Fri. Nov 20th, 2026

ಕುಡ್ಲದ ಸುದ್ದಿ | Mangalore News

ತುಳುನಾಡು ಬೇತೆ ಬೇತೆ ಬಾಸೆಲು ಉಪ್ಪುನ ಬೂಡು: ಡಾ.ವಾಸುದೇವ ಬೆಳ್ಳೆ

ಕುಡ್ಲಡ್ ಬಹುಭಾಷಾ ಕಬಿ ಕೂಟ ; 14 ಭಾಷೆದ ಕಬಿತೆ ವಾಚನ

ಕುಡ್ಲ : ತುಳುನಾಡು ಬೇತೆ ಬೇತೆ ಭಾಷೆಲು ಉಪ್ಪುನ ಬೂಡು.ವಿವಿಧ ಸಮುದಾಯದಕ್ಲೆನ ನಾಲಾಯಿಡ್ ಉಪ್ಪುನ ತನ್ನ ಅಪ್ಪೆ ಬಾಸೆದ ಬಗೆಟ್ಟ್ ಪ್ರತಿಯೊರಿಲ ಅಭಿಮಾನ ಪಡೆಯೊಡು ” ಪಂದ್ ಮುಲ್ಕಿ ಕಾರ್ನಾಡ್ ಸರಕಾರಿ ಪ್ರೌಢಶಾಲೆದ ಮುಖ್ಯೋಪಾಧ್ಯಾಯೆರ್, ಲೇಖಕೆರ್ ಡಾ.ವಾಸುದೇವ ಬೆಳ್ಳೆ ಪಂಡೆರ್.
ಆರ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ವತಿರ್ದ್ ತುಳುಭವನಡ್ ತುಳು ಪರಿಷತ್ ಬೊಕ್ಕ ಮಯೂರಿ ಫೌಂಡೇಶನ್ ಸಹಯೋಗಡ್
ನಡತಿನ 6ನೇ ವರ್ಷದ ದಸರಾ ಬಹುಭಾಷಾ ಕಬಿ ಕೂಟ ಉದಿಪನ ಮಲ್ತ್‌ದ್ ಪಾತೆರಿಯೆರ್.

ಕಬಿ ಕೂಟದ ಗುರ್ಕಾರ್ಮೆನ್ ಪೂವರಿ ತುಳು ಪತ್ರಿಕೆದ ಸಂಪಾದಕೆರ್ ವಿಜಯ ಕುಮಾರ್ ಭಂಡಾರಿ ಹೆಬ್ಬಾರಬೈಲ್ ವಹಿಸ್‌ದಿತ್ತೆರ್. ಲೇಖಕಿ ಡಾ.ಝೀಟಾ ಲೋಬೋ, ಕವಿ ಯು.ಕೆ ಖಾಲಿದ್ ಉಳ್ಳಾಲ್ಕರ್ , ವಿ.ಬಿ. ಆಚಾರ್ಯ ಬಿನ್ನೆರಾದ್ ಪಾಲ್ ಪಡೆದಿತ್ತೆರ್.
ಅಕಾಡೆಮಿ ಅಧ್ಯಕ್ಷೆರ್ ತಾರಾನಾಥ ಗಟ್ಟಿ ಕಾಪಿಕಾಡ್ ಪ್ರಾಸ್ತಾವಿಕ ಪಾತೆರ ಪಂಡೆರ್.
ಕಬಿ ಗೋಷ್ಠಿಡ್ ಶಾರದಾ ಶೆಟ್ಟಿ (ತುಳು), ವಿಜಯರಾಜ್ ಪುಣಿಂಚಿತ್ತಾಯ(ಶಿವಳ್ಳಿ ತುಳು), ರಾಜೇಂದ್ರ ಟಿ.ಕಾರಿಕೆ (ಮಾವಿಲನ್ ತುಳು), ಪ್ರೊ.ಸಂಜೀವ ಕುದ್ಪಾಜೆ(ಅರೆಭಾಷೆ), ಶರತ್ ಕುಮಾರ್ ತುಳುಪುಳೆ(ಚಿತ್ಪಾವನಿ), ಆಯಿಷಾ ಯು.ಕೆ (ಬ್ಯಾರಿ), ಸುಭಾಷ್ ಪೆರ್ಲ (ಮರಾಠಿ), ಆಂಡ್ರ್ಯೂ ಎಲ್. ಡಿ ಡಿಕೂನ್ಹಾ (ಕೊಂಕಣಿ), ಮಂಜುನಾಥ ಗುಂಡ್ಮಿ (ಕುಂದಗನ್ನಡ), ದೀಪಿಕಾ ಉಡುಪಿ (ಕೊರಗ ಭಾಷೆ), ಜೋತ್ಸ್ನ ಎಂ.ಕಡಂದೇಲು (ಕರಾಡ), ರವೀಂದ್ರನ್ ಪಾಡಿ (ಮಲೆಯಾಳಂ), ಶ್ರೀ ಮುದ್ರಾಡಿ (ಕನ್ನಡ), ಮಂಗಳಾ ಎಸ್. ಭಟ್ (ಕೊಂಕಣಿ),ವನಜಾಕ್ಷಿ ಪಿ. ಚೆಂಬ್ರಕಾನ(ಕನ್ನಡ), ಎನ್ ಸುಬ್ರಾಯ ಭಟ್ (ಹವ್ಯಕ) ಕಬಿತೆ ಓದಿಯೆರ್.
ಅಕಾಡೆಮಿ ಸದಸ್ಯೆರ್ ಸಂತೋಷ್ ಶೆಟ್ಟಿ ಹಿರಿಯಡ್ಕ ಸ್ವಾಗತ ಮಲ್ತೆರ್. ಪಾಂಗಾಳ ಬಾಬು ಕೊರಗ ಲೇಸ್ ಸುದಾರಿಕೆ ನಿರೂಪಣೆ ಮಲ್ತೆರ್. ತುಳು ಪರಿಷತ್ ಅಧ್ಯಕ್ಷೆರ್ ಶುಭೋದಯ ಆಳ್ವ ಸೊಲ್ಮೆ ಸಂದಾಯೆರ್.

