ಪುತ್ತೂರ್ದ ಸುದ್ದಿ | Puttur News

ಸುಬ್ರಹ್ಮಣ್ಯ ಗ್ರಾಮ ಪಂಚಾಯತ್ ಡ್ ಬಸವಣ್ಣನ ಪೋಟೋ ಅನಾವರಣ

ಸುಬ್ರಮಣ್ಯ ಫೆ.17: ಕರ್ನಾಟಕದ ಸಾಂಸ್ಕೃತಿಕ ನಾಯಕ, ಜಗಜ್ಯೋತಿ, ವಿಶ್ವಗುರು ಬಸವಣ್ಣನ ಪೋಟೋನ್ ಸುಬ್ರಹ್ಮಣ್ಯ ಗ್ರಾಮ ಪಂಚಾಯತ್ ಕಚೇರಿದ ಆವರಣಡ್ ಇನಿ ಅನಾವರಣ ಮಲ್ತೆರ್.

ಸುಬ್ರಹ್ಮಣ್ಯ ಗ್ರಾಮ ಪಂಚಾಯತ್ ಗುರ್ಕಾರ್ದಿ ಸುಜಾತ ಕಲ್ಲಾಜೆ ತುಡರ್ ಅರ್ಲಾದ್ ಲೇಸ್ ದ ಉದಿಪನ ಮಲ್ತೆರ್.

ಈ ಪೊರ್ತುಡು ನಿವೃತ್ತ ಉಪನ್ಯಾಸಕೆರ್ ವಿಶ್ವನಾಥ ನಡುತೋಟ ಪಾತೆರ್ದ್ 12ನೇ ಶತಮಾನಡ್ ಕ್ರಾಂತಿಯೋಗಿ ಶ್ರೀ ಜಗಜ್ಯೋತಿ ಬಸವಣ್ಣನ ಪ್ರತಿಪಾದನೆ ಮಲ್ತಿನ ಸಾರ್ವತ್ರಿಕ ಮೌಲ್ಯಲಾಯಿನ ಜಾತಿ ರಹಿತ ಸಮಾಜ, ಕಾಯಕದ ಮಹತ್ವ ಬೊಕ್ಕ ವರ್ಗ ರಹಿತ ಸಮಾಜ, ಜೀವನ ಮಾರ್ಗ, ಸರ್ವಕಾಲಗ್ ದಾರಿದೀಪ ಆತ್ಂಡ್ ಪಂದ್ ಪಂಡೆರ್.

ಅಂಚನೆ ಪಂಚಾಯತ್ ಸದಸ್ಯೆರ್ ಗಿರೀಶ್ ಪಾತೆರ್ದ್ ವಿಶ್ವಗುರು ಬಸವಣ್ಣನ ಸರಳ ಸಜ್ಜನಿಕೆದ ಜೀವನದ ಮೌಲ್ಯಲೆನ್ ನಮ ಮಾತ ಪಾಲನೆ ಮಲ್ಪುಗ ,ಆರ್ ಸಮಾಜಗ್ ಕೊರ್ನ ಏಕತೆದ ಸಂದೇಶನ್ ಅನುಸರಿಸಾಗ ಪಂದ್ ಪಂಡೆರ್.

ಈ ಪೊರ್ತುಡು ಪಂಚಾಯತ್ ಸದಸ್ಯೆರ್ ದಿಲೀಪ್, ಕಚೇರಿ ಸಿಬ್ಬಂದಿಲು ,ಸಂಜೀವಿನಿ ಬೊಕ್ಕ ಸ್ವಸಹಾಯ ಒಕ್ಕೂಟದ ಸದಸ್ಯೆರ್ ,ಸ್ಥಳೀಯ ಉದ್ಯಮಿಲು ಇತ್ತೆರ್. ಸುಬ್ರಹ್ಮಣ್ಯ ಗ್ರಾಮ ಪಂಚಾಯತ್ ಕಾರ್ಯದರ್ಶಿ ಮೋನಪ್ಪ ಡಿ ಬತ್ತಿ ಬಿನ್ನೆರೆನ್ ಎದ್ಕೊಂದು, ಸೊಲ್ಮೆ ಸಂದಾಯ ಮಲ್ತೆರ್.

