February 2024

ರೇಡಿಯೊ ಮಣಿಪಾಲಡ್ ಮದ್ಯವ್ಯಸನಿಲೆನ ಜೋಕ್ಲೆನ ಜಾಗೃತಿ ಸಪ್ತಾಹ

ಮಣಿಪಾಲ: ರೇಡಿಯೋ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರಡ್ ಫೆಬ್ರವರಿ ತಿಂಗೊಲ್ದ ರಡ್ಡನೇ ವಾರ ಆಚರಣೆ ಮಲ್ಪುನ ಮದ್ಯವ್ಯಸನಿಲೆನ ಜೋಕ್ಲೆನ ಜಾಗೃತಿ ಸಪ್ತಾಹದ ನಿಲೆಟ್ಟ್ ಒಡಿಪು ದೊಡ್ಡಣಗುಡ್ಡೆದ ಡಾ.ಎ.ವಿ ಬಾಳಿಗ ಸ್ಮಾರಕ ಆಸ್ಪತ್ರೆದ ಒಟ್ಟುಸೇರಿಗೆಡ್ ಫೆಬ್ರವರಿ 11 ರ್ದ್ ಸರಣಿ ಪೊಲಬು ಲೇಸ್ ಪ್ರಸಾರ ಆವೊಂದು ಉಂಡು.

(ಇನಿ) ಫೆ.12 ಸೋಮಾರ ಬಯ್ಯಗ್ 6 ಗಂಟೆಗ್ ಮದ್ಯವ್ಯಸನಿಲೆನ ಜೋಕ್ಲೆನ ವ್ಯಕ್ತಿತ್ವದ ಬಗೆಟ್ಟ್ ಒಡಿಪುದ ಡಾ.ಎ.ವಿ ಬಾಳಿಗ ಸ್ಮಾರಕ ಆಸ್ಪತ್ರೆಡ್ ಮನಶಾಸ್ತ್ರಜ್ಞೆರಾಯಿನ ನಾಗರಾಜ್ ಮೂರ್ತಿ ಮೇರ್ ವಿಶೇಷ ಪೊಲಬು ಕೊರಿಯೆರೆ ಉಲ್ಲೆರ್. ಫೆ.13 ಅಂಗಾರೆ ಮದ್ಯಾಹ್ನ 2 ಗಂಟೆಗ್ ಕುಡೊರ ಪ್ರಸಾರ ಆಪುಂಡು.

ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.

ಪ್ರಧಾನಿ ಹುದ್ದೆದ ರೇಸ್ ಡ್ ಜೈಶಂಕರ್ ಪುದರ್?

2024 ತ್ತ ವೋಟುಡು NDA ಗೆಂದ್ಂಡ ಮೋದಿ 3 ವರ್ಷ, ಜೈಶಂಕರ್ ಮೆರೆನ್ 2 ವರ್ಷ ಪ್ರಧಾನಿ ಮಲ್ಪೆರೆ RSS ಲೆಕ್ಕಾಚಾರ ಪಾಡ್ದ್ಂಡ್.

ನೆಕ್ಕ್ ಪ್ರಮುಖ ಕಾರಣನೇ ಜೈಶಂಕರ್ ಮೆರೆನ ಕೆಲಸ, 2019 ಟ್ಟ್ ವಿದೇಶಾಂಗ ಸಚಿವೆರಾಯಿನ ಮೇರ್, ಚೀನಾ, ಅಮೆರಿಕ, ಚೆಕ್ ಗಣರಾಜ್ಯಡ್ ಭಾರತದ ರಾಯಭಾರಿಯಾದ್, ಸಿಂಗಾಪೂರಡ್ ಹೈಕಮಿಷನರ್ ಆದಿತ್ತೆರ್. ಮೇರ್ ದೆತೊನ್ನ ನಿರ್ಧಾರನ್ ಮೋದಿಲ ಮೆಚ್ಚ್ ದಿತ್ತೆರ್.

ಇನಿ 1 ಲಕ್ಷ ಉದ್ಯೋಗ ನೇಮಕಾತಿ ಪತ್ರ ವಿತರಣೆ

ಪ್ರಧಾನಿ ರೋಜ್ ಗಾರ್ ಮೇಳ ಯೋಜನೆದ ಮುಕೇನ ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಇನಿ 1 ಲಕ್ಷ ಜನಕ್ಲೆಗ್ ಉದ್ಯೋಗ ನೇಮಕಾತಿ ಪತ್ರ ಪಟ್ಟಿಯೆರೆ ಉಲ್ಲೆರ್.

