ಕಿಲ್ಪಾಡಿ ಶ್ರೀ ಕೋರ್ದಬ್ಬು ದೈವಸ್ಥಾನಡ್ ಕಂಡಿನ ನಾಲ್ ಜನ ಅರೆಸ್ಟ್

ಮುಲ್ಕಿ: ಪೊಲೀಸ್ ಠಾಣಾ ವ್ಯಾಪ್ತಿದ ಕಿಲ್ಪಾಡಿ ಶ್ರೀ ಕೋರ್ದಬ್ಬು ದೈವಸ್ಥಾನಡ್ ಲಕ್ಷಾಂತರ ರೂಪಾಯಿದ ಸೊತ್ತು ಕಂಡಿನ ಕೇಸ್‌ಡ್ ಮುಲ್ಕಿ ಪೊಲೀಸೆರ್ ನಾಲ್ ಜನ ಆರೋಪಿಲೆನ್ ಅರೆಸ್ಟ್ ಮಲ್ತ್‌ದ್ ನನ ರಡ್ಡ್ ಜನ ಆರೋಪಿಲೆನ್ ನಾಡೊಂದುಲ್ಲೆರ್.
ಪಡ್ಡೆದ್ರ ಕಂಚಿನಡ್ಕ ನಿವಾಸಿ ಜಾಹಿದ್ ಸಿನಾನ್ (26), ಕಾರ್ಲ ನಿಟ್ಟೆ ನಿವಾಸಿ, ಇತ್ತೆ ಕಾರ್ನಾಡ್‌ಡ್ ವಾಸ ಉಪ್ಪುನ ಯಾಸಿನ್(36), ದಾವಣಗೆರೆತ್ತ ಅಬ್ದುಲ್ ಜುಮಾಲ್ (24), ಮಹಮ್ಮದ್ ಆಫ್ರಿದ್ (24) ಮೊಕ್ಲೆನ್ ಪೊಲೀಸೆರ್ ಅರೆಸ್ಟ್ ಮಲ್ದೆರ್.
ಆರೋಪಿಲೆನ್ ಸ್ಥಳ ಮಹಜರ್‌ಗ್ ದೈವಸ್ಥಾನಗ್ ಲೆತೊಂದು ಬರ್ಪೆರ್ ಪಂದ್ ಗೊತ್ತಾದ್ ಊರುದ ಜನಕುಲು ಐತಾರ ರಾತ್ರೆ ಭಾರಿ ಸಂಖ್ಯೆಡ್ ಸೇರ್ದಿತ್ತೆರ್. ಆಂಡ ಪೊಲೀಸೆರ್ ಸೋಮವಾರ ಪುಲ್ಯಕೊಲೊಗು ಲೆತೊಂದು ಬತ್ತ್‌ದ್ ಮಹಜರ್ ಮಲ್ದೆರ್ ಪಂದ್ ತೆರಿದ್ ಬೈದ್ಂಡ್.