Sat. Nov 21st, 2026

ಕುಡ್ಲದ ಸುದ್ದಿ | Mangalore News

ಕಿಲ್ಪಾಡಿ ಶ್ರೀ ಕೋರ್ದಬ್ಬು ದೈವಸ್ಥಾನಡ್ ಕಂಡಿನ ನಾಲ್ ಜನ ಅರೆಸ್ಟ್

ಮುಲ್ಕಿ: ಪೊಲೀಸ್ ಠಾಣಾ ವ್ಯಾಪ್ತಿದ ಕಿಲ್ಪಾಡಿ ಶ್ರೀ ಕೋರ್ದಬ್ಬು ದೈವಸ್ಥಾನಡ್ ಲಕ್ಷಾಂತರ ರೂಪಾಯಿದ ಸೊತ್ತು ಕಂಡಿನ ಕೇಸ್‌ಡ್ ಮುಲ್ಕಿ ಪೊಲೀಸೆರ್ ನಾಲ್ ಜನ ಆರೋಪಿಲೆನ್ ಅರೆಸ್ಟ್ ಮಲ್ತ್‌ದ್ ನನ ರಡ್ಡ್ ಜನ ಆರೋಪಿಲೆನ್ ನಾಡೊಂದುಲ್ಲೆರ್.
ಪಡ್ಡೆದ್ರ ಕಂಚಿನಡ್ಕ ನಿವಾಸಿ ಜಾಹಿದ್ ಸಿನಾನ್ (26), ಕಾರ್ಲ ನಿಟ್ಟೆ ನಿವಾಸಿ, ಇತ್ತೆ ಕಾರ್ನಾಡ್‌ಡ್ ವಾಸ ಉಪ್ಪುನ ಯಾಸಿನ್(36), ದಾವಣಗೆರೆತ್ತ ಅಬ್ದುಲ್ ಜುಮಾಲ್ (24), ಮಹಮ್ಮದ್ ಆಫ್ರಿದ್ (24) ಮೊಕ್ಲೆನ್ ಪೊಲೀಸೆರ್ ಅರೆಸ್ಟ್ ಮಲ್ದೆರ್.
ಆರೋಪಿಲೆನ್ ಸ್ಥಳ ಮಹಜರ್‌ಗ್ ದೈವಸ್ಥಾನಗ್ ಲೆತೊಂದು ಬರ್ಪೆರ್ ಪಂದ್ ಗೊತ್ತಾದ್ ಊರುದ ಜನಕುಲು ಐತಾರ ರಾತ್ರೆ ಭಾರಿ ಸಂಖ್ಯೆಡ್ ಸೇರ್ದಿತ್ತೆರ್. ಆಂಡ ಪೊಲೀಸೆರ್ ಸೋಮವಾರ ಪುಲ್ಯಕೊಲೊಗು ಲೆತೊಂದು ಬತ್ತ್‌ದ್ ಮಹಜರ್ ಮಲ್ದೆರ್ ಪಂದ್ ತೆರಿದ್ ಬೈದ್ಂಡ್.

ಮೂಡಾ ಅಧ್ಯಕ್ಷೆರೆಗ್ ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಅಭಿನಂದನೆ

ಕುಡ್ಲ: ಮಂಗಳೂರು ನಗರಾಭಿವೃದ್ಧಿ ಪ್ರಾಧಿಕಾರದ ಪೊಸ ಅಧ್ಯಕ್ಷೆರಾದ್ ಅಧಿಕಾರ ಸ್ವೀಕಾರ ಮಲ್ತಿನ ಯುವ ನಾಯಕ ಸಂತೋಷ್ ಕುಮಾರ್ ಶೆಟ್ಟಿ ಮೆರೆನ್ ಜಾಗತಿಕ ಬಂಟರ ಸಂಘಗಳ ಒಕ್ಕೂಟದ ಅಧ್ಯಕ್ಷೆರಾಯಿನ ಐಕಳ ಹರೀಶ್ ಶೆಟ್ರ್ ಮಂಗಳೂರು ನಗರಾಭಿವೃದ್ಧಿ ಪ್ರಾಧಿಕಾರದ ಆಫೀಸ್‌ಡ್ ಭೇಟಿಯಾದ್ ಅಭಿನಂದನೆ ಮಲ್ತೆರ್.
“ಸಂತೋಷ್ ಶೆಟ್ರ್ ಕಾಂಗ್ರೆಸ್ ಡ್ ಮಸ್ತ್ ವರ್ಷರ್ದಿಂಚಿ ಪಕ್ಷ ನಿಷ್ಠೆಡ್ ಕೆಲಸ ಮಲ್ತೊಂದು ಬೈದಿನಾರ್. ಪಕ್ಷಗಾದ್ ಆರ್ ಮಲ್ದಿನ ಬೇಲೆನ್ ಗುರ್ತಿಸಾದ್ ಅರೆಗ್ ರಾಜ್ಯ ಸರಕಾರ ಮಲ್ಲ ಜಬದಾರಿನ್ ಕೊರ್ತುಂಡು.ಸಂತೋಷ್ ಶೆಟ್ರ್ ಮೂಡಾ ಅಧ್ಯಕ್ಷೆರಾದ್ ಮಸ್ತ್ ಅಭಿವೃದ್ಧಿ ಕೆಲಸ ಮಲ್ಪಡ್” ಪಂದ್ ಐಕಳ ಹರೀಶ್ ಶೆಟ್ಟಿ ಎಡ್ಡೆಪ್ಪು ಬಯಕಿಯೆರ್.