ಒಂಜೇ ಪೊರ್ತುಡು 1 ಲಕ್ಷ ಜನಕ್ಕ್ ನೇಮಕ ಪತ್ರ ಪಟ್ಟುನೆ ಉಂದುವೇ ಸುರು. ಸೋಮಾರ ಬೊಲ್ಪುಗು ನಡಪುನ ಲೇಸ್ ಡ್ ಪ್ರಧಾನಮಂತ್ರಿ ಮೋದಿ ವೀಡಿಯೋ ಕಾನ್ಫರೆನ್ಸ್ ಮುಕೇನ ಪಾಲ್ ಪಡೆಯೆರೆ ಉಲ್ಲೆರ್.

47 ಕಡೆಟ್ಟ್ ಈ ಲೇಸ್ ನಡಪರೆ ಉಂಡು. ನೆರ್ದ್ ದುಂಬು 70000 ಜನಕ್ಕ್ ನೇಮಕಾತಿ ಪತ್ರ ಕೊರ್ದಿತ್ತೆರ್. ಆಕ್ಟೋಬರ್ 2022 ತ್ತ ಬೊಕ್ಕ ರೋಜ್ ಗಾರ್ ಮೇಳಡ್ ಒಟ್ಟು 8 ಲಕ್ಷ ನೇಮಕಾತಿ ಪಟ್ಟ್ ದೆರ್. 2024 ತ್ತೊಲಯಿ 10 ಲಕ್ಷ ನೇಮಕ ನಡಪಾವುನ ಉದ್ದೇಶ ಉಂಡು.

ಇನಿರ್ದ್ ಆರಿಕೋಡಿ ಶ್ರೀ ಚಾಮುಂಡೇಶ್ವರಿ ದೇವಲ್ಯಡ್ ಆರಿಕೋಡಿ ಉಚ್ಚಯ

ಬೆಳಾಲು: ಆರಿಕೋಡಿ ಶ್ರೀ ಚಾಮುಂಡೇಶ್ವರಿ ದೇವಲ್ಯಡ್ ಆರಿಕೋಡಿ ಉಚ್ಚಯ ಇನಿರ್ದ್ (ಫೆ‌.12) ಫೆ.15 ಮುಟ್ಟ ನಡಪರೆ ಉಂಡು.

ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆವೊಡು ಪಂದ್ ದೇವಲ್ಯದ ಗುರ್ಕಾರೆರ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಬಂದಾರು ಶ್ರೀ ಸದಾಶಿವ ದೇವಲ್ಯಡ್ ಕೆಸರ್ ಕಲ್ಲ್ ಪಾಡುನ ಲೇಸ್

ಬಂದಾರು: ಬಂದಾರು ಗ್ರಾಮದ ಕುರಾಯ ಶ್ರೀ ಸದಾಶಿವ ದೇವೊಲ್ಯಡ್ ಬೇತೆ ಬೇತೆ ಅಭಿವೃದ್ಧಿ ಕಾರ್ಯಲೆಗ್ ಧಾರ್ಮಿಕ ದತ್ತಿ ಇಲಾಖೆದ 25 ಲಕ್ಷದ ಅನುದಾನ ಒದಗಿಸಾಯಿನ ಬೊಲ್ತೇರ್ ವಿಧಾನಸಭಾ ಕ್ಷೇತ್ರದ ಶಾಸಕೆರ್ ಹರೀಶ್ ಪೂಂಜಾ ಮೇರ್ ಕಾಮಗಾರಿಗ್ ಕೆಸರ್ ಕಲ್ಲ್ ಪಾಡಿಯೆರ್.

ಈ ಪೊರ್ತುಡು ಬಂದಾರು ಗ್ರಾಮ ಪಂಚಾಯತ್ ಗುರ್ಕಾರೆ ದಿನೇಶ್ ಗೌಡ ಖಂಡಿಗ, ಒತ್ತು ಗುರ್ಕಾರ್ದಿ ಪುಷ್ಪಾವತಿ, ದೇವಲ್ಯದ ವ್ಯವಸ್ಥಾಪನ ಸಮಿತಿ ಗುರ್ಕಾರೆ ಬಾಬು ಗೌಡ ಮಡ್ಯಲಕಂಡ, ಪದ್ಮುಂಜ ಸಿ.ಎ ಬ್ಯಾಂಕ್ ದ ಒತ್ತು ಗುರ್ಕಾರೆ ಅಶೋಕ್ ಗೌಡ ಬೊಕ್ಕ ವ್ಯವಸ್ಥಾಪನ ಸಮಿತಿ ಸದಸ್ಯೆರ್, ಪ್ರಮುಖೆರ್ ಪಾಲ್ ಪಡೆದಿತ್ತೆರ್.

