ಕಳಸ : ವಿಧಾನ ಪರಿಷತ್ ಗ್ ರಡ್ಡನೇ ಅವಧಿಗ್ ಉಪ ಸಭಾಪತಿಯಾದ್ ಆಯ್ಕೆ ಆಯಿನ ವಿಧಾನ ಪರಿಷತ್ ಸದಸ್ಯೆರ್ ಎಂ.ಕೆ. ಪ್ರಾಣೇಶ್ ಗ್ ಕಳಸ ತಾಲೂಕ್ ದ ಬಿಲ್ಲವ ಸಮಾಜ ಸೇವಾ ಸಂಘದ ಪರವಾದ್ ಗೌರವ ಸಲ್ಲಿಕೆ ಮಲ್ತೆರ್.
ಈ ಪೊರ್ತುಡು ಸಂಘದ ಅಧ್ಯಕ್ಷೆರ್ ಮಂಜಪ್ಪ ಪೂಜಾರಿ, ಗೌರವಾಧ್ಯಕ್ಷೆರ್ ಎಂ.ಎ. ಶೇಷಗಿರಿ, ಚಂದ್ರಶೇಖರ್, ರಾಮಚಂದ್ರ, ರವಿ ಸುವರ್ಣ, ಬೊಕ್ಕ ಸಮಾಜದ ಮುಖಂಡೆರ್ ಇತ್ತೆರ್.
ಬೊಲ್ತೇರ್:ಶ್ರೀ ಗುರು ನಾರಾಯಣ ಸ್ವಾಮಿ ಸೇವಾ ಸಂಘದ ಮುತಾಲಿಕೆಡ್, ಯುವ ಬಿಲ್ಲವ ವೇದಿಕೆ, ಮಹಿಳಾ ಬಿಲ್ಲವ ವೇದಿಕೆ, ಯುವವಾಹಿನಿ ಬೊಲ್ತೇರ್ ಬೊಕ್ಕ ವೇಣೂರ್ ಘಟಕದ ಒಟ್ಟುಸೇರಿಗೆಡ್ ಜ.22 ಕ್ ಬೊಲ್ತೇರ್ ಡ್ ನಡಪರೆ ಇಪ್ಪುನ ಬಿಲ್ಲವ ಜನಪದ ಸಮ್ಮೇಳನ-2023 “ಜೀಟಿಗೆ” ಸತ್ಯೊದ ತುಡರ್ ಲೇಸ್ ದ ಲೆಪ್ಪೋಲೆ ಬುಡುಗಡೆನ್ ಜ.4 ಕ್ ಸಂಘದ ಸಭಾಭವನಡ್ ಶ್ರೀ ಗುರುದೇವ ವಿವಿದೋದ್ದೇಶ ಸಹಕಾರಿ ಸಂಘದ ಅಧ್ಯಕ್ಷೆರ್ ಎನ್. ಪದ್ಮನಾಭ ಮಾಣಿಂಜ ಮಲ್ತೆರ್.
ಈ ಪೊರ್ತುಡು ಸಂಘದ ಗೌರವಾಧ್ಯಕ್ಷೆರ್ ಕೆ.ವಸಂತ ಬಂಗೇರ, ಶ್ರೀ ಗುರುನಾರಾಯಣ ಸ್ವಾಮಿ ಸೇವಾ ಸಂಘದ ಅಧ್ಯಕ್ಷೆರ್, ಸಂಪತ್ ಬಿ. ಸುವರ್ಣ, ಶ್ರೀ ಕ್ಷೇತ್ರ ಗೆಜ್ಜೆಗಿರಿ ಕ್ಷೇತ್ರಾಡಳಿತ ಸಮಿತಿದ ಅಧ್ಯಕ್ಷೆರ್ ಪಿತಾಂಬರ ಹೆರಾಜೆ, ಸಂಘದ ಮಾಜಿ ಅಧ್ಯಕ್ಷೆರಾಯಿನ ಪಿ.ಕೆ. ರಾಜು ಪೂಜಾರಿ, ಯೋಗೀಶ್ ಕುಮಾರ್, ಜಯರಾಮ ಬಂಗೇರ ಹೆರಾಜೆ, ಉಪಾಧ್ಯಕ್ಷೆರ್ ಶೇಖರ ಬಂಗೇರ, ಕಾರ್ಯದರ್ಶಿ ಜಯವಿಕ್ರಂ ಕಲ್ಲಾಪು, ಜತೆ ಕಾರ್ಯದರ್ಶಿ ರಾಜೀವ್ ಸಾಲಿಯಾನ್, ಮಹಿಳಾ ಬಿಲ್ಲವ ವೇದಿಕೆದ ಮಾಜಿ ಅಧ್ಯಕ್ಷೆರ್ ರಾಜಶ್ರೀ ರಮಣ್, ಕಾರ್ಯದರ್ಶಿ ಶಾಂಭವಿ ಬಂಗೇರ ಬೊಕ್ಕ ಸಮಾಜ ಬಾಂಧವೆರ್ ಇತ್ತೆರ್.
