ತುಳು ಸುದ್ದಿ

ಫೆ.21-29: ಇರುವೈಲ್ ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯಡ್ ವರ್ಷಾವಧಿ ಜಾತ್ರೆ, ತೇರ್ ಉಚ್ಚಯ

ಬೆದ್ರ: ಇರುವೈಲ್ ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯಡ್ ಫೆ.21-29 ಮುಟ್ಟ ವರ್ಷಾವಧಿ ಜಾತ್ರೆ, ತೇರ್ ಉಚ್ಚಯ ನಡಪರೆ ಉಂಡು.

ಈ ಲೇಸ್ ಎಡಪದವು ಬ್ರಹ್ಮಶ್ರೀ ಗಣೇಶ ತಂತ್ರಿಲೆನ ಮುತಾಲಿಕೆಡ್ ನಡಪರೆ ಉಂಡು.

ಫೆ.17 ಸನಿಯಾರ ಬೊಲ್ಪುಗು ತಾರಾಯಿದ ಗಣಹೋಮ, ಅಪ್ಪದ ಪೂಜೆ, ಪಂಚಕಜ್ಜಾಯ, ಗುಡಾನ್ನ ನೈವೇದ್ಯ, ಮಹಾಪೂಜೆ, ಅನ್ನ ಪ್ರಸಾದ ಸೇವೆ, ರಾತ್ರೆ ರಂಗಪೂಜೆ ನಡತ್ಂಡ್.

ಫೆ.21 ಬುಧಾರ ಬೊಲ್ಪುಗು ಸಾಮೂಹಿಕ ದೇವತಾ ಪ್ರಾರ್ತನೆ, ಕುಂಟ ಮೂರ್ತ ನಡತ್ಂಡ್. ಮಧ್ಯಾಹ್ನ ಮಹಾಪೂಜೆ, ರಾತ್ರೆ ಉಚ್ಚಯ ಬಲಿ ನಡತ್ಂಡ್.

ಫೆ.22 ಗುರುವಾರ (ಇನಿ) ಇಸೇಸ ಪೂಜೆ, ಉಚ್ಚಯ ಬಲಿ ನಡಪರೆ ಉಂಡು.

ಫೆ.23 ಸುಕ್ರಾರ ಬೊಲ್ಪುಗು ತಂಬಿಲ ಸೇವೆ, ಮಹಾಪೂಜೆ, ಬಯ್ಯಗ್ ಅಂಕುರಾರೋಪಣ, ಉಚ್ಚಯ ಬಲಿ ನಡಪರೆ ಉಂಡು.

ಫೆ.24 ಸನಿಯಾರ ಬೊಲ್ಪುಗು ಕಲಶ ಪ್ರಧಾನ ಹೋಮ, ಬೊಲ್ಪುಗು ಕೊಡಿ ಏರಿಯೆರೆ, ಮಹಾಪೂಜೆ, ಅನ್ನ ಪ್ರಸಾದ ಸೇವೆ ಬಯ್ಯಗ್ ಉಚ್ಚಯ ಬಲಿ, ಕಂಚಿಲಾಲೆ ರಾತ್ರೆ ಆಟ ನಡಪರೆ ಉಂಡು.

ಫೆ.25 ಐತಾರ ಬೊಲ್ಪುಗು ನವಕ ಕಲಶಾಭಿಷೇಕ, ಪ್ರಧಾನ ಹೋಮ, ಸಾಮೂಹಿಕ ಶ್ರೀ ಸತ್ಯನಾರಾಯಣ ಪೂಜೆ, ಮಹಾಪೂಜೆ, ಅನ್ನ ಪ್ರಸಾದ ಸೇವೆ, ಬಯ್ಯಗ್ ಉಚ್ಚಯ ಬಲಿ, ಕಟ್ಟೆಪೂಜೆ, ಕೆರೆ ದೀಪೋಚ್ಚಯ ನಡಪರೆ ಉಂಡು.

ಫೆ.26 ಸೋಮಾರ ಬೊಲ್ಪುಗು ನವಕ ಕಲಶ ಪ್ರಧಾನ ಹೋಮ, ಮಹಾಪೂಜೆ, ಅನ್ನ ಪ್ರಸಾದ ಸೇವೆ ರಾತ್ರೆ ಧಾರ್ಮಿಕ ಸಭೆ, ಭೇರಿತಾಡನೆ, ನಡುಬಲಿ ಉಚ್ಚಯ, ಚಂದ್ರಮಂಡಲ ಸೇವೆ, ಬಾಕಿಮಾರು ದೀಪೋಚ್ಚಯ ಕಟ್ಟೆಪೂಜೆ ನಡಪರೆ ಉಂಡು.

ಫೆ.27 ಅಂಗಾರೆ ಬೊಲ್ಪುಗು ನವಕ ಕಲಶ ಪ್ರಧಾನ ಹೋಮ, ಮಲ್ಲ ತೇರ್ ಉಚ್ಚಯ, ಅನ್ನ ಪ್ರಸಾದ ಸೇವೆ, ರಾತ್ರೆ ತೇರ್ ಉಚ್ಚಯ, ಶ್ರೀ ಭೂತಬಲಿ, ಶಯನೋಚ್ಚಯ, ಕವಾಟ ಬಂಧನ, ಬೆಡಿಮರ್ದ್ ಪ್ರದರ್ಶನ ನಡಪರೆ ಉಂಡು.

ಫೆ.28 ಬುದಾರ ಬೊಲ್ಪುಗು ಕವಾಟ ಉದಿಪನ, ಪಲ್ಲಪೂಜೆ, ತುಲಾಭಾರ ಸೇವೆ, ಕಲಶಾಭಿಷೇಕ, ಚೂರ್ಣೋಚ್ಚಯ, ಚಂದ್ರಮಂಡಲ ಸೇವೆ, ಮಹಾಪೂಜೆ, ಮಧ್ಯಾಹ್ನ ಮಹಾ ಅನ್ನ ಪ್ರಸಾದ ಸೇವೆ, ರಾತ್ರೆ ಬ್ರಹ್ಮ ತಂಬಿಲ, ಉಚ್ಚಯ, ಕಟ್ಟೆಪೂಜೆ, ಓಕುಳಿ, ಅವಭೃತ, ಮಾಡ್ಲಾಯಿ ದೈವ ದೇವೆರೆನ ಭೇಟಿ, ಮಾಡ್ಲಾಯಿ ದೈವೊದ ನೇಮ, ಕೊಡಿ ಜಾವೆರೆ ಉಂಡು.

ಫೆ‌.29 ಗುರುವಾರ ಬೊಲ್ಪುಗು ಮಂಗಳ ಗಣಯಾಗ, ನವಕ ಕಲಶ, ಪ್ರಧಾನ ಹೋಮ, ಮಹಾಪೂಜೆ, ಅನ್ನ ಪ್ರಸಾದ ಸೇವೆ ಬಯ್ಯಗ್ ಹೊಸಮರಾಯ ದೈವೊದ ಭಂಡಾರ ಜಪ್ಪೆರೆ, ರಾತ್ರೆ ಹೊಸಮರಾಯ ದೈವೊದ ನೇಮ ನಡಪರೆ ಉಂಡು.