ಉಬಾರ್ ದ ತುದೆಟ್ಟ್ ಕಲ್ಕುಡನ ವಲಸರಿ

ಉಬಾರ್: ಪೌರಾಣಿಕ ಐತಿಹ್ಯ ಇಪ್ಪುನ, ಉಬಾರ್ ಕಡಪುದ ಬಾಕಿಲ್ ಶ್ರೀ ರಾಜನ್‌ದೈವ ಉಬಾರ್ ಕಲ್ಕುಡ-ಕಲ್ಲುರ್ಟಿ ದೈವಸ್ಥಾನದ ಮೂಲಸ್ಥಾನದ ನೇಮೋತ್ಸವಡ್ ನಡಪುನ ಶ್ರೀ ಕಲ್ಕುಡ ದೈವದ ವಲಸರಿದ ಈ ಸರ್ತಿ ಸಂಕ ಇತ್ತಿನ ಕಾರಣ ಓಡದ ಮುಖೇನ ನಡತ್ ದ್ ಭಕ್ತೆರ್ನ ಮನಸ್ ಗೆಂದ್ ದ್ಂಡ್ .‌ ಸುಮಾರ್ ನಾಲ್ ನೂದು ವರ್ಷದ ಪಿರಾವು ಕರಾಯ ವೈಲಾಯರದಲ್ಪದ ದೈವದ ಎದುರು ಮಾನವ ರೂಪಡ್ ರಾತ್ರೆ ಪೊರ್ತುಡು ಉಬಾರ್‌ದ ಕಡಪುದ ಕೈತಲ್ ಬತ್ತ್‌ದ್ ನಮನ್ ಶ್ರೀ ಸಹಸ್ರ ಲಿಂಗೇಶ್ವರ ದೇವೆರ್ನ ಸನ್ನಿಧಿಗ್ ಬುಡ್ರೆ ಕೇನ್ನಗ ಅಪಗದ ಓಡ ಬುಡ್ಪಿನಾಯೆ “ಇತ್ತೆ ರಾತ್ರಿಯಾತ್‌ಂಡ್. ಸುದೆಟ್ಟ್‌ ನೀರ್‌ ದಿಂಜಿದ್ಂಡ್. ಕಾಂಡೆ ನಿಕ್ಲೆನ್ ಬುಡ್ಪೆ. ಈ ರಾತ್ರೆ ನಮ್ಮ ಇಲ್ಲಲ್ ಬಿನ್ನೆರಾದ್ ಇಪ್ಪುಲೆ ಪಂದ್‌ ಬಿನ್ನಾಪು ಮಲ್ತೆರ್.‌

ಇಲ್ಲಲ್‌ ಕುಲ್ಲಿನ ಬಿನ್ನೆರೆಗ್ ಕೋರಿ ಸಾರ್, ರೊಟ್ಟಿ, ಸುದೆತ್ತ ಮೀನ್ ಉಪಚಾರ ಮಲ್ತೆರ್.‌ ಮನದಾನಿ ಕಾಂಡೆ ತೂನಗ ಬತ್ತಿನ ಬಿನ್ನೆರ್‌ ನಾಪತ್ತೆಯಾದಿತ್ತೆರ್. ಆತಿಥ್ಯ ಕೊರ್ನ ಇಲ್ಲದ ಮೂಜಿ ಅಣ್ಣ-ಮೆಗ್ಯನಕ್ಲೆಗ್ ಬಿನ್ನೆರ್ ರಾತ್ರೆ ಕನಟ್ಟ್‌ ಬತ್ತ್‌ದ್ ‘ಏರ‍್ಯ ನಾಲ್ ಕಡಪು ( ಕಡಪು ಪಂಡ ಓಡೊಡು ತುದೆ ಕಡಪುನ ಜಾಗೆ. ಅಪಗದ ಕಾಲಡ್ ನಾಲ್ ಕಡಪು ಪಂಡ ಬೊಳ್ವಾರ್, ನೆಕ್ಕಿಲಾಡಿ, ಉಬಾರ್, ಎಣ್ಮಾಡಿ) ಗುಡ್ಡ, ಕುಂಞ, ರಾಮ ಈ ಜಾಗೆದ ಗರ್ಗಲ್ಲ ಕೋಟೆದ ಅಡಿ ಪಂಚಾಂಗ ಯಾನ್ ಮಲ್ತ್‌ದೆ. ಮೇಲ್ ಪಂಚಾಂಗ (ಗುಡಿಗೋಪುರ) ನಿಕುಲು ಮಲ್ಪುಲೆ. ಪಗೆಲ್ ಕಡಪು ನಿಕುಲು ಮಲ್ಪುಲೆ. ರಾತ್ರಿ ಕಡಪು ಯಾನ್ ತೂವೊನ್ಬೆ ಪಂದ್‌ ಪಂಡೆರ್.

