Times Of Kuda

ಅಮ್ಮೆಂಬಳ ಬಾಳಪ್ಪ ಜನ್ಮ ಶತಾಬ್ದಿ ಲೇಸ್ ದ ಅಟ್ಟಣೆದ ಸಭೆ

ಸ್ವಾತಂತ್ರ್ಯ ಯೋಧೆರ್ ಡಾ. ಅಮ್ಮೆಂಬಳ ಬಾಳಪ್ಪ ಜನ್ಮಶತಾಬ್ದಿ ಲೇಸ್ ದ ಅಟ್ಟಣೆದ ಸಭೆ ಬಿ.ಸಿ.ರೋಡ್ ಸಂಚಯಗಿರಿತ ರಾಣಿ ಅಬ್ಬಕ್ಕ ತುಳು ಅಧ್ಯಯನ ಕೇಂದ್ರಡ್ ಜ.8 ಐತಾರ ನಡತ್ಂಡ್.

ಲೇಸ್ ದ ಗುರ್ಕಾರ್ಮೆನ್ ಒಯಿಸ್ ದಿತ್ತಿನ ಬಂಟ್ವಾಳ ಡಾ. ಅಮ್ಮೆಂಬಳ ಬಾಳಪ್ಪ ಸ್ಮಾರಕ ಸೇವಾ ಪ್ರತಿಷ್ಠಾನದ ಅಧ್ಯಕ್ಷೆರ್, ಪತ್ರಕರ್ತೆರ್ ಅಮ್ಮೆಂಬಳ ಆನಂದ ಮೇರ್ ಲೇಸ್ ದ ರೂಪುರೇಷೆಲೆನ್ ತೆರಿಪಾಯೆರ್. ಬೊಕ್ಕ ದೇಶಭಕ್ತಿಗೀತೆ ಪಂತೊದ ಅಟ್ಟಣೆ, ಅಮ್ಮೆಂಬಳ ಬಾಳಪ್ಪರ ಸಂಸ್ಮರಣಾರ್ಥ ಸಂಚಿಕೆ ಬುಡುಗಡೆ, ಸಾಧಕೆರೆಗ್ ತಮ್ಮನದ ಬಗೆಟ್ ಸಮಾಲೋಚನೆ ನಡತ್ಂಡ್. ಈ ಲೇಸ್ ದ ಯಶಸ್ವಿನ್ ಬೇತೆ ಬೇತೆ ಸಮಿತಿಲೆನ್ ತಯಾರಿ ಮಲ್ತ್ಂಡ್. ಅಧ್ಯಕ್ಷೆರಾದ್ ರಾಣಿ ಅಬ್ಬಕ್ಕ ತುಳು ಅಧ್ಯಯನ ಕೇಂದ್ರದ ಮುಖ್ಯಸ್ಥೆರ್ ಪ್ರೊ. ತುಕಾರಾಮ ಪೂಜಾರಿ, ಗೌರವಾಧ್ಯಕ್ಷೆರಾದ್ ಪತ್ರಕರ್ತೆರ್ ಡಾ. ಅಮ್ಮೆಂಬಳ ಆನಂದ, ಪ್ರಧಾನ ಕಾರ್ಯದರ್ಶಿಯಾದ್ ಪುಂಡರೀಕಾಕ್ಷ ಯು. ಕೈರಂಗಳ, ಕೋಶಾಧಿಕಾರಿಯಾದ್, ಉಮೇಶ್ ಪಿ.ಕೆ. ನಾಗಲಚ್ಚಿಲ್, ಪ್ರಧಾನ ಸಂಯೋಜಕೆರಾದ್ ಮಂಜು ವಿಟ್ಲ, ಸಂಪಾದಕ ಮಂಡಳಿಗ್ ಡಾ.ಆಶಾಲತಾ ಸುವರ್ಣ, ಡಾ.ರಶ್ಮಿ ಅಮ್ಮೆಂಬಳ, ರತ್ನಾವತಿ, ಪ್ರಸಾದ್ ಕುಮಾರ್ ಮಾರ್ನಬೈಲು, ಡಾ. ದುಗ್ಗಪ್ಪ ಕಜೆಕಾರ್ ನ್ ಆಯ್ಕೆ ಮಲ್ತೆರ್. ಈ ಪೊರ್ತುಡು ನಿವೃತ್ತ ಯೋಧೆ ಡಿ.ಚಂದಪ್ಪ ಮೂಲ್ಯ, ಭೋಜ ಅಡ್ಯಾರ್, ಮಯೂರ್ ಉಳ್ಳಾಲ್, ರವೀಂದ್ರನಾಥ, ತೇಜಸ್ವಿರಾಜ್, ಶ್ರೀರಾಮ ದಿವಾಣ, ಪಾಂಡುರಂಗ ನಾಯಕ್, ಸದಾನಂದ ಬಂಗೇರ ಮುಡಿಪು, ಸುರೇಶ್ ಬಂಗೇರ, ದಾಮೋದರ ಸಾಲ್ಯಾನ್ ಸಂಚಯಗಿರಿ, ಜನಾರ್ದನ ಕುಲಾಲ್, ಕಿರಣ್ ಅಟ್ಲೂರ್, ಸದಾಶಿವ ಕುಲಾಲ್, ಸಿ. ಮುತ್ತಪ್ಪ ಪೂಜಾರಿ, ಕೇಶವ ಮಾಸ್ಟರ್ ಮಾರ್ನಬೈಲ್, ಪ್ರದೀಪ್ ಅತ್ತಾವರ್, ಎ. ಶಿವಪ್ಪ ಬಿ.ಸಿ.ರೋಡು ಇತ್ತೆರ್. ಉಮೇಶ್ ಪಿ.ಕೆ. ಎದ್ಕೊನಿಯೆರ್. ದಾಮೋದರ್ ಬಿ. ಎಂ. ಸೊಲ್ಮೆ ಸಂದಾಯೆರ್.