ಈ ಲೇಸ್ ಗ್ ಮಾತೆರ್ಲಾ ಕುಟುಂಬ ಸಮೇತೆರಾದ್ ಬತ್ತ್ ದ್, ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಇರುವೈಲ್ ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯದ ವ್ಯವಸ್ಥಾಪನಾ ಸಮಿತಿದ ಗುರ್ಕಾರೆ ಐ.ಕುಮಾರ್ ಶೆಟ್ಟಿ ಇರುವೈಲ್, ಅರ್ಚಕೆರ್ ಐ.ರಾಘವೇಂದ್ರ ಭಟ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಇನಿ ಮುಂಡ್ಕೂರು ಕಜೆ ಶ್ರೀ ಮಹಾಮ್ಮಾಯಿ ದೇವಲ್ಯಡ್ ಬ್ರಹ್ಮಕಲಶಾಭಿಷೇಕ, ಧಾರ್ಮಿಕ, ಸಾಂಸ್ಕೃತಿಕ ಲೇಸ್ ಸುರು

ಮುಂಡ್ಕೂರು: ಒಡಿಪುದ ಕಾರ್ಲ ತಾಲೂಕ್ ದ ಮುಂಡ್ಕೂರು ಕಜೆ ಶ್ರೀ ಮಹಾಮ್ಮಾಯಿ ದೇವಲ್ಯಡ್ ಬ್ರಹ್ಮಕಲಶಾಭಿಷೇಕ, ಧಾರ್ಮಿಕ ಬೊಕ್ಕ ಸಾಂಸ್ಕೃತಿಕ ಲೇಸ್ (ಫೆ.22) ಇನಿರ್ದ್ ಫೆ.28 ಮುಟ್ಟ ನಡಪರೆ ಉಂಡು.

ಫೆ.22 ಕ್ಕ್ (ಇನಿ) ಬೊಲ್ಪುಗು ಸಾಮೂಹಿಕ ಪ್ರಾರ್ತನೆ, ತೋರಣ ಮೂರ್ತ, ಉಗ್ರಾಣ ಮೂರ್ತ, ಗಣಪತಿ ಹೋಮ, ಬಯ್ಯಗ್ ರಾಕ್ಷೋಘ್ನ ಹೋಮ, ವಾಸ್ತುಪೂಜೆ, ವಾಸ್ತುಬಲಿ ನಾಗಮಂಡಲ ನಡಪರೆ ಉಂಡು.

ಫೆ.23 ಕ್ಕ್ ನವಗ್ರಹ ಯಾಗ, ಮೃತ್ಯುಂಜಯ ಯಾಗ, ಪುದೆಕಾಣಿಕೆ ಮೆರವಣಿಗೆ, ಬಯ್ಯಗ್ ಆದಿವಾಸ ಹೋಮ, ದೈವೊಲೆನ ಅಧಿವಾಸ, ಕಳಶಾದಿವಾಸ, ವಾಸ್ತು ಹೋಮ, ಬಲಿ ನಡಪರೆ ಉಂಡು.

ಫೆ.24 ಕ್ಕ್ ಶಿಖರ ಪ್ರತಿಷ್ಠೆ, ಶ್ರೀ ಮಹಮ್ಮಾಯಿ ದೇವಿನ ಬಿಂಬ ಗದ್ದಿಗೆ ಪ್ರತಿಷ್ಠೆ, ನಿದ್ರಾ ಕುಂಭಾಭಿಷೇಕ, ಪ್ರಸನ್ನ ಪೂಜೆ, ಕಲಶಾಭಿಷೇಕ, ಆಶ್ಲೇಷ ಬಲಿ, ಪ್ರತಿಷ್ಠಾಪನೆ ಲೇಸ್, ವಾಸ್ತು ಹೋಮ, ವಾಸ್ತು ಬಲಿ ನಡಪರೆ ಉಂಡು.

ಫೆ.25 ಕ್ಕ್ ಶಾಂತಿ ಹೋಮ, ಕಲಸ ಮಂಡಲ ರಚನೆ, ಮಹಾ ಚಂಡಿಕಾಯಾಗ, ದೇವಿ ದರ್ಶನ, ಅನ್ನ ಪ್ರಸಾದ ಸೇವೆ, ಬಯ್ಯಗ್ ಅಧಿವಾಸ ಹೋಮ ನಡಪರೆ ಉಂಡು.

ಫೆ.26 ಕ್ಕ್ ಬ್ರಹ್ಮಕಲಶಾಭಿಷೇಕ, ಬ್ರಹ್ಮ ಕುಂಭಾಭಿಷೇಕ, ಪ್ರಸನ್ನ ಪೂಜೆ, ದೇವಿ ದರ್ಶನ, ಪಲ್ಲಪೂಜೆ, ಅನ್ನ ಪ್ರಸಾದ ಸೇವೆ ನಡಪರೆ ಉಂಡು.

ಫೆ.27 ಕ್ಕ್ ಮೆರವಣಿಗೆ, ಮುಡ್ಕೂರು ದೇವಲ್ಯಡ್ ಸಾರ್ವಜನಿಕ ಅನ್ನ ಪ್ರಸಾದ ಸೇವೆ, ಮಧ್ಯಾಹ್ನ ಮೆರವಣಿಗೆದ ಮುಕೇನ ಜಾರಿಗೆ ಕಟ್ಟೆ -ಪೇರೂರು-ಸಚ್ಚರಿಪೇಟೆ ಕಟ್ಟೆಡ್ ಪೂಜೆ, ರಾತ್ರೆ ಮಾರಿಗುಡಿಟ್ಟ್ ದೇವಿ ದರ್ಶನ ರಾತ್ರೆ ಗುಳಿಗ ಪಂಜುರ್ಲಿ ದೈವೊಲೆನ ನೇಮ ನಡಪರೆ ಉಂಡು.

ಫೆ.28 ಕ್ಕ್ ವಾರ್ಷಿಕ ಮಾರಿ ಪೂಜೆ, ಮಧ್ಯಾಹ್ನ ಮಹಾಪೂಜೆ, ದೇವಿ ದರ್ಶನ ನಡಪರೆ ಉಂಡು.

