Mon. Nov 23rd, 2026

ಕುಡ್ಲದ ಸುದ್ದಿ | Mangalore News

ಒಡಿಪು: ಒಂಜೆ ಕುಟುಂಬದ ನಾಲ್ ಜನನ್ ಕೆರ್ನ ಆರೋಪಿ ಅರೆಸ್ಟ್

ಒಡಿಪು: ಒಡಿಪುದ ನೇಜಾರ್ ಡ್ ನಡತ್ತಿನ ಒಂಜೇ ಕುಟುಂಬದ ನಾಲ್ ಜನನ್ ಕೆರ್ನ ಆರೋಪಿನ್ ಪೊಲೀಸೆರ್ ಅರೆಸ್ಟ್ ಮಲ್ತ್ ದೆರ್.

ಬೆಳಗಾವಿರ್ದ್ ಒಡಿಪು ಪೊಲೀಸೆರ್ ಪ್ರವೀಣ್​​​​ ಅರುಣ್​​​ ಚೌಗಲೆನ್ ಅರೆಸ್ಟ್ ಮಲ್ತ್ ದೆರ್.

ಆರೋಪಿ ಮಹಾರಾಷ್ಟ್ರ ಸಾಂಗ್ಲಿ ಮೂಲದಾಯೆ ಪಂದ್ ತೆರಿದ್ ಬೈದ್ಂಡ್.ಎಚ್ಚಿನ ಮಾಹಿತಿ ತಿಕ್ಕೊಡಾತೆ ಪಂದ್ ತೆರಿದ್ ಬೈದ್ಂಡ್.

ಕುಡ್ಲ: ಟ್ರಾಫಿಕ್ ರೂಲ್ಸ್ ಬ್ರೇಕ್: ಸಾಲ್ ಸಾಲ್ ಫೈನ್…!!!

ಕುಡ್ಲ: ನಗರ ಪೊಲೀಸ್ ಕಮಿಷನರೇಟ್ ವ್ಯಾಪ್ತಿದ ರೋಡ್ ಡ್ ಜಾಗ್ರತೆ ಇಜ್ಜಾಂದೆ ಗಾಡಿ ಬುಡ್ಪುನಕುಲು, ಪರ್ದ್ ಗಾಡಿ ಬುಡ್ಪುನಕುಲ್ ಬೊಕ್ಕ ಸಂಚಾರ ನಿಯಮ ಪಾಲನೆ ಮಲ್ಪಂದೆ ಇಪ್ಪುನ ಡ್ರೈವರ್ ನಕ್ಲೆನ ಮಿತ್ತ್ ಕ್ರಮ ದೆತೊಂದು ಡ್ರೈವರ್ ನಕ್ಲೆಗ್ ರಸ್ತೆ ಸುರಕ್ಷತೆದ ಬಗ್ಗೆ ಅರಿವು ಕೊರ್ಪುನ ನಿಟ್ಟ್ ಡ್ ನ.5-12ಮುಟ್ಟ ಪೇಂಟೆಡ್ ಸಂಚಾರ ನಿಯಮ ಉಲ್ಲಂಘನೆ ಮಲ್ತಿನ ವಾಹನ ಚಾಲಕೆರ್ನ ವಿರುದ್ದ ಒಟ್ಟು 2543 ಕೇಸ್ ದಾಖಲಾತ್ಂಡ್

ಉಳ್ಳಾಲ ತುಳು ಕೂಟ ಸ್ಥಾಪನೆ: ಅಟ್ಟಣೆದ ಸಭೆ

ಕುಡ್ಲ: ತುಳು ಭಾಷೆ, ಮಾನ್ಯತೆ, ಬುಲೆಚ್ಚಿಲ್ ಗಾದ್ ಇಡೀ ದೇಶೊಡು ತುಳು ಸಂಘಟನೆಲು ಸಂಘಟಿತೆರಾದ್ ಹೋರಾಟ ಮಲ್ಪೊಡಾಪುಂಡು. ಈ ನಿಟ್ಟ್ ಡ್ ಬೇತೆ ಬೇತೆ ಜಿಲ್ಲೆ, ತಾಲೂಕು ಮಟ್ಟಡ್ ಪೊಸ ತುಳುಕೂಟಲೆನ್ ಸ್ಥಾಪನೆ ಮಲ್ತ್, ಸಂಘಟನೆಗ್ ಪೂರಕ ಬೇಲೆನ್ ಮಲ್ಪೊಡು, ಪಂದ್ ಅಖಿಲ ಭಾರತ ತುಳು ಒಕ್ಕೂಟದ ಗುರ್ಕಾರ್ಲು ಎ.ಸಿ.ಭಂಡಾರಿ ಪಂಡೆರ್.

