ಕುಡ್ಲದ ಸುದ್ದಿ | Mangalore News

ವಿವಿಧತೆಡ್ ಏಕತೆ ಇಪ್ಪುನ ಭಾಷೆ ತುಳು: ತುಳುವೆರೆ ಕರ್ಣೆ ಕನ್ಯಾನ ಸದಾಶಿವ ಶೆಟ್ಟಿ

ಕುಡ್ಲ: ತುಳುನಾಡ್ ಡ್ ಬೇತೆ ಬೇತೆ ಧರ್ಮ, ಜಾತಿ, ರೀತಿ ನೀತಿ ಇತ್ತ್ಂಡಲ ತುಳುಭಾಷೆಡ್ ಏಕತೆ ಉಂಡು.‌ ಎನ್ನ ಈ ದಾನ ಧರ್ಮದ ಕೆಲಸಡ್ ಎನ್ನ ಇಲ್ಲದಕ್ಲೆನ ಬೆರಿಬಲ ಬೊಕ್ಕ ಶ್ರೇಷ್ಠ ಮನಸ್ಥಿತಿನೇ ಕಾರಣ. ದಾನ ಧರ್ಮೊಡು ಎನ್ನ ಬೊಡೆದಿ ಜೋಕುಲು ಒವ್ವೇ ರೀತಿಡ್ ಲ ಆಕ್ಷೇಪ ಮಲ್ಪುಜೆರ್. ಅಂಚಾದ್ ಯಾನ್ ಈ ರೀತಿದ ಕೆಲಸ ಕಾರ್ಯಲೆಗ್ ಪ್ರೋತ್ಸಾಹ ಏಪಲ ಕೊರೊಂದುಲ್ಲೆ ಪಂದ್ “ತುಳುವೆರೆ ಕರ್ಣೆ” ಬಿರ್ದ್ ಪಡೆಯಿನ ಕನ್ಯಾನ ಸದಾಶಿವ ಶೆಟ್ಟಿ ಪಂಡೆರ್.

ಮೇರ್ ಕುಡ್ಲ ಪುರಭವನಡ್ ನಡತಿಮ ತುಳುವೆರೆ ಆಯನೊ ಕೂಟ ಕುಡ್ಲ ನೆತ್ತ ಪದಗ್ರಹಣ ಲೇಸ್ ಡ್ “ತುಳುವೆರೆ ಕರ್ಣೆ” ಬಿರುದು ಸ್ವೀಕಾರ ಮಲ್ತ್ ದ್ ಪಾತೆರಿಯೆರ್.‌

ಲೇಸ್ ನ್ ಕಟೀಲ್ ಕ್ಷೇತ್ರದ ಅನುವಂಶಿಕ ಅರ್ಚಕೆರ್ ಹರಿನಾರಾಯಣ ಅಸ್ರಣ್ಣ ಮೇರ್ ತುಡರ್ ಅರ್ಲಾದ್ ಉದಿಪನ ಮಲ್ತೆರ್. ಈ ಪೊರ್ತುಡು ಸಂಸದೆರ್ ನಳಿನ್ ಕುಮಾರ್ ಕಟೀಲ್, ಕುಡ್ಲ ದಕ್ಷಿಣ ಶಾಸಕೆರ್ ವೇದವ್ಯಾಸ್ ಕಾಮತ್, ಕಾಪು ಶಾಸಕೆರ್ ಸುರೇಶ್ ಶೆಟ್ಟಿ ಗುರ್ಮೆ, ಮಾಜಿ ಸಚಿವೆರ್ ರಮಾನಾಥ ರೈ, ವಿಶ್ವ ಬಂಟರ ಕೂಟಲೆನ ಒಕ್ಕೂಟದ ಗುರ್ಕಾರೆ ಐಕಳ ಹರೀಶ್ ಶೆಟ್ಟಿ, ಮಾಜಿ ಮೇಯರ್ ಪ್ರೇಮಾನಂದ ಶೆಟ್ಟಿ, ಮಹಾನಗರ ಪಾಲಿಕೆ ಹಣಕಾಸು ಸ್ಥಾಯಿ ಸಮಿತಿದ ಗುರ್ಕಾರೆ ವರುಣ್ ಚೌಟ, ನ್ಯಾಯವಾದಿ, ನೋಟರಿ ಪದ್ಮರಾಜ್, ಅಖಿಲ ಭಾರತ ತುಳು ಒಕ್ಕೂಟದ ಗುರ್ಕಾರೆ ಎ.ಸಿ ಭಂಡಾರಿ, ದಯಾನಂದ ಕತ್ತಲ್ ಸಾರ್, ಯೋಗೀಶ್ ಶೆಟ್ಟಿ ಜಪ್ಪು, ಪ್ರವೀಣ್ ಕುಮಾರ್ ಕೊಡಿಯಾಲ್ ಬೈಲ್ ಪಾಲ್ ಪಡೆದಿತ್ತೆರ್. ಪುಗರ್ತೆದ ಸಂಗೀತ ನಿರ್ದೇಶಕೆರ್ ಪ್ರಮೋದ ಸಪ್ರೆ ಬೊಕ್ಕ ಬಳಗದಕುಲು ತುಳುನಾಡ ಗೀತೆನ್ ಪಂಡೆರ್. ನವೀನ್ ಶೆಟ್ಟಿ ಎಡ್ಮೆಮಾರ್ ಲೇಸ್ ದ ಸುಧಾರಿಕೆ ಮಲ್ತೆರ್. ‌