ಕೊರಗಜ್ಜನ ಸನ್ನಿಧಿಡ್ ಪ್ರಾರ್ತನೆ ಸಂದಾಯಿನ ರೂಪೇಶ್ ಶೆಟ್ಟಿ

ಕುಡ್ಲ: ಬಿಗ್ ಬಾಸ್ ಪಂತೊಡು ಗೆಂದಿನ ಬೊಕ್ಕ ಸುರುತ ಸರ್ತಿ ಕುಡ್ಲಗ್ ಬತ್ತಿನ ರೂಪೇಶ್ ಶೆಟ್ಟಿ ಕೊರಗಜ್ಜನ ಸನ್ನಿಧಿಗ್ ಭೇಟಿ ಕೊರ್ದು ಪ್ರಾರ್ತನೆ ಸಂದಾಯೆರ್.

ಬೊಕ್ಕ ತನ್ನ ಯಶಸ್ಸ್ ಗ್ ಕೊರಗಜ್ಜನ ಕೃಪೆಲ ಕಾರಣ ಪಂದ್ ಪಂಡೆರ್. ಮೆರೆನ್ ಅಭಿಮಾನಿಲು ಇಮಾನ ನಿಲ್ದಾಣಡ್ ಎದ್ಕೊನಿಯೆರ್. ನನ ಮೇರ್ ಸುಮಾರ್ ಲೇಸ್ ಡ್ ಪಾಲ್ ಪಡೆಯರೆ ಉಲ್ಲೆರ್.

ಎಲ್ಲೆ ಭೂಮಿದ ಕೈತಡೇ ನಾಸಾದ ERBS ಉಪಗ್ರಹ ಬರ್ಪಿನ ಸಾಧ್ಯತೆ!

38 ವರ್ಷ ಬಾಹ್ಯಾಕಾಶ ಯಾನ ಅಕೇರಿ ಮಲ್ತಿನ ನಾಸಾ ಅರ್ಥ್ ರೇಡಿಯೇಷನ್ ಬಜೆಟ್ ಉಪಗ್ರಹ ಎಲ್ಲೆ ಬಯ್ಯಗ್ ಭೂಮಿಗ್ ಬರ್ಪುನ ನಿರೀಕ್ಷೆ ಉಂಡು ಪಂದ್ ಸ್ಪೇಸ್ ವಿಜ್ಞಾನಿಲು ತೆರಿಪಾದೆರ್.