ಅಂಚೆನೆ ಪ್ರತಿದಿನೊಲ ಬಯ್ಯಗ್ ಸಭಾ ಲೇಸ್ ದ ಬೊಕ್ಕ ಸಾಂಸ್ಕೃತಿಕ ಲೇಸ್ ನಡಪರೆ ಉಂಡು. ಅತ್ತಂದೆ ಬೊಲ್ಪುರ್ದ್ ಬಯ್ಯ ಮುಟ್ಟ ಧಾರ್ಮಿಕ ಬೊಕ್ಕ ಸಂಗೀತ ಲೇಸ್ ನಡಪರೆ ಉಂಡು. ನೆತ್ತೊಟ್ಟಿಗೆ ಅನ್ನ ಪ್ರಸಾದ ಸೇವೆಲ ನಡಪುಂಡು. ಮುಂಡ್ಕೂರುರ್ದ್ ಜಾರಿಗೆಕಟ್ಟೆ ಸಂಕಲಕರಿಯ ಬೊಕ್ಕ ಸಚ್ಚರಿಪೇಟೆಯಾದ್ ಶ್ರೀ ಕ್ಷೇತ್ರ ಕಜೆಕ್ಕ್ ಧರ್ಮೊಗು ಬಸ್ ಸೇವೆ ಉಂಡು.

ಈ ಮಾತ ಲೇಸ್ ಡ್ ಭಕ್ತೆರ್ ಎಚ್ಚದ ಸಂಖ್ಯೆಡ್ ಪಾಲ್ ಪಡೆದ್ ಶ್ರೀ ದೇವೆರೆನ ಪ್ರಸಾದ ದೆತೊಂದು ಶ್ರೀ ಕ್ಷೇತ್ರದ ಪರವಾದ್ ಪ್ರಧಾನ ಅರ್ಚಕೆರ್ ಅನಂತ ಕೃಷ್ಣ ಆಚಾರ್ಯ, ಸಹೋದರೆರ್, ಮಾನಾದಿಗೆದ ಗುರ್ಕಾರೆ ಎಂ.ಜಿ. ಕರ್ಕೇರ, ಗುರ್ಕಾರೆ ಕಜೆ ಹೊಸಮನೆ ಸುಂದರ ಸಫಲಿಗ, ಒತ್ತು ಗುರ್ಕಾರೆ ಹೆಗ್ಗಡೆ ಕಜೆ ಚನ್ನಪ್ಪ ಸಫಲಿಗ, ಪ್ರಧಾನ ಕಾರ್ಯದರ್ಶಿ ಕಜೆ ಪಡುಬೈಲು ಸುರೇಂದ್ರ ಸಾಲ್ಯಾನ್, ಜತೆ ಕಾರ್ಯದರ್ಶಿ ಕಜೆ ಮಂಗಿಲಮಾರ್ ನಾರಾಯಣ ಸಫಲಿಗ, ಕೋಶಾಧಿಕಾರಿ ಕಜೆ ಆಚೆ ಮನೆ ಉದಯಕುಮಾರ್, ಜತೆ ಕೋಶಾಧಿಕಾರಿ ಕಜೆಮನೆ ಭುಜಂಗ ಮೂಲ್ಯ , ಸದಸ್ಯೆರ್ ಕಜೆ ಪಡುಬೈಲು ಜಯ ಸಾಲ್ಯಾನ್, ಕಜೆ ಆಚೆಮನೆ ಸಂಜೀವ ಸೇರಿಗಾರ್, ಕಜೆ ಹೊಸಮನೆ ಶೇಖರ್ ಮೆಂಡನ್, ಕಜೆ ಮನೆ ಸುರೇಶ್ ವಾಸು ಮೂಲ್ಯ, ಕಜೆ ಮಂಗ್ಲಿಮಾರ್ ದಯಾನಂದ ಸಫಲಿಗ, ಹೆಗ್ಗಡೆ ಕಎ ಸುಚಿತ್ ಕುಮಾರ್, ಬೊಂಬೈ ಸಮಿತಿದ ಗುರ್ಕಾರೆ ಸುಧಾಕರ್ ಎಂ ಶೆಟ್ಟಿ ಮುಲ್ಲಡ್ಕ, ಸ್ಥಳೀಯ ಸಮಿತಿದ ಗುರ್ಕಾರೆ ವಿನಯ್ ಕುಮಾರ್ ಶೆಟ್ಟಿ ನಡಿಗುತ್ತು, ಸಲಹೆಗಾರೆರ್, ಒತ್ತು ಗುರಿಕಾರೆರ್, ಬೇತೆ ಬೇತೆ ಸಮಿತಿದ ಸದಸ್ಯೆರ್, ಇನ್ನ, ಮುಲ್ಲಡ್ಕ, ಪೋಸ್ರಾಲ್, ಬೋಳ, ಕಡಂದಲೆ, ಸಚ್ಚರಿಪೇಟೆ ಬೊಕ್ಕ ಉಳೆಪಾಡಿದ ಗ್ರಾಮದ ಮಾತ ಗ್ರಾಮಸ್ಥೆರ್, ಬ್ರಹ್ಮಕಲಶ ಉಚ್ಚಯ ಸಮಿತಿ ಬೊಕ್ಕ ಅಭಿವೃದ್ದಿ ಸಮಿತಿದ ಮಾತ ಪದುಕೆರ್ ಬೊಕ್ಕ ಸದಸ್ಯೆರ್ ಬಿನ್ನಾಪು ಮಲ್ದೆರ್.

ಇನಿ ಪಟ್ರಮೆ ಮಹಾವಿಷ್ಣುಮೂರ್ತಿ ದೇವಲ್ಯಡ್ ವರ್ಷದ ಜಾತ್ರೆ, ದೈವೊಲೆನ ನೇಮ ಸುರು

ಬೊಲ್ತೇರ್: ಪಟ್ರಮೆ ಶ್ರೀ ಮಹಾವಿಷ್ಣುಮೂರ್ತಿ ದೇವಲ್ಯಡ್ ವರ್ಷದ ಜಾತ್ರೆ ಬೊಕ್ಕ ದೈವೊಲೆನ ನೇಮ (ಫೆ.20) ಇನಿರ್ದ್ ಫೆ.23 ಮುಟ್ಟ ನಡಪರೆ ಉಂಡು.

ಈ ಲೇಸ್ ಶ್ರೀ ಕ್ಷೇತ್ರ ಧರ್ಮಸ್ಥಳದ ಧರ್ಮಾಧಿಕಾರಿ ಡಾ| ಡಿ.ವೀರೇಂದ್ರ ಹೆಗ್ಗೆಡೆರೆನ ಆಶೀರ್ವಾದಡ್, ಭಕ್ತೆರೆನ ಸಹಕಾರಡ್, ಬ್ರಹ್ಮಶ್ರೀ ವೇದಮೂರ್ತಿ ನೀಲೇಶ್ವರ ಕೆ.ಯು ಪದ್ಮನಾಭ ತಂತ್ರಿಲೆನ ಮುತಾಲಿಕೆಡ್ ನಡಪರೆ ಉಂಡು.

ಫೆ.20 ಅಂಗಾರೆ (ಇನಿ) ಬೊಲ್ಪುಗು ತೋರಣ ಮೂರ್ತ, ಪುದೆಕಾಣಿಕೆ, ಉಗ್ರಾಣ ಮೂರ್ತ ನಡತ್ಂಡ್. ರಾತ್ರೆ ವಾಸ್ತು ಹೋಮ, ವಾಸ್ತು ಪೂಜೆ, ರಕ್ಷೋಘ್ನ ಹೋಮ ಬಯ್ಯಗ್ ಊರುದ ಜೋಕ್ಲೆರ್ದ್ ಸಾಂಸ್ಕೃತಿಕ ಲೇಸ್ ನಡಪರೆ ಉಂಡು.

