May 2021

ಹಳ್ಳಿ ಹಳ್ಳಿಗ್ ವೈದ್ಯೆರ್ನ ಕೂಟ ಯೋಜನೆ : ಸಚಿವ ಆರ್. ಅಶೋಕ್

ಒಡಿಪು , ಮೇ 19: ಗ್ರಾಮೀಣ ಪ್ರದೇಶಡ್ ಕೊರೋನ ಪ್ರಕರಣಲು ಜಾಸ್ತಿ ಆವೊಂದು ಉಪ್ಪುನ ನೆಲೆಟ್ಟ್ ಬೆಂಗಳೂರು ಗ್ರಾಮಾಂತರ ಜಿಲ್ಲೆಡ್ ಜಾರಿಗ್ ಕಂದಿನ ಹಳ್ಳಿದ ಕಡೆ ವೈದ್ಯರ ಕೂಟ ಪೈಲೆಟ್ ಯೋಜನೆನ್ ಇಡೀ ರಾಜ್ಯಡ್ ಜಾರಿಗ್ ಕನರೆ ಕ್ರಮ ದೆತೊನೊಡು ಈ ಬಗ್ಗೆ ಆದೇಶ ಕೊರಿಯರೆ ರಾಜ್ಯ ಪ್ರಿನ್ಸಿಪಾಲ್ ಸೆಕ್ರೆಟರಿಗ್ ಸೂಚನೆ ಕೊರೊಡು ಪಂದ್ ರಾಜ್ಯ ಕಂದಾಯ ಸಚಿವ ಆರ್.ಅಶೋಕ್ ತೆರಿಪಾದೆರ್ .

ಪ್ರತಿ ತಾಲೂಕುಡು 15 ವೈದ್ಯೆರ್ , 40 ನರ್ಸಿಂಗ್ ಸಿಬ್ಬಂದಿಲುಪ್ಪುನ ಕೂಟ 15 ಗಾಡಿಡ್ ಪ್ರತಿ ರಡ್ಡ್ ದಿನಕೊರ ಹಳ್ಳಿಗ್ ಪೋದು ಜನಕ್ಲೆನ ಪರೀಕ್ಷೆ ಮಲ್ಪೊಡು .

ಅಗತ್ಯ ಇತ್ತುಂಡ ಚಿಕಿತ್ಸೆ ಕೊರ್ಪಿನತ್ತಂದೆ , ಜಾಸ್ತಿದ ಚಿಕಿತ್ಸೆಗಾದ್ ತಾಲೂಕು ಆಸ್ಪತ್ರೆ ಡ್ ದಾಖಲ್ ಮಲ್ಪರೆ ವ್ಯವಸ್ಥೆ ಮಲ್ಪೊಡು ಪಂದ್ ಪಂಡೆರ್.

ಅಪಘಾತಾಡ್ ಗಂಭೀರ ಗಾಯ ಆದ್ ರಡ್ಡ್ ತಿಂಗೊಲುರ್ದು ಆಸ್ಪತ್ರೆಡ್ ಇತ್ತಿನ ಜವನ್ಯೆ ಸಾವು

ಬಂಟ್ವಾಳ, ಮೇ 19: ಬಂಟ್ವಾಳ: ಅಪಘಾತಡ್ ಗಂಭೀರ ಗಾಯ ಆದ್ ಕರಿನ ರಡ್ಡ್ ತಿಂಗೊಲುರ್ದು ಖಾಸಗಿ ಆಸ್ಪತ್ರೆಡ್ ತೀವ್ರ ನಿಗಾ ಘಟಕಡ್ ಮರ್ದ್ ದೆತೊನೊಂದು ಉಪ್ಪುನ ಜವನ್ಯೆ ಇನಿ ಮರ್ದ್ ಫಲಕಾರಿಯಾವಂದೆ ತೀರ್ ಪೋತೆರ್ .

ಬಂಟ್ವಾಳ ಬಿ.ಕಸ್ಬಾ ಗ್ರಾಮದ ಮುಗ್ಡಾಲ್ ಗುಡ್ಡೆ ನಿವಾಸಿ ವಿನಯ್ (24)ತೀರ್ ಪೋಯಿನ ಆಣ್.

