May 2021

ಕಾರವಾರದ ಜವಣ್ಯೆಗ್ ತೆಲುಗುದ ” ಡಾನ್ಸ್ ಪ್ಲಸ್ 2021″ ಮಾನದಿಗೆ

ಕಾರವಾರ, ಮೇ 25: ಕಾರವಾರದ ಜವಣ್ಯೆ ಸಂಕೇತ್ ಸಹದೇವ ಪ್ರಸಿದ್ಧ ತೆಲುಗು ಡ್ಯಾನ್ಸ್ ಶೋ “ಡ್ಯಾನ್ಸ್ ಪ್ಲಸ್ 2021” ಡ್ ಗೆಂದ್ ದ್ ಪಿದಾಯಿ ಬೈದೆರ್.

ಫೈನಲ್ ಬತ್ತಿನ ಸಂಕೇತ್ ತನ್ನ ಅದ್ಭುತ ನೃತ್ಯದ ಮುಖೇನ ಇನಾಮು ಗೆಂದ್ ದೆರ್.ಸಂಕೇತ್ ಮೆರೆಗ್ ಟ್ರೋಫಿದೊಟ್ಟುಗು 20 ಲಕ್ಷ ರೂ. ಪನವುದ ಇನಾಮು ತಿಕ್ಕ್ ದುಂಡು.

ಇಂದುವೆ ರಿಯಾಲಿಟಿ ಶೋಡ್ ಶಿವಮೊಗ್ಗದ ನಿವೇದಿತಾ ಬೊಕ್ಕ ಕುಡ್ಲದ ವೆಲಾಸಿಟಿ ಕೂಟ ಪಾಲ್ ಪಡೆದ್ ಇತ್ತುಂಡು.

ಕೋವಿಡ್ ಸೊಂಕಿತೆರ್ನ ಸಾಕಾರಗ್ ವೆಬ್ ಸೈಟ್ : ಪಿಯುಸಿ ಜೋಕ್ಲೆನ ಸಾಧನೆ

ಕುಡ್ಲ, ಮೇ 25: ಕೋವಿಡ್‌ದ ಈ ಕಷ್ಟದ ಪೊರ್ತುಡುಅವ್ವೆತೋ ಸಂಘ ಸಂಸ್ಥೆಲು , ವ್ಯಕ್ತಿಲು ಸ್ವಯಂ ಪ್ರೇರಿತೇರಾದ್ ಬೇತೆ ಬೇತೆ ರೀತಿದ ಸೇವೆ ಮಲ್ತೊಂದು ಇತ್ತಿಲಕನೆ ಕುಡ್ಲದ ರಡ್ಡ್ ಜವಣ್ಯೆರ್ ವಿಶೇಷ ರೀತಿಡ್ ಸಾಕಾರ ಕೊರ್ತೆರ್.

ಕುಡ್ಲದ ಲೂರ್ಡ್ಸ್ ಸೆಂಟ್ರಲ್ ಸ್ಕೂಲ್‌ದ 12ನೆ ತರಗತಿದ ವಿದ್ಯಾರ್ಥಿಲಾಯಿನ (ಪಿಸಿಎಂಸಿ) ಅಮೋಲ್ ಮೆಂಡೋನ್ಸಾ ಬೊಕ್ಕ ಅದ್ವಿಕ್ ಅಭ್ಯುದಿತ್ ಹೆಗ್ಡೆ ಕೊರೋನ ಸೋಂಕಿತೆರೆಗ್ ಮಾಹಿತಿ, ನೆರವುಗಾದ್ ವೆಬ್‌ಸೈಟ್ ನ್ ಸುರು ಮಲ್ದೆರ್ .

ದ.ಕ. ಜಿಲ್ಲೆಡ್ ಕೊರೋನ ಸೋಂಕಿತೆರೆಗ್ ಸುಲಭವಾದ್ ತಿಕ್ಕುನ ಅಂಚನೆ ಅಂಚನೆ ಬಳಕೆದಾರ ಸ್ನೇಹಿ ಅಂಕಿಅಂಶದ ಕೊರತೆನ್ ಗೇನಡ್ ದೀದ್ ಈ ರಡ್ಡ್ ಜವಣ್ಯೆರ್ www.covidwarzonedk.com ವೆಬ್‌ಸೈಟ್ ಸುರು ಮಲ್ದೆರ್ .