ಪದಗ್ರಹಣ ಲೇಸ್ ಡ್ ಗೌರವಾಧ್ಯಕ್ಷೆರಾದ್ ಸಾಯಿರಾಧ ಗ್ರೂಪ್ ಆಡಳಿತ ನಿರ್ದೇಶಕೆರ್ ಮನೋಹರ್ ಶೆಟ್ಟಿ, ಅಧ್ಯಕ್ಷೆರಾದ್ ಶಮಿನಾ ಆಳ್ವ, ಕಾರ್ಯದರ್ಶಿಯಾದ್ ರಾಜೇಶ್ ಹೆಗ್ಡೆ ಪೊಳಲಿ, ಉಪಾಧ್ಯಕ್ಷೆರಾದ್ ಗೋಪಾಡ್ಕರ್, ಆಶಾ ಶೆಟ್ಟಿ ಅತ್ತಾವರ, ಯಾದವ್ ಕೋಟ್ಯಾನ್ ಬೊಕ್ಕ ಮಾತ ಸದಸ್ಯೆರ್ ಪ್ರಮಾಣವಚನ ಸ್ವೀಕಾರ ಮಲ್ತೆರ್. ಡಾ. ರಾಜೇಶ್ ಆಳ್ವ ಪ್ರಮಾಣ ವಚನ ಓದಿಯೆರ್.

ಅಗರಿ ಶ್ರೀನಿವಾಸ ಭಾಗವತೆರ್ ಬರೆಯಿನ, ದೇವದಾಸ್ ಈಶ್ವರಮಂಗಲ ತುಳುಕ್ಕ್ ಅನುವಾದಿಸಾದ್, ಸರಪಾಡಿ ಅಶೋಕ್ ಶೆಟ್ಟಿ ಸಂಪಾದಿಸಾಯಿನ, ಐಲೇಸಾ ಬೆಂಗ್ಲೂರು ಬೊಕ್ಕ ಟೋಟಲ್ ಕನ್ನಡ ಮೇರ್ ಪುಸ್ತಕ ಪ್ರಕಾಶನ ಮಲ್ತಿನ “ಸಿರಿ ದೇವಿ ಮಾತ್ಮೆ” ತುಳು ಯಕ್ಷಗಾನ ಪ್ರಸಂಗದ ಬೂಕು ಬುಡುಗಡೆ ಮಲ್ತೆರ್. ಲೇಸ್ ದ ಮುನ್ನುಡಿಯಾದ್ ವಾಯ್ಸ್ ಆಫ್ ಆರಾಧನಾ ಕೂಟದ ಜೋಕುಲೆರ್ದ್ ಜೋಕ್ಲೆನ ಮಿನದನ ಲೇಸ್ ನಡತ್ಂಡ್.

ಕುಡ್ಲ ಪುರಭವನಡ್ ಸುರುತ್ತ ಸರ್ತಿ ತುಳು ಭಾಷೆಡ್ ಭಾಗವತಿಕೆದೊಟ್ಟಿಗೆ “ತುಳು ದೇವಿ ಮಾತ್ಮೆ” ಯಕ್ಷಗಾನ ಪ್ರದರ್ಶನ ರಾಜ್ಯ ಪ್ರಶಸ್ತಿ ಗೆಂದಿನ ಸರಪಾಡಿ ಅಶೋಕ್ ಶೆಟ್ಟಿ ಸಂಯೋಜನೆಡ್ ಸುಮಾರ್ 40 ಜನ ತೆಂಕುತಿಟ್ಟುದ ಪೆರ್ಮೆದ ಕಲಾವಿದೆರೆನ ಒಟ್ಟುಸೇರಿಗೆಡ್ ಲೇಸ್ ಸಂಪನ್ನ ಆಂಡ್.