ಪಾದೂರು ಐಎಸ್‌ಪಿಆರ್‌ಎಲ್ ಯೋಜನೆ ಖಾಸಗೀಕರಣ : ಕಾಂಗ್ರೆಸ್ ವತಿರ್ದ್ ಜನಾಂದೋಲನ ಯಾತ್ರೆ : ಸೊರಕೆ

ಕಾಪು, ಮೇ 19: ದೇಶದ ಆತಂಕರಿಕ ಭದ್ರತೆ, ರಕ್ಷಣೆ ಬೊಕ್ಕ ಆಪತ್ ಕಾಲದ ಬಂಗದ ಪೊರ್ತುಡು ಬಳಕೆಗ್ ಬೋಡಾಪಿನ ಕಚ್ಚಾತೈಲ ಸಂಗ್ರಹಣೆಗಾದ್ ಕೇಂದ್ರ ರಕ್ಷಣಾ ಇಲಾಖೆದ ಮುಖೇನ ಪಾದೂರುದ ಕಚ್ಛಾ ತೈಲ ಸಂಗ್ರಹಣಾ ಘಟಕನ್ ಅನುಷ್ಟಾನಗ್

ಕಂದೇರ್ , ಅವೆನ್ ರಕ್ಷಣಾ ಇಲಾಖೆರ್ದ್ ಪ್ರತ್ಯೇಕ ಮಲ್ತ್ ದ್ , ಪೆಟ್ರೋಲಿಯಂ ಇಲಾಖೆಗ್ ಕೊರ್ತೆರ್ . ಅಲ್ಪರ್ದ್ ಕುಡ ಖಾಸಗಿದಕ್ಲೆಗ್ ಗುತ್ತಿಗೆ ಆಧಾರಡ್ ಕೊರ್ಪಿನವು ಖಂಡನೀಯ ಪಂದ್ ಮಾಜಿ ಸಚಿವ ವಿನಯ ಕುಮಾರ್ ಸೊರಕೆ ಪಂಡೆರ್.

ಕಾಪು ನಗರ ಕಾಂಗ್ರೆಸ್ ಗುರ್ಕಾರ್ಲಾಯಿನ ಮಹಮ್ಮದ್ ಸಾದಿಕ್ ದೀನಾರ್, ಕಾಂಗ್ರೆಸ್ ಅಲ್ಪಸಂಖ್ಯಾತ ವಿಭಾಗದ ಗುರ್ಕಾರ್ಲಾಯಿನ ಸಂಶುದ್ದೀನ್ ಶೇಖ್, ಕಾಪು ಬ್ಲಾಕ್ ಕಾಂಗ್ರೆಸ್ ಕೋಶಾಧಿಕಾರಿ ಹರೀಶ್ ನಾಯಕ್, ಕಾಪು ಗ್ರಾಮೀಣ ಕಾಂಗ್ರೆಸ್ ಗುರ್ಕಾರ್ಲಾಯಿನ ನಾಗೇಶ್ ಸುವರ್ಣ, ಮಜೂರು ಗ್ರಾಮೀಣ ಕಾಂಗ್ರೆಸ್ ಗುರ್ಕಾರ್ಲಾಯಿನ ನಾಗಭೂಷಣ ರಾವ್ ಪಾಲ್ ಪಡೆದಿತ್ತೆರ್ .

ಸಹಕಾರಿ ನೌಕರೆರೆನ್ ಫ್ರಂಟ್ ಲೈನ್ ವಾರಿಯರ್ಸ್ ಆದ್ ಘೋಷಣೆ ಮಲ್ಪರೆ ಮನವಿ

ಒಡಿಪು, ಮೇ 19: ಕೊರೋನದ ಸಂಕಷ್ಟದ ಪೊರ್ತುಡು ಸೇವೆ ಮಲ್ತೊಂದು ಉಪ್ಪುನ ಸಹಕಾರ ಸಂಘದ ನೌಕರೆರೆನ್ ಫ್ರಂಟ್‌ಲೈನ್ ವಾರಿಯರ್ಸ್ ಪಂದ್ ಪರಿಗಣಿಸಾವೊಡು ಅಂಚನೆ ಸುರುತ್ತ ಪ್ರಾಶಸ್ಯ ಕೊರ್ದು ವ್ಯಾಕ್ಸಿನೇಷನ್ ಬೊಕ್ಕ ವಿಮಾ ಭದ್ರತೆ ಕೊರೊಡು ಪಂದ್ ಸಂಬಂಧಪಟ್ಟಿನ ಸಚಿವೆರ್ , ಅಧಿಕಾರಿಲೆಗ್ ಒಡಿಪು ಜಿಲ್ಲಾ ಸಹಕಾರಿ ಯೂನಿಯನ್ ಗುರ್ಕಾರ್ಲು ಬೊಕ್ಕ ರಾಜ್ಯ ಸಹಕಾರ ಮಹಾಮಂಡಳದ ನಿರ್ದೇಶಕ ಜಯಕರ ಶೆಟ್ಟಿ ಇಂದ್ರಾಳಿ ಮನವಿ ಮಲ್ತೆರ್ .