ಮೇರ್ ಉಳ್ಳಾಲಡ್ ತುಳುವೆರ ಐಸಿರಿ ಟ್ರಸ್ಟ್‌ ನೆತ್ತ ಗುರ್ಕಾರ್ಲು ಕೆ.ರವೀಂದ್ರ ಶೆಟ್ಟಿ ಉಳಿದೊಟ್ಟು ಮೇರ್ನ ಮುತಾಲಿಕೆಡ್ ನಡತ್ತಿನ ಉಳ್ಳಾಲ ತುಳು ಕೂಟ ಸ್ಥಾಪನೆದ ಪೂವ೯ಭಾವಿ ಸಭೆತ ಗುರ್ಕಾರ್ಮೆನ್ ವಹಿಸಾದ್ ಪಾತೆರಿಯೆರ್. ಅಖಿಲ ಭಾರತ ತುಳು ಒಕ್ಕೂಟಡ್ ಇಡೀ ದೇಶಡ್ ಸುಮಾರ್ 44 ತುಳು ಸಂಘಟನೆಲು ಸದಸ್ಯೆರಾದ್ ತುಳು ಭಾಷೆ, ಸಂಸ್ಕೃತಿ ದ ಬಗೆಟ್ಟ್ ವರ್ಷಲ ಸರಣಿ ಲೇಸ್ ಲೆನ್ ಅಟ್ಟಣೆ ಮಲ್ತ್ ಬೇಲೆನ್ ಮಲ್ತೊಂದು ಉಲ್ಲೆರ್. ಈ ಸಂಖ್ಯೆನ್ 100 ಕ್ಕ್ ಏರಾವುನ ಪ್ರಯತ್ನಡ್ ಒಕ್ಕೂಟ ದುಂಬಾತ್ಂಡ್ ಪಂದ್ ಪಂಡೆರ್.