ದುಂಬು ಕರಾಯ ವೈಲಾಯರ ಜೋತಿಷ್ಯ ಮಾರ್ಗದರ್ಶನಡ್‌ ತೋಜಿದ್‌ ಬತ್ತಿಲಕ ಬಿನ್ನೆರಾದ್‌ ಬತ್ತಿನಕುಲು ಕಲ್ಕುಡ- ಕಲ್ಲುರ್ಟಿ ದೈವಲಾದಿತ್ತೆರ್ ಈ ದೈವಲೆಗ್ ನಿಕುಲು ಗುಡಿ ಗೋಪುರ ಕಟ್ಟಾದ್ ಆರಾಧನೆ ಮಲ್ತೊಂದು ಬರೊಡು ಪಂದ್ ವೈಲಾಯೆರ್ ಸಲಹೆ ಕೊರ್ದಿತ್ತೆರ್. ದುಂಬಗ್ ಮೂಲು ದೈವಲೆನ್ ವೈಲಾಯರ ಮುಖೆನ ಪ್ರತಿಷ್ಠಾಪನೆ ಮಲ್ತ್‌ದ್, ದುಂಬುದ ವಿಧಿ- ವಿಧಾನಲೆನ್ ಅಕ್ಲೆನ ಸಲಹೆದಂಚ ಆಚರಣೆ ಮಲ್ತೊಂದು ಬರೊಡು. ಉಂದು ಮಾತ ಪೂರ್ವ ಸಂಪ್ರದಾಯದಂಚ ನಡತೊಂದು ಇತ್ತ್‌ದ್, ವಿಶೇಷ ದಾದ ಪಂಡ ಆನಿ ಪಾತೆರ ಕೊರ್ಲಕ ವರ್ಷಾಧಿದ ನೇಮದ ಮನದಾನಿ ದೈವ ಸುದೆ ಕಡತ್ತ್‌ ಬತ್ತ್‌ದ್ ಶ್ರೀ ಸಹಸ್ರಲಿಂಗೇಶ್ವರ ದೇವೆರ್ನ ದರ್ಶನ ಮಲ್ಪುನ ವಾಡಿಕೆ. ಈ ಪಿರಾವ್‌ ನೇಮೋತ್ಸವದ ಸಮಯಡ್ ಸುದೆತ್ತ ನೀರ್‌ದ ಮಟ್ಟ ಮಸ್ತ್ ಕಮ್ಮಿ ಆದ್‌ ಇತ್ತ್‌ಂಡ್, ಸುಲಭ ಸಾಧ್ಯವಾದ್ ನಡತೊಂದು ವಲಸರಿ ವಿಧಿ ವಿಧಾನ ನಡತೊಂದು ಇತ್ತ್‌ಂಡ್. ಆಂಡ ಈ ಸರ್ತಿ ದೈವಸ್ಥಾನಡ್ ಪೊಸಕಟ್ಟೆದ ನಿರ್ಮಾಣ ಆದ್, ಈ ಕಾರಣಗ್ ಬ್ರಹ್ಮಕಲಶೋತ್ಸವ ಗುರುವಾರ ನಡತ್‌ದ್‌ ಇತ್ತ್‌ಂಡ್. ರಾತ್ರಿ ನಡತ್ತಿನ ನೇಮೋತ್ಸವಡ್ ದೈವದ ವಲಸರಿಗ್‌ ಪಂದೆ ಪೊಸತ್ತ್‌ ದೆತೊನ್ನ ಓಡಡ್ ಸುಕ್ರಾರ ರಾತ್ರೆ ಕಲ್ಕುಡ ದೈವ ನೇತ್ರಾವತಿ ಸುದೆನ್ ದಾಂಟ್‌ದ್ ವಲಸರಿ ಮಲ್ತ್ಂಡ್.

ರಾಜ್ಯ ಬಿಜೆಪಿ ಸೋಶಿಯಲ್ ಮೀಡಿಯಾ ಕೋ-ಕನ್ವಿನರ್ ಆದ್ ಅಕ್ಷಯ್ ರೈ ದಂಬೆಕಾನ ಆಯ್ಕೆ‌

ಬಿಜೆಪಿದ ರಾಜ್ಯ ಸೋಶಿಯಲ್ ಮೀಡಿಯಾ ಕೋ-ಕನ್ವಿನರ್ ಆದ್ ಪುತ್ತೂರುದ ಅಕ್ಷಯ್ ರೈ ದಂಬೆಕಾನ ಆಯ್ಕೆಯಾತೆರ್.‌

