ದಿಲ್ಲಿ: ಇಲ್ಲಗ್ ಪೋವೊಂದಿತ್ತಿನ ಪೊಣ್ಣನ ಸ್ಕೂಟಿಗ್ ಕಾರ್ ಗುದ್ದುದು 8 ಕಿ.ಮೀ. ಒಯ್ತೊಂದು ಪೋತಿನ ಘಟನೆ ದಿಲ್ಲಿದ ಕಂಜಾವಾಲ ಪ್ರದೇಶಡ್ ನಡತ್ಂಡ್.
ಉಂದೆನ್ ಮಲ್ತ್ದಿತ್ತಿನ ಐನ್ ಜನಕ್ಲೆನ್ ಪೊಲೀಸೆರ್ ಅಕ್ಲೆನ್ ಅರೆಸ್ಟ್ ಮಲ್ತ್ದೆರ್. ಕಾರ್ ಸ್ಕೂಟಿಗ್ ಗುದ್ದಿನ ಬಿರ್ಸ್ಗ್ ಪೊಣ್ಣು ಅಲ್ಪನೇ ಪ್ರಾಣ ಬುಡ್ತೆರ್.
ಬೆಂಗ್ಲೂರು: ಪೊಸ ವರ್ಷಾಚರಣೆಗ್ ಅಬಕಾರಿ ಇಲಾಖೆಗ್ ಭಾರಿ ಆದಾಯ ಬೈದ್ಂಡ್.
ಡಿ.23 – 31 ಮುಟ್ಟ ಬರೋಬ್ಬರಿ 1262 ಕೋಟಿ ರೂ. ಬಿಲೆತ್ತ 20.66 ಲಕ್ಷ ಲೀಟರ್ ಐಎಎಲ್ ಗಂಗಸರ ಸೇಲ್ ಆತ್ಂಡ್. ಇಂಚಾದ್ 15.4 ಲಕ್ಷ ಲೀಟರ್ ಬಿಯರ್ ಸೇಲ್ ಆದ್ ದಾಖಲ್ ನಿರ್ಮಾಣ ಮಲ್ತ್ದ್ಂಡ್.
ಮೈಸೂರ್: ಜ.15 ತ್ತ ಮಕರ ಸಂಕ್ರಾಂತಿರ್ದ್ ಬೊಕ್ಕ ಜೆಡಿಎಸ್ ಪಕ್ಷದ ಅಭ್ಯರ್ಥಿಲೆನ 2ನೇ ಪಟ್ಟಿ ಬುಡುಗಡೆ ಮಲ್ಪರೆ ಉಲ್ಲ ಪಂದ್ ಮಾಜಿ ಮುಖ್ಯಮಂತ್ರಿ ಎಚ್ ಡಿ ಕುಮಾರಸ್ವಾಮಿ ತೆರಿಪಾದೆರ್.
ಸುದ್ದಿಗೋಷ್ಟಿಡ್ ಪಾತೆರಿನ ಆರ್, ಇತ್ತೆ ಜೆಡಿಎಸ್ ಪಕ್ಷದ ಆಭ್ಯರ್ಥಿಲೆನ ಸುರುತ್ತ ಪಟ್ಟಿ ಬುಡುಗಡೆ ಮಲ್ತ್ದ. ರಾಜ್ಯಡ್ 130 ತಾನೊ ಪಡೆಯೊನುನ ಮುಕೇನ ಜೆಡಿಎಸ್ ಅಧಿಕಾರಗ್ ಬರಿಯರೆ ಉಂಡು ಪಂದ್ ಪಂಡೆರ್.
ಕರ್ನಾಟಕ ಸರ್ಕಾರದ ಲೋಕೋಪಯೋಗಿ ಇಲಾಖೆದ 5 ಕೋಟಿ ರೂ. ಬಿಲೆತ ನೆಲ್ಲಿತೀರ್ಥ ನೀರುಡೆ ಕಣಿಕಟ್ಟ ಸಂಪರ್ಕ ಮಾರ್ಗಗ್ ಕಾಂಕ್ರಿಟ್ ಪಾಡುನ ಕಜ್ಜೊಗು ಕೆಸರ್ ಕಲ್ಲ್ ಪೂಜೆ ನ್ ಶಾಸಕೆರ್ ಡಾ.ವೈ ಭರತ್ ಶೆಟ್ಟಿ ಮಲ್ತೆರ್.
