ರಿಯಾದ್: ಸೌದಿ ಅರೇಬಿಯಾಡ್ ಐತಾರ ಮುಟ್ಟ ಬರ್ಸ ಬರ್ಪಿನ ಸಾಧ್ಯತೆ ಉಂಡು ಪಂದ್ ಎಚ್ಚರ್ಗೆ ಕೊರ್ತೆರ್.
ಮಕ್ಕಾ, ಅಸಿರ್, ಅಲ್ ಬಹಾ, ಜಝಾನ್ ಇಂಚಿತ್ತಿನ ಪ್ರದೇಶಲೆಡ್ ಭಾರೀ ಬರ್ಸ ಬರ್ಪಿನ ಸಾಧ್ಯತೆ ಉಂಡು ಪಂದ್ ಹವಾಮಾನ ಇಲಾಖೆ ಎಚ್ಚರ್ಗೆ ಕೊರ್ತೆರ್.
ಕಾಸಿಮ್, ಹೈಲ್, ಉತ್ತರ ಗಡಿ ಪ್ರದೇಶ, ಅಲ್ ಔಫ್, ತಬೂಕ್ ಬೊಕ್ಕ ಮದೀನಾ ಪ್ರದೇಶಲೆಡ್ ಸುಕ್ರಾರರ್ದ್ ಐತಾರ ಮುಟ್ಟ ಬರ್ಸ ಬರ್ಪಿನ ಸಾಧ್ಯತೆ ಉಂಡು.
ಕುಡ್ಲ: ಬಾಂದೊಟ್ಟು ಶ್ರೀ ಕೋರ್ದಬ್ಬು ದೈವೊಲ್ಯಡ್ ಪುನರ್ ಪ್ರತಿಷ್ಠೆ, ಮಹಾಕಲಶಾಭಿಷೇಕ ಬೊಕ್ಕ ವರ್ಷಾಧಿದ ಕೋಲ ದೇರೆಬೈಲು ಶ್ರೀ ವಿಠಲದಾಸ ತಂತ್ರಿಲೆನ ಮುತಾಲಿಕೆಡ್ ಜ.25 ರ್ದ್ 29 ಮುಟ್ಟ ನಡಪರೆ ಉಂಡು.
ಜ.25 ಬುಧಾರ ಪ್ರಾರ್ತನೆ, ವಾಸ್ತು ಶಿಲ್ಪಿಲೆರ್ದ್ ಆಲಯ ಪರಿಗ್ರಹ, ತೋರಣ ಮೂರ್ತ, ದೈವೊಲೆನ ಭಂಡಾರ ಬರಿಯೆರೆ ಉಂಡು. ಬೊಕ್ಕ ವಾಸ್ತು ರಾಕ್ಷೋಘ್ನ ಹೋಮ, ಬಲಿ ನಡಪರೆ ಉಂಡು. ಜ.26 ಗಣಹೋಮ, ಶುದ್ಧಿ, ದೈವ ದರ್ಶನಡ್ ಪರ್ವಸೇವೆ ಆದ್ ಸಾರ್ವಜನಿಕ ಅನ್ನಸಂತರ್ಪಣೆ ನಡಪುಂಡು. ಬೊಕ್ಕ ಬಯ್ಯಗ್ ಕಟೀಲ್ ಮೇಳದಕ್ಲೆರ್ದ್ ಶ್ರೀ ದೇವಿ ಮಹಾತ್ಮೆ ಆಟ ನಡಪರೆ ಉಂಡು. ಜ.27 ಶುಕ್ರಾರ ಚೌತಿ ಪರ್ಬ ಆದ್ ಅನ್ನಸಂತರ್ಪಣೆ ನಡಪುಂಡು. ಜ.28 ಸನಿಯಾರ ಶ್ರೀ ಕೋರ್ದಬ್ಬು ತನ್ನಿಮಾನಿಗ ದೈವೊಲೆನ ಕೋಲ ನಡಪರೆ ಉಂಡು. ಜ.29 ಐತಾರ ಸಭಾ ಲೇಸ್ ಆದ್ ಪೌರಾಣಿಕ ಬೊಕ್ಕ ಸಾಂಸ್ಕೃತಿಕ ಲೇಸ್ ನಡಪುಂಡು. ಬೊಕ್ಕ ರಾತ್ರೆ ರಾಹುಗುಳಿಗ, ಗುಳಿಗ-ಪಂಜುರ್ಲಿ ದೈವೊಲೆನ ಕೋಲ ಬೊಕ್ಕ ಮಾರಿಬಲಿ ಆದ್ ಭಂಡಾರ ಪೋಪುಂಡು. ಈ ಮಾತ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ದೈವೊಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಕೋರ್ದಬ್ಬು ಸೇವಾ ಸಮಿತಿದ ಅಧ್ಯಕ್ಷೆರ್ ಬಾಲಕೃಷ್ಣ ರೈ ಬಾಂದೊಟ್ಟು ಗುತ್ತು, ಪದಾಧಿಕಾರಿಲು ಬೊಕ್ಕ ಸರ್ವಸದಸ್ಯೆರ್, ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರ್ ಗಿರಿಧರ ಶೆಟ್ಟಿ, ಪದಾಧಿಕಾರಿಲು ಬೊಕ್ಕ ಸರ್ವಸದಸ್ಯೆರ್, ದೈವೊಲ್ಯದ ಗುರಿಕಾರೆರ್ ಅರುಣ್ ಗುರಿಕಾರ ಲೆಪ್ಪೋಲೆಡ್ ತೆರಿಪಾದೆರ್.
ಮಂಜೇಶ್ವರ: ಶಾಲೆದ ಗಾಡಿಗ್ ಬೈಕ್ ಗುದ್ದುದು ರಡ್ಡ್ ಕಲ್ಪಾರ್ಥಿಲು ಜಾಗೆಡೇ ತೀರ್ ಪೋಯಿನ ಘಟನೆ ಮಂಜೇಶ್ವರ ಕೈತಲ್ ದ ಮೀಂಜ ಬಾಳಿಯೂರುಡ್ ನಡತ್ಂಡ್.
ಈ ಘಟನೆಡ್ ಮೀಯಪದವುದ ಪ್ರೀತೇಶ್ ಶೆಟ್ಟಿ ಬೊಕ್ಕ ಅಭಿ ತೀರ್ ಪೋಯಿನಕುಲು ಪಂದ್ ತೆರಿದ್ ಬೈದ್ಂಡ್.
ಖಾಸಗಿ ಬಸ್ ಬೊಕ್ಕ ಟ್ರಕ್ ಗುದ್ದುದು 10 ಜನ ತೀರ್ ಪೋಯಿನ ಘಟನೆ ಮಹಾರಾಷ್ಟ್ರದ ಸಿನ್ನಾರ ಶಿರಡಿದ ಪತ್ತಾರೆ ಶಿವಾರದ ಈಶಾನೇಶ್ವರ ದೇವಲ್ಯದ ಕಮಾನುದಲ್ಪ ನಡತ್ಂಡ್.
ಬಸ್ಸ್ ಟ್ 50 ಜನ ಪ್ರಯಾಣಿಕೆರ್ ಇತ್ತೆರ್. ನೆಟ್ಟ್ ಮಸ್ತ್ ಜನಕ್ ಪೆಟ್ಟಾತ್ಂಡ್ ಪಂದ್ ತೆರಿದ್ ಬೈದ್ಂಡ್.
ಬೆಂಗ್ಲೂರ್: ಸೈಪುನ ಸ್ಥಿತಿಡ್ ಇತ್ತಿನ ಒಡು (ಪ್ಯಾಂಗೋಲಿಯನ್) ನ್ ಕೇರ್ದ್ ಅಯಿತ್ತ ವೋಡುಲೆನು (ಚಿಪ್ಪು) ಮಾರಿಯೆರೆ ತೂಯಿನ ಒರಿ ಆರೋಪಿನ್ ಬೊಕ್ಕ ಆಯಡ ಇತ್ತಿನ 30 ಕಿಲೊ ತೂಕದ ವೋಡುನು ಪೊಲೀಸೆರ್ ವಶಕ್ಕ್ ಪಡೆತೆರ್.