1984 ಟ್ ಲಾಂಚ್ ಆಯಿನ 2450ಕೆಜಿ ತೂಕದ ಈ ಉಪಗ್ರಹ ಭೂಮಿಗ್ ಬರ್ಪುನ ಪೊರ್ತುಡು ಪುಡಾವುಂಡು. ಆಂಡ ಕೆಲವು ಅವಶೇಷ ಅಂಚನೆ ಒರಿವುನ ಸಾಧ್ಯತೆ ಉಂಡು. ಅಂಚಾದ್ ಭೂಮಿದ ಮಿತ್ತ್ ಆಯಿರ್ದ್ ಅತೊಂಜಿ ಅಪಾಯ ಅಪುಜಿ ಪಂದ್ ಎನ್ಎಎಸ್ಎ ತೆರಿಪಾದ್ಂಡ್.

Old NASA satellite to fall off on the Earth this weekend

38 years after its launch the Earth radiating Budget satellite ERBS will fall to earth said space scientists .

It was launched in 1984 and weighted 2450 kg .By the time it reaches earth it will have burnt off tough some peices are likely to remain. But there is no threat to earth said NASA .

ಫೆಬ್ರವರಿಡ್ ಸಾನಿಯಾ ಮಿರ್ಜಾನ ಅಕೇರಿದ ಪಂತೊ

ಭಾರತದ ಟೆನಿಸ್‌ ತಾರೆ ಸಾನಿಯಾ ಮಿರ್ಜಾ ನಿವೃತ್ತಿ ಘೋಷಣೆ ಮಲ್ದೆರ್.

ಫೆಬ್ರವರಿಡ್ ದುಬೈಡ್ ನಡಪುನ ಡಬ್ಲ್ಯೂ ಟಿಎ 1000 ಚಾಂಪಿಯನ್ ಶಿಪ್ ಡ್ ಡಬಲ್ಸ್‌‌ ಡ್ ಗೊಬ್ಬುನ ಮುಖೇನ ವಿಶ್ವದ ಮಾಜಿ ನಂಬರ್ ಒನ್ ಮೇರ್ ತನ್ನ ವೃತ್ತಿಜೀವನಗ್ ನಿವೃತ್ತಿ ಕೊರ್ಪುನೆ ಪಂದ್ ಪ್ರಕಟಣೆಡ್ ತೆರಿಪಾದೆರ್.

Sania Mirza to play compitativly for the last time in February

Sania Mirza has announced her retirement and will play compitativly for the last time this February.
She will participate in the doubles of WTA 1000 championships at Dubai and Sania Mirza will retire from compititve tennis said sources.

ಎಲ್ಲೆರ್ದಿಂಚಿ ಇಲ್ಲ ಇಲ್ಲಗ್ ತೋಕೂರು ಸುಬ್ರಹ್ಮಣ್ಯ ದೇವಲ್ಯದ ಕೊಡಿಮರ ಮೆರವಣಿಗೆದ ಓಲೆ ಪಟ್ಟರೆ

ತೋಕೂರು ಶ್ರೀ ಸುಬ್ರಹ್ಮಣ್ಯ ದೇವಲ್ಯಗ್ ಕೊಡಿಮರ ಕನಪಿನ ಅಂಚೆನೆ ದೇವಲ್ಯದ ಜೀರ್ಣೋದ್ಧಾರದ ಬಿನ್ನಾಪುದ ಓಲೆನ್ ಇಲ್ಲ ಇಲ್ಲಡೇ ಪಟ್ಟುನ ಕಜ್ಜ ಜ. 8 ಐತಾರೊರ್ದು ಸುರು ಆವರೆ ಉಂಡು.

