2023

ಪತ್ರಕರ್ತೆರೆನ ರಾಜ್ಯ ಮಟ್ಟದ ಕ್ರಿಕೆಟ್ ಪಂತೊದ ಲೆಪ್ಪೋಲೆ ಬುಡುಗಡೆ ಮಲ್ತಿನ ಡಾ. ವೀರೇಂದ್ರ ಹೆಗ್ಗಡೆರ್

ಧರ್ಮಸ್ಥಳ: ಕರ್ನಾಟಕ ಕಾರ್ಯನಿರತ ಪತ್ರಕರ್ತೆರೆನ ಸಂಘ ಬೊಕ್ಕ ದಕ್ಷಿಣ ಕನ್ನಡ ಜಿಲ್ಲಾ ಕಾರ್ಯನಿರತ ಪತ್ರಕರ್ತೆರೆನ ಸಂಘದ ಒಟ್ಟುಸೇರಿಗೆಡ್ ಅಡ್ಯಾರ್ ಸಹ್ಯಾದ್ರಿ ಕ್ರೀಡಾಂಗಣಡ್ ಜ.5 ರ್ದ್ ಕ್ಯಾ.ಪ್ರಾಂಜಲ್ ಗೌರವಾರ್ಥವಾದ್ ‘ಕೆಯುಡಬ್ಲ್ಯುಜೆ ಬ್ರ್ಯಾಂಡ್ ಕುಡ್ಲ ರೋಹನ್ ಕಪ್ ಕ್ರಿಕೆಟ್’ ಪಂತೊ ನಡಪರೆ ಉಂಡು.

ಈ ಪಂತೊದ ಲೆಪ್ಪೋಲೆನ್ ಶ್ರೀ ಕ್ಷೇತ್ರ ಧರ್ಮಸ್ಥಳದ ಧರ್ಮಾಧಿಕಾರಿ, ರಾಜ್ಯ ಸಭಾ ಸದಸ್ಯೆರ್ ಡಾ.ಡಿ. ವೀರೇಂದ್ರ ಹೆಗ್ಗಡೆ ಸೋಮಾರ ಶ್ರೀಕ್ಷೇತ್ರ ಧರ್ಮಸ್ಥಳಡ್ ಬುಡುಗಡೆ ಮಲ್ತ್ ದ್ ಎಡ್ಡೆಪ್ಪು ಬಯಕಿಯೆರ್.

ಈ ಪೊರ್ತುಡು ಡಾ.ಡಿ.ವೀರೇಂದ್ರ ಹೆಗ್ಗಡೆರೆನ ಆಪ್ತ ಕಾರ್ಯದರ್ಶಿ ವೀರು ಶೆಟ್ಟಿ, ದಕ್ಷಿಣ ಕನ್ನಡ ಕಾರ್ಯನಿರತ ಪತ್ರಕರ್ತೆರೆನ ಸಂಘದ ಗುರ್ಕಾರೆ ಶ್ರೀನಿವಾಸ ನಾಯಕ್ ಇಂದಾಜೆ, ಕುಡ್ಲ ಪ್ರೆಸ್ ಕ್ಲಬ್ ದ ಗುರ್ಕಾರೆ ಪಿ.ಬಿ.ಹರೀಶ್ ರೈ, ರಾಜ್ಯ ಕಾರ್ಯಕಾರಿ ಸಮಿತಿದ ಸದಸ್ಯೆರ್ ಜಗನ್ನಾಥ ಶೆಟ್ಟಿ ಬಾಳ, ಪಂತೊದ ಪ್ರಧಾನ ಸಂಚಾಲಕೆರ್, ಕುಡ್ಲ ಪ್ರಧಾನ ಕಾರ್ಯದರ್ಶಿ ಜಿತೇಂದ್ರ ಕುಂದೇಶ್ವರ, ಕೋಶಾಧಿಕಾರಿ ಪುಷ್ಪರಾಜ್ ಬಿ.ಎನ್, ಒತ್ತು ಗುರ್ಕಾರೆ ಭಾಸ್ಕರ್ ರೈ ಕಟ್ಟ, ಹಿರಿಯ ಪತ್ರಕರ್ತೆರ್ ಕೇಶವ ಕುಂದರ್, ಆರ್.ಎನ್. ಪೂವಣಿ, ಝೀ ಕನ್ನಡ ಡ್ರಾಮಾ ಜ್ಯೂನಿಯರ್ ಖ್ಯಾತಿದ ರಿಷಿಕಾ ಕುಂದೇಶ್ವರ ಪಾಲ್ ಪಡೆದಿತ್ತೆರ್.