ರವೀಂದ್ರ ಶೆಟ್ಟಿ ಉಳಿದೊಟ್ಟು ಮೇರ್ ಪಾತೆರ್ದ್, ತುಳು ಭಾಷೆ, ಮಾನ್ಯತೆಗ್ ಮೋಹನ್‌ ಆಳ್ವೆರ್ನೆ ತಂಡ ವರದಿನ್ ಈ ದುಂಬು ಸರಕಾರಗ್ ಕೊರ್ತುಂಡು. ಆಂಡ ಇಡೆ ಮುಟ್ಟ ಈ ಬಗ್ಗೆ ಒವ್ವೇ ಬೆಳವಣಿಗೆ ಅತಿಜಿ ಪಂದ್ ಪಂಡೆರ್. ಸಭೆಟ್ ಮನೋಜ್‌ ಆಳ್ವ ತುಳುಕೂಟ ಬಂಟ್ವಾಳ, ಜಯಪ್ರಕಾಶ್‌ ರೈ ನಿವೃತ್ತ ಸೈನ್ಯಾಧಿಕಾರಿ, ಡಾ. ರಾಜೇಶ್‌ ಆಳ್ವ ಸಂಘಟನಾ ಕಾರ್ಯದರ್ಶಿ ಅಖಿಲ ಭಾರತ ತುಳು ಒಕ್ಕೂಟ, ರವೀಂದ್ರ ರೈ ಕಲ್ಲಿಮಾರು ಗೌರವ ಸಲಹೆಗಾರೆರ್ ತುಳುವ ಸಿರಿ(ರಿ.) ಕುಡ್ಲ, ಚಂದ್ರಹಾಸ ಕನಂತೂರು ನಿವೃತ್ತ ಲೆಕ್ಕಾಧಿಕಾರಿ ಕಾರ್ಮಿಕರ ಭವಿಷ್ಯನಿಧಿ, ಎಂ. ಚಂದ್ರಹಾಸ ದೇವಾಡಿಗ ಕೋಶಾಧಿಕಾರಿ ಅಖಿಲ ಭಾರತ ತುಳು ಒಕ್ಕೂಟ, ಮನೋಜ್‌ ಆಳ್ವ, ತುಳು ಕೂಟ ಬಂಟ್ವಾಳ ಇತ್ತೆರ್. ಅಖಿಲ ಭಾರತ ತುಳು ಒಕ್ಕೂಟದ ಜೊತೆ ಕಾರ್ಯದರ್ಶಿ ಪಿ.ಎ. ಪೂಜಾರಿ ಒಕ್ಕೂಟ ಬೊಕ್ಕ ಕೂಟದ ರಚನೆ, ಕಾರ್ಯಾಚರಣೆ, ಕಾರ್ಯಕ್ರಮ, ನಿಬಂಧನೆದ ಬಗ್ಗೆ ಪೂರ್ಣ ಮಾಹಿತಿ ಕೊರಿಯೆರ್. ರವೀಂದ್ರ ರೈ ಕಲ್ಲಿಮಾರು ಬಿನ್ನೆರೆನ್ ಎದ್ಕೊಂದು, ಒಕ್ಕೂಟದ ಪ್ರಧಾನ ಕಾರ್ಯದರ್ಶಿ ಮುಲ್ಕಿ ಕರುಣಾಕರ ಶೆಟ್ಟಿ ಸೊಲ್ಮೆ ಸಂದಾಯ ಮಲ್ತೆರ್. ಮಂಚಿ ಸರಕಾರಿ ಪ್ರೌಢಶಾಲೆದ ಶಿಕ್ಷಕಿ ವಿಜಯಲಕ್ಷ್ಮೀ ಕಟೀಲ್‌ ಲೇಸ್ ದ ಸುಧಾರಿಕೆ ಮಲ್ತೆರ್.

✍️ಮುಲ್ಕಿ ಕರುಣಾಕರ ಶೆಟ್ಟಿ ಪ್ರಧಾನ ಕಾರ್ಯದರ್ಶಿ

ಕುಡ್ಲ: ಎಂಬಿಬಿಎಸ್ ಕಲ್ಪಾರ್ಥಿ ಆತ್ಮಹತ್ಯೆ

ಎಂಬಿಬಿಎಸ್ ಕಲ್ಪಾರ್ಥಿ ಒರ್ತಿ ಹಾಸ್ಟೆಲ್ ದ 6ನೇ ಮಾಲಿಗೆರ್ದ್ ಲಾಗಿದ್ ಆತ್ಮಹತ್ಯೆ ಮಲ್ತೊನ್ನ
ಘಟನೆ ಕುಡ್ಲಡ್ ಸೋಮವಾರ ಕಾಂಡೆ ನಡತ್ಂಡ್.

ಪೇಂಟೆದ ಎ.ಜೆ. ಸಂಸ್ಥೆದ ಎಂಬಿಬಿಎಸ್ ವಿದ್ಯಾರ್ಥಿನಿ ಪ್ರಕೃತಿ ಶೆಟ್ಟಿ (20) ತೀರ್ ಪೋಯಿನ‌ ಕಲ್ಪಾರ್ಥಿ.

ಸೋಮವಾರ ಕಾಂಡೆ 3 ಗಂಟೆಗ್ ಪೊಂಜೊಕ್ಲೆನ ಹಾಸ್ಟೆಲ್‌ ದ 6ನೇ ಮಾಲಿಗೆರ್ದ್ ಲಾಗಿದ್ ಆತ್ಮಹತ್ಯೆ ಮಲ್ತೊಂದೆರ್.

ಜೀವನಡ್ ಬೇಜಾರ್ ಆದ್ ಈ ಕೃತ್ಯ ಮಲ್ತ್ ದೆ ಪಂದ್
ಡೆತ್ ನೋಟ್ ಡ್
ಬರೆತೆರ್.