ಸುರತ್ಕಲ್ ಬಂಟರ ಸಂಘಡ್ ಈ. ಟಿ. ಶೆಟ್ರೆಗ್ ನುಡಿನಮನ

ಸುರತ್ಕಲ್ : ಇಂಚೊಗು ದೇವೆರೆ ಪಾದ ಸೇರಿನ ಸಿವಿಲ್ ಕಂಟ್ರಾಕ್ಟರ್, ಉದ್ಯಮಿ ಸುರತ್ಕಲ್ ಬಂಟರ ಸಂಘದ ಮಾಜಿ ಉಪಾಧ್ಯಕ್ಷೆರ್, ನಡ್ಯೋಡಿಗುತ್ತು ಈರಯ್ಯ ಶೆಟ್ಟಿ (ಈ. ಟಿ. ಶೆಟ್ಟಿ) ಪಂಜ ಮೆರೆಗ್ ಸುರತ್ಕಲ್ ಬಂಟರ ಸಂಘಡ್ ನುಡಿನಮನ ಕಾರ್ಯಕ್ರಮ ನಡತ್ಂಡ್.
ಸುರತ್ಕಲ್ ಬಂಟರ ಸಂಘದ ಸ್ಥಾಪನೆ ಸಂದರ್ಭಡ್ ಈ ಟಿ ಶೆಟ್ರ್ ಸಂಘಟನೆದ ಬೇಲೆಡ್ ಸಕ್ರಿಯವಾದಿತ್ತ್‌ದ್ ಜವನೆರೆಡ ಉಮೇದ್ ದಿಂಜಾದ್ ಬೇಲೆ ಮಲ್ತೊಂದಿತ್ತೆರ್ ಪಂದ್ ಸಂಘದ ಸ್ಥಾಪಕಾಧ್ಯಕ್ಷೆರ್ ಕುಳಾಯಿಗುತ್ತು ರೋಹಿರಾಕ್ಷ ರೈ ನುಡಿನಮನ ಸಂದಾದ್ ಪಾತೆರಿಯೆರ್.
2001 ನೇ ಇಸ್ವಿಡ್ ಸುರತ್ಕಲ್‌ಡ್ ನಡತಿನ ವಿಶ್ವ ಬಂಟರ ಕಲೋತ್ಸವಡ್ ಈ ಟಿ ಶೆಟ್ರೆ ಜವನೆರೆನ್ ಒಟ್ಟುಪಾಡ್ದ್ ಕೆಲಸ ಮಲ್ತ್‌ದ್ ಯಶಸ್ವಿ ಮಲ್ತ್ ಕೊರ್ತೆರ್ ಪಂದ್ ಮಾಜಿ ಅಧ್ಯಕ್ಷೆರ್ ಉಲ್ಲಾಸ್ ಆರ್ ಶೆಟ್ಟಿ ಪೆರ್ಮುದೆ ತೆರಿಪಾಯೆರ್.
ಸುರತ್ಕಲ್ ಬಂಟರ ಸಂಘಡ್ ಈ ಟಿ ಶೆಟ್ರೆನ ಕೆಲಸದ ಬದ್ದತೆ ಬೊಕ್ಕ ಯುವ ಸಮುದಾಯಗ್ ಮಾರ್ಗದರ್ಶಕೆರಾದ್ ಪ್ರೇರಣಾ ಶಕ್ತಿ ಆದಿತ್ತೆರ್ ಪಂದ್ ಮಾಜಿ ಅಧ್ಯಕ್ಷೆರ್ ಎಂಜೆ ಶೆಟ್ಟಿ ಕುಳಾಯಿ ತೆರಿಪಾಯೆರ್.
ಸಂಘದ ಅಧ್ಯಕ್ಷೆರ್ ಬಾಳ ಜಗನ್ನಾಥ ಶೆಟ್ಟಿ, ಪ್ರಧಾನ ಕಾರ್ಯದರ್ಶಿ ಲೀಲಾಧರ ಶೆಟ್ಟಿ ಕಟ್ಲ, ನಿಕಟ ಪೂರ್ವಾಧ್ಯಕ್ಷೆರ್ ಲೋಕಯ್ಯ ಶೆಟ್ಟಿ ಮುಂಚೂರು, ಮಾಜಿ ಪ್ರಧಾನ‌ ಕಾರ್ಯದರ್ಶಿ ದಿವಾಕರ ಸಾಮಾನಿ ಚೇಳಾರ್ ಗುತ್ತು, ಕಾರ್ಯಕಾರಿ ಸಮಿತಿ ಸದಸ್ಯೆರ್ ಗಿರೀಶ್ ಎಂ ಶೆಟ್ಟಿ ಕಟೀಲು, ಪುಷ್ಪರಾಜ್ ಶೆಟ್ಟಿ ಕುಡುಂಬೂರು, ಸತೀಶ್ ಶೆಟ್ಟಿ ಪಂಜ, ಸುಜಾತ ಶೆಟ್ಟಿ, ಹರೀಶ್ ಶೆಟ್ಟಿ ನುಡಿ ನಮನ ಸಂದಾಯೆರ್.
ಸಂಘದ ಮಾಜಿ ಉಪಾಧ್ಯಕ್ಷೆರ್ ಮಹಾಬಲ ರೈ ಮುಕ್ಕ ಮಹಿಳಾ ವೇದಿಕೆದ ಅಧ್ಯಕ್ಷೆರ್ ಸರೋಜ ಟಿ ಶೆಟ್ಟಿ, ಕಾರ್ಯ‌ದರ್ಶಿ ರಾಜೇಶ್ವರಿ ಡಿ ಶೆಟ್ಟಿ, ಸುರತ್ಕಲ್ ವ್ಯವಸಾಯ ಸೇವಾ ಸಹಕಾರಿ ಬ್ಯಾಂಕ್ ಅಧ್ಯಕ್ಷೆರ್ ಅಶೋಕ್ ಶೆಟ್ಟಿ ತಡಂಬೈಲ್, ಸುರತ್ಕಲ್ ಸುಭಾಷಿತನಗರ ರೆಸಿಡೆಂಟ್ಸ್ ವೆಲ್‌ಫೇರ್ ಅಸೋಸಿಯೇಶನ್ ಅಧ್ಯಕ್ಷೆರ್ ರಮೇಶ್ ಶೆಟ್ಟಿ, ಶ್ರೀಕಾಂತ್ ಶೆಟ್ಟಿ ಬಾಳ, ಮಾಜಿ ಅಧ್ಯಕ್ಷೆರ್ ಸುಧಾಕರ ಪೂಂಜ, ಆಶ್ರಯ್ ಶೆಟ್ಟಿ ಮೊಕುಲು ಮಾತ ಇತ್ತೆರ್.

ಸೆ.19 : ಬೀರಿ ಕೋಟೆಕಾರ್‌ಡ್ 18 ನೇ ವರ್ಷದ ಶ್ರೀ ಬಾಲ ಗಣೇಶೋತ್ಸವ

ಕುಡ್ಲ : ಕೋಟೆಕಾರ್ ಬೀರಿ ಕೆ.ಸುಬ್ಬಣ್ಣಯ್ಯೆರ್ನ ಇಲ್ಲಡ್ ಸೆ.19 ತಾರೀಕ್‌ಗ್ 18ನೇ ವರ್ಷದ ಶ್ರೀ ಬಾಲ ಗಣೇಶೋತ್ಸವ ನಡಪರೆ ಉಂಡು.
ಆನಿ ಕಾಂಡೆ 8.30 ಕ್ಕ್ ಗಣ ಹೋಮ ಬೊಕ್ಕ ಬಾಲ ಗಣಪತಿ ಮೂರ್ತಿ ಪ್ರತಿಷ್ಠೆ, ಮದ್ಯಾನ ಅನ್ನಸಂತರ್ಪಣೆ, ರಾತ್ರೆ 8.30 ಕ್ಕ್ ಮಹಾ ಪೂಜೆ ಆದ್ ಮೂರ್ತಿ ಜಲಸ್ತಂಭನ ನಡಪರೆ ಉಂಡು.
ಈ ಲೇಸ್‌ಡ್ ಭಕ್ತಾದಿಲು ಎಚ್ವಿನ ಸಂಖ್ಯೆಡ್ ಪಾಲ್ ಪಡೆದ್ ಗಣಪತಿ ದೇವೆರ್‌ನ ಅನುಗ್ರಹೊಗು ಪಾತ್ರರಾವೊಡು ಪಂದ್ ಕೆ. ಸುಬ್ಬಯ್ಯಣ್ಣೆರ್‌ನ ಇಲ್ಲದಕುಲು ಬಿನ್ನಾಪು ಮಲ್ದೆರ್.

