February 2021

ವಿಶ್ವ ಮಾತೃಭಾಷ ದಿನತಾನಿ “ತುಲು-ತುಲಿಪು”, ಜೈ ತುಲುನಾಡ್ ಸಂಘಟನೆ ಬೊಕ್ಕ ಕರ್ನಾಟಕ ತುಲು ಸಾಹಿತ್ಯ ಅಕಾಡೆಮಿರ್ದ್ ವಿಶಿಷ್ಟ ಲೇಸ್

ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಬೊಕ್ಕ ಜೈ ತುಳುನಾಡ್ (ರಿ.) ಮೆಕ್ಲೆನ ಒಟ್ಟು ಸೇರಿಗೆಡ್ ವಿಶ್ವ ಮಾತೃ ಭಾಷಾ ದಿನದ ಪರವಾದ್ ಉರ್ವ ದ ತುಳು ಭವನಡ್ “ತುಲು- ತುಲಿಪು” ಲೇಸ್ ಬಾರಿ ಗೌಜಿ ಡ್ ನಡತುಂಡು.

ಲೇಸ್ ನ್ ಕಲಸೆಗ್ ಬಾರ್ ಪಾಡುನ ಮುಖೇನ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಗುರ್ಕಾರ್ಲಾಯಿನ ದಯಾನಂದ ಜಿ ಕತ್ತಾಲ್‌ಸರ್‌ ಮೇರ್ ಉದಿಪನ ಮಲ್ತ್ ದ್, ಅಪ್ಪೆ ಭಾಷೆದ ಮಹತ್ವದ ಬಗ್ಗೆ ತೆರಿಪಾಯೆರ್. ಲೇಸ್ ದ ಸಭಾಧ್ಯಕ್ಷತೆನ್ ವಹಿಸೊಂದು ಪಾತೆರಿನ ಡಾ.ಆಕಾಶ್ ರಾಜ್ ಜೈನ್ ತುಲು ಭಾಷೆ ರಾಜ್ಯದ ಅಧಿಕೃತ ಭಾಷೆ ಸ್ಥಾನಮಾನದ ಸಾಧಕ ಬಾಧಕದ ಬಗ್ಗೆ ಪಾತೆರ್ದ್ “ತುಲು ರಾಜ್ಯ ಭಾಷೆಯಾಪಿನ ಮುಟ ತುಳುವೆರ್ ಮಾತಾ ಒಟ್ಟಾದ್ ಹೋರಾಟ ಮಲ್ಪುನ ಅನಿವಾರ್ಯತೇ ಉಂಡು ಪಂದ್ ಪಂಡೆರ್.

“ಪಾರ್ದನದ ಪೊರ್ಲು- ತಿರ್ಲ್” ಲೇಸ್ ಡ್ ಪೆರಿಯ ಪಾರ್ದನ ಕಲಾವಿದೆರಾಯಿನ ಅಪ್ಪಿ ಶೆಟ್ಟಿ ಅಂಚನೇ ದೈವ ನರ್ತಕೆರ್ ಬೊಕ್ಕ ಸಿವಿಲ್ ಇಂಜಿನಿಯರ್ ಆಯಿನ ರವೀಶ್ ಪಡುಮಲೆ ಮೇರ್ ಪಾರ್ದನ ಪಂಡೆರ್.

ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಸದಸ್ಯರಾಯಿನ ಶ್ರೀಮತಿ ತಾರಾ ಆಚಾರ್ಯ, ನಾಗೇಶ್ ಕುಲಾಲ್, ನರೇಂದ್ರ ಕೆರೆಕಾಡು, ‌ದಿನೇಶ್ ರೈ ಕಡಬ, ತುಳು ರಂಗಭೂಮಿ ಕಲಾವಿದೆರಾಯಿನ ಇಸ್ಮಾಯಿಲ್ ತಣ್ಣೀರುಬಾವಿ, ಜೈ ತುಳುನಾಡ್ ಸಂಘಟನೆದ ಗುರ್ಕಾರ್ಲಾಯಿನ ಸುದರ್ಶನ್ ಸುರತ್ಕಲ್ ಪಾಲ್ ಪಡೆದಿತ್ತೆರ್.

ಅವ್ವೆ ಪೊರ್ತುಡು ತುಳು ಕಬಿಕೂಟಡ್ ಪದವಿಪೂರ್ವ ಕಾಲೇಜ್ ದ ಉಪನ್ಯಾಸಕೆರ್ ರಘು ಇಡ್ಕಿದು, ಉಡುಪಿ ಸಮೂಹ ಸಂಸ್ಥೆದ ಉಪನ್ಯಾಸಕಿ ಅರ್ಪಿತಾ ಶೆಟ್ಟಿ , ಸಾಹಿತಿಲಾಯಿನ ಆರ್ಯನ್ ಸವಣಾಲ್ ಮೇರ್ ತುಳು ಕಬಿಕೂಟದ ಮಲ್ಲ ಬಿನ್ನೆರ್ ಆದ್ ಪಾಲ್ ಪಡೆಯೆರ್.

ಸಂಘಟನೆದ ಸದಸ್ಯೆರೆರ್ದ್ ತುಳು ಕವಿಗೊಷ್ಟಿ ನಡತುಂಡು .ಜೈ ತುಳುನಾಡು ಸಂಘಟನೆದ ಸಂಸ್ಥಾಪಕ ಸದಸ್ಯರಾಯಿನ ಅಂಚನೇ ತುಳು ಪರ ಬೇಲೆ ಡ್ ನಿರಂತರವಾದ್ ಪಾಲ್ ಪಡೆಯುನ ‌ಕಿರಣ್ ತುಳುವೆ ಮೆರೆಗ್ ಮಾನದಿಗೆ ಮಲ್ತೆರ್.ಅಂಚನೇ ತುಳು ಲಿಪಿ ಶಿಕ್ಷಕೆರೆಗ್ಲಾ ಮಾನದಿಗೆ ಮಲ್ತೆರ್ .ರಾಜೇಂದ್ರ ಪ್ರಸಾದ್ ಎಕ್ಕಾರ್ ಲೇಸ್ ದ ನಿರೂಪಣೆ ಮಲ್ತೆರ್. ಚಿರಶ್ರೀ ಕಬಿಕೂಟ ಲೇಸ್ ನಡಪಾದ್ ಕೊರಿಯೆರ್, ಸಂಘಟನೆದ ಸದಸ್ಯೆರಾಯಿನ ಪೂರ್ಣಿಮ ಬಂಟ್ವಾಳ ಎದುಕೊಂಡೆರ್ . ದೀಕ್ಷಿತಾ ಮಧ್ಯ ಸೊಲ್ಮೆ ಸಂದೈತ ಮಲ್ತೆರ್ .