Mon. Nov 23rd, 2026

ಕುಡ್ಲದ ಸುದ್ದಿ | Mangalore News

ಕುಡ್ಲ ಪೇಂಟೆದ ಬುಲೆಚ್ಚಿಲ್‌ಗ್ 75 ಕೋಟಿ ರೂಪಾಯಿ : ಭೈರತಿ ಸುರೇಶ್

ಕುಡ್ಲ : ಕುಡ್ಲನ್ ಪ್ರವಾಸಿತಾಣ ಮಲ್ಪರೆ 50 ಕೋಟಿ ರೂಪಾಯಿ ವಿಶೇಷ ಅನುದಾನ ಅಂಚೆನೆ ಕುಡ್ಲ ಪೇಂಟೆದ ಅಭಿವೃದ್ದಿಗ್ ಪಾಲಿಕೆಗ್ 25 ಕೋಟಿ ರೂಪಾಯಿ ಅನುದಾನೊನು ಬೇಗೊಡು ಬುಡುಗಡೆ ಮಲ್ಪುವ ಪನ್ದ್ ನಗರಾಭಿವೃದ್ದಿ ಸಚಿವೆರ್ ಭೈರತಿ ಸುರೇಶ್ ಪಂಡೆರ್.

ಕುಡ್ಲದ ಅಭಿವೃದ್ಧಿ ಡ್ ಒವ್ವೇ ರಾಜಕೀಯ ಇಜ್ಜಿ. ಜನಕ್ಲೆನ ತೀರ್ವೆದ ಪನವು ಜನಕುಲೆಗೇ ಗಲಸುಲೆಕ್ಕ ಆವೊಡು. 749 ಕೋಟಿ ರೂ. ಕರ್ಚಿಡ್ ಕುಡ್ಲದ ಸ್ಮಾರ್ಟ್ ಸಿಟಿ ಬೇಲೆಲು ಆವೊಂದುಲ್ಲ, 24 ಬೇಲೆಲು ಆವೊಂದುಲ್ಲ. ರಾಜ್ಯೊಡೇ ಅತ್ಯುತ್ತಮ ಪನ್ಪಿನಂಚ ಎಮ್ಮೆಕೆರೆ ಸ್ವಿಮ್ಮಿಂಗ್ ಪೂಲ್ ನಿರ್ಮಾಣ ಆತ್ಂಡ್ ಪನ್ಡೆರ್. ಈ ಪೊರ್ತುಡು ಸ್ವಿಮ್ಮಿಂಗ್ ಪೂಲ್ ಉದಿಪನ ಲೇಸ್ ದ ಗುರ್ಕಾರ್ಮೆ ವೈಸೊಂದಿತ್ತಿನ ವೇದವ್ಯಾಸ ಕಾಮತೆರ್ ಪಾತೆರ್ದ್, ಸ್ಮಾರ್ಟ್ ಸಿಟಿ ಯೋಜನೆದ ಮೂಲಕ ಕುಡ್ಲ ಅಭಿವೃದ್ದಿದಂಚಿ ಮಲ್ಲ ಬಕ್ಕರ್ ಪಾಡೊಂದುಂಡು. ಪಿಪಿಪಿ ಮಾದರಿಡ್ ಕುಡ್ಲದ ಸೆಂಟ್ರಲ್ ಮಾರ್ಕೆಟ್ ಬುಲೆಚ್ಚಿಲ್ ಆವೊಂದುಂಡು ಪನ್ದ್ ಪನ್ಡೆರ್.