ಪೊಸ ಕೊಡಿಮರ ಕನಪಿನ ಬಗೆಟ್ ಜ.6 ಕ್ ಬಯ್ಯಗ್ ದೇವಲ್ಯದ ಚಾವಡಿಡ್ ಬೇತೆ ಬೇತೆ ಸಂಘ ಸಂಸ್ಥೆದ ಪದಾಧಿಕಾರಿಲೆನ ಒಟ್ಟುಸೇರಿಗೆಡ್ ನಡತಿನ ಸಭೆಟ್ಟ್ ಈ ನಿರ್ಧಾರ ದೆತೊಂದೆರ್. ಸಭೆತ್ತ ಗುರ್ಕಾರ್ಮೆನ್ ಒಯಿಸ್ ದಿತ್ತಿನ ದೇವಲ್ಯದ ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಹರಿದಾಸ್ ಭಟ್ ಪಾತೆರ್ದ್, ಜ.8 ಐತಾರ ಬೊಲ್ಪುಗು 8:30ಕ್ ದೇವಲ್ಯದ ಜೀರ್ಣೋದ್ಧಾರದ ವಿಜ್ಞಾಪನ ಪತ್ರ ಬೊಕ್ಕ ಪೊಸ ಕೊಡಿಮರ ಸಮರ್ಪಣೆ ಮಲ್ಪುನ ಮೆರವಣಿಗೆದ ಲೆಪ್ಪೋಲೆನ್ ಊರುದ ಪ್ರತಿ ಇಲ್ಲಡೇ ಎತ್ತಾವುನ ಕಜ್ಜೊದ ಜಬದಾರಿನ್ ಸಂಘ-ಸಂಸ್ಥೆಲೆಗ್ ಕೊರಿಯೆರ್. ನನದ ದಿನಕ್ಲೆಡ್ ಲ ಕರಸೇವೆ ಸುರು ಆಯೆರೆ ಉಂಡು ಪಂದ್ ಪಂಡೆರ್. ಜ.14 ಕ್ಕ್ ಪೊಸ ಕೊಡಿಮರ ಸಮರ್ಪಣೆ ಮೆರವಣಿಗೆ ಬಪ್ಪನಾಡ್ ದೇವಲ್ಯರ್ದ್ ಮಧ್ಯಾಹ್ನ 3:00 ಗಂಟೆಗ್ ಪಿದಾಡ್ದ್ ಮುಲ್ಕಿ ಬಸ್ ಸ್ಟಾಂಡ್ ಮುಟ್ಟ ಪಾದಯಾತ್ರೆಡ್ ಬತ್ತ್ ದ್ ಬೊಕ್ಕ ಪಡುಪಣಂಬೂರುರ್ದ್ ಪಾದಯಾತ್ರೆದ ಮುಖೇನ ಕಲ್ಲಾಪು ಮಾರ್ಗವಾದ್, ತೋಕೂರು ದೇವಲ್ಯಗ್ ಬರ್ಪುಂಡು ಪಂದ್ ಪಂಡೆರ್. ಸಭೆಟ್ಟ್ ಜೀರ್ಣೋದ್ಧಾರ ಸಮಿತಿದ ಉಪಾಧ್ಯಕ್ಷೆರ್ ಮೋಹನ್ ದಾಸ್, ವ್ಯವಸ್ಥಾಪನಾ ಸಮಿತಿ ಸದಸ್ಯೆರ್, ಬೇತೆ ಬೇತೆ ಸಂಘ ಸಂಸ್ಥೆಲೆನ ಅಧ್ಯಕ್ಷೆರ್, ಪದಾಧಿಕಾರಿಲು, ಸದಸ್ಯೆರ್ ಇತ್ತೆರ್.

ರೇಡಿಯೋ ಮಣಿಪಾಲ್ ಡ್ ಶುದ್ಧ ಜಲ, ಸ್ವಚ್ಛ ನೆಲ ಆರೋಗ್ಯವಾಗಿರಲಿ ಜೀವಸಂಕುಲ ಸರಣಿ ಲೇಸ್

ಮಣಿಪಾಲ: ರೇಡಿಯೋ ಮಣಿಪಾಲ್ 90.4 mhz, ಡ್ ಗ್ರಾಮೀಣ ಪರ್ಪಿನ ನೀರ್ ಬೊಕ್ಕ ನೈರ್ಮಲ್ಯ ಇಲಾಖೆ ಬೆಂಗ್ಲೂರ್ ನೆತ್ತ ಮುತಾಲಿಕೆಡ್ ಶುದ್ಧ ಜಲ, ಸ್ವಚ್ಛ ನೆಲ ಆರೋಗ್ಯವಾಗಿರಲಿ ಜೀವಸಂಕುಲ ಸರಣಿ ಲೇಸ್ ಜ.6 ಶುಕ್ರಾರ ಬಯ್ಯಗ್ 6 ಗಂಟೆಗ್ ಬೂದುನೀರ್ ದ ನಿರ್ವಹಣೆಡ್ ಇಂಗುಗುಂಡಿಲೆನ ಪ್ರಾಮುಖ್ಯತೆದ ಬಗೆಟ್ ಪ್ರಸಾರ ಆಪುಂಡು.

