September 2023

ಬಂಟ ಸಮುದಾಯಗ್ ಮೀಸಲಾತಿ ಅಗತ್ಯ ಉಂಡು, ಐಕಾದ್ ಪ್ರಾಮಾಣಿಕ ಪ್ರಯತ್ನ ಮಲ್ಪೊಡು -ಒಡಿಪು ಜಿಲ್ಲಾಧಿಕಾರಿ ಡಾ. ವಿದ್ಯಾಕುಮಾರಿ

ಕುಡ್ಲ: “ಪೊಂಜೊಕುಲು ತನ್ನ ಕಾರ್ ಡ್ ಉಂತೊಡು. ತನ್ನ ಸಾಮರ್ಥ್ಯನ್ ಸಮಾಜಗ್ ಧಾರೆ ಮೈಪುಲಕ ಅಕ್ಲೆಗ್ ವಿದ್ಯಾಭ್ಯಾಸ ತಿಕ್ಕೊಡು. ತನ್ನ ಇಲ್ಲದ ಪೊಂಜೊಕ್ಲೆಗ್ ಉನ್ನತ ಶಿಕ್ಷಣ ಕೊರಿಯೆರೆ ಇಲ್ಲದಕುಲ್ ಎದುರು ಬರೋಡು. ಸರಕಾರಿ ಹುದ್ದೆಡ್ ಬಂಟೆರ್ ಕಮ್ಮಿ ಉಲ್ಲೆರ್. ಐಎಎಸ್ ಪರೀಕ್ಷೆ ಬರೆಯೆರೆ ಹಿಂದುಳಿದ ವರ್ಗಗಳ ಮೀಸಲಾತಿ ಕೇಂದ್ರ ಸರಕಾರರ್ದ್ ಉಂಡು. ಆಂಡ ನಮ್ಮ ಬಂಟ ಸಮುದಾಯಗ್ ಲಭ್ಯ ಇಜ್ಜಿ. ಉಂದು ಅಗತ್ಯವಾದ್ ಬೋಡು. ಐಕಾದ್ ನಮ್ಮ ಬಂಟ ಸಮಾಜ ಪ್ರಾಮಾಣಿಕ ಪ್ರಯತ್ನ ಮಲ್ಪೊಡು” ಪಂದ್ ಒಡಿಪು ಜಿಲ್ಲಾಧಿಕಾರಿ ಡಾ|ವಿದ್ಯಾಕುಮಾರಿ ಪಂಡೆರ್.

ಬಂಟರ ಯಾನೆ ನಾಡವರ ಮಾತೃ ಸಂಘ, ಶ್ರೀ ಸಿದ್ಧಿವಿನಾಯಕ ಪ್ರತಿಷ್ಠಾನ ಬೊಕ್ಕ ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸಮಿತಿದ ಆಶ್ರಯಡ್ ದ.ಕ. ಒಡಿಪು ಬೊಕ್ಕ ಕಾಸರಗೋಡ್ ದ ಬೇತೆ ಬೇತೆ ಬಂಟೆರ್ನ ಸಂಘದ ಒಟ್ಟು ಸೇರಿಗೆಡ್ ಸಾರ್ವಜನಿಕ ಶ್ರೀ ಗಣೇಶೋತ್ಸವ ಅಂಗವಾ‍ದ್ ಬಂಟ್ಸ್ ಹಾಸ್ಟೆಲ್ ಓಂಕಾರ‌ ನಗರಡ್ ನಡತ್ತಿನ ಗಣೇಶೋತ್ಸವ ಕಾರ್ಯಕ್ರಮದ ಧಾರ್ಮಿಕ ಸಭೆಟ್ ತಮ್ಮನನ್ ಸ್ವೀಕಾರ ಮಲ್ತ್ ಪಾತೆರ್ಯೆರ್.