ಚೆನ್ನೈ: ತೂಕ ಕಮ್ಮಿ ಮಲ್ಪುನ ಮಾತ್ರೆ ದೆತೊಂದು ಜವನೆ ಒರಿ ತೀರ್ ಪೋಯಿನ ಘಟನೆ ತಮಿಳುನಾಡ್ ದ ಚೆನ್ನೈಡ್ ನಡತ್ಂಡ್.
ಈ ಘಟನೆಡ್ ಪಿ.ಸೂರ್ಯ (21) ತೀರ್ ಪೋತೆರ್.
ಮೇರ್ ಪೇರ್ ದ ಸಂಸ್ಥೆಡ್ ವಿತರಕನಾದ್ ಬೇಲೆ ಮಲ್ತೊಂದು ಇತ್ತೆರ್ ಪಂದ್ ತೆರಿದ್ ಬೈದ್ಂಡ್.
ಮೇರ್ ಡಿ.22 ರ್ದ್ ದೋಸ್ತಿಲೆನ ಸಲಹೆದಂಚನೆ ಮಾತ್ರೆ ದೆತೊನರೆ ಸುರು ಮಲ್ತೆರ್. ಆಂಡ ಜ. 1 ಕ್ ಇಲ್ಲಡ್ ಪ್ರಜ್ಞೆ ತತ್ತ್ ದ್ ಬೂರ್ನ ಮೆರೆನ್ ಸರ್ಕಾರಿ ಆಸ್ಪತ್ರೆಗ್ ದಾಖಲ್ ಮಲ್ದೆರ್. ಬೊಕ್ಕ ಚೆನ್ನೈದ ರಾಜೀವ್ ಗಾಂಧಿ ಸರ್ಕಾರಿ ಆಸ್ಪತ್ರೆಗ್ ದಾಖಲ್ ಮಲ್ತೆರ್. ಅಲ್ಪ ಚಿಕಿತ್ಸೆ ಫಲಕಾರಿ ಆವಂದೆ ಬುಧಾರ ತೀರ್ ಪೋತೆರ್. ಈ ಬಗೆಟ್ ಮೆರೆನ ಪೊಪ್ಪ ಪೊಲೀಸೆರೆಗ್ ದೂರು ಕೊರ್ತೆರ್. ಪೊಲೀಸೆರ್ ಕೇಸ್ ದಾಖಲ್ ಮಲ್ತ್ ದ್ ತನಿಖೆ ಮಲ್ತೊಂದು ಉಲ್ಲೆರ್. ಎಚ್ಚದ ಮಾಹಿತಿಗ್ ಮರಣೋತ್ತರ ಪರೀಕ್ಷೆದ ವರದಿನ್ ಕಾತೊಂದು ಉಲ್ಲೆರ್.