ಬೆದ್ರ “ಕೋಟಿ – ಚೆನ್ನಯ” ಕಂಬುಲಡ್ ಗೆಂದಿನ ಎರ್ಲು

ಬೆದ್ರಡ್ ಡಿ.17 ಕ್ಕ್ ನಡತಿನ 21ನೇ ವರ್ಷದ “ಕೋಟಿ – ಚೆನ್ನಯ” ಜೋಡು ಕರೆ ಕಂಬುಲದ ರಿಸಲ್ಟ್ ಇಂಚ ಉಂಡು.

ಕನೆ ಪಲಯಿ: 7 ಜತೆ
ಅಡ್ಡ ಪಲಯಿ: 5 ಜತೆ
ಬಲ್ಲ್ ದ ಮಲ್ಲ: 21 ಜತೆ
ನಾಯೆರ್ ದ ಮಲ್ಲ: 40 ಜತೆ
ಬಲ್ಲ್ ದ ಎಲ್ಯ: 38 ಜತೆ
ನಾಯೆರ್ ದ ಎಲ್ಯ: 167 ಜತೆ
ಒಟ್ಟು ಎರ್ಲೆನ ಸಂಖ್ಯೆ: 278 .

ಕನೆಪಲಯಿ:
ಬೋಳಾರ ತ್ರಿಶಾಲ್ ಕೆ ಪೂಜಾರ್ಲೆನ ಎರ್ಲು (6.5 ಕೋಲ್ ನಿಶಾನೆಗ್ ನೀರ್ ರಾಪಾದೆರ್)
ಪಲಯಿ ಮುಟ್ಟಿನಾರ್: ಬೈಂದೂರು ಮಹೇಶ್ ಪೂಜಾರಿ

ಕಾಂತಾರ ಬೇಲಾಡಿ ಬಾವ ಹವ್ಯನ್ ಪ್ರಜೋತ್ ಶೆಟ್ಟಿ
ಪಲಯಿ ಮುಟ್ಟಿನಾರ್: ತೆಕ್ಕಟ್ಟೆ ಸುಧೀರ್ ದೇವಾಡಿಗ

ಅಡ್ಡ ಪಲಯಿ:
ಸುರುತ್ತ ಇನಾಮು: ಬೋಳಾರ ತ್ರಿಶಾಲ್ ಕೆ ಪೂಜಾರಿ
ಪಲಯಿ ಮುಟ್ಟಿನಾರ್: ಸಾವ್ಯ ಗಂಗಯ್ಯ ಪೂಜಾರಿ
ರಡ್ಡನೇ ಇನಾಮು: ಕಾಂತಾರ ಬೇಲಾಡಿ ಬಾವ ಹವ್ಯನ್ ಪ್ರಜೋತ್ ಶೆಟ್ಟಿ
ಪಲಯಿ ಮುಟ್ಟಿನಾರ್: ಭಟ್ಕಳ ಹರೀಶ್

ಬಲ್ಲ್ ದ ಮಲ್ಲ:
ಸುರುತ್ತ ಇನಾಮು: ಕೊಳಚೂರು ಕೊಂಡೆಟ್ಟು ಸುಕುಮಾರ್ ಶೆಟ್ಟಿ “ಬಿ”
ಗಿಡತಿನಾರ್: ಬಜಗೋಳಿ ಜೋಗಿಬೆಟ್ಟು ನಿಶಾಂತ್ ಶೆಟ್ಟಿ
ರಡ್ಡನೇ ಇನಾಮು: ಹರೇಕಳ ಕೈಡೇಲುಗುತ್ತು ಮಿಥುನ್ ಎಮ್ ರೈ “ಬಿ”
ಗಿಡತಿನಾರ್: ಮಿಜಾರು ಅಶ್ವಥಪುರ ಶ್ರೀನಿವಾಸ ಗೌಡ