ಚಾವಡಿಡ್ ಕುಡ್ಲದ ಮೇಯರ್ ಸುಧೀರ್ ಶೆಟ್ಟಿ ಕಣ್ಣೂರು ಮೆರೆನ್ ಮಾನಾದಿಗೆ ಮಲ್ತೆರ್. ಈ ಪೊರ್ತುಡು ಸುಧೀರ್ ಶೆಟ್ಟಿ ಪಾತೆರ್ದ್, ‘ಬಂಟ ಸಮುದಾಯ ಇನಿ ದಕ್ಷಿಣ ಕನ್ನಡ, ಒಡಿಪು, ಕಾಸರಗೋಡು ಜಿಲ್ಲೆದ ಏತೊ ದೇವಸ್ಥಾನದ ಜೀರ್ಣೋದ್ಧಾರಗ್ ಕೆಲಸ ಮಲ್ತೊಂದು ಉಂಡು. ಕೇವಲ ಸಮುದಾಯದ ಹಿತನ್ ಕಾಪಂದೆ ಸಮಾಜದ ಮಾತ ವರ್ಗದ ಜನಕ್ಲೆನ್ ಒಂಜೆ ರೀತಿಡ್ ತೂಪುನ ಬಂಟೆರ್ ಉಂದುವೇ ಕಾರಣಗ್ ಸಮಾಜಡ್ ಜನಕುಲ್ ನಮನ್ ಗುರುತಿಸಾವೊಂದುಲ್ಲೆರ್. ಯಾನ್ ಪಕ್ಷ ಕೊರ್ದ್ ಇಪ್ಪುನ ಜವಾಬ್ದಾರಿನ್ ಕುಡ್ಲ ಮಹಾನಗರ ಪಾಲಿಕೆದ ವ್ಯಾಪ್ತಿಡ್ ಮಾತೆರೆನ್ ಸಮಾನವಾದ್ ತೂಪುನ ಮೂಲಕ ಪಾಲಿಕೆದ ಅಭಿವೃದ್ಧಿನ್ ಮಿತ್ತ್ ಕನವೆರೆ ಯಾನ್ ತಯಾರ್ ಉಲ್ಲೆ ಪಂದ್ ಪಂಡೆರ್.

ಬಂಟರ ಯಾನೆ ನಾಡವರ ಮಾತೃ ಸಂಘದ ಗುರ್ಕಾರೆರ್, ಸಿದ್ದಿವಿನಾಯಕ ಪ್ರತಿಷ್ಠಾನದ ಟ್ರಸ್ಟಿ ಅಜಿತ್ ಕುಮಾರ್ ರೈ ಮಾಲಾಡಿ ಮೆರ್ ಗುರ್ಕಾಮೆನ್ ವಹಿಸ್ ದ್ ಇತ್ತೆರ್.

ಚಾವಡಿಡ್ ವಿಧಾನಸಭಾ ಸ್ಪೀಕರ್ ಯು.ಟಿ. ಖಾದರ್, ಕುಡ್ಲ ಯುನಿವರ್ಸಿಟಿ ಪ್ರೊ ಚಾನ್ಸೆಲರ್ ಡಾ|ಎ ಶ್ರೀನಿವಾಸ್ ರಾವ್, ಕೆನರಾ ವಿದ್ಯಾಸಂಸ್ಥೆದ ಗೌರವ ಕಾರ್ಯದರ್ಶಿ ಎಮ್ ರಂಗನಾಥ್ ಭಟ್, ಯೂನಿಯನ್ ಬ್ಯಾಂಕ್ ಆಫ್ ಇಂಡಿಯಾ ಝೊನಲ್ ಹೆಡ್ ರೇಣು ಕೆ ನಾಯರ್, ರಾಷ್ಟ್ರೀಯ ಕೃಷಿ ಪ್ರಶಸ್ತಿ ಪುರಸ್ಕೃತ ಕಡಮಜಲು ಸುಭಾಸ್ ರೈ, , ಬಂಟರ ಮಾತೃ ಸಂಘದ ಉಪಾಧ್ಯಕ್ಷೆರ್ ಕಾವು ಹೇಮನಾಥ ಶೆಟ್ಟಿ, ಪ್ರಧಾನ ಕಾರ್ಯದರ್ಶಿ ಕೆ.ಎಮ್ ಶೆಟ್ಟಿ, ಪನವುದ ಪಾಲವೆರ್ ರಾಮಮೋಹನ್ ರೈ, ಶ್ರೀ ಸಿದ್ದಿ ವಿನಾಯಕ ಪ್ರತಿಷ್ಠಾನದ ಟ್ರಸ್ಟಿಲಾಯಿನ ಕೃಷ್ಣ ಪ್ರಸಾದ್ ರೈ, ನಿಟ್ಟೆಗುತ್ತು ರವಿರಾಜ ಶೆಟ್ಟಿ, ಜಿಲ್ಲಾ ಸಂಚಾಲಕೆರ್ ಬಿ.ನಾಗರಾಜ ಶೆಟ್ಟಿ, ಎಮ್ ಸಂಜೀವ ಶೆಟ್ಟಿ ಕಾಸರಗೋಡು, ಈ ಪೊರ್ತುಡು ಇತ್ತೆರ್.