ಫೆ.21 ಬುದಾರ ಬೊಲ್ಪುಗು ಗಣಹೋಮ, ತ್ರಿಕಾಲ ಪೂಜೆ, ಕಲಶಾಭಿಷೇಕ, ಪವಮಾನ ಅಭಿಷೇಕ, ನಾಗ ತಂಬಿಲ, ಮಹಾಪೂಜೆ, ಪ್ರಸಾದ ವಿತರಣೆ, ಅನ್ನ ಪ್ರಸಾದ ಸೇವೆ, ಬಯ್ಯಗ್ ದೀಪಾರಾಧನೆ, ಶ್ರೀ ಮಹಾಗಣಪತಿ ಬೊಕ್ಕ ಶ್ರೀ ಮಹಾವಿಷ್ಣುಮೂರ್ತಿ ದೇವೆರೆಗ್ ರಂಗಪೂಜೆ, ಶ್ರೀ ಭೂತ ಬಲಿ ಉಚ್ಚಯ, ವಸಂತ ಕಟ್ಟೆ, ಅಶ್ವತ್ಥ ಕಟ್ಟೆ ಪೂಜೆ, ಅನ್ನ ಪ್ರಸಾದ, ಫಲಾಹಾರ ಪ್ರಸಾದ, ನಲಿಕೆ ಭಜನೆ ಲೇಸ್ ನಡಪರೆ ಉಂಡು.

ಫೆ.22 ಗುರುವಾರ ಬೊಲ್ಪುಗು ಗಣಹೋಮ, ಉಚ್ಚಯ, ದರ್ಶನ ಬಲಿ, ಬಟ್ಟಲ್ ಕಾಣಿಕೆ, ಕಲಶಾಭಿಷೇಕ, ಮಹಾಪೂಜೆ, ಅನ್ನ ಪ್ರಸಾದ ಸೇವೆ, ಬಯ್ಯಗ್ ಊರುದ ಜೋಕ್ಲೆರ್ದ್ ಸಾಂಸ್ಕೃತಿಕ ಲೇಸ್ ರಾತ್ರೆ ಧಾರ್ಮಿಕ ಸಭಾ ಲೇಸ್ ಬೊಕ್ಕ ಕಾಯರ್ತ್ತಡ್ಕ ತುಡರ್ ಕಲಾವಿದೆರ್ದ್ ಅಂಚಾಯಿನೆಟ್ ಇಂಚಾಂಡ್ ತುಳು ನಾಟಕ ನಡಪರೆ ಉಂಡು.

ಫೆ.23 ಸುಕ್ರಾರ ಬಯ್ಯಗ್ ಶ್ರೀದುರ್ಗಾಪೂಜೆ, ಪ್ರಸಾದ ವಿತರಣೆ, ರಾತ್ರೆ ಶ್ರೀ ದೈವೊಲೆನ ಭಂಡಾರ ಪಿದಾಡಿಯೆರೆ, ಅನ್ನ ಪ್ರಸಾದ ಸೇವೆ, ಬ್ರಹ್ಮಚಾಮುಂಡಿ, ಇಷ್ಟದೈವ, ಕೊಡಮಣಿತ್ತಾಯಿ, ರಕ್ತೇಶ್ವರಿ, ಪಾಷಾಣಮೂರ್ತಿ, ವರಾಹಮೂರ್ತಿ, ಗುಳಿಗ ದೈವೊಲೆನ ನೇಮ ನಡಪರೆ ಉಂಡು.

ಈ ಲೇಸ್ ಡ್ ಭಕ್ತೆರ್ ಮಾತೆರ್ಲಾ ಪಾಲ್ ಪಡೆದ್, ಶ್ರೀ ದೇವೆರೆನ ಬೊಕ್ಕ ದೈವೊಲೆನ ಕೃಪೆಗ್ ಪಾತ್ರರಾವೊಡು ಪಂದ್ ದೇವಲ್ಯದ ಗುರ್ಕಾರೆ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಕಜ್ಕೆ ಶ್ರೀ ಅನ್ನಪೂರ್ಣೇಶ್ವರೀ ದೇವಲ್ಯಗ್ ಪುದೆಕಾಣಿಕೆ ಸಮರ್ಪಣೆ

ಬ್ರಹ್ಮಾವರ: ಕಜ್ಕೆ ಶ್ರೀ ಅನ್ನಪೂರ್ಣೇಶ್ವರೀ ದೇವಲ್ಯಡ್ ಫೆ.21 ಕ್ಕ್ ನಡಪುನ ಪೊಸ ಶಿಲಾಮಯ ದೇಗುಲ ಸಮರ್ಪಣೆ, ಪ್ರತಿಷ್ಠೆದ ಲೆಕ್ಕೊಡು ಐತಾರ ಪುದೆಕಾಣಿಕೆ ಸಮರ್ಪಣೆ ನಡತ್ಂಡ್.

ಮುದ್ದೂರು ಬಸ್ ನಿಲ್ದಾಣ ಕೈತಲ್ ರ್ದ್ ಅರೆಮಾದನಹಳ್ಳಿ ವಿಶ್ವಬ್ರಾಹ್ಮಣ ಮಹಾಸಂಸ್ಥಾನದ ಶ್ರೀ ಶಿವಸುಜ್ಞಾನ ತೀರ್ಥ ಸ್ವಾಮೀಜಿ ಮೆರವಣಿಗೆಗ್ ಚಾಲನೆ ಕೊರಿಯೆರ್.

ಪೊಂಜೋವುನಕಲೆರ್ದ್ ಪೂರ್ಣಕುಂಭ ಸ್ವಾಗತ, ಬೇತೆ ಬೇತೆ ಭಜನಾ ಕೂಟ, ಚೆಂಡೆ ಬಳಗ ಮೆರವಣಿಗೆಡ್ ಇತ್ತೆರ್.

ಈ ಪೊರ್ತುಡು ದೇವಲ್ಯದ ನಿರ್ಮಾಣ ಸಮಿತಿ, ಮಹಾ ಕುಂಭಾಭಿಷೇಕ ಸಮಿತಿ, ಬೇತೆ ಬೇತೆ ಉಪಸಮಿತಿಲೆನ ಗುರಿಕಾರೆರ್, ಪದುಕೆರ್, ಕೈತಲ್ದ ಪ್ರಮುಖೆರ್, ಭಕ್ತೆರ್ ಪಾಲ್ ಪಡೆದಿತ್ತೆರ್.