ಬಲ್ಲ್ ದ ಎಲ್ಯ:
ಸುರುತ್ತ ಇನಾಮು: ಬೆದ್ರ ಹೊಸಬೆಟ್ಟು ಏರಿಮಾರು ಬರ್ಕೆ ಚೇತನ್ ಚಂದ್ರಹಾಸ ಸಾಧು ಸನಿಲ್
ಗಿಡತಿನಾರ್: ಮಿಜಾರು ಅಶ್ವಥಪುರ ಶ್ರೀನಿವಾಸ ಗೌಡ
ರಡ್ಡನೇ ಇನಾಮು: ಭಟ್ಕಳ ಎಚ್.ಎನ್. ನಿವಾಸ ಪಿನ್ನುಪಾಲ್
ಗಿಡತಿನಾರ್: ಭಟ್ಕಳ ಶಂಕರ

ನಾಯೆರ್ ದ ಮಲ್ಲ:
ಸುರುತ್ತ ಇನಾಮು: ರೆಂಜಾಳ ಕುದ್ರಾಡಿ ಶಿವಕೃಪ ವಿದ್ಯಾನಂದ ಹೆಗ್ಡೆ
ಗಿಡತಿನಾರ್: ಪೆಂರ್ಗಾಲು ಕೃತಿಕ್ ಗೌಡ
ರಡ್ಡನೇ ಇನಾಮು: ಬೋಳದಗುತ್ತು ಸತೀಶ್ ಶೆಟ್ಟಿ “ಬಿ”
ಗಿಡತಿನಾರ್: ಬೈಂದೂರು ವಿಶ್ವನಾಥ ದೇವಾಡಿಗ

ನಾಯೆರ್ ದ ಎಲ್ಯ:
ಸುರುತ್ತ ಇನಾಮು: ತೋಡಾರು ಪಂಚಶಕ್ತಿ ಬಾರ್ದಿಲ ಶ್ಲೋಕ್ ರಂಜಿತ್ ಪೂಜಾರಿ
ಗಿಡತಿನಾರ್: ಪೆಂರ್ಗಾಲು ಕೃತಿಕ್ ಗೌಡ
ರಡ್ಡನೇ ಇನಾಮು: ನಾವುಂದ ಆಶ್ರಿತ ಐಶಾನಿ ವಿಶ್ವನಾಥ ಪೂಜಾರಿ “ಎ”
ಗಿಡತಿನಾರ್: ಪಟ್ಟೆ ಗುರುಚರಣ್

ತೋಕೂರು ಶ್ರೀ ಸುಬ್ರಹ್ಮಣ್ಯ ದೇವಲ್ಯಡ್ ಷಷ್ಠಿ ಉಚ್ಚಯ

ಮುಲ್ಕಿ: ತೋಕೂರು ಶ್ರೀ ಸುಬ್ರಹ್ಮಣ್ಯ ದೇವಲ್ಯಡ್ ಷಷ್ಠಿ ಉಚ್ಚಯ ಗೌಜಿಡ್ ನಡತ್ಂಡ್.

ಕ್ಷೇತ್ರದ ತಂತ್ರಿಲಾಯಿನ ಶಿಬರೂರು ಗೋಪಾಲಕೃಷ್ಣ ತಂತ್ರಿ, ಅರ್ಚಕೆರ್ ಮಧುಸೂದನ ಆಚಾರ್ಯ ಮೊಕ್ಲೆನ ಮುತಾಲಿಕೆಡ್ ಇಸೇಸ ಪ್ರಾರ್ತನೆ, ಮಹಾಪೂಜೆ, ಉಚ್ಚಯ ಬಲಿ, ಪಗೆಲ್ ತೇರ್ ಒಯಿಪೆರೆ, ಪಲ್ಲ ಪೂಜೆ, ಅನ್ನ ಪ್ರಸಾದ ಸೇವೆ, ರಾತ್ರೆ ಶ್ರೀ ದೇವೆರೆನ ಬಯನ ಬಲಿ, ಶಯನೋಚ್ಚಯ, ಕವಾಟ ಬಂಧನ ನಡತ್ಂಡ್.