ಕುಕ್ಕರ್ ಬಾಂಬ್ ಪುಡಾದಿನ ಕೇಸ್ : ಬೇಗೊಡೆ ಆರೋಪಪಟ್ಟಿ

 ಕುಡ್ಲ ಕುಕ್ಕರ್ ಬಾಂಬ್ ಸ್ಪೋಟದ ಜಡ್ತೆದ ಅಕೇರಿಗ್ ಎತ್ತಿನ ರಾಷ್ಟ್ರೀಯ ತನಿಖಾ ದಳ, ಆರೋಪಿ ಶಾರೀಕ್ ಸೇರ್ದ್ ಐನ್ ಜನತ ಮಿತ್ತ್ ಆರೋಪಪಟ್ಟಿನ್ ಬೇಗನೆ ಸಲ್ಲಿಕೆ ಮಲ್ಪರೆ ಉಂಡು. ಈ ಕೇಸ್ ಡ್ ಸದ್ಯೊಗು ಶಾರೀಕ್, ಮುನೀರ್, ಯಾಸೀನ್, ಅರಾಫತ್ ಒಟ್ಟುಗು ಐನ್ ಜನನ್ ಅರೆಸ್ಟ್ ಮಲ್ದೆರ್.

ಈ ಆರೋಪಿಲೆನ ಮಿತ್ತ್ ಐವೊರ್ದುಲಾ ಎಚ್ಚಿನ ಸಾಕ್ಷಿಲೆನ ಹೇಳಿಕೆ ಅಂಚೆನೆ ತಾಂತ್ರಿಕ ಸಾಕ್ಷಿಲೆನ್ ಒಟ್ಟು ಮಲ್ದ್ಂಡ್. ಆರೋಪಿಲು ಕದ್ರಿ ದೇವಲ್ಯೊಗು ಬಾಂಬ್ ಪಾಡುನ ಅಟ್ಟನೆಡ್ ಇತ್ತೆರ್ ಪನ್ದ್ ತನಿಕೆಡ್ ಬೈದಿತ್ತ್ಂಡ್. ಕದ್ರಿರ್ದ್ ಬೊಕ್ಕ ಒಡಿಪುದ ಕೃಷ್ಣ ಮಠ, ಚಿಕ್ಕಮಗಳೂರುದ ಬಿಜೆಪಿ ಕಚೇರಿಲಾ ಮೊಕಲೆನ ಟಾರ್ಗೆಟ್ ಡ್ ಇತ್ತ್ಂಡ್. ಈ ಬಗೆಟ್ ಆಜಿ ತಿಂಗೊಲು ತರಬೇತಿ ದೆತೊನ್ದಿನ ಉಲ್ಲೇಖಲಾ ಉಂಡು.

ಕುಡ್ಲಡ್ ನನ ಈ ಜಾಗೆಲೆಡ್ ಹಾರ್ನ್ ಪಾಡಿಯರ್ಡ ದಂಡ ಕಟ್ಟೊಡು! No Horn Zoneದ ಬಗೆಟ್ ಪೋಲೀಸ್ ಪ್ರಕಟನೆ!

ಕುಡ್ಲಡ್ ಲೆಕ್ಕೊರ್ದು ಜಾಸ್ತಿ ಟ್ರಾಫಿಕ್ ಆವೊಂದುಂಡು. ಗಾಡಿಡ್ ಪೋಪಿನಕುಲು ಒಟ್ಟಾರೆ ಹಾರ್ನ್ ಪಾಡುನೆರ್ದ್ ಮಸ್ತ್ ಅನಾನುಕೂಲ ಆಪುಂಡು. ಅಂಚಾದ್ ಕುಡ್ಲದ ಕೆಲವು ಜಾಗೆಲೆಡ್ ಹಾರ್ನ್ ಪಾಡರೆ ಬಲ್ಲಿ ಪನ್ದ್ ಪೋಲೀಸೆರ್ ಪ್ರಕಟಣೆ ಕೊರ್ತೆರ್. ಉಂದೆನ್ ಮೀರ್ ‌ದ್ ಪೋಂಡ ಫೈನ್ ಬೂರುಂಡು.