ಜೈ ತುಳುನಾಡ್ (ರಿ) ಕಾಸರಗೋಡು ಸಂಘಟನೆದ ವತಿರ್ದ್ ಆನ್ ಲೈನ್ಡೇ ಪತ್ತನಾಜೆ ಕೂಟ ಅಟ್ಟನೆ

ಕಾಸ್ರೋಡು, ಮೇ 25 : ಜೈ ತುಳುನಾಡ್ (ರಿ) ಸಂಘಟನೆದ ಕಾಸರಗೋಡು ಘಟಕದ ಮುತಾಲಿಕೆಡ್ ಪತ್ತನಾಜೆದ ಪತ್ತೆರಿ ಕೂಟ ಲಾಕ್ ಡೌನ್ ದ ನಡುಟುಲಾ ಆನ್‌ಲೈನ್ ಡೇ ನಡತುಂಡು.

ತುಳುನಾಡ್ ದ ಆಚಾರ ಇಚಾರ, ಲಿಪಿ, ಸಂಸ್ಕೃತಿ ಬೊಕ್ಕ  ಒರಿಪಾದ್ ಬುಲೆಪಾವುನ ಜವಾಬ್ದಾರಿಯುತ ಬೇಲೆನ್ ನಿಸ್ವಾರ್ಥವಾದ್ ಜವಣ್ಯೇರ್ನ ಅಂಚನೆ ಪೆರಿಯೇರ್ನ ಕೂಟ ಬಾರಿ ಒಗ್ಗಟ್ ಡ್ ಮಲ್ತೊಂದು ಉಲ್ಲೆರ್.ಐತ ಒಟ್ಟುಗು ತುಳುನಾಡ್ ಡ್ ಮಾಜೊಂದು ಉಪ್ಪುನ ಪರ್ಬಲೆನ್ ಯುವ ಪೀಳಿಗೆಗ್ ಗೊತ್ತು ಮಲ್ಪಾವುನ ಪ್ರಯತ್ನನ್ ಸಾರ್ವಜನಿಕವಾದ್ ಮಲ್ತೊಂದು ಉಲ್ಲೆರ್ . ಅಂಚನೆ ತುಳುನಾಡ್ ದ ವಿಶೇಷ ದಿನಟ್ ಒಂಜಾಯಿನ ಪತ್ತನಾಜೆನ್ಲ ಗಣ್ಯರ ಸಮ್ಮುಖಡ್ , ಲಾಕ್ ಡೌನ್ ನಡುಟುಲಾ ಗೂಗಲ್ ಮೀಟ್ ಪನ್ಪಿನ ಆನ್‌ಲೈನ್ ವೇದಿಕೆಡ್ ಬಾರಿ ಗೌಜಿ ಡ್ ಪತ್ತನಾಜೆದ ಪತ್ತೆರಿ ಕೂಟನ್ ಆಚರಣೆ ಮಲ್ತೆರ್ . ಲೇಸ್ ದ ಗುರ್ಕಾರ್ಮೆನ್ ಘಟಕದ ಗುರ್ಕಾರ್ಲಾಯಿನ ಹರಿಕಾಂತ್ ಕಾಸರಗೋಡು ವಯಿಸ್ದ್ ಇತ್ತೆರ್ .

ಪೆರಿಯ ಪತ್ರಕರ್ತ, ಸಹಕಾರಿ ದುರೀಣೆರ್ ತುಳು ಸಾಹಿತಿಲೂ ಆಯಿನ ಬಿ.ಪಿ. ಶೇಣಿ ಮೆರ್ ಪತ್ತನಾಜೆದ ಬಗ್ಗೆ ಮಾಹಿತಿ ಕೊರಿಯೆರ್ . ಘಟಕದ ಗೌರವಾಧ್ಯಕ್ಷೇರಾಯಿನ ಉಮೇಶ್ ಸಾಲಿಯಾನ್, ಘಟಕದ ಜೊತೆಕಾರ್ಯದರ್ಶಿ, ತುಳು ಸಾಹಿತಿ ಶ್ರೀನಿವಾಸ ಆಳ್ವ ಕಳತ್ತೂರು, ವಿಕಿಪೀಡಿಯ ಸಂಪಾದಕಿ ಬೊಕ್ಕ ಘಟಕದ ಉಪಾಧ್ಯಕ್ಷೆ ವಿನೋದ ಪ್ರಸಾದ್ ರೈ ಕಾರಿಂಜೆ ಅಂಚನೆ ತುಳು ಸಾಹಿತಿ, ಘಟಕದ ಸದಸ್ಯೆ ರಾಜಶ್ರೀ ಟಿ ರೈ ಪೆರ್ಲ ಪಾಲ್ ಪಡೆದಿತ್ತೆರ್.