ರಾಜ್ಯ ಸಾಮಾಜಿಕ ಜಾಲತಾಣದ ರಾಜ್ಯ ಸಂಚಾಲಕೆರ್ ಪ್ರಶಾಂತ್ ಮಾಕ್ಕೂರು ಮೇರ್ ಅಕ್ಷಯ್ ರೈ ಅರೆನ್ ಬಿಜೆಪಿ ರಾಜ್ಯ ಕೋ-ಕನ್ವಿನರ್ ಆದ್ ಘೋಷಣೆ ಮಲ್ತ್‌ದೆರ್. ಅಕ್ಷಯ್ ರೈ ದಂಬೆಕಾನ ಕರಿನ ಪದ್ರಾಡ್ ವರ್ಷದ ಕಾಲ ಬಿಜೆಪಿ ಯುವಮೋರ್ಚಾದ ಮಂಡಲ ಜಿಲ್ಲೆ ಬೊಕ್ಕ ರಾಜ್ಯದ ಮಸ್ತ್ ಜಬದಾರಿನ್ ನಿಭಾಯಿಸಾದ್, ಬೆಂಗಳೂರು ಜಿಲ್ಲೆದ ಖಜಾಂಚಿಯಾದ್‌ ಬೊಕ್ಕ ರಾಜ್ಯದ ಕಾರ್ಯಕಾರಿಣಿ ಸದಸ್ಯೆರಾದ್, ಮಾಧ್ಯಮದ ಸಂಚಾಲಕೆರಾದ್ ಸೇವೆ ಮಲ್ದೆರ್.

ತಮಿಳುನಾಡು ರಾಜ್ಯದ ವಿಧಾನ ಸಭಾ ವೋಟುದ ಪೊರ್ತುಡು ಕನ್ಯಾಕುಮಾರಿ ಜಿಲ್ಲೆದ ಕೊಲಚ್ಚಿಲ್ ಬೊಕ್ಕ 🔥 ನಾರಗಕೋವಿ ಕ್ಷೇತ್ರದ ಪ್ರಭಾರಿಯಾದ್ ಕೆಲಸ ಮಲ್ತ್‌ದೆರ್.‌ ಈ ಸರ್ತಿ ವಿಜಯೇಂದ್ರ ಮೇರೆನ ತಂಡಡ್ ಉನ್ನತ ಸ್ಥಾನ ತಿಕ್ಕಿನ ಇಂಬೆರ್ನ ಪರಿಶ್ರಮಗ್ ತಿಕ್ಕಿನ ಪ್ರತಿಫಲ. ಅಕ್ಷಯ್ ರೈ ದಂಬೆಕಾನ ಮೇರ್  ಬಿಜೆಪಿ ರಾಜ್ಯ ಸೋಶಿಯಲ್ ಮೀಡಿಯಾ ಕೋ-ಕನ್ವಿನರ್ ಆದ್‌ ಇನಿರ್ದ್ ಬೇಲೆ ಮಲ್ಪೆರೆ ಉಲ್ಲೆರ್.

ಫೆ.20: ಸಾಲ ಮನ್ನಾ ಪರಿಹಾರ ತಿಕ್ಕಂದಿನ ರೈತೆರ್ನ ಬೃಹತ್ ಪ್ರತಿಭಟನೆ

ಕರ್ನಾಟಕ ಸರಕಾರ 2018 ಡ್ ಸಹಕಾರಿ ಸಂಘ ಸೊಸೈಟಿ ಬ್ಯಾಂಕ್ ಸಾಲ ಮನ್ನಾ ಪರಿಹಾರದ ಕಾಸ್ ತಿಕ್ಕಂದಿನ ರೈತರ ಪರವಾದ್ ಮಲೆನಾಡು ಜನಹಿತ ರಕ್ಷಣಾ ವೇದಿಕೆದ ಸಂಘಟನೆ ಪ್ರಜಾಪ್ರಭುತ್ವದ ವ್ಯವಸ್ಥೆದ ಅಡಿಟ್ಟ್ ಪುತ್ತೂರು ಕಂದಾಯ ಉಪ ವಿಭಾಗ ಕಚೇರಿದ ಎದುರು ಫೆ .20 ತಾನಿ ಮಲ್ಲ ಪ್ರತಿಭಟನೆನ್ ದಿಯೊಂದ ಪಂದ್ ಮಲೆನಾಡು ಜನಹಿತ ರಕ್ಷಣಾ ವೇದಿಕೆದ ಗುರ್ಕಾರೆ ಕಿಶೋರ್ ಶಿರಾಡಿ ಸುಬ್ರಹ್ಮಣ್ಯಡ್ ನಡತ್ತಿನ ಪತ್ರಿಕಾಗೋಷ್ಠಿಡ್ ತೆರಿಪಾಯೆರ್.