ಈ ಲೇಸ್ ಡ್ ಕುತ್ವಾಡಿ ಕಡೆಕಾರ್ ಗ್ರಾಮ ಪಂಚಾಯತ್ ದ ಪಂಚಾಯತ್ ಅಭಿವೃದ್ಧಿ ಅಧಿಕಾರಿ ಸಿದ್ದೇಶ ಎಸ್ ಪಾಲ್ ಪಡೆಯೆರೆ ಉಲ್ಲೆರ್. ಜ.7ಕ್ ಮಧ್ಯಾಹ್ನ 2 ಕ್ ಮರುಪ್ರಸಾರ ಆಪುಂಡು.

ಜ.8: ಬಿರುವೆರ್ ಕುಡ್ಲ ಪೈವಳಿಕೆ ಘಟಕದ ಸಾಮೂಹಿಕ ಸತ್ಯನಾರಾಯಣ ಪೂಜೆ, ಉದಿಪನ, ಪದಗ್ರಹಣ ಲೇಸ್

ಕಾಸ್ರೋಡು: ಬಿರುವೆರ್ ಕುಡ್ಲ ಪೈವಳಿಕೆ ಘಟಕದ ಸಾಮೂಹಿಕ ಸತ್ಯನಾರಾಯಣ ಪೂಜೆ, ಉದಿಪನ ಬೊಕ್ಕ ಪದಗ್ರಹಣ ಲೇಸ್ ಜ.8 ಐತಾರ ಬಾಯಿಕಟ್ಟೆ ಶ್ರೀ ಅಯ್ಯಪ್ಪ ಭಜನಾ ಮಂದಿರಡ್ ನಡಪರೆ ಉಂಡು.

