ಪಂಜಾಬ್ ನ್ಯಾಷನಲ್ ಬ್ಯಾಂಕ್ ಡ್ ಖಾಲಿ ಇಪ್ಪುನ 1025 ಆಫೀಸರ್-ಕ್ರೆಡಿಟ್, ಮ್ಯಾನೇಜರ್-ಫಾರೆಕ್ಸ್, ಮ್ಯಾನೇಜರ್-ಸೈಬರ್ ಸೆಕ್ಯುರಿಟಿ ಬೊಕ್ಕ ಸೀನಿಯರ್ ಮ್ಯಾನೇಜರ್-ಸೈಬರ್ ಸೆಕ್ಯುರಿಟಿ ಬೇಲೆಗ್ ಆನ್ ಲೈನ್ ಮುಕೇನ ಅರ್ಜಿ ಸಂದಾವೊಲಿ.
ಉಂದೆಕ್ಕ್ ದೇಶ ಇಡೀ ಮಾತ ಅಭ್ಯರ್ಥಿಲೆಗ್ ಅರ್ಜಿ ಸಂದಾಯೆರೆ ಅವಕಾಶ ಉಂಡು. ಆಸಕ್ತ ಅಭ್ಯರ್ಥಿಲು 2024 ತ್ತ ಫೆಬ್ರವರಿ 7-25 ಮುಟ್ಟ ಅಧಿಕೃತ ವೆಬ್ಸೈಟ್ pnbindia.in ಮುಕೇನ ಅರ್ಜಿ ಸಂದಾವೊಲಿ.
ಕುಡ್ಲ: ದಕ್ಷಿಣ ಕನ್ನಡ ಜಿಲ್ಲೆದ ಯುವ ಸಬಲೀಕರಣ ಬೊಕ್ಕ ಕ್ರೀಡಾ ಇಲಾಖೆದ ಸಹಾಯಕ ನಿರ್ದೇಶಕೆರಾದ್ ಪ್ರದೀಪ್ ಡಿಸೋಜಾ ಫೆ.6 ಅಂಗಾರೆ ಅಧಿಕಾರ ಒಯಿಸೊಂಡೆರ್.
ಇತ್ತೆದ ಜಿಲ್ಲಾ ಕೌಶಲ್ಯಾಭಿವೃದ್ಧಿ ಅಧಿಕಾರಿ ಆಯಿನ ಪ್ರದೀಪ್ ಡಿಸೋಜಾ ಹೆಚ್ಚುವರಿ ಪ್ರಭಾರಡ್ ಬೇಲೆ ಮಲ್ದೆರ್.
ಬೊಲ್ತೇರ್: ಒಟ್ಲ ಶ್ರೀ ಧರ್ಮರಸು ಉಳ್ಳಾಕ್ಲು ಬ್ರಹ್ಮಬೈದೆರ್ಲೆನ ಗರಡಿಡ್ ಬೊಕ್ಕ ಪರಿವಾರ ದೈವೊಲೆನ ಕ್ಷೇತ್ರಡ್ ವರ್ಷಾವಧಿ ಜಾತ್ರೋಚ್ಚಯ ಫೆ.7-10 ಮುಟ್ಟ ನಡಪರೆ ಉಂಡು.
ಫೆ.7 ಬುದಾರ ಬೊಲ್ಪುಗು ಪ್ರಾರ್ತನೆ, ಗಣಹೋಮ, ಕಲಶಾಭಿಷೇಕ, ನಾಗತಂಬಿಲ, ಮಾಕಲಬ್ಬೆ ತಂಬಿಲ, ಬ್ರಹ್ಮಬೈದೆರ್ಲೆನ ತಂಬಿಲ, ದೈವೊಲೆನ ತಂಬಿಲ, ಪುದೆಕಾಣಿಕೆ ನಡತ್ಂಡ್.