ತೀಯಾ ಸೇವಾ ಸಹಕಾರ ಸಂಘದ 10ನೇ ವರ್ಷದ ಮಹಾಸಭೆ

ಇತಿಹಾಸದ ಪುಟೊಟ್ಟು ದಾಖಲಾಯಿನ ದಶಮಾನ ಉಚ್ಚಯದ ಲೇಸ್

ಕುಡ್ಲ : ತೊಕ್ಕೊಟ್ಟು ಒಳಪೇಟೆಡ್ ಪ್ರಧಾನ ಕಚೇರಿ ಉಪ್ಪುನ ತೀಯಾ ಸೇವಾ ಸಹಕಾರ ಸಂಘದ 10ನೇ ವಾರ್ಷಿಕ ಮಹಾಸಭೆ ಬೊಕ್ಕ ದಶಮಾನ ಉಚ್ಚಯದ ಲೇಸದ ಜೆಪ್ಪು ಮಹಾಕಾಳಿ ಪಡ್ಪು ಕೈತಲ್ದ “ಮಾಷ್ ” ಸಭಾಂಗಣಡ್ ಇಂಚೊಗು ನಡತ್ಂಡ್. ದಶಮಾನೋತ್ಸವಗ್ ಸೇರ್ದಿನ ಜನಾಭಿಪ್ರಾಯದ ಪ್ರಕಾರ, ತೀಯಾ ಸಮಾಜದ ಎಡ್ಡೆಗಾದ್ ಬೆನ್ತಿನ
ದಿ. ದಾಮೋದರ ಉಳ್ಳಾಲ್ ಮೆರೆನ ಪುದರ್ ತಯಾರಾತಿನ ವೇದಿಕೆಡ್ ನಡತಿನ ಸಹಕಾರಿ ರಂಗಡ್ ಇಂಚಿನ ಒಂಜಿ ಕಾರ್ಯಕ್ರಮ
ವಿಶಿಷ್ಠ ಬೊಕ್ಕ ವಿಭಿನ್ನವಾದ್ ಮೂಡ್ದು ಬರ್ಪಿನ ಮುಕೇನ ಇತಿಹಾಸದ ಪುಟ ಸೇರ್ದ್ಂಡ್.

ಲೇಸ್ ಡ್ ಆಶೀರ್ವಚನ ಕೊರ್ನ ತಿರುವನಂತಪುರ
ವರ್ಕಳ ಶಿವಗಿರಿ ಮಠತ್ತ ಶ್ರೀ ಶ್ರೀ ಜ್ಞಾನತೀರ್ಥ ಸ್ವಾಮೀಜಿ ಪಾತೆರ್ದ್, “ತುಳುನಾಡ್‌ಡ್
ನಾರಾಯಣ ಗುರುಕ್ಲೆನ್ ಬ್ರಹ್ಮಶ್ರೀ ನಾರಾಯಣ ಗುರು ಪಂದ್ ಗೌರವ ಮಲ್ಪುವೆರ್. ಆಂಡ ಆರ್ ದೈವಾಂಶ ಸಂಭೂತೆರಾದಿತ್ತಿನೆರ್ದಾವರ ನಮ ಅರೆನ್ “ಭಗವಾನ್ ನಾರಾಯಣ ಗುರು” ಪಂದ್ ಪೂಜೆ ಮಲ್ಪೊಡು” ಪಂದ್ ಸಲಹೆ ಕೊರಿಯೆರ್.


ಮಲ್ಲ ಬಿನ್ನೆರಾದ್ ಕರ್ನಾಟಕ ರಾಜ್ಯ ಆರೋಗ್ಯ, ಕುಟುಂಬ ಕಲ್ಯಾಣ,ಅಲ್ಪಸಂಖ್ಯಾತರ ಕಲ್ಯಾಣ, ಹಜ್ ಬೊಕ್ಕ ವಕ್ಫ್ ಸಚಿವೆರಾಯಿನ ಯು.ಟಿ. ಖಾದರ್, ದ.ಕ. ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್‌ದ ಅಧ್ಯಕ್ಷೆರ್ ಡಾ.ಎಂ.ಎನ್. ರಾಜೇಂದ್ರ ಕುಮಾರ್, ಮಾಜಿ ಸಂಸದೆರ್ ನಳಿನ್ ಕುಮಾರ್ ಕಟೀಲು, ದಿ.ದಾಮೋದರ ಉಳ್ಳಾಲ್‌ರೆನ ಧರ್ಮಪತ್ನಿ ಇಂದುಮತಿ, ಉದ್ಯಮಿ ಚಂದ್ರಕಾಂತ್ ಕ್ಲಿಕ್ ಕ್ಯಾಟರರ್ಸ್, ರಾಜ್ಯ ಆಹಾರ ಅಯೋಗದ ಸದಸ್ಯ ನಿರ್ದೇಶಕೆ ಸುಮಂತ್ ರಾವ್, ಸಚಿವ ಯು. ಟಿ. ಖಾದರ್‌ರೆನ ಆಪ್ತ ಸಹಾಯಕೆರ್ ಭವಿತ್ ಬಂಗೇರ ತೊಕ್ಕೊಟ್ಟು, ಕಾಪು ಶಾಸಕೆರ್ ಸುರೇಶ್ ಶೆಟ್ಟಿ ಗುರ್ಮೆ ಮೆರೆನ ಆಪ್ತ ಸಹಾಯಕೆರ್ ಚರಿತ್ರಾ ಶ್ರೀ ಮೋಹನ್ ತುಂಬೆ , ಸಂಸ್ಥೆದ ಉದಿಪನದ ಕಾರಣೀಕರ್ತೆ ಬೊಕ್ಕ ಆಡಳಿತ ಮಂಡಳಿದ ಅಧ್ಯಕ್ಷೆರ್ ಎಂ.‌ದಿನೇಶ್ ಕುಂಪಲ, ಉಪಾಧ್ಯಕ್ಷೆರ್ ಸುನಿಲ್ ಜೆ. ಉಚ್ಚಿಲ್, ನಿರ್ದೇಶಕೆರ್ ಸೂರಜ್ ಕುಮಾರ್, ಮುಖ್ಯ ಕಾರ್ಯ ನಿರ್ವಹಣಾ ಅಧಿಕಾರಿ ಯಶವಂತಿ ಜೆ. ಉಚ್ಚಿಲ್,
ಶಾಖಾ ವ್ಯವಸ್ಥಾಪಕೆರ್ ಸ್ವಸ್ತಿಕ್ ಕೋಟ್ಯಾನ್, ನಾಟಕ ನಿರ್ದೇಶಕೆರ್ ಸುಧೀಶ್ ಕಾಸರಗೋಡು,
ಸಂಸ್ಕೃತ ಎಂಎಡ್ ಸುರೂತ್ತ ರ್‍ಯಾಂಕ್ ಪಡೆಯಿನ ಶ್ರಾವ್ಯ, ಬಾಲ ಪ್ರತಿಭೆಲಾಯಿನ ದಕ್ಷಿತ್ ಪ್ರೇಮ್ ಜಿತ್, ಚಿರುಷ್ ಮೊಕ್ಲೆಗ್ ಮಾನಾದಿಗೆ ಮಲ್ತೆರ್.
ಅತ್ಯುತ್ತಮ ಠೇವಣಿದಾರೆರ್, ಪೊರ್ತುಡು ಸಾಲ ಸಂದಾಯಿನ ಗ್ರಾಹಕೆರ್ 4 ಅತ್ಯುತ್ತಮ ಸಂಘ ಬೊಕ್ಕ 4 ಉತ್ತಮ ಸ್ವಸಹಾಯ ಸಂಘಲೆಗ್ ಇನಾಮು ಪಟ್ಟಿಯೆರ್.
ಅಂಚೆನೆ ತೀಯಾ ಸಮಾಜದ ವಿವಿಧ ಕ್ಷೇತ್ರಲೆನ ಆಚಾರಪಟ್ಟವರು, ಗುರಿಕಾರೆರ್, ಸಂಘದ ನಿರ್ದೇಶಕೆರ್ ಸೇರ್ದ್ ಲೇಸ್‌ಡ್ ಪಾಲ್ ಪಡೆಯಿನ ಗಣ್ಯೆರೆಗ್ ಗೌರವ ಮಲ್ತೆರ್.