ಒಡಿಪು ಜಲ್ಲೆದ ಸಮಸ್ತ ಸಹಕಾರಿಲೆನ ಪರವಾದ್ ಸಹಕಾರ ಸಚಿವ ಎಸ್. ಟಿ.ಸೋಮಶೇಖರ್, ಜಿಲ್ಲಾ ಉಸ್ತುವಾರಿ ಸಚಿವ ಬಸವರಾಜ ಬೊಮ್ಮಾಯಿ, ಕರ್ನಾಟಕ ರಾಜ್ಯ ಸಹಕಾರ ಮಹಾಮಂಡಳದ ಗುರ್ಕಾರ್ಲಾಯಿನ ಜಿ.ಟಿ.ದೇವೇಗೌಡ, ಒಡಿಪು ಶಾಸಕ ರಘುಪತಿ ಭಟ್, ದಕ್ಷಿಣ ಕನ್ನಡ ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್ ದ ಗುರ್ಕಾರ್ಲಾಯಿನ ಎಂ.ಎನ್.ರಾಜೇಂದ್ರಕುಮಾರ್, ಜಿಲ್ಲಾಧಿಕಾರಿ ಜಿ. ಜಗದೀಶ್ ಮೆಕ್ಲೆಗ್ ಬಿನ್ನಾಪು ಮಲ್ದೆರ್.

ಒಡಿಪು ಜಿಲ್ಲಾಧಿಕಾರಿ ಜಿ.ಜಗದೀಶ್ ಒಟ್ಟುಗು ಪ್ರಧಾನ ಮಂತ್ರಿ ನರೇಂದ್ರ ಮೋದಿ ವೀಡಿಯೊ ಸಂವಾದ

ಒಡಿಪು , ಮೇ 19: ದೇಶಡ್ ಜಾಸ್ತಿ ಕೋವಿಡ್ ಪಾಸಿಟಿವಿಟಿ ಉಪ್ಪುನ ಜಿಲ್ಲೆದ ಜಿಲ್ಲಾಧಿಕಾರಿಲೆನ ಒಟ್ಟುಗು ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಇನಿ ನಡಪಾಯಿನ ವೀಡಿಯೊ ಸಂವಾದಡ್ ಒಡಿಪು ಜಿಲ್ಲಾಧಿಕಾರಿ ಜಿ.ಜಗದೀಶ್ ಪಾಲ್ ಪಡೆದ್ ಇತ್ತೆರ್ ..

ಜಾಸ್ತಿ ಪಾಸಿಟಿವಿಟಿ ಉಪ್ಪುನ ಜಿಲ್ಲೆಡ್ ಕೋವಿಡ್ ನಿಯಂತ್ರಣದ ಬಗ್ಗೆ ಜಿಲ್ಲಾಧಿಕಾರಿಲು ಇತ್ತೆ ಮುಟ ದೈದಿನ ಕ್ರಮತ ಬಗ್ಗೆ ಪರಿಶೀಲನೆ ಮಲ್ತಿನ ಪ್ರಧಾನ ಮಂತ್ರಿಲು ನನ ದುಂಬು ದೆತೊನೊಡಾಯಿನ ಕ್ರಮತ ಬಗ್ಗೆ ವೀಡಿಯೊ ಸಂವಾದದ ಮುಖೇನ ಮಾತಾ ಜಿಲ್ಲಾಧಿಕಾರಿಲೆಗ್ ಸಲಹೆ ಕೊರಿಯೆರ್ .

