ಕುಡ್ಲ: ತುಂಬೆದಲ್ಪ ಲಾರಿಯೊಂಜೇಕ್ಕ್ ಕರೆಂಟ್ ವಯರ್ ತಿಕೊಂದು, ಕಂಬ ಮಾರ್ಗಗ್ ವಾಲಿನ ಘಟನೆ ನಡತ್ ದ್ಂಡ್.
ಅದೃಷ್ಟವಾಶತ್ ಒವ್ವೇ ತೊಂದರೆ ಇಜ್ಜಂದೆ ಸುಮಾರ್ ಗಾಡಿದ ಸವಾರೆರ್ ಗಾಡಿ ಕೊನೊತೆರ್. ಈ ಘಟನೆರ್ದ್ 20 ನಿಮಿಷ ಗಾಡಿ ಸಂಚಾರ ಇಜ್ಜಂಡ್. ಮೆಸ್ಕಾಂ ಅಧಿಕಾರಿಲು ಜಾಗೆಗ್ ಬತ್ತ್ ದ್ ಕರೆಂಟ್ ವಯರ್ ನ್ ದೆತ್ತ್ ದ್ ಗಾಡಿ ಸಂಚಾರಗ್ ಅವಕಾಶ ಮಲ್ತ್ ದ್ ಕೊರ್ತೆರ್ ಪಂದ್ ತೆರಿದ್ ಬೈದ್ಂಡ್.
ಕುಡ್ಲ: ಬಜರಂಗದಳ ಮುಖಂಡೆ ಆರೆನ ಬೊಕ್ಕ ಕೂಟದಕುಲು ಅಂಗಡಿಗ್ ಪೊಗ್ಗುದು ಪೆಟ್ಟ್ ಪಾಡಿನ ಘಟನೆ ಪುತ್ತೂರು ತಾಲೂಕ್ ದ ಉಬಾರ್ ಡ್ ನಡತ್ಂಡ್.
ಕೊಲೆ ಆರೋಪಿ, ಬಜರಂಗದಳ ಮುಖಂಡೆ ಭರತ್ ಕುಮ್ಡೇಲು, ಬಜರಂಗದಳತ್ತ ಜಗಜೀವನ್ ರೈ, ಭವಿಷ್, ಸಂದೀಪ್ ಪನ್ಪುನಕುಲು ಅಂಗಡಿಗ್ ಪೊಗ್ಗುದು ಹರೀಶ ನಾಯ್ಕ, ಸುದರ್ಶನ್ ಕುಮಾರ್, ರಮಾನಂದ ಪನ್ಪುನಕ್ಲೆನ್ ಅಂಗಡಿರ್ದ್ ಪಿದಯಿ ಒಯಿತ್ ದ್, ನಡು ಮಾರ್ಗಡ್ ಪೆಟ್ಟ್ ಮಲ್ತಿನ ದೃಶ್ಯ ಸಿಸಿಟಿವಿಡ್ ರೆಕಾರ್ಡ್ ಆತ್ಂಡ್.
ಈ ಬಗೆಟ್ಟ್ ಉಬಾರ್ ಪೊಲೀಸ್ ಠಾಣೆಡ್ ಎಸ್ಸಿ ಎಸ್ಟಿ ಕಾಯ್ದೆಯಡಿಟ್ಟ್ ಕೇಸ್ ದಾಖಲ್ ಆತ್ಂಡ್. ಭರತ್ ಕುಮ್ಡೇಲು 2017 ಟ್ಟ್ ಎಸ್ ಡಿಪಿಐ ಮುಖಂಡೆ ಅಶ್ರಫ್ ಕಲಾಯಿ ಕೊಲೆ ಕೇಸ್ ದ ಪ್ರಮುಖ ಆರೋಪಿ ಆತೆರ್.
ಮುಲ್ಕಿ: ಕರ್ನಿರೆದ ದಿನಸಿ ಬ್ಯಾರ ಮಲ್ಪುನಾರ್ ಒರಿ ವಿಷತ್ತ ಉಚ್ಚು ತುಚ್ಚಿದ್ ತೀರ್ ಪೋತೆರ್.