ಫೆ.8 ಗುರುವಾರ (ಇನಿ) ಬೊಲ್ಪುಗು ತೋರಣ ಮೂರ್ತ, ಧರ್ಮರಸು ಉಳ್ಳಾಕ್ಲು ಬೊಕ್ಕ ಪರಿವಾರ ದೈವೊಲೆನ ನೇಮೋಚ್ಚಯ, ಮಧ್ಯಾಹ್ನ ಕೊಡಮಂದಾಯ ನೇಮ, ಅನ್ನ ಪ್ರಸಾದ ಸೇವೆ, ಕಲ್ಲಾಜೆರ್ದ್ ಪಿಲಿಕಲ್ತಾಯ ಭಂಡಾರ ಬರಿಯೆರೆ, ಶಿರಾಡಿ ದೈವ, ಪಂಜುರ್ಲಿ ದೈವೊಲೆನ ಭಂಡಾರ ದೆತ್ತೆರ್, ಬಯ್ಯಗ್ ಸತ್ಯ ಜಾವತೆ ನೇಮ, ಕಲ್ಕುಡ ಕಲ್ಲುರ್ಟಿ ನೇಮ, ರಾತ್ರೆ ಲೆಕ್ಕೆಸಿರಿ ಬಾವನ ನೇಮ, ಪರಿವಾರ ದೈವೊಲೆನ ನೇಮ, ಅನ್ನ ಪ್ರಸಾದ ಸೇವೆ, ಪಿಲಿಕಲ್ತಾಯ ನೇಮ ನಡಪರೆ ಉಂಡು.
ಫೆ.9 ಸುಕ್ರಾರ ಬೊಲ್ಪುಗು ಬಿರ್ಮೆರ್, ಶಿರಾಡಿ ದೈವೊಲೆನ ಪರಿವಾರ ನೇಮ, ಪಂಜುರ್ಲಿ, ಮಾಲದ ಕೊರಗ ನೇಮ, ಬಚ್ಚನಾಯಕ, ಗುಳಿಗ ನೇಮ ಮಧ್ಯಾಹ್ನ ಅನ್ನ ಪ್ರಸಾದ ಸೇವೆ, ಬಯ್ಯಗ್ ಬೈದೇರುಲೆನ ಗರಡಿ ಜಪ್ಪೆರೆ, ದೇಯಿ ಬೈದಿತಿ ಉಚ್ಚಯ ಬೊಕ್ಕ ಬೈದೇರುಲೆನ ಭೇಟಿ, ಬೊಕ್ಕ ಸಾಂಸ್ಕೃತಿಕ ಲೇಸ್ ನಡಪರೆ ಉಂಡು.
ಫೆ.10 ಸನಿಯಾರ ಬೊಲ್ಪುಗು ಮಾನಿಬಾಲೆ ಗರಡಿ ಜಪ್ಪೆರೆ, ಸುರಿಯ ಪಾಡಿಯೆರೆ, ಪರಕೆ ಬೊಕ್ಕ ಗಂಧ ಪ್ರಸಾದ ನಡಪರೆ ಉಂಡು.
ಈ ಮಾತ ಲೇಸ್ ಡ್ ಭಕ್ತೆರ್ ಮಾತೆರ್ಲಾ ಪಾಲ್ ಪಡೆದ್ ಸಿರಿಮುಡಿ ಗಂಧ ಪ್ರಸಾದ ದೆತೊಂದು ಶ್ರೀ ಧರ್ಮರಸು ಉಳ್ಳಾಕ್ಲು ಬ್ರಹ್ಮಬೈದೇರುಲೆನ ಬೊಕ್ಕ ಪರಿವಾರ ದೈವೊಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಅನುವಂಶೀಯ ಧರ್ಮದರ್ಶಿಲು ಜನಾರ್ಧನ ಬಂಗೇರ ವಿ., ಆಡಳಿತ ಸಮಿತಿ, ಕ್ಷೇತ್ರಾಭಿವೃದ್ಧಿ ಸಮಿತಿದ ಗುರ್ಕಾರೆ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಬೆದ್ರ: ಕೋಟೆಬಾಗಿಲ್ ಶ್ರೀ ವೀರಮಾರುತಿ ದೇವಲ್ಯಡ್ ಇಸೇಸ ಸಂಕ್ರಾಂತಿ ಪೂಜೆ ಫೆ.13 ಅಂಗಾರೆ ನಡಪರೆ ಉಂಡು.