ಹೈಕೋರ್ಟ್‌ದ ಅನು ಗೆತೊಂದು ಬೆಂಗ್ಳೂರ್‌ ದ ಪರೀಕ್ಷೆನ್ ಕುಡ್ಲಡ್ ಬರೆಯಿನ ದಿಂಜಿ ಬಂಜಿನಾಲ್

ಕುಡ್ಲ: ಬೆಂಗ್ಳೂರ್‌ಡ್ ಬರೆಯೊಡಿತ್ತಿನ ನ್ಯಾಯಾಂಗ ಸೇವೆದ ಪರೀಕ್ಷೆನ್ ದಿಂಜಿ ಬಂಜಿನಾರ್ ಒರ್ತಿ ಕುಡ್ಲಡೇ ಬರೆಯಿನ ಅಪರೂಪೊದ ನಡಕೆ ನಡತ್‌ದ್ಂಡ್. ಬೆಂಗ್ಳೂರ್‌ಡ್ ಅಟ್ಟನೆ ಆದಿತ್ತಿನ ನ್ಯಾಯಾಂಗ ಸೇವೆದ ಪರೀಕ್ಷೆಗ್ ಕುಡ್ಲದ ನ್ಯಾಯವಾದಿ ನೇತ್ರಾವತಿ ಅಜತ್ ಬತ್ತಿತ್ತೆರ್. ಎಣ್ಮರೆ ತಿಂಗೊಲ್ದ ದಿಂಜಿ ಬಂಜಿನಾಲ್ ನ್ಯಾಯವಾದಿ ನೇತ್ರಾವತಿ ಎಂಕ್ ಬೆಂಗ್ಳೂರ್‌ಗ್ ಪೋದು ಪರೀಕ್ಷೆ ಬರೆಯೆರೆ ಸಾಧ್ಯ ಇಜ್ಜಿ.

ಅಂಚಾದ್ ಕುಡ್ಲಡೇ ಪರೀಕ್ಷೆ ಬರೆಯೆರೆ ಅನು ಮಲ್ತ್ ಕೊರೊಡು ಪಂದ್ ನೇತ್ರಾವತಿ ಮೇರ್ ಹೈಕೋರ್ಟ್‌ಗ್ ಬಿನ್ನಾಪು ಸಂದಾದಿತ್ತೆರ್. ಸಿವಿಲ್ ನ್ಯಾಯಾಧೀಶೆರೆನ ನೇಮಕಾತಿ ಸಂಬಂಧಿತಿನ ಹೈಕೋರ್ಟ್‌ದ ಸಮಿತಿ ಈ ಅರ್ಜಿನ್ ಪುರಸ್ಕರಿತ್‌ದ್ ಅಭ್ಯರ್ಥಿನ ಬಿನ್ನಾಪುದಂಚ ಕುಡ್ಲಡೇ ಪರೀಕ್ಷೆ ಬರೆಯೆರೆ ಅನು ಕೊರ್ದಿತ್ತ್ಂಡ್. ರಾಜ್ಯ ಹೈಕೋರ್ಟ್‌ದ ವಿಶೇಷ ಅನುವುಡು ನೇತ್ರಾವತಿ ನ್ಯಾಯಾಂಗ ಸೇವೆದ ಮುಖ್ಯ ಪರೀಕ್ಷೆನ್ ಕುಡ್ಲ ನ್ಯಾಯಂತಡೆದ ಕಟ್ವಾನೊಡು ಸನಿಯಾರ ಬೊಕ್ಕ ಐತಾರ ಬರೆತೆರ್. ಎಚ್ಚರ್ಗೆದ ಕ್ರಮ ಆದ್ ನ್ಯಾಯಂತಡೆತಲ್ಪ ಆ್ಯಂಬುಲೆನ್ಸ್‌ನ್ಲಾ ತಯಾರ್ ದೀದಿತ್ತೆರ್.