ಬೊಲ್ಪುಗು ದೇವೆರೆನ ಪ್ರಾರ್ತನೆ ಗಣಹೋಮ, ಸಾಮೂಹಿಕ ಸತ್ಯನಾರಾಯಣ ಪೂಜೆ, ಮಂಗಳಾರತಿ ಆದ್ ಸಭಾ ಲೇಸ್ ನಡಪುಂಡು. ಈ ಲೇಸ್ ಡ್ ಸ್ಫೂರ್ತಿ, ಅತುಲ್ ಸುವರ್ಣ, ದಿಶಾ ಬೊಕ್ಕ ಸಾನ್ವಿ ಮೊಕ್ಲೆರ್ದ್ ಸ್ವಾಗತ ನೃತ್ಯ ನಡಪರೆ ಉಂಡು. ಪೃಥ್ವಿನ್, ದೃಶಾ, ಚರಿತ್ ಕನಿಹಿತ್ತಿಲು ಪ್ರಾರ್ತನೆ ಮಲ್ಪುವೆರ್. ಶ್ರೀಧರ ಅಮ್ಮೇರಿ ಎದ್ಕೊನುವೆರ್. ಗುರ್ಕಾರ್ಮೆನ್ ಬಿರುವೆರ್ ಕುಡ್ಲ ಪೈವಳಿಕೆ ಘಟಕದ ಅಧ್ಯಕ್ಷೆರ್ ಗಣೇಶ್ ಪೂಜಾರಿ ಸ್ಥಾನದ ಮನೆ ಒಯಿಸೊನ್ವೆರ್. ಕಾಸ್ರೋಡು ಜಿಲ್ಲಾ ಸಂಘಟನೆದ ಕಾರ್ಯದರ್ಶಿ ಉದಯ ಕುಮಾರ್ ಅಮ್ಮೇರಿ ಪ್ರಾಸ್ತಾವಿಕ ಪಾತೆರ್ರೆ ಉಲ್ಲೆರ್. ವಕೀಲೆರ್ ಚಂದ್ರಶೇಖರ ಎಂ ಅಮೀನ್ ಮುಖ್ಯ ಭಾಷಣ ಮಲ್ಪುವೆರ್. ಫ್ರೆಂಡ್ಸ್ ಬಳ್ಳಾಲ್ ಬಾಗ್ ಬಿರುವೆರ್ ಕುಡ್ಲ ಸ್ಥಾಪಕಾಧ್ಯಕ್ಷೆರ್ ಉದಯ ಪೂಜಾರಿ ಬಳ್ಳಾಲಬಾಗ್ ಉದಿಪನ ಮಲ್ಪುವೆರ್. ಮಲ್ಲ ಬಿನ್ನೆರಾದ್ ಶ್ರೀ ಕ್ಷೇತ್ರ ಗೆಜ್ಜೆಗಿರಿತ್ತ ಗೌರವಾಧ್ಯಕ್ಷೆರ್ ಜಯಂತ್ ನಡುಬೈಲು, ಮುಕ್ಕ ಶೀನಿವಾಸ ಕಾಲೇಜ್ ದ ಪ್ರೊ. ಎಮ್. ಎಸ್ ಕೋಟ್ಯಾನ್, ಕೇರಳ ನಿವೃತ್ತ ಸಬ್ ಇನ್ಸ್ ಪೆಕ್ಟರ್ ಶೀನಪ್ಪ ಪೂಜಾರಿ ಅಲಾರು, ಮಾಜಿ ರಣಜಿ ಕ್ರಿಕೆಟ್ ಆಟಗಾರೆ ಚಂದ್ರಶೇಖರ್ ಕೆ, ಬಿರುವೆರ್ ಕುಡ್ಲ ಫ್ರೆಂಡ್ಸ್ ಬಳ್ಳಾಲ್ ಬಾಗ್ ದ ಅಧ್ಯಕ್ಷೆರ್ ರಾಜೇಶ್ ಪೂಜಾರಿ, ಮಹಿಳಾ ವೇದಿಕೆದ ಅಧ್ಯಕ್ಷೆರ್ ವಿದ್ಯಾರಾಕೇಶ್ ಬರಿಯೆರೆ ಉಲ್ಲೆರ್. ಬೊಕ್ಕ ತರವಾಡ್ ದ ಇಲ್ಲದಕ್ಲೆಗ್ ಮಾನಾದಿಗೆ ಮಲ್ಪರೆ ಉಂಡು. ರಿತೇಶ್ ಅಂಚನ್ ಕುಲಶೇಖರ, ಜಯಂತಿ ಕೆ. ಪೈವಳಿಕೆ ಲೇಸ್ ದ ಸುಧಾರಿಕೆ ಮಲ್ಪುವೆರ್. ಬಿರುವೆರ್ ಕುಡ್ಲದ ಪ್ರಧಾನ ಕಾರ್ಯದರ್ಶಿ ಜಿತೇಶ್ ಕುಮಾರ್ ಚಕ್ಕರಗುಲಿ ಸೊಲ್ಮೆ ಸಂದಾವೆರ್. ಬೊಕ್ಕ ಮಧ್ಯಾಹ್ನ ಅನ್ನಸಂತರ್ಪಣೆ ನಡಪರೆ ಉಂಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.

ಜ.21-29: ಪಯ್ಯತ್ತೋಡು ಶ್ರೀ ರಾಮ ಸೇವಾ ಭಜನಾ ಮಂದಿರದ ಅಮೃತ ಉಚ್ಚಯದ ಲೆಕ್ಕೊಡು ಅಖಂಡ ಭಜನಾ ಸಪ್ತಾಹ, ಸಾಂಸ್ಕೃತಿಕ ಲೇಸ್

ಮಂಜೇಶ್ವರ: ಪಯ್ಯತ್ತೋಡು ಶ್ರೀ ರಾಮ ಸೇವಾ ಭಜನಾ ಮಂದಿರದ ಅಮೃತ ಉಚ್ಚಯದ ಲೆಕ್ಕೊಡು ಅಖಂಡ ಭಜನಾ ಸಪ್ತಾಹ ಬೊಕ್ಕ ಸಾಂಸ್ಕೃತಿಕ ಲೇಸ್ ಪೇಜಾವರ ಶ್ರೀ ವಿಶ್ವಪ್ರಸನ್ನ ತೀರ್ಥ ಸಾಮೀಜಿಲೆನ ಆಶೀರ್ವಾದದೊಟ್ಟಿಗೆ ಜ.21 ರ್ದ್ 29ಮುಟ್ಟ ನಡಪರೆ ಉಂಡು.