ಕರ್ನಿರೆ ಮಸೀದಿ ಕೈತಲ್ದ ಸಯ್ಯದ್ ಆಲಿ(57) ತೀರ್ ಪೋಯಿನಾರ್. ಆರ್ ತನ್ನ ತೋಟಡ್ ತರ್ಕಾರಿ ಬುಳೆನ್ ಮಲ್ತೊಂದಿತ್ತ್ ದ್ , ಕಾಂಡೆ ತೋಟಗ್ ಪೋನಗ ಉಚ್ಚು ತುಚ್ಚಿದ್ಂಡ್. ಅಪಗನೆ ಅರೆನ್ ಆಸ್ಪತ್ರೆಗ್ ದಾಖಲ್ ಮಲ್ತ್ಂಡಲ ಚಿಕಿತ್ಸೆ ಫಲಕಾರಿ ಆವಂದೆ ತೀರ್ ಪೋಯೆರ್.
ಕುಡ್ಲ: 2021-2022 ಅಂಚನೆ 2023 ನೇ ಸಾಲ್ದ ಮುಖ್ಯಮಂತ್ರಿಲೆನ ಬಂಗಾರ್ದ ಪದಕ ಪುರಸ್ಕಾರಗ್ ಜಿಲ್ಲೆದ ಅಗ್ನಿಶಾಮಕ ಅಧಿಕಾರಿಲು ಬೊಕ್ಕ ಸಿಬ್ಬಂದಿಗಳು ಆಯ್ಕೆ ಆತೆರ್.
ಪಾಂಡೇಶ್ವರ ಅಗ್ನಿಶಾಮಕ ಠಾಣೆದ ಜಿಲ್ಲಾ ಅಗ್ನಿಶಾಮಕ ಅಧಿಕಾರಿ ಭರತ್ ಕುಮಾರ್, ಕದ್ರಿ ಅಗ್ನಿಶಾಮಕ ಠಾಣೆದ ಜಿಲ್ಲಾಧಿಕಾರಿ ಮಹಮ್ಮದ್ ಜುಲ್ಫಿಕರ್ ನವಾಜ್ ಕೆ ಪಿ, ಜಿಲ್ಲೆದ ಸಹಾಯಕ ಅಗ್ನಿಶಾಮಕ ಠಾಣಾಧಿಕಾರಿ ರಾಜ್, ಜಿಲ್ಲೆದ ಕುಡ್ಲ ತಾಲೂಕ್ದ ಆದರ್ಶ ನಗರದ ಪ್ರಮುಖ ಅಗ್ನಿಶಾಮಕ-1647 ಸುದರ್ಶನ್.ಕೆ, ಕಡಬ ತಾಲೂಕ್ದ ಕೊಂಬಾರು ಪ್ರಮುಖ ಅಗ್ನಿಶಾಮಕ-2119 ರುಕ್ಮಯ ಗೌಡ ಇ, ಕುಡ್ಲ ತಾಲೂಕ್ದ ಗುರುಪುರ ಗ್ರಾಮದ ಪ್ರಮುಖ ಅಗ್ನಿಶಾಮಕ- 2189 ಸುರೇಶ್ ಶೆಟ್ಟಿ, ಬೊಲ್ತೇರ್ ತಾಲೂಕ್ದ ಗರ್ಗಾಡಿ ಗ್ರಾಮದ ಅಗ್ನಿಶಾಮಕ – 2427 ಉಸ್ಮಾನ್ ಮುಖ್ಯಮಂತ್ರಿ ಬಂಗಾರ್ದ ಪದಕ ಪಡೆಯಿನ ಅಧಿಕಾರಿಲು ಬೊಕ್ಕ ಸಿಬ್ಬಂದಿಲು ಪಂದ್ ಜಿಲ್ಲಾ ಅಗ್ನಿಶಾಮಕ ಅಧಿಕಾರಿಲು ಪ್ರಕಟನೆಡ್ ತೆರಿಪಾದೆರ್.
ಕುಡ್ಲ: ಕೆನರಾ ವಾಣಿಜ್ಯ ಬೊಕ್ಕ ಕೈಗಾರಿಕಾ ಸಂಸ್ಥೆ (ಕೆಸಿಸಿಐ)ದ 83ನೇ ವಾರ್ಷಿಕ ಸಾಮಾನ್ಯ ಸಭೆ ನಡಪರೆ ಇತ್ತ್ದ್, 2023-24ನೇ ಸಾಲ್ದ ಅಧ್ಯಕ್ಷೆರಾದ್ ಸಿಎ ಅನಂತೇಶ್ ವಿ. ಪ್ರಭು ಆಯ್ಕೆ ಆತೆರ್.