ಎಂಆರ್‌ಪಿಎಲ್ ಗುತ್ತಿಗೆ ಕಾರ್ಮಿಕೆರೆಗ್ 5 ಲಕ್ಷ ರೂ. ದ ಇನ್ಸೂರ್

ಸಂಸದೆರ್ ಬ್ರಿಜೇಶ್ ಚೌಟ ನೇತೃತ್ವದ ಸಭೆಟ್ಟ್ ನಿರ್ಧಾರ, 2 ಸಾರ ಜನಕ್ಕ್ ಪ್ರಯೋಜನ

ಕುಡ್ಲ : ಮಂಗಳೂರು ರಿಫೈನರೀಸ್ ಆಂಡ್ ಪೆಟ್ರೊಕೆಮಿಕಲ್ಸ್ ಲಿ (ಎಂಆರ್‌ಪಿಎಲ್) ಕಂಪೆನಿಡ್ ಕೆಲಸ ಮಲ್ಪುನ ಗುತ್ತಿಗೆ ಕಾರ್ಮಿಕೆರ್ ಬೊಕ್ಕ ಅಕ್ಲೆನ ಕುಟುಂಬದಕ್ಲೆಗ್ 5 ಲಕ್ಷ ರೂ. ಇನ್ಸೂರ್ ಕೊರ್ಪಿನ ಪ್ರಸ್ತಾವನೆಗ್ ಒಪ್ಪಿಗೆ ತಿಕ್‌ದ್ಂಡ್.
ಸಂಸದೆರ್ ಬ್ರಿಜೇಶ್ ಚೌಟ ಮೆರೆನ ಮುತಾಲಿಕೆಡ್ ನಡತಿನ ಸಭೆಟ್ಟ್ ಈ ಮಲ್ಲ ನಿರ್ದಾರ ದೆತೊಂದೆರ್.
ಈ ನಿರ್ಧಾರದಾತ್ರ ಕಂಪೆನಿಡ್ ಬೇಲೆ ಮಲ್ಪುನ 2 ಸಾರರ್ದ್‌ಲ ಎಚ್ಚ ಕಾರ್ಮಿಕೆರೆಗ್ ಪ್ರಯೋಜನ ಆಪುಂಡು.
ಕರಿನ 8 ವರ್ಷರ್ದಿಂಚಿ ಈ ಬೇಡಿಕೆ ಇತ್ತ್ಂಡ್. ಅಪಗ ಜಿಲ್ಲಾದಿಕಾರಿ ಕಚೇರಿಡ್ ನಡತಿನ ಸಭೆಟ್ಟ್ ಸಂಸದೆರ್ ಚೌಟೆರ್ ಬೊಕ್ಕ ಶಾಸಕೆರ್ ಉಮಾನಾಥ್ ಕೋಟ್ಯಾನ್ ಮೆರೆನ ಈ ಪ್ರಸ್ತಾವನೆ ಮಲ್ತಿತ್ತೆರ್. ಸಂಸದೆರ್‌ನ ಕಚೇರಿಡ್ ಕೋಡೆ ನಡತಿನ ಸಭೆಟ್ಟ್ ಆ ಬೇಡಿಕೆ ಈಡೇರ್‌ದ್ಂಡ್.
ಅಂಚೆನೆ ಮಹಿಳಾ ಕಾರ್ಮಿಕೆರೆನ ಮೂಲ ಸೌಕರ್ಯ, ಪ್ರತ್ಯೇಕ ಶೌಚಾಲಯ ಇಂಚಿನ ವಿಚಾರೊಡು ಚರ್ಚೆ ನಡತ್ಂಡ್.ಸಭೆಟ್ಟ್ ಶಾಸಕೆರ್ ಭರತ್ ಶೆಟ್ಟಿ, ಅಪರ ಜಿಲ್ಲಾಧಿಕಾರಿ ರಾಜು, ಎಂಆರ್‌ಪಿಎಲ್‌ದ ಅಧಿಕಾರಿಲು ಬೊಕ್ಕ ಗುತ್ತಿಗೆ ಕಾರ್ಮಿಕೆರೆನ ಸಂಘಟನೆದ ಮುಖಂಡೆರ್ ಪಾಲ್ ಪಡೆದಿತ್ತೆರ್.

