ಕುಡ್ಲದ ಸುದ್ದಿ | Mangalore News

ಅಯೋಧ್ಯೆಡ್ ಅರಳರೆ ಉಂಡು ತುಳುನಾಡ್ ದ ನಾಗಲಿಂಗ ಪುರ್ಪ!

ಅಯೋಧ್ಯೆಡ್ ನಿರ್ಮಾಣ ಆವೊಂದು ಇಪ್ಪುನ ಶ್ರೀರಾಮ ಮಂದಿರಗ್‌ ಪೋದು ಮುಟ್ಟುದುಂಡು ತುಳುನಾಡ್‌ಡ್‌ ಬುಲೆಯಿನ ನಾಗಲಿಂಗ ಪೂತ್ತ ದೈ. ಅಪರೂಪದ ಈ ಪುರ್ಪಗ್ ರಾಮ ಜನ್ಮಭೂಮಿಡ್‌ ಅರಳುನ ಭಾಗ್ಯ ತಿಕ್ಕ್‌ದುಂಡು. ದಕ್ಷಿಣ ಅಮೆರಿಕಾ ಮೂಲದ ಈ ವಿಶಿಷ್ಟ ಪೂ, ತುಳುನಾಡ್‌ದ ಜವನೆನ ಪ್ರಯತ್ನಡ್‌ ಇತ್ತೆ ರಾಮ ಮಂದಿರ ಸೇರ್ದ್‌ಂಡ್. ಮೇರ್‌ ಇಲ್ಲಲ್‌ ಬೆಳೆಪಾಯಿನ ನಾಗಲಿಂಗ ವೃಕ್ಷ ಪನ್ಪುನ ಪೂತ್ತ ದೈನ್ ಅಯೋದ್ಯೆಗ್ ಮುಟ್ಟಾದೆರ್.

ಕೊರಿಯರ್‌ ಮುಖೆನ ಪಾರ್ಸೆಲ್‌
ಗೂಗಲ್ ಮುಖೆನ ಅಯೋಧ್ಯೆದ ಬಗೆಟ್ ವಿವರ ಪಡೆಯಿನ ವಿನೇಶ್ ಪೂಜಾರಿ ಅಲ್ಪದ ಅಧಿಕಾರಿಲೆನ ಫೋನ್ ನಂಬರ್ ದೆತೊಂದು ಫೋನ್ ಮಲ್ತ್ ನಾಗಲಿಂಗ ವೃಕ್ಷದ ಬಗೆಟ್ ವಿವರ ಕೊರ್ತೆರ್. ಮಾಹಿತಿ ಪಡೆನ ಅಧಿಕಾರಿಲು ಅಯೋಧ್ಯೆಡ್ ಈ ಪೂತ್ತ ಗಿಡನ್ ನಡ್ಪುನ ಸಲುವಾದ್ ಕಡಪುರ್ದ್ ಕೊರಿಯೆರೆ ಪಂಡೆರ್.

ಅಂಚನೆ ವಿನೇಶ್ ಪೂಜಾರಿ ಕೊರಿಯರ್ ಮುಖೆನ ನಾಗಲಿಂಗ ವೃಕ್ಷದ 5 ದೈಕ್ ಲೆನ್ ಕಡಪಾದ್ ಕೊರ್ತೆರ್. ಐರ್ದ್ ಬೊಕ್ಕ ಕೆಲ ದಿನತ ಬೊಕ್ಕ ಅಯೋಧ್ಯೆದ ಅಧಿಕಾರಿಲು ವಿನೇಶ್ ಮೆರೆಗ್ ಕಾಲ್ ಮಲ್ತ್ ದ್, ದೈಕ್ಕುಲು ತಿಕ್ಕಿನ ಬಗೆಟ್ ಮಾಹಿತಿ ಕೊರ್ದ್, ಉಂದೆನ್ ಮೂಲ್ ನರ್ದ್ ಫೋಟೋ ಕಡಪುಡುವ ಪಂದ್ ಮಾಹಿತಿ ಕೊರ್ತೆರ್.