ಬೆಂಗ್ಲೂರು ಕಂಬುಲೊಗು 125 ಜತೆ ಎರ್ಲು: ಅಶೋಕ್ ಕುಮಾರ್ ರೈ

ನ.25 ಕ್ಕ್ ರಾಜಬೂಡುದ ಅರಮನೆ ಮೈದಾನಡ್ ಗಿಡ್ದೆರ್ಲೆನ ಬಲ್ಪಾಟಿಗೆದ ಪೊರ್ಲು

ಕುಡ್ಲ: ರಾಜಬೂಡು ಬೆಂಗ್ಲೂರುದ ಅರಮನೆ ಮೈದಾನಡ್ ನವೆಂಬರ್ 25,26 ಕ್ಕ್ ನಡಪುನ ಸುರೂತ್ತ ಕಂಬುಲಗ್ ಮಾತಾ ರೀತಿದ ಅಟ್ಟನೆ ನಡತೊಂದುಂಡು. 100-125 ಜತೆ ಎರ್ಲು ಈ ಕಂಬುಲೊಡು ಪಾಲ್ ಪಡೆವರೆ ಉಂಡು ಪಂದ್ ಬೆಂಗಳೂರು ಕಂಬುಲ ಆಯೋಜಕೆರ್, ಪುತ್ತೂರು ಶಾಸಕೆರ್ ಅಶೋಕ್ ಕುಮಾರ್ ರೈ ತೆರಿಪಾಯೆರ್.
ಆರ್ ಕುಡ್ಲದ ವುಡ್‌ಲ್ಯಾಂಡ್ಸ್ ಹೋಟೆಲ್‌ಡ್ ಬೆಂಗ್ಲೂರು ಕಂಬುಲದ ನಿಲೆಟ್ಟ್ ಸನಿಯಾರ ಬಯ್ಯಡ್ ನಡತಿನ “ಕಂಬುಲದ ಎರ್ಲೆನ ಯಜಮಾನೆರ್‌ನ ಸಭೆ”ರ್ದ್ ಬೊಕ್ಕ ಸುದ್ದಿಗಾರೆರ್ನ ಒಟ್ಟಿಗೆ ಪಾತೆರ್ದ್, ಕೆಲವು ವಿಚಾರೊಲೆನ್ ತೆರಿಪಾಯೆರ್.

ಪ್ಯಾಲೇಸ್ ಗ್ರೌಂಡ್‌ದ ಎದುರುಡು ಕಂಬುಲೊಗು ಜೋಡು ಕರೆಕ್ಲೆನ್ ಕಟ್ಟುನ ಕೆಲಸ ಸುರು ಆತ್ಂಡ್. ಅಲ್ತ ಮಣ್ಣ್, ನೀರ್ ಮಾತ ಪರೀಕ್ಷೆ ಮಲ್ತ್‌ದ್ಂಡ್ . ಕಂಬುಲದ ಲೇಸ್‌ಡ್ ಮುಖ್ಯಮಂತ್ರಿಲು ಸಿದ್ದರಾಮಯ್ಯೆರ್, ಉಪಮುಖ್ಯಮಂತ್ರಿಲು ಡಿಕೆ ಶಿವಕುಮಾರ್, ಮಾಜಿ ಸಿಎಂ ಯಡಿಯೂರಪ್ಪೆರ್, ಬೊಮ್ಮಾಯಿ, ಬೊಕ್ಕ ಮಾತಾ ಸಚಿವೆರ್, ಸಂಸದೆರ್, ಶಾಸಕೆರ್ ಪಾಲ್ ಪಡೆವರೆ ಆಸಕ್ತಿ ತೋಜಾದೆರ್. ಪುಗರ್ತೆದ ಸಿನೆಮಾ ನಟೆರಾಯಿನ ರಜನಿಕಾಂತ್, ಸುನಿಲ್ ಶೆಟ್ಟಿ, ಐಶ್ವರ್ಯ ರೈ, ಅನುಷ್ಕಾ ಶೆಟ್ಟಿ ಇಂಚಿನ ಮಾತ ಸೆಲೆಬ್ರಿಟಿನಕುಲು ಬರ್ರೆ ಉಲ್ಲೆರ್. ರಡ್ಡ್ ದಿನೊಟ್ಟು ಅಂದಾಜಿ 7-8 ಲಕ್ಷ ಜನ ಪಾಲ್ ಪಡೆವುನ ನಿರೀಕ್ಷೆ ಉಂಡು ಪಂಡೆರ್.