ಅಂಚೆನೆ ಮಧ್ಯಾಹ್ನ ಸಾರ್ವಜನಿಕ ಅನ್ನ ಪ್ರಸಾದ ಸೇವೆ ನಡಪರೆ ಉಂಡು. ಈ ಲೇಸ್ ಡ್ ಭಕ್ತೆರ್ ಮಾತೆರ್ಲಾ ಎಚ್ಚದ ಸಂಖ್ಯೆಡ್ ಪಾಲ್ ಪಡೆದ್ ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಕೋಟೆಬಾಗಿಲ್ ಶ್ರೀ ವೀರಮಾರುತಿ ದೇವಲ್ಯದ ಆಡಳಿತ ಮಂಡಳಿ, ಊರುದ ಪತ್ತ್ ಸಮಸ್ತೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಕುಡ್ಲ: ರಂಗಸಂಗಾತಿ ಸಾಂಸ್ಕೃತಿಕ ಪ್ರತಿಷ್ಠಾನ ಬೊಕ್ಕ ಸಂತ ಅಲೋಶಿಯಸ್ ರಂಗ ಅಧ್ಯಯನ ಕೇಂದ್ರ ಕನ್ನಡ ವಿಭಾಗದ ಒಟ್ಟುಸೇರಿಗೆಡ್ ನಾಟಕಕಾರೆ, ನ್ಯಾಯವಾದಿ ಶಶಿರಾಜ್ ರಾವ್ ಕಾವೂರು ಮೇರ್ ಬರೆಯಿನ ರಡ್ಡ್ ನಾಟಕ ಬೂಕುಲು (ಪರಶುರಾಮ ಬೊಕ್ಕ ಛತ್ರಪತಿ ಶಿವಾಜಿ) ಬುಡುಗಡೆ ಲೇಸ್ ಫೆ.14 ಕ್ಕ್ ಬಯ್ಯಗ್ 5.30 ಕ್ಕ್ ಪೇಂಟೆದ ಸಂತ ಅಲೋಶಿಯಸ್ ಕಾಲೇಜ್ ದ ಎಲ್ ಸಿ ಆರ್ ಐ ಬ್ಲಾಕ್, ಎಲ್ ಎಫ್ ರಸ್ಕ್ ದ ಸಭಾಂಗಣಡ್ ನಡಪರೆ ಉಂಡು.
ಲೇಸ್ ಡ್ ಮೆಗಾ ಮ್ಯಾಜಿಕ್ ಸ್ಟಾರ್ ಕುದ್ರೋಳಿ ಗಣೇಶ್ ಮೆರೆರ್ದ್ ಮೈಂಡ್ ಮ್ಯಾಜಿಕ್ ಬೊಕ್ಕ ಡಾ.ಜೀವನ್ ರಾಮ್ ಸುಳ್ಯ ನಿರ್ದೇಶನಡ್ ಏಕಾದಶಾನನ ಪನ್ಪುನ ಕಿರು ನಾಟಕ ಪ್ರದರ್ಶನ ಆವೆರೆ ಉಂಡು.
ಮಣಿಪಾಲ: ಕಸ್ತೂರ್ಬಾ ಆಸ್ಪತ್ರೆ ಮಣಿಪಾಲ ಬೊಕ್ಕ ಮಣಿಪಾಲ್ ಇನ್ ಸ್ಟಿಟ್ಯೂಟ್ ಆಫ್ ಕಮ್ಯುನಿಕೇಶನ್ ದ ಒಟ್ಟುಸೇರಿಗೆಡ್ ರೇಡಿಯೋ ಮಣಿಪಾಲ್ ಡ್ ಆರೋಗ್ಯ ದರ್ಶನ ಲೇಸ್ ಫೆ.7 ಬುದಾರ ಬಯ್ಯಗ್ 5 ಗಂಟೆಗ್ ಪ್ರಸಾರ ಆಂಡ್.