ನೆಟ್ಟ್ ಕಿರಣ್ ಪನ್ಪುನ ಆರೋಪಿ ಅರೆಸ್ಟ್ ಆತೆರ್. ಈ ಚಿಪ್ಪುದ ಬಿಲೆ 30 ಲಕ್ಷ ರೂ. ಪಂದ್ ಅಂದಾಜ್ ಮಲ್ಪರೆ ಆತ್ಂಡ್. ಅಂತಾರಾಷ್ಟ್ರೀಯ ಮಾರ್ಕೆಟ್ ಡ್ ಒಡುತ್ತ ವೋಡುಗು ಮಸ್ತ್ ಬೇಡಿಕೆ ಉಂಡು. ನೆನ್ ಸೌಂದರ್ಯ ವರ್ಧಕ ಸೊತ್ತುಲೆನ ಉತ್ಪಾದನೆಡ್ ಗಲಸುವೆರ್. ಹನುಮಂತ ನಗರ ಠಾಣೆಡ್ ಪೊಲೀಸೆರ್ ಕೇಸ್ ದಾಖಲ್ ಮಲ್ತ್ ದ್ ತನಿಖೆ ಮಲ್ತೊಂದು ಉಲ್ಲೆರ್.
ಎಕ್ಕಾರ್, ಬುಡಿಗಾಡ್ ನವಚೇತನಾ ಫ್ರೆಂಡ್ಸ್ ನೆತ್ತ 10 ನೇ ವರ್ಷದ ಸಾರ್ವಜನಿಕ ಶ್ರೀ ಸತ್ಯನಾರಾಯಣ ಪೂಜೆ ಬೊಕ್ಕ ಸಾಂಸ್ಕೃತಿಕ ಲೇಸ್ ಜ.29 ಐತಾರ ಎಕ್ಕಾರ್ ದ ಬುಡಿಗಾಡು ಸಾರ್ವಜನಿಕ ಗಣೇಶೋತ್ಸವ ಸಭಾಭವನಡ್ ನಡಪರೆ ಉಂಡು.
ಬಯ್ಯಗ್ ಪೊಳಲಿ ಓಂಕಾರ ಅಖಿಲೇಶ್ವರ ಭಜನಾ ಮಂಡಳಿ ಮೊಕ್ಲೆರ್ದ್ ಭಜನೆ ಲೇಸ್ ನಡಪುಂಡು. ಬೊಕ್ಕ ಸಭಾ ಲೇಸ್ ನಡಪರೆ ಉಂಡು. ನೆತ್ತ ಗುರ್ಕಾರ್ಮೆನ್ ನವಚೇತನ ಫ್ರೆಂಡ್ಸ್ ದ ಅಧ್ಯಕ್ಷೆರ್ ಸುಧೀರ್ ಪೂಜಾರಿ ಒಯಿಸೊನ್ವೆರ್. ಕೇಮಾರು ಮಠತ ಶ್ರೀ ಈಶವಿಠಲದಾಸ ಸ್ವಾಮೀಜಿ ಆಶೀರ್ವಚನ ಕೊರಿಯೆರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಶಾಸಕೆರ್ ಉಮಾನಾಥ ಕೋಟ್ಯಾನ್, ಎಕ್ಕಾರ್ ಕೊಡಮಣಿತ್ತಾಯ ದೈವೊಲ್ಯದ ಆಡಳಿತ ಮೊಕ್ತೇಸರೆರ್ ನಿತಿನ್ ಹೆಗ್ಡೆ, ಜಿಲ್ಲಾ ಪಂಚಾಯತ್ ಮಾಜಿ ಉಪಾಧ್ಯಕ್ಷೆರ್ ಕಸ್ತೂರಿ ಪಂಜ, ಸದಸ್ಯೆರ್ ಜನಾರ್ಧನ ಗೌಡ ಮುಚ್ಚೂರು, ಉದ್ಯಮಿ ಗಣೇಶ್ ಶೆಟ್ಟಿ ಮುಚ್ಚೂರು, ಪ್ರತೀಕ್ ಶೆಟ್ಟಿ, ಬಿ.