ಕುಡ್ಲ ಬಿಜೆಪಿ ಯುವ ಮೋರ್ಚಾದ ತುಡರ್ ಪರ್ಬ

ಕುಡ್ಲ: ಬಿಜೆಪಿ ಯುವ ಮೋರ್ಚಾ ಕುಡ್ಲ ನಗರ ಉತ್ತರ ಮಂಡಲದ ಲೆಕ್ಕಡ್ ತುಡರ್ ಪರ್ಬ ನ.12 ದಾನಿ ಸುರತ್ಕಲ್ ಜಂಕ್ಷನ್ ಡ್ ನಡಪರೆ ಉಂಡು.

ಕಾಂಡೆ ಜಿಲ್ಲಾ ಮಟ್ಟದ ಕುಣಿತ ಭಜನೆ, ಗೂಡುದೀಪ ಪಂತೊ, ಭಜನೆದ ಸಾಧಕೆರ್ ದೀನ್ ರಾಜ್ ಕಳವಾರು ತಂಡದ 1000 ಜೋಕ್ಲೆರ್ದ್ ಕುಣಿತ ಭಜನೆ, ಗೋಪೂಜೆ, ಪಟಾಕಿದ ಪ್ರದರ್ಶನ ನಡಪರೆ ಉಂಡು.

ರಾತ್ರೆ 8 ಗಂಟೆರ್ದ್ ಶಿರಡಿ ಸಾಯಿಬಾಬಾ ಮಂದಿರದ ಆಶ್ರಿತ ಸಾಯಿಶಕ್ತಿ ಬಳಗ ಉರ್ವ ಚಿಲಿಂಬಿ ಮೊಕ್ಲೆರ್ದ್ ಪೌರಣಿಕ ನಾಟಕ ಬೊಳ್ಳಿಮಲೆತ ಶಿವಶಕ್ತಿಲು ನಾಟಕ ನಡಪರೆ ಉಂಡು.

ಈ ಲೇಸ್ ಮಾತೆರ್ಲ ಎಚ್ಚಿನ ಸಂಖ್ಯೆಡ್ ಪಾಲ್ ಪಡೆಯೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.

ಅನಂತಪುರ ಕ್ಷೇತ್ರಡ್‌ ಕುಡೊಂಜಿ ಮೊಸಳೆ ಪ್ರತ್ಯಕ್ಷ..!

ಇತಿಹಾಸ ಪ್ರಸಿದ್ಧ ಕೇರಳದ ಅನಂತಪುರ ದೇವಸ್ಥಾನಡ್ ದೇವೆರ್ನ ಪ್ರತಿಬಿಂಬ ಪಂದೇ ಲೆಪ್ಪುನ ಬಬಿಯಾ ಪುದರ್ ದ ಮುದಲೆ ದೇವೆರೆ ಪಾದ ಸೇರಿನ ಬೊಕ್ಕ ಭಕ್ತರೆಗ್‌ ಬೇಜಾರ್‌ ಆದಿತ್ತ್‌ಂಡ್.‌ ಆಂಡ ಇತ್ತೆ ಅನಂತಪುರ ಕ್ಷೇತ್ರದ ಕಿರೆಟ್ಟ್ ಕುಡ ಒಂಜಿ ಮುದಲೆ ತೋಜಿದ್ ಬೈದ್‌ಂಡ್.‌

ಒಂಜಿ ವಾರದ ಪಿರವ್ ಭಕ್ತೆ ಒರಿ ಮುದಲೆನ್‌ ತೂಯಿಲಕ ಆಂಡ್‌ ಪಂದ್‌ ಪಂದಿತ್ತೆರ್. ಸಾಕ್ಷ್ಯಾಧಾರ ಇಜ್ಜಂದಿನೆರ್ದಾತ್ರ ನಂಬೆರೆ ಸಾಧ್ಯ ಆಯಿಜಿ. ಇತ್ತೆ ಕ್ಷೇತ್ರದ ಆಡಳಿತ ಮಂಡಳಿ ಮುದಲೆ ಇಪ್ಪುನೆನ್ ಖಚಿತಪಡಿಸಾದ್ಂಡ್. ಉಂದು ದೇವೆರ್ನ ಪವಾಡನ, ಕಾರಣಿಕ ಶಕ್ತಿ ಪನ್ಪುನಂಚ ಕ್ಷೇತ್ರದ ಕಿರೆಟ್ಟ್ ಮುದಲೆ ಪತ್ತೆಯಾತ್‌ಂಡ್.