ಬೆಂಗಳೂರು ಕಂಬುಲೊಗು ಬರಿಯರೆ 30-40 ಜನ ಎರ್ಲೆನ ಯಜಮಾನೆರ್ ಪುದರ್ ಕೊರ್ತೆರ್. ಮಲ್ಲ ಎರ್ಲೆನ ಯಜಮಾನೆರ್ ಎಚ್ಚಿನ ಸಂಖ್ಯೆಡ್ ಪಾಲ್ ಪಡೆವರೆ ಉಲ್ಲೆರ್. ಕಂಬುಲೊಗು ಬರ್ಪಿನ ಎರ್ಲೆಗ್ ಲಾರಿದ ವ್ಯವಸ್ಥೆ, ಹಾಸನಡ್ ರೆಸ್ಟ್‌ಗ್ ಉಂತುನ ವ್ಯವಸ್ಥೆ, ಬೆಂಗಳೂರುಡು ಎರ್ಲೆನ ಯಜಮಾನೆರೆಗ್, ಚಾಕಿರಿದಕ್ಲೆಗ್ ಜೆಪ್ಪರೆ, ವನಸ್ ತೆನಸ್‌ದ ವ್ಯವಸ್ಥೆ, ತಂಡಾಸ್, ಎರ್ಲೆನ ಜತೆಟ್ಟ್ ಪಶುವೈದ್ಯೆರ್ನ ವ್ಯವಸ್ಥೆ ಇಂಚ ಬೋಡುತ್ತಿನ ಮಾತ ವ್ಯವಸ್ಥೆಲ ಮಲ್ಪುವ ಪಂದ್ ಪಂಡೆರ್.

ಕಂಬುಲದ ಜೋಡು ಕರೆಕ್ಕ್ ಪುದರ್ ಫೈನಲ್ ಆತಿಜಿ. ರಾಜ ವಂಶಸ್ಥೆರ್ನ ಪುದರ್ ದೀಪಿನ ಅಂದಾಜಿ ಉಂಡು. ಮಸ್ತ್ ಜನ ಬರ್ಪಿನೆರ್ದಾವರ ಟ್ರಾಫಿಕ್, ಪೊಲೀಸ್, ಭದ್ರತೆ, ಆರೋಗ್ಯ, ಅಂಬುಲೆನ್ಸ್ ವ್ಯವಸ್ಥೆ ಮಲ್ತೊಂದುಲ್ಲ. ಬೆಂಗಳೂರುದ ಜನಕ್ಲೆಗ್ ಕಾಂತಾರ ಪಿಚ್ಚರ್ ತೂಯಿನೆರ್ದ್ ಬೊಕ್ಕ ತುಳುನಾಡ್ ದ ಕಂಬುಲ, ಕೋಲ ಇಂಚಿನ ಆಚರಣೆಲೆನ್ ಕಣ್ಣಾರೆ ತೂವೊಡು ಪನ್ಪಿನ ಉಮೇದ್ ಬೈದ್ಂಡ್. ಅಂಚಾದ್ ಬೆಂಗ್ಲೂರುಡು ಕಂಬುಲೊಡು ಐಎಎಸ್, ಐಪಿಎಸ್, ಐಎಫ್‌ಎಸ್, ಕೆಎಎಸ್ ಅಧಿಕಾರಿಲು, ನ್ಯಾಯಾಧೀಶೆರ್ ನಕುಲು, ಲಾಯರ್‌ನಕುಲು ಇಂಚ ಮಾತ ವರ್ಗದ ಜನಕುಲು ಕುಟುಂಬಸಮೇತ ಎಚ್ಚಿನ ಸಂಖ್ಯೆಡ್ ಪಾಲ್ ಪಡೆವುನ ನಿರೀಕ್ಷೆ ಉಂಡು ಪಂಡೆರ್.