ಜೈ ತುಲುನಾಡ್ ಕುಡ್ಲ ಎಗ್ಗೆದ ಪದುಕೆರೆಗ್ ಪಟ್ಟ ಕಟ್ಟುನ ಲೇಸ್

ಜೈ ತುಲುನಾಡ್ ಕುಡ್ಲ ಎಗ್ಗೆಗ್ 2023-2024 ನೇ ಸಾಲ್ ದ ಪದುಕೆರೆಗ್ ಪಟ್ಟಕಟ್ಟುನ ಲೇಸ್ ಸೆ.24 ಐತಾರದಾನಿ ಕೂಳೂರು ಫಲ್ಗುಣಿ ಸಭಾಂಗಣಡ್ ನಡತ್ಂಡ್.

ಕಾರ್ಯಕಾರಿ ಸಮಿತಿದ ಗುರ್ಕಾರ್ಲು ಆದ್ ನಿರಂಜನ್ ಕರ್ಕೇರ, ಒತ್ತು ಗುರ್ಕಾರ್ಲು ಮನೀಶ್ ಕುಮಾರ್, ಕಾರ್ಯಂತೆರ್ ಚೇತನ್ ಅಂಚನ್, ಒತ್ತು ಕಾರ್ಯಂತೆರ್ ರಾಜೇಶ್ ಶೆಟ್ಟಿ, ಪನವುದ ಪಾಲವೆರ್ ಶ್ವೇತಾ ಶೆಟ್ಟಿ, ಒತ್ತು ಪನವುದ ಪಾಲವೆರ್ ಪುನೀತ್ ಬೋಳೂರು, ಸಂಘಟನಾ ಕಾರ್ಯಂತೆರ್ ದುರ್ಗಾಪ್ರಸಾದ್ ರೈ, ಒತ್ತು ಸಂಘಟನಾ ಕಾರ್ಯಂತೆರ್ ಲತಾ ಡಿಂಪಲ್, ಒತ್ತು ಸಂಘಟನಾ ಕಾರ್ಯಂತೆರ್ ಸ್ವಾತಿ ಶೆಟ್ಟಿ ಆಯ್ಕೆ ಆತೆರ್.

ಲೇಸ್ ದ ಗುರ್ಕಾರ್ಮೆನ್ ಜೈ ತುಲುನಾಡ್ (ರಿ ) ಕೇಂದ್ರ ಸಮಿತಿ ದ ಗುರ್ಕಾರ್ಲು ವಿಶು ಶ್ರೀಕೇರ ವಹಿಸೊಂಡೆರ್, ಕೇಂದ್ರ ಸಮಿತಿ ಒತ್ತು ಗುರ್ಕಾರ್ಲು ಉದಯ್ ಪೂಂಜ, ಪ್ರಧಾನ ಕಾರ್ಯಂತೆರ್ ಕಿರಣ್ ತುಲುವೆ, ಸ್ಥಾಪಕ ಸಮಿತಿ ಪದುಕೆರ್ ರಕ್ಷಿತ್ ರಾಜ್ ಬಜಾಲ್, ಒತ್ತು ಕಾರ್ಯಂತೆರ್ ರಾಜಶ್ರೀ ಚಂದ್ರಶೇಖರ, ಒತ್ತು ಸಂಘಟನಾ ಕಾರ್ಯಂತೆರ್ ರಾಜೇಶ್ ನೀರುಡೆ ಪಾಲ್ ಪಡೆದಿತ್ತೆರ್. ಒತ್ತು ಕಾರ್ಯಂತೆರ್ ಪೂರ್ಣಿಮಾ ಬಂಟ್ವಾಳ ಲೇಸ್ ಸುಧಾರಿಕೆ ಮಲ್ತೆರ್.