ಕೊರಗ ಭಾಷೆಡ್ ಸಾಮೂಹಿಕ ಮದಿಮೆದ ಲೆಪ್ಪೋಲೆ

ದಕ್ಷಿಣ ಕನ್ನಡ ಕೊರಗರ ಜಿಲ್ಲಾ ಸಂಘದ ಮುತಾಲಿಕೆಡ್ ತುಳುನಾಡ್ ದ ಮೂಲ ನಿವಾಸಿಲಾಯಿನ ಆದಿವಾಸಿ ಕೊರಗ ಸಮುದಾಯದ ಸಾಮೂಹಿಕ ಮದಿಮೆದ ಲೇಸ್ ಫೆ.11 ನಡತ್ಂಡ್. ಈ ಮದಿಮೆದ್ ಲೆಪ್ಪೋಲೆನ್ ಕೊರಗ ಭಾಷೆಡ್ ಅಚ್ಚಿ ಮಲ್ಪಾದ್ ತುಳುನಾಡ್ ದ ಪಿರಾಕ್ ದ ಬಾಷೆನ್ ಒರಿಪಾವುನ ಪ್ರಯತ್ನನ್ ಸಂಘಟಕೆರ್ ಮಲ್ದಿನವು ವಿಶೇಷ.

ಸುರತ್ಕಲ್ ಕುತ್ತೆತ್ತೂರುದ ಆದಿವಾಸಿ ಸಮುದಾಯ ಭವನಡ್ ಐತಾರ (ಫೆ.11) ಬೊಲ್ಪುಗು 11.15ಕ್ಕ್ ಒಟ್ಟು ಆಜಿ ಜೋಡಿ ಮದಿಮೆ ನಡತ್ಂಡ್.

ಕೊರಗ ಸಮುದಾಯ ತುಳುನಾಡ್ ದ ಮೂಲ ನಿವಾಸಿ ಸಮುದಾಯ ಆದ್ ತನ್ನನೇ ಆಯಿನ ಭಾಷೆನ್ ಒರಿತೊಂದು ಬೈದ್ಂಡ್. ಈ ಸಾಮೂಹಿಕ ಮದಿಮೆದ ಲೇಸ್ ದ ಲೆಪ್ಪೋಲೆನ್ ಕನ್ನಡ ಬೊಕ್ಕ ಕೊರಗ ಭಾಷೆಡ್ ಅಚ್ಚಿ ಮಲ್ದೆರ್.

ಕೊರಗ ಸಮುದಾಯದ ಸಂಪ್ರದಾಯದಂಚೆನೆ ಸಮುದಾಯದ ಗುರಿಕಾರೆರೆನ ಮುತಾಲಿಕೆಡ್ ಪೋಷಕೆರ್ ಮದಿಮೆಯೆ ಮಾದಿಮಾಲೆಗ್ ಧಾರೆ ಮೈತೆರ್.

ಮದುಮೆದ ಮಾತ ಸಂಪ್ರದಾಯ, ಆಚರಣೆನ್ ಸಮುದಾಯದ ಜನಕ್ಲೆ ಮಲ್ಪುನವು ಸಮುದಾಯದ ವಿಶೇಷತೆ ಆತ್ಂಡ್. ಮದಿಮೆ ಲೇಸ್ ಮಾಂಸಹಾರಿ ಬೊಕ್ಕ ಸಸ್ಯಹಾರಿ ವನಸ್ ದ ವ್ಯವಸ್ಥೆ ಇತ್ತ್ಂಡ್.

ಜಿಲ್ಲಾ ಕೊರಗ ಸಂಘದ ಮುತಾಲಿಕೆಡ್ ಆಯೋಜನೆ ಮಲ್ತಿನ 5ನೇ ವರ್ಷದ ಸಾಮೂಹಿಕ ವಿವಾಹ ಲೇಸ್ ಉಂದಾತ್ಂಡ್‌. ಮದಿಮೆ ಲೇಸ್ ಡ್ ಸುಮಾರ್ ರಡ್ಡ್ ಸಾರ ಜನ ಪಾಲ್ ಪಡೆಪ್ಪೆರ್ ಪಂದ್ ದಕ್ಷಿಣ ಕನ್ನಡ ಕೊರಗರ ಜಿಲ್ಲಾ ಸಂಘದ ಗುರ್ಕಾರೆ ಸುಂದರ ಬೆಳುವಾಯಿ ಮೇರ್ ತೆರಿಪಾದಿತ್ತೆರ್.