ಕಂಬುಲೊಡು ಗೆಂದಿನ ಎರ್ಲೆಗ್ ಸುರುತ್ತ ಇನಾಮು ರಡ್ಡ್ ಪವನ್ ಬಂಗಾರ್, ನೆಂಪು ಕಾಣಿಕೆ, ರಡ್ಡನೇ ಇನಾಮು ಒಂಜಿ ಪವನ್ ಬಂಗಾರ್, ನೆಂಪು ಕಾಣಿಕೆ ಇಂಚ ಮಾತ ಇನಾಮು ಕೊರ್ರೆ ಉಂಡು. ಅಂಚೆನೆ ಪಾಲ್ ಪಡೆಯಿನ ಮಾತಾ ಎರ್ಲೆಗ್ಲ ನೆಂಪು ಕಾಣಿಕೆ ಕೊರ್ದು ಮಾನಾದಿಗೆ ಮಲ್ಪರೆ ಉಂಡು. ಅವ್ವತ್ತಾಂದೆ ಮಸ್ತ್ ಮೆಡಲ್ ಕನದಿನ ಎರ್ಲು ಬೊಕ್ಕ ಯಜಮಾನೆರೆಗ್ ಮಾನಾದಿಗೆ ಮಲ್ಪರೆ ಉಂಡು ಪಂದ್ ಅಶೋಕ್ ರೈಕುಲು ಪಂಡೆರ್.

ಸುದ್ದಿಗೋಷ್ಠಿಡ್ ಜಿಲ್ಲಾ ಸಮಿತಿದ ಅಧ್ಯಕ್ಷೆರ್ ಡಾ. ದೇವಿಪ್ರಸಾದ್ ಶೆಟ್ಟಿ ಬೆಳಪು, ಗೌರವಾಧ್ಯಕ್ಷೆರಾಯಿನ ಎರ್ಮಾಳ್ ರೋಹಿತ್ ಹೆಗ್ಡೆ, ಬಾರ್ಕೂರು ಶಾಂತಾರಾಮ ಶೆಟ್ರ್, ಕಾರ್ಯದರ್ಶಿ ಮುಚ್ಚೂರು ಕಲ್ಕುಡೆ ಲೋಕೇಶ್ ಶೆಟ್ಟಿ, ಕೋಶಾಧಿಕಾರಿ ಚಂದ್ರಹಾಸ್ ಸಾಧು ಸನಿಲ್, ತೀರ್ಪುಗಾರೆರ್ನ ಸಂಚಾಲಕೆರ್ ವಿಜಯಕುಮಾರ್ ಕಂಗಿನಮನೆ, ಮುರಳೀಧರ ರೈ ಇತ್ತೆರ್.

5-6 ಕೋಟಿ ರೂ. ಖರ್ಚಿ, 70 ಲಕ್ಷ ರೂ. ಬಾಡಿಗೆ ಬೆಂಗ್ಲೂರು ಕಂಬುಲದ ಅಂದಾಜಿ ಖರ್ಚಿ 5-6 ಕೋಟಿ ರೂ. ಮುಟ್ಟ ಆಪುಂಡು. ರಾಜ್ಯ ಸರ್ಕಾರೊರ್ದು ಅನುದಾನೊಗು ಮನವಿ ಕೊರೊಂದುಲ್ಲ. ಅರಮನೆ ಮೈದಾನಗ್ ರಡ್ಡ್ ದಿನೊಕ್ಕು 60-70 ಲಕ್ಷ ರೂ. ಬಾಡಿಗೆ ಕೊರೊಡಾಪುಂಡು. ವಿವಿಐಪಿ, ವಿಐಪಿ ಎಂಟ್ರಿ ಬೊಕ್ಕ ಜನರಲ್ ಎಂಟ್ರಿ ಪ್ರತ್ಯೇಕ ಉಂಡು. 6000 ಕಾರ್ ಪಾರ್ಕಿಂಗ್ ಮಲ್ಪರೆ ವ್ಯವಸ್ಥೆ ಉಂಡು. 6 ಎಕ್ರೆ ಜಾಗೆಡ್ ತುಳುನಾಡ್‌ದ ಸಂಸ್ಕೃತಿನ್ ತೊಜಪಾವುನ ವಸ್ತುಪ್ರದರ್ಶನ ನಡಪರೆ ಉಂಡು.