ವಿಡಿಯೋಗಾದ್ ಈ ಲಿಂಕ್ ಓಪನ್ ಮಲ್ಪುಲೆ

ಕುಡ್ಲ: ಬೈಕ್‌ಗ್ ಎಡ್ತಿನ ಬಸ್, ತಿರ್ತ್ ಬೂರ್ನಕ್ಲೆನ ಮಿತ್ತ್ ಲಾರಿ ಪೋದು ಮೆಗ್ಯೆ ತೀರ್ ಪೋಯೆರ್, ಪಲಯೆ ಸೀರಿಯಸ್

ಕುಡ್ಲ: ಕೂಳೂರು ಸಂಕದಲ್ಪದ ಕುದುರೆಮುಖ ಜಂಕ್ಷನ್‌ದಲ್ಪ ಮೆಗ್ಯೆ-ಪಲಯೆ ಒಟ್ಟುಗು ಪೋವೊಂದಿತ್ತಿನ ಬೈಕ್‌ಗ್ ಪ್ರೈವೇಟ್ ಕಾಲೇಜಿದ ಬಸ್ ಒಂಜಿ ಎಡ್ತ್‌ನೆರ್ದಾವರ ರೋಡುಗು ಬೂರ್ದಿತ್ತ್ ದ್, ಬೂರ್ನಕಲೆನ ಮೇಲ್‌ಡೆ ಲಾರಿ ಪೋಯಿನೆರ್ದಾವರ ಒರಿ ಅಲ್ಪನೇ ತೀರ್ದ್, ಕುಡೊರಿಯಗ್ ಗಾತಿದ ಪೆಟ್ಟಾತಿನ ಘಟನೆ ಶುಕ್ರವಾರ ಬಯ್ಯಡ್ ನಡತ್‌ದ್ಂಡ್.

ತೀರ್ದಿನಾರೆನ್ ಕೃಷ್ಣಾಪುರ ಬಶೀರ್‌(42) ಪಂದ್ ಗುರ್ತಪತ್ತ್‌ದಿತ್ತ್‌ದ್, ಆರೆನ ಪಲಯೆ ಅಶ್ರಫ್‌(52) ಗಾಡಿದ ಗಡಿಕುಲಾದ್, ಕುಡ್ಲದ ಆಸ್ಪತ್ರೆಡ್ ಅಡ್ಮಿಟ್ ಆದುಲ್ಲೆರ್.

ಬಶೀರ್‌ ಬೊಕ್ಕ ಆರೆನ ಪಲಯೆ ಅಶ್ರಫ್‌ ಜೋಕಟ್ಟೆರ್ದ್ ಕುದುರೆಮುಖೊಟೆ ಆದ್ ಕೃಷ್ಣಾಪುರೊಕು ತನ್ಕುಲೆ ಬೈಕ್‌ಡ್ ಬರೊಂದುಪ್ಪುನಗ ಕಾಲೇಜಿದ ಬಸ್ ಎಡ್ತ್‌ದ್ ಸಾದಿಗ್ ಬೂರ್ದೆರ್. ಅವ್ವೇ ಪೊರ್ತುಡು ಬರಸ್‌ಡ್ ಬತ್ತಿನ ಲಾರಿ ಒಂಜಿ ಅಕಲೆನ ಮೇಲ್‌ಡೆ ಪೋತುಂಡು ಪಂದ್ ತೆರಿದ್‌ಬೈದ್ಂಡ್. ನಡಕೆಗ್ ಸಂಬಂಧಿತ್‌ದ್ ಬಡಕಾಯಿ ಕುಡ್ಲ ಸಂಚಾರ ವಿಭಾಗೊದ ಪೊಲೀಸೆರ್ ಜಾಗೆಗ್ ಬತ್ತ್‌ದ್ ಪರಿಶೀಲನೆ ಮಲ್ತ್‌ದ್, ಕೇಸ್‌ ದಾಖಲ್‌ ಮಲ್ತೊಂದೆರ್.