ವೇದಮೂರ್ತಿ ಮರಿಭಟ್ ಕಣ್ಣತೀರ್ಥ ಮೇರ್ ದೀಪ ಪ್ರತಿಷ್ಠೆ ಮಲ್ಪುವೆರ್. ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್, ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಅಧ್ಯಕ್ಷೆರ್ ವಿಜಯ ಕುಮಾರ್ ಕಣ್ವತೀರ್ಥ, ಗೌರವಾಧ್ಯಕ್ಷೆರ್ ಪ್ರದೀಪ್ ಕುಮಾರ್ ಕಲ್ಕೂರು, ಉಪಾಧ್ಯಕ್ಷೆರ್ ಸಚ್ಚೀಂದ್ರ ದೇವಾಡಿಗ ಟಿ.ಪಿ ಹೌಸ್, ಸುಕನ್ಯಾ ನವೀನ್ ಕಾಂತೊಚ್ಚಿಲ್, ಕೋಶಾಧಿಕಾರಿ ನಿತಿನ್ ಕಾಡಬಳಿ, ಕಾರ್ಯದರ್ಶಿ ಹರೀಶ್ ಕುಮಾರ್ ಮಜಲ್ ಕಣ್ವತೀರ್ಥ, ಅಕ್ಷಯ್ ಮುಗುಲ್ಯ, ಜತೆ ಕಾರ್ಯದರ್ಶಿ ಅಶ್ವಥ್ ಪಯ್ಯತ್ತೋಡು, ಅಕ್ಷಯ್ ಕಾಡಬಳಿ, ಸಲಹೆಗಾರೆರ್ ಮಧುಸೂದನ ಆಚಾರ್ಯ, ಲೆಕ್ಕ ಪರಿಶೋಧಕೆರ್ ತಾರಾನಾಥ ಕಜೆಕೋಡಿ, ಭಜನಾ ಸಂಚಾಲಕೆರ್ ಸುನಿಲ್ ಕುಮಾರ್ ಮಜಲ್ ಕಣ್ವತೀರ್ಥ ಲೆಪ್ಪೋಲೆಡ್ ತೆರಿಪಾದೆರ್.

ತೋಕೂರು ಶ್ರೀ ಸುಬ್ರಹ್ಮಣ್ಯ ದೇವಲ್ಯದ ಕೊಡಿಮರಕ್ ಕುತ್ಯಾರ್ ಡ್ ಪೂಜೆ

ಹಳೆಯಂಗಡಿ: ತೋಕೂರು ಶ್ರೀ ಸುಬ್ರಹ್ಮಣ್ಯ ದೇವಲ್ಯದ ಪೊಸತ್ ಕೊಡಿಮರಕ್ ಮಂಚ ಕಲ್ಲ್ ಕೈತಲ್ ದ ಕುತ್ಯಾರ್ ಡ್ ಜ.4 ಬುಧಾರ ಬೊಲ್ಪುಗು ವೇದಮೂರ್ತಿ ಶಿಬರೂರು ಗೋಪಾಲಕೃಷ್ಣ ತಂತ್ರಿಲೆನ ಮುತಾಲಿಕೆಡ್ ಪೂಜೆ ನಡತ್ಂಡ್.

ಈ ಪೊರ್ತುಡು ಶ್ರೀವತ್ಸ ಶಿಬರೂರು ದೇವಲ್ಯದ ವ್ಯವಸ್ಥಾಪನ ಸಮಿತಿದ ಅಧ್ಯಕ್ಷೆರ್ ಹರಿದಾಸ್ ಭಟ್, ಜೀರ್ಣೋದ್ದಾರ ಸಮಿತಿದ ಉಪಾಧ್ಯಕ್ಷೆರ್ ಮೋಹನ್ ದಾಸ್, ಸದಸ್ಯೆರಾಯಿನ ಪುರುಷೋತ್ತಮರಾವ್, ವಿಜಯಕುಮಾರ್ ರೈ, ಲೋಕಯ್ಯ ಸಾಲ್ಯಾನ್, ಯೋಗೀಶ್ ಕೋಟ್ಯಾನ್, ಪುರುಷೋತ್ತಮ ಕೋಟ್ಯಾನ್ ಬೊಕ್ಕ ವಿನೋದ್ ಕುಮಾರ್ ಇತ್ತೆರ್. ಅಂಚನೆ ಕೊಡಿಮರ ಕಡ್ಪುನಗ ಅರುಣ್ ಕುಮಾರ್ ತೋಕೂರು ಬೊಕ್ಕ ಅರೆನ ಕೂಟದಕುಲು ಪಾಲ್ ಪಡೆದಿತ್ತೆರ್.