ವಿದೇಶಿ ಚಾನೆಲ್ ಬೊಕ್ಕ ಸ್ಪೋರ್ಟ್ಸ್ ಚಾನೆಲ್‌ದಕುಲು ಲೈವ್ ಕೊರ್ರೆ ಉಲ್ಲೆರ್. ಒಟ್ಟಾರೆ ಬೆಂಗ್ಲೂರು ಕಂಬುಲದ ಮುಕೇನ ತುಳುನಾಡ್ ದ ಸಂಸ್ಕೃತಿನ್ ಜಗತ್ತ್‌ಗ್ ಪರಿಚಯ ಮಲ್ಪುನ ಪ್ರಯತ್ನ ಮಲ್ತೊಂದುಲ್ಲ ಪಂದ್ ರೈಕುಲು ತೆರಿಪಾಯೆರ್.

ಒಂಜೇ ಕಡೆರ್ದ್ ಎರ್ಲು ಪಿದಾಡುನ ಗೌಜಿ ಜಿಲ್ಲಾ ಕಂಬುಲ ಸಮಿತಿ ಅಧ್ಯಕ್ಷೆರ್ ಡಾ. ದೇವಿ ಪ್ರಸಾದ್ ಶೆಟ್ಟಿ ಬೆಳಪು ಮೇರ್ ಪಾತೆರ್ದ್, ಬೆಂಗ್ಲೂರು ಕಂಬುಲೊಗು ಪೋಪಿನ ಮಾತಾ ಎರ್ಲೆನ್ಲ ನ.23 ಕ್ಕ್ ಒಂಜೇ ಕಡೆಟ್ಟ್ ಸೇರ್ಸಾದ್, ಅಲ್ತ್ ರ್ದ್ ಭಾರಿ ಬಿರ್ದಾವಳಿಡ್ ಮಾತಾ ಎರ್ಲೆನ್ ಗೌರವಯುತವಾದ್ ಕಡಪುಡ್ದು ಕೊರೊಂದುಲ್ಲ. ಬೆಂಗಳೂರುಗು ಎರ್ಲೆನ್ ಕೊನೊಪಿನ ವಿಚಾರೊಡು ಮಾತ ಯಜಮಾನೆರ್ ದುಂಬು ಬೈದೆರ್. ಎರ್ಲೆಗ್ ಬೋಡಾಪಿನ ವ್ಯವಸ್ಥೆ, ಟ್ಯಾಂಕರ್ ಡ್ ನೀರ್, ಬೈ, ಕುಡು ಇಂಚ ಮಾತ ಅಗತ್ಯ ಸೊತ್ತುಲೆನ್ ಊರುರ್ದೇ ಕೊನೊಡು ಪನ್ಪಿನ ಅಭಿಪ್ರಾಯಲ ಬೈದ್ಂಡ್ ಪಂಡೆರ್.