ಅಂಚನೆ ಉಪಾಧ್ಯಕ್ಷೆರಾದ್ ಆನಂದ್ ಜಿ. ಪೈ, ಖಜಾಂಚಿಯಾದ್ ಸಿಎ ಅಬ್ದುರ್ ರಹ್ಮಾನ್ ಮುಸ್ಬಾ, ಗೌರವ ಕಾರ್ಯದರ್ಶಿಯಾದ್ ಪಿ.ಬಿ. ಅಹ್ಮದ್ ಮುದಸ್ಸರ್ ಬೊಕ್ಕ ಅಶ್ವಿನ್ ಪೈ ಮಾರೂರ್ ಆಯ್ಕೆ ಆತೆರ್.
ಬೆಂಗ್ಲೂರು: ಒಡಿಪು ಜಿಲ್ಲೆಡ್ ಆವೊಂದಿಪ್ಪುನ ಪೊಯ್ಯೆ ಸಾಗಾಟ, ಕೆಂಪುಕಲ್ಲ್ ಅಂಚನೆ ಬೇತೆ ಸಮಸ್ಯೆದ ಬಗೆಟ್ ಅ.5 ಕ್ಕ್ ಬಯ್ಯ 5 ಗಂಟೆಗ್ ವಿಧಾನಸೌಧದ ಸಮಿತಿ ಕೋಣೆಡ್ ಮುಖ್ಯಮಂತ್ರಿಲೆನ ಜಿಲ್ಲಾ ಉಸ್ತುವಾರಿ ಸಚಿವೆರ್, ಜಿಲ್ಲೆದ ಐನ್ ಶಾಸಕೆರ್, ರಡ್ಡ್ ವಿಧಾನ ಪರಿಷತ್ ಸದಸ್ಯೆರ್, ಜಿಲ್ಲಾಧಿಕಾರಿ, ಜಿಲ್ಲಾ ಪಂಚಾಯತ್ ಸಿಇಒ ಅಂಚನೆ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಸೇರ್ದ್ ಜಿಲ್ಲೆದ ಪ್ರಮುಖೆರ್ನೊಟ್ಟುಗು ಸಭೆ ನಡಪಾಯರೆ ಉಲ್ಲೆರ್.
ಕುಡ್ಲದ ಜೋಡಿ ಒಂಜಿ ಅಕ್ಲೆನ ಮದಿಮೆದ ಕಾಕಜಿನ್ ಕೊರಗ ಭಾಷೆಡ್ ಪ್ರಕಟ ಮಲ್ತ್ದೆರ್. ಈ ಮುಖೇನ ಕೊರಗ ಭಾಷೆನ್ ಒರಿಪಾವುನ ಒಂಜಿ ಎಲ್ಯ ಪ್ರಯತ್ನಗ್ ಕೈ ಪಾರ್ದೆರ್. ತುಳುನಾಡ್ಡ್ ತುಳು ಪನ್ಪುನ ಕೇವಲ ಒಂಜಿ ಭಾಷೆ ಆವಂದೆ ಜನಕ್ಲೆನ್ ಒಟ್ಟುಮಲ್ಪುನ ಕೊಂಡಿದಂಚ ಆತ್ಂಡ್. ಅಂಚನೆ ತುಳುನಾಡ್ಡ್ ಗಲಸುನ ಭಾಷೆಡ್ ಕೊರಗ ಭಾಷೆಲ ಒಂಜಿ, ಉಂದು ಕುಡ್ಲ ಭಾಗದ ಭಾರಿ ಪಿರಾಕ್ದ ಸಮುದಾಯಡ್ ಭಾಷೆ ಜೀವಂತ ಆದ್ ಉಂಡು.
