ಕುಡ್ಲದ ಸುದ್ದಿ | Mangalore News

ಕುಡ್ಲಗ್ ಪೊಸ ಮೇಯರ್ ಸುಧೀರ್ ಶೆಟ್ಟಿ ಕಣ್ಣೂರು,‌ ಉಪ ಮೇಯರ್ ಸುನೀತಾ ಸಾಲ್ಯಾನ್

ಕುಡ್ಲ: ಕುಡ್ಲ ಮಹಾನಗರ ಪಾಲಿಕೆದ 24ನೇ ಅವಧಿದ ಮೇಯರ್ ಆದ್ ಸುಧೀರ್ ಶೆಟ್ಟಿ ಕಣ್ಣೂರು ಬೊಕ್ಕ ಉಪಮೇಯರಾದ್ ಸುನೀತಾ ಸಾಲಿಯಾನ್ ಆಯ್ಕೆ ಆತೆರ್.

ಮೇಯರ್ ಬೊಕ್ಕ ಉಪ ಮೇಯರ್ ತಾನಗ್ ಇನಿ ನಡತಿನ ವೋಟುಡು ಆಡಳಿತರೂಢ ಬಿಜೆಪಿರ್ದ್ ಮೇಯರ್ ತಾನಗ್ ಸುಧೀರ್ ಶೆಟ್ಟಿ ಬೊಕ್ಕ ಉಪ ಮೇಯರ್ ತಾನಗ್ ಸುನೀತಾ ಸಾಲಿಯಾನ್ ನಾಮಪತ್ರ ಸಂದಾದಿತ್ತೆರ್. ಅಂಚೆನೆ ಪ್ರತಿಪಕ್ಷ ಕಾಂಗ್ರೆಸ್ ರ್ದ್ ಮೇಯರ್ ಬೊಕ್ಕ ಉಪ ಮೇಯರ್ ತಾನಗ್ ಅಭ್ಯರ್ಥಿಲೆನ್ ವೋಟುಗು ಉಂತಾದಿತ್ತೆರ್. ಅವೆರ್ದ್ ಬೊಕ್ಕ ನಡತಿನ ವೋಟುಡು ಸುಧೀರ್ ಶೆಟ್ಟಿ ಬೊಕ್ಕ ಸುನೀತಾ ಸಾಲಿಯಾನ್ ಆಯ್ಕೆ ಆಯೆರ್.

ಮೈಸೂರ್ ವಿಭಾಗದ ಪ್ರಾದೇಶಿಕ ಆಯುಕ್ತೆರ್ ವೋಟು ನಡಪಾದ್ ಕೊರಿಯೆರ್. ಪಾಲಿಕೆದ ಮಂಗಳಾ ಸಭಾಂಗಣಡ್ ಈ ವೋಟು ನಡತ್ಂಡ್.

ಕುಡ್ಲಗ್ ಭೇಟಿ ಕೊರ್ನ ರಾಜ್ಯಪಾಲೆರ್ ತಾವರ್ ಚಂದ್ ಗೆಹ್ಲೋಟ್

ಕುಡ್ಲ: ಕರ್ನಾಟಕ ರಾಜ್ಯಪಾಲೆರ್ ತಾವರ್ ಚಂದ್ ಗೆಹ್ಲೋಟ್ ಮೇರ್ ಸೆ.8 ಸುಕ್ರಾರ (ಇನಿ) ಬಜಪೆದ ಅಂತರಾಷ್ಟ್ರೀಯ ಇಮಾನ ನಿಲ್ದಾಣಗ್ ಭೇಟಿ ಕೊರಿಯೆರ್.

ಈ ಪೊರ್ತುಡು ಜಿಲ್ಲಾಧಿಕಾರಿ ಮುಲ್ಲೈ ಮುಗಿಲನ್, ಕುಡ್ಲ ಪೇಂಟೆದ ಪೊಲೀಸ್ ಆಯುಕ್ತೆರ್ ಅನುಪಮ್ ಅಗರ್ವಾಲ್, ದ.ಕ ಜಿಲ್ಲಾ ಪಂಚಾಯತ್ ದ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ ಡಾ. ಆನಂದ್ ಕೆ. ಬೊಕ್ಕ ಅಧಿಕಾರಿಲು ಇತ್ತೆರ್.