ಬೆಂಗಳೂರುಗು ಎರ್ಲೆಗ್ ಕುಡ್ಲರ್ದೇ ಪರ್ಪಿನ ನೀರ್ ಕಂಬುಲದ ಎರ್ಲೆನ ಯಜಮಾನೆರ್ನ ಸಭೆ ದಕ್ಷಿಣಕನ್ನಡ, ಒಡಿಪು ಬೊಕ್ಕ ಕಾಸ್ರೋಡುದ ಜಿಲ್ಲಾ ಕಂಬುಲ ಸಮಿತಿದ ಅಧ್ಯಕ್ಷೆರ್ ಡಾ.ದೇವಿಪ್ರಸಾದ್ ಶೆಟ್ಟಿ ಬೊಕ್ಕ ಬೆಂಗ್ಲೂರು ಕಂಬುಲದ ಆಯೋಜಕೆರ್, ಶಾಸಕೆರ್ ಅಶೋಕ್ ಕುಮಾರ್ ರೈಕ್ಲೆನ ಮುತಾಲಿಕೆಡ್ ಕಂಬುಲದ ಎರ್ಲೆನ ಯಜಮಾನೆರ್ನಕಲ್ನ ಸಭೆ ಸನಿಯಾರ ಬಯ್ಯಡ್ ಹೋಟೆಲ್ ವುಡ್‌ಲ್ಯಾಂಡ್ಸ್‌ದ ಸಭಾಂಗಣಡ್ ನಡತ್ಂಡ್. ಸಭೆಟ್ಟ್ ಸಮಿತಿದ ಗೌರವಾಧ್ಯಕ್ಷೆರ್ ಎರ್ಮಾಳ್ ರೋಹಿತ್ ಹೆಗ್ಡೆ ಪಾತೆರ್ದ್, ಕಂಬುಲದ ಕರೆನ್ ಸರಿಯಾದ್ ಮಲ್ಪೊಡು, ಒಂತೆ ದಿನ ದುಂಬು ರಡ್ಡ್ ಮೂಜಿ ಜತೆ ಎರ್ಲೆನ್ ಬಲಿಪಾದ್ ತೂವೊಡು. ಅಂಚೆನೆ ಎರ್ಲೆನ್ ಜಾಗ್‌ರ್ತೆಡ್ ಬೆಂಗ್ಲೂರುಗು ಲೆತೊಂದು ಪೋದು ಲೆತೊಂದು ಬರ್ಪಿನ ವ್ಯವಸ್ಥೆ ಮಲ್ಪೊಡು, ಎರ್ಲೆಗ್ ಪರ್ರೆ ಊರುರ್ದೇ ಟ್ಯಾಂಕರ್‌ಡ್ ನೀರ್ ಕೊನೊಪಿನ ವ್ಯವಸ್ಥೆ ಮಲ್ಪೊಡು, ಎರ್ಲೆನ ಆರೋಗ್ಯನ್ ತೂವೊನೊಡು ಅಂಚೆನೆ ಸೂಕ್ತ ಗೌರವಧನದ ವ್ಯವಸ್ಥೆ ಮಲ್ತ್ ಕೊರೊಡು ಪಂದ್ ಪಂಡೆರ್. ಕಂಬುಲದ ಯಜಮಾನೆರಾಯಿನ ನಂದಳಿಕೆ ಶ್ರೀಕಾಂತ್ ಭಟ್, ಬಾರ್ಕೂರು ಶಾಂತಾರಾಮ ಶೆಟ್ಟಿ, ತಿರುವೈಲ್‌ಗುತ್ತು ನವೀನ್‌ಚಂದ್ರ ಆಳ್ವ, ಪಿ.ಆರ್.ಶೆಟ್ಟಿ ಕುಳೂರು, ಶಕ್ತಿಪ್ರಸಾದ್ ರೈ, ತ್ರಿಶಾಲ್ ಪೂಜಾರಿ, ಸುರೇಶ್ ಶೆಟ್ಟಿ, ಕಂಬುಲ ಅಕಾಡೆಮಿದ ಅಧ್ಯಕ್ಷೆರ್ ಗುಣಪಾಲ ಕಡಂಬ ಬೊಕ್ಕ ಅಭಿಮಾನಿಲು ಸಭೆಟ್ಟ್ ಪಾಲ್ ಪಡೆದಿತ್ತೆರ್.

ಮಹೇಶ್ ಬಸ್ ತ್ತ ಧಣಿ ಪ್ರಕಾಶ್ ಆತ್ಮಹತ್ಯೆ!

ಕುಡ್ಲ: ಕುಡ್ಲ ಬೊಕ್ಕ ಒಡಿಪು ಜಿಲ್ಲೆಡ್ ಪುಗರ್ತೆ ಪಡೆಯಿನ ಖಾಸಗಿ ಬಸ್ಸ್ ಒಂಜೆತ್ತ ಧಣಿ ಆತ್ಮಹತ್ಯೆ ಮಲ್ತೊನ್ನ ಘಟನೆ ನಡತ್ಂಡ್.

ತೀರ್ ಪೋಯಿನಾರ್ ಮಹೇಶ್ ಬಸ್ ತ್ತ ಧಣಿ ಪ್ರಕಾಶ್ (40) ಪಂದ್ ತೆರಿದ್ ಬೈದ್ಂಡ್. ಮೆರೆನ ಮರಣೋತ್ತರ ಪರೀಕ್ಷೆಗಾದ್ ಪುನನ್ ಕುಡ್ಲದ ಖಾಸಗಿ ಆಸ್ಪತ್ರೆಗ್ ಕೊನೊತೆರ್. ಮೆರೆನ ಆತ್ಮಹತ್ಯೆಗ್ ಕಾರಣ ತೆರಿದ್ ಬೈದಿಜಿ. ಎಚ್ಚದ ಪೊಲಬು ತೆರಿದ್ ಬೈದಿಜಿ.