ಈ ಪೊರ್ತುಡು ಸಂಸ್ಥೆದ ಸದಸ್ಯೆರೆಗ್ ಕ್ರೀಡಾ ಸ್ಪರ್ಧೆ, ವೈದ್ಯಕೀಯ ಶಿಬಿರ, ಪಂಚಗ್ಯಾರಂಟಿ ನೋಂದಣಿ ಶಿಬಿರ, ಅಸಂಘಟಿತ ಕಾರ್ಮಿಕೆರೆಗ್ ಸ್ಮಾರ್ಟ್‌ಕಾರ್ಡ್ ನೋಂದಣಿ ಶಿಬಿರ, ಆಧಾರ್ ಕಾರ್ಡ್ ತಿದ್ದುಪಡಿ ಶಿಬಿರ ನಡತ್ಂಡ್.

ಅಂಚೆನೆ ಸಾಂಸ್ಕೃತಿಕ ಕಾರ್ಯಕ್ರಮ, ಸ್ವಸಹಾಯ ಸಂಘದ ಸದಸ್ಯೆರೆರ್ದ್ ಸುಧೀಶ್ ಕಾಸರಗೋಡು ನಿರ್ದೇಶನಡ್ ಪೌರಾಣಿಕ ನಾಟಕ “ಕಿಷ್ಕಿಂಧ ಕಾಂಡ” ಎಲ್ಯ ನಾಟಕ ನಡತ್ಂಡ್.
ಅವ್ವತ್ತಾಂದೆ ನೃತ್ಯ ಪ್ರದರ್ಶನ, ಸೇರ್ದ್ ಬೇತೆ ಬೇತೆ ವಿವಿಧ ಮನೋರಂಜನಾ ಕಾರ್ಯಕ್ರಮ ನಡತ್ಂಡ್.
ನಮ್ಮ ಸಂಸ್ಥೆಡ್ ‘ಎ ‘ ಗ್ರೇಡ್ ಪ್ರತಿ ಷೇರ್‌ದ ಬಿಲೆನ್ ರೂ.500 ರ್ದ್ ರೂ. 1000 ಎಚ್ಚ ಮಲ್ಪುನ ಆಡಳಿತ ಮಂಡಳಿದ ನಿರ್ಣಯನ್ ಸಭೆತ್ತ ದುಂಬು ದೀದ್ ಒಪ್ಪಿಗೆ ದೆತೊಂದು ಬೈಲಾ ತಿದ್ದುಪಡಿ ಮಲ್ಪರೆ ಒಪ್ಪಿಗೆ ಕೇಂಡೆರ್.
ಸಂಸ್ಥೆದ ಪುದರ್‌ಡ್ ಸ್ವಂತ ಕಟ್ವಾಣ ಮಲ್ಪುನ ಪ್ರಸ್ತಾವನೆ ಮಲ್ತೆರ್. ಕೋರ್ ಬ್ಯಾಂಕಿಂಗ್ ವ್ಯವಸ್ಥೆದ ಬಗೆಟ್ಟ್ ವಿಷಯ ಸಂಗ್ರಹ ಮಲ್ತ್‌ದ್ ನಮ್ಮ ಸಾಫ್ಟ್ ವೇರ್ ಪಾಡುನ ನಿರ್ಣಯನ್ ಸಭೆತ್ತ ದುಂಬು ದೀಯೆರ್.
ಲೇಸ್‌ಡ್ ಸಮಾಜದ ಬೇತೆ ಬೇತೆ ಕ್ಷೇತ್ರದ ಆಚಾರಪಟ್ಟವರು, ಗುರಿಕಾರೆರ್, ಉಳ್ಳಾಲ‌ ಶ್ರೀ ಚೀರುಂಭ ಭಗವತೀ ಕ್ಷೇತ್ರದ ಆಡಳಿತ ಮೊಕ್ತೇಸರೆರ್ ಸುರೇಶ್ ಭಟ್ನಗರ, ಅಧ್ಯಕ್ಷೆರ್ ಚಿದಾನಂದ ಗುರಿಕಾರ ನಂದ್ಯ, ವಿಧಾನ ಪರಿಷತ್ ಸದಸ್ಯೆರ್ ಐವನ್ ಡಿಸೋಜ, ಮೂಡ ಅಧ್ಯಕ್ಷೆರ್ ಸದಾಶಿವ ಉಳ್ಳಾಲ್, ಆತ್ಮಶಕ್ತಿ ವಿವಿಧೋದ್ದೇಶ ಸಹಕಾರಿ ಸಂಘದ ಅಧ್ಯಕ್ಷೆರ್ ಚಿತ್ತರಂಜನ್ ಬೋಳಾರ, ಕೆಪಿಸಿಸಿ ಕಾರ್ಯದರ್ಶಿ ಪದ್ಮರಾಜ್ ಆರ್. ಪೂಜಾರಿ, ಉದ್ಯಮಿ ಉಮೇಶ್ ಬೆಂಜನಪದವು, ಗ್ಯಾರಂಟಿ ಅನುಷ್ಠಾನ ಸಮಿತಿದ ಜಿಲ್ಲಾ ಉಪಾಧ್ಯಕ್ಷೆ ಸುರೇಖಾ ಚಂದ್ರಹಾಸ, ಸೋಮೇಶ್ವರ ಪುರಸಭಾ ಉಪಾಧ್ಯಕ್ಷೆರ್ ರವಿಶಂಕರ್, ಅಂಚೆ ಇಲಾಖೆ ನೌಕರರ ಸಂಘದ ಅಧ್ಯಕ್ಷೆರ್ ಶೈಲೇಶ್ ಕುಮಾರ್, ಎಂಸಿಸಿ ಬ್ಯಾಂಕ್ ಮಾಜಿ ಅಧ್ಯಕ್ಷೆರ್ ಫ್ರಾನ್ಸಿಸ್ ಕುಟಿನ್ಹ , ಉಷಾ ಪ್ರಭಾಕರ್ ಯೆಯ್ಯಾಡಿ, ಚಂದ್ರಹಾಸ ಕರ್ಕೇರ, ವಿಶ್ವಾಸ್ ದಾಸ್, ರಾಘವ ಆರ್ ಉಚ್ಚಿಲ್, ರಾಜಗೋಪಾಲ್ , ವೈ. ಬಿ.ಸುಂದರ್ ಇರಾ, ಮಾಧವಿ ಉಳ್ಳಾಲ, ಉಳ್ಳಾಲ ಶ್ರೀ ಚೀರುಂಭ ಭಗವತೀ ಕ್ಷೇತ್ರದ ಕಾರ್ನವೆರ್ ಗೋಪಾಲ ಅಶ್ವತ್ಥಡಿ, ಸಂಘದ ಉಪಾಧ್ಯಕ್ಷೆರ್ ಸುನಿಲ್ ಕುಮಾರ್ ಉಚ್ಚಿಲ್,  ನಿರ್ದೇಶಕೆರಾಯಿನ ಪ್ರಕಾಶ್ ಎಂ. ಉಳ್ಳಾಲ್,    ನಾಗಪ್ಪ ಅಡ್ಯಾರ್, ಸೂರಜ್ ಕುಮಾರ್, ಉಮೇಶ್ ಕುತ್ತಾರ್, ಮನೋಜ್, ಅಭಿಜಿತ್ ಬೆಳ್ಚಡ, ರಜನಿ ಕುಮಾರಿ, ಲತಾ ವಿಶ್ವನಾಥ್ ಬೊಕ್ಕ ಹರಿಣಾಕ್ಷಿ ಮೊಕುಲು ಮಾತ ಇತ್ತೆರ್.