ಒಡಿಪುದ ಪದ್ಮಪ್ರಿಯಾ ಆತ್ಮಹತ್ಯೆ ಕೇಸ್ : ಅತುಲ್ ರಾವ್‌ಗ್ ಜೈಲ್

ಒಡಿಪು : ಜೂನ್ 10, 2008 ದಾನಿ ನಡತ್ತಿನ ಮಾಜಿ ಶಾಸಕೆರ್ ಕೆ ರಘುಪತಿ ಭಟ್ ಅರೆನ ಬುಡೆದಿ ಪದ್ಮಪ್ರಿಯಾ ನಾಪತ್ತೆ ಬೊಕ್ಕ ಆತ್ಮಹತ್ಯೆಗ್ ಸಂಬಂಧಪಟ್ಟಿನಂಚ ಒಡಿಪು ಸಿಜೆಎಂ ನ್ಯಾಯಾಲಯ ಅತುಲ್ ರಾವ್‌ಗ್ ಒಂಜಿ ವರ್ಷ ಜೈಲು ಶಿಕ್ಷೆ ಕೊರ್ದು ಶುಕ್ರವಾರ ತೀರ್ಪು ಕೊರ್ತುಂಡು.

ಮಾಜಿ ಶಾಸಕೆರ್ ರಘುಪತಿ ಭಟ್ ಅರೆನ ಬುಡೆದಿ ಪದ್ಮಪ್ರಿಯಾ ಕರಂಬಳ್ಳಿಡ್ ಇಪ್ಪುನ ಇಲ್ಲಲ್ ನಾಪತ್ತೆಯಾದ್‌ ಬೊಕ್ಕ ಅವ್ವೇ ಊರುದ ರಘುಪತಿ ಭಟ್ ಅರೆನ ಎಲ್ಯ ಇಪ್ಪುನಗದ ದೋಸ್ತಿ ಅತುಲ್ ರಾವ್ ಪನ್ಪುನಾಯೆ ಪದ್ಮಪ್ರಿಯಾನ್ ತನ್ನ ಕಾರ್‌ಡ್‌ ಲೆತೊಂದು ಪೋದು ಕುಂಜಾರುಗಿರಿಕ್ಕ್ ಪೋಪಿನ ರೋಡುಡು ಕುಂಟುಲೆನ್‌ ಬುರ್ದು ನಾಪತ್ತೆಯಾದಿತ್ತೆರ್. ಮಣಿಪಾಲ ಪೊಲೀಸ್ ಠಾಣೆಡ್ ಈ ಬಗೆಟ್ಟ್ ರಘುಪತಿ ಭಟ್ ಮೇರ್ ಜೂನ್ 19, 2008 ದಾನಿ ದೂರು ಕೊರ್ದು, ಕೇಸ್‌ ದಾಖಲ್‌ ಮಲ್ತ್‌ ಇತ್ತೆರ್. ಸುರುಕ್ಕು ಮಣಿಪಾಲ ಪೊಲೀಸೆರ್ ತನಿಖೆ ಮಲ್ತೊಂದು ಇತ್ತೆರ್.