ಶ್ರೀ ರಾಮ್ ಪೂಜಾ ಭಂಡಾರ ಉದಿಪನ

ತೊಕ್ಕೊಟ್ಟು ಬಸ್ ಸ್ಟಾಂಡ್ ದ ಇಂದಿರಾ ಕ್ಯಾಂಟೀನ್ ಕೈತಲ್ದ ದ್ವಾರಕಾ ಕಾಂಪ್ಲೆಕ್ಸ್ ಡ್ ಶ್ರೀರಾಮ್ ಪೂಜಾ ಭಂಡಾರ ಅಂಗಡಿ ಫೆ.18 ಐತಾರ ಉದಿಪನ ಆತ್ಂಡ್.

ಮುಲ್ಪ ತಾಮ್ರ, ಹಿತ್ತಾಳೆ, ಸ್ಟೀಲ್, ಅಲ್ಯೂಮಿನಿಯಂ ಪಾತ್ರೆಲು, ಪೂಜೆದ ಸಲಕರಣೆಲು, ದೇವೆರೆನ ಪೋಟೋ, ಊದುಬತ್ತಿ, ಬಲೆದ ಬಟ್ಟಲ್, ಅರಿತ್ತ ಮುಡಿ ತಿಕ್ಕುಂಡು ಪಂದ್ ಹರ್ಷದೀಪ್ ಎನ್.ಟಿ ತೆರಿಪಾದೆರ್.

ಪ್ರಯೋಗ ಶಾಲೆ ಕಲ್ಪಾರ್ಥಿಲೆನ ಕಂಪ್ಯೂಟರ್ ಜ್ಞಾನಾರ್ಜನೆಗ್ ಅಡಿಪಾಯ: ಡಾ.ನಿಂಗಯ್ಯ

ಸುಬ್ರಹ್ಮಣ್ಯ: ಇತ್ತೆದ ಕಾಲಡ್ ಕಂಪ್ಯೂಟರ್ ದ ಜ್ಞಾನ ಅಗತ್ಯ. ಕಂಪ್ಯೂಟರ್ ಲು ಶಾಲೆ ಕಾಲೇಜ್ ಗ್ ಅತ್ಯವಶ್ಯಕ, ಅವ್ವೇ ರೀತಿ ವಿದ್ಯಾಸಂಸ್ಥೆಲೆಡ್ ವ್ಯವಸ್ಥಿತವಾಯಿನ ಪ್ರಯೋಗ ಶಾಲೆ ಇಪ್ಪುನವು ಅತ್ಯವಶ್ಯಕ, ಉತ್ಕೃಷ್ಠ ಮಟ್ಟದ ಸುಸಜ್ಜಿತ ಪ್ರಯೋಗ ಶಾಲೆಲು ಕಂಪ್ಯೂಟರ್ ದ ಜ್ಞಾನಾರ್ಜನೆಗ್ ಅಡಿಪಾಯ ಆತ್ಂಡ್. ಎಸ್‌ಎಸ್‌ಪಿಯು ಕಾಲೇಜ್ ಡ್ ಜಿಲ್ಲೆಡೇ ಪುದರ್ ಪಡೆಯಿನ ಶ್ರೇಷ್ಠ ಮಟ್ಟದ ಕಂಪ್ಯೂಟರ್ ಬೊಕ್ಕ ವಿಜ್ಞಾನ ಪ್ರಯೋಗ ಶಾಲೆ ಉಂಡು ಪನ್ಪುನವು ಗ್ರಾಮೀಣ ಭಾಗದ ಪೆರ್ಮೆ ಪಂದ್ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಲ್ಯದ ಕಾರ್ಯನಿರ್ವಹಣಾಧಿಕಾರಿ, ಎಸ್‌ಎಸ್‌ಪಿಯು ಕಾಲೇಜ್ ದ ಕಾರ್ಯದರ್ಶಿ ಡಾ.ನಿಂಗಯ್ಯ ಪಂಡೆರ್.

ಮೇರ್ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಲ್ಯದ ಆಡಳಿತ ಎಸ್‌ಎಸ್‌ಪಿಯು ಕಾಲೇಜ್ ಗ್ ಡಾ.ಚಂದನ್ ಬೆಂಗ್ಲೂರು ಮೇರ್ ಕೊರ್ನ 10 ಕಂಪ್ಯೂಟರ್ ನ್ ದೆತೊಂದು ಪಾತೆರಿಯೆರ್.

ಶ್ರೀ ದೇವಲ್ಯರ್ದ್ ತಿಕಿನ ಕಂಪ್ಯೂಟರ್ ದೊಟ್ಟಿಗೆ ಇತ್ತೆ ದಾನಿಲು ಕೊರ್ನ ಪೊಸ ಕಂಪ್ಯೂಟರ್ ಲು ಪ್ರಯೋಗ ಶಾಲೆಡ್ ಉಂಡು. ನೆತ್ತ ಉಪಯೋಗನ್ ಕಲ್ಪಾರ್ಥಿಲು ಪಡೆವೊನೊಡು. ಕಾಲೇಜ್ ಡ್ ಇತ್ತೆ 1000 ರ್ದ್ ಎಚ್ಚ ಕಲ್ಪಾರ್ಥಿಲು ಕಲ್ತೊಂದು ಉಲ್ಲೆರ್. ಗಣಕ ವಿಜ್ಞಾನ ವಿಭಾಗಲ ಉಂಡು. ಅತ್ತಂದೆ ಕಲೆ ಬೊಕ್ಕ ವಾಣಿಜ್ಯ ವಿಭಾಗಗ್ ಕಂಪ್ಯೂಟರ್ ತರಬೇತಿ ನಡತೊಂದು ಉಂಡು. ಈ ಪೊರ್ತುಡು ಪೊಸ ಕಂಪ್ಯೂಟರ್ ಲು ಕಲ್ಪಾರ್ಥಿಲೆಗ್ ಎಚ್ಚದ ಅನುಕೂಲತೆ ಕೊರ್ಪುಂಡು ಪಂದ್ ಪಂಡೆರ್.

ಈ ಪೊರ್ತುಡು ದೇವಲ್ಯದ ವ್ಯವಸ್ಥಾಪನಾ ಸಮಿತಿ ಸದಸ್ಯೆರ್, ದಾನಿ ಡಾ.ಚಂದನ್ ಬೆಂಗ್ಲೂರು, ಆರೆನ ದೋಸ್ತಿ ಶ್ರೀವತ್ಸ ಬೆಂಗ್ಲೂರು, ಕಾಲೇಜ್ ದ ಪ್ರಾಚಾರ್ಯೆರ್ ಸೋಮಶೇಖರ ನಾಯಕ್, ಕೆಎಸ್‌ಎಸ್ ಕಾಲೇಜ್ ದ ಪ್ರಾಂಶುಪಾಲೆರ್ ಡಾ. ದಿನೇಶ್ ಪಿ.ಟಿ, ಗ್ರಂಥಪಾಲಕೆರ್ ಜಯಪ್ರಕಾಶ್ ಆರ್.ವಿ, ಕುಕ್ಕೆ ದೇವಲ್ಯದ ಶಿವ ಸುಬ್ರಹ್ಮಣ್ಯ ಭಟ್, ನಂದೀಶ್ ಕಟ್ರಮನೆ, ಪ್ರವೀಣ್ ಸುಬ್ರಹ್ಮಣ್ಯ, ಪ್ರಶಾಂತ್, ಎಸ್‌ಎಸ್‌ಪಿಯು ಕಾಲೇಜ್ ದ ಉಪನ್ಯಾಸಕೆರ್, ಶಿಕ್ಷಕೆರ್, ಸಿಬ್ಬಂದಿ ವರ್ಗದಕುಲು ಪಾಲ್ ಪಡೆದಿತ್ತೆರ್.