ಈ ಪೊರ್ತುಡು ದೇವಲ್ಯದ ಆಡಳಿತಾಧಿಕಾರಿ ದಿಲೀಪ್ ರೋಡ್ಕರ್, ಧರ್ಮದರ್ಶಿಲು ಡಾ. ಹರಿಕೃಷ್ಣ ಪುನರೂರು, ಪಡುಪಣಂಬೂರು ಗ್ರಾಮ ಪಂಚಾಯತಿ ಗುರ್ಕಾರ್ದಿ ಕುಸುಮಾ ಚಂದ್ರಶೇಖರ್, ಒತ್ತು ಗುರ್ಕಾರೆ ಹೇಮನಾಥ ಅಮೀನ್ ಇತ್ತೆರ್.

ಪಾವಂಜೆ ಶ್ರೀ ಜ್ಞಾನಶಕ್ತಿ ಸುಬ್ರಹ್ಮಣ್ಯ ದೇವಲ್ಯಡ್ ಚಂಪಾಷಷ್ಠಿ ಉಚ್ಚಯದ ಗೌಜಿ

ಮುಲ್ಕಿ: ಹಳೆಯಂಗಡಿ ಕೈತಲ್ ದ ಪಾವಂಜೆ ಶ್ರೀ ಜ್ಞಾನಶಕ್ತಿ ಸುಬ್ರಹ್ಮಣ್ಯ ದೇವಲ್ಯದ ನಾಗವೃಜ ಕ್ಷೇತ್ರಡ್ ಚಂಪಾಷಷ್ಠಿ ಉಚ್ಚಯ ಗೌಜಿಡ್ ನಡತ್ಂಡ್.

ಬೊಲ್ಪುಗು ಪ್ರಾರ್ತನೆ, ಬಲಿ, ಶ್ರೀ ದೇವೆರೆಗ್ ಪೂಜೆ, ಕಲಶಾಭಿಷೇಕ, ಮಹಾಪೂಜೆ ಉಚ್ಚಯ ಬಲಿ, ಅನ್ನ ಪ್ರಸಾದ ಸೇವೆ, ಬಯ್ಯಗ್ ನಿತ್ಯರಂಗ ಪೂಜೆ, ಉಚ್ಚಯ ಬಲಿ, ಶ್ರೀ ಅಣ್ಣಪ್ಪ ಸ್ವಾಮಿನ ಭೇಟಿ, ಅವಭೃತೋತ್ಸವ, ಕೊಡಿ ಏರುಂಡು ಬೊಕ್ಕ ಶ್ರೀ ಅಣ್ಣಪ್ಪ ಸ್ವಾಮಿಗ್ ನರ್ತನ ಸೇವೆ, ಭಂಡಾರನ್ ಮೂಲಸ್ಥಾನಗ್ ಸೇರ್ಸಾವುನ ಲೇಸ್ ನಡತ್ಂಡ್.

ಈ ಪೊರ್ತುಡು ದೇವಲ್ಯದ ಆಡಳಿತ ಮಂಡಳಿದ ಸದಸ್ಯೆರ್ ಬೊಕ್ಕ ಭಕ್ತಾದಿಲು ಇತ್ತೆರ್.

ರೇಡಿಯೊ ಮಣಿಪಾಲಡ್ ಯೋಗ ಸುಯೋಗ ಸರಣಿ ಲೇಸ್

ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಯೋಗ ಸುಯೋಗ ಸರಣಿ ಲೇಸ್ ದ 38 ನೇ ಸಂಚಿಕೆ ಡಿ. 18 ಸೋಮಾರ ಬಯ್ಯಗ್ 4.15 ಕ್ಕ್ ಪ್ರಸಾರ ಆಪುಂಡು.

ಈ ಲೇಸ್ ಡ್ ಒಡಿಪು ಚಿಟ್ಪಾಡಿದ ಶ್ರೀ ಗುರುಕೃಪಾ ಯೋಗ ವಿದ್ಯಾ ಪ್ರತಿಷ್ಠಾನಡ್ ಯೋಗ ಶಿಕ್ಷಕೆರಾಯಿನ ಆರ್ ಶಿವಕುಮಾರ್ ಪಾಲ್ ಪಡೆಯೆರೆ ಉಲ್ಲೆರ್. ಡಿ.19 ಮಧ್ಯಾಹ್ನ 12.15 ಕ್ಕ್ ಕುಡೊರ ಪ್ರಸಾರ ಆಪುಂಡು. ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೋ ಮಣಿಪಾಲ್ ಆಪ್ ಡೌನ್‌ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.