ಉಂದುವೆ ರೀತಿ ಪ್ರತಿ ಭಾಷೆ ನ್ಲ ಒರಿಪಾವೆರೆಗಾದ್ ಭಾಷೆದ ಬಳಕೆ ಮಹತ್ತರದ ಪಾತ್ರ ವಹಿಸೊದುಂಡ್. ಸದ್ಯ, ಕೊರಗ ಸಮುದಾಯದ ಮದಿಮೆದ ಕಾಕಜಿಡ್ ಕೊರಗ ಭಾಷೆಡ್ ಪ್ರಕಟ ಆದ್, ಲಿಪಿ ಕನ್ನಡ ಆಂಡಲ ಸಂಪೂರ್ಣ ಮದಿಮೆದ ಕಾಕಜಿದ ವಿವರ ಕೊರಗ ಭಾಷೆದ ಶೈಲಿಡ್ ಉಂಡು. ಕುಡ್ಲದ ಕೋಡಿಬೆಟ್ಟು ಅಕ್ಷತಾ ಬೊಕ್ಕ ಬಾರ್ಕೂರ್ ಅಮಿತ್ ಕುಮಾರ್ ಅಕ್ಲೆನ ಮದಿಮೆ ನವೆಂಬರ್ 19 ದಾನಿ ಕುಡ್ಲಡ್ ನಿಗದಿ ಆತ್ಂಡ್, ಈ ಮದಿಮೆದ ವಿವರ ಕೊರಗ ಭಾಷೆಡ್ ಪ್ರಕಟ ಆತ್ಂಡ್.
ಬೋಲ್ತೆರ್: ಆಳ್ವಾಸ್ ಶಿಕ್ಷಣ ಪ್ರತಿಷ್ಠಾನದ ಮುತಾಲಿಕೆಡ್ ಅಕ್ಟೋಬರ್ 6 ಬೊಕ್ಕ 7 ದಾನಿ ಬೆದ್ರ ಆಳ್ವಾಸ್ ವಿದ್ಯಾಗಿರಿ ಕ್ಯಾಂಪಸ್ ಡ್ “ಆಳ್ವಾಸ್ ಪ್ರಗತಿ” ಬೃಹತ್ ಉದ್ಯೋಗ ಮೇಳ ನಡಪೆರೆ ಉಂಡು.
ಉದ್ಯೋಗಾಕಾಂಕ್ಷಿಲು ಈ ಮೇಳದ ಪ್ರಯೋಜನನ್ ಪಡೆಯೋನೋಡು ಪಂದ್ ಶಾಸಕೆರ್ ಹರೀಶ್ ಪೂಂಜ ಪಂಡೆರ್. ಆಳ್ವಾಸ್ ಪ್ರಗತಿ ಉದ್ಯೋಗ ಮೇಳಡ್ 204 ರ್ದ್ ಜಾಸ್ತಿ ಬೇತೆ ಬೇತೆ ಕಂಪೆನಿಲು ಪಾಲ್ ಪಡೆದ್ ಸಾವಿರಾರ್ ಜನಕ್ಕ್ ಉದ್ಯೋಗ ತಿಕ್ಕರೆ ಉಂಡು. ಬೋಲ್ತೆರ್ ದ ಗ್ರಾಮೀಣ ಭಾಗದ ಉದ್ಯೋಗಾಕಾಂಕ್ಷಿ ಆಂಜೋಕುಲು-ಪೊಂಜೊಕುಲು ನೆಟ್ಟ್ ಪಾಲ್ ಪಡೆದ್ ಪ್ರಯೋಜನ ಪಡೆಯೊನೊಲಿ. ಪದವಿ ಶಿಕ್ಷಣ, ಐಟಿಐ, ಡಿಪ್ಲೋಮಾ, ಎಂಜಿನಿಯರಿಂಗ್ ಅಂಚೆನೆ ಬೇತೆ ಪಧವೀದರೆರ್ ಈ ಉದ್ಯೋಗ ಮೇಳಡ್ ಪಾಲ್ ಪಡೆಯೊಲಿ ಪಂದ್ ಆಳ್ವಾಸ್ ಶಿಕ್ಷಣ ಸಂಸ್ಥದ ಆಡಳಿತ ಟ್ರಸ್ಟಿ ವಿವೇಕ್ ಆಳ್ವ ತೆರಿಪಾಯೆರ್.ಈ ಪೊರ್ತುಡು ಬೇತೆ ಬೇತೆ ಕಾಲೇಜ್ ದ ಪ್ರಾಂಶುಪಾಲೆರ್ ಬೊಕ್ಕ ಉಪನ್ಯಾಸಕೆರ್ ಇತ್ತೆರ್.