ರಂಗಸ್ಥಳದ ಅಪ್ಪಣ್ಣೆ” ನನ ನಮಕ್ಕ್ ನೆಂಪು ಮಾತ್ರ

ಒಂಜಿ ಕಾಲೊಡು ಊರುಡು ಆಟ (ಯಕ್ಷಗಾನ) ಆಪಿನಿ ಪಂಡ ಒಂಜಿ ದಿನತ್ತ ಜಾತ್ರೆದಾತ್ ಗೌಜಿ. ಪರಕೆದ ಆಟ ಗೊಬ್ಬಾವುನ ಇಲ್ಲದಕ್ಲೆಗ್ ಮಾತ್ರ ಅತ್ತಾಂದೆ ಆ ಊರುದಕ್ಲೆಗ್, ಕೈತಲ್ದ ಈರುದಕ್ಲೆಗ್ಲ ಗೌಜಿಯೇ ಗೌಜಿ. ಒಂಜಿ ಕಡೆಟ್ಟ್ ಇನಿ ಕಟೀಲ್ ಮೇಳದ ಆಟ ಉಂಡುಂದಾಂಡ ನಮ್ಮ “ರಂಗಸ್ಥಳದ ಅಪ್ಪಣ್ಣೆ” ಪಂಡ್ ದೇ ಪುದರ್ ಪಡೆಯಿನ ಪದ್ಮಯ ಶೆಟ್ರ್ ಅಲ್ಪ ಕಾಂಡೆ ಕಾಂಡೆನೆ ರಂಗಸ್ಥಳ ಪಾಡರೆ ತಯಾರ್ ಆದುಪ್ಪುವೆರ್. ಅರೆನ ಬೇಲೆದಕಲ್ನ ಒಟ್ಟುಗು ಬತ್ತ್ ದ್ ರಂಗಸ್ಥಳ ಪಾಡರೆ ಜಾಗೆ ತೋಜಾದ್ ಕೊರ್ಪೆರ್.
ಅರೆನ ಬೇಲೆದಕುಲು ರಂಗಸ್ಥಳೊಗು ಗುರಿ ದೆತ್ತ್ ದ್ ರಂಗಸ್ಥಳತ್ತ ಬೇಲೆ ಮುಗಿನ ಮುಟ್ಟಲ ಸುತ್ತ ಸೇರುನ ಜೋಕುಲು ಮಧ್ಯಾಹ್ನ ಆಂಡಲ ಇಲ್ಲಗ್ ಪೋವೊಂದಿತ್ತಿಜೆರ್.ಆತ್ ಲ ಕುಸಿ ಜೋಕುಲೆಗ್.
ಒರ ಒರ ರಾತ್ರೆ ಆಟ ಸುರು ಆವೊಡ್ಡನೇ ರಂಗಸ್ಥಳ ದ ಎದುರು ಬತ್ತ್ ದ್ ಪಜೆ, ಮಂದಿರ್ ಪಾಡ್ ದ್ ಕುಲ್ಲುದು, ಅಡೇಗೆ ಜೆತ್ತಿನ ಜೋಕುಲು ಆಟ ಮುಗಿದ್ ಮಂಗಲ ಆದ್ ರಂಗಸ್ಥಳ ಗಿರ್ಪರೆ ಅಪ್ಪಣ್ಣನ ಜನೊಕ್ಕುಲು ಬನ್ನಗನೇ ಎಚ್ಚೆರ್ಗೆ ಆಪಿನಿ ಅಕ್ಲೆಗ್.ಪಂಜ ಕೊಯಿಕುಡೆ, ಪಕ್ಷಿಕೆರೆ, ಕೆಮ್ರಾಲ್, ಅತ್ತೂರು, ಕಿಲೆಂಜೂರು, ಕಿನ್ನಿಗೋಳಿ, ಕಟೀಲ್, ಸುರಗಿರಿ ,ಹಳೆಯಂಗಡಿ, ತೆಲಾರ ಪದವು ಇಂಚ ಮಾತಾ ಕಡೆಟ್ಟ್ ಲ ಪರಕೆದ ಆಟ ಇತ್ತ್ಂಡ ಅಡೆಗ್ ಅಪ್ಪಣ್ಣನ ರಂಗಸ್ಥಳ ಬರೊಂದಿತ್ತ್ಂಡ್.
ಇಂಚ ಅಪ್ಪಣ್ಣನ ಬಾಡಿಗೆದ ರಂಗಸ್ಥಲದ ಸೇವೆ ಆ ಕಾಲೊಡು ಮಲ್ಲ ಪುದರ್ ಪಡೆದಿನ. ಇಂಚಿನ ಬಾಡಿಗೆ ರಂಗಸ್ಥಳ ದ ಸೇವೆ ಮಲ್ತೊಂದಿತ್ತಿನ ಅಪ್ಪಣ್ಣೆ ಮೇ 17(ಸೋಮಾರ) ದೇವೆರ್ನ ಪಾದ ಸೇರಿಯೆರ್.