ವಿಧಾನ ಸಭಾಧ್ಯಕ್ಷೆರಾಯಿನ ಯು.ಟಿ.ಖಾದರ್, ಹಿರಿಯ ವೈದ್ಯೆರಾಯಿನ ಡಾ.ಯು. ಮಾಧವ ಶೆಟ್ಟಿ, ಯಕ್ಷಗಾನ ಕ್ಷೇತ್ರದ ಕಿಶನ್ ಹೆಗ್ಡೆ, ಸಂಗೀತ ಕ್ಷೇತ್ರದ ವಿದ್ವಾನ್ ಬಾಬು ರೈ ಮೊಕ್ಲೆಗ್ ಈ ಪೊರ್ತುಡು ಮನಾದಿಗೆ ನಡತ್ಂಡ್.

ಮನಾದಿಗೆ ಸ್ವೀಕಾರ ಮಲ್ತ್ ಪಾತೆರ್ನ ಕಿಶನ್ ಹೆಗ್ಡೆ, “ಗೌರವ ಮನಾದಿಗೆರ್ದ್ ನಮ್ಮ ಜವಾಬ್ದಾರಿಲು ನನಲ ಜಾಸ್ತಿ ಆತ್ಂಡ್. ಯಕ್ಷಗಾನ ರಂಗಡ್ ನನಾತ್ ಬೆನಿಯೆರೆ ಇಂಚಿನ ಸಾರ್ವಜನಿಕ ಮಾನಾದಿಗೆ ಉತ್ತೇಜನ ಕೊರ್ಪುಂಡು ಪಂಡೆರ್.

ಜಿಲ್ಲಾ ಸಂಚಾಲಕ ಬಿ.ನಾಗರಾಜ್ ಶೆಟ್ಟಿ ಪ್ರಾಸ್ತಾವಿಕವಾದ್ ಪಾತೆರ್ದ್ ಬತ್ತಿ ಬಿನ್ನೆರೆನ್ ಎದ್ಕೊಂಡೆರ್. ಅಭಿಷೇಕ್ ಶೆಟ್ಟಿ, ಕವಿತಾ ಪಕ್ಕಳ ಲೇಸ್ ದ ಸುಧಾರಿಕೆ ಮಲ್ತೆರ್. ಕೃಷ್ಣಪ್ರಸಾದ್ ರೈ ಬೆಳ್ಳಿಪಾಡಿ ಸೊಲ್ಮೆ ಸಂದಾಯ ಮಲ್ತೆರ್. ಬೊಕ್ಕ ಸಾಂಸ್ಕೃತಿಕ ಕಾರ್ಯಕ್ರಮ ನಡತ್ಂಡ್.