ರಾಜ್ಯಪಾಲೆರ್ 12 ಗಂಟೆಗ್ ಕುಡ್ಲ ಪೇಂಟೆದ ಟಿ.ಎಂ.ಎ. ಪೈ ಕನ್‍ವೆನ್‍ಶನ್ ಸಭಾಂಗಣಡ್ ಮ್ಯಾಂಗಲೋರ್ ಫಿಸಿಯೋಕಾನ್ 2023 ಲೇಸ್ ನ್ ಉದಿಪನ ಮಲ್ತೆರ್. ಮಧ್ಯಾಹ್ನ 1 ಗಂಟೆಗ್ ಪೇಂಟೆದ ಹೋಟೆಲ್ ತಾಜ್ ವಿವಂತಾಡ್ ವಾಸ ಇತ್ತೆರ್.1.30 ಕ್ಕ್ ಖಾಸಗಿ ವಿಶ್ವವಿದ್ಯಾನಿಲಯ ಬೊಕ್ಕ ಕಾಲೇಜ್ ಆಡಳಿತದ ಅಧಿಕಾರಿಲೆನೊಟ್ಟಿಗೆ ಸಂವಾದ ನಡಪಾಯೆರ್. ನನ ಬಯ್ಯಗ್ 5.25 ಕ್ಕ್ ಕುಡ್ಲರ್ದ್ ಇಮಾನದ ಮುಖೇನ ಬೆಂಗ್ಲೂರ್ ಗ್ ಪೋಪೆರ್.

ಇನಿ ಕ್ರಿಶ್ಚನ್ ದಕಲ್ನ ಕೊರಲ್ ಪರ್ಬ

ಕುಡ್ಲ: ತುಳುನಾಡ್ ಭಾಗದ ಕೊಂಕಣಿ ಕೆಥೋಲಿಕ್ ಪೊರ್ಬುನಕ್ಲೆಗ್ (ಸೆ.8) ಇನಿ ಪರ್ಬದ ದಿನ.

ಆನಿ ಯೇಸು ಕ್ರಿಸ್ತನ ಅಪ್ಪೆ ಮೇರಿ ಮೆರೆನ ಪುಟ್ಟುನ ದಿನ. ಈ ದಿನೊನು ದ.ಕ ಬೊಕ್ಕ ಒಡಿಪು ಜಿಲ್ಲೆದ ಕೊಂಕಣಿ ಕೆಥೋಲಿಕೆರ್ ಧಾರ್ಮಿಕ ಬೊಕ್ಕ ಸಾಂಸ್ಕೃತಿಕ ರೀತಿಡ್ ಆಚರಣೆ ಮಲ್ಪುವೆರ್.

ಚರ್ಚ್ ಲೆಡ್ ಬಲಿ ಪೂಜೆ, ಪೊಸ ಕುರಲ್ ಪಟ್ಟುನ ಲೇಸ್, ಮೆರವಣಿಗೆ, ಬೊಕ್ಕ ಪುಷ್ಪಾರ್ಚನೆದ ಮುಖೇನ ಮೇರಿ ಅಪ್ಪೆಗ್ ನಮನ ಸಂದಾಯೆರೆ ಉಂಡು. ಬೊಕ್ಕ ಧರ್ಮ ಗುರುಕುಲು ಪರ್ಬದ ಪೊಲಬು ಕೊರ್ದು ಎಡ್ಡೆಪ್ಪು ಬಯಕುವೆರ್. ಬೊಕ್ಕ ಚೀಪೆ ತಿಂಡಿ, ಕರ್ಂಬು ಪಟ್ಟುವೆರ್. ಅವೆರ್ದ್ ಬೊಕ್ಕ ಇಲ್ಲಲ್ ಪರ್ಬದ ವನಸ್ ಮಲ್ಪುವೆರ್.

ಕುಡ್ಲ ಪೇಂಟೆದ ಮಿಲಾಗ್ರಿಸ್, ಬೆಂದೂರು, ಜಪ್ಪು, ವೆಲೆನ್ಸಿಯಾ, ಕಾಸ್ಸಿಯಾ, ಬಿಜೈ, ಆಂಜೆಲೋರ್, ಉರ್ವ, ಅಶೋಕನಗರ, ಬೋಂದೆಲ್, ಕುಲಶೇಖರ, ಕೂಳೂರು ಚರ್ಚ್ ಡ್ ಬೊಲ್ಪುಗು ಮೊಂತಿ ಪರ್ಬದ ಬಲಿಪೂಜೆಲು ನಡಪರೆ ಉಂಡು.