ಇನಿ ಆಧುನಿಕ ತಂತ್ರಜ್ಞಾನ ಈತ್ ಮುಂದುವರಿದ್ ಇತ್ತ್ಂಡಲ ಸರಕಾರದ ಸಾಲ ಮನ್ನಾ ಯೋಜನೆ ಬೊಕ್ಕ ಬೇತೆ ಬೇತೆ ಯೋಜನೆದ ಅರ್ಹತೆ ಪಡೆನ ರೈತೆರೆಗ್ ತಿಕ್ಕಂದೆ ಇಪ್ಪುನ ಈ ರಾಜ್ಯದ ರೈತೆರ್ನ ವಿಪರ್ಯಾಸ .ರೈತೆರ್ನ ಸಮಸ್ಯೆಗ್ ಸ್ಪಂದನೆ ಕೊರಂದಿನ ಅಧಿಕಾರಿಲೆನ ವಿರುದ್ಧ ಬೊಕ್ಕ ಸಾಲ ಮನ್ನಾ ವಂಚಿತ ರೈತೆರೆಗ್ ಸಾಲಮನ್ನದ ಒಂಜಿ ಲಕ್ಷ ರೂ ಪನವು ತಿಕ್ಕುನ ಮುಟ್ಟ ಈ ಹೋರಾಟ ಮಲ್ಪುವ ಪಂದ್ ಕಿಶೋರ್ ಶಿರಾಡಿ ಪಂಡೆರ್. ಸುದ್ದಿಗೋಷ್ಠಿಡ್ ಹೋರಾಟ ಸಮಿತಿ ಸಂಚಾಲಕೆರ್ ಜಯಪ್ರಕಾಶ್ ಕೂಜುಗೋಡು, ಸದಸ್ಯೆರ್ ಮೋಹನ ಕೆದಿರ, ರಮೇಶ್ ಎಂ. ಎಸ್, ಹೂವಯ್ಯ ಕಲ್ಲೇರಿ ,ಪ್ರವೀಣ ಕೋನಡ್ಕ, ಎಂ ಮುತ್ತಪ್ಪ ಗೌಡ, ಡಿ ಲಿಂಗಪ್ಪಗೌಡ, ನರೇಂದ್ರ ಕೂಜುಗೋಡು ಬೊಕ್ಕ ಲೋಕೇಶ್ ಕೋನಡ್ಕ ಇತ್ತೆರ್.

ಸುಬ್ರಹ್ಮಣ್ಯಡ್ ಡಿಜಿಟಲ್ ಬೊಕ್ಕ ಬಿಕನ್ ಲೈಬ್ರರಿ ಉದಿಪನ

ಸುಬ್ರಹ್ಮಣ್ಯ: ಸುಬ್ರಹ್ಮಣ್ಯ ಗ್ರಾಮ ಪಂಚಾಯತ್ ಕಡಬ ತಾಲೂಕುದ ಸುರುತ ಡಿಜಿಟಲ್ ಬೊಕ್ಕ ಬಿಕನ್ ಲೈಬ್ರರಿನ್ ಗುರುವಾರ ಏನೆಕಲ್ ಪೂಜಾರಿ ಮನೆ ವಿಶೇಷ ಚೇತನ ಶಮನ್ ಕುಮಾರ್ ಉದಿಪನ ಮಲ್ತೆರ್.