ಆರ್ ಬೊಡೆದಿ, ಮೂಜಿ ಆಣ್ ಜೋಕುಲು, ಒರ್ತಿ ಮಗಲ್ ,ಅರುವತ್ತನ್ ಅಂಚೆನೇ ಬಂಧು ಬಳಗೊನು ಬುಡ್ದು ಪರಲೋಕ ಸೇರಿಯೆರ್. ಅಪ್ಪಣ್ಣೆ ನನ ನಮಕ್ಕ್ ನೆಂಪು ಮಾತ್ರ.
ಬೀಡಿದ ಬ್ರ್ಯಾಂಚ್ ದ ಮ್ಯಾನೇಜರ್ ಆದ್, ಹರಿಪಾದೆ ಸಾನದ ಮಸುಲುಡಿಕೆದ ಕಲಾವಿದೆರಾದ್, ದೈವ ದೇವೆರೆನ ಸೇವೆಡ್ ದುಂಬು ಉಂತುದು,ಸಮಾಜಸೇವೆಡ್ ಪುಗರ್ತೆ ಪಡೆದಿನ ಪದ್ಮಯ ಶೆಟ್ರ್ ನನ ನಮ್ಮೊಟ್ಟುಗು ಇಜ್ಜೆರ್.ಅರೆನ ಆತ್ಮೊಗು ಶಾಂತಿ ತಿಕ್ಕಡ್. ಅರೆನ ಇಲ್ಲದಕ್ಲೆಗ್ ದುಃಖೊನು ಸಹಿಸೊನುನ ಶಕ್ತಿ ನ್ ದೇವೆರ್ ಕೊರಡ್ ಪಂಡ್ ದ್ ದೇವೆರ್ಡ ಪ್ರಾರ್ಥನೆ.

ವಿದ್ಯುತ್ ಬಿಲ್ ಮನ್ನಾ ಮಲ್ಪರೆ ಕಾಂಗ್ರೆಸ್ ಮನವಿ

ಕುಡ್ಲ , ಮೇ 19: ಲಾಕ್‌ಡೌನ್ ಪೊರ್ತುಡು ವಿದ್ಯುಚ್ಛಕ್ತಿ ಬಿಲ್ಲ್ ನ್ ಮನ್ನಾ ಮಲ್ಪೊಡು ಅಂಚನೆ ವಿದ್ಯುತ್ ಸರಬರಾಜು ಸಂಪರ್ಕನ್ ಕಡಿತ ಮಲ್ಪರೆ ಬಲ್ಲಿ ಪಂದ್ ಒತ್ತಾಯಿಸಾದ್ ಮೆಸ್ಕಾಂ ಅಧಿಕಾರಿಲೆಗ್ ಮಾಜಿ ವಿಧಾನ ಪರಿಷತ್ ಸದಸ್ಯ, ಎಐಸಿಸಿ ಕಾರ್ಯದರ್ಶಿ ಐವನ್ ಡಿಸೋಜ ನೇತೃತ್ವದ ನಿಯೋಗ ಮನವಿ ಮಲ್ದೆರ್ .

ಕೊರೋನ ಪೊರ್ತು ರಾಜ್ಯ ಸರಕಾರ ಲಾಕ್‌ಡೌನ್ ಮಲ್ತಿನೆತ್ತ ಪರಿಣಾಮ ಕಾರ್ಮಿಕೆರ್ , ಎಲ್ಯ ಉದ್ದಿಮೆದಾರೆರ್ ವಿದ್ಯುತ್ ಬಿಲ್ಲ್ ಕಟ್ಟೆರೆ ಬಂಗ ಆವೊಂದು ಉಂಡು.ವಿದ್ಯುತ್ ಬಿಲ್ಲ್ ಕಟ್ಟರೆ ಆವಂದಿನ ಗ್ರಾಹಕೆರ್ನ ವಿದ್ಯುತ್ ಸರಬರಾಜುನು ಒವ್ವೆ ಕಾರಣಗ್ ಲಾ ಉಂತಾಯೆರೆ ಬಲ್ಲಿ ಪಂದ್ ಮನವಿ ಮಲ್ತೆರ್.

