್ಸಿತ್ಸೆ ಪಡೆವೊಂದು ಉಲ್ಲೆರ್.
ಕೊಡಗು: ದೇವಲ್ಯದ ಜಾಲ್ ಡ್ ನಿಧಿ ಪತ್ತೆ ಆಯಿನ ಘಟನೆ ಕೊಡಗು ಜಿಲ್ಲೆ ವಿರಾಜಪೇಟೆ ತಾಲೂಕ್ ದ ಆನಂದಪುರ ಗ್ರಾಮಡ್ ನಡತ್ಂಡ್.
ಟಾಟಾ ಕಾಫಿ ಸಂಸ್ಥೆಗ್ ಸೇರಿನ ಕಾಫಿತೋಟಡ್ ಇಪ್ಪುನ ಪಿರಾಕ್ ದ ಈಶ್ವರ ದೇವಲ್ಯದ ಜಾಲ್ ಡ್ ನಿಧಿ ಪತ್ತೆ ಆತ್ಂಡ್. ಉಂದು ದೇವಲ್ಯದ ಜಾಲ್ ಡ್ ಕೆಲಸ ಮಲ್ತೊಂದು ಇತ್ತಿನ ಕಾರ್ಮಿಕೆರೆಗ್ ಭೂಮಿದಡಿಟ್ಟ್ ಇತ್ತಿನ ಮಣ್ಣ್ ದ ಮಡಿಕೆ ತಿಕ್ ದ್ಂಡ್. ಕೂಡ್ಲೆ ಟಾಟಾ ಕಾಫಿ ತೋಟದ ವ್ಯವಸ್ಥಾಪಕೆರ್ ಪೊಲೀಸೆರೆಗ್ ಪೊಲಬು ಕೊರ್ತೆರ್. ವಿರಾಜಪೇಟೆ ತಹಶೀಲ್ದಾರ್ ಸಮ್ಮುಖಡ್ ಮಹಜರು ಮಲ್ತ್ ದ್ ಬೊಕ್ಕ ಕೊಡಗು ಜಿಲ್ಲಾಧಿಕಾರಿ ವಶಕ್ಕ್ ನಿಧಿನ್ ಕೊರ್ತೆರ್. ಈ ಬಗೆಟ್ಟ್ ತನಿಖೆ ನಡತೊಂದು ಉಂಡು.
ಒಡಿಪು ತುಳುನಾಡ ರಕ್ಷಣಾ ವೇದಿಕೆ ವಿದ್ಯಾರ್ಥಿ ಘಟಕದ ಸಭೆ ನ.11 ಸನಿಯಾರ ಒಡಿಪು ಜಿಲ್ಲಾ ಕಚೇರಿಡ್ ಒಡಿಪು ತಾಲೂಕ್ ಘಟಕದ ಗುರ್ಕಾರೆ ಕೃಷ್ಣಕುಮಾರ್ ಮೆರೆನ ಗುರ್ಕಾರ್ಮೆಡ್ ನಡತ್ಂಡ್.
ಈ ಸಭೆಟ್ಟ್ ಒಡಿಪು ಜಿಲ್ಲೆ ವೀಕ್ಷಕೆರ್ ಫ್ರ್ಯಾಂಕಿ ಡಿಸೋಜ ಬೊಕ್ಕ ಒಡಿಪು ತಾಲೂಕ್ ಘಟಕದ ಶಿಫಾರಸು ಮಿತ್ತ್ ಕೇಂದ್ರೀಯ ಮಂಡಳಿ ಗುರ್ಕಾರೆ ಯೋಗೀಶ್ ಶೆಟ್ಟಿ ಜಪ್ಪು ಮೇರ್ ಅಭಿಷೇಕ್ ಮೆರೆನ್ ವಿದ್ಯಾರ್ಥಿ ಘಟಕದ ಗುರ್ಕಾರೆಯಾದ್ ಆಯ್ಕೆ ಮಲ್ತೆರ್.