ಮಲ್ಲ ಬಿನ್ನೆರಾದ್ ಪಾಲ್ ಪಡೆನ ತಾಲೂಕು ಪಂಚಾಯತ್ ಸಹಾಯಕ ನಿರ್ದೇಶಕೆರ್ ಚೆನ್ನಪ್ಪ ಗೌಡ ಕಜಮೂಲೆ ಪಾತೆರ್ದ್, ನಮ್ಮ ರಾಜ್ಯದ 5623 ಗ್ರಾಮ ಪಂಚಾಯಿತ್ ಡ್ ತಾಲೂಕುಗ್ ಒಂಜೆತಲಕ ಡಿಜಿಟಲ್ ಬೊಕ್ಕ ಬಿಕನ್ ಗ್ರಾಮ ಪಂಚಾಯಿತಿ ಆದ್ ಮಾರ್ಪಾಡ್ ಮಲ್ತ್ ದ್ ಕಡಬ ತಾಲೂಕುದ ಸುಬ್ರಹ್ಮಣ್ಯ ಗ್ರಾಮ ಪಂಚಾಯತ್ ನ್ ಆಯ್ಕೆ ಮಲ್ತ್ ದೆರ್ .ನೆತ್ತ ಉದ್ದೇಶ ಗ್ರಾಮೀಣ ಆಂಜೊಕ್ಲೆಗ್ ಬೊಕ್ಕ ಪೊಂಜೊವುನಕ್ಲೆಗ್ ಅಂಚನೆ ಸಾರ್ವಜನಿಕೆರೆಗ್ ಮಾತ ಮಾಹಿತಿಲೆನ್ ಗ್ರಂಥಾಲಯದ ಮೂಲಕ ಕೊರೊಡು, ಬೊಕ್ಕ ಎಚ್ಚ ಎಚ್ಚ ಜನಕ್ಕುಲು ಗ್ರಂಥಾಲಯಗ್ ಬತ್ತ್ ದ್ ಪುಸ್ತಕಲೆನ್ ಓದೊಡು, ಬೊಕ್ಕ ಡಿಜಿಟಲ್ ಕಂಪ್ಯೂಟರ್ ಜ್ಞಾನ ಪಡೆಯೊನೊಡು ಪನ್ಪುನ ಉದ್ದೇಶ.ನೆತ್ತ ಒಟ್ಟಿಗೆ ವಿಶೇಷ ಚೇತನ ಜೋಕ್ಲೆಗ್ ಲ ಪ್ರತ್ಯೇಕ ಕಂಪ್ಯೂಟರ್ ವ್ಯವಸ್ಥೆನ್ ಕೂಡ ಮಲ್ತ್ ದ ಪಂದ್ ಪಂಡೆರ್.

ಸುಬ್ರಹ್ಮಣ್ಯ ಗ್ರಾಮ ಪಂಚಾಯತ್ ಗುರ್ಕಾರ್ದಿ ಸುಜಾತ ಕಲ್ಲಾಜೆ ಗುರ್ಕಾರ್ಮೆನ್ ವಹಿಸ್ ದ್ ಇತ್ತೆರ್. ಚಾವಡಿಡ್ ಗ್ರಾಮ ಪಂಚಾಯತ್ ಉಪಾಧ್ಯಕ್ಷೆರ್ ವೆಂಕಟೇಶ ಎಚ್ ಎಲ್ ಪಂಚಾಯತ್ ಅಭಿವೃದ್ಧಿ ಅಧಿಕಾರಿ ಮಹೇಶ ಜೆಎನ್ ಲೈಬ್ರರಿಯನ್ ಲಲಿತ ಇತ್ತೆರ್.

ಈ ಪೊರ್ತುಡು ಸುಬ್ರಹ್ಮಣ್ಯ ಹಿರಿಯ ಪ್ರಾಥಮಿಕ ಶಾಲಾ ವಿದ್ಯಾರ್ಥಿಲು ಬೊಕ್ಕ ಶಿಕ್ಷಕ ವೃಂದದಕುಲು ಗ್ರಾಮ ಪಂಚಾಯತ್ ಸದಸ್ಯೆರ್, ಬೇತೆ ಬೇತೆ ಸಂಘ ಸಂಸ್ಥೆದ ಗುರ್ಕಾರ್ಲು, ಒತ್ತು ಗುರ್ಕಾರ್ಲು ಪದಾಧಿಕಾರಿಲು ,ಬೇತೆ ಬೇತೆ ಸ್ವಸಹಾಯ ಗುಂಪುದ ಗುರ್ಕಾರ್ಲು ಇತ್ತೆರ್.

ಸುಬ್ರಹ್ಮಣ್ಯ ಗ್ರಾಮ ಪಂಚಾಯತಿ ಕಾರ್ಯದರ್ಶಿ ಮೋನಪ್ಪ.ಡಿ ಲೇಸ್ ದ ಸುದಾರಿಕೆ ಮಲ್ತೆರ್. ಪಂಚಾಯತ್ ಸದಸ್ಯೆರ್ ಗಿರೀಶ್ ಬತ್ತಿ ಬಿನ್ನೆರೆನ್ ಎದ್ಕೊಂಡೆರ್. ಪಂಚಾಯತ್ ಸದಸ್ಯೆ ಭಾರತಿ ದಿನೇಶ್ ಸೊಲ್ಮೆ ಸಂದಾಯ ಮಲ್ತೆರ್.

