KA 20 ಗಾಡಿಲೆಗ್ ಪೆಜಮಾಡಿ ಟೋಲುಡ್ ರಿಯಾಯ್ತಿ ಕೊರೊಡು : ಸಚಿವೆರ್ ಸುನಿಲ್ ಕುಮಾರ್
ಒಡಿಪು: ಪೆಜಮಾಡಿ ಟೋಲ್ ಗೇಟ್ ಡ್ ಒಡಿಪು ಜಿಲ್ಲೆದ KA 20 ಗಾಡಿಲೆಗ್ ರಿಯಾಯಿತಿ ಕೊರೊಡು, ಜಿಲ್ಲೆದ ಗಾಡಿಲೆಗ್ ಎಚ್ಚದ ಕಾಸ್ ದೆತೊನರೆ ಬಲ್ಲಿ, ಸುರತ್ಕಲ್ ಟೋಲ್ ರೇಟ್ ಸಂಗ್ರಹ ಬಗೆಟ್ ಡೆಲ್ಲಿಡ್ ಚರ್ಚೆ ಮಲ್ಪರೆ ತೀರ್ಮಾನ ಆತ್ಂಡ್ ಪಂದ್ ಇಂಧನ ಸಚಿವೆರ್ ಸುನಿಲ್ ಕುಮಾರ್ ತೆರಿಪಾದೆರ್.
ಒಡಿಪುದ ತಾಲೂಕ್ ಕಚೇರಿ ಸಭಾಂಗಣಡ್ ನಡತಿನ ಸುರತ್ಕಲ್ ಟೋಲ್ ದೆತ್ ದ್, ಆಯಿನ್ ಪೆಜಮಾಡಿ ಟೋಲ್ ದೊಟ್ಟಿಗೆ ಸೇರ್ಸಾದ್ ರೇಟ್ ಸಂಗ್ರಹ ಪ್ರಸ್ತಾವನೆ ಸಭೆತ ಬೊಕ್ಕ ಸುದ್ಧಿಗಾರೆರೆನೊಟ್ಟಿಗೆ ಮೇರ್ ಪಾತೆರಿಯೆರ್. ರಾಷ್ಟ್ರೀಯ ಹೆದ್ದಾರಿ ಅಧಿಕಾರಿಲೆನ ತಪ್ಪುರ್ದ್ ಅವೈಜ್ಞಾನಿಕ ವ್ಯವಸ್ಥೆ ಜಾರಿ ಮಲ್ಪೆರೆ ಆತ್ಂಡ್ ಪಂದ್ ಪಂಡಿನ ಸುನಿಲ್ ಕುಮಾರ್, ಸುರತ್ಕಲ್ ಟೋಲ್ ದೆಪ್ಪುನ ವೇಗಡ್ ಬಿಲೆ ಹೆಚ್ಚ ಮಲ್ತ್ ದ್, ಪೆಜಮಾಡಿದ ಮಿತ್ತ್ ವರ್ಗಾವಣೆ ಮಲ್ಪರೆ ಆಂಡ್. ಶಾಸಕೆರ್ ರಘುಪತಿ ಭಟ್ ಡೆಲ್ಲಿಡ್ ಈ ಬಗೆಟ್ ಪಾತೆರ್ದೆರ್. ನನದ ವಾರಡ್ ಮುಖ್ಯಮಂತ್ರಿಲೆನೊಟ್ಟಿಗೆ ಚರ್ಚೆ ಮಲ್ಪುನ ಪಂದ್ ಪಂಡೆರ್. ಸುರತ್ಕಲ್ ಟೋಲ್ ಅಕ್ರಮ ಪಂದ್ ಎಂಕುಲು ಏಪಲ ಪಂತಿಜ. 2035 ಮುಟ್ಟ ಮಲ್ತಿನ ಒಪ್ಪಂದದ ದಾಖಲೆಲು. ಇಂಚಾದ್ ಸುರತ್ಕಲ್ ಡ್ ನಡತಿನ ಒತ್ತಡದ ಕಾರಣಗ್ ಕೈತಲ್ ದ ಪೆಜಮಾಡಿ ಮಿತ್ತ್ ಟೋಲ್ ದ ಹೊರೆ ಪಾಡ್ದೆರ್. ಒವ್ವೇ ಸೂಕ್ತ ನಿರ್ಧಾರ ಆಪುನ ಮುಟ್ಟ ಹೆಚ್ಚದ ಟೋಲ್ ಸಂಗ್ರಹ ಮಲ್ಪರೆ ಬಲ್ಲಿ ಪನ್ಪುನ ಬೇಡಿಕೆದೊಟ್ಟಿಗೆ ಡೆಲ್ಲಿ ಮಟ್ಟಡ್ ಮಾತ ಜನಪ್ರತಿನಿಧಿಲು ಚರ್ಚೆ ಮಲ್ಪುವ ಪಂದ್ ಸಚಿವೆರ್ ಸುನಿಲ್ ಕುಮಾರ್ ಭರವಸೆ ಕೊರಿಯೆರ್.