ಬಂಟರ ಮಾತೃ ಸಂಘದ ಗಣೇಶೋತ್ಸವ ಉದಿಪನ ಲೇಸ್

ಕುಡ್ಲ: ಬಂಟರ ಯಾನೆ ನಾಡವರ ಮಾತೃ ಸಂಘ, ಶ್ರೀ ಸಿದ್ಧಿವಿನಾಯಕ ಪ್ರತಿಷ್ಠಾನ ಬೊಕ್ಕ ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸಮಿತಿದ ಆಶ್ರಯಡ್ ದ.ಕ., ಒಡಿಪು ಬೊಕ್ಕ ಕಾಸ್ರೋಡ್ ದ ಬೇತೆ ಬೇತೆ ಬಂಟರ ಸಂಘದ ಸಹಭಾಗಿತ್ವಡ್ ಸಾರ್ವಜನಿಕ ಶ್ರೀ ಗಣೇಶೋತ್ಸವ ಅಂಗವಾದ್ ಬಂಟ್ಸ್ ಹಾಸ್ಟೆಲ್ ದ ಓಂಕಾರ‌ ನಗರಡ್ ಗಣೇಶೋತ್ಸವದ ಉದಿಪನ ಲೇಸ್ ಸೆ.19 ದಾನಿ ನಡತ್ಂಡ್.

ರಾಮಕೃಷ್ಣ ಕೋ ಆಪರೇಟಿವ್ ಸೊಸೈಟಿದ ಗುರ್ಕಾರೆರ್ ಕೆ. ಜೈರಾಜ್ ಬಿ ರೈ ಬೊಕ್ಕ ಸೌಮ್ಯ ಜೆ ರೈ ಲೇಸ್ ದ ಉದಿಪನ ಮಲ್ತೆರ್.

ಸಮಾಜನ್ ಒಟ್ಟು ಮಲ್ಪೆರೆ ಇಂಚಿನ ಸಾರ್ವಜನಿಕ ಗಣೇಶೋತ್ಸವ ಪ್ರೇರಣೆ ಪಂದ್ ಪಂಡೆರ್. ಅಜಿತ್ ಕುಮಾರ್ ರೈ ಮಾಲಾಡಿ ಕೆಲವು ಯೋಜನೆಲೆನ್ ಪಾಡೊಂದೆರ್ ಅವ್ ಮಾತಾ ಕಾರ್ಯಗತ ಆಪುಂಡು ಪಂದ್ ತೆರಿಪಾಯೆರ್.

ಶ್ರೀ ವೈಷ್ಣವಿ ದುರ್ಗಾ ದೇವಸ್ಥಾನ ದಶರಥ ನಗರ ಮಣಿಪಾಲದ ಆಡಳಿತ ಮೊಕ್ತೇಸರೆರ್ ಬಿ ಜಯರಾಜ್ ಹೆಗ್ಡೆ, ಅಮ್ಮಣ್ಣಿ ಜೆ ಹೆಗ್ಡೆ ಕುರಲ್ ನ್ ವಿತರಣೆ ಮಲ್ತೆರ್. ಈಎಸ್.ಎಂ ಸಬ್ ಮೇಜರ್ ಶಶಿಧರ ಆಳ್ವ ಧ್ವಜಾರೋಹಣ ಮಲ್ತೆರ್. ಬಂಟರ ಯಾನೆ ನಾಡವರ ಮಾತೃ ಸಂಘದ ಗುರ್ಕಾರೆ, ಸಿದ್ದಿ ವಿನಾಯಕ ಪ್ರತಿಷ್ಠಾನದ ಟ್ರಸ್ಟಿ ಅಜಿತ್ ಕುಮಾರ್ ರೈ ಮಾಲಾಡಿ ಗುರ್ಕಾರ್ಮೆನ್ ವಹಿಸ್ ದ್ ಇತ್ತೆರ್.

ಗಣೇಶೋತ್ಸವ ಆಚರಣೆದ ಪೊರ್ತುಡು ಒಂಜಿ ಕ್ರಿಯಾಶೀಲ ತಂಡ ಕೆಲಸ ಮಲ್ತೊಂದು ಉಂಡು. ನೆರ್ದ್ ಸಮಾರಂಭ ಯಶಸ್ವಿಯಾತ್ಂಡ್ ಪಂದ್ ಅಜಿತ್ ಕುಮಾರ್ ರೈ ಮಾಲಾಡಿ ತೆರಿಪಾಯೆರ್.