ಡಾ.ಚಂದನ್ ಬೆಂಗ್ಲೂರು ಮೇರ್ ಕುಕ್ಕೆ ದೇವಲ್ಯದ ಆಡಳಿತದ ಕೆ.ಎಸ್.ಎಸ್ ಕಾಲೇಜ್ ಗ್ 10 ಕಂಪ್ಯೂಟರ್ ಕೊರಿಯೆರ್. ಈ ಮುಕೇನ ಒಟ್ಟು 20 ಕಂಪ್ಯೂಟರ್ ನ್ ಶ್ರೀ ದೇವಲ್ಯದ ವಿದ್ಯಾಸಂಸ್ಥೆಗ್ ಕೊರ್ಲೆಕ್ಕ ಆಂಡ್.

ಫೆ.25: ಶ್ರೀ ಸಂತ ಸೇವಾಲಾಲ್ 285ನೇ ಜಯಂತಿದ ಲೆಕ್ಕೊಡು ಬಂಜಾರ ಬಾಯ್ಸ್ ಯುವಕ ಸಂಘ ತೋಗುಣಶಿದ ಮುತಾಲಿಕೆಡ್ ಸ್ಯಾಟ್ ಲೈಟ್ ಕಬಡ್ಡಿ ಪಂತೊ

ಶ್ರೀ ಸಂತ ಸೇವಾಲಾಲ್ 285ನೇ ಜಯಂತಿದ ಲೆಕ್ಕೊಡು ಬಂಜಾರ ಬಾಯ್ಸ್ ಯುವಕ ಸಂಘ ತೋಗುಣಶಿದ ಮುತಾಲಿಕೆಡ್ ಸುರುತ್ತ ಸರ್ತಿ 55 ಕೆಜಿ ವಿಭಾಗದ ಸ್ಯಾಟ್ ಲೈಟ್ ಕಬಡ್ಡಿ ಪಂತೊ ಫೆ.25 ಕ್ಕ್ ಬಾಗಲಕೋಟೆ ಜಿಲ್ಲೆದ ಗುಳೇದಗುಡ್ಡ ತಾಲೂಕ್ ದ ತೋಗುಣಶಿ ಎಲ್ ಟಿ ಗ್ರಾಮಡ್ ನಡಪರೆ ಉಂಡು.

ಈ ಪಂತೊಡು ಗೆಂದಿನಕ್ಲೆಗ್ ಸುರುತ್ತ ಇನಾಮು 7001 ಬೊಕ್ಕ ಟ್ರೋಫಿ, ರಡ್ಡನೇ ಇನಾಮು 5001 ಬೊಕ್ಕ ಟ್ರೋಫಿ, ಮೂಜಿನೇ ಇನಾಮು 3001 ಬೊಕ್ಕ ಟ್ರೋಫಿ, ನಾಲ್ ನೇ ಇನಾಮು 2001 ಬೊಕ್ಕ ಟ್ರೋಫಿ ತಿಕ್ಕುಂಡು.

ಈ ಪಂತೊದ ನಿಯಮಲು:
•ಒಂಜಿ ಕೂಟಡ್ ಗೊಬ್ಬಿನ ಗೊಬ್ಬುಗಾರೆರ್ ಕುಡೊಂಜಿ ಕೂಟಡ್ ಗೊಬ್ಬೆರೆ ಇಜ್ಜಿ.
•ನಿರ್ಣಾಯೆಕೆರೆನ ನಿರ್ಣಾಯನೇ ಅಕೇರಿ.
•ಗೊಬ್ಬುಗಾರೆರೆಗ್ ದಾದಂಡಲ ಕಮಿಟಿದ ಜಬದಾರಿದ ಅತ್ತ್.
•ಒಂಜೇ ಊರುದ ಗೊಬ್ಬುಗಾರೆರ್ ಇಪ್ಪೊಡು.
•ಆಧಾರ ಕಾರ್ಡ್ ಕಡ್ಡಾಯವಾದ್ ಕನವೊಡು.
•ತೂಕಗ್ 2 ಸರ್ತಿ ಅವಕಾಶ ಉಂಡು.
•ನನ ಒರಿನ ನಿಯಮನ್ ಮೈದಾನಡೇ ತೆರಿಪಾವೆರ್.

ಈ ಪಂತೊದ ಎಚ್ಚದ ಪೊಲಬುಗಾದ್ ತರುಣ 9845403158, ಲಕ್ಷ್ಮಣ 6363671796, ಮಂಜುನಾಥ 7892114951 ಮೊಕ್ಲೆನ್ ಸಂಪರ್ಕ ಮಲ್ಪೊಲಿ.

ರೇಡಿಯೊ ಮಣಿಪಾಲಡ್ ಹೊಂಬೆಳಕು-ವ್ಯಕ್ತಿತ್ವ ವಿಕಸನ ಸರಣಿ ಲೇಸ್

ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಸಮುದಾಯ ಬಾನುಲಿ ಜೆಸಿಐ ಕಲ್ಯಾಣಪುರದ ಒಟ್ಟುಸೇರಿಗೆಡ್ ಹೊಂಬೆಳಕು-ವ್ಯಕ್ತಿತ್ವ ವಿಕಸನ ಸರಣಿ ಲೇಸ್ ದ 46ನೇ ಸಂಚಿಕೆ ಫೆ.20 ಕ್ಕ್ ಅಂಗಾರೆ ಬಯ್ಯಗ್ 5.30 ಕ್ಕ್ ಪ್ರಸಾರ ಆಪುಂಡು.

ಈ ಲೇಸ್ ನ್ ಶಿಕ್ಷಕೆರ್, ಬರವುಗಾರೆ ನರೇಂದ್ರ ಕುಮಾರ್ ಕೋಟ ನಡಪಾದ್ ಕೊರಿಯೆರೆ ಉಲ್ಲೆರ್. ಫೆ.21 ಕ್ಕ್ ಮಧ್ಯಾಹ್ನ 1.30 ಕ್ಕ್ ಕುಡೊರ ಪ್ರಸಾರ ಆಪುಂಡು.

ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್‌ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.