ಅಲೆ ಬುಡಿಯೆರ್ ಗೆ.. ಬೆಂಗ್ಲೂರು ಕಂಬುಲದ ಗೌಜಿ ಗಮ್ಮತ್ತ್ ನನ ಸುರು

ತುಳುನಾಡ್ ದ ರೈತಾಪಿ ಬಂಧುಲೆನ ವೀರ ಕ್ರೀಡೆಯಾಯಿನ ಕಂಬುಲಗ್ ಸುಮಾರ್ ಸಾವಿರರ್ದ್ ಜಾಸ್ತಿ ವರ್ಷದ ಇತಿಹಾಸ ಉಂಡು. ತುಳುನಾಡ್ ಡ್ ನಡಪುನ ಬಲಿಪುನ ಎರುಕುಲೆನ ಪಂತನೇ ಕಂಬುಲ.

ತುಳುನಾಡ್‌ಡ್ ಯಕ್ಷಗಾನ ಜಾನಪದ ಕಲೆ ಆಂಡ, ಕಂಬುಲ ಜಾನಪದ ಕ್ರೀಡೆ. ಯಕ್ಷಗಾನ ಬೊಕ್ಕ ಕಂಬುಲ ತುಳುನಾಡ್ ದ ಪುದರ್ ಡ್ ಅಂಟ್‌ದ್ ಪೊತುಂಡು. ಕುಂದಾಪುರರ್ದ್ ಕಾಸ್ರೋಡು ಮುಟ್ಟ ಪಸರ್ನ ತುಳುನಾಡ್ ದ ಕಂಬುಲ ಬಾರಿ ಜನಪ್ರಿಯತೆನ್ ಗಳಿಸಾದ್ಂಡ್. ಪುತ್ತೂರುದ ಪುಗರ್ತೆದ ಶಾಸಕೆರ್ ಅಶೋಕ್‌ ಕುಮಾರ್‌ ರೈ ನೇತೃತ್ವಡ್ ನವೆಂಬರ್‌ 25 ಬೊಕ್ಕ 26 ದಾನಿ ಇತಿಹಾಸಡೆ ಸುರುತ ಸರ್ತಿ ಬೆಂಗಳೂರುದ ಅರಮನೆ ಮೈದಾನಡ್ ’ಬೆಂಗಳೂರು ಕಂಬಳ – ನಮ್ಮ ಕಂಬಳ’ ನಡಪೆರೆ ಉಂಡು.

ನ. 24ದಾನಿ ಕಾಂಡೆ 10.30ಕ್ಕ್ ಆಹಾರ ಮೇಳನ್ ಮುಖ್ಯಮಂತ್ರಿಲೆನ ರಾಜಕೀಯ ಕಾರ್ಯದರ್ಶಿ ಡಾ.ಕೆ. ಗೋವಿಂದರಾಜ್ ಉದಿಪನ ಮಲ್ಪೆರೆ ಉಲ್ಲೆರ್. ವಸ್ತು ಪ್ರದರ್ಶನ ಮೇಳನ್ ವಿಶ್ವ ತುಳು ಬೊಕ್ಕ ಸಾಂಸ್ಕೃತಿಕ ಸಮ್ಮೇಳನದ ಗೌರವಾಧ್ಯಕ್ಷೆರ್ ಡಾ.ರವಿ ಶೆಟ್ಟಿ ಮೂಡಂಬೈಲು, ಕತಾರ್‌ ಉದಿಪನ ಮಲ್ಪೆರೆ ಉಲ್ಲೆರ್.‌ ನ.25 ಶನಿವಾರ- ಕಾಂಡೆ ಮಾಜಿ ಮುಖ್ಯಮಂತ್ರಿ ಬೆಂಗಳೂರು ಉತ್ತರದ ಸಂಸದೆರ್ ಡಿ.ವಿ.ಸದಾನಂದ ಗೌಡ ಮೇರ್‌ನ ಗುರ್ಕಾರ್ಮೆಡ್ ನಡಪುನ ಸಭಾ ಕಾರ್ಯಕ್ರಮನ್‌ ಮಾಜಿ ಮುಖ್ಯಮಂತ್ರಿ ಬಿ.ಯಸ್‌.ಯಡಿಯೂರಪ್ಪ ಉದಿಪನ ಮಲ್ಪೆರೆ ಉಲ್ಲೆರ್.