ಪರ್ಬದ ತಯಾರಿಗಾದ್ ಚರ್ಚ್ ಲೆಡ್ 9 ದಿನತ್ತ ನೊವೇನಾ ಪ್ರಾರ್ತನೆ ನಡತ್ ದ್ಂಡ್. ಜೋಕುಲು ಪೂವು ಕನತ್ ದ್ ಮೇರಿ ಅಪ್ಪೆಗ್ ಅರ್ಚನೆ ಮಲ್ತ್ ದ್ ಪ್ರಾರ್ತನೆ ಸಂದಾದೆರ್.

ಇನಿ ತರಕಾರಿದ ತೆನಸ್ ಈ ಪರ್ಬದ ಇಸೇಸ ಆತ್ಂಡ್. ಕಮ್ಮಿ ಆಂಡಲ 5 ಬಗೆತ್ತ ಕಜಿಪು ಇಪ್ಪೊಡು. ಆಯಿಟ್ಲಾ ಚೇವುದ ದಂಡ್, ದೆಂಟೊ (ಪದ್ ಪೆ ದಂಟು) ಪೀರೆ, ಬೆಂಡೆಕಾಯಿ ಇನಿತ್ತ ಕಜಿಪು ಆತ್ಂಡ್. ಆಯಿತ್ತೊಟ್ಟಿಗೆ ಪಾಯಿಸಲ ಮಲ್ಪುವೆರ್.

ದತ್ತ ನಗರಡ್ ರಂಗ ಚಾವಡಿ ಉದಿಪನ

ಕುಡ್ಲ: ದತ್ತ ನಗರ ಡ್ ಪೊಸತಾದ್ ನಿರ್ಮಾಣ ಆಯಿನ ದತ್ತ ನಗರ ರಂಗ ಮಂದಿರನ್ ಶಾಸಕೆರ್ ವೇದವ್ಯಾಸ ಕಾಮತ್ ಬುಧಾರ ಉದಿಪನ ಮಲ್ತೆರ್.

ಬೊಕ್ಕ ಮೇರ್ ಪಾತೆರ್ದ್, ದತ್ತ ನಗರ ಸ್ವಚ್ಛತೆ ಒಗ್ಗಟು ಬೊಕ್ಕ ಬೇತೆ ಬೇತೆ ಸಾಮಾಜಿಕ, ಧಾರ್ಮಿಕ ಲೇಸ್ ನ್ ನಡಪಾವೊಂದು ಬರೊಂದು ಉಂಡು.
ದತ್ತ ನಗರಡ್ ಕೈತಲ್ ನುಂಗೆಲ್ ಕಜವುನ್ ಬೊಕ್ಕ ಪಜ್ಜಿ ಕಜವುನ್ ಸಂಸ್ಕರಣೆ ಮಲ್ಪುನ ಸಲುವಾದ್ ಸಂಸ್ಕರಣ ಘಟಕನ್ ನಿರ್ಮಾಣ ಮಲ್ಪುನಲ್ಪ ಕುಡ್ಲ ಮಹಾನಗರ ಪಾಲಿಕೆರ್ದ್ ಸಂಪೂರ್ಣ ಸಹಕಾರ ಕೊರ್ಪ ಪಂದ್ ಭರವಸೆ ಕೊರಿಯೆರ್.