ಫೆ.22-ಮಾ.1: ವೇಣೂರುಡು ಮಹಾಮಸ್ತಕಾಭಿಷೇಕ

ಬೊಲ್ಪುರ್ದ್ ರಾತ್ರೆ ಮುಟ್ಟ ಬಾಹುಬಲಿ ಮೂರ್ತಿಗ್ ಮಜ್ಜನ

ಬೊಲ್ತೇರ್: ವೇಣೂರು ಶ್ರೀ ದಿಗಂಬರ ಜೈನ ತೀರ್ಥ ಕ್ಷೇತ್ರಡ್ ಪ್ರತಿ 12 ವರ್ಷಗೊರ ನಡಪುನ ಮಹಾಮಸ್ತಕಾಭಿಷೇಕ ಫೆ.22 ರ್ದ್ ಮಾ.1 ಮುಟ್ಟ ನಡಪರೆ ಉಂಡು.

ಕ್ರಿ.ಶ.1604 ಟ್ಟ್ 35 ಅಡಿ ಎತ್ತರದ ಏಕಶಿಲಾ ಬಾಹುಬಲಿ ಮೂರ್ತಿನ್ ಅಜಿಲರಸೆರ್ ತಿಮ್ಮಣ್ಣ ಅಜಿಲೆರ್ ಪ್ರತಿಷ್ಠಾಪನೆ ಮಲ್ತ್ ದ್, ಸುರುತ್ತ ಮಹಾಮಸ್ತಕಾಭಿಷೇಕ ಮಲ್ತೆರ್. ಬೊಕ್ಕ 1928, 1956 ಸೇರಿನಂಚೆನೆ 2000, 2012 ಟ್ಟ್ ಆದ್ 2024 ಪಂಡ ಈ ವರ್ಷದ 3ನೇ ಮಹಾಮಸ್ತಕಾಭಿಷೇಕಗ್ ತಯಾರಿ ಆತ್ಂಡ್ ಪಂದ್ ಸ್ಥಾಪಕ ವಂಶೀಯ ಅರಸೆರ್, ಕಾರ್ಯಾಧ್ಯಕ್ಷೆರ್ ತಿಮ್ಮಣ್ಣರಸುಲು ಡಾ. ಪದ್ಮಪ್ರಸಾದ್ ಅಜಿಲೆರ್ ಪ್ರತಿಕಾಗೋಷ್ಠಿಡ್ ತೆರಿಪಾಯೆರ್.

ವೇಣೂರು ಶ್ರೀ ದಿಗಂಬರ ಜೈನ ತೀರ್ಥಕ್ಷೇತ್ರ ಸಮಿತಿ ಮುತಾಲಿಕೆಡ್ ಧರ್ಮಾಧಿಕಾರಿ ಡಾ| ಡಿ. ವೀರೇಂದ್ರ ಹೆಗ್ಗಡೆರೆನ ಗುರ್ಕಾರ್ಮೆಡ್ ಪರಮಪೂಜ್ಯ 108 ಶ್ರೀ ಅಮೋಘಕೀರ್ತಿ ಮುನಿ ಮಹಾರಾಜೆರ್, ಪರಮಪೂಜ್ಯ 108 ಶ್ರೀ ಅಮರಕೀರ್ತಿ ಮುನಿ ಮಹಾರಾಜೆರ್ ಸೇರಿನಂಚೆನೆ ನಾಡ್ ದ ಜೈನಪರಂಪರೆದ ಮಾತ ಮಹಾಧೀಶೆರ್ ಬೊಕ್ಕ ಜೈನ ಆರ್ಯಿಕೆರೆನ ಸಾನಿಧ್ಯಡ್ 9 ದಿನ ಬಯ್ಯಗ್ ಧಾರ್ಮಿಕ ಸಭೆ, ಸಾಂಸ್ಕೃತಿಕ ಲೇಸ್ ನಡಪರೆ ಉಂಡು ಪಂದ್ ಪಂಡೆರ್.

ಫೆ.22 ಕ್ಕ್ ಮಧ್ಯಾಹ್ನ ಬೆದ್ರ ಜೈನ ಮಠ ಡಾ| ಭಟ್ಟಾರಕ ಚಾರುಕೀರ್ತಿ ಪಂಡಿತಾಚಾರ್ಯವರ್ಯ ಮಹಾ ಸ್ವಾಮೀಜಿ, ಶ್ರವಣಬೆಳಗೊಳ ಜೈನ ಮಠತ್ತ ಚಾರುಕೀರ್ತಿ ಭಟ್ಟಾರಕ ಪಟ್ಟಾಚಾರ್ಯವರ್ಯ ಮಹಾ ಸ್ವಾಮೀಜಿ ಸಾನಿಧ್ಯಡ್ ಉಪಮುಖ್ಯ ಮಂತ್ರಿ ಡಿ.ಕೆ ಶಿವಕುಮಾರ್ ಉದಿಪನ ಮಲ್ಪುವೆರ್. ಡಾ| ಡಿ. ವೀರೇಂದ್ರ ಹೆಗ್ಗಡೆ ಗುರ್ಕಾರ್ಮೆನ್ ಒಯಿಸೊನ್ವೆರ್. ಉಸ್ತುವಾರಿ ಸಚಿವೆರ್ ದಿನೇಶ್ ಗುಂಡೂರಾವ್ ಸ್ಮರಣ ಸಂಚಿಕೆ ಬುಡುಗಡೆ ಮಲ್ಪುವೆರ್. ಸಂಸದೆರ್ ನಳಿನ್ ಕುಮಾರ್ ಕಟೀಲ್ ವಸ್ತುಪ್ರದರ್ಶನ ಉದಿಪನ ಮಲ್ಪುವೆರ್ ಪಂದ್ ಪಂಡೆರ್.

9 ದಿನಟ್ಟ್ ಜೈನ ಶ್ರಾವಕರ 30 ರ್ದ್ ಎಚ್ಚ ಉಪಸಮಿತಿ, 1500 ಸ್ವಯಂ ಸೇವಕೆರ್ ಸೇರ್ದ್ 3 ಸಾರರ್ದ್ ಎಚ್ಚ ಜನ ಸೇವೆಡ್ ಪಾಲ್ ಪಡೆಯೆರೆ ಉಲ್ಲೆರ್. ಪ್ರತಿದಿನ ಬಯ್ಯಗ್ ಅಗ್ರೋದಕ ಮೆರವಣಿಗೆ ಆದ್ ಬಾಹುಬಲಿ ಮೂರ್ತಿಗ್ ನೀರ್, ಕಷಾಯ, ಕಲ್ಕಚೂರ್ಣ, ಮಂಜಲ್, ಶ್ರೀಗಂಧ, ಚಂದನ, ಅಷ್ಟಗಂಧ, ಪೇರ್, ಬೊಂಡ, ಕೇಸರಿ ದ್ರವ್ಯಲೆರ್ದ್ ಮಸ್ತಕಾಭಿಷೇಕ ಮಲ್ತ್ ದ್ ಪುಷ್ಪವೃಷ್ಠಿ, ಮಹಾ ಮಂಗಳಾರತಿ, ಶಾಂತಿಮಂತ್ರದೊಟ್ಟಿಗೆ ರಾತ್ರೆ ಸಂಪನ್ನ ಆಪುಂಡು. ಫೆ.25 ಕ್ಕ್ ಇಸೇಸವಾದ್ ಬೊಲ್ಪುಗು ಮಜ್ಜನ ನಡಪರೆ ಉಂಡು. ಫೆ.29 ಕ್ಕ್ ಸಮವಸರಣ ಪೂಜೆ ನಡಪರೆ ಉಂಡು.