ಅಂತಾರಾಷ್ಟ್ರೀಯ ಮಟ್ಟದ ಹಿರಿಯರ ಕ್ರೀಡಾಕೂಟಗ್‌ ಬಳ್ಪ ಗ್ರಾ.ಪಂ ಸದಸ್ಯೆ ನೇತ್ರಾವತಿ ಹೊಪ್ಪಾಳೆ ಆಯ್ಕೆ

ಕಡಬ ತಾಲೂಕುದ ಬಲ್ಪ ಗ್ರಾಮವೆಟರನ್ಸ್ ಅಥ್ಲೆಟಿಕ್ ಫೆಡರೇಷನ್ ಆಫ್ ಇಂಡಿಯಾ ಮುತಾಲಿಕೆಡ್‌ ತಮಿಳುನಾಡ್‌ದ ತಿರುನಲ್ವೇಲಿಯ ಅಣ್ಣಾ ಸ್ಟೇಡಿಯಂಡ್ ಫೆಬ್ರವರಿ 2 ರ್ದ್ 4 ಮುಟ್ಟ ನಡತ್ತಿನ 43ನೇ ರಾಷ್ಟ್ರ ಮಟ್ಟದ ಹಿರಿಯರ ಕ್ರೀಡಾಕೂಟಡ್ ಕಡಬ ತಾಲೂಕುದ ಬಳ್ಪ ಗ್ರಾಮ ಪಂಚಾಯತ್ ಸದಸ್ಯೆ ನೇತ್ರಾವತಿ ಹೊಪ್ಪಾಳೆ ( ಶ್ರೀ ಗಣೇಶ್ ಪೂಜಾರಿ ಹೊಪ್ಪಾಳೆ ಮೇರೆನ ಬುಡೆದಿ) 4×400ಮೀ ರಿಲೇಟ್‌ ಸುರುತ ಇನಾಮು, 4×100 ಮೀ ರಿಲೇ, ಲಾಂಗ್ ಜಂಪ್, 100 ಮೀ ಹರ್ಡಲ್ಸ್ ಡ್‌ ರಡ್ಡನೇ ಇನಾಮು ಬೊಕ್ಕ 100 ಮೀ ಓಟಡ್ ಮೂಜನೇ ಇನಾಮು ಪಡೆಯೊಂದೆರ್.

ಮೇರ್ ಸೆಪ್ಟೆಂಬರ್‌ಡ್‌ ನಡಪುನ ಅಂತಾರಾಷ್ಟ್ರೀಯ ಮಟ್ಟದ ಹಿರಿಯರ ಕ್ರೀಡಾಕೂಟಡ್ ಪಾಲ್‌ ಪಡೆಯೆರೆ ಉಲ್ಲೆರ್.

ಅರಣ್ಯ ಸಚಿವೆರ್ ಈಶ್ವರ್ ಖಂಡ್ರೆ ಕುಕ್ಕೆ ಸುಬ್ರಹ್ಮಣ್ಯ ದೇವಸ್ಥಾನಗ್ ಭೇಟಿ

ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನಗ್ ಅರಣ್ಯ ಸಚಿವೆರ್ ಈಶ್ವರ್ ಖಂಡ್ರೆ ದಂಪತಿ ಸಮೇತ ಫೆ.5 ತಾರೀಕ್ ಇನಿ ಮಧ್ಯಾಹ್ನ ಭೇಟಿ ಕೊರಿಯೆರ್. ದೇವಸ್ಥಾನಗ್ ಬತ್ತಿನ ಅರೆನ್ ದೇವಸ್ಥಾನ ವತಿರ್ದ್ ಎದ್ಕೊಂಡೆರ್. ದೇವೆರ್ನ ದರ್ಶನ ಮಲ್ತ್ ದ್ ಪೂಜೆ ಸಲ್ಲಿಸಾಯೆರ್.