ಬಂಟರ ಯಾನೆ ನಾಡವರ ಮಾತೃ ಸಂಘದ ಪ್ರಧಾನ ಕಾರ್ಯದರ್ಶಿ ಕೆ ಎಂ ಶೆಟ್ಟಿ, ಕೋಶಾಧಿಕಾರಿ ರಾಮಮೋಹನ್ ರೈ, ಶ್ರೀ ಸಿದ್ದಿ ವಿನಾಯಕ ಪ್ರತಿಷ್ಠಾನದ ಟ್ರಸ್ಟಿಲಾಯಿನ ಕೃಷ್ಣ ಪ್ರಸಾದ್ ರೈ, ನಿಟ್ಟೆಗುತ್ತು ರವಿರಾಜ ಶೆಟ್ಟಿ, ಜಿಲ್ಲಾ ಸಂಚಾಲಕೆರ್ ಬಿ ನಾಗರಾಜ ಶೆಟ್ಟಿ, ಬಿ ಶೇಖರ ಶೆಟ್ಟಿ, ಸುಧಾಕರ ಎಸ್ ಪೂಂಜ, , ವಸಂತ ಶೆಟ್ಟಿ, ಶರ್ಮಿಳಾ ಎಸ್ ಆಳ್ವ, ಭಾರತಿ ಜಿ ಶೆಟ್ಟಿ, ಅರುಣಾ ಎಸ್ ಶೆಟ್ಟಿ, ಆಶಾ ಜ್ಯೋತಿ ರೈ ಈ ಪೊರ್ತುಡು ಇತ್ತೆರ್. ಬೊಕ್ಕ ಸಾರ್ವಜನಿಕೆರೆಗ್ ಕುರಲ್ ನ್ ವಿತರಣೆ ಮಲ್ತೆರ್.

ಕುಡ್ಲ ತಾಲೂಕು ಸಮಿತಿ ಸಂಚಾಲಕೆರ್ ವಸಂತ ಶೆಟ್ಟಿ ಮಾತೆರೆನ್ ಎದ್ಕೊಂಡೆರ್. ಉಮೇಶ್ ರೈ ಪದವು ಮೇಗಿನಮನೆ ಸೊಲ್ಮೆ ಸಂದಾಯ ಮಲ್ತೆರ್. ಸತೀಶ್ ಶೆಟ್ಟಿ ಕೊಡಿಯಾಲ್ ಬೈಲ್, ಕವಿತಾ ಪಕ್ಕಳ ಲೇಸ್ ದ ಸುಧಾರಿಕೆ ಮಲ್ತೆರ್.

ಬಂಟ್ವಾಳಡ್ ಕತರ್ ನಾಕ್ ಕಲ್ವೆರ್ ಉಲಾಯಿ

ಬಂಟ್ವಾಳ: ಬಂಟ್ವಾಳ ಸ್ಟೇಷನ್ ದ ಪೊಲೀಸೆರ್ ಬೊಲ್ಪುಗೆ ಬಂಗಾರ್ ಕಂಡೊಂದು ಇತ್ತಿನ ಕಲ್ವೆರೆನ್ ಪತ್ತ್ ದೆರ್.

ಕಸಬಾ ಬೇಂಗ್ರೆ ನಿವಾಸಿ ಮಹಮ್ಮದ್ ಆಯುಬು ಅರೆನ ಮಗೆ ಫರಾಜ್(27) ಬೊಕ್ಕ ಸುರತ್ಕಲ್ ತಾಲೂಕು ಚೊಕ್ಕಬೆಟ್ಟು, ಕೃಷ್ಣಪುರ 8- 36 ಸೈಟ್ ನಂ 37, 4ನೇ ಬ್ಲಾಕ್ ನಿವಾಸಿ ಅಬ್ಬಾಸ್ ಅರೆನ ಮಗೆ ತೌಸಿಫ್ ಅಹಮ್ಮದ್ (34) ಅರೆಸ್ಟ್ ಆಯಿನಕುಲು.