ಊರು ಪರವೂರುರ್ದು ಆನ್ ಲೈನ್ ಮುಖೇನ ಪಾಲ್ ಪಡೆಯಿನ ಗಣ್ಯೆರ್ , ಅಭಿಮಾನಿಲು ಇಂಚಿನ ಲೇಸುಲು ನನಾತ್ ಸಂಘಟನೆ ಮುಖೇನ ನಡಪಾವಡ್ ಪಂದ್ ಎಡ್ಡೆಪ್ಪುನು ಬಯಕಿಯೆರ್.

ಲೇಸ್ ದ ನಿರೂಪಣೆನ್ ಘಟಕದ ಕಾರ್ಯದರ್ಶಿ ಕಾರ್ತಿಕ್ ಮಲ್ತೆರ್ ಅಂಚನೆ ಸದಸ್ಯೆ ಕುಶಾಲಾಕ್ಷಿ ವಿ ಕುಲಾಲ್ ಕಣ್ವತೀರ್ಥ ಸೊಲ್ಮೆ ಸಂದೈತ ಮಲ್ತೆರ್.

ಇಡೀ ಜಿಲ್ಲೆನ್ ಸಂಪೂರ್ಣ ಲಾಕ್ ಡೌನ್ ಮಲ್ಪರೆಗ್ ಜಿಲ್ಲಾ ವರ್ತಕೆರ್ನ ಸಂಘೊಡ್ದ್ ಡಿಸಿಗ್ ಮನವಿ

ಒಡಿಪು, ಮೇ 25: ಒಡಿಪು ಜಿಲ್ಲಾ ವರ್ತಕರ ಹಿತರಕ್ಷಣಾ ವೇದಿಕೆ ಒಡಿಪು ಜಿಲ್ಲೆ ಈ ಸಂಸ್ಥೆ ಕರಿನ ಏಳ್ ವರ್ಷರ್ದ್ ಜಿಲ್ಲೆದ ವರ್ತಕೆರ್ನ ಹಿತರಕ್ಷಣೆ ಮಲ್ತೊಂದು ಬೈದುಂಡು.

ಕರಿನ ಸಲ ಕೋವಿಡ್ -19 ಪೊರ್ತುಡುಲಾ ತನ್ನ ಸದಸ್ಯೇರ್ನ ಮನವೊಲಿಸಾದ್ ಸಂಪೂರ್ಣ ಲಕ್ಡೌನ್ ಬೆಂಬಲ ಕೊರ್ಪದ್ ತನ್ಮೂಲಕ ಕೊರೋನ ಹತೋಟಿ ಕನಪುನಲ್ಪ ಬಾರಿ ಮಲ್ಲ ಕಜ್ಜ ಮಲ್ದೆರ್ .ಅವ್ವೆತೋ ಸಂಸಾರಗ್ ಫುಡ್ ಕಿಟ್ ಕೊರ್ಪಿನ ಮುಖೇನ ಬಡವು ಮಾಜಾವುನ ಬೇಲೆಲಾ ಮಲ್ತೊಂದು ಬೈದೆರ್.
ಈ ಸಲ ರಡ್ಡನೆ ಅಲೆ ಒಡಿಪು ಡು ಚೂರು ಜಾಸ್ತಿಯೇ ಉಪ್ಪುನೆರ್ದಾವರ ಪೇಂಟೇರ್ದ್ ಲಾ ಜಾಸ್ತಿ ಗ್ರಾಮಾಂತರ ಪ್ರದೇಶಡ್ ಜಾಸ್ತಿ ಸಾವು ಆಪುನೆರ್ದ್ ಇಡೀ ಜಿಲ್ಲೆನ್ ಸಂಪೂರ್ಣ ಲಾಕಡೌನ್ ಮಲ್ಪರೆ ಈ ಪೊರ್ತುಡು ವೇದಿಕೆ ಜಿಲ್ಲಾಧಿಕಾರಿಲೆನ ಮುಖೇನ ಸರಕಾರಗ್ ಬಿನ್ನಾಪು ಮಲ್ತೆರ್.