ಕೆ ಪದ್ಮರಾಜ್, ಮುಕ್ತಾನಂದ ಶೆಟ್ಟಿ, ಕೃಷಿಕೆರ್ ಸದಾನಂದ ಶೆಟ್ಟಿ ಎಕ್ಕಾರ್, ಶ್ಯಾಮ್ ಶೆಟ್ಟಿ ಎಕ್ಕಾರ್, ತುಳು ಪಿಕ್ಚರ್ ದ ನಟೆ ಚೇತಕ್ ಪೂಜಾರಿ, ಎಕ್ಕಾರ್ ಗ್ರಾಮ ಪಂಚಾಯತ್ ಅಧ್ಯಕ್ಷೆರ್ ಸುರೇಖಾ ರೈ, ಸದಸ್ಯೆರ್ ಸತೀಶ್ ಶೆಟ್ಟಿ, ಕಲ್ಲಮಂಡ್ನೂರು ಗ್ರಾಮ ಪಂಚಾಯತ್ ಸದಸ್ಯೆರ್ ಲವೀನಾ ಡಿ ಸೋಜ ಬರಿಯೆರೆ ಉಲ್ಲೆರ್. ನೆಲ್ಲಿತೀರ್ಥ ಶ್ರೀನಿವಾಸ ಭಟ್, ಕೊಂಬೊಡಿ ಕೇಶವ ಪೂಜಾರಿ, ಬರಂಕಿಲ ವಾಮನ ಕೋಟ್ಯಾನ್ ಗ್ ಗೌರವ ಸಂದಾಯೆರ್ ಉಂಡು. ಕೈತಲ್ ದ ಪ್ರತಿಭೆಲೆರ್ದ್ ಸಾಂಸ್ಕೃತಿಕ ಲೇಸ್ ಬೊಕ್ಕ ಪ್ರಗತಿ ಕಲಾತಂಡ ಮುಚ್ಚೂರು ಕಲಾವಿದೆರೆರ್ದ್ ತುಳು ಸಾಮಾಜಿಕ ನಾಟಕ ಧರ್ಮ ಚಾವಡಿ ನಡಪರೆ ಉಂಡು ಪಂದ್ ಅಧ್ಯಕ್ಷೆರ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಡೆಲ್ಲಿ: ಮಾಜಿ ಕೇಂದ್ರ ಸಚಿವೆರ್, ಜೆಡಿಯು ಪಕ್ಷದ ಮಾಜಿ ಅಧ್ಯಕ್ಷೆರ್ ಶರದ್ ಯಾದವ್ (75) ಗುರುವಾರ ರಾತ್ರೆ ತೀರ್ ಪೋಯೆರ್.
ಈ ಮಾಹಿತಿನ್ ಮೆರೆನ ಮಗಲ್ ಸುಭಾಷಿಣಿ ಶರದ್ ಯಾದವ್ ಟ್ವೀಟ್ ಮಲ್ದೆರ್. ಆರ್ ಹುಷಾರ್ ಇಜ್ಜಂದೆ ಗುರುಗ್ರಾಮ್ದ ಫೋರ್ಟಿಸ್ ಆಸ್ಪತ್ರೆಗ್ ದಾಖಲ್ ಆದಿತ್ತೆರ್. ಆಂಡ ಚಿಕಿತ್ಸೆ ಫಲಕಾರಿ ಆವಂದೆ ತೀರ್ ಪೋಯೆರ್.
ಕುಡ್ಲ ಯುನಿವರ್ಸಿಟಿ ದೈಹಿಕ ಶಿಕ್ಷಣ ವಿಭಾಗ ಬೊಕ್ಕ ಸರಕಾರಿ ಪ್ರಥಮ ದರ್ಜೆ ಕಾಲೇಜ್, ಉಬಾರ್ ದ ಒಟ್ಟುಸೇರಿಗೆಡ್ ಆಂಜೋವ್ ನಕ್ಲೆಗ್ ಅಖಿಲ ಭಾರತ ಅಂತರ ವಿಶ್ವವಿದ್ಯಾಲಯ ಬಾಲ್ ಬ್ಯಾಡ್ಮಿಂಟನ್ ಚಾಂಪಿಯನ್ಶಿಪ್ 2022-23 ದ ಪಂತೊ ಜ.13 ಬೊಕ್ಕ ಜ.17 ಕ್ ಉಬಾರ್ ಸರಕಾರಿ ಪ್ರಥಮ ದರ್ಜೆ ಕಾಲೇಜ್ ಡ್ ನಡಪರೆ ಉಂಡು.