ಕರ್ನಾಟಕದ ಕಾಂಗ್ರೆಸ್ ಸರ್ಕಾರ ಪರ್ಬದ ಆಚರಣೆಗ್ ಸಮಯದ ಮಿತಿನ್ 10 ಗಂಟೆಗ್ ಸೀಮಿತ ಮಲ್ತ್ ದ್ ನಮ್ಮ ಧಾರ್ಮಿಕ ಆಚರಣೆಗ್ ತಡೆ ಪಾಡಿಯೆರೆ ದುಂಬಾತ್ಂಡ್. ಇಂಚಿನೆನ್ ಬಿಜೆಪಿ ವಿರೋಧ ಮಲ್ಪುಂಡು. ಅತ್ತಂದೆ ಪರ್ಬನ್ ಎಂಕುಲು ಪೊರ್ಲುಡೆ ಆಚರಣೆ ಮಲ್ಪುವ, ಒವ್ವೇ ಕಾರಣಗ್ಲಾ ಇಂಚಿನ ಪೊಳ್ಳು ಬೆದರಿಕೆನ್ ತರೆತಗ್ಗವುಜ. ಪೊಲೀಸೆರೆನ ಮುಖೇನ ಕಾಂಗ್ರೆಸ್ ಸರಕಾರ ಅಡ್ಡಿ ಮಲ್ಪರೆ ದುಂಬಾಂಡ ಸ್ವತಃ ಯಾನೇ ಪಾಲ್ ಪಡೆದ್ ರೋಡ್ ರೋಡ್ ಡ್ ಪರ್ಬ ಆಚರಣೆ ಮಲ್ಪುವೆ ಪಂದ್ ಪಂಡೆರ್. ಅಂಚೆನೆ
ವಿಶ್ವವಿದ್ಯಾನಿಲಯಡ್ ಆಚರಣೆ ಮಲ್ತೊಂದು ಬರೊಂದು ಇಪ್ಪುನ ಗಣೇಶ ಉತ್ಸವನ್ ಉಂತಾವಂದಿಲೆಕ್ಕ ಬಿನ್ನಾಪು ಮಲ್ದೆ. ನಮ್ಮ ಪರಂಪರೆ ಧಾರ್ಮಿಕ ಉತ್ಸವದಿಲು ಯಥಾಸ್ಥಿತಿಡ್ ನಡಪುಲೆಕ್ಕ ಆವೊಡು ಪಂದ್ ಪಂಡೆರ್.

ಸ್ಥಾಯಿ ಸಮಿತಿದ ಅಧ್ಯಕ್ಷೆರ್ ಶಕೀಲಾ ಕಾವಾ ಪಾತೆರ್ದ್, ರಂಗಮಂದಿರ ಮಾತೆರೆಗ್ಲಾ ಸದುಪಯೋಗ ಅವಡ್, ನೆರ್ದ್ ಎಡ್ಡೆ ಪ್ರತಿಭೆಲು ಪುಟ್ಟಡ್ ಪಂದ್ ಎಡ್ಡೆಪ್ಪು ಬಯಕಿಯೆರ್.

ರಂಗ ಮಂದಿರದ ನಿರ್ಮಾಣಗ್ ಸಹಕಾರ ಮಲ್ತಿನ ಶಾಸಕೆರೆನ್, ಸ್ಥಾಯಿ ಸಮಿತಿ ಅಧ್ಯಕ್ಷೆರೆನ್, ದತ್ತ ನಗರ ನಿವಾಸಿ ಸಂಘದ ಪ್ರಮುಖೆರ್, ಕುಡ್ಲ ಜಿಲ್ಲೆದ ವಿಶ್ವ ಹಿಂದೂ ಪರಿಷತ್ ಅಧ್ಯಕ್ಷೆರ್ ಎಚ್. ಕೆ ಪುರುಷೋತ್ತಮ್, ಮನಪಾ ಸದಸ್ಯೆರ್ ಸುಧೀರ್ ಶೆಟ್ಟಿ ಕಣ್ಣೂರು, ಸ್ಥಳೀಯ ಮನಪಾ ಸದಸ್ಯೆ ವನಿತಾ ಪ್ರಸಾದ್ ಮೊಕ್ಲೆಗ್ ಸನ್ಮಾನ ಮಲ್ತೆರ್. ಶ್ರೀ ಕೃಷ್ಣ ಜನ್ಮಾಷ್ಟಮಿದ ಲೆಕ್ಕೊಡು ದತ್ತ ನಗರ ನಿವಾಸಿಲೆರ್ದ್ ಆಟೋ ಪಂತೊ, ಶ್ರೀ ಕೃಷ್ಣ ಏಸ ಪಂತೊ ಬೊಕ್ಕ ಕಾಸ್ರೋಡುದ ಶ್ರೀ ಸುಧಾಕರ ಕೋಟೆ ಮೆರೆರ್ದ್ ಸೀತ ಕಲ್ಯಾಣ ಬೊಕ್ಕ ಭಕ್ತ ಸುಧಾಮ ಹರಿಕಥ ಸತ್ಸಂಗ ನಡತ್ಂಡ್.