ಈ ಪೊರ್ತುಡು ವೇದಿಕೆದ ಒತ್ತುಗುರ್ಕಾರ್ಲಾಯಿನ ದಿ.ಯಶವಂತ ಬಿಕೆ ಮೆರ್ನ ನಿಧನದ ಪ್ರಥಮ ಪುಣ್ಯ ಸ್ಮರಣೆ ಪೊರ್ತುಡು 100 ಫುಡ್ ಕಿಟ್ ಲೆನ್ ಪೇಂಟೆಡ್ ಬಾರಿ ಕಷ್ಟಡ್ ಉಪ್ಪುನಕ್ಲೆಗ್ ಮುಟ್ಟವುನ ಬೇಲೆನ್ ಅಂಚನೆ ದೇಶಡ್ ನಡಪುನ ವಿಚಾರನ್ ಜನಕ್ಲೆಗ್ ಮುಟ್ಟವುನoಚಿನ ಕಜ್ಜ ಮಲ್ತೊಂದು ಉಪ್ಪುನ ಮಾಧ್ಯಮ ಮಿತ್ರೆರೆಗ್ ಮಾಸ್ಕ್ ,ಬೊಕ್ಕ ಆಕ್ಸಿ ಮೀಟರ್ ವಿತರಣೆ ಮಲ್ತೆರ್. ಅಂಚನೆ  ಅನಾಥೆರೆಗ್ ಆಶ್ರಯ ಕೊರೊಂದು ಉಪ್ಪುನ ವಿಶ್ವಾಸದ ಇಲ್ಲ್ ಶಂಕರಪುರ ,ಸತ್ಯದ ತುಳುವೆರ್ ಕೂಟ ಸೇವಾಕಾರ್ಯಗ್ ಹೆಲ್ಪಿಂಗ್ ಹ್ಯಾಂಡ್ಸ್ ಸಂಘಟನೆದ ಮುಖೇನ , ಒಟ್ಟು ಸುಮಾರ್ ಒಂಜಿ ಲಕ್ಷರ್ದ್ ಜಾಸ್ತಿ ಜವಾಬ್ದಾರಿದ ಬೇಲೆನ್ ಇನಿ 24 ಮೇ ತಿಂಗಳ ಸೋಮವಾರ ಜಿಲ್ಲಾಧಿಕಾರಿಲೆನ ಮುತಾಲಿಕೆಡ್ ಸಾಂಕೇತಿಕವಾದ್ ಪಟ್ಟಿಯೆರ್.

ಈ ಪೊರ್ತುಡು ವೇದಿಕೆದ ಗುರ್ಕಾರ್ಲಾಯಿನ ಶ್ರೀ ವಾಲ್ಟರ್ ಸಲ್ದನಾ , ಕಾರ್ಯದರ್ಶಿ ಆನಂದ ಕಾರ್ನಾಡ್,ವರ್ತಕರ ಸಹಕಾರ ಸಂಘದ ಗುರ್ಕಾರ್ಲಾಯಿನ ಶ್ರೀ ಡೊಲ್ಫಿ ವಿಕ್ಟರ್ ಲೂವಿಸ್, ಸದಸ್ಯೆರಾಯಿನ ಮಟ್ಟರ್ ಗಣೇಶ್ ಕಿಣಿ, ಮಹಮದ್ ಮೌಲಾ , ಮಾಕ್ಸಿಮ್ ಸಲ್ದನ , ದಿವಾಕರ ಸನಿಲ್, ಡೊನಾಲ್ಡ್ ಸಾಲ್ದಾನ , ಡ ಯನ ನರೇಂದ್ರ ಪೈ,ರೋಶಿತ್ ಜಯನಂದನ್, ದಿನೇಶ್ ಶೆಣೈ , ಸುಬ್ರಮಣ್ಯ ವಿ ಭಟ್ ಒಸ್ವಾಲ್ಡ್ ಸಾಲ್ದಾನ ಪಾಲ್ ಪಡೆದಿತ್ತೆರ್.

ಕೋವಿಡ್ ರ್ದ್ ತೀರ್ ಪೋಯಿನ ಅಂತರ್ರಾಷ್ಟ್ರೀಯ ಸ್ಯಾಕ್ಸೊಫೋನ್ ಕಲಾವಿದ ಮಚ್ಚೇಂದ್ರನಾಥ್ ಮಂಗಳಾದೇವಿ

ಕುಡ್ಲ,24 : ಅಂತರರಾಷ್ಟ್ರೀಯ ಮಟ್ಟದ ಸ್ಯಾಕ್ಸೊಫೋನ್ ಕಲಾವಿದ ಮಚ್ಚೇಂದ್ರನಾಥ್ ಮಂಗಳಾದೇವಿ (62) ಐತಾರ ತೀರ್ ಪೋಯೆರ್.

