ಕುಡ್ಲದ ಸುದ್ದಿ | Mangalore News

ಬಲೆಕ್ಕ್‌ ಬೂರ್ಂಡ್ ಮಾಮಲ್ಲ ಪಿಲಿ ತೊರಕೆ..!‌

ಉಳ್ಳಾಲ: ಭಾರಿ ಮಲ್ಲ ಗಾತ್ರದ ಪಿಲಿ ತೊರಕೆ ಮೀನ್ ಸೋಮೇಶ್ವರ ಉಚ್ಚಿಲ ಮೀನುಗಾರೆರ್ನ ಬಲೆಕ್ಕ್‌ ಬೂರ್ದುಂಡು. ಕಡಲ್ದ ಕರೆಟ್ಟ್ ಬೀಸಿನ ಬಲೆಕ್ಕ್ ಅಂದಾಜಿ 75 ಕೆ.ಜಿ ದ ಈ ಮೀನ್‌ ಬೂರ್ದುಂಡ್.

ಉಚ್ಚಿಲ ಪೆರಿಬೈಲ್ ನಿವಾಸಿ ನಾಡದೋಣಿ ಮೀನುಗಾರೆರಾಯಿನ ಶೈಲೇಶ್ ಉಚ್ಚಿಲ, ಚಂದ್ರ ಉಚ್ಚಿಲ, ಅಝೀಝ್, ಕಲ್ಪೇಶ್ ಬೊಕ್ಕ ಶಂಭು ನ್ಯೂ ಉಚ್ಚಿಲ ಮೊಕುಲ್ ತೊರಕೆನ್ ಪತ್ ದೆರ್. ಈ ವರ್ಷದ ತನ್ನ ಮೀನುಗಾರಿಕೆಡ್‌ ತಿಕ್ಕಿನ ಮಲ್ಲ ಗಾತ್ರದ ಮೀನ್‌ ಉಂದು ಆತ್‌ಂಡ್‌ ಪಂದ್‌ ಅಕುಲು ಪಂತೆರ್.

ಎನ್.ಪಿ.ಸಿ.ಐ ಲಿಂಕ್ ಮಲ್ಪೆರೆ ಮನವಿ

ಕುಡ್ಲ: ಸಾಮಾಜಿಕ ಭದ್ರತಾ ಯೋಜನೆ ಪಿಂಚಣಿಗ್ ಆಧಾರ್ ಆಧಾರೊಡು ಸೀದಾ ಪನವು ಸಂದಾಯ ಯೋಜನೆ ಕನಯೆರೆ ತೀರ್ಮಾನ ಮಲ್ತ್‌ದ್, ಈ ಯೋಜನೆನ್ ಕಾರ್ಯಕರ್ತ ಮಲ್ಪೆರೆ ಪಿಂಚಣಿ ಫಲಾನುಭವಿಲೆನ ಬ್ಯಾಂಕ್/ಅಂಚೆ ಖಾತೆಗ್ ಎನ್.ಪಿ.ಸಿ.ಐ ಲಿಂಕ್ ಮಲ್ಪೊಡು.
‌
ಅಂಚಾದ್ ಸಾಮಾಜಿಕ ಭದ್ರತಾ ಯೋಜನೆಯಡಿ ಪಿಂಚಣಿ ಪಡೆಯೊಂದು ಇಪ್ಪುನ ಫಲಾನುಭವಿಲು ತನ್ನ ಆಧಾರ್ ಬೊಕ್ಕ ಬ್ಯಾಂಕ್/ಅಂಚೆ ಖಾತೆದೊಟ್ಟಿಗೆ ಸಂಬಂಧಪಟ್ಟಿನ ಬ್ಯಾಂಕ್/ಅಂಚೆ ಕಚೇರಿಗ್‌ ಪೋದು ಸೆ.30 ದ ಉಲಾಯಿ ಎನ್.ಪಿ.ಸಿ.ಐ ಮಲ್ಪುನಂಚ ಜಿಲ್ಲಾಧಿಕಾರಿ ಕಚೇರಿ ಪ್ರಕಟಣೆಡ್‌ ತೆರಿಪಾದುಂಡ್.