ಎಸ್‌ಸಿಡಿಸಿಸಿ ಬ್ಯಾಂಕ್ ವತಿರ್ದ್ ಆಯಂಬುಲೆನ್ಸ್ ಕೊಡುಗೆ

ಕುಡ್ಲ , ಮೇ 19: ದಕ್ಷಿಣ ಕನ್ನಡ ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್ ವತಿರ್ದ್ ಸಾರ್ವಜನಿಕೆರ್ನ ಉಚಿತ ಸೇವೆಗಾದ್ ಆಕ್ಸಿಜನ್ ಸಹಿತ ಆಯಂಬುಲೆನ್ಸ್ನ್ ಸೇವಾಂಜಲಿ ಟ್ರಸ್ಟ್‌ಗ್ ಸೋಮವಾರ ಕೊರಿಯೆರ್ .

ಎಸ್‌ಸಿಡಿಸಿಸಿ ಬ್ಯಾಂಕ್ ಗುರ್ಕಾರ್ಲಾಯಿನ ಡಾ.ಎಂ.ಎನ್.ರಾಜೇಂದ್ರ ಕುಮಾರ್ ಆಯಂಬುಲೆಬನ್ಸ್ ನ್ ಸೇವಾಂಜಲಿ ಟ್ರಸ್ಟ್ ಗುರ್ಕಾರ್ಲಾಯಿನ ಶಾಸಕ ವೇದವ್ಯಾಸ ಕಾಮತ್‌ರೆಗ್ ಕೀ ಕೊರ್ಪಿನ ಮುಖೇನ ಚಾಲನೆ ಕೊರಿಯೆರ್.

ವಿಶ್ವ ಸುಂದರಿ ಪಂಥ : ಒಡಿಪುದ ಆಯಡ್ಲಿನ್ ಕ್ಯಾಸ್ಟೋಲಿನೋ ಮೂಜನೆ ರನ್ನರ್ ಅಪ್

ಒಡಿಪು , ಮೇ 19: ಅಮೆರಿಕಾದ ಫ್ಲೋರಿಡಾದ ಹಾಲಿವುಡ್‌ದ ಸೆಮಿ ನೋಲ್ ಹಾರ್ಡ್ ರಾಕ್ ಹೋಟೆಲ್ ಬೊಕ್ಕ ಕ್ಯಾಸಿನೊಡು ಐತಾರ ನಡತಿನ 69ನೇ ವಿಶ್ವ ಸುಂದರಿ ಪಂಥಡ್ ಮಿಸ್ ಇಂಡಿಯಾ ಸ್ಪರ್ಧೆಡ್ ಒಡಿಪು ಉದ್ಯಾವರ ಮೂಲದ ಆಯಡ್ಲಿನ್ ಕ್ಯಾಸ್ಟೋಲಿನೋ ಮೂಜನೆ ರನ್ನರ್ ಅಪ್ ಸ್ಥಾನ ಪಡೆತೆರ್ .

ಉದ್ಯಾವರ ಮೂಲದ ಅಲ್ಫೋನ್ಸಸ್ ಕ್ಯಾಸ್ಟೆಲಿನೊ ಬೊಕ್ಕ ಮೀರಾ ಕ್ಯಾಸ್ಟೆಲಿನೊ ದಂಪತಿ ಪುತ್ರಿಯಾಯಿನ 22 ವರ್ಷದ ಆಯಡ್ಲಿನ್ ಕ್ಯಾಸ್ಟೋಲಿನೋ ಕುವೈತ್ ಡ್ ಪುಟ್ಟುದು ಮುಂಬೈದ ಸೇಂಟ್ ಕ್ಸೇವಿಯರ್ಸ್ ಕಾಲೇಜ್ ಡ್ ಪ್ರೌಢ ಬೊಕ್ಕ ಪದವಿ ಶಿಕ್ಷಣ ಪಡೆತೆರ್.