ಜ.13ಕ್ ನಡಪುನ ಲೇಸ್ ದ ಗುರ್ಕಾರ್ಮೆನ್ ಕುಡ್ಲ ಯುನಿವರ್ಸಿಟಿದ ಪ್ರೊ. ಪಿ. ಸುಬ್ರಹ್ಮಣ್ಯ ಯಡಪಾಡಿತ್ತಾಯ ಒಯಿಸೊನ್ವೆರ್. ಗೌರವ ಉಪಸ್ಥಿತಿಡ್ ಪುತ್ತೂರ್ ಶಾಸಕೆರ್ ಸಂಜೀವ ಮಠಂದೂರು ಉಲ್ಲೆರ್. ಯುವ ಸಬಲೀಕರಣ ಬೊಕ್ಕ ಕ್ರೀಡಾ ಸಚಿವೆರ್ ಕೆ.ಸಿ. ನಾರಾಯಣ ಗೌಡ ಉದಿಪನ ಮಲ್ಪುವೆರ್. ಮಲ್ಲ ಬಿನ್ನೆರಾದ್ ಇಂಧನ ಸಚಿವೆರ್ ಸುನೀಲ್ ಕುಮಾರ್, ಕುಡ್ಲ ಕಾಲೇಜ್ ದ ಜಂಟಿ ನಿರ್ದೇಶಕೆರ್ ಡಾ. ಜೆನಿಫರ್ ಲೋಲಿಟಾ ಸಿ, ಬಾಲ್ ಬ್ಯಾಡ್ಮಿಂಟನ್ ಫೆಡರೇಶನ್ ಆಫ್ ಇಂಡಿಯಾ ಪ್ರಧಾನ ಕಾರ್ಯದರ್ಶಿ ದಿನೇಶ್, ಬಾಲ್ ಬ್ಯಾಡ್ಮಿಂಟನ್ಡ್ 1ನೇ ಏಕಲವ್ಯ ಪ್ರಶಸ್ತಿ ಪುರಸ್ಕೃತೆರ್ ಮೊಹಮ್ಮದ್ ಲಿಯಾಸ್ ಬರಿಯೆರೆ ಉಲ್ಲೆರ್. ಜ.17 ಕ್ ಸಭಾ ಲೇಸ್ ನಡಪರೆ ಉಂಡು. ಈ ಲೇಸ್ ದ ಗುರ್ಕಾರ್ಮೆನ್ ಪುತ್ತೂರ್ ಶಾಸಕೆರ್ ಸಂಜೀವ ಮಠಂದೂರು ಒಯಿಸೊನ್ವೆರ್. ಕುಡ್ಲ ಯುನಿವರ್ಸಿಟಿದ ರಿಜಿಸ್ಟರ್ ಡಾ. ಕಿಶೋರ್ ಕುಮಾರ್ ಸಿ.ಕೆ ಇನಾಮು ಕೊರಿಯೆರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಆಳ್ವಾಸ್ ಶಿಕ್ಷಣ ಪ್ರತಿಷ್ಠಾನದ ಅಧ್ಯಕ್ಷೆರ್ ಡಾ.ಎಂ ಮೋಹನ್ ಆಳ್ವ, ಕಾಲೇಜ್ ಶಿಕ್ಷಣ ಇಲಾಖೆದ ಇಸೇಸ ಅಧಿಕಾರಿ ಡಾ. ಆರ್ ಶ್ರೀಕಾಂತ್, ಬೊಕ್ಕ ಗೌರವ ಉಪಸ್ಥಿತಿಡ್ ಬಾಲ್ ಬ್ಯಾಡ್ಮಿಂಟನ್ ಫೆಡರೇಶನ್ ಆಫ್ ಏಷ್ಯಾದ ಪ್ರಧಾನ ಕಾರ್ಯದರ್ಶಿ ವೈ ರಾಜಾ ರಾವ್, ಬಾಲ್ ಬ್ಯಾಡ್ಮಿಂಟನ್ಡ್ ಏಕಲವ್ಯ ಪ್ರಶಸ್ತಿ ಪಡೆತಿನ ಜಿ ಬಿ ನಾಗರಾಜ್ ಉಲ್ಲೆರ್ ಪಂದ್ ಕುಡ್ಲ ಯುನಿವರ್ಸಿಟಿ ಸಂಸ್ಥೆದ ಕಾರ್ಯದರ್ಶಿ, ಡಾ. ಜೆರಾಲ್ಡ್ ಡಿಸೋಜಾ, ಉಬಾರ್ ಸರಕಾರಿ ಪ್ರಥಮ ದರ್ಜೆ ಕಾಲೇಜ್ ದ ಪ್ರಾಂಶುಪಾಲೆರ್ ಪ್ರೊ.ಸುಬ್ಬಪ್ಪ ಕೈಕಂಬ, ರಿಜಿಸ್ಟರ್ ಡಾ. ಕಿಶೋರ್ ಕುಮಾರ್ ಸಿ.ಕೆ ಪಾಲ್ ಪಡೆವರೆ ಉಲ್ಲೆರ್.