ಇನಿ ಕುಡ್ಲಗ್ ಸಿಎಂ ಡಿಕೆ ಶಿವಕುಮಾರ್ ಭೇಟಿ

ಮಂಗಳೂರು ದಸರಾ ಉದಿಪನಗ್ ಮಲ್ಲ ಬಿನ್ನೆರ್

ಕುಡ್ಲ : ಇನಿ ಬಯ್ಯಡ್ ಮಂಗಳೂರು ದಸರಾ ಉದಿಪನ ಮಲ್ಪರೆ ಮುಖ್ಯಮಂತ್ರಿ ಡಿ.ಕೆ ಶಿವಕುಮಾರ್ ಕುಡ್ಲಗ್ ಭೇಟಿ ಕೊರಿಯರೆ ಉಲ್ಲೆರ್.
ಅಂಚಾದ್ ಪೇಂಟೆಡ್ ವಾಹನ ಸಂಚಾರ ವ್ಯವಸ್ಥೆಡ್ ಬದಲಾವಣೆ ಮಲ್ದೆರ್. ಬಯ್ಯಡ್ 4 ರ್ದ್ ರಾತ್ರೆ 8 ಗಂಟೆ ಮುಟ್ಟ ಸಂಚಾರ ವ್ಯವಸ್ಥೆಡ್ ಬದಲಾವಣೆ ಆಪುಂಡು.
ವಾಹನ ದಟ್ಟಣೆ ಆವಂದಿಲೆಕ ಸಾರ್ವಜನಿಕೆರ್ ಪರ್ಯಾಯ ಮಾರ್ಗಡ್ ಗಾಡಿ ಪಾರ್ಕ್ ಮಲ್ಪೊಡು ಪಂದ್ ಪೊಲೀಸ್ ಇಲಾಖೆ ತೆರಿಪಾದ್ಂಡ್.

ತುಳುನಾಡ್ ದ ಪಿಲಿ ಕೂಟಗ್ ಅರ್ಥಿಕ ಬಲ ಕೊರೊಡು, ನಮ್ಮ ಸಂಸ್ಕೃತಿ ಪರಂಪರೆನ್ ಒರಿಪಾವೊಡು: ಮಿಥುನ್‌ ಎಂ. ರೈ