ಕಂಬುಲ ಕರೆನ್ ಖ್ಯಾತ ಸಿನಿಮಾ ನಿರ್ಮಾಪಕಿ ಅಶ್ವಿನಿ ಪುನೀತ್ ರಾಜಕುಮಾರ್ ಉದಿಪನ ಮಲ್ಪೆರೆ ಉಲ್ಲೆರ್. ಸಾಂಸ್ಕೃತಿಕ ವೇದಿಕೆನ್ ಮಾಜಿ ಮುಖ್ಯಮಂತ್ರಿ ಹೆಚ್.ಡಿ ಕುಮಾರಸ್ವಾಮಿ ಉದಿಪನ ಮಲ್ಪೆರೆ ಉಲ್ಲೆರ್. ಈ ಸಭಾ ಕಾರ್ಯಕ್ರಮಡ್ ಕರ್ನಾಟಕ ವಿಧಾನ ಸಭೆ ವಿರೋಧ ಪಕ್ಷದ ನಾಯಕೆರ್ ಆರ್. ಅಶೋಕ್‌, ಮಾಜಿ ಮುಖ್ಯಮಂತ್ರಿ ಬಸವರಾಜ ಎಸ್.ಬೊಮ್ಮಾಯಿ, ಸಂಸದೆರ್ ನಳಿನ್ ಕುಮಾರ್ ಕಟೀಲ್, ಸೇರಿನಂಚ ಮಸ್ತ್ ಗಣ್ಯ ಅತಿಥಿಲು ಪಾಲ್‌ ಪಡೆಯೆರೆ ಉಲ್ಲೆರ್. ಬಯ್ಯಗ್‌ ಜಲಸಂಪನ್ಮೂಲ ಬೊಕ್ಕ ಬೆಂಗಳೂರು ಅಭಿವೃದ್ಧಿ ಇಲಾಖೆ ಸಚಿವೆರ್, ಉಪಮುಖ್ಯಮಂತ್ರಿ ಡಿ.ಕೆ.ಶಿವಕುಮಾರ್‍ ಮೇರ್‌ನ ಗುರ್ಕಾರ್ಮೆಡ್ ನಡಪುನ ಸಭಾ ಕಾರ್ಯಕ್ರಮನ್ ರಾಜ್ಯದ ಮುಖ್ಯಮಂತ್ರಿ ಸಿದ್ದರಾಮಯ್ಯೆರ್‌ ಉದಿಪನ ಮಲ್ಪೆರೆ ಉಲ್ಲೆರ್. ವಿಧಾನ ಸಭೆತ ಸಭಾಧ್ಯಕ್ಷೆರ್ ಯು.ಟಿ. ಖಾದರ್, ಗೃಹ ಸಚಿವ ಡಾ.ಜಿ.ಪರಮೇಶ್ವರ, ಗ್ರಾಮೀಣಾಭಿವೃದ್ಧಿ ಬೊಕ್ಕ ಪಂಚಾಯತ್‌ ರಾಜ್‌,ಐ.ಟಿ & ಬಿ.ಟಿ.,ಸಚಿವೆರ್ ಪ್ರೀಯಾಂಕ್‌ ಖರ್ಗೆ, ಮಹಿಳಾ ಬೊಕ್ಕ ಮಕ್ಕಳ ಕಲ್ಯಾಣ, ಒಡಿಪು ಜಿಲ್ಲಾ ಉಸ್ತುವಾರಿ ಸಚಿವೆ ಲಕ್ಷ್ಮೀ ಹೆಬ್ಬಾಳ್ಕರ್ ಮಲ್ಲ ಬಿನ್ನೆರಾದ್‌ ಪಾಲ್‌ ಪಡೆಯೆರೆ ಉಲ್ಲೆರ್.