ಈ ಆರೋಗ್ಯ ದರ್ಶನ ಲೇಸ್ ದ ಸಂಚಿಕೆಡ್ ಮಲಬದ್ಧತೆದ ನಿರ್ವಹಣೆ ಇಸಯದ ಬಗೆಟ್ಟ್ ಮಣಿಪಾಲ ಮಾಹೆದ ಕಸ್ತೂರ್ಬಾ ಹಾಸ್ಪಿಟಲ್ ದ ನ್ಯೂಟ್ರಿಷನ್ ಆಂಡ್ ಡಯಾಟಟಿಕ್ಸ್ ವಿಭಾಗಡ್ ಪಥ್ಯಾಹಾರ ತಜ್ಞೆರಾಯಿನ ಪರ್ಲಿನ್ ಮೇರ್ ಇಸೇಸ ಪೊಲಬು ಕೊರಿಯೆರ್.
ಈ ಲೇಸ್ ಫೆ.8 ಗುರುವಾರ ಮಧ್ಯಾಹ್ನ 1 ಗಂಟೆಗ್ ಕುಡೊರ ಪ್ರಸಾರ ಆಂಡ್. ಈ ಲೇಸ್ ನ್ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.
ಪೆಜಮಾಡಿದ ತಿಮಪ್ಪ ಸನಿಲ್ (87ವ ) ಫೆ.8 ಇನಿ ಇಲ್ಲಡ್ ದೇವೆರೆ ಪಾದೊ ಸೇರಿಯೆರ್.
ಮೇರ್ ಬೊಂಬೈದ ಪುಗರ್ತೆದ ಇಂಟರ್ ನ್ಯಾಷನಲ್ ಬುಕ್ ಹೌಸ್ ದ ಮುಖ್ಯ ಪ್ರಬಂಧಕೆರಾದ್, 70 ದಶಕಡ್ ಪೆಜಮಾಡಿ ಬಿಲ್ಲವರ ಸಂಘದ, ಬೊಂಬೈ ಸಮಿತಿದ ಗೌರವ ಪ್ರಧಾನ ಕೋಶಾಧಿಕಾರಿಯಾದ್ ಸೇವೆ ಸಂದಾದೆರ್.
ಮೆರೆಗ್ ಬೊಡೆದಿ, ಪೆಜಮಾಡಿದ ಹಿರಿಯ ಧಾರ್ಮಿಕ ಮುಖಂಡೆ ಮಾಧವ ಸನಿಲ್ ಸೇರ್ದ್ 4 ಸಹೋದರೆರ್ ಬೊಕ್ಕ 4 ಸಹೋದರಿಯೆರ್ ಉಲ್ಲೆರ್.
ಅಂಗರಗುಡ್ಡೆ ಶ್ರೀ ರಾಮಾಂಜನೇಯ ಯಕ್ಷ ನಾಟ್ಯಾಲಯದ 5 ವರ್ಷದ ಯಕ್ಷೋತ್ಸವ ಫೆ.10 ಸನಿಯಾರ ಬಯ್ಯಗ್ ಶ್ರೀರಾಮ ಮಂದಿರದ ಜಾಲ್ ಡ್ ನಡಪರೆ ಉಂಡು.