ಬೊಕ್ಕ ಸಿಒಡಿ ಅಧಿಕಾರಿಲು ತನಿಖೆನ್ ವಹಿಸೊಂಡೆರ್. ಕೋಡಿ ಪೊಲೀಸೆರ್ ಆರೋಪಿಲೆನ ವಿರುದ್ಧ 2008ರ ಆಗಸ್ಟ್ 22 ದಾನಿ ಸುರುತ ಚಾರ್ಜ್ ಶೀಟ್ ಬೊಕ್ಕ 2009 ಜೂನ್ 29 ದಾನಿ ಅಂತಿಮ ಚಾರ್ಜ್ ಶೀಟ್ ಸಲ್ಲಿಸಾದ್, ವಂಚನೆ, ನಕಲಿ ದಾಖಲೆನ್ ಸೃಷ್ಟಿ ಮಲ್ತ್‌ದ್, ದುರುಪಯೋಗ ಮಲ್ದಿನ ಕೇಸ್ ಪಾಡ್ದೆರ್. ರಘುಪತಿ ಭಟ್ ಅರೆನ ದೂರುದಂಚ ತನಿಖೆ ಮಲ್ತಿನ ಪೊಲೀಸೆರ್ ಬೋಡಾಯಿನಾತ್ ಸಾಕ್ಷ್ಯಾಧಾರ ಇಜ್ಜಂದಿನ ಕಾರಣ ಅಪಹರಣ ಬೊಕ್ಕ ಆತ್ಮಹತ್ಯೆಗ್ ಪ್ರಚೋದನೆದ ಆರೋಪಲೆನ್‌ ಕೈ ಬುಡ್ದಿತ್ತೆರ್.

ಕೇಸ್‌ದ ವಿಚಾರಣೆ ಮಲ್ತಿನ ಒಡಿಪು ಸಿಜೆಎಂ ನ್ಯಾಯಾಲಯದ ನ್ಯಾಯಾಧೀಶೆರ್ ಯೋಗೇಶ್, ಆರೋಪಿನ ಮಿತ್ತ್ ದ ಆರೋಪ ಸಾಬೀತ್‌ ಆತ್‌ಂಡ್‌ ಪಂದ್ ಘೋಷಣೆ ಮಲ್ತೆರ್. ಅತುಲ್ ರಾವ್ ಗ್ ಐಪಿಸಿ 458 ಕಾಯ್ದೆದಡಿ ಒಂಜಿ ವರ್ಷ ಜೈಲು ಶಿಕ್ಷೆ ಬೊಕ್ಕ 5,000 ರೂ. ಹೆಚ್ಚುವರಿಯಾದ್, ಐಪಿಸಿ 417, 455, ಬೊಕ್ಕ 471 ಪ್ರಕಾರ ಆಜಿ ತಿಂಗೊಲು ಜೈಲ್ ಶಿಕ್ಷೆ ಬೊಕ್ಕ 5,000 ರೂ.ದಂಡ ಪಾಡ್ದೆರ್ .

ನ.11 : ಮುಲ್ಕಿ ಯುವವಾಹಿನಿ ಘಟಕದ ನಿರೆಲ್ಡ್‌ ತುಳುವೆರೆ ತುಡರ ಪರ್ಬ

ಯುವವಾಹಿನಿ ಮುಲ್ಕಿ ಘಟಕದ ನಿರೆಲ್‌ಡ್‌ 21 ನೇ ವರ್ಸೊದ ತುಳುವೆರೆ ತುಡರ ಪರ್ಬ ನ.11 ಶನಿವಾರ ಬಯ್ಯ 5.30 ಗಂಟೆಗ್‌ ಮೂಲ್ಕಿ ಬಿಲ್ಲವ ಸಮಾಜ ಸೇವಾ ಸಂಘಡ್‌ ನಡಪರೆ ಉಂಡು. ಲೇಸ್‌ದ ಉದಿಪನನ್‌ ಕುಡ್ಲ ಕೇಂದ್ರ ಸಮಿತಿ ಯುವವಾಹಿನಿ ಘಟಕದ ಗುರ್ಕಾರ್ಲು ರಾಜೇಶ್‌ ಬಿ ನಡಪಾದ್‌ ಕೊರಿಯೆರೆ ಉಲ್ಲೆರ್.‌

 