ಹರಿಪಾದೆ ಶ್ರೀ ಧರ್ಮದೈವ ಜಾರಂತಾಯ ದೈವೊಲ್ಯಡ್ ಗೌಜಿದ ನೇಮೋಚ್ಚಯ

ಮುಲ್ಕಿ: ಪಕ್ಷಿಕೆರೆ ಕೈತಲ್ದ ಪಂಜ ಕೊಯಿಕುಡೆ ಶ್ರೀ ಹರಿಪಾದೆ ಧರ್ಮದೈವ ಜಾರಂತಾಯ ದೈವೊಲ್ಯಡ್ ನೇಮೋಚ್ಚಯ ಗೌಜಿಡ್ ನಡತ್ಂಡ್.

ಕ್ಷೇತ್ರಡ್ ಧಾರ್ಮಿಕ ಲೇಸ್ ದ ಲೆಕ್ಕೊಡು ಜಾರಂತಾಯ ದೈವೊದ ಭಂಡಾರ ಪಿದಾಡುನ ಲೇಸ್, ಚೌತಿ ಪರ್ಬ, ತುಡರ ಬಲಿ, ಕೊಡಿ ಏರುನ ಲೇಸ್ ನಡತ್ಂಡ್. ಐತಾರ ತುಲಾಭಾರ ಸೇವೆ ಮಧ್ಯಾಹ್ನ ಅನ್ನ ಪ್ರಸಾದ ಸೇವೆ, ರಾತ್ರೆ ನೇಮೋಚ್ಚಯ ಗೌಜಿಡ್ ನಡತ್ಂಡ್.

ಈ ಪೊರ್ತುಡು ಧಾರ್ಮಿಕ ಪರಿಷತ್ ಮಾಜಿ ಸದಸ್ಯೆರ್ ಪಂಜ ಭಾಸ್ಕರ್ ಭಟ್, ದೈವೊಲ್ಯದ ಆಡಳಿತ ಮಂಡಳಿದ ಮೊಕ್ತೇಸರೆರ್ ನಲ್ಯಗುತ್ತು ಪ್ರಕಾಶ್ ಟಿ ಶೆಟ್ಟಿ, ಸದಸ್ಯೆರ್, ಭಕ್ತೆರ್ ಪಾಲ್ ಪಡೆದಿತ್ತೆರ್.

ಫೆ.14: ಬಿಲ್ಲವರ ಅಶೋಸಿಯೇಶನ್ ಬೊಂಬೈದ ಬಿವಂಡಿ ಲೋಕಲ್ ಆಫೀಸ್ ಡ್ 23 ನೇ ವರ್ಷದ ಗುರುಮೂರ್ತಿ ಪ್ರತಿಷ್ಠಾಪನೆದ ನೆಂಪು, ಸಾರ್ವಜನಿಕ ಸತ್ಯನಾರಾಯಣ ಮಹಾಪೂಜೆ

ಬಿಲ್ಲವರ ಅಶೋಸಿಯೇಶನ್ ಮುಂಬಯಿ ಬಿವಂಡಿ ಲೋಕಲ್ ಆಫೀಸ್ ಮುಲ್ಪ 23 ನೇ ವರ್ಷದ ಗುರುಮೂರ್ತಿ ಪ್ರತಿಷ್ಠಾಪನೆ ದ ನೆಂಪು ಬೊಕ್ಕ ಸಾರ್ವಜನಿಕ ಸತ್ಯನಾರಾಯಣ ಮಹಾ ಪೂಜೆದ ಲೇಸ್ ಉಂದುವೇ ಬರ್ಪಿನ ತಾರಿಕ್ 14 ಫೆಬ್ರವರಿ ಬುಧವಾರ ಕಾಂಡೆ ಗುರು ಮಂದಿರ ಡು ನಡಪೆರೆ ಉಂಡು.