ಮೊಕ್ಲೆಡ ಒಟ್ಟು ರೂ. 12,23,000/- ಮೌಲ್ಯದ 223ಗ್ರಾಂ ಬಂಗಾರ್ ಬೊಕ್ಕ ರೂ 3000/- ಮೌಲ್ಯದ ಬೊಳ್ಳಿ ವಸ್ತ್ ಬೊಕ್ಕ ಕೃತ್ಯಗ್ ಬಳಕೆ ಮಲ್ತಿನ ಸುಮಾರ್ 3,30,000/- ಮೌಲ್ಯದ ಮಹೀಂದ್ರ ಕೈಲೋ ಕಾರು ಬೊಕ್ಕ ಬೈಕ್ ಸೇರಿನಂಚ ಒಟ್ಟು ರೂ 15,56,000/- ಮೌಲ್ಯದ ಸೊತ್ತುಲೆನ್ ಪೊಲೀಸೆರ್ ವಶಕ್ ಪಡೆಯೊಂದೆರ್.

ಆರೋಪಿಲೆನ ಪತ್ತೆ ಕಾರ್ಯಡ್ ಎಸ್.ಪಿ. ಸಿ.ಬಿ ರಿಷ್ಯಂತ್, ಎಸ್.ಪಿ. ಧರ್ಮಪ್ಪ ಎನ್. ಎಂ, ಡಿ.ವೈ.ಎಸ್.ಪಿ. ಪ್ರತಾಪ್ ಸಿಂಗ್ ಥೋರಾಟ್ ನಿರ್ದೇಶನದಂಚ ಪೋಲಿಸ್ ಇನ್ಸ್ ಪೆಕ್ಟರ್ ನಾಗರಾಜ್ ಹೆಚ್. ಇ. ಅರೆನ ನೇತ್ರತ್ವಡ್ ಬಂಟ್ವಾಳ ನಗರ ಠಾಣೆದ ಎಸ್.ಐ.ರಾಮಕೃಷ್ಣ ಅಪರಾಧ ವಿಭಾಗದ ಎಸ್.ಐ ಕಲೈಮಾರ್, ಎ. ಎಸ್. ಐ ನಾರಾಯಣ, ಹೆಡ್ ಕಾನ್ಸ್ ಸ್ಟೇಬಲ್ ಇರ್ಷಾದ್ ಪಿ. ರಾಜೇಶ್, ಮನೋಹರ, ಸಿಬ್ಬಂದಿಲಾಯಿನ ಉಮೇಶ್ ಹಿರೇಮಠ, ರಂಗನಾಥ್ ಬೊಕ್ಕ ಜಿಲ್ಲಾ ಬೆರಳಚ್ಚು ಘಟಕದ ಸಚಿನ್ ಬೊಕ್ಕ ಉದಯ ಬೊಕ್ಕ ಜಿಲ್ಲಾ ಗಣಕಯಂತ್ರ ಕೇಂದ್ರದ ದಿವಾಕರ ಆರೋಪಿಲೆನ ಪತ್ತೆಗ್ ಸಹಕಾರ ಮಲ್ತೆರ್.

ಸಾಂಪ್ರದಾಯಿಕ ಕಸುಬುದ ಮುಖೆನ ದೇಶಗ್ ಕೊಡುಗೆ ಕೊರ್ನ ಕುಶಲಕರ್ಮಿಲು ನನ ಮಿತ್ತರ್ಮೆಗ್ ಬರಿಯೆರೆ ಉಲ್ಲೆರ್: ವೇದವ್ಯಾಸ್ ಕಾಮತ್