ಹ್ಯಾಕರ್‌ನಕಲೆನ ಬಲೆಕ್ಕ್ ತಿಕ್ಕ್‌ದ್ ಜೈಲ್ ಸೇರ್ದಿತ್ತಿನ ಜವನೆ ಇನಿ ತುಳುನಾಡ್‌ಗ್

ಬ್ಯಾಂಕ್ ಖಾತೆದ ಹ್ಯಾಕರ್ನಕುಲು ತಿಕ್ಕಾದ್ ಪಾಡ್ದ್ ಸೌದಿ ಅರೇಬಿಯಾದ ರಿಯಾದ್ ಜೈಲ್‌ಡ್ ಕರಿನ 11 ತಿಂಗೊಲುಡು ಬಂಧಿಯಾದಿತ್ತಿನ ಕಡಬದ ಐತ್ತೂರು ಗ್ರಾಮ ಮಜೂರುದ ಚಂದ್ರಶೇಖರ್ ಮೇರ್ ಬುಡುಗಡೆ ಆದ್ ಊರುಗು ಬರೊಂದುಲ್ಲೆರ್. ರಿಯಾದ್‌ದ ಪೋಲೀಸೆರ್ ಅರೆನ್ ವಿಮಾನೊಡು ಮುಂಬೈಗ್ ಕಡಪುಡುವೆರ್, ಅಲ್ತ್ ಬಯ್ಯಗ್ ಕುಡ್ಲ ವಿಮಾನ ಉಂತಡೆಕ್ ಬರ್ಪೆರ್.

ಚಂದ್ರಶೇಖರ್ ಮೇರ್ ದಾಲಾ ತಪ್ಪು ಮಲ್ಪಂದೆ ಹ್ಯಾಕರ್‌ನಕಲೆನ ವಂಚನೆಗ್ ತಿಕ್ಕ್‌ದ್ ಬೂರ್ದು ಮಸ್ತ್ ಬಂಗ ತಿಂಡೆರ್. ಕಡೆಕ್ಲಾ ಉಂದೆಟ್ ಮೆರೆನ ದಾಲಾ ತಪ್ಪು ಇಜ್ಜಿ ಮೇರ್ ನಿರಪರಾಧಿ ಪನ್ದ್ ತೆರಿನ ರಿಯಾದ್ ಪೋಲೀಸೆರ್ ಮೆರೆನ್ ಬುಡುಗಡೆ ಮಲ್ತ್ ಊರುಗು ಕಡಪುಡುದೆರ್.

ಕಟೀಲ್ : 44 ಜೋಡಿಲೆಗ್ ಮದಿಮೆ

 ಕಟೀಲ್ ಶ್ರೀ ದುರ್ಗಾಪರಮೇಶ್ವರಿ ದೇವಲ್ಯಡ್ ನವೆಂಬರ್ 19ಗ್ 44 ಜೋಡಿಲೆಗ್ ಸಾಮೂಹಿಕ ಮದಿಮೆ ನಡತ್ಂಡ್. ಐತಾರ ಕಾಂಡೆ 8ಗ್ ಸುರು ಆಯಿನ ಮದಿಮೆದ ಮೂರ್ತ ಮದ್ಯಾಹ್ನ 1 ಮುಟ್ಟ ಇತ್ತ್ ಸುಮಾರ್ 15 ಸಾರದಾತ್ ಭಕ್ತೆರ್ ದೇವಲ್ಯೊಗು ಭೇಟಿ ಕೊರ್ತೆರ್.

ಮದಿಮೆ ಎಡ್ಡೆಡ್ ನಡಪರೆ 8 ಜನ ಪುರೋಹಿತೆರೆನ 4 ಕೌಂಟರ್ ಅಂಚೆನೆ ರಿಜಿಸ್ಟ್ರೇಷನ್ ಗ್ ಬೇತೆನೇ ಸಿಬ್ಬಂದಿನ್ ದೀದಿತ್ತೆರ್. ಅಂಚಾದ್ 44 ಜೋಡಿಲೆನ ಮದಿಮೆ ಎಡ್ಡೆಡ್ ನಡತ್ಂಡ್.‌