ಬೆಳಗಾವಿ: ಯಲ್ಮಮ್ಮ ದೇವಿನ ದರ್ಶನಗ್ ಪೋವೊಂದು ಇತ್ತಿನ ಗಾಡಿ ಗೋಳಿದ ಮರಕ್ ಗುದ್ದುದು ಆಜಿ ಜನ ತೀರ್ ಪೋಯಿನ ಘಟನೆ ಬೆಳಗಾವಿ ಜಿಲ್ಲೆದ ರಾಮದುರ್ಗ ತಾಲೂಕುದ ಚುಂಚನೂರುಡ್ ನಡತ್ಂಡ್.
ಈ ಘಟನೆಡ್ ಹುಲಕುಂದ ಗ್ರಾಮದ ನಿವಾಸಿಲಾಯಿನ ಹನುಮವ್ವ, ದೀಪಾ, ಸವಿತಾ, ಸುಪ್ರೀತಾ, ಮಾರುತಿ ಬೊಕ್ಕ ಇಂದ್ರವ್ವ ತೀರ್ ಪೋತೆರ್. ಈ ಬಗೆಟ್ ರಾಮದುರ್ಗ ತಾಲೂಕ್ ದ ಕಟಕೋಳ ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.
ಸುಳ್ಯ: ಗುಜರಾತ್ ದ ಕಚ್ ಪ್ರದೇಶಡ್ ಪ್ರಕೃತಿನ್ ಆರಾಧನೆ ಮಲ್ತೊಂದು, ಲಕ್ಷ ಲಕ್ಷ ಮರಕುಲೆನ್ ಬುಲೆಪಾವೊಂದು ಇಪ್ಪುನ ಆರ್.ಕೆ.ನಾಯರ್ ಮೇರ್ ಸುಳ್ಯ ತಾಲೂಕ್ ದ ಕಸಬಾ ಗ್ರಾಮದ ಜಯನಗರ ಶ್ರೀ ನಾಗಬ್ರಹ್ಮ ಆದಿ ಮೊಗೇರ್ಕಳ ದೈವೊಲ್ಯ, ಶ್ರೀ ಗುಳಿಗ ದೈವ, ಶ್ರೀ ಕೊರಗಜ್ಜ ದೈವೊಲ್ಯಗ್ ಭೇಟಿ ಕೊರಿಯೆರ್.
ಮೇರ್ ದೈವೊಲೆನ ಪ್ರಸಾದ ದೆತೊಂದು, ದೈವೊಲ್ಯದ ಅಭಿವೃದ್ಧಿ ಕಜ್ಜೊಲು ನಡತೊಂದು ಇಪ್ಪುನೆರ್ದಾವರ ಕ್ಷೇತ್ರದ ಅಭಿವೃದ್ಧಿಗ್ ಪಣವುದ ಸಕಾಯ ಮಲ್ಪುವೆ ಪಂದ್ ಪಂಡೆರ್.
ಈ ಪೊರ್ತುಡು ಶ್ರೀ ಕ್ಷೇತ್ರ ಕೊರಂಬಡ್ಕದ ವ್ಯವಸ್ಥಾಪನಾ ಆಡಳಿತ ಮಂಡಳಿದ ಅಧ್ಯಕ್ಷೆರ್ ಕೇಶವ ಸಿ.ಎ ಹೊಸಗದ್ದೆ, ಸಂಚಾಲಕೆರ್ ಜಗನ್ನಾಥ.ಜಿ ಜಯನಗರ, ಕಾರ್ಯದರ್ಶಿ ಸುಂದರ ಕುದ್ಪಾಜೆ, ಮಂಜುನಾಥ ಬಳ್ಳಾರಿ, ಜನಾರ್ಧನ.ಜಿ.ಹೊಸಗದ್ದೆ ಇತ್ತೆರ್.
ವಿಟ್ಲ: ಮಾರ್ಗದ ಬರಿಟ್ಟ್ ಉಂತುದು ಇತ್ತಿನ ಶಾಲೆದ ಪೊಣ್ಣಗ್ ಬೈಕ್ ಗುದ್ದುದು ಮಸ್ತ್ ಪೆಟ್ಟಾಯಿನ ಘಟನೆ ಒಕ್ಕೆತ್ತೂರುಡ್ ನಡತ್ಂಡ್.