ಬೊಕ್ಕ ಮೇರ್ ಕೈತಲ್ ದ ಪ್ರದೇಶಾಭಿವೃದ್ಧಿ ಯೋಜನೆದ ಅನುದಾನಡ್ 4 ಲಕ್ಷ ರೂ. ಬಿಲೆಟ್ ಕೊಂಪದವು ಅಂಗನವಾಡಿ ಕೇಂದ್ರಗ್ ಮಿತ್ತ ಚಾವಡಿ, 2.75 ಲಕ್ಷ ರೂ. ಬಿಲೆತ ಕೊಂಪದವು ರಿಕ್ಷಾ ಪಾರ್ಕ್ ಬೊಕ್ಕ 1.25 ಲಕ್ಷ ರೂ. ಬಿಲೆಟ್ ನಿರ್ಮಾಣ ಆಯಿನ ಮುಚ್ಚೂರು ರಿಕ್ಷಾ ಪಾರ್ಕ್ ನ್ ಉದಿಪನ ಮಲ್ತೆರ್.
ಈ ಪೊರ್ತುಡು ಜಿಲ್ಲಾ ಪಂಚಾಯತ್ ಮಾಜಿ ಸದಸ್ಯೆರ್ ಜನಾರ್ದನ ಗೌಡ, ಗ್ರಾಮ ಪಂಚಾಯತ್ ಅಧ್ಯಕ್ಷೆರ್ ಮೋಹಿನಿ, ಉಪಾಧ್ಯಕ್ಷೆರ್ ನಾರಾಯಣ ಎ.ಎಸ್, ಮಾಜಿ ಅಧ್ಯಕ್ಷೆರ್ ಪ್ರಕಾಶ್ ಹೆಗ್ಡೆ, ಸದಸ್ಯೆರ್ ವೀರಪ್ಪ ಗೌಡ, ರಜನೀಶ್, ಉದಯ ನಾಯ್ಕ್, ಪೂರ್ಣಿಮಾ ಹರಿಪ್ರಕಾಶ್, ಸುಮನ, ಮಾಜಿ ಸದಸ್ಯೆರ್ ಸಂದೇಶ್ ಡೇಸ ಇತ್ತೆರ್. ಪ್ರಸಾದ್ ಶೆಟ್ಟಿ ಕೊಂಪದವು ಸುಧಾರಿಕೆ ಮಲ್ತೆರ್. ಪಂಚಾಯತ್ ಕಾರ್ಯದರ್ಶಿ ಸತೀಶ್ ಸೊಲ್ಮೆ ಸಂದಾಯೆರ್.
ಕಿನ್ನಿಗೋಳಿ : ಪಂಜ ಕೊಯಿಕುಡೆ ಶ್ರೀ ವಿಠೋಬ ಭಜನಾ ಮಂದಿರಡ್ 64ನೇ ವಾರ್ಷಿಕ ಭಜನಾ ಮಂಗಳ ಉಚ್ಚಯ ಜ.15 ಐತಾರ ಬೊಕ್ಕ ವರ್ಧಂತಿ ಉಚ್ಚಯ ಜ.18 ಬುಧಾರ ನಡಪರೆ ಉಂಡು.
ಜ.15 ಬೊಲ್ಪುಗು ಭಜನೆ ಸುರುವಾದ್ ಜಾಮಪೂಜೆ, ಮಂಗಳ ಉಚ್ಚಯ ನಡತ್ ದ್ ಪ್ರಸಾದ ಪಟ್ಟ್ ದ್ , ಅನ್ನಸಂತರ್ಪಣೆ ನಡಪರೆ ಉಂಡು. ಜ.18 ಗು ಬೊಲ್ಪುಗು ಸಾಮೂಹಿಕ ಸತ್ಯನಾರಾಯಣ ಪೂಜೆ, ಭಜನೆ, ಮಂಗಳಾರತಿ ಬೊಕ್ಕ ಬಯ್ಯಗ್ 5 ಗಂಟೆರ್ದ್ ದಿ. ಪಂಜ ಲಕ್ಕಪ್ಪ ಶೆಟ್ರ್ ನ ನೆಂಪುಗಾದ್ ಮೆರೆನ ಜೋಕುಲು ಸೇವೆದ ರೂಪಡ್ ಕಟೀಲ್ ಶ್ರೀ ದುರ್ಗಾಪರಮೇಶ್ವರೀ ಪ್ರಸಾದಿತ ದಶಾವತಾರ ಸೇವೆ ಯಕ್ಷಗಾನ ಮಂಡಳಿದಕ್ಲೆರ್ದ್ ಆಟ ಗೊಬ್ಬಯೆರೆ ಉಲ್ಲೆರ್. ಈ ಮಾತಾ ಲೇಸ್ ಗ್ ಮಾತೆರ್ಲ ಬತ್ತ್ ದ್ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಶ್ರೀ ವಿಠೋಬ ಭಜನಾ ಮಂದಿರದ ಅಧ್ಯಕ್ಷೆರ್ ಸತೀಶ್ ಎಂ. ಶೆಟ್ಟಿ ಪಂಜ ಬೈಲಗುತ್ತು, ಗೌರವಾಧ್ಯಕ್ಷೆರ್ ವಿಶ್ವನಾಥ ಶೆಟ್ಟಿ ಪಂಜದಗುತ್ತು ಅಂಚೆನೆ ಪದಾಧಿಕಾರಿಲು ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಕಾರ್ಲ: ಶಾಲೆದ ಜೋಕ್ಲೆನ ಪ್ರವಾಸದ ಬಸ್ ಪಲ್ಟಿಯಾಯಿನ ಘಟನೆ ಧರ್ಮಸ್ಥಳ-ಕಾರ್ಲ ರಾಜಮಾರ್ಗದ ನಲ್ಲೂರು ಕೈತಲ್ದ ಪಾಜೆಗುಡ್ಡೆ ತಿರ್ಗಾಸ್ಡ್ ನಡತ್ಂಡ್.
ಈ ಘಟನೆಡ್ ಮೂಜಿ ಶಿಕ್ಷಕೆರ್ ಬೊಕ್ಕ 2 ಕಲ್ಪಾರ್ಥಿಲೆಗ್ ಪೆಟ್ಟಾತ್ಂಡ್. ವಿಜಯನಗರ ಜಿಲ್ಲೆದ ಕೊಟ್ಟೂರು ತಾಲೂಕ್ದ ಬಸವೇಶ್ವರ ಪ್ರೌಢ ಶಾಲೆಗ್ ಸೇರ್ದಿನ ಖಾಸಗಿ ಬಸ್ಟ್ಟ್ ಜೋಕುಲು ಪ್ರವಾಸಗ್ ಪಂದ್ ತುಳುನಾಡ್ಗ್ ಬತ್ತಿತ್ತೆರ್.
ಮೆಕ್ಸಿಕೊ: ಸಿಯುಡಾಡ್ ಜುವಾರೆಜ್ ಜೈಲ್ದ ಮಿತ್ತ್ ಗುಂಡುದ ದಾಳಿ ಆದ್, ಸಿಬ್ಬಂದಿ ಸೇರ್ದ್ 14 ಜನ ತೀರ್ ಪೋಯಿನ ಘಟನೆ ನಡತ್ಂಡ್. ಕೈದಿಲೆನ ಕುಟುಮದಕುಲು ತನ್ನ ಸದಸ್ಯೆರೆನ್ ಭೇಟಿ ಮಲ್ಪರೆ ಜೈಲ್ಗ್ ಪೋದಿಪ್ಪುನಗ ಈ ಘಟನೆ ನಡತ್ಂಡ್.
ಗುಂಡು ಪಾಡ್ದಿನಕುಲು ಪೆನಿಟೆನ್ಷಿಯರಿ ಸೆಂಟರ್ಗ್ ಗಾಡಿಡ್ ಬೈದೆರ್. ಆಯಿಬೊಕ್ಕ ಭದ್ರತಾ ಅಧಿಕಾರಿಲೆನ ಮಿತ್ತ್ ಗುಂಡುದ ದಾಳಿ ನಡಪಾದೆರ್. ಅಂಚಾದ್ 24 ಕೈದಿಲು ಜೈಲ್ರ್ದ್ ತಪ್ಪಾದ್ ಪದ್ರಾಡ್ ಪಾಡ್ದೆರ್.
ಬೆದ್ರ: ಕಡಂದಲೆ ಗ್ರಾಮದ ಜೋಡಿಕಟ್ಟೆ ಮುಕ್ಕಡಪ್ಪು ಸರಕಾರಿ ಕಿರಿಯ ಪ್ರಾಥಮಿಕ ಶಾಲೆದ ಕೈತಲ್ ಜ.1 ಐತಾರ ರಾತ್ರೆ 10 ಗಂಟೆಗ್ ಮಾರುತಿ ಕಾರ್ 15 ಅಡಿ ತಿರ್ತ್ ದ ಶಾಲೆದ ಮೈದಾನಗ್ ಪಲ್ಟಿಯಾದ್ ಬೂರ್ದು ಚಾಲಕೆ ತೀರ್ ಪೋಯಿನ ಘಟನೆ ನಡತ್ಂಡ್.