ಉಸ್ತುವಾರಿ ಸಚಿವರೆರ್ದ್ ಜನತಾ ದರ್ಶನಗ್ ಚಾಲನೆ

ಕುಡ್ಲ: ಆರೋಗ್ಯ ಬೊಕ್ಕ ಕುಟುಂಬ ಕಲ್ಯಾಣ ಸಚಿವೆರ್‌, ಜಿಲ್ಲಾ ಉಸ್ತುವಾರಿ ಸಚಿವೆರಾಯಿನ ದಿನೇಶ್ ಗುಂಡೂರಾವ್ ಸೆ.25 ಸೋಮವಾರ ದಾನಿ ಪೇಂಟೆದ ಕುದ್ಮುಲ್ ರಂಗರಾವ್ ಪುರಭವನಡ್ ಜನತಾ ದರ್ಶನ ಕಾರ್ಯಕ್ರಮಗ್ ಚಾಲನೆ ಕೊರಿಯೆರ್.‌
ಅಂಚನೆ ಸಾರ್ವಜನಿಕೆರೆರ್ದ್ ಬೇತೆ ಬೇತೆ ಬೇಡಿಕೆಲೆನ ಮನವಿ ಪತ್ರಲೆನ್‌ ಪಡೆಯೊಂದು ಮಾಹಿತಿಲೆನ್‌ ಕೊರಿಯೆರ್.‌

ಈ ಪೊರ್ತುಡು ವಿಧಾನ ಪರಿಷತ್ ಶಾಸಕೆರ್ ಹರೀಶ್ ಕುಮಾರ್, ಡಿಸಿ, ಸಿಇಒ, ನಗರ ಪೊಲೀಸ್ ಆಯುಕ್ತೆರು, ಎಸ್ ಪಿ ಸೇರಿನಂಚ ಅಧಿಕಾರಿಲು, ಜನಪ್ರತಿನಿಧಿಲು ಇತ್ತೆರ್.

ಕುಂಜತ್ತಬೈಲ್ ಡ್ “ಬಿಲ್ಲವ ಹಾಸ್ಟೆಲ್‌’ ಉದಿಪನ

ಕುಡ್ಲ: ಧಾರ್ಮಿಕ ಕೇಂದ್ರಲು ಇಪ್ಪುನಂಚೆನೆ ಉತ್ತಮ ಮನುಷ್ಯ ನಿರ್ಮಾಣದ ಸಂಕಲ್ಪರ್ದ್‌ ಬೇತೆ ಬೇತೆ ಕಡೆಟ್ ಶಿಕ್ಷಣ ಮಂದಿರದ ನಿರ್ಮಾಣಗ್ ವಿಶೇಷ ಒತ್ತು ಕೊರೊಡು. ಶಿಕ್ಷಣರ್ದ್ ಶಕ್ತಿ ಪನ್ಪುನ ಬ್ರಹ್ಮಶ್ರೀ ನಾರಾಯಣ ಗುರುಕುಲೆನ ಮಾರ್ಗದರ್ಶನ ನಮಕ್ಕ್‌ ಮಾತ ಮಾದರಿ ಪಂದ್ ವಿಧಾನ ಪರಿಷತ್‌ ಸದಸ್ಯ ಬಿ.ಕೆ. ಹರಿಪ್ರಸಾದ್‌ ಪಂಡೆರ್.

ಅಖಿಲ ಭಾರತ ಬಿಲ್ಲವ ಯೂನಿಯನ್‌ ಮುತಾಲಿಕೆಡ್ ಕುಡ್ಲದ ಕುಂಜತ್ತಬೈಲ್‌ಡ್‌ ನಿರ್ಮಾಣ ಆಯಿನ ದಿ| ದಾಮೋದರ ಆರ್‌. ಸುವರ್ಣ ಸ್ಮಾರಕ “ಬಿಲ್ಲವ ಹಾಸ್ಟೆಲ್‌’ನ್ ಕುದ್ಮಲ್ ರಂಗರಾವ್‌ ಪುರಭವನಡ್ ಸೆ.24 ಐತಾರ ದಾನಿ ಉದಿಪನ ಮಲ್ತ್‌ ಪಾತೆರಿಯೆರ್.