ಅಂಚೆನೇ ವರ್ಷಾದ ಲೇಸ್ ತಾರಿಕ್ 17 ಪೆಬ್ರವರಿ 2024 ಶನಿವಾರ ಬಯ್ಯಗ್ 3 ಗಂಟೆಗ್, ಪ್ರೇಮ ತಾಯಿ ಸುರೇಶ್ ಪಾಟೀಲ್ ಮೈದಾನ ವಾರಳ ದೇವಿ ಮಾರ್ಗ ಪದ್ಮನಗರ ಬಿವಂಡಿ ಮುಲ್ಪ ನಡಪೆರೆ ಉಂಡು ಸಾಂಸ್ಕೃತಿಕ ಕಾರ್ಯಕ್ರಮ ದ ಒಟ್ಟಗೂ ಬಿನ್ನೆರೆ ಚಾವಡಿಡ್ ಸಾಧನೆ ಮಲ್ದಿನ ಸದಾಕೆರೆಗ್ ಮಾನದಿಗೆ ಅಂಚೆನೇ, ರಾತ್ರೆಡ್ ವನಸ್ ಆಯಿಬೊಕ್ಕ ರಂಗ ಭೂಮಿ ದ ಪುದರ್ ಪೋಯಿ ನಿರ್ದೇಸಕೆ ಜಗದೀಶ್ ಶೆಟ್ಟಿ ಕೆಂಚನ ಕೆರೆ ಮೆರೆನ ನಿರ್ದೇಶನೊಡು ಬಿವಂಡಿ ಲೋಕಲ್ ಆಫೀಸ್ ದ ಸದಸ್ಯೆರೆದ್ ” ಪಿರ ಬನ್ನಗ ” ಪನ್ಪಿನ ತುಳು ಹಾಸ್ಯಮಯಾ ನಾಟಕ ನಡಪೆರೆ ಉಂಡು.

ಅನಿದ ಲೇಸ್ ದ ಗುರ್ಕಾರ್ಮೆ ವಹಿಸೋನಿಯರೇ ಉಲ್ಲೆರ್ ಬಿಲ್ಲವರ ಅಸೋಸಿಯೇಶನ್ ಮುಂಬಯಿ ದ ಗುರ್ಕಾರೆ ಶ್ರೀ ಹರೀಶ್ ಜಿ ಅಮೀನ್. ಮಲ್ಲ ಬಿನ್ನೆರ್ ಅದ್ ಬಿಲ್ಲವ ಮಹಾ ಮಂಡಲದ ಗುರ್ಕಾರೆ ಶ್ರೀ ರಾಜ ಶೇಖರ್ ಕೋಟಿಯನ್. ಬೊಕ್ಕ ಭಾರತ್ ಕೋ ಅಪ್ ಬ್ಯಾಂಕ್ ಮುಂಬೈದ ಛೇರ್ಮನ್ ಶ್ರೀ ಸೂರ್ಯಕಾಂತ್ ಜಯ ಸುವರ್ಣ ಬರ್ರೆ ಉಲ್ಲೆರ್ ಅಂಚೆನೇ ಮಸ್ತ್ ಜನ ಮಾನದಿಗೆದ ಬಿನ್ನೆರ್ ಬರ್ರೆ ಉಲ್ಲೆರ್. ಈ ಮಾತ ಕಾರ್ಯಕ್ರಮ ಡು ತನೂಕುಲು ಮತಾ ಕುಟುಂಬ ಸಮೇತ ಬಾಗಿ ಆವೊಡು ಪಂದ್ ಬಿಲ್ಲವರ ಅಸೋಸಿಯೇಶನ್ ಮುಂಬಯಿ ಬಿವಂಡಿ ಲೋಕಲ್ ಆಫೀಸ್ ದ ಮಾನದಿಗೆದ ಗುರ್ಕಾರೆ ದೇವು ಪೂಜಾರಿ, ಗುರ್ಕಾರೆ. ರತ್ನಕರ್ ಜಿ ಪೂಜಾರಿ , ಒತ್ತು ಗುರ್ಕರೆ ಜಯಂತ್ ಸಾಲಿಯಾನ್, ಕಾರ್ಯದರ್ಶಿ. ಉದಯ ಡಿ ಸಾಲ್ಯಾನ್, ಪಣವುದ ಗುರ್ಕಾರೆ ಪ್ರಶಾಂತ್ ಆರ್ ಪೂಜಾರಿ, ಅಂಚೆನೇ ಕೂಟದ ಪದುಕೆರ್ ಲೆಪ್ಪೋಲೆಡ್ ತೆರಿಪಾದೆರ್