ತುಳುನಾಡ ರಕ್ಷಣಾ ವೇದಿಕೆ ಸ್ಥಾಪಕ ಗುರ್ಕಾರೆ ಯೋಗೀಶ್ ಶೆಟ್ಟಿ ಜಪ್ಪು ಮೇರ್ ಉದಿಪನ ಭಾಷಣ ಮಲ್ತ್ ದ್, ವಿದ್ಯಾರ್ಥಿಲು ಪೋಷಕೆರ್ ಬೊಕ್ಕ ಶಿಕ್ಷಣದೊಟ್ಟಿಗೆ ಎಡ್ಡೆ ಸಂಬಂಧನ್ ಬುಲೆಪಾವೊಂದು ಸಮಾಜಗ್ ಎಡ್ಡೆ ಆಸ್ತಿ ಅವೊಡು ಪಂದ್ ಪಂಡೆರ್.
ಈ ಪೊರ್ತುಡು ಒತ್ತು ಗುರ್ಕಾರೆ ಜಯರಾಮ ಪೂಜಾರಿ, ಒಡಿಪು ತಾಲೂಕ್ ಘಟಕ ಪ್ರಧಾನ ಕಾರ್ಯದರ್ಶಿ ರೋಷನ್ ಡಿಸೋಜಾ, ಒಡಿಪು ತಾಲೂಕ್ ಮಹಿಳಾ ಘಟಕ ಪ್ರಧಾನ ಕಾರ್ಯದರ್ಶಿ ನಾಗಲಕ್ಷ್ಮಿ, ತುರವೇ ಮುಖಂಡೆರ್ ಯಶು ಪಕಳ, ಅನಿಲ್ ಪೂಜಾರಿ, ಸುನಂದ, ಗುಣವತಿ, ಗುಲಾಬಿ, ಹೇಮಾ, ನಿರ್ಮಲ ಮೆಂಡನ್, ಪದುಕೆರ್ ಬೊಕ್ಕ ಸಮರ್ಥ್, ಸಂದೇಶ್, ಗೌರವ್, ಸಿಂಚನ್, ಅಧಿತ್, ಮೋಹಿತ್, ಧನೇಶ್ ಸೇರಿನಂಚೆನೆ ಸುಮಾರ್ ಜನ ವಿದ್ಯಾರ್ಥಿಲು ತುಳುನಾಡ ರಕ್ಷಣಾ ವೇದಿಕೆದಕುಲು ಪಾಲ್ ಪಡೆದಿತ್ತೆರ್.
ಅಮೆರಿಕದ ಸೇನಾ ಹೆಲಿಕಾಪ್ಟರ್ ಮೆಡಿಟರೇನಿಯನ್ ಕಡಲ್ ಗ್ ಬೂರ್ದು 5 ಜನ ತೀರ್ ಪೋಯೆರ್ ಪಂದ್ ಅಮೆರಿಕದ ಅಧಿಕಾರಿಲು ತೆರಿಪಾದೆರ್.
ನ.10 ಕ್ಕ್ ಟೇಕಾಫ್ ಆಯಿನ ಹೆಲಿಕಾಪ್ಟರ್ ತಾಂತ್ರಿಕ ದೋಷರ್ದ್ ಕಡಲದ ಗ್ ಬೂರ್ದುಂಡು. ಈ ಘಟನೆದ ಬಗೆಟ್ಟ್ ಅಧ್ಯಕ್ಷೆರ್ ಬಿಡೆನ್ ಸಂತಾಪ ತೆರಿಪಾದೆರ್. ಅಂಚೆನೆ ತೀರ್ ಪೋಯಿನ ಯೋಧೆರೆನ ಸೇವೆನ್ ಮೆಚ್ಚಿದೆರ್. ಪಶ್ಚಿಮ ಏಷ್ಯಾದ ಮಿತ್ತ್ ನಿಗಾ ದೀಯೆರೆ ಅಮೆರಿಕ ಈ ಪ್ರದೇಶಡ್ ಪಡೆನ್ ನಿಯೋಜನೆ ಮಲ್ದೆರ್ ಪಂದ್ ತೆರಿದ್ ಬೈದ್ಂಡ್.
ಬೆಂಗ್ಲೂರ್ ದ ಬಾಣಸವಾಡಿದ ರಿಂಗ್ ರೋಡ್ ಡ್ ಇಪ್ಪುನ ನಾಲ್ ಮಾಳಿಗೆದ ಕಟ್ವಾನಡ್ ಕೋಡೆ ರಾತ್ರೆ ತೂ ಪೊತ್ತ್ ದ್ಂಡ್.