ಎಪಿಎಲ್‌ ಕಾರ್ಡ್‌ದಕ್ಲೆಗ್ ಅರಿ ಇಜ್ಜಿ, ಉಂದು ಕಾಂಗ್ರೆಸ್ ಸರ್ಕಾರದ ಅರ್ಥ ಇಜ್ಜಂದಿನ ನೀತಿ: ವೇದವ್ಯಾಸ್ ಕಾಮತ್

ಸಾರ್ವಜನಿಕೆರ್ನ ಪಡಿತರ ವ್ಯವಸ್ಥೆಡ್ ಕರಿನ ನಾಲೈನ್ ತಿಂಗೊಲುರ್ದ್ ಅವಿಭಜಿತ ಜಿಲ್ಲೆಡ್ ಎಪಿಎಲ್‌ ಕಾರ್ಡ್‌ದಕ್ಲೆಗ್ ಅರಿ ತಿಕ್ಕೊಂದಿಜ್ಜಿ ಪನ್ಪುನ ದೂರು ಸಾರ್ವಜನಿಕ ವಲಯರ್ದ್ ಕೇಂಡ್ ದ್ ಬರೊಂದುಂಡು. ಈ ಅವ್ಯವಸ್ಥೆಗ್ ನೇರವಾದ್ ರಾಜ್ಯ ಸರ್ಕಾರದ ಅರ್ಥ ಇಜ್ಜಂದಿನ ನೀತಿ ಕಾರಣ ಪಂದ್ ಶಾಸಕೆರ್ ವೇದವ್ಯಾಸ್ ಕಾಮತ್ ಪಂತೆರ್.

ಬಿಪಿಎಲ್‌ ಬೊಕ್ಕ ಅಂತ್ಯೋದಯ ಕಾರ್ಡ್‌ ದಕ್ಲೆಗ್ ಕೇಂದ್ರರ್ದ್ ಧರ್ಮಾರ್ಥ ಅರಿ ಪೂರೈಕೆ ಆವೊಂದುಂಡು. ಆಂಡ ಎಪಿಎಲ್‌ ಕಾರ್ಡ್‌ದಾರೆರೆಗ್ ತಿಕ್ಕೊಡಾಯಿನ ಅರಿಕ್ಕ್ ರಾಜ್ಯ ಸರ್ಕಾರ ಕತ್ತೆರಿ ಪಾಡ್ದ್ಂಡ್ . ಬಿಪಿಎಲ್‌ ಬೊಕ್ಕ ಅಂತ್ಯೋದಯ ಕಾರ್ಡ್‌ ದಕ್ಲೆಗ್ ಧರ್ಮಾರ್ಥ ಪಡಿತರ ಕೊರ್ಪಿಲೆಕ ಎಪಿಎಲ್‌ ಕಾರ್ಡ್‌ದಕ್ಲೆಗ್ ಲ ಈತೇ ರೇಟ್ ಡ್ ಈತೇ ಪ್ರಮಾಣದ ಅರಿನ್ ಈ ದುಂಬುಲ ಪ್ರತೀ ತಿಂಗೊಲು ವಿತರಣೆ ಮಲ್ತೊಂದು ಇತ್ತ್ಂಡ್. ಆಂಡ ಕರಿನ ಕೆಲವು ತಿಂಗೊಲುರ್ದ್ ದಕ್ಷಿಣಕನ್ನಡ ಬೊಕ್ಕ ಒಡಿಪು ಜಿಲ್ಲೆಡ್ ಎಪಿಎಲ್‌ ಕಾರ್ಡ್‌ದಕ್ಲೆಗ್ ಸರಿಯಾದ್ ಅರಿ ತಿಕ್ಕೊಂದು ಇಜ್ಜಿ.