ಶ್ರೀ ಚಾಮುಂಡೇಶ್ವರಿ ದೇವಿ ಸನ್ನಿಧಿ ಪಂಜ-ಕೊಯಿಕುಡೆ ಮೂಲು ಅ.15 ರ್ದ್ 24 ಮುಟ್ಟ ಮಾರ್ನೆಮಿ (ಶರವನ್ನರಾತ್ರಿ) ಉಚ್ಚಯ ನಡಪರೆ ಉಂಡು. ಅ.15 ಕಾಂಡೆ ಗಣಹೋಮ ಬೊಕ್ಕ ಕಲಶ ಸ್ಥಾಪನೆ ಆದ್, ಅ.24 ಕ್ಕ್ ಪೂಜೆದ ಒಟ್ಟಿಗೆ ಮಧ್ಯಾಹ್ನ ಬೊಕ್ಕ ರಾತ್ರೆ ದೇವಿ ದರ್ಶನ, ತೀರ್ಥ ಪ್ರಸಾದ, ಅನ್ನಸಂತರ್ಪಣೆ ನಡಪೆರೆ ಉಂಡು.
ಅಂಚನೆ ನವಕಲಶ ಅಧಿವಾಸ, ಹೋಮ, ಗಣಹೋಮ, ನವಕ ಕಲಶಾಭಿಷೇಕ, ಕಲಶ ಪ್ರತಿಷ್ಠೆ, ಮಹಾಪೂಜೆ, ದರ್ಶನ ಸೇವೆ, ಚಂಡಿಕಾ ಹೋಮ, ಬೇತೆ ಬೇತೆ ಭಜನಾ ಮಂಡಳಿರ್ದ್ ಭಜನಾ ಕಾರ್ಯಕ್ರಮ ನಡಪರೆ ಉಂಡು. ಶ್ರೀ ದೇವಿ ಸನ್ನಿಧಿಡ್ ಪ್ರತಿದಿನ ನಡಪುನ ಮಾತಾ ಕಾರ್ಯಕ್ರಮಡ್ ಭಕ್ತೆರ್ ಪಾಲ್ ಪಡೆದ್ ಗಂಧ-ಪ್ರಸಾದ ಸ್ವೀಕಾರ ಮಲ್ತ್ ದ್ ಶ್ರೀ ದೇವಿನ ಕೃಪೆಗ್ ಪಾತ್ರರಾವೊಡು ಪಂದ್ ಕ್ಷೇತ್ರದ ಮುಖ್ಯಸ್ಥೆರ್ ಸೀತಾರಾಮ ಅಮೀನ್ ಲೆಪ್ಪೋಲೆಡ್ ತೆರಿಪಾದೆರ್.
ನಿಟ್ಟೆ ಕಡಂಬೂರಿ: ದುರ್ಗಾಂಬಿಕ ದೇವಸ್ಥಾನಡ್ ಅ.15 ರ್ದ್ 24 ಮುಟ್ಟ ನವರಾತ್ರಿ ಉಚ್ಚಯ ನಡಪೆರೆ ಉಂಡು. ಅ.15 ದಾನಿ ಕಾಂಡೆ ಬಿಂಬ ಶುದ್ದಿ, ಘಟ ಸ್ಥಾಪನೆ, ಮಹಾಪೂಜೆ ನಡಪೆರೆ ಉಂಡು. ಅಂಚೆನೆ ಭಜನಾ ಕಾರ್ಯಕ್ರಮ, ಮಹಾಪೂಜೆ, ಅನ್ನಸಂತರ್ಪಣೆ ಪ್ರತಿ ದಿನ ನಡಪುಂಡು. ಭಕ್ತಾದಿಲು ಮಾತ ಬತ್ತ್ ದ್, ಈ ಪುಣ್ಯ ಕಾರ್ಯಡ್ ಪಾಲ್ ಪಡೆದ್ ತನು,ಮನ,ಧನರ್ದ್ ಸಹಕರಿಸಾದ್ ತೀರ್ಥ ಪ್ರಸಾದ ಸ್ವೀಕಾರ ಮಲ್ತ್ ದೇವಿನ ಕೃಪೆಗ್ ಪಾತ್ರರಾವೊಡು ಪಂದ್. ಲೆಪ್ಪೋಲೆಡ್ ಮೊಕ್ತೇಸರೆರ್ ಮಹಾಬಲ ಪೂಜಾರಿ ಬೊಕ್ಕ,ಸಂಜೀವ ಬಂಗೇರ ತೆರಿಪಾದೆರ್.