ಭಾರತಗ್ ಸ್ವಾತಂತ್ರ್ಯ ತಿಕ್ಕುನ ದುಂಬುದಿಂಚಲ ದೇಶದ ಏಳಿಗೆಗ್ ಅಕ್ಲೆನನೇ ಆಯಿನ ಸಾಂಪ್ರದಾಯಿಕ ಕಸಬುದ ಮೂಲಕ ಅಮೂಲ್ಯವಾಯಿನ ಕೊಡುಗೆನ್ ಕೊರ್ನಂಚಿತ್ತಿನ ಕರ ಕುಶಲಕರ್ಮಿಲೆನ್ ಪಿರೋರ ಜಾಗತಿಕವಾದ್ ಮಿತ್ತ್ ಕನಪುನ ನಿಲೆಟ್ಟ್ ಭಗವಾನ್ ವಿಶ್ವಕರ್ಮ ಜಯಂತಿ ದಾನಿ “ಪಿಎಂ ವಿಶ್ವಕರ್ಮ” ಯೋಜನೆನ್ ಪ್ರಧಾನಿ ನರೇಂದ್ರ ಮೋದಿ ಜಾರಿ ಕಾನಯೆರೆ ಉಲ್ಲೆರ್ ಪಂದ್ ಶಾಸಕೆರ್ ವೇದವ್ಯಾಸ್ ಕಾಮತ್ ಪಂಡೆರ್.

ಕೇಂದ್ರ ಸರ್ಕಾರದ “ಪಿಎಂ ವಿಶ್ವಕರ್ಮ” ಯೋಜನೆ ಲೋಕಾರ್ಪಣೆ ಕಾರ್ಯಕ್ರಮಗ್ ಕೇಂದ್ರ ಸಚಿವೆರಾಯಿನ ಪರ್ಷೋತ್ತಮ್ ರೂಪಾಲ ಮೆರ್ ಕುಡ್ಲ ಪೇಂಟೆದ ಕಾರ್ ಸ್ಟ್ರೀಟ್ ಡ್ ಇಪ್ಪುನ ಕಾಳಿಕಾಂಬಾ ದೇವಸ್ಥಾನಗ್ ಭೇಟಿ ಕೊರ್ದ್ ಬೊಕ್ಕ ಜಿಲ್ಲಾಡಳಿತದ ಮುತಾಲಿಕೆಡ್ ನಡತೊಂದು ಇತ್ತಿನ ಭಗವಾನ್ ವಿಶ್ವಕರ್ಮ ಜಯಂತಿ ಕಾರ್ಯಕ್ರಮಡ್ ಪಾಲ್ ಪಡೆಯೆರ್.

ಈ ಕಾರ್ಯಕ್ರಮಕ್ಕ್ ಹೇಳಿಕೆ ಇಜ್ಜಿಂಡಲ ಕೇಂದ್ರ ಸಚಿವೆರಾಯಿನ ಪರ್ಷೋತ್ತಮ್ ರೂಪಾಲ ಪಾಲ್ ಪಡೆನವು ವಿಶೇಷ ಆದ್ ಇತ್ತ್ಂಡ್. ಆಂಡ ಮುಖ್ಯವಾದ್ ಇಪ್ಪೊಡಾಯಿನ ಜಿಲ್ಲೆದ ಉಸ್ತುವಾರಿ ಸಚಿವೆರೇ ಇಜ್ಜಾಂಡ್. ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆದ ಅಧಿಕಾರಿಲು ಬುಂಡ ಸರ್ಕಾರದ ಬೇತೆ ಪ್ರತಿನಿಧಿಲು ಇಜ್ಜಾಂಡ್. ಶಿಷ್ಟಾಚಾರದ ಪ್ರಕಾರ ಜಿಲ್ಲಾಡಳಿತದ ಉಸ್ತುವಾರಿಡ್ ಅವೊಡಾಯಿನ ಕಾರ್ಯಕ್ರಮಟ್ಟ್ ಸರ್ಕಾರದ ಬೇಜವಾಬ್ದಾರಿ ದೇರ್ತ್ ತೋಜುಂಡು. ಉಂದು ಭಾರಿ ಬೇಜಾರದ ಸಂಗತಿ ಪಂದ್ ಪಂಡೆರ್.