ಈ ಘಟನೆಡ್ ಒಕ್ಕೆತ್ತೂರುದ ನಿವಾಸಿ ಬಶೀರ್ ಪನ್ಪುನರೆನ ಮಗಲ್ ಫಾತಿಮತ್ ನಿದಾ ಪೆಟ್ಟಾಯಿನ ಕಲ್ಪಾರ್ಥಿ. ಮೇರ್ ವಿಟ್ಲ ಸರಕಾರಿ ಮಾದರಿ ಶಾಲೆಡ್ 5ನೇ ಕ್ಲಾಸ್ ಕಲ್ತೊಂದು ಉಲ್ಲೆರ್. ಶಾಲೆಗ್ ಪೋವೆರೆ ಉಂತಿನ ಪೊರ್ತುಡು ಬೈಕ್ ಗುದ್ದುದ್ಂಡ್. ಕೂಡ್ಲೆ ಕೈತಲ್ ದಕುಲು ಪುತ್ತೂರ್ ಆಸ್ಪತ್ರೆಗ್ ಸೇರ್ಸಾದೆರ್. ಆಂಡ ಹೆಚ್ಚದ ಚಿಕಿತ್ಸೆಗಾದ್ ಕುಡ್ಲ ಆಸ್ಪತ್ರೆಗ್ ದಾಖಲ್ ಮಲ್ದೆರ್.
ದಕ್ಷಿಣ ಕನ್ನಡ ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್ ಪಡ್ಡೆದ್ರ ಶಾಖೆಡ್ ಜ.3 ಕ್ ನಬಾರ್ಡ್ ದ ಮುತಾಲಿಕೆಡ್ ಗ್ರಾಹಕರೆಗ್ ಪಣವುದ ವೈವಾಟ್ ತೆರಿಪಾವುನ ಕಜ್ಜ ನಡತ್ಂಡ್.
ಲೇಸ್ ದ ಗುರ್ಕಾರ್ಮೆನ್ ಶಾಖೆದ ವ್ಯವಸ್ಥಾಪಕೆರ್ ಪ್ರಬೋದ್ ಚಂದ್ರ ಪೆಜಮಾಡಿ ಒಯಿಸ್ ದಿತ್ತೆರ್. ಖಾದಿ ಬೊಕ್ಕ ಗ್ರಾಮೋದ್ಯೋಗ ಮಂಡಳಿದ ನಿರ್ದೇಶಕೆರ್ ಮಿಥುನ್ ಆರ್ ಹೆಗ್ಡೆ ಉದಿಪನ ಮಲ್ತೆರ್. ಆರ್ ಪಾತೆರ್ದ್, ಡಾ.ಎಂ.ಎನ್ ರಾಜೇಂದ್ರ ಕುಮಾರ್ ಮೆರೆನ ಮುತಾಲಿಕೆಡ್ SCDCC ಬ್ಯಾಂಕ್ ಜನಕ್ ಇಸೇಸ ಯೋಜನೆದೊಟ್ಟಿಗೆ ಎಡ್ಡೆ ಸೇವೆ ಕೊರೊಂದು ಉಂಡು. ಜನಕುಲು ಬ್ಯಾಂಕ್ ದ ಯೋಜನೆಲೆನ ಪ್ರಯೋಜನನ್ ಪಡೆವೊಡು ಪಂದ್ ಪಂಡೆರ್. ಬ್ಯಾಂಕ್ ದ ಸಿಬ್ಬಂದಿ ಶ್ರೀನಿಧಿ ರಾವ್ ಕಾಸ್ ಒರಿಪಾವುನ ಬೊಕ್ಕ ಆರ್ಥಿಕ ನಿರ್ವಹಣೆದ ಬಗೆಟ್ ಮಾಹಿತಿ ಕೊರಿಯೆರ್. ಶಾಖೆದ ವ್ಯವಸ್ಥಾಪಕೆರ್ ಪ್ರಭೋದ್ ಚಂದ್ರ ಪೆಜಮಾಡಿ ಎದ್ಕೊನಿಯೆರ್. ಶೋಭಿತ ಹರೀಶ್ ಸೊಲ್ಮೆ ಸಂದಾಯೆರ್. ಅನಂತ ಪ್ರಭು ಲೇಸ್ ಸುಧಾರಿಕೆ ಮಲ್ತೆರ್. ಮಲ್ಲ ಬಿನ್ನೆರಾದ್ ಪೆಜಮಾಡಿದ ಧಾರ್ಮಿಕ ಮುಖಂಡೆರ್ ಮಾಧವ ಸನಿಲ್, ಪರ್ತಕರ್ತೆರ್ ರಾಮಚಂದ್ರ ಆಚಾರ್ಯ ಪಡ್ಡೆದ್ರ, ಪಡ್ಡೆದ್ರ ಗಣಪತಿ ಪ್ರೌಢ ಶಾಲೆದ ಮುಖ್ಯೋಪಾಧ್ಯಾಯೆರ್ ಗಣಪತಿ ಭಟ್, Scdcc Bank ಉಚ್ಚಿಲ ಶಾಖೆದ ವ್ಯವಸ್ಥಾಪಕೆರ್ ಮನೋಹರ್ ಪೆಜಮಾಡಿ, ಕೇಂದ್ರ ಕಚೇರಿದ ಸಿಬ್ಬಂದಿ ವೀರೆಂದ್ರ ನಾಯಕ್, ನವೋದಯ ಸ್ವ ಸಹಾಯ ಸಂಘದ ಪ್ರೇರಕಿಯೆರಾಯಿನ ಶಶಿಕಲಾ, ವಿಮಲಾ ದಯಾನಂದ್, ಶಾಖೆದ ಸಿಬ್ಬಂದಿಲು ಶೋಭಿತ ಹರೀಶ್, ಅನಂತ್ ಪ್ರಭು, ಶ್ವೇತಾ ಪಿ ಅಡಿಗ, ಯಾದವ್ ಇತ್ತೆರ್.
ಉಳ್ಳಾಲ: ಬಸ್ ಟ್ ಪೊಂಜೋವ್ ಒರ್ತಿ ಕಳೆವೊನ್ನ 18 ಗ್ರಾಂ ಬಂಗಾರ್ ದ ಕಾಜಿನ್ ಬಸ್ ಕಂಡೆಕ್ಟರ್ ಬೊಕ್ಕ ಡ್ರೈವರ್ ಮಾಲಿಕೆರೆನ ಸಹಕಾರಡ್ ಪೊಲೀಸೆರೆಗ್ ವಾಪಸ್ ಕೊರ್ದು ಪ್ರಾಮಾಣಿಕತೆ ಮೆರೆನ ಘಟನೆ ಉಳ್ಳಾಲ ಪೊಲೀಸ್ ಠಾಣೆಡ್ ನಡತ್ಂಡ್.
ಜ.1 ಕ್ ಕುಡ್ಲರ್ದ್ ಉಳ್ಳಾಲಗ್ ಪೋಪಿನ ಶಾಲಿಮಾರ್ 44ಸಿ ಬಸ್ ಟ್ ಬಿಸಿರೋಡ್ ದ ಪೊಂಜೋವ್ ತಸ್ಲಿಮಾ ಬಂಗಾರ್ ಕಳೆವೊನ್ನಾರ್. ಮೆರೆಗ್ ಉಳ್ಳಾಲ ಪೋಲಿಸ್ ಠಾಣೆಡ್ ಎಸ್. ಐ ಶಿವು ಕುಮಾರ್ ಮೆರೆನ ಸಮ್ಮುಖಡ್ ಬಂಗಾರ್ ನ್ ವಾಪಸ್ ಕೊರಿಯೆರ್.
ಕಿನ್ನಿಗೋಳಿ : ಪಂಜ ಕೊಯಿಕುಡೆ ಶ್ರೀ ವಿಠೋಬ ಭಜನಾ ಮಂದಿರಡ್ 64ನೇ ವಾರ್ಷಿಕ ಭಜನಾ ಮಂಗಳ ಉಚ್ಚಯ ಜ.15 ಐತಾರ ಬೊಕ್ಕ ವರ್ಧಂತಿ ಉಚ್ಚಯ ಜ.18 ಬುಧಾರ ನಡಪರೆ ಉಂಡು.