ತೀಯಾ ಸೇವಾ ಸಹಕಾರ ಸಂಘದ ಅಧ್ಯಕ್ಷೆರ್ ಎಂ. ದಿನೇಶ್ ಕುಂಪಲ ಸ್ವಾಗತ ಮಲ್ತ್‌ದ್ ಪ್ರಾಸ್ತಾವಿಕ ಪಾತೆರ ಪಂಡೆರ್. ಸಿಇಒ ಯಶವಂತಿ ಜೆ. ಉಚ್ವಿಲ್ ವಾರ್ಷಿಕ ವರದಿ ಓದುದು, ಸನ್ಮಾನಿತೆರೆನ ಪೊಲಬು ಮಲ್ತ್ ಕೊರ್ದು ಅಕೇರಿಗ್ ಸೊಲ್ಮೆ ಸಂದಾಯೆರ್.
ಪತ್ರಕರ್ತೆರ್, ಸಂಘದ ನಿರ್ದೇಶಕೆರ್ ಸತೀಶ್ ಕುಮಾರ್ ಪುಂಡಿಕಾಯಿ ಲೇಸ್ ಸುದಾರಿಕೆ ಮಲ್ತೆರ್.

ಬಂಟರ ಯಾನೆ ನಾಡವರ ಮಾತೃಸಂಘ: ವಿದ್ಯಾರ್ಥಿ ವೇತನಗ್ ಅರ್ಜಿ ಆಹ್ವಾನ

ಕುಡ್ಲ : ಬಂಟರ ಯಾನೆ ನಾಡವರ ಮಾತೃಸಂಘ ಮಂಗಳೂರು ತಾಲೂಕು ಸಮಿತಿ ವತಿರ್ದ್ ಎಜುಕೇಷನ್ ಎಕ್ಸಲೆನ್ಸಿ ಅವಾರ್ಡ್ ಪುರಸ್ಕಾರಗ್ ಅರ್ಜಿಗ್ ಲೆಪ್ಪು ಕೊರ್ತೆರ್.
ಮಂಗಳೂರು ತಾಲೂಕು ವ್ಯಾಪ್ತಿಡ್ ವಾಸ ಉಪ್ಪುನ ಬಂಟ ಸಮಾಜದ 2025-26ನೇ ವರ್ಷಡ್ ಎಸ್.ಎಸ್.ಎಲ್.ಸಿ ಬೊಕ್ಕ ದ್ವಿತೀಯ ಪಿ.ಯು.ಸಿಡ್ ಶೇ. 95 ಬೊಕ್ಕ ಅಯಿರ್ದ್ ಎಚ್ಚ ಮಾರ್ಕ್ಸ್ ದೈದಿನ ಕಲ್ಪಾರ್ತಿಲು ಅರ್ಜಿ ಪಾಡೊಲಿ.
ಸ್ವಯಂ ಲಿಖಿತ ಅರ್ಜಿದ ಒಟ್ಟುಗು ಆಧಾರ್ ಕಾರ್ಡ್ ಜೆರಾಕ್ಸ್ , ಅಂಕಪಟ್ಟಿದ ಜೆರಾಕ್ಸ್ ಬೊಕ್ಕ ಒಂಜಿ ಫೊಟೊನ್ ತಾ. 10.09.2026ತ್ತ ಉಲಯಿ ಬಂಟರ ಯಾನೆ ನಾಡವರ ಮಾತೃಸಂಘದ ಕಚೇರಿ, ಅಮೃತೋತ್ಸವ ಕಟ್ಟಡ, ಒಂದನೇ ಮಹಡಿ, ಬಂಟ್ಸ್ ಹಾಸ್ಟೆಲ್ ಮಂಗಳೂರು ಇಡೆಗ್ ಮುಟ್ಟಾವೊಡು. ಎಚ್ಚದ ಮಾಹಿತಿಗಾದ್ ಫೋನ್ ಮಲ್ಪೊಲಿ (9480015895, 9480400994) ಪಂದ್ ಸಂಘದ ಪ್ರಕಟಣೆ ತೆರಿಪಾದ್ಂಡ್.

ಬಂಟ ಸಮಾಜ ಬಿಪಿಎಲ್ ಕಾಡ್೯ರ್ದ್ ಮುಕ್ತಿ ಪಡೆಯೊಡು: ಬರೋಡ ಶಶಿಧರ ಶೆಟ್ಟಿ

ಜಾಗತಿಕ ಬಂಟರ ಸಂಘಗಳ ಒಕ್ಕೂಟದ ಆಡಳಿತ ಮಂಡಳಿ ಸಭೆ

ಕುಡ್ಲ : “ಬಡಪತ್ತ್‌ಡ್ ಉಪ್ಪುನ ಕೆಲವು ಬಂಟ ಕುಟುಂಬಲೆನ್ ಮಿತ್ತ್ ಕನವರೆ ಪ್ರಯತ್ನ ಆವೊಡು. ಪ್ರತಿ ಬಂಟ ಕುಟುಂಬಲ ಬಿಪಿಎಲ್ ಕಾಡ್೯ರ್ದ್ ಮುಕ್ತ ಆವೊಡು. ಆ ಛಲ ಇತ್ತ್ಂಡ ನಮಕ್ಕ್ ಸಮಾಜೊಡು ಉನ್ನತ ಸ್ಥಾನ ಪಡೆಯರೆ ಸಾಧ್ಯ” ಪಂದ್ ಜಾಗತಿಕ ಬಂಟರ ಸಂಘಗಳ ಒಕ್ಕೂಟದ ವಿಶೇಷ ಮಹಾ ನಿರ್ದೇಶಕೆರ್, ಬರೋಡ ಶಶಿ ಕ್ಯಾಟರಿಂಗ್‌ದ ಧಣಿ ಶಶಿಧರ ಶೆಟ್ಟಿ ಬರೋಡ ಪಂಡೆರ್.
ಬಂಟ್ಸ್ ಹಾಸ್ಟೆಲ್ ಅಮೃತೋತ್ಸವ ಕಟ್ವಾಣದ ಸಭಾಂಗಣಡ್ ನಡತಿನ ಜಾಗತಿಕ ಬಂಟರ ಸಂಘಗಳ ಒಕ್ಕೂಟದ ಆಡಳಿತ ಮಂಡಳಿ ಸಭೆನ್ ಶಶಿಧರ ಶೆಟ್ಟಿ ಬರೋಡ ಮೇರ್ ಉದಿಪನ ಮಲ್ತ್ ಪಾತೆರಿಯೆರ್.
ಜಾಗತಿಕ ಬಂಟರ ಸಂಘಗಳ ಒಕ್ಕೂಟ ಕರಿನ ಏಳೆಡ್ಮ ವರ್ಷರ್ದ್ ಬಡವೆರ್‌ನ ಕಣ್ಣೀರು ಒರೆಸುನ ಕೆಲಸ ಮಲ್ತೊಂದುಂಡು. ಐಕಳ ಹರೀಶ್ ಶೆಟ್ಟಿ ಮೇರ್ ಒಕ್ಕೂಟದ ಅಧ್ಯಕ್ಷೆರಾದ್ 25 ಕೋಟಿ ರೂಪಾಯಿರ್ದ್‌ಲ ಎಚ್ವಿಗೆ ಪರಿಹಾರ ಧನ ಪಟ್‌ದೆರ್. ಪ್ರಸಕ್ತ ಮುಲ್ಕಿಡ್ ಕನ್ಯಾನ ಸದಾಶಿವ ಶೆಟ್ಟಿ ಸಂಕೀರ್ಣಡ್ ನಿರ್ಮಾಣ ಆಪಿನ ಸಭಾಭವನದ ಬೇಲೆ ಬಿರ್ಸ್‌ಡ್ ಸಾಗೊಂದಿತ್ತ್‌ದ್ ಅಯಿತ ಲೋಕಾರ್ಪಣೆಗ್ ನಮ ಮಾತ ಸಾಕ್ಷಿ ಆವೊಡು” ಪಂದ್ ಪಂಡೆರ್.