ಮಂಗಳೂರು ವಿವಿ, ನನಲ ಆವಂದಿನ ಪೊಸ ಕುಲಪತಿ ನೇಮಕ

ಇತೋರ್ತು ನಡಪೊಡಿತ್ತಿನ ಮಂಗಳೂರು ವಿವಿದ ಕುಲಪತಿನ ಆಯ್ಕೆ ನನಲ ಅಂತಿಮ ಆವಂದಿನ ತೋಜಿದ್ ಬರೊಂದುಂಡು. ಕುಲಪತಿ ಆಯ್ಕೆದ ಬಗೆಟ್ ಶೋಧನಾ ಸಮಿತಿ ಕರಿನ ರಡ್ಡ್ ತಿಂಗೊಲುದ ದುಂಬೇ ಮಹತ್ವದ ಸಭೆ ಮಲ್ತ್ ಸರಕಾರೊಗು ವರದಿ ಮಲ್ದ್ಂಡ್. ಆಂಡಲ ಪೊಸ ಕುಲಪತಿನ ಆಯ್ಕೆ ಸರಕಾರೊಡೇ ತಿಕೊಂದು ಕುಲ್ದುಂಡು.

ಮೈಸೂರು ವಿ.ವಿದ ರಾಜ್ಯಶಾಸ್ತ್ರ ವಿಭಾಗದ ನಿವೃತ್ತ ಉಪನ್ಯಾಸಕೆ ಪ್ರೊ| ಮುಜಾಫರ್‌ ಅಸ್ಸಾದಿ, ಮಂಗಳೂರು ವಿ.ವಿ.ದ ಮಾಜಿ ಕುಲಸಚಿವ (ಪರೀಕ್ಷಾಂಗ)ರಾಜ್ಯಶಾಸ್ತ್ರ ಉಪನ್ಯಾಸಕ ಪ್ರೊ| ಪಿ.ಎಲ್‌. ಧರ್ಮ ಅಂಚೆನೆ ಮಂಗಳೂರು ವಿ.ವಿ.ಯ ಮಾಜಿ ಕುಲಸಚಿವ (ಆಡಳಿತ), ದೈಹಿಕ ಶಿಕ್ಷಣ ವಿಭಾಗದ ನಿರ್ದೇಶಕ ಪ್ರೊ| ಕಿಶೋರ್‌ ಕುಮಾರ್‌ ಸಿ.ಕೆ. ಒಟ್ಟುಗು ಸುಮಾರ್ ಪುದರುಲು ಕುಲಪತಿ ಹುದ್ದೆಗ್ ಕೇನ್ದ್ ಬೈದಿತ್ತ್ಂಡ್. ಸರಕಾರದ ಮಟ್ಟೊಡು ಈ ಬಗೆಟ್ ಚರ್ಚೆಲಾ ನಡತಿತ್ತ್ಂಡ್. ಸರಕಾರ “ಕರ್ನಾಟಕ ರಾಜ್ಯ ವಿಶ್ವವಿದ್ಯಾನಿಲಯ ಕಾಯ್ದೆ’ ಕನಪಿನ ತಾಪುರ್ತೋಪುಡು ಅವ್ ಆಯಿನ ಬೆರಿಕ್ ವಿಸಿ ನೇಮಕ ಮಲ್ಪುನ ಸಾಧ್ಯತೆ ಉಂಡು ಪನ್ದ್ ಪನೊಂದುಲ್ಲೆರ್.

ಕಾಪು: ಕಾರ್ ಆಕ್ಸಿಡೆಂಟ್ ರೋಡ್ ಕಡತೊಂದು ಇತ್ತಿನ ಜನ ಕಲಾಸ್…!!!

ಕಾಪು: ಕಟಪಾಡಿದ ಭಾಗ್ಯಲಕ್ಷ್ಮೀ ಗ್ರಾನೈಟ್ಸ್ ಎದುರು ಕಾರ್ ಒಂಜಿ ಡಿಕ್ಕಿ ಹಾಕಿನ ಪರಿಣಾಮ ರೋಡ್ ಕ್ರಾಸ್ ಮಲ್ತೊಂದು ಇತ್ತಿನ ಜನ ಒಂಜಿ ತೀರ್ ಪೋಯಿನ ಘಟನೆ ನಡತ್ಂಡ್.