ಈ ಪೊರ್ತುಡು ದತ್ತ ನಗರ ನಿವಾಸಿ ಸಂಘದ ಅಧ್ಯಕ್ಷೆರ್ ವಿಜಯಕುಮಾರ್ ಆಳ್ವ, ಸಂಚಾಲಕೆರ್ ಪ್ರವೀಣ್ ಶೆಟ್ಟಿ, ಕಾರ್ಯದರ್ಶಿ ರಾಜೇಶ್ ನಾಯ್ಕ್, ಕೋಶಾಧಿಕಾರಿ ಕರುಣಾಕರ ಶೆಟ್ಟಿ ಪಾಲ್ ಪಡೆದಿತ್ತೆರ್.

ಕುಡ್ಲದ ಡಾ.ಎನ್ ಎಸ್ ಎ ಎಂ ಕಾಲೇಜ್ ಡ್ ಬಲೆ ತುಲು ಲಿಪಿ ಕಲ್ಪುಗ ಲೇಸ್ ದ ಉದಿಪನ

ಕುಡ್ಲ: ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಬೊಕ್ಕ ಜೈ ತುಲುನಾಡ್ (ರಿ.) ಸಂಘಟನೆದ ಒಟ್ಟುಸೇರಿಗೆಡ್ ಬಲೆ ತುಲು ಲಿಪಿ ಕಲ್ಪುಗ ಪನ್ಪುನ ಲೇಸ್ ದ ಉದಿಪನ ಸೆ.5 ಕ್ಕ್ ಕುಡ್ಲದ ಡಾ.ಎನ್ ಎಸ್ ಎ ಎಂ ಕಾಲೇಜ್ ಡ್ ನಡತ್ಂಡ್.

ಮಲ್ಲ ಬಿನ್ನೆರಾದ್ ಪುಗರ್ತೆದ ನಿರೂಪಕೆ, ವಾಗ್ಮಿ ನಮ್ಮ ಟಿ. ವಿ. ಚಾನೆಲ್‌ದ ನವೀನ್ ಶೆಟ್ಟಿ, ಅಧ್ಯಕ್ಷೆರಾದ್ ಕಾಲೇಜ್‌ದ ಪ್ರಾಂಶುಪಾಲೆರ್ ಡಾ. ನವೀನ್ ಶೆಟ್ಟಿ ಕೆ, ಜೈ ತುಲುನಾಡ್ (ರಿ.) ಸಂಘಟನೆದ ಅಧ್ಯಕ್ಷೆರ್ ವಿಶು ಶ್ರೀಕೇರ ಪಾಲ್ ಪಡೆದಿತ್ತೆರ್.

ಸೆ.9 ರ್ದ್ ಪ್ರತಿ ಸನಿಯಾರ ಮಧ್ಯಾಹ್ನ ಗಂಟೆ 1.45 ರ್ದ್ 2.45 ಮುಟ್ಟ ಬಲೆ ತುಲು ಲಿಪಿ ಕಲ್ಪುಗ ಲೇಸ್ ನಡಪರೆ ಉಂಡು. ತುಲು ಲಿಪಿನ್ ಗೀತಾ ಲಕ್ಷ್ಮೀಶ್ ಬೊಕ್ಕ ಚಿರಶ್ರೀ ಮೊಕುಲು ಕಲ್ಪಾವೆರ್.

ತುಲು ಭಾಷೆದ, ಲಿಪಿತ್ತ ಬುಲೆವಣಿಗೆಗಾದ್ ತುಳುನಾಡ್ ಡ್ ತುಲು ಲಿಪಿ ಕಲ್ಪೆರೆ ಈ ಲೇಸ್ ನ್ ಆಯೋಜನೆ ಮಲ್ತೆರ್. ಇತ್ತೆ ತುಲು ಲಿಪಿನ್ ಮತ ಕಡೆ ಕಲ್ಪಾವುನ ಉದ್ದೇಶಗಾದ್ ಕುಡ್ಲದ ಡಾ. ಎನ್. ಎಸ್. ಎ. ಎಂ. ಪಿ. ಯು. ಕಾಲೇಜ್ ದುಂಬಾತ್ತಿಗೆನ್ ಒಯಿಸೊಂದುಂಡು. ಅತ್ತಂದೆ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ದುಂಬಾತ್ತಿಗೆಡ್ ಅರವಿಂದ್ ಲಿಂಬಾವಳಿ ಕನ್ನಡ ಭಾಷೆ ಬೊಕ್ಕ ಸಂಸ್ಕೃತಿ ಇಲಾಖೆದ ಮಂತ್ರಿ ಆದಿಪ್ಪುನಗ ತುಲು ಲಿಪಿ ರಾಜ್ಯ ಬೊಕ್ಕ ಕೇಂದ್ರದ ಮಾನ್ಯತೆ ಪಡೆದಿತ್ತ್ಂಡ್.