ನಿಟ್ಟೆ ಕೆಮ್ಮಣ್ಣು ಶ್ರೀ ದುರ್ಗಾ ಫ್ರೆಂಡ್ಸ್ ಕ್ಲಬ್ ಮುತಾಲಿಕೆಡ್ ಕ್ರಿಕೆಟ್ ಪಂತೊ

ಪುಗರ್ತೆದ ಶ್ರೀ ದುರ್ಗಾ ಫ್ರೆಂಡ್ಸ್ ಕ್ಲಬ್ (ರಿ.) ಕೆಮ್ಮಣ್ಣು, ನಿಟ್ಟೆ ನೆತ್ತ ಮುತಾಲಿಕೆಡ್ ವಿಶಿಷ್ಟ ಪರಿಕಲ್ಪನೆದ ದೀಪಾವಳಿ ಟ್ರೋಫಿ – 2023 ಆಜಿನೇ ಆವೃತ್ತಿದ 40 ಗಜತ್ತ ಕ್ರಿಕೆಟ್ ಪಂತೊ ಕೆಮ್ಮಣ್ಣು ಬೀದಿಮನೆ ಮೈದಾನಡ್ ಇಂಚಿಪ್ಪ ನಡತ್ಂಡ್.

ಲೇಸ್ ಡ್ ಕೆಮ್ಮಣ್ಣು ಶ್ರೀ ದುರ್ಗಾಪರಮೇಶ್ವರಿ ದೇವಲ್ಯದ ಪ್ರಧಾನ ಅರ್ಚಕೆರ್ ಶಾಂತಾರಾಮ್ ಭಟ್, ಯುವ ಉದ್ಯಮಿ ಅರುಣ್ ಕುಮಾರ್ ನಿಟ್ಟೆ, ಕಾಪು ವಲಯದ ಯುವಜನ ಸೇವೆ ಬೊಕ್ಕ ಕ್ರೀಡಾಧಿಕಾರಿ ರಿತೇಶ್ ಕುಮಾರ್ ಶೆಟ್ಟಿ ಸೂಡ, ಕಾರ್ಲ ತಾಲೂಕ್ ಕ್ರಿಕೆಟ್ ಅಸೋಸಿಯೇಷನ್ ದ ಗುರ್ಕಾರೆ ಅವಿನಾಶ್ ಶೆಟ್ಟಿ, ಬೀದಿಮನೆ ಸುರೇಶ್ ರಾವ್, ಕೈತಲ್ ದ ಪಂಚಾಯತ್ ಪ್ರತಿನಿಧಿ ಸಂತೋಷ್ ಶೆಟ್ಟಿ, ರೈತ ಉತ್ಪಾದಕ ಸಂಸ್ಥೆದ ನಿರ್ದೇಶಕೆರ್ ವೆಂಕಟಕೃಷ್ಣ ಭಟ್, ಕ್ಲಬ್ ದ ಗುರ್ಕಾರೆ ಪ್ರಶಾಂತ್ ಕುಮಾರ್ ಕೆ., ಕಾರ್ಯದರ್ಶಿ ಕೃಷ್ಣಾನಂದ ರಾವ್ ಬೊಕ್ಕ ಕ್ರೀಡಾ ಕಾರ್ಯದರ್ಶಿ ದೀಪಕ್ ಪಾಲ್ ಪಡೆದಿತ್ತೆರ್.

ವಿದ್ವಾನ್ ಪ್ರಸನ್ನ ಆಚಾರ್ಯ ತುಡರ್ ಅರ್ಲಾದ್ ಲೇಸ್ ದ ಉದಿಪನ ಮಲ್ತೆರ್. ತುಡರ್ ಪರ್ಬದ ಲೆಕ್ಕೊಡು ಇಪ್ಪುನ ‘ನರಕಾಸುರ ನಟೋರಿಯಸ್’, ‘ತುಡರ್ ನೈಟ್ ರೈಡರ್ಸ್’, ‘ಬಲೀಂದ್ರ ಬುಲ್ಸ್’ ಬೊಕ್ಕ ‘ವಾಮನ ವಾರಿಯರ್ಸ್’ ಪನ್ಪುನ ಪುದರ್ ದ ನಾಲ್ ಕೂಟಲು ಈ ಪಂತೊಡು ಗೊಬ್ಬುದು ಮಾತೆರೆನ್ಲಾ ಮನಸ್ ಗೆಂದ್ಂಡ್.