ತೀರ್ ಪೋಯಿನಾರ್ ಇನ್ನಂಜೆದ ಉತ್ತಮ (33) ಪಂದ್ ತೆರಿದ್ ಬೈದ್ಂಡ್.

ಕಾರ್ ಡಿಕ್ಕಿ ಹಾಕ್ ದ್ ಡ್ರೈವರ್ ಪರಾರಿ ಆತೆ ಪಂದ್ ತೆರಿದ್ ಬೈದ್ಂಡ್. ಗಾಯಾಳುನು ಆಸ್ಪತ್ರೆಗ್ ಲೆತಪೋನಗ ಸಾದಿದ ನಡುಟ್ ತೀರ್ ಪೋತೆರ್.

ಈ ಬಗೆಟ್ ಕಾಪು ಪೊಲೀಸ್ ಠಾಣೆಡ್ ಕೇಸ್ ದಾಖಲಾತ್ಂಡ್.

ನ.24: ಪಣೋಲಿಬೈಲ್‌ ಕಲ್ಲುರ್ಟಿ ದೈವಸ್ಥಾನಡ್‌ ವರ್ಷಾಧಿದ ಕೋಲ

ಬಂಟ್ವಾಳ: ಪಣೋಲಿಬೈಲ್‌ ಶ್ರೀ ಕಲ್ಲುರ್ಟಿ ದೈವಸ್ಥಾನಡ್‌ ನ.24 ದಾನಿ ರಾತ್ರೆ 10 ಗಂಟೆರ್ದ್‌ ವರ್ಷಾಧಿದ ಕೋಲ ನಡಪೆರೆ ಉಂಡು.

ನ.23 ದಾನಿ ಕೊಪ್ಪರಿಗೆ ಮೂರ್ತ, ಕುಣಿತ ಭಜನೆ, ಬೇತೆ ಬೇತೆ ಸಾಂಸ್ಕೃತಿಕ ಕಾರ್ಯಕ್ರಮ, ರಾತ್ರೆ 8 ಗಂಟೆಗ್‌ ಯಕ್ಷಗಾನ ವೈಭವ ಸ್ವರಾಭಿಷೇಕ, ನಡಪರೆ ಉಂಡು.
ನ.24 ದಾನಿ ಕಾಂಡೆ ನವಕ ಕಳಶ ಪ್ರದಾನ, 12 ತಾರಾಯಿದ ಗಣಹೋಮ, ನಾಗತಂಬಿಲ, ಅನ್ನಸಂತರ್ಪಣೆ, ಅಂಚನೆ ಬೇತೆ ಬೇತೆ ಭಜನಾ ಮಂಡಳಿರ್ದ್‌ ಭಜನಾ ಕಾರ್ಯಕ್ರಮ ನಡಪೆರೆ ಉಂಡು. ರಾತ್ರೆ ಭರತನಾಟ್ಯ ನೃತ್ಯ ವೈಭವ, 8.30 ರ್ದ್‌ “ಅವು ದಾಲಾಪುಜಿ” ನಾಟಕ ನಡಪೆರೆ ಉಂಡು.

ಈ ಮಾತ ಕಾರ್ಯಡ್‌ ಭಕ್ತೆರ್‌ ಪಾಲ್‌ ಪಡೆದ್‌ ಶ್ರೀ ಕಲ್ಲುರ್ಟಿ ಕಲ್ಕುಡ ದೈವದ ಸಿರಿಮುಡಿ ಗಂಧ ಪ್ರಸಾದ ಸ್ವೀಕಾರ ಮಲ್ಪೊಡು ಪಂದ್‌ ಲೆಪ್ಪೋಲೆಡ್‌ ತೆರಿಪಾದೆರ್.

You Missed