ನಮ ಎಡ್ಡೆ ಬೇಲೆ ಮಲ್ಪುನಗ ಪರ ವಿರೋಧ ಚರ್ಚೆ ಸಹಜ. ಮಾತೆರ್ಲ ಸಮಾಜದ ಅಭಿವೃದ್ದಿಗಾದ್ ಕೆಲಸ ಮಲ್ಪೊಡು ಪಂಡೆರ್.
ಒಕ್ಕೂಟದ ನಿರ್ದೇಶಕೆರ್ ಮುನಿಯಾಲು ಉದಯಕುಮಾರ್ ಶೆಟ್ಟಿ ಎಡ್ಡೆಪ್ಪುದ ಪಾತೆರ ಪಂಡೆರ್.
ಈ ಪೊರ್ತುಡು ಉದ್ಯಮಿ, ಒಕ್ಕೂಟದ ನಿರ್ದೇಶಕೆ ಹುಬ್ಬಳ್ಳಿ- ಧಾರಾವಾಡ ಬಂಟರ ಸಂಘದ ಅಧ್ಯಕ್ಷೆರ್ ರಾಜೇಂದ್ರ ವಿ ಶೆಟ್ಟಿ ಮೆರೆನ್ ಸನ್ಮಾನ ಮಲ್ತೆರ್.
ಲೇಸ್‌ದ ಅಧ್ಯಕ್ಷತೆನ್ ಒಕ್ಕೂಟದ ಅಧ್ಯಕ್ಷೆರ್ ಐಕಳ ಹರೀಶ್ ಶೆಟ್ಟಿ ವಹಿಸ್‌ದಿತ್ತೆರ್.
ಪೋಷಕ ಸದಸ್ಯ ನವೀನ್ ಚಂದ್ರ ಶೆಟ್ಟಿ ಪಡುಬಿದ್ರೆ, ಒಕ್ಕೂಟದ ಉಪಾಧ್ಯಕ್ಷೆ ಕರ್ನಿರೆ ವಿಶ್ವನಾಥ ಶೆಟ್ಟಿ, ನಿರ್ದೇಶಕೆರಾಯಿನ ಶಶಿಧರ ಶೆಟ್ಟಿ ಇನ್ನಂಜೆ, ಇಂಜಿನಿಯರ್ ಗೋಪಾಲ ಭಟ್, ಸುಧಾಕರ ಶೆಟ್ಟಿ ಉತ್ರಿಂಜೆ ಬೆಹರಿನ್, ಸತೀಶ್ಚಂದ್ರ ಶೆಟ್ಟಿ ಅಕ್ಕುಂಜೆ, ಒಕ್ಕೂಟದ ಕೋಶಾಧಿಕಾರಿ ಉಳ್ತೂರು ಮೋಹನ್ ದಾಸ್ ಶೆಟ್ಟಿ, ಯುವ ವಿಭಾಗದ ಸಂಚಾಲಕ ಗಿರೀಶ್ ಶೆಟ್ಟಿ ತೆಳ್ಳಾರ್, ಸಂಚಾಲಕ ಬಾಲಕೃಷ್ಣ ರೈ ಕೊಲ್ಲಾಡಿ ಮೊಕುಲು ಮಾತ ಇತ್ತೆರ್.
ಸಭೆಟ್ಟ್ ಹಿರಿಯಡ್ಕ ಬಂಟರ ಸಂಘದ ನೂತನ ಅಧ್ಯಕ್ಷೆರ್ ರವೀಂದ್ರನಾಥ ಹೆಗ್ಡೆ, ಹೆಬ್ರಿ ಬಂಟರ ಸಂಘದ ಅಧ್ಯಕ್ಷೆರ್ ಹರ್ಷ ಶೆಟ್ಟಿ, ಕುಂದಾಪುರ ತಾಲೂಕು ಯುವ ಬಂಟರ ಸಂಘದ ಅಧ್ಯಕ್ಷೆರ್ ಡಾ ಚೇತನ್ ಶೆಟ್ಟಿ ಕೋವಾಡಿ, ಮೂಡಬಿದ್ರೆ ಯುವ ಬಂಟರ ಸಂಘದ ಅಧ್ಯಕ್ಷೆರ್ ಸಂದೀಪ್ ಶೆಟ್ಟಿ, ಸುರತ್ಕಲ್ ಬಂಟರ ಸಂಘದ ಯುವ ಸಮಿತಿದ ಸಂಚಾಲಕೆ ಶಿಶಿರ್ ಶೆಟ್ಟಿ ಮೊಕ್ಲೆಗ್ ಮಾನಾದಿಗೆ ನಡತ್ಂಡ್.
ಐಕಳ ಹರೀಶ್ ಶೆಟ್ಟಿ ಸ್ವಾಗತ ಮಲ್ತೆರ್. ಗಿರೀಶ್ ಶೆಟ್ಟಿ ಸೊಲ್ಮೆ ಸಂದಾಯೆರ್. ಅನೂಪ್ ಶೆಟ್ಟಿ ಸುರತ್ಕಲ್ ಪ್ರಾರ್ಥನೆ ಮಲ್ತೆರ್. ಡಾ ಪ್ರಿಯಾ ಶೆಟ್ಟಿ, ಡಾ ಮಂಜುಳಾ ಶೆಟ್ಟಿ ಕಾರ್ಯಕ್ರಮ ನಿರ್ವಹಣೆ ಮಲ್ತೆರ್.

ಅಧಿಕಾರಿಲೆನ ನಿರ್ಲಕ್ಷ್ಯರ್ದ್ ಮುಚ್ಚಿದ್ ಪೋಯಿನ ಕಾವೂರು-ಜ್ಯೋತಿನಗರ ಬಸ್ ಸ್ಯಾಂಡ್; ಸ್ವಚ್ಛ ಮಲ್ತಿನ ಸಮಾಜಮುಖಿ ಜವನೆರೆನ ಕೂಟ

ಸಾರ್ವಜನಿಕೆರೆನ ಲೆಪ್ಪೋಗು ಒಟ್ಟಾದ್ ಕೈ ಜೋಡಿಸಾಯಿನ “ಮೀಡಿಯಾ ಮನಸುಲು”!

ಕುಡ್ಲ: ಊರುದಕುಲು ನೂದೆರ್ದ್ ಎಚ್ಚ ಕನ ಪತ್ತೊಂದು, ದಾರಿದೀಪ ಆವೊಡಾಯಿನ ಆ ಬಸ್ ಸ್ಯಾಂಡ್ ಕರಿನ ಕೆಲವು ಸಮಯರ್ದಿಂಚ ನಗರ ಪಾಲಿಕೆದ, ಕೈತಲ್ದ ಜನಪ್ರತಿನಿಧಿಲೆನ ನಿರ್ಲಕ್ಷ್ಯದ ಕಥೆನೇ ಪನೊಂದು ಉಂಡು! ಕುಡ್ಲ ಮಹಾನಗರ ಪಾಲಿಕೆ ವ್ಯಾಪ್ತಿದ ಕಾವೂರು ಜ್ಯೋತಿನಗರದ ಬಸ್ ಸ್ಯಾಂಡ್.

ನಿರ್ವಹಣೆ ಇಜ್ಜಂದೆ ಇಪ್ಪುನ ಬಸ್ ಸ್ಯಾಂಡ್ ಅಕ್ಷರಶಃ ಶಾಪಗ್ರಸ್ಥ ಆದಿತ್ತ್ಂಡ್. ಬಸ್ ಸ್ಯಾಂಡ್ ದ ಸುತ್ತಮುತ್ತ ಬುಲೆದ್ ಉಂತಿನ ಪಂತಿ ಬೊಕ್ಕ ದೈ, ಮರಕುಲು, ಉಲಯಿ ಕಾರ್ ದೀಯೆರೆ ಅವಂದೆ ವಾಸನೆ ಬರೊಂದು ಇತ್ತ್ಂಡ್. ಕೈತಲ್ದ ಫುಟ್ ಪಾತ್ ಡ್ ಇಪ್ಪುನ ದೈ ಮರಕುಲು, ಪ್ರಯಾಣಿಕೆರ್ ಬಸ್ಸ್ ಗ್ ಕಾಪೆರೆ ನಿರಲ್ ಕೊರೊಡಾಯಿನ ಜಾಗೆ, ಬಯ್ಯ ಕತ್ತಲೆ ಆನಗ ಕುಡುಕೆರ್ ಬೊಕ್ಕ ಅಲೆಮಾರಿಲೆನ ಅಡ್ಡ ಆತ್ಂಡ್. ಬಸ್ಸ್ ಗಾದ್ ಉಂತೊಡಾಯಿನ ಹಿರಿಯೆರ್, ಪೊಣ್ಣು ಜೋಕುಲು ಬೊಕ್ಕ ಶಾಲೆದ ಜೋಕುಲು ಪೋಡಿಗೆಡೇ ದೊಂಬು-ಬರ್ಸಡ್ ಪಿದಯಿ ಉಂತುನ ಪರಿಸ್ಥಿತಿ ನಿರ್ಮಾಣ ಆದಿತ್ತ್ಂಡ್.

ಸಾರ್ವಜನಿಕೆರೆನ ಲೆಪ್ಪೊಗು ಒಗ್ಗಟ್ಟಾದ್ “ಮೀಡಿಯಾ ಮನಸುಲು”! ಅಧೋಗತಿ ಆಯಿನ ಬಸ್ ಸ್ಯಾಂಡ್ ನ್ ತೂಯಿನ ಕೈತಲ್ದ ಸಾರ್ವಜನಿಕೆರೊರಿ ಸಮಸ್ಯೆನ್ ಪರಿಹಾರ ಮಲ್ಪೆರೆ ಕುಡ್ಲದ “ಮೀಡಿಯಾ ಮನಸುಲು” ಕೂಟನ್ ಸಂಪರ್ಕ ಮಲ್ತೆರ್. ಬಸ್ ಸ್ಯಾಂಡ್ ಗ್ ಭೇಟಿ ಕೊರ್ದು ಅಲ್ಪದ ಸ್ಥಿತಿನ್ ತೆರಿವೊನ್ನ ಕೂಟ ಕೂಡ್ಲೆ ಕಾವೂರು ಜ್ಯೋತಿನಗರಗ್ ಬತ್ತೆರ್.

ಕೈಟ್ಟ್ ಮೈಪು, ಪಂತಿ ದೆಪ್ಪುನ ಮಿಷನ್ ಪತ್ತೊಂದು ಬತ್ತಿನ ಕೂಟದ ಸದಸ್ಯೆರ್, ಸ್ವತಃ ತನ್ನ ಕೈರ್ದೆ ನಿಲ್ದಾಣದ ಪಂತಿ ದೆತ್ತ್ ದ್ ಸ್ವಚ್ಛ ಮಲ್ತೆರ್.‌ ದೈ ಮರರ್ದ್ ಮುಚ್ಚಿದ್ ಪೋಯಿನ ಬಸ್ ಸ್ಯಾಂಡ್ ಪರಿಸರನ್ ಸುಮಾರ್ ರಡ್ಡರೇ ಗಂಟೆಲೆನ ಕಾಲ ಸ್ವಚ್ಛ ಮಲ್ತ್ ದ್ ಪೊರ್ಲು ಮಲ್ತ್ ದ್ ಸಾರ್ವಜನಿಕೆರ್ ಬಳಸುಲೆಕ್ಕ ಮಲ್ತೆರ್.

ಅನಾಥ ಆಯಿನ ಬಸ್ ಸ್ಯಾಂಡ್ ಗ್ ಪೊಸ ಜೀವ ಕೊರ್ನ ಈ ಸೇವಾ ಕಾರ್ಯಡ್ “ಮೀಡಿಯಾ ಮನಸುಲು” ಕೂಟದ ಪ್ರಮುಖೆರ್ ಶಶಿ ಬೆಳ್ಳಾಯರ್, ಬಾಲಕೃಷ್ಣ ಶೆಟ್ಟಿ, ಸಂದೇಶ್ ಶೆಟ್ಟಿ, ಶಿವು ಕುಲಾಲ್, ಗಿರೀಶ್ ಮಣೇಲ್ ಬೊಕ್ಕ ಅನೂಪ್ ಸೂರಿಂಜೆ ಮೊಕುಲು ಎಪೊಲ ಪಾಲ್ ಪಡೆದ್ ಜವನೆರೆನ ಸಮುದಾಯಗ್ ಮಾದರಿ ಆತೆರ್.

ದಪ್ಪ ಚರ್ಮದ ಅಧಿಕಾರಿಲೆನ ನಿರ್ಲಕ್ಷ್ಯರ್ದ್ ಈ ಜಾಗಡ್ ಇನಿ ಸ್ವಚ್ಛ ಆಯಿನ ಬಸ್ ಸ್ಯಾಂಡ್ ನ್ ತೂದು ಕೈತಲ್ದಕುಲು ಬೊಕ್ಕ ಬಸ್ ಪ್ರಯಾಣಿಕೆರ್ ಸಮಾಧಾನ ಆತೆರ್. ನಮ್ಮ ಕಷ್ಟಗ್ ಸ್ಪಂದಿಸಾಯಿನ, ಸ್ವಾರ್ಥ ಇಜ್ಜಂದೆ ಸೇವೆ ಕೊರ್ನ “ಮೀಡಿಯಾ ಮನಸುಲು” ಕೂಟಗ್ ಉಡಲ್ ದಿಂಜಿನ ಕೃತಜ್ಞತೆನ್ ಸಂದಾದೆರ್. ಕೈತಲ್ದ ಮಾತೃಶ್ರೀ ಹೋಟೆಲ್ ದ ಮಾಲಕೆರ್ ಯತಿರಾಜ್ ಶೆಟ್ಟಿ ಮೇರ್ ಸ್ವಚ್ಛತಾ ಕಾರ್ಯಗ್ ನೀರ್ ದ ವ್ಯವಸ್ಥೆ ಮಲ್ಪುನ ಮುಕೇನ ಸಕಾಯ ಆತೆರ್.