ಶೈಕ್ಷಣಿಕ ಕೊಡುಗೆ
ಲೇಸ್‌ ದ ಉದಿಪನ ಮಲ್ತಿನ ವಿಧಾನಸಭಾ ಸ್ಪೀಕರ್‌ ಯು.ಟಿ. ಖಾದರ್‌ ಪಾತೆರ್ದ್‌ ಅಖಿಲ ಭಾರತ ಬಿಲ್ಲವರ ಯೂನಿಯನ್‌ ಬಿಲ್ಲವ ಹಾಸ್ಟೆಲ್‌ ಮುಖೇನ ಶೈಕ್ಷಣಿಕ ಕ್ಷೇತ್ರಡ್‌ ಭಾರಿ ಮಲ್ಲ ಕೊಡುಗೆನ್‌ ಕೊರ್ತುಂಡು. ಕಲ್ಪಾರ್ಥಿ ಸಮುದಾಯ ಇಂಚಿನ ಅವಕಾಶಲೆನ್ ಸದುಪಯೋಗ ಮಲ್ತೊನೊಡು. ಉತ್ತಮ ಶಿಕ್ಷಣದ ಮುಖೇನ ಸದೃಢ ಸಮಾಜ ನಿರ್ಮಾಣ ಮಲ್ಪೊಡು ಪಂಡೆರ್.

ಸಂಸದ ನಳಿನ್‌ ಕುಮಾರ್‌ ಕಟೀಲು ಪಾತೆರ್ದ್, ನಾರಾಯಣ ಗುರುಕುಲೆನ ಅಧ್ಯಾತ್ಮ ಕ್ರಾಂತಿಪುರುಷ ಆದ್ ಅಕ್ಷರರ್ದ್ ಜ್ಞಾನ, ಜ್ಞಾನರ್ದ್ ವಿಜ್ಞಾನ, ವಿಜ್ಞಾನರ್ದ್ ತಂತ್ರಜ್ಞಾನ, ತಂತ್ರಜ್ಞಾನರ್ದ್ ತಂತ್ರಾಂಶ ಜ್ಞಾನನ್ ಈ ನಾಡ್‌ಗ್‌ ಕೊರ್ತೆರ್. ಗುರುಕುಲೆನ ಚಿಂತನೆದಂಚ ನವೀನ್‌ಚಂದ್ರ ಡಿ. ಸುವರ್ಣರ ಕುಟುಂಬ ಬಿಲ್ಲವ ಹಾಸ್ಟೆಲ್‌ ಸಮಾಜಗ್ ಅರ್ಪಣೆ ಮಲ್ತಿನ ಶ್ಲಾಘನೀಯ ಪಂಡೆರ್.

ಅಖಿಲ ಭಾರತ ಬಿಲ್ಲವರ ಯೂನಿಯನ್‌ ಗುರ್ಕಾರೆರ್ ನವೀನ್‌ಚಂದ್ರ ಡಿ. ಸುವರ್ಣ ಗುರ್ಕಾರ್ಮೆನ್‌ ವಹಿಸ್‌ದ್‌ ಇತ್ತೆರ್. ಉದ್ಯಮ ಕ್ಷೇತ್ರದ ಸಾಧಕೆರಾಯಿನ ಸುಶೀರ್‌ ಕುಮಾರ್‌ ಬೊಕ್ಕ ಬಾಬ ಅಲಂಕಾರ್‌ ಮೊಕ್ಲೆನ್‌ ಈ ಪೊರ್ತುಡು ಮಾನಾದಿಗೆ ಮಲ್ತೆರ್‌.