ಮೆರೆಗ್ ಕೋವಿಡ್ ಸೋಂಕು ದೃಢ ಆಯಿಬೊಕ್ಕ . ವಾರದ ಪಿರವು ಕುಡ್ಲದ ಖಾಸಗಿ ಆಸ್ಪತ್ರೆಗ್ ಸೇರಿನ ಮೆರ್ ಮರ್ದ್ ಗ್ ಸ್ಪಂದನೆ ಕೊರಂದೆ ತೀರ್ ಪೋಯೆರ್.

ಪೇಂಟೆದ ಮಂಗಳಾದೇವಿ ದೇವಸ್ಥಾನಡ್ ದಿನಾಲ ಸ್ಯಾಕ್ಸೊಫೋನ್ ಸೇವೆ ಕೊರೊಂದು ಇತ್ತೆರ್ . ದುಬೈ, ಅಬುಧಾಬಿ, ಆಸ್ಟ್ರೇಲಿಯಾ ಸೇರಿನಂಚ ಬೇತೆ ಬೇತೆ ದೇಶಡ್ ಸ್ಯಾಕ್ಸೊಫೋನ್ ಸಂಗೀತ ಕಚೇರಿ ನಡಪಾದ್ ಇತ್ತೆರ್.ಮೆರೆಗ್ ದಕ್ಷಿಣ ಕನ್ನಡ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ಸೇರಿನoಚ ಅವ್ವೆತೋ ಮಾನದಿಗೆ ತಿಕ್ಕ್ದುಂಡು.

ಅಲ್ಪಕಾಲದ ಅಸೌಖ್ಯರ್ದ್ ತೀರ್ ಪೋಯಿನ ಮೊಹಮ್ಮದ್ ಅನ್ವರ್

ಒಡಿಪು , ಮೇ 24: ದಿ. ಹಾಜಿ ಹಾಜಿ ಅನ್ವರ್ ಮೊಹಮ್ಮದ್ ರೆಹಮತುಲ್ಲಾ ಸಾಹೇಬ್ ಮೆರ್ನ ಮಗೆ , ನಗರದ ವಳಕಾಡು ನಿವಾಸಿ ಹಾಜಿ ಮುಹಮ್ಮದ್ ಅನ್ವರ್(74) ಅಲ್ಪಕಾಲದ ಅಸೌಖ್ಯರ್ದ್ ಕೋಡೆ ತೀರ್ ಪೋಯೆರ್.

ಮೆರ್ ಒಡಿಪುದ ಮುಸ್ಲಿಮ್ ವೆಲ್‌ಫೇರ್ ಅಸೋಸಿಯೇಶನ್‌ದ ಅಜೀವ ಸದಸ್ಯೆರಾದ್ ಇತ್ತೆರ್ . ಮೃತೆರ್ ಪತ್ನಿ, ಮೂಜಿ ಆಣ್ ಜೋಕುಲು , ರಡ್ಡ್ ಪೊಣ್ಣು ಜೋಕ್ಲೆನೆರ್ದ್ ದೂರ ಆತೆರ್.

ಒಡಿಪು, ಕುಂದಾಪುರ ಸರ್ಕಾರಿ ಆಸ್ಪತ್ರೆಡ್ ಜೋಕ್ಲೆನ ಐಸಿಯು

ಒಡಿಪು, ಮೇ 24: ಕೊರೋನ ಮೂಜನೆ ಅಲೆ ಜೋಕ್ಲೆನ ಮಿತ್ತ್ ಜಾಸ್ತಿ ಪರಿಣಾಮ ಬೂರುನ ನೆಲೆಟ್ಟ್ ತಜ್ಞರ ವರದಿದ ನೆಲೆಟ್ಟ್ ಜಿಲ್ಲೆಡ್ ಜೋಕ್ಲೆಗಾದ್ ಒಟ್ಟು 25 ಐಸಿಯು ಬೆಡ್‌ದ ಪ್ರತ್ಯೇಕ ವ್ಯವಸ್ಥೆನ್ ಮಲ್ಪುವ ಪಂದ್ ಒಡಿಪು ಜಿಲ್ಲಾಧಿಕಾರಿ ಜಿ.ಜಗದೀಶ್ ತೆರಿಪಾದೆರ್ .