ಮುಲ್ಕಿ ಯುವವಾಹಿನಿ ಮುಲ್ಕಿ ಘಟಕದ ಗುರ್ಕಾರ್ಲು ಮಾಧವ ಪೂಜಾರಿ ಕಿಲ್ಪಾಡಿ ಗುರ್ಕಾರ್ಮೆನ್‌ ವಹಿಸೆರೆ ಉಲ್ಲೆರ್.‌ ಬಿನ್ನೆರಾದ್‌ ಪುರೋಹಿತೆರ್‌ ಮಹೇಶ್‌ ಶಾಂತಿ, ಮುಲ್ಕಿ ಶಾಂಭವಿ ಜೆಸೀಸ್‌ ಟ್ರಸ್ಟ್‌ದ ಗುರ್ಕಾರ್ಲು ಮೊಹಮ್ಮದ್‌ ಹಬಿಬುಲ್ಲ, ಸುರಭಿ ಎಲೆಕ್ಟ್ರಾನಿಕ್ಸ್‌ ದ ಧಣಿ ಜಾನ್ ಕ್ವಾಡ್ರಸ್‌ ಪಾಲ್‌ ಪಡೆಯೆರೆ ಉಲ್ಲೆರ್.‌

 

ಮುಲ್ಕಿ ಬಿಲ್ಲವ ಸಮಾಜ ಸೇವಾ ಸಂಘದ ಗುರ್ಕಾರ್ಲು ಪ್ರಕಾಶ್‌ ಸುವರ್ಣ ತಮೆರಿಯಾದ್ ಉಲ್ಲೆರ್. ಪರ್ಬದ ತಮ್ಮನನ್‌ ಹಿರಿಯ ಕೃಷಿಕೆರ್‌ ಬಾಲಚಂದ್ರ ಸನಿಲ್‌ ಪಡೆಯೆರೆ ಉಲ್ಲೆರ್.‌ ಅಂಚನೆ ಗೂಡುದೀಪ ಪಂತೊ, ರಂಗೋಲಿ ಪಂತೊ, ಗೋ ಪೂಜೆ, ಬಲೀಂದ್ರ ಪೂಜೆ, ಬರವು ಕಲ್ಪುನ ಜೋಕ್ಲೆಗ್‌ ಸಕಾಯ, ಘಟಕದ ಸದಸ್ಯರೆಡ್ದ್‌ ಗಟ್ಟಿ ಬಜಿಲ್ದ ತಮ್ಮನ ನಡಪರೆ ಉಂಡು. ಈ ಲೇಸ್‌ಗ್‌ ಎಚ್ಚಿನ ಸಂಖ್ಯೆಡ್‌ ಬತ್ತ್ವದ್ ಪಾಲ್‌ ಪಡೆಯೊಡು ಪಂದ್‌ ಸಂಘದ ಗುರ್ಕಾರ್ಲು ಬೊಕ್ಕ ಸರ್ವ ಸದಸ್ಯೆರ್‌ ಲೆಪ್ಪೋಲೆಡ್‌ ತೆರಿಪಾದೆರ್.

ನ.27: ಕೋಟೇಶ್ವರದ ಕೊಡಿ ಪರ್ಬ

ಕುಂದಾಪುರ: ಕೋಟೇಶ್ವರ ಶ್ರೀ ಕೋಟಿಲಿಂಗೇಶ್ವರ ದೇವಲ್ಯಡ್ ಕೊಡಿಪರ್ಬ ಬೊಕ್ಕ ತೇರ್ ಉಚ್ಚಯ ನ.27 ಸೋಮಾರ ನಡಪರೆ ಉಂಡು.

ಭಕ್ತಾದಿಲು ಮಾತೆರ್ಲಾ ಈ ಲೇಸ್ ಡ್ ಪಾಲ್ ಪಡೆದ್, ಶ್ರೀ ಮುಡಿ ಗಂಧ ಪ್ರಸಾದ ದೆತೊಂದು ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ದೇವಲ್ಯದ ಕಾರ್ಯ ನಿರ್ವಾಹಣಾಧಿಕಾರಿ ಪ್ರಶಾಂತ್ ಕುಮಾರ್ ಶೆಟ್ಟಿ, ಪ್ರಧಾನ ಅರ್ಚಕೆರ್ ತಂತ್ರಿಲಾಯಿನ ಪ್ರಸನ್ನ ಕುಮಾರ್ ಐತಾಳ್, ವ್ಯವಸ್ಥಾಪನಾ ಸಮಿತಿದ ಗುರ್ಕಾರೆ ಎಮ್ ಪ್ರಭಾಕರ ಶೆಟ್ಟಿ ಬೊಕ್ಕ ಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

You Missed