ಕಿನ್ನಿಗೋಳಿ : ತುಳುನಾಡ್ ದ ಉಭಯ ಜಿಲ್ಲೆಡ್ ಪಿರಾಕ್ ದ ಕಾಲರ್ದಿಂಚ ನಡತೊಂದು ಬತ್ತಿನ ಅಷ್ಟಮಿ, ಚೌತಿ, ಮಾರ್ನೆಮಿದ ಪೊರ್ತುಡು ಸುಮಾರ್ 150 ರ್ದ್ ಎಚ್ಚ ಪಿಲಿ ಏಸದ ಕೂಟಲು ಉಂಡು. ಅವೆಕ್ಕ್ ಬಲ ದಿಂಜಾವುನ ಪರಂಪರೆ ಒರಿಪಾದ್ ಬುಲೆಪಾವುನ ದಿಟ್ಟಿಡ್ ವರ್ಷಗ್ ಮಾನದಂಡಡ್ 2 ಲಕ್ಷ ರೂ. ಕೊರ್ಪಿನ ಯೋಜನೆದ ಬಗ್ಗೆ ಸರಕಾರಗ್ ಬಿನ್ನಾಪು ಕೊರ್ತೆರ್. ಮಂಜೂರಾತಿ ತಿಕುನ ಭರವಸೆನ್ ಕೊರ್ತೆರ್ ಪಂದ್ ಕುಡ್ಲದ ಪಿಲಿ ಪರ್ಬ ಕೂಟದ ಮುಖ್ಯಸ್ಥೆರ್ ಕಾಂಗ್ರೆಸ್‌ ನಾಯಕೆರ್ ಮಿಥುನ್‌ ಎಂ ರೈ ಪಂಡೆರ್.

ಮೇರ್ ಕಿನ್ನಿಗೋಳಿ ಕೈತಲ್ದ ಗುತ್ತಕಾಡುಡ್ ನಮ್ಮ ಪಿಲಿ (ರಿ.) ಗುತ್ತಕಾಡುದ ದಶಮನೋತ್ಸವ ಪೊರ್ತುಡು ಲೇಸ್ ಗ್ ಚಾಲನೆ ಕೊರ್ದು ಪಾತೆರ್ದ್, ಪಿಲಿ ಏಸ ಉಂದು ಮನೊರಂಜನೆಗ್ ಅತ್ತ್, ಧಾರ್ಮಿಕ ನೆಲಗಟ್ಟುದ ಮಿತ್ತ್ ಉಂತುದುಂಡು. ನೆಕ್ಕ್ ಸಹಕಾರ ಅಗತ್ಯ ಉಂಡು ಪಂದ್ ಪಂಡೆರ್.

ಸುರೇಶ್‌ ಕೊಲಕಾಡಿ ಊದು ಪೂಜೆದ ಧಾರ್ಮಿಕ ಲೇಸ್ ನ್ ನಡಪಾದ್ ಕೊರಿಯೆರ್. ಈ ಪೊರ್ತುಡು ನಾಗಸ್ವರ ವಾದಕೆರ್ ಶಮ್ಮಿಗಪೂರ್‌, ರವಿ ಕಟಪಾಡಿ, ಹೇಮಂತ್‌ ಕುಮಾರ್‌, ಶ್ರೀಶ ಐಕಳ, ಶಿವಪ್ರಸಾದ್‌ ಗುತ್ತಕಾಡು, ಪ್ರಕಾಶ್‌ ಆಚಾರ್‌ ಕಿನ್ನಿಗೋಳಿ, ಯೋಗೀಶ್‌ ಗೋಳಿಜೋರ, ಸುದರ್ಮ, ಕೀರ್ತನ್‌ ಕಟೀಲ್‌, ಶಶಿಧರ ಮುನ್ನಾ, ಗೌರೀಶ್‌ ಆಚಾರ್ಯ, ಸುನೀಲ್‌ ಅಂಚನ್‌ ದಾಮಸ್‌ಕಟ್ಟೆ, ಲಕ್ಷ್ಮಣ್‌ ಶಾಂತಿಪಲ್ಕೆ, ಹರೀಶ್‌ ಪೂಜಾರಿ ಉಲ್ಲಂಜೆ, ವಿಜೇತ್‌ ಬಿಟ್ಟು, ಕೃಷ್ಣ ಪಾತ್ರಿ, ಸೂರಜ್‌, ಲೋಹಿತ್‌, ವರುಣ್‌ ಮಲ್ಪೆ, ಸಾಯಿಪ್ರಸಾದ್‌ ಮೊಕ್ಲೆಗ್ ಮಾನಾದಿಗೆ ಮಲ್ತೆರ್. ಪ್ರಮೋದ್‌ ಕುಮಾರ್‌ ಅಧ್ಯಕ್ಷತೆನ್ ಒಯಿಸೊಂದಿತ್ತೆರ್.