ಪಾಲಡ್ಕ ಗ್ರಾಮದ ಮಾಗಂದಾಡಿ ದಿವಾಕರ ಶೆಟ್ಟಿ (58) ತೀರ್ ಪೋಯಿನಾರ್. ಉಂದೆನ್ ಬೊಲ್ಪುಗು ನೆಲ್ಯಾಡಿಕೆದ ಯೋಗೀಶ್ ಗೌಡ ತೂದು ಬೆದ್ರ ಪೊಲೀಸೆರೆಗ್ ತೆರಿಪಾದೆರ್. ಪೊಲೀಸೆರ್ ಬತ್ತ್ ದ್ ತನಿಖೆ ಮಲ್ತ್ ದೆರ್.
ಈ ಪೊರ್ತುಡು ಪಾಲಡ್ಕ ಪಂಚಾಯತ್ ಅಧ್ಯಕ್ಷೆರ್ ದಿನೇಶ್ ಕಾಂಗ್ಲಾಯ್, ದ.ಕ. ಜಿಲ್ಲಾ ಹಾಲಿನ ಒಕ್ಕೂಟದ ಜಿಲ್ಲಾಧ್ಯೆಕ್ಷೆರ್ ಕೆ ಪಿ ಸುಚರಿತ ಶೆಟ್ಟಿ, ಗ್ರಾಮ ಪಂಚಾಯತ್ ಉಪಾಧ್ಯಕ್ಷೆರ್ ಸುಕೇಶ್ ಶೆಟ್ಟಿ, ಸದಸ್ಯೆರಾಯಿನ ಜಗದೀಶ್ ಕೋಟ್ಯಾನ್, ಅಮಿತಾ ನಾಗೇಶ್ ಪೂಜಾರಿ, ಕಾಂತಿ ಉದಯ ಶೆಟ್ಟಿ, ಸುರೇಶ್ ಪೂಜಾರಿ, ಸುಧೀರ್ ಶೆಟ್ಟಿ ಇತ್ತೆರ್.
ರಾಮನಗರ: ಸಂಸದೆರ್ ಬಿ. ವೈ ರಾಘವೇಂದ್ರ ಮೆರೆನ ಫೋಟೋಗ್ರಾಫರ್ ಕಿರೆಟ್ಟ್ ಮುರ್ಕ್ದ್ ತೀರ್ ಪೋಯಿನ ಘಟನೆ ಐತಾರ ನಡತ್ಂಡ್. ಪ್ರಸನ್ನ ಭಟ್ ತೀರ್ ಪೋಯಿನ ಫೊಟೊಗ್ರಾಫರ್.
ಈ ಬಗೆಟ್ ಟ್ವೀಟ್ ಮಲ್ತಿನ ಸಂಸದೆರ್, ಪಕ್ಷದ ಲೇಸ್ಡ್ ಪಾಲ್ ಪಡೆಯೊಂದಿತ್ತಿನ ಯನ್ನ ಫೋಟೋಗ್ರಾಫರ್ ಪ್ರಸನ್ನ ಭಟ್ ತೀರ್ ಪೋಯಿನ ಸುದ್ದಿ ಕೇಂದ್ ಬೇಜಾರ್ ಆತ್ಂಡ್. ದೇವೆರ್ ಅರೆನ ಆತ್ಮಗ್ ಶಾಂತಿ ಕೊರಡ್ ಪಂದ್ ಪ್ರಾರ್ಥನೆ ಮಲ್ಪವೆ. ಓಂ ಶಾಂತಿ ಪಂದ್ ಬರೆತೆರ್.
ಒಡಿಪು: ಕಾರ್ ಗುದ್ದುದು ರಡ್ಡ್ ಜನಕ್ ಪೆಟ್ಟಾಯಿನ ಘಟನೆ ಕಾರ್ಲದ ಹೆಬ್ರಿ ತಾಲೂಕ್ ದ ಹೆಬ್ರಿ ಅಂಡಾರು ಕರಿಯಾಲು ಕ್ರಾಸ್ ದಲ್ಪ ನಡತ್ಂಡ್.
ಈ ಘಟನೆಡ್ ಪೆಟ್ಟಾಯಿನಕ್ಲೆನ್ ಆಸ್ಪತ್ರೆ ದಾಖಲ್ ಮಲ್ದೆರ್. ಹೆಬ್ರಿ ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.