ಈ ಲೇಸ್ ಡ್ 1300 ಕಾರ್, 700 ದ್ವಿಚಕ್ರ ಗಾಡಿ ಉಂತಾಯೆರೆ ವ್ಯವಸ್ಥೆ ಪಾರ್ಕಿಂಗ್ ಮಲ್ದ್ಂಡ್. 200 ಕಲ್ಪಾರ್ಥಿಲು ಈ ಸೇವೆಡ್ ಪಾಲ್ ಪಡೆಯೆರೆ ಉಲ್ಲೆರ್. 75 ರ್ದ್ ಎಚ್ಚ ಜನತ್ತ ಪೊಲೀಸ್ ಭದ್ರತೆ ಉಂಡು. ಯಾತ್ರಿಕೆರೆಗ್ ಇಪ್ಪೆರೆ ಶಾಲೆ, ಖಾಸಗಿ ವಸತಿ ಗೃಹಲೆಡ್ ವ್ಯವಸ್ಥೆ ಮಲ್ದ್ಂಡ್ ಪಂದ್ ಪಂಡೆರ್.

ಪ್ರಧಾನ ಕಾರ್ಯದರ್ಶಿ ವಿ.ಪ್ರವೀಣ್ ಕುಮಾರ್ ಇಂದ್ರ ಪಾತೆರ್ದ್, ಮಸ್ತಕಾಭಿಷೇಕದ ಪೊರ್ತುಡು ಭಕ್ತೆರೆನ ಮೂಲಸೌಕರ್ಯಗಾದ್ ಅಲ್ಪಸಂಖ್ಯಾತ ಅಭಿವೃದ್ಧಿ ನಿಗಮರ್ದ್ 1 ಕೋಟಿ ರೂ. ಸಕಾಯ ಕೊರ್ನೆದಾವೆರ 2 ಬಸದಿ ಜೀರ್ಣೋದ್ಧಾರದೊಟ್ಟಿಗೆ ಬೇತೆ ಕಾಮಗಾರಿ ನಡತ್ ದ್ಂಡ್. ಬೇತೆ ಬೇತೆ ಇಲಾಖೆಲೆನ ಅನುದಾನರ್ದ್ ಕ್ಷೇತ್ರದ ಸುತ್ತ ಮಾರ್ಗ, ಶೌಚಾಲಯ, ಕರೆಂಟ್ ವ್ಯವಸ್ಥೆ ನೀರ್ ದ ಟ್ಯಾಂಕ್, ತಡೆಗೋಡೆದಂಚಿನ ಅಗತ್ಯ ಸೌಕರ್ಯನ್ ಮಲ್ದ್ಂಡ್. ‌ಶಾಸಕೆರ್ ಹರೀಶ್ ಪೂಂಜ ನಗರಾಲಂಕಾರ ಕಲ್ಪಿಸಾದೆರ್. 25 ಕೊಠಡಿದ ವಸತಿಗೃಹಲು ಪ್ರವಚನ ಮಂಟಪಗ್ 50 ಲಕ್ಷ ರೂ. ಕೊರ್ಪುಲೆಕ್ಕ ಮುಖ್ಯಮಂತ್ರಿಲೆಗ್ ಬಿನ್ನಾಪು ಮಲ್ತ್ ದ್ಂಡ್ ಪಂದ್ ಪಂಡೆರ್. ಕೋಶಾಧಿಕಾರಿ ಜಯರಾಜ್ ಕಂಬ್ಳಿ ಪಾಲ್ ಪಡೆದಿತ್ತೆರ್.

ಈ ಲೇಸ್ ದ ವ್ಯವಸ್ಥೆಲು:
•1 ಸಾರ ಜನಕ್ಕ್ ಆಸನ ವ್ಯವಸ್ಥೆ
•ಪ್ರತಿ ದಿನ 10-20 ಸಾರ ಜನತ್ತ ನಿರೀಕ್ಷೆ
•ಮಾತ ಕಡೆಟ್ಲಾ ಹೆಚ್ಚುವರಿ ಸರಕಾರಿ ಬೊಕ್ಕ ಖಾಸಗಿ ಬಸ್ ವ್ಯವಸ್ಥೆ
•ಮಾ.1 ಕ್ಕ್ 1008 ಕಲಶದ ಮಹಾ ಮಜ್ಜನ
•ಪ್ರತಿದಿನ ಅನ್ನದಾಸೋಹ ರಾತ್ರೆ ಸಾಂಸ್ಕೃತಿಕ ಲೇಸ್
•30 ಉಪಸಮಿತಿ, 1500 ಜನ ಸ್ವಯಂ ಸೇವಕೆರ್
•ಎಸ್ ಡಿಎಂ ಕಲ್ಪಾರ್ಥಿಲು, ಶೌರ್ಯ ವಿಪತ್ತು ರಕ್ಷಣ ಕೂಟರ್ದ್ ಸೇವೆ

ರಾಜ್ಯಪಾಲೆರ್, ಒಡೆಯೆರೆನ ಪಾಲ್ವಿಕೆ:
ಫೆ.23 ಕ್ಕ್ ಸಚಿವೆರ್ ಜಮೀರ್ ಅಹ್ಮದ್ ಖಾನ್, ಫೆ.24 ಕ್ಕ್ ವಿಧಾನಸಭಾ ಸ್ವೀಕರ್ ಯು.ಟಿ ಖಾದರ್, ಫೆ.25 ಕ್ಕ್ ಮಾಜಿ ಮುಖ್ಯಮಂತ್ರಿ ಬಸವರಾಜ್ ಬೊಮ್ಮಾಯಿ, ಸಚಿವೆರ್ ಎನ್ ಎಸ್ ಬೋಸರಾಜ್, ಫೆ.26 ಕ್ಕ್ ಮೈಸೂರು ಮಹಾಸಂಸ್ಥಾನದ ಯದುವೀರ್ ಕೃಷ್ಣದತ್ತ ಚಾಮರಾಜ ಒಡೆಯೆರ್, ಫೆ.27 ಕ್ಕ್ ಮಾಜಿ ಮುಖ್ಯಮಂತ್ರಿ ವೀರಪ್ಪ ಮೊಯಿಲಿ, ಫೆ‌.28 ಕ್ಕ್ ಬಿಜೆಪಿ ರಾಜ್ಯಾಧ್ಯಕ್ಷೆರ್ ಬಿ.ವೈ ವಿಜಯೇಂದ್ರ, ಮಾ.1 ಕ್ಕ್ ರಾಜ್ಯಪಾಲೆರ್ ಥಾವರ್ ಚಂದ್ ಗೆಹ್ಲೋಟ್ ಪಾಲ್ ಪಡೆಯೆರೆ ಉಲ್ಲೆರ್.