ಕುಡ್ಲ: ಶಾಲೆದ ಜೋಕುಲೆಗ್ ಪೋವರೆ, ಬರ್ರೆ ಸ್ಕೂಲ್ ಬಸ್ ಇತ್ತಿನವು ಮಾತೆರೆಗ್ಲ ಗೊತ್ತಿತ್ತಿನ ವಿಚಾರ. ಆಂಡ ಮಾಸ್ಟರ್ನಕುಲು, ಟೀಚರ್ನಕ್ಲೆಗ್ಲ ಶಾಲೆಗ್ ಪೋವರೆ, ಬರ್ರೆ ಸ್ಕೂಲ್ ಬಸ್ ಮಲ್ದಿನ ವಿಚಾರ ನಿಕ್ಲೆಗ್ ಗೊತ್ತುಂಡೇ?
ಅಂದ್, ಕೊರೊನಾ, ಲಾಕ್ಡೌನ್, ಥರ್ಡ್ ವೇವ್ ಇಂಚಿನ ಮಾತಾ ಪೊಸ ಪೊಸ ಸಂಗತಿಲು ಇಡೀ ಜಗತ್ತ್ನೇ ಬದಲಾವಣೆ ಮಲ್ತ್ದ್ಂಡ್. “ಪರಿವರ್ತನೆ ಜಗದ ನಿಯಮ’ ಪನ್ಪಿನ ಪಾತೆರದಲೆಕ್ಕನೆ ಬದಲಾತಿನ ಜಗತ್ತ್ಡ್ ಜನೊಕ್ಕುಲು ಬದ್ಕರೆ ಕಲ್ದೆರ್. ಇಂಚ ಬಾರಿ ಸಮಯೊರ್ದು ಬೊಕ್ಕ ಶಾಲೆ, ಕಾಲೇಜಿ ಸುರುವಾತ್ಂಡ್. ಆಂಡ ಅರ್ಧಂಬರ್ದ ಕ್ಲಾಸ್, ಅರ್ಧ ಸಂಬಳ ಇಂಚಿನ ಮಾತಾ ಸಮಸ್ಯೆಲು ಶಾಲೆದ ಟೀಚರ್, ಮಾಸ್ಟರ್ನಕ್ಲೆನ್ಲ ಬುಡ್ತುಜಿ.
ಕಡಿಮೆ ಸಂಬಳೊಡು ಎಂಚಾಂಡಲ ಜೀವನ ಮಲ್ಪೊಡು ಪನ್ಪಿನ ಉದ್ದೇಸ ದೀದ್ ಮಾತೆರ್ಲ ಕರ್ಚಿ ಕಮ್ಮಿ ಮಲ್ಪರೆ ತೂಯೆರ್. ಒಂತೆ ಆಂಡಲ ಕಾಸ್ ಒರಿಪಾವರೆ ತೂವೊಂದುಲ್ಲೆರ್. ಮಾತೆರ್ಲ ಸರಳ ಜೀವನೊಗು ಒಗ್ಗ್ದ್ ಪೋತೆರ್.
ಶಾಲೆದ ಜೋಕುಲೆಗ್ ಬಸ್, ವ್ಯಾನ್ದ ವ್ಯವಸ್ಥೆ ಉಂಡು. ಆಂಡ ಟೀಚರ್ನಕುಲು ಅಕ್ಲೆಕ್ಲನ ಗಾಡಿಡ್ ಬರೊಡು. ಅಂಚಿಡ್ ಪೆಟ್ರೋಲ್, ಡೀಸೆಲ್ದ ಬಿಲೆ ಜಾಸ್ತಿ. ಕಾಸ್ ಒರಿಯೊಂದಿತ್ತಿಜಿ. ಆ ಪೊರ್ತುಡು ಸುರತ್ಕಲ್ ಎಂಆರ್ಪಿಎಲ್ದ ಡೆಲ್ಲಿ ಪಬ್ಲಿಕ್ ಸ್ಕೂಲ್ದ ಶಿಕ್ಷಕೆರ್ ಒಂಜಿ ಉಪಾಯ ಮಲ್ತೆರ್. ಅವು ದಾದ ಪಂಡ ಶಾಲೆದ ಟೀಚರ್ನಕ್ಲೆಗ್ಲ ಸ್ಕೂಲ್ ಬಸ್ ಪನ್ಪಿನ ಕಾಸೆಪ್ಟ್!
ಒಂಜಿ ವ್ಯಾನ್ ಬುಕ್ ಮಲ್ತ್ದ್ ಮಾತೆರ್ಲ ಒಂಜೇ ಗಾಡಿಡ್ ಪೋದು ಬರ್ಪಿನ ವ್ಯವಸ್ಥೆ ಮಲ್ತೊಂಡೆರ್. ಸುಮಾ ಬೊಕ್ಕ ಶಾಮಲ ಟೀಚರ್ನಕುಲು ಈ ಐಡಿಯೊನು ಬೇತೆ ಟೀಚರ್ನಕ್ಲೆನ ಒಟ್ಟುಸೇರಿಗೆಡ್ ಅನುಷ್ಠಾನೊಗು ಕನದೆರ್. ೧೫ ಜನ ಶಿಕ್ಷಕೆರ್ ಒಟ್ಟುಗಾದ್ ಒಂಜಿ ಮಿನಿ ಬಸ್ದ ವ್ಯವಸ್ಥೆ ಮಲ್ತೊಂಡೆರ್. ಇತ್ತೆ ಆ ಬಸ್ಡೇ ಶಾಲೆಗ್ ಪೋದು ಬರೊಂದುಲ್ಲೆರ್.
ಡ್ರೈವರ್ ಪೊರ್ತುಗು ಸರಿಯಾದ್ ಶಿಕ್ಷ್ಷಕೆರ್ನ ಇಲ್ಲ ಬಾಕಿಲ್ಗ್ ಬತ್ತ್ದ್ ಅಕ್ಲೆನ್ ಶಾಲೆಗ್ ಲೆತೊಂದು ಪೋದು ಬಯ್ಯಗ್ ಅಂಚೆನೆ ಇಲ್ಲ ಬಾಕಿಲ್Uನ್ಪಿರ ಕನತ್ ಬುಡ್ಪೆರ್. ಉಂದೆಟ್ಟ್ ಪೊರ್ತುಲ ಹಾಳಾಪುಜಿ. ದುಡ್ಡುಲ ಎಚ್ಚ ಕರ್ಚಾಪುಜಿ ಪನ್ಪೆರ್ ಈ ಬಸ್ಟ್ ದಿನೊಲ ಪೋಪಿನ ಟೀಚರ್ನಕುಲು. ಅಕ್ಲೆನ ಈ ಯೋಜನೆ ಯಶಸ್ವಿ ಆವಡ್. ಕಷ್ಟದ ಕಾಲೊಡು ಮಲ್ದಿನ ಈ ವ್ಯವಸ್ಥೆ ಬೇತೆಕಲೆಗ್ಲ ಮಾದರಿ ಆವಡ್ ಪನ್ಪಿನ ಆಶಯ ನಮ್ಮವು.