ಶಾಸಕೆರಾಯಿನ ಉಮಾನಾಥ ಕೋಟ್ಯಾನ್‌, ವೇದವ್ಯಾಸ ಕಾಮತ್‌, ವಿಧಾನ ಪರಿಷತ್‌ ಸದಸ್ಯೆರ್ ಹರೀಶ್‌ ಕುಮಾರ್‌, ಮೇಯರ್‌ ಸುಧೀರ್‌ ಶೆಟ್ಟಿ ಕಣ್ಣೂರು, ಮಾಜಿ ಸಚಿವೆರ್ ವಿನಯ ಕುಮಾರ್‌ ಸೊರಕೆ, ಸಣ್ಣ ಕೈಗಾರಿಕಾ ರಾಷ್ಟ್ರೀಯ ಸಮಿತಿ ಗುರ್ಕಾರ್ಲು ಉದಯಚಂದ್ರ ಡಿ. ಸುವರ್ಣ, ಮುಂಬಯಿ ಬಿಲ್ಲವ ಚೇಂಬರ್‌ ಆಫ್‌ ಕಾಮರ್ಸ್‌ದ ಗುರ್ಕಾರ್ಲು ಎನ್‌.ಟಿ. ಪೂಜಾರಿ, ಮುಂಬಯಿ ಬಿಲ್ಲವ ಅಸೋಸಿಯೇಶನ್‌ ಗುರ್ಕಾರ್ಲು ಹರೀಶ್‌ ಜೆ. ಅಮೀನ್‌, ಬೆಂಗಳೂರು ಬಿಲ್ಲವರ ಅಸೋಸಿಯೇಶನ್‌ ಗುರ್ಕಾರ್ಲು ವೇದಕುಮಾರ್‌, ಅಖಿಲ ಭಾರತ ಬಿಲ್ಲವರ ಮಹಿಳಾ ಸಂಘ ಗುರ್ಕಾರ್ದಿ ಸುಮಲತಾ ಎನ್‌. ಸುವರ್ಣ, ಕಾರ್ಪೊರೇಟರ್‌ ಶರತ್‌ ಕುಮಾರ್‌‌ ಈ ಪೊರ್ತುಡು ಇತ್ತೆರ್.

ಸ್ಕೂಟರ್‌ರ್ದ್‌ ಬೂರ್ದು ತೀರ್‌ಪೋಯಿನ ಪೊಂಜೊವು

ಕುಡ್ಲ: ಸ್ಕೂಟರ್‌ರ್ದ್‌ ಬೂರ್ದು ಗಾಯ ಆದಿತ್ತಿನ ಪೊಂಜೊವ್‌ ಒರ್ತಿ ದೇರಳಕಟ್ಟೆದ ಆಸ್ಪತ್ರೆಡ್‌ ತೀರ್‌ಪೋಯಿನ ಘಟನೆ ಸೆ.25 ಕ್ಕ್ ನಡತ್‌ಂಡ್.‌

ಕಾಸರಗೋಡು ಜಿಲ್ಲೆದ ಮಧೂರು ನಿವಾಸಿ ಸುಮಾ ನಾರಾಯಣ ಗಟ್ಟಿ(52ವ) ತೀರ್‌ಪೋಯಿನ ವ್ಯಕ್ತಿ.

ಜಪ್ಪಿನಮೊಗರು ಪೋದ್‌ ಅಲ್ಪರ್ದ್‌ ಕಾಸರಗೋಡು ಕಡೆಕ್‌ ಬತ್ತ್‌ದ್‌ ತೊಕೊಟ್ಟು ಪ್ರೈಓವರ್‌ ಕೈತಲ್‌ ಬನ್ನಗ ನಾಗನಕಟ್ಟೆ ಕೈತಲ್‌ ಸ್ಕೂಟರ್‌ರ್ದ್‌ ಬೂರ್ದು ತರೆಕ್ಕ್‌ ಪಟ್ಟ್‌ ಆಯಿನ ಕಾರಣ ಅಪಗನೆ ಕೈತಲ್‌ದ ಆಸ್ಪತ್ರೆಗ್‌ ದಾಖಲ್‌ ಮಲ್ತ್‌ ಇತ್ತೆರ್‌, ಎಚ್ಚಿನ ಚಿಕಿತ್ಸೆಗಾದ್‌ ದೇರಳಕಟ್ಟೆ ಆಸ್ಪತ್ರೆಗ್‌ ದಾಖಲ್‌ ಮಲ್ತ್‌ ಇತ್ತೆರ್.‌ ಚಿಕಿತ್ಸೆ ಫಲಕಾರಿ ಆವಂದೆ ತೀರ್‌ಪೋತೆರ್.