ದ.ಕ. ಜಿಲ್ಲೆಡ್ ಬಹುತೇಕ ಮಾತಾ ತಾಲೂಕುಡು ಎಪಿಎಲ್‌ ಕಾರ್ಡ್‌ದಕ್ಲೆಗ್ ಅರಿತ ಕೊರತೆ ಉಂಡು ಪನ್ಪುನ ಮಾಹಿತಿ ಅಧಿಕಾರಿಲೆನ ಗಮನಗ್ ಬತ್ತ್ ಇತ್ತ್ಂಡಲ ರಾಜ್ಯ ಸರ್ಕಾರ ಸೂಕ್ತ ಸ್ಪಂದನೆ ಕೊರಂದಿನ ಕಾರಣ ಎಪಿಎಲ್‌ ಕಾರ್ಡ್‌ದಕುಲು ಅರಿ ತಿಕ್ಕುಂಡ ಇಜ್ಜ ಪನ್ಪುನ ಗೊಂದಲಡ್ ಏಪಲಾ ನ್ಯಾಯಬೆಲೆ ಅಂಗಡಿಗ್ ಪೋಪುನ ಅತ್ತ್ಂಡ ಪಡಿತರಗಾದ್ ಲೈನ್ ಉಂತುನ ಪರಿಸ್ಥಿತಿ ಬೈದ್ಂಡ್.

ಕೆಲವು ಪಡಿತರ ಅಂಗಡಿಡ್ ಎಪಿಎಲ್‌ ಕಾರ್ಡ್‌ದಕ್ಲೆಗ್ ಅರಿ ಇಜ್ಜಿ ಪನ್ಪುನ ಬೋರ್ಡ್ ಪಾರ್ದಿನ ದೂರು ಬೈದ್ಂಡ್. ಸಾರ್ವಜನಿಕೆರೆನ್ ಈ ಸ್ಥಿತಿಗ್ ಕಣತ್ತಿನ ರಾಜ್ಯ ಸರಕಾರ ಜನಾಕ್ರೋಶಗ್ ಎದುರು ಆಪುನ ದಿನ ಮುಟ್ಟಡ್ ಉಂಡು. ಅವೆರ್ದ್ ದುಂಬು ಸರ್ಕಾರ ಕ್ರಮ ದೆತೊನೊಡ್ ಪಂದ್ ಶಾಸಕೆರ್ ಪಂತೆರ್.

ಕುಡ್ಲ ಏರ್‌ಪೋರ್ಟ್‌ಡ್ 46.52 ಲಕ್ಷ ರೂ. ಬಿಲೆತ್ತ ಬಂಗಾರ್‌ ವಶಕ್‌

ಐನ್ ಪ್ರತ್ಯೇಕ ಪ್ರಕರಣಡ್ ವಿದೇಶರ್ದ್ ಅಕ್ರಮವಾದ್ ಸಾಗಾಟ ಮಲ್ತೊಂದು ಇತ್ತಿನ ಒಟ್ಟು 46.52 ಲಕ್ಷ ರೂ. ಮೌಲ್ಯದ ಬಂಗಾರ್‌ನ್ ಕುಡ್ಲ ಕಸ್ಟಮ್ಸ್ ಅಧಿಕಾರಿಲು ವಶಕ್ಕ್‌ ಪಡೆಯೊಂದೆರ್.‌

ಕುಡ್ಲ ಅಂತರ್‌ರಾಷ್ಟ್ರೀಯ ವಿಮಾನ ನಿಲ್ದಾಣಡ್ ಸೆ.23 ಬೊಕ್ಕ 24 ದಾನಿ ಬೇತೆ ಬೇತೆ ಐನ್‌ ಪ್ರಕರಣಡ್ ದುಬೈರ್ದ್ ಸಾಗಾಟ ಮಲ್ತೊಂದು ಇತ್ತಿನ 24 ಕ್ಯಾರೆಟ್‌ ದ ಒಟ್ಟು 46,52,270 ರೂ ಬಿಲೆತ್ತ 775 ಗ್ರಾಂ ಬಂಗಾರ್‌ನ ಪತ್ತೆ ಮಲ್ತ್‌ದ್‌ ಕಸ್ಟಮ್ಸ್ ಅಧಿಕಾರಿಲು ವಶಕ್ಕೆ ಪಡೆತೆರ್.‌

ಬಂಗಾರ್‌ನ್ ಪೇಸ್ಟ್‌ಡ್‌, ಇಯರ್ ಪಾಡ್ ಬೊಕ್ಕ ಟ್ರಾಲಿಬ್ಯಾಗ್‌ ದ ರಾಡ್‌ಡ್ ಲೇಪ ಮಲ್ತ್ ದ್ ಸಾಗಾಟ ಮಲ್ತೊಂದು ಇತ್ತೆರ್‌ ಪಂದ್  ಅಧಿಕಾರಿಲು ತೆರಿಪಾದೆರ್.‌