ಈ ಪೊರ್ತುಡು ಉಲಯಿ ಇತ್ತಿನ 2 ಜನ ಭದ್ರತಾ ಸಿಬ್ಬಂದಿನ್ ರಕ್ಷಣೆ ಮಲ್ದೆರ್. ಅಗ್ನಿಶಾಮಕ ದಳ ಸಿಬ್ಬಂದಿ ತೂ ತೆಕ್ಕಾಂಡಲ ತರಬೇತಿ ಸಂಸ್ಥೆ, ಫರ್ನೀಚರ್ ಮಾರಾಟ ಮಾಳಿಗೆಡ್ ಇತ್ತಿನ ಲಕ್ಷರ್ದ್ ಎಚ್ಚ ಸೊತ್ತುಲು ತೂಟ್ಟ್ ಪೊತ್ತ್ ದ್ಂಡ್.
ದೇವೆರ್ನ ಅನುಗ್ರಹಡ್ ಅರವಿಂದ ಶೆಟ್ರ್ ಮಲ್ಲ ತಾನಮಾನ ಪಡೆತೆರ್: ಐಕಳ ಹರೀಶ್ ಶೆಟ್ಟಿ
ಮೀರಾರೋಡ್: ಮೂಲತಃ ಕರ್ನಾಟಕರ್ದ್ ಬತ್ತ್ ದ್ ಕರ್ಮ ಭೂಮಿ ಆಯಿನ ಈ ಮಹಾರಾಷ್ಟ್ರಡ್ ತನ್ನ ಅಚಲ ಪರಿಶ್ರಮದೊಟ್ಟಿಗೆ ಒರಿ ಯಶಸ್ವಿ ಉದ್ಯಮಿಯಾದ್, ರಾಜಕೀಯ ನೇತಾರೆಯಾದ್, ಜನಕ್ಲೆನ ಸುಖಃ-ದುಃಖಡ್ ಪಾಲ್ ಪಡೆದ್ ಸಮಾಜ ಸೇವೆ ಮಲ್ತೊಂದು ಇಪ್ಪುನ ಅರವಿಂದ್ ಶೆಟ್ಟಿ ಮೆರೆನ ಜೀವನದ ನಡೆ-ನುಡಿತ್ತ ತಾದಿ ಮೆಚ್ಚೊಡಾಯಿನವು. ಪರಿವಾರದ ಸದಾ ಪ್ರೋತ್ಸಾಹರ್ದ್ ಅರವಿಂದ ಶೆಟ್ಟಿ ಮೇರ್ ಇತ್ತೆಲ ಯಶಸ್ವಿ ರಾಜಕೀಯ ನೇತಾರೆಯಾದ್ ದುಂಬರಿವೊಂದು ಇಪ್ಪುನವು ಸಂತೋಷ ಆತ್ಂಡ್. ದೇವೆರೆನ ಅನುಗ್ರಹದ ಸಾಕಾರರ್ದ್ ಅರವಿಂದ ಶೆಟ್ಟಿ ಮೇರ್ ಇತ್ತೆ ಮಲ್ಲ ತಾನಮಾನ ಪಡೆತೆರ್. ಮೇರ್ ಜಾಗತಿಕ ಬಂಟರ ಫೆಡರೇಶನ್ ದ ಮಹಾದಾನಿ ಆದ್ ದಾನರೂಪದ ಕಾಸ್ ರ್ದ್ ಸಮಾಜೊಗಾದ್ ಉಪಯೋಗ ಮಲ್ತೊಂದು ಉಲ್ಲೆರ್ ಪಂದ್ ಜಾಗತಿಕ ಬಂಟರ ಫೆಡರೇಶನ್ ದ ಗುರ್ಕಾರೆ ಐಕಳ ಹರೀಶ್ ಶೆಟ್ಟಿ ಮೇರ್ ಪಂಡೆರ್.