ಚಿಲಿಂಬಿಗುಡ್ಡೆ ಶ್ರೀ ರಾಮಾಂಜನೇಯ ಯುವಕ ಮಂಡಲದ ಮುತಾಲಿಕೆಡ್ ಜೋಕುಲೆಗ್ ನಮ್ಮನೆ ಕೃಷ್ಣ ಏಸ ಪಂತೊ

ಕುಡ್ಲ: ಚಿಲಿಂಬಿಗುಡ್ಡೆ ಶ್ರೀ ರಾಮಾಂಜನೇಯ ಯುವಕ ಮಂಡಲ (ರಿ.) ಮುತಾಲಿಕೆಡ್ ಶ್ರೀ ಕೃಷ್ಣ ಜನ್ಮಾಷ್ಟಮಿದ ಲೆಕ್ಕೊಡು ಸೆ.3 ಐತಾರ ಚಿಲಿಂಬಿಗುಡ್ಡೆದ ಜೋಕುಲೆಗ್ ನಾಲ್ಕನೇ ವರ್ಷೊದ ನಮ್ಮನೆ ಕೃಷ್ಣ ವೇಷ ಪಂತೊ ಆಯೋಜನೆ ಮಲ್ತ್ ದ್ ಇತ್ತೆರ್.

ಈ ಪಂತೊ ಮೂಜಿ ವಿಭಾಗವಾದ್ ನಡತ್ಂಡ್. ಕಂದಕೃಷ್ಣ, ಮುದ್ದುಕೃಷ್ಣ, ಬಾಲಕೃಷ್ಣ ಲೇಸ್ ದ ಉದಿಪನನ್ ಬಿಜೆಪಿ ಜಿಲ್ಲಾ ಕಾರ್ಯಕಾರಿ ಸದಸ್ಯೆರ್ ಸುನಂದ ಕೊಟ್ಟಾರಕ್ರಾಸ್ ತುಡರ್ ಅರ್ಲಾದ್ ಮಲ್ತೆರ್. ಮಲ್ಲ ಬಿನ್ನೆರಾದ್ ಶ್ರೀ ಸಾಯಿ ಡಾನ್ಸ್ ಇನ್ಸ್ಟಿಟ್ಯೂಟ್ ದ ಮಾಲಕೆರ್ ಚೇತನ ಪ್ರಕಾಶ್, ನೃತ್ಯ ಕಲಾವಿದೆ ಶ್ರುತಿ ಕಿರಣ್, ಯುವಕ ಮಂಡಲದ ಉಪಾಧ್ಯಕ್ಷೆರ್ ಪವನ್ ರಾಜ್, ಮಹಿಳಾ ಉಪಾಧ್ಯಕ್ಷೆರ್ ಆಶಾ ಸುರೇಶ್, ಗೌರವಾಧ್ಯಕ್ಷೆರ್ ಗುರುದತ್ ಕೋಟ್ಯಾನ್ ಪಾಲ್ ಪಡೆದಿತ್ತೆರ್.

ಅಂಚೆನೆ ಈ ಪಂತೊಡು ಗೆಂದಿನ ಜೋಕುಲೆಗ್ ಪ್ರಮಾಣ ಪತ್ರದೊಟ್ಟಿಗೆ ಸುರುತ್ತ, ರಡ್ಡನೇ, ಮೂಜಿನೇ ಪ್ರಶಸ್ತಿನ್ ಪ್ರಧಾನ ಮಲ್ತೆರ್. ತೃಪ್ತಿ ಎದ್ಕೊನಿಯೆರ್. ಮಮಿತಾ ಲೇಸ್ ದ ಸುಧಾರಿಕೆ ಮಲ್ತೆರ್.