ಬಿ.ಸಿ ರೋಡ್: 44ನೇ ವರ್ಷದ ಗಣಪತಿ ಉಚ್ಚಯ

ಹಿಂದೂ ಧಾರ್ಮಿಕ ಸೇವಾ ಸಮಿತಿದ ಲೆಕ್ಕಡ್ 44ನೇ ವರ್ಷದ ಸಾರ್ವಜನಿಕ ಗಣಪತಿ ಉಚ್ಚಯ ಸೆ.19 ದಾನಿ ನಡತ್ಂಡ್.

ಈ ಲೇಸ್ ಡ್ ಶ್ರೀ ದೇವಿ ನೃತ್ಯಾರಾಧನಾ ಕಲಾ ಕೇಂದ್ರ ಪುತ್ತೂರು, ನೆತ್ತ ನೃತ್ಯ ಗುರು ವಿದುಷಿ ರೋಹಿಣಿ ಉದಯ್ ಮೆರ್ನ ಶಿಷ್ಯ ವೃಂದರ್ದ್ ನೃತ್ಯ ಪ್ರೇರಣಾ ಬೊಕ್ಕ ಯುಗಪುರುಷ (ನೃತ್ಯ ರೂಪಕ) ಪನ್ಪುನ ಸಾಂಸ್ಕೃತಿಕ ಕಾರ್ಯಕ್ರಮ ನಡತ್ಂಡ್.

ಕುಡ್ಲ: ಯುನಿಸೆಕ್ಸ್ ಸೆಲೂನ್‌ ಲೆಗ್ ಎಚ್ಚರಿಕೆ ಕೊರ್ನ ಪೊಲೀಸ್ ಆಯುಕ್ತೆರ್ ಅನುಪಮ್

ಯುನಿಸೆಕ್ಸ್ ಸೆಲೂನ್‌ ನಡಪಾವುನ ನೆಪಟ್ಟ್ ಕಾನೂನುಬಾಹಿರ ಚಟುವಟಿಕೆ ನಡತ್ಂಡ ಕಠಿನ ಕ್ರಮ ದೆತೊನ್ವ ಪಂದ್ ಕುಡ್ಲ ಪೊಲೀಸ್ ಆಯುಕ್ತ ಅನುಪಮ್ ಅಗರ್‌ವಾಲ್ ಎಚ್ಚೆರ್ಗೆ ಕೊರ್ತೆರ್.

ಯುನಿಸೆಕ್ಸ್ ಸೆಲೂನ್‌ ದ ಪುದರ್ ಡ್ ಕೆಲವ್ ಕಡೆಟ್ಟ್ ಬೊಡ್ಚಾಂದಿನ ಬೇಲೆ ನಡಪುನ ಬಗೆಟ್ ಇಲಾಖೆಗ್ ದೂರ್ ಬೈದ್ಂಡ್.

ಉಂದೆನ್ ಗಂಭೀರವಾದ್ ದೆತೊಂದು ಪೊಲೀಸ್ ಇಲಾಖೆ ಪೇಂಟೆದ 14 ಸೆಲೂನ್‌ ಲೆಗ್ ದಿಢೀರ್ ಭೇಟಿ ಕೊರ್ದ್ ತಪಾಸಣೆ ಮಲ್ತ್ ದೆರ್.