ದೇವೆರೆ ಪಾದ ಸೇರಿಯೆರ್ ದೈವ ಪಾತ್ರಿ ಆನಂದ ಪೂಜಾರಿ

ಹಳೆಯಂಗಡಿ : ದ.ಕ. ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ಪಡೆದಿನ ದೈವ ಪಾತ್ರಿ, “ಜಾರಂದಾಯ ಪೂಜಾರಿ” ಪನ್ಪಿನ ಪುಗರ್ತೆದ ಆನಂದ ಪೂಜಾರಿ (94) ಮೇರ್ ಗುರುವಾರ ದೇವೆರೆ ಪಾದ ಸೇರಿಯೆರ್.

ಮೇರ್ ಹಳೆಯಂಗಡಿ ಶ್ರೀ ಜಾರಂದಾಯ ದೈವಸ್ಥಾನದ ಕೈತಲ್ದ ತನ್ನ ಇಲ್ಲಡ್ ಕೆಲವು ಸಮಯೊರ್ದಿಂಚಿ ಹುಷಾರ್ ದಾಂತೆ ಇತ್ತೆರ್. ಮೆರೆಗ್ ನಾಲ್ ಜನ ಆಣ್ ಜೋಕುಲು ಬೊಕ್ಕ ಒರ್ತಿ ಪೊಣ್ಣು ಮಗಲ್ ಉಲ್ಲೆರ್. ಮೇರ್ ಹಳೆಯಂಗಡಿ, ಹರಿಪಾದೆ ಇಂಚ ಕೆಲವು ಕಡೆಟ್ಟ್ ಜಾರಂದಾಯ ದೈವದ ಪಾತ್ರಿಯಾದ್ ಸೇವೆ ಮಲ್ದಿತ್ತೆರ್. ಕಡ್ಸಲೆ ಬೀಜಾವುನ ಅಂಚೆನೆ ಬದಿಕರ ರಾಪಾವುನ ಮೇರ್ನನೇ ಶೈಲಿ ಭೂತಾರಾಧನೆ ಕ್ಷೇತ್ರಡ್ ಭಾರಿ ಪುದರ್ ಪಡೆದಿತ್ತ್ಂಡ್. ಆನಂದ ಪೂಜಾರಿ ಮೆರೆನ ನಿಧನೊಗು ಅಂತಾರಾಷ್ಟ್ರೀಯ ವಾಸ್ತು ತಜ್ಞೆರ್ ಚಂದ್ರಶೇಖರ ಸ್ವಾಮೀಜಿ, ಮುಲ್ಕಿ ಸೀಮೆ ಅರಸೆರ್ ದುಗ್ಗಣ್ಣ ಸಾವಂತೆರ್, ಶಾಸಕೆರ್ ಉಮಾನಾಥ ಕೋಟ್ಯಾನ್, ಮಾಜಿ ಸಚಿವೆರ್ ಅಭಯಚಂದ್ರ ಜೈನ್, ಯುವ ನಾಯಕೆರ್ ಮಿಥುನ್ ರೈ, ಪ್ರಿಯದರ್ಶಿನಿ ಕೋ ಆಪರೇಟಿವ್ ಬ್ಯಾಂಕ್ ದ ಅಧ್ಯಕ್ಷೆರ್ ವಸಂತ ಬೆರ್ನಾಡ್, ಉದ್ಯಮಿ ಶಶೀಂದ್ರ ಸಾಲ್ಯಾನ್, ಚಂದ್ರಶೇಖರ ನಾನಿಲ್, ಹರಿಪಾದೆ ಶ್ರೀ ಜಾರಂದಾಯ ಸಾನದ ನವೀನ್ , ಹರೀಶ್ ಮೊಕುಲು ಸಂತಾಪ ತೆರಿಪಾದೆರ್.