ಜವಾಬ್ದಾರಿ ಇಪ್ಪುನ ಆಡಳಿತ ವ್ಯವಸ್ಥೆ ಸಮಸ್ಯೆನ್ ತೂದು ತೂವಂದಿಲೆಕ್ಕ ಕಣ್ಣ್ ಮುಚ್ಚಿನಗ, ಸಮಾಜಮುಖಿ ಜವನೆರೆನ ಕೂಟ ಒಗ್ಗಟ್ಟಾನಗ ಎಂಚ ಬದಲಾವಣೆ ಕನಪುಂಡು ಪನ್ಪಿನೆಕ್ಕ್ ಈ ಲೇಸ್ ಸಾಕ್ಷಿ ಆತ್ಂಡ್.

ಪುಗರ್ತೆದ ಕ್ರೀಡಾ ಬರವುಗಾರೆ ಜಗದೀಶ್ಚಂದ್ರ ಅಂಚನ್‌‌ರೆಗ್ ‘ಬಸವಶ್ರೀ’ ರಾಜ್ಯ ಪ್ರಶಸ್ತಿ

ಕುಡ್ಲ : ಸೂಟರ್‌ಪೇಟೆ ನಿವಾಸಿ, ಪುಗರ್ತೆದ ಕ್ರೀಡಾ ಅಂಕಣ ಬರವುಗಾರೆ ಎಸ್. ಜಗದೀಶ್ಚಂದ್ರ ಅಂಚನ್ ಮೇರ್ ಪ್ರತಿಷ್ಠಿತ ‘ಬಸವಶ್ರೀ’ ರಾಜ್ಯ ಪ್ರಶಸ್ತಿಗ್ ಆಯ್ಕೆ ಆತೆರ್.
ಬೆಂಗಳೂರುದ ಶ್ರೀ ಜ್ಞಾನ ಮಂದಾರ ಎಜುಕೇಶನಲ್ ಮತ್ತು ಸಾಂಸ್ಕೃತಿಕ ಟ್ರಸ್ಟ್ (ರಿ) ತನ್ನ ಬೊಳ್ಳಿ ಪರ್ಬದ ಸಂಭ್ರಮದ ಅಂಗವಾದ್ ಈ ಪ್ರಶಸ್ತಿನ್ ಪ್ರಕಟ ನಲ್ತ್‌ದ್, ಕನ್ನಡ ನಾಡ್‌ಗ್ ಮೇರ್ ಕೊರ್ತಿನ ಅನುಪಮ ಕ್ರೀಡಾ ಸಾಹಿತ್ಯ ಸೇವೆನ್ ಗುರುತಿಸಾದ್ ಈ ಗೌರವಗ್ ಆಯ್ಕೆ ಮಲ್ದೆರ್.
ಕರಿನ 32 ವರ್ಷರ್ದ್ ಮಾಧ್ಯಮ ಕ್ಷೇತ್ರಡ್ ಸಕ್ರಿಯೆರಾದುಪ್ಪುನ ಮೇರ್, ಜಿಲ್ಲೆ, ರಾಜ್ಯ ಬೊಕ್ಕ ಅಂತರರಾಷ್ಟ್ರೀಯ ಮಟ್ಟದ ದಿನಪತ್ರಿಕೆ, ವಾರಪತ್ರಿಕೆ ಅಙಚಡನೆ ಮಾಸಪತ್ರಿಕೆಲೆಡ್ 4,500ರ್ದ್‌ಲ ಎಚ್ಚ ಕ್ರೀಡಾ ಲೇಖನ ಬೊಕ್ಕ ಅಂಕಣಲೆನ್ ಬರೆತೆರ್. ಇಂಚೊಗು ಮೇರ್ ‘ತ್ಯಾಗಮಯಿ ಮೋಹಳ್ಳಿ’ ಪನ್ಪಿನ ಪುಸ್ತಕ ಬರೆದ್ ಲೋಕಾರ್ಪಣೆ ಮಲ್ದೆರ್.
ಪ್ರಶಸ್ತಿ ಪ್ರದಾನ ಸಮಾರಂಭ ಆಗಸ್ಟ್ 29 ಬೆಂಗಳೂರುದ ಜೆಎಸ್‌ಎಸ್ ಸಭಾಂಗಣಡ್ ನಡಪರೆ ಉಂಡು. ಶ್ರೀ ಜ್ಞಾನ ಮಂದಾರ ಎಜುಕೇಶನಲ್ , ಸಾಂಸ್ಕೃತಿಕ ಟ್ರಸ್ಟ್‌ ಬೊಳ್ಳಿ ಪರ್ಬದ ಮುಗಿತಲದ ಲೇಸ್‌ದ ವೇದಿಕೆಡ್ ಜಗದೀಶ್ಚಂದ್ರ ಅಂಚನ್ ಮೆರೆಗ ‘ಬಸವಶ್ರೀ’ ರಾಜ್ಯ ಪ್ರಶಸ್ತಿ ಕೊರ್ದು ಗೌರವ ಮಲ್ಪರೆ ಉಂಡು ಪಂದ್ ಟ್ರಸ್ಟ್‌ದ ಕಾರ್ಯದರ್ಶಿ ಎಲ್. ಸೋಮಶೇಖರ್ ತೆರಿಪಾದೆರ್.

ಸಾಂಬಾರ್‌ಡ್ ಎಕ್ಕಲೆ ; ತೊಕ್ಕೊಟ್ಟುದ ಹೋಟೆಲ್‌ಗ್ ರೈಡ್

ಉಳ್ಳಾಲ : ಸಾಂಬಾರ್‌ಡ್ ಎಕ್ಕಲೆ ಪತ್ತೆ ಆಯಿನೆತ್ತ ಬಗೆಟ್ಟ್ ಗ್ರಾಹಕೆರ್ ದೂರು ಕೊರ್ತಿನ ಹಿನ್ನೆಲೆಡ್ ಉಳ್ಳಾಲ ತೊಕ್ಕೊಟ್ಟುದ ಹೋಟೆಲ್‌ ಒಂಜೆಕ್ಕ್ ಆಹಾರ ಇಲಾಖೆದ ಅಧಿಕಾರಿ ಡಾ.ಪ್ರವೀಣ್ ಕುಮಾರ್ ಮೆರೆನ ತಂಡ ರೈಡ್ ಮಲ್ದ್ಂಡ್.
“ರೈಡ್ ಮಲ್ಪುನ ಪೊರ್ತುಡು ಹೋಟೆಲ್‌ದ ಅಟಿಲ್ದ ಕೋಣೆಡ್ ಸ್ವಚ್ಚತೆ ಇಜ್ಜಾಂದಿನವು ಬೊಕ್ಕ ಆಹಾರ ವಸ್ತುಲೆನ್ ಸರಿಯಾದ್ ಜೋಡಿಸಾವಂದಿನವು ಪತ್ತೆ ಆತ್ಂಡ್” ಪಂದ್ ಡಾ. ಪ್ರವೀಣ್ ಮಾಧ್ಯಮದಕ್ಕೆಗ್ ತೆರಿಪಾದೆರ್.

You Missed