ಸೆಲೂನ್ ಮಾಲೀಕೆರ್ ಅಕ್ಲೆನ ಶಾಪ್ ಡ್ ಬೇಲೆ ಮಲ್ತೊಂದು ಇಪ್ಪುನ ಸಿಬ್ಬಂದಿಲೆನ ಬಗ್ಗೆ ಪೊಲೀಸ್ ದೃಢೀಕರಣ ದೆತೊನೊಡು. ಉಂದು ಪೊಲೀಸ್ ಇಲಾಖೆದ ಉಚಿತ ಸೇವೆ ಆದ್ ಇಪ್ಪುಂಡು. ರಿಸೆಪ್ಷನ್, ಪ್ರವೇಶದ ಜಾಗೆಡ್ ಸಿಸಿ ಕ್ಯಾಮರಾ ಪಾಡೊಡು. ಮಾತಾ ಗ್ರಾಹಕೆರ್ನ ಮಾಹಿತಿ ದಾಖಲ್ ಮಲ್ತೊಂದು, ಇತರ ಇಲಾಖೆದ ಮಾರ್ಗಸೂಚಿಲೆನ್ ಪಾಲನೆ ಮಲ್ಪೊಡು ಪಂದ್ ಪಂತೆರ್. ಇಜ್ಜಿಂಡ ಕಾನೂನು ಪ್ರಕಾರ ಕಠಿನ ಕ್ರಮ ದೆತೊನ್ವ ಪಂದ್ ಎಂದು ಆಯುಕ್ತೆರ್ ತೆರಿಪಾದೆರ್.

ರೇಡಿಯೊ ಮಣಿಪಾಲ್ ಡ್ ಕಥೆ ಕೇಳೋಣ

ಮಣಿಪಾಲ ಮಾಹೆದ ಎಂ.ಐ.ಸಿ ಕ್ಯಾಂಪಸ್ ಡ್ ಇಪ್ಪುನ ರೇಡಿಯೊ ಮಣಿಪಾಲ್ 90.4 ಮೆಗಾಹರ್ಟ್ಝ್ ಸಮುದಾಯ ಬಾನುಲಿ ಕೇಂದ್ರ ಕನ್ನಡ ಸಾಹಿತ್ಯ ಪರಿಷತ್ ಒಡಿಪು ಜಿಲ್ಲೆ, ಒಡಿಪು ತಾಲೂಕು ಘಟಕದ ಸಹಯೋಗಡ್ ಕಥೆ ಕೇಳೋಣ ಸರಣಿ ಕಾರ್ಯಕ್ರಮದ 73ನೇ ಸಂಚಿ ಸೆ. 23 ಶನಿವಾರ ಬಯ್ಯ 4.30 ಗ್ ಪ್ರಸಾರ ಆವರೆ ಉಂಡು.

ಈ ಸಂಚಿಡ್ ಸ್ವರಚಿತ ಕಥೆನ್ ಶೆಟ್ಟಿ ದೇವಿಪ್ರಸಾದ್ ಕೆಮ್ಮಣ್ಣು(ಕಲ್ಪಾರ್ಥಿ)ವಾಚನ ಮಲ್ಪರೆ ಉಲ್ಲೆರ್.

ಸೆ. 24 ಮಧ್ಯಾಹ್ನ 12.30ಕ್ಕ್ ನೆತ್ತ ಮರು ಪ್ರಸಾರ ಆವರೆ ಉಂಡು. ರೇಡಿಯೊಡ್ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ದ https://play.google.com/store/apps/details?id=com.atc.radiomanipal ಬೊಕ್ಕ ಐಫೋನ್ ದ https://itunes.apple.com/app/id6447231815 ಲಿಂಕ್ ಮುಖೆನ ರೇಡಿಯೊ ಮಣಿಪಾಲ್ ಆ್ಯಪ್ ಡೌನ್‌ಲೋಡ್ ಮಲ್ತ್ ದ್ ಈ ಕಾರ್ಯಕ್ರಮನ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆಡ್ ತೆರಿಪಾದೆರ್.