ಕಿನ್ನಿಗೋಳಿ ಪ.ಪಂ. ಅಧ್ಯಕ್ಷೆರ್ ಗುರುಪ್ರಸಾದ್‌ ಮಲ್ಲಿಗೆಯಂಗಡಿ, ಪ.ಪಂ. ಸದಸ್ಯೆರ್ ಲೋಕಯ್ಯ ಸಾಲ್ಯಾನ್‌, ಪ್ರಣೀಕ್‌ ಕಿನ್ನಿಗೋಳಿ, ಮಲ್ಲಿಕಾ ಗುತ್ತಕಾಡು, ಧನುಷ್‌ ಶೆಟ್ಟಿಗಾರ್‌, ಮಲ್ಲಿಕಾ, ಗೋಪಾಲಕೃಷ್ಣ ಪುನರೂರು, ಕಾಂಗ್ರೆಸ್‌ ಮುಖಂಡೆರ್ ಮೋಹನ್‌ ಕೋಟ್ಯಾನ್‌, ಶಯನ್‌ ಶೆಟ್ಟಿಗಾರ್‌, ಸರೋಜಿನಿ ಗುಜರನ್‌, ಕಸ್ತೂರಿ ಪಂಜ, ಕೃಷ್ಣ ಬಂಗೇರ, ಸಚಿನ್‌ ಶೆಟ್ಟಿ, ದಿವಾಕರ ಕರ್ಕೇರಾ, ರಕ್ಷಿತ್‌ ಕುಮಾರ್‌, ಭರತ್‌ರಾಜ್‌ ಕಷ್ಣಾಪುರ, ಸಂದೇಶ್‌ ಕೃಷ್ಣಾಪುರ, ಸಂಘಟನೆದ ಕಪಿಲ್‌ ಅಂಚನ್‌, ಅಶ್ವಥ್‌, ಕಮಲ ರಮೇಶ್‌ ಪಾಲ್ ಪಡೆದಿತ್ತೆರ್. ಸಂತೋಷ್‌ ನಂಬಿಯಾರ್‌ ಲೇಸ್ ನ್ ಸುಧಾರಿಕೆ ಮಲ್ತೆರ್.