ಮಲ್ಲ ಬಿನ್ನೆರಾಯಿನ ರಿತೇಶ್ ಕುಮಾರ್ ಶೆಟ್ಟಿ ಸೂಡ, ಗ್ರಾಮೀಣ ಭಾಗದ ಸಂಸ್ಥೆ ‘ದೀಪಾವಳಿ ಟ್ರೋಫಿ’ ಪರಿಕಲ್ಪನೆಡ್ ಆಯೋಜನೆ ಮಲ್ತಿನ ಪಂತೊದ ಬಗೆಟ್ಟ್ ಮೆಚ್ಚಿಯೆರ್. ಕ್ಲಬ್‌ದ ಗುರ್ಕಾರೆ ಪ್ರಶಾಂತ್ ಕುಮಾರ್ ಕೆ. ಎದ್ಕೊನಿಯೆರ್. ಕಾರ್ಯದರ್ಶಿ ಕೃಷ್ಣಾನಂದ ರಾವ್ ಸೊಲ್ಮೆ ಸಂದಾಯೆರ್. ಹಿರಿಯ ಸದಸ್ಯೆರ್ ಸುಂದರ ದೇವಾಡಿಗ ಲೇಸ್ ನ್ ಸುಧಾರಿಕೆ ಮಲ್ತೆರ್.

ಪಂದ್ಯಕೂಟಡ್ ಸಾಹಿಲ್ ಮುತಾಲಿಕೆದ ‘ಬಲೀಂದ್ರ ಬುಲ್ಸ್’ ಸುರುತ್ತ ತಾನ ಗೆಂದಿನ ಕೂಟ, ಶಶಿಕಾಂತ್ ಮೊಯಿಲಿ ಮುತಾಲಿಕೆದ ‘ವಾಮನ ವಾರಿಯರ್ಸ್’ ರಡ್ಡನೇ ತಾನ ಗೆಂದಿನ ಕೂಟ ಆತ್ಂಡ್.

ಬಯ್ಯಗ್ ನಡತಿನ ಪ್ರಶಸ್ತಿ ಪಟ್ಟುನ ಲೇಸ್ ಡ್ ನಿಟ್ಟೆ ರುಕ್ಮಿಣಿ, ಅಡ್ಯಂತಾಯ ಪಾಲಿಟೆಕ್ನಿಕ್ ಕಾಲೇಜ್ ದ ಪ್ರಾಂಶುಪಾಲೆರ್ ಪ್ರಶಾಂತ್ ಕುಮಾರ್ ಹೊಳ್ಳ, ನಿಟ್ಟೆ ಗ್ರಾಮ ಪಂಚಾಯತ್ ದ ಒತ್ತು ಗುರ್ಕಾರೆ ನಿತಿನ್ ಸಾಲ್ಯಾನ್, ಬೀದಿಮನೆ ಸುರೇಶ್ ರಾವ್ ಬೊಕ್ಕ ಕ್ಲಬ್‌ ದ ಪದುಕೆರ್ ಪಾಲ್ ಪಡೆದಿತ್ತೆರ್.

ಕ್ಲಬ್‌ದ ಪೂರ್ವಾಧ್ಯಕ್ಷೆರ್ ಡಾ.ದಿಲೀಪ್ ಕುಮಾರ್ ಕೆ., ಡಾ.ರಘುನಂದನ್, ಸುರೇಶ್ ಆಚಾರ್ಯ, ಒತ್ತು ಗುರ್ಕಾರೆ ಸತೀಶ್ ಶೆಟ್ಟಿ, ಹಿರಿಯ ಸದಸ್ಯೆರ್ ವಿಠಲ ಆಚಾರ್ಯ, ರೋಟರಿ ಸಮುದಾಯ ದಳತ್ತ ಗುರ್ಕಾರೆ ಪ್ರದೀಪ್ ಸುವರ್ಣ, ಕಾರ್ಯದರ್ಶಿ ಪ್ರಕಾಶ್ ಸಾಲ್ಯಾನ್, ಗಣೇಶ್ ಭಟ್, ಸುಧಾಕರ್ ಸಾಲ್ಯಾನ್, ಸುಭಾಷ್ ಬೊಕ್ಕ ನವದುರ್ಗಾ ಫ್ರೆಂಡ್ಸ್ ಕ್ಲಬ್ (ರಿ.) ಕೆಮ್ಮಣ್ಣು, ನಿಟ್ಟೆದ ಗುರ್ಕಾರೆ ಶೈಲೇಶ್ ಸುವರ್ಣ ಸಹಕಾರ ಕೊರಿಯೆರ್.