ಜ.15 ಬೊಲ್ಪುಗು ಭಜನೆ ಸುರುವಾದ್ ಜಾಮಪೂಜೆ, ಮಂಗಳ ಉಚ್ಚಯ ನಡತ್ ದ್ ಪ್ರಸಾದ ಪಟ್ಟ್ ದ್ , ಅನ್ನಸಂತರ್ಪಣೆ ನಡಪರೆ ಉಂಡು. ಜ.18 ಗು ಬೊಲ್ಪುಗು ಸಾಮೂಹಿಕ ಸತ್ಯನಾರಾಯಣ ಪೂಜೆ, ಭಜನೆ, ಮಂಗಳಾರತಿ ಬೊಕ್ಕ ಬಯ್ಯಗ್ 5 ಗಂಟೆರ್ದ್ ದಿ. ಪಂಜ ಲಕ್ಕಪ್ಪ ಶೆಟ್ರ್ ನ ನೆಂಪುಗಾದ್ ಮೆರೆನ ಜೋಕುಲು ಸೇವೆದ ರೂಪಡ್ ಕಟೀಲ್ ಶ್ರೀ ದುರ್ಗಾಪರಮೇಶ್ವರೀ ಪ್ರಸಾದಿತ ದಶಾವತಾರ ಸೇವೆ ಯಕ್ಷಗಾನ ಮಂಡಳಿದಕ್ಲೆರ್ದ್ ಆಟ ಗೊಬ್ಬಯೆರೆ ಉಲ್ಲೆರ್. ಈ ಮಾತಾ ಲೇಸ್ ಗ್ ಮಾತೆರ್ಲ ಬತ್ತ್ ದ್ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಶ್ರೀ ವಿಠೋಬ ಭಜನಾ ಮಂದಿರದ ಅಧ್ಯಕ್ಷೆರ್ ಸತೀಶ್ ಎಂ. ಶೆಟ್ಟಿ ಪಂಜ ಬೈಲಗುತ್ತು, ಗೌರವಾಧ್ಯಕ್ಷೆರ್ ವಿಶ್ವನಾಥ ಶೆಟ್ಟಿ ಪಂಜದಗುತ್ತು ಅಂಚೆನೆ ಪದಾಧಿಕಾರಿಲು ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಪೊಸ ವರ್ಸಡ್ ಟೀಂ ಇಂಡಿಯಾದ ಸುರುತ ಟಿ20/ ಪಂತೊ ಶ್ರೀಲಂಕಾದೊಟ್ಟಿಗೆ ನಡಪರೆ ಉಂಡು.
ಮೂಜಿ ಪಂತೊಲೆನ ವಿವರ ಇಂಚ ಉಂಡು:
ಸುರುತ ಪಂತೊ- ಜ.3ಕ್ ಬೊಂಬೈದ ವಾಂಖೆಡೆ ಸ್ಟೇಡಿಯಂಡ್ ಬಯ್ಯಗ್ 7 ಗಂಟೆಗ್. ರಡ್ಡನೇ ಪಂತೊ ಜ.5ಕ್ ಪುಣೆದ ಮಹಾರಾಷ್ಟ್ರ ಕ್ರಿಕೆಟ್ ಅಸೋಸಿಯೇಷನ್ ಸ್ಟೇಡಿಯಂಡ್ ಬಯ್ಯಗ್ 7ಗಂಟೆಗ್. ಮೂಜಿನೇ ಪಂತೊ ಜ.7 ಕ್ ರಾಜ್ಕೋಟ್ ದ ಸೌರಾಷ್ಟ್ರ ಕ್ರಿಕೆಟ್ ಅಸೋಸಿಯೇಷನ್ ಸೇಡಿಯಂಡ್ ಬಯ್ಯಗ್ 7 ಗಂಟೆಗ್ ನಡಪರೆ ಉಂಡು.