ಮೇರ್ ಕನಕೀಯ ರೋಡ್ ಡ್ ಇಪ್ಪುನ ಶೆಹಣಾಯಿ ಸಭಾಗೃಹಡ್ ಮೀರಾಭಾಯಂದರ್ ದಕ್ಷಿಣ ಭಾರತೀಯ ಬಿಜೆಪಿ ಘಟಕ ಬೊಕ್ಕ ಕೈತಲ್ ದ ಸಂಘ-ಸಂಸ್ಥೆಲು ಆಯೋಜನೆ ಮಲ್ತಿನ ಉದ್ಯಮಿ, ರಾಜಕೀಯ ನೇತಾರೆ ಅರವಿಂದ್ ಆನಂದ ಶೆಟ್ಟಿ 51ನೇ ಪುಟ್ಟುದಿನತ್ತ ಲೆಕ್ಕೊಡು ನಡತಿನ ಗೌಜಿದ ಲೇಸ್ ಡ್ ಪಾತೆರ್ದ್, ಬಡಪತ್ತ್ ದಕ್ಲೆನ ಸೇವೆ ಮಲ್ಪುನನೇ ಪುಣ್ಯದ ಕೆಲಸ ಆತ್ಂಡ್. ಬಡಪತ್ತ್ ದಕ್ಲೆಗ್ ಮಾತ ವಿಧಟ್ಲಾ ಪ್ರೋತ್ಸಾಹ ಮಲ್ತ್ ದ್ ಅಕ್ಲೆನ್ ಮಿತ್ತ್ ಕನಯೆರೆ ಪ್ರಯತ್ನ ಮಲ್ಪುನ ಕೆಲಸಲು ನಡಪೊಡು. ನೆರ್ದ್ ನಮ್ಮ ಆತ್ಮಬಲದ-ಸಂತೃಪ್ತಿ ಮಾತ್ರ ಅತ್ತಂದೆ ಸಮಾಜದ ಆಶೀರ್ವಾದನ್ ಪಡೆವೊಡು. ಏಪಲ ಸಮಾಜ ಸೇವೆನ್ ಮಲ್ತೊಂದು ಇಪ್ಪುನ ಮೆರೆನ ನನದ ಜೀವನ ಯಶಸ್ವಿ ಆವಡ್, ದೇವೆರ್ ಆಯುರಾರೋಗ್ಯ ಭಾಗ್ಯ-ಸುಖ-ಸಂಪತ್ತ್ ನ್ ಏಪಲ ಕೊರಡ್ ಪಂದ್ ಪುಟ್ಟುದಿನತ್ತ ಎಡ್ಡೆಪ್ಪು ಬಯಕಿಯೆರ್.
ಮಾಜಿ ಎಂ.ಎಲ್.ಎ. ನರೇಂದ್ರ ಮೆಹ್ತಾ ಮೇರ್ ಪಾತೆರ್ದ್, ಜೀವನಡ್ ಸಮಾಜ ಸೇವೆ ಮಲ್ಪುನಲ್ಪ ಅಯಿನವೇ ಆಯಿನ ಶೈಲಿ ಉಂಡು. ಸಾಧ್ಯ ಆಯಿನಾತ್ ಜನಸೇವೆ ಮಲ್ತೊಂದು ಇಪ್ಪೊಡು. ಅರವಿಂದ ಶೆಟ್ಟಿ ಮೇರ್ ಎನ್ನ ಆತ್ಮೀಯೆರ್. 51 ವರ್ಷದ ಮೇರ್ ಯುವ ಪ್ರತಿನಿಧಿಲೆಕ್ಕ ಸಮಾಜ ಸೇವೆನ್ ಮಲ್ತೊಂದು ಉಲ್ಲೆರ್. ನಮ ಮಾತ ಬೇತೆ ಬೇತೆ ರಾಜ್ಯಲೆರ್ದ್ ಬತ್ತಿನಕುಲು ಆಂಡಲ ನಮ್ಮ ಎಡ್ಡೆ ತನರ್ದ್ ಈ ಮಣ್ಣ್ ಡ್ ಮನ್ನಣೆ ತಿಕೊಂದು ಉಂಡು. ಎಡ್ಡೆ ಸ್ಥರಟ್ಟ್ ಸಮಾಜ ಸೇವೆ ಮಲ್ತೊಂದು ಇಪ್ಪುನ ಅರವಿಂದ ಶೆಟ್ಟಿ ಮೆರೆನ ರಾಜಕೀಯ ಭವಿಷ್ಯ ಉತ್ತರೋತ್ತರವಾದ್ ಉಜ್ವಲ ಅವಡ್ ಪಂದ್ ಪುಟ್ಟು ದಿನತ್ತ ಎಡ್ಡೆಪ್ಪು ಬಯಕಿಯೆರ್.