ನಿರ್ಮಿತಿ ಕೇಂದ್ರದ ಲಾಭಾಂಶಡ್ ಪ್ರತ್ಯೇಕವಾದ್ ಒಡಿಪು ಜಿಲ್ಲಾಸ್ಪತ್ರೆಡ್ 15 ಬೊಕ್ಕ ಕುಂದಾಪುರ ತಾಲೂಕು ಆಸ್ಪತ್ರೆಡ್ 10 ಐಸಿಯು ಬೆಡ್‌ ನಿರ್ಮಾಣ ಮಲ್ಪರೆ ಉಲ್ಲಾ ಪಂದ್ ಪಂಡೆರ್ .

ಎಮ್ ಎನ್ ಜಿ ಫೌಂಡೇಶನ್ ವತಿರ್ದ್ ಕೋವಿಡ್ ಕಿಟ್

ಕುಡ್ಲ, ಮೇ 24: ಕೊರೋನ ರಡ್ಡನೆ ಅಲೆಗ್ ಲಾಕ್ ಡೌನ್ ರ್ದ್ ಪೇಂಟೆದ ಬೇತೆ ಬೇತೆ ಕಡೆಟ್ ಅವ್ವೆತೋ ಕುಟುಂಬಲು ಕಷ್ಟಡ್ ಉಪ್ಪುನೆರ್ದಾವರ ಇಂಚಿನ ಪೊರ್ತುಡು ಜಿಲ್ಲೆದ ಪ್ರತಿಷ್ಠಿತ ಸೇವಾ ಸಂಸ್ಥೆಡ್ ಒಂಜಾಯಿನ ಎಮ್ ಎನ್ ಜಿ ಫೌಂಡೇಶನ್ ಕುಡ್ಲ ಸಂಸ್ಥೆ ಬೇತೆ ಬೇತೆ ವಿಭಾಗ ಮಲ್ತೊಂದು ನಿರಂತರ ಸಂಕಷ್ಟಡ್ ಉಪ್ಪುನ ಜನಕ್ಲೆಗ್ ಸೇವೆ ಮಲ್ತೊಂದು ಉಲ್ಲೆರ್.

ದಾನಿಲೆನ ಮುಖೇನ ಒಟ್ಟು ಮಲ್ತಿನ ಕೋವಿಡ್ ಆಹಾರ ಸಾಮಗ್ರಿದ ಕಿಟ್ ಲೆನ್ ಪಾವೂರು ಪೋಡಾರ್ ಸೈಟ್, ಹರೇಕಳ ಕಡವಿನಬಳಿ, ಪಾವೂರು ದೋಟ ಭಾಗದ ಅರ್ಹ ಕುಟುಂಬಲೆಗ್ ಎಮ್ ಎನ್ ಜಿ ಫೌಂಡೇಶನ್ ಸಂಸ್ಥೆದ ಸ್ಥಾಪಕೆರಾಯಿನ ಇಲ್ಯಾಸ್ ಕುಡ್ಲ ಬೊಕ್ಕ ಸಂಸ್ತೆದ ಬೇತೆ ಸದಸ್ಯೇರ್ನ ಒಟ್ಟು ಸೇರಿಗೇಡ್ ಪಟ್ಟಿಯೆರ್.

ಈ ಪೊರ್ತುಡು ಹರೇಕಳ ಗ್ರಾಮ ಪಂಚಾಯತ್ ಗುರ್ಕಾರ್ಲಾಯಿನ ಬದ್ರುದ್ದೀನ್ ಫರೀದ್ ನಗರ, ಶಾಕಿರ್ ಪಾವೂರು, ಸತೀಶ್ ಕಡವಿನಬಳಿ, ನಿಸಾರ್ ಉಂಬುದ, ನಿಝಾಮ್ ದೆಬ್ಬೇಲಿ, ಅಶೋಕ್ ಮೊಂತೇರು, ನಿಯಾಝ್ ಅಲ್ ನಿಸಾರ್, ತಸ್ಲೀಮ್ ಹರೇಕಳ ಹಾಗೂ ಅಭಿಷೇಕ್ ಕಡವಿನಬಳಿ ಪಾಲ್ ಪಡೆದಿತ್ತೆರ್ .