ರಾತ್ರೆ ನಡಪುನ ಸಭಾ ಲೇಸ್ ಡ್ ಮಲ್ಲ ಬಿನ್ನೆರಾದ್ ಪಟ್ಲ ಸತೀಶ್ ಶೆಟ್ಟಿ, ಉದ್ಯಮಿ ಸತೀಶ್ ಶೆಟ್ಟಿ, ಕೆಂಚನಕೆರೆ ಶ್ರೀಕಾಂತ್ ಶೆಟ್ಟಿ, ಶಿಮಂತೂರು ಉದ್ಯಮಿ ಶಂಕರಶೆಟ್ಟಿ ಮೂಡುಹೊಸಮನೆ, ಬೊಂಬೈ ಉದ್ಯಮಿ ಜಿತೇಶ್ ಆಚಾರ್ಯ, ಶಿಮಂತೂರು ಎಂ. ಕೇಶವ ಶೆಟ್ಟಿ, ಅಂಗರಗುಡ್ಡೆ ಶ್ರೀ ರಾಮ ಭಜನಾ ಮಂದಿರದ ಗುರ್ಕಾರೆ ದಿನೇಶ್ ಕೋಟ್ಯಾನ್, ಅತಿಕಾರಿ ಬೆಟ್ಟು ಗ್ರಾಮ ಪಂಚಾಯತ್ ಸದಸ್ಯೆರ್ ಕೃಷ್ಣ ಶೆಟ್ಟೆಗಾರ್ ಅಂಗರಗುಡ್ಡೆ ಪಾಲ್ ಪಡೆಯೆರೆ ಉಲ್ಲೆರ್.
ಬೊಂಬೈ: ಗೋರೆಗಾಂವ್ ಕರ್ನಾಟಕ ಸಂಘದ 63ನೇ ನಾಡಪರ್ಬ ಲೇಸ್ ದ ವಿಚಾರಗೋಷ್ಠಿ ಬೊಕ್ಕ ಕರ್ಮಯೋಗಿ ಜಯ ಸುವರ್ಣ ವೇದಿಕೆ ಪನ್ಪುನ ಬೂಕು ಬುಡುಗಡೆ ಲೇಸ್ ಫೆ.25 ಐತಾರ ನಂದಾದೀಪ ಹೈಸ್ಕೂಲ್ ಸಭಾಗೃಹಡ್ ನಡಪರೆ ಉಂಡು.
ಬೊಲ್ಪುಗು ಉದಿಪನ ಲೇಸ್, ವಿಚಾರಗೋಷ್ಠಿ ಮಧ್ಯಾಹ್ನ ಶ್ರೀ ಕೃಷ್ಣ ರಾಯಭಾರ ಯಕ್ಷಗಾನ ತಾಳಮದ್ದಳೆ, ಬಯ್ಯಗ್ ಸಮಾರೋಪ ಸಮಾರಂಭ, ಸಾಂಸ್ಕೃತಿಕ ಲೇಸ್ ನಡಪರೆ ಉಂಡು ಪಂದ್ ಗುರ್ಕಾರೆ ನಿತ್ಯಾನಂದ ಡಿ.ಕೋಟ್ಯಾನ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಕರ್ನಾಟಕ ಹೈಕೋರ್ಟ್ ದ ಪೊಸ ಮುಖ್ಯ ನ್ಯಾಯಮೂರ್ತಿಯಾದ್ ಗುಜರಾತ್ ಹೈಕೋರ್ಟುದ ನ್ಯಾಯಮೂರ್ತಿ ಎನ್.ವಿ.ವಿ ಅಂಜಾರಿಯಾ ಮೆರೆನ್ ನೇಮಕ ಮಲ್ತೆರ್.
ಇತ್ತೆ ಇತ್ತಿನ ನ್ಯಾಯಮೂರ್ತಿ ಪಿ.ಎಸ್ ದಿನೇಶ್ ಕುಮಾರ್ ಮೇರ್ ಫೆ.24 ಕ್ಕ್ ನಿವೃತ್ತರಾಯೆರೆ ಉಲ್ಲೆರ್. ಮೆರೆನ ತಾನಗ್ ಅಂಜಾರಿಯಾ ಮೆರೆನ್ ಸುಪ್ರೀಂಕೋರ್ಟ್ ಕೊಲಿಜಿಯಂ ಶಿಫಾರಸು ಮಲ್ದ್ಂಡ್. ಈ ಶಿಫಾರಸುಗ್ ಸರ್ಕಾರ ಗ್ರೀನ್ ಸಿಗ್ನಲ್ ಕೊರ್ತುಂಡು.