ಡಾ. ಯನ್. ಎ. ಹೆಗ್ಡೆ, ಡಾ. ಭಾಸ್ಕರ್ ಶೆಟ್ಟಿ, ವಿರಾರ್ ಶಂಕರ್ ಶೆಟ್ಟಿ, ರಂಜನ್ ಶೆಟ್ಟಿ, ಡಾ. ಅರುಣೋದಯ ರೈ ಬಿಳಿಯೂರುಗುತ್ತು, ರತ್ನಾಕರ್ ಶೆಟ್ಟಿ ಮುಂಡ್ಕೂರ್, ಸುಮತಿ ಆರ್. ಶೆಟ್ಟಿ ಪುಟ್ಟು ದಿನತ್ತ ಎಡ್ಡೆಪ್ಪು ಬಯಕ್ ದ್ ಅರವಿಂದ ಶೆಟ್ಟಿ ಮೆರೆನ ಗುಣಗಾನ ಮಲ್ತೆರ್.
ಕಟೀಲ್ ದೇವಲ್ಯದ ಲಕ್ಷ್ಮೀ ನಾರಾಯಣ ಅಸ್ರಣ್ಣ, ಕಾಶಿಮೀರಾ ಭಾಸ್ಕರ್ ಶೆಟ್ಟಿ, ನಟೆ ದಯಾ ಶೆಟ್ಟಿ, ಗಿರೀಶ್ ಶೆಟ್ಟಿ ತೆಳ್ಳಾರ್, ಪದ್ಮನಾಭ ಪಯ್ಯಡೆ, ಬಳ್ಕುಂಜೆ ಗುತ್ತಿನಾರ್ ಕೊಟ್ರಪಾಡಿ ರವೀಂದ್ರ ಶೆಟ್ಟಿ, ಸಂತೋಷ್ ಪುತ್ರನ್, ಶಿವ್ ಪ್ರಸಾದ್ ಶೆಟ್ಟಿ, ರವೀಂದ್ರ ಶೆಟ್ಟಿ ದಹಿಸರ್ ಮಾತ್ರ ಅತ್ತಂದೆ ಪರಿಸರದ ಸುಮಾರ್ ಸಂಸ್ಥೆಲೆನ ಪದುಕೆರ್, ಮಹಾನಗರ ಪಾಲಿಕೆದ ಮಾಜಿ ನಗರ ಸೇವಕೆರ್, ರಾಜಕೀಯ ನೇತಾರೆರ್ ಸೇರಿನಂಚೆನೆ ಜನಸಾಗರನೇ ಅರವಿಂದ ಶೆಟ್ಟಿ ಮೆರೆಗ್ ಎಡ್ಡೆಪ್ಪು ಬಯಕ್ಂಡ್.
ಸುರುಟ್ಟ್ ಜೋಕುಲೆರ್ದ್ ನೃತ್ಯ ಕಾರ್ಯಕ್ರಮ ನಡತ್ಂಡ, ಬಿನ್ನೆರೆನ ಸಮ್ಮುಖಡ್, ಅರವಿಂದ ಶೆಟ್ಟಿ ಮೆರೆನ ಅಮ್ಮ ಬೇಬಿ (ಲಕ್ಷ್ಮೀ) ಎ. ಶೆಟ್ಟಿ, ಬೊಡೆದಿ ಪಲ್ಲವಿ ಶೆಟ್ಟಿ ಬೊಕ್ಕ ಪರಿವಾರದಕುಲು ಕೇಕ್ ಕಟ್ ಮಲ್ಪುನ ಮುಖೇನ ಪುಟ್ಟು ದಿನತ್ತ ಆಚರಣೆನ್ ಗೌಜಿಡ್ ಮಲ್ತೆರ್. ಲೇಸ್ ನ್ ರಂಗ ನಟೆ ಜಿ. ಕೆ. ಕೆಂಚನ ಕೆರೆ ಬೊಕ್ಕ ದೇವೇಂದ್ರ ಪೊರ್ವಾಲ್ ಮೊಕುಲು ಸುಧಾರಿಕೆ ಮಲ್ತೆರ್.