ಬೆಂಗ್ಲೂರ್ ದ ಕಂಟೋನ್ಮೆಂಟ್ ರೈಲ್ವೇ ನಿಲ್ದಾಣಡ್ ತಿಗಲೆ ಬೇನೆಡ್ ಬೂರ್ದು ಯಾದಗಿರಿ ಜಿಲ್ಲೆದ ದೋರನಹಳ್ಳಿದ ಹಿರೇಮಠತ ವೀರಮಹಾಂತ ಶಿವಾಚಾರ್ಯ ಸ್ವಾಮೀಜಿ ತೀರ್ ಪೋಯೆರ್.
ಮೇರ್ ಜ. 11 ಕ್ ಬೆಂಗ್ಲೂರ್ ರ್ದ್ ಯಾದಗಿರಿಗ್ ಪೋನಗ ಈ ಘಟನೆ ನಡತ್ಂಡ್. ಮೆರೆನ್ ಕೂಡ್ಲೆ ಭಕ್ತೆರ್ ಆಸ್ಪತ್ರೆಗ್ ಲೆತೊಂದು ಪೋನಗ ತಾದಿ ನಡುಟ್ ತೀರ್ ಪೋಯೆರ್ ಪಂದ್ ತೆರಿದ್ ಬೈದ್ಂಡ್.
ಕೇರಳದ ಕೋಝಿಕ್ಕೋಡ್ ಜಿಲ್ಲೆದ ಸರ್ಕಾರಿ ಸ್ವಾಮ್ಯದ ಕೋರಿದ ಫಾರಂಡ್ ಪಕ್ಕಿ ಜ್ವರ ತೋಜಿದ್ ಬೈದ್ಂಡ್. ಈ ಜ್ವರಟ್ಟ್ ಸುಮಾರ್ 1800 ಕೋರಿಲು ತೀರ್ ಪೋತ್ಂಡ್.
ಈ ನಿಲೆಟ್ಟ್ ಕೇಂದ್ರದ ಮಾರ್ಗಸೂಚಿ ಬೊಕ್ಕ ನಿಯಮದ ಪ್ರಕಾರ ಉಂದೆನ್ ತಡೆಗಟ್ಟರೆ ಕ್ರಮಲೆನ್ ದೆತೊನರೆ ಕೇರಳದ ಪಶುಸಂಗೋಪನೆ ಸಚಿವೆರ್ ಆಯಿನ ಜೆ ಚಿಂಚು ರಾಣಿ ಮೇರ್ ಸೂಚನೆ ಕೊರ್ತೆರ್. ಫಾರ್ಮ್ಡ್ 5 ಸಾರರ್ದ್ ಎಚ್ಚ ಕೋರಿ ಇತ್ತ್ದ್, ಅವೆಟ್ಟ್ 1800 ಕೋರಿಲು ಪಕ್ಕಿಜ್ವರಟ್ಟ್ ತೀರ್ ಪೋತುಂಡು.