ಈ ಪೊರ್ತುಡು ವ್ಯವಸ್ಥಾಪನಾ ಸಮಿತಿ ಅಧ್ಯಕ್ಷೆರ್ ಮೋಹನ ರಾಮ್ ಸಳ್ಳಿ, ಸದಸ್ಯೆರಾಯಿನ ಶ್ರೀ ವತ್ಸ, ಕಾರ್ಯನಿರ್ವಹಣಾಧಿಕಾರಿ ಡಾl ನಿಂಗಯ್ಯ, ಕಾಂಗ್ರೆಸ್ ಮುಖಂಡೆರಾಯಿನ ಪಿ.ಸಿ ಜಯರಾಂ, ಭರತ್ ಮುಂಡೋಡಿ, ಹರೀಶ್ ಇಂಜಾಡಿ, ಅಶೋಕ್ ನೆಕ್ರಾಜೆ, ಲೋಲಾಕ್ಷ ಕೈಕಂಬ, ಪವನ್ ಎಂ.ಡಿ, ಸುಧೀರ್ ಕುಮಾರ್ ಶೆಟ್ಟಿ, ಸುಬ್ರಹ್ಮಣ್ಯ ರಾವ್, ವಿಮಲಾ ರಂಗಯ್ಯ,ನಿತ್ಯಾನಂದ ಮುಂಡೋಡಿ, ಭರತ್ ಮುಂಡೋಡಿ, ಕೃಷ್ಣಪ್ಪ, ACF ಪ್ರವೀಣ್ ಶೆಟ್ಟಿ, ಡಿಸಿಎಫ್ ಮಂಗಳೂರು ಅಂತೋನಿ ಮರಿಯಪ್ಪ, ಸಿಎಫ್ಓ ಕರಿಕಲ್ಲನ್, ಸಚಿವೆರ್ನ ಆಪ್ತ ಕಾರ್ಯದರ್ಶಿ ಎ.ಆರ್. ರವಿ ಈ ಪೊರ್ತುಡು ಇತ್ತೆರ್.

ಎನೆಕಲ್ಲು: ಇನ್ನರ್ ವೀಲ್ ಕ್ಲಬ್ ವತಿರ್ದ್ ಸ್ಟೀಲ್ ನೀರ್ ದ ಬಾಟಲ್ ವಿತರಣೆ

ಸುಬ್ರಹ್ಮಣ್ಯ ಇನ್ನರ್ ವೀಲ್ ಕ್ಲಬ್ ವತಿರ್ದ್ ಏನೇ ಕಲ್ಲು ಬಾ ನಾಟಕ ಅಂಗನವಾಡಿ ಶಾಲೆದ ಮಾತ ಜೋಕ್ಲೆಗ್ ಉಚಿತವಾದ್ ಸ್ಟೀಲ್ ವಾಟರ್ ಬಾಟಲ್ ಶನಿವಾರ ವಿತರಣೆ ಮಲ್ತೆರ್.

ಲೇಸ್ ದ ಗುರ್ಕಾರ್ಮೆನ್ ಸುಬ್ರಮಣ್ಯ ಇನ್ನರ್ವೇಲ್ ಕ್ಲಬ್ ಗುರ್ಕಾರ್ದಿ ವೇದ ಶಿವರಾವ್ ವಹಿಸ್ ದ್ ಇತ್ತೆರ್. ಮಲ್ಲ ಬಿನ್ನೆರಾದ್ ಸುಬ್ರಹ್ಮಣ್ಯ ಗ್ರಾಮ ಪಂಚಾಯತ್ ಸದಸ್ಯೆರ್ ಶಿವರಾಮ ನಿಕ್ರಾಜೆ, ಭವ್ಯ, ಸುಬ್ರಹ್ಮಣ್ಯ ರೋಟರಿ ಕ್ಲಬ್ ದ ಪೂರ್ವ ಅಧ್ಯಕ್ಷೆರ್ ಶಿವರಾಮ ಏನಕಲ್ ಇತ್ತೆರ್.

ಈ ಪೊರ್ತುಡು ಸುಬ್ರಹ್ಮಣ್ಯ ಇನ್ನರ್ ವೇಲ್ ಕ್ಲಬ್ ದ ಸದಸ್ಯೆರಾಯಿನ ಶ್ರೀಜಾ ಚಂದ್ರಶೇಖರ್ ನಾಯರ್ ,ಸೋನು ಭಟ್ ,ಸವಿತಾ ,ಶಾಲಾ ಎಸ್ ಡಿ ಎಂ ಸಿ ಅಧ್ಯಕ್ಷೆರ್, ಸದಸ್ಯೆರ್ ,ಪೋಷಕೆರ್, ಅಂಗನವಾಡಿ ಕಾರ್ಯಕರ್ತೆ ರಾಧಾ ಯಮುನಾ, ಜಯಲಕ್ಷ್ಮಿ ಬೊಕ್ಕ ಊರಿದಕುಲು ಇತ್ತೆರ್. ಅಂಗನವಾಡಿ ಕಾರ್ಯಕರ್ತೆ ಯಮುನಾ ಬತ್ತಿ ಬಿನ್ನೆರೆನ್ ಎದ್ಕೊಂದು, ಸೊಲ್ಮೆ ಸಂದಾಯ ಮಲ್ತೆರ್. ಧನ್ಯ ಲೇಸ್ ದ ಸುದಾರಿಕೆ ಮಲ್ತೆರ್.