ಕಾಪು ಲೀಲಾಧರ್ ಶೆಟ್ರೆನ ಮಗಲ್ ಸೇರ್ದ್ 4 ಜನ ಆರೋಪಿಲು ಅರೆಸ್ಟ್

ಒಡಿಪು: ರಂಗಕರ್ಮಿ, ಸಮಾಜ ಸೇವಕೆರ್ ಲೀಲಾಧರ ಶೆಟ್ಟಿ ಮೆರೆನ ಸಾಂಕನದ ಮಗಲ್ ನಾಪತ್ತೆ ಆಯಿನ ಕೇಸ್ ದ 4 ಜನನ್ ಕಾಪು ಪೊಲೀಸೆರ್ ಅರೆಸ್ಟ್ ಮಲ್ದೆರ್.

ಅರೆಸ್ಟ್ ಆಯಿನಕುಲು ಲೀಲಾಧರ ಶೆಟ್ರೆನ ಮಗಲೆನ ದೋಸ್ತಿ ಶಿರ್ವ ನಿವಾಸಿ ಗಿರೀಶ್ (20), ನಾಪತ್ತೆ ಆಯೆರೆ ಸಹಾಯ ಮಲ್ತಿನ ಶಿರ್ವ ನಿವಾಸಿ ರೂಪೇಶ್ (22), ಜಯಂತ್ (23), ಬೊಕ್ಕ ಮಜೂರು ನಿವಾಸಿ ಮೊಹ್ಮದ್ ಅಝೀಜ್ ಪಂದ್ ತೆರಿದ್ ಬೈದ್ಂಡ್.

ಅಂಚೆನೆ ಆರೋಪಿ ಗಿರೀಶ್ ನ ಮಿತ್ತ್ ಪೋಕ್ಸೊ, ಅತ್ಯಾಚಾರ, ಕಿಡ್ನ್ಯಾಪ್ ಕೇಸ್ ಬೊಕ್ಕ ಮೂಜಿ ಜನತ್ತ ಮಿತ್ತ್ ಪೋಕ್ಸ್ ಕೇಸ್ ದಾಖಲ್ ಆತ್ಂಡ್.

ಎಲ್ಲೆ ಇಂಡಿಯಾ ಮೈತ್ರಿಕೂಟದ ಸಭೆ

ಎಲ್ಲೆ ಡೆಲ್ಲಿಡ್ ಇಂಡಿಯಾ ಮೈತ್ರಿಕೂಟದ ಸಭೆ ಅಶೋಕ ಹೋಟೆಲ್ ಡ್ ನಡಪರೆ ಉಂಡು.

ಕಾಂಗ್ರೆಸ್ ಗುರ್ಕಾರೆ ಮಲ್ಲಿಕಾರ್ಜುನ ಖರ್ಗೆ ಈ ಸಭೆತ್ತ ಮುತಾಲಿಕೆಡ್ ಒಯಿಸೊನ್ವೆರ್. ಸೋನಿಯಾ ಗಾಂಧಿ, ರಾಹುಲ್ ಗಾಂಧಿ, ಶರದ್ ಪವಾರ್, ಉದ್ಧವ್ ಠಾಕ್ರೆ, ಅರವಿಂದ್ ಕೇಜ್ರಿವಾಲ್, ಮಮತಾ ಸೇರಿನಂಚೆನೆ 28 ವಿರೋಧ ಪಕ್ಷದ ನಾಯಕೆರ್ ಈ ಸಭೆಟ್ಟ್ ಪಾಲ್ ಪಡೆಯೆರೆ ಉಲ್ಲೆರ್.