ದ.ಕ. ಜಿಲ್ಲೆ ‘ಮಂಗಳೂರು’ ಆದ್ ನಾಮಕರಣ: ಸರಕಾರೊಡ್ದು ಅಧಿಸೂಚನೆ

ಸಲಹೆ, ಅಭಿಪ್ರಾಯ ಸಂದಾಯ ಮಲ್ಪರೆ 30 ದಿನೊತ ಅವಕಾಶ

ಕುಡ್ಲ : ದ.ಕ. ಜಿಲ್ಲೆನ್ ‘ಮಂಗಳೂರು ಜಿಲ್ಲೆ’ ಪಂಡ್‌ದ್ ಪಿರ ನಾಮಕರಣ ಮನ್ಪುನ ಬಗೆಟ್ಟ್ ಸಾರ್ವಜನಿಕೆರೆಡ್ದ್ ಸಲಹೆ, ಅಭಿಪ್ರಾಯ ಪಟ್ಟೊನರೆ ಕರ್ನಾಟಕ ರಾಜ್ಯ ಸರಕಾರ ಅಧಿಸೂಚನೆ (ರಾಜ್ಯಪತ್ರ) ಕಡಪಾದ್ಂಡ್.
ಸಾರ್ವಜನಿಕೆರೆನ ಬೇಡಿಕೆ ಬೊಕ್ಕ ಆಡಳಿತಾತ್ಮಕ ಅನುಕೂಲನ್ ಗಣನೆಗ್ ದೆತೊಂದ್ ಸರಕಾರ ‘ಮಂಗಳೂರು ಜಿಲ್ಲೆ’ ಪಂದ್ ಪುದರ್ ಬದಲ್ ಮಲ್ಪರೆ ಉದ್ದೇಶ ದೀತ್ಂಡ್. ಈ ಬಗೆಟ್ ಸಾರ್ವಜನಿಕೆರೆಡ್ದ್ ಸಲಹೆ ಅಭಿಪ್ರಾಯೊಲೆನ್ ಸ್ವೀಕಾರ ಮಲ್ಪರೆ 30 ದಿನತ್ತ ಕಾಲಾವಕಾಶ ಕೊರ್ತುಂಡು.
​ಅ.1ಕ್ ಸರಕಾರ, ಈ ಅಧಿಸೂಚನೆ ಕಡಪಾದ್ಂಡ್. ಈ ರಾಜ್ಯಪತ್ರ ಪ್ರಕಟ ಆಯಿನ ದಿನರ್ದ್ 30 ದಿನೊತ ಉಲಯಿ ಸಾರ್ವಜನಿಕೆರ್ ಅಭಿಪ್ರಾಯ, ಸಲಹೆಲೆನ್ ಲಿಖಿತ ರೂಪೊಡು ಅತ್ತಂಡ ಇ-ಮೇಲ್ ಮುಖಾಂತರ ಮುಖ್ಯಮಂತ್ರಿಲೆನ ಸಚಿವಾಲಯ, ಕೊಠಡಿ ಸಂಖ್ಯೆ 235, 2ನೇ ಮಹಡಿ, ವಿಧಾನಸೌಧ, ಬೆಂಗಳೂರು, ಇಮೇಲ್ cm.kar@nic.inಗ್, ಅತ್ತಂಡ ಸರಕಾರೊದ ಅಪರ ಕಾರ್ಯದರ್ಶಿ, ಕಂದಾಯ ಇಲಾಖೆ, ಕೊಠಡಿ ಸಂಖ್ಯೆ 711, 7ನೇ ಮಹಡಿ, ಬಹುಮಹಡಿ ಕಟ್ಟಡ, ಡಾ.ಬಿ.ಆರ್.ಅಂಬೇಡ್ಕರ್ ವೀದಿ, ಬೆಂಗಳೂರು, ಇಮೇಲ್ prs.revenue@gmail.comಗ್, ಅತ್ತ್‌ಡ ಜಿಲ್ಲಾಧಿಕಾರಿ, ದ.ಕ. ಜಿಲ್ಲೆ, ಪ್ರಜಾಸೌಧ, ದ.ಕ. ಜಿಲ್ಲಾಡಳಿತ ಕೇಂದ್ರ, ಜಿಲ್ಲಾಧಿಕಾರಿಲೆ ಕಾರ್ಯಾಲಯ, ಪಡೀಲ್ ಮಂಗಳೂರು- ಇಮೇಲ್ dc.mnglr@gmail.comಗ್ ಸಲ್ಲಿಕೆ ಮಲ್ಪೊಲಿ ಪಂದ್ ಅಧಿಸೂಚನೆಡ್ ತೆರಿಪಾದೆರ್.

“ಪ್ಯಾರೀಸ್‌ ಫ್ಯಾಷನ್‌ ಜಗತ್ತ್‌ಡ್‌ ಮಿಂಚೊಂದಿಪ್ಪುನ ಕುಡ್ಲದ ಜವನೆ ಭ್ರಣಾಲ್‌ ಶೆಟ್ಟಿ”

ಕುಡ್ಲದ ಪೇಂಟೆರ್ದ್‌ ಫ್ರಾನ್ಸ್‌ ಪನ್ಪಿನ ಮಾಯಲೋಕದಡೆ ನಡತಿನ ಜರ್ನಿ

ಭ್ರಣಾಲ್‌ ಶೆಟ್ಟಿ

ಅಂತಾರಾಷ್ಟ್ರೀಯ ಮಾಡೆಲ್ ಬೊಕ್ಕ ಫ್ಯಾಷನ್ ಡಿಸೈನರ್

ಕುಡ್ಲ ಪನ್ಪಿನ ಪೊರ್ಲುದ ಮಣ್ಣ್‌ಡ್‌ ಪುಟ್ಟು ಬಲತಿನ ಸ್ಫುರದ್ರೂಪಿ ಬಂಟೆ ಜವನೆ ಕಡಲಾಯೆರೆದ ಫ್ರಾನ್ಸ್‌ ಪನ್ಪಿನ ಮಾಯಾಲೋಕಡ್‌ ಮಿಂಚೊದುಲ್ಲೆರ್. ಸಾಮಾಜಿಕ ಜಾಲತಾಣದ ಪ್ರಭಾವ ಜಾಸ್ತಿಯಾದ್‌ ದುಂಬು ಪೋವಂದಿನ ೨೦೨೦ ತ ಪೊರ್ತುಡು ಫ್ಯಾಷನ್‌ – ಮಾಡೆಲಿಂಗ್‌ ಕ್ಷೇತ್ರೊಗು ಕಾರ್‌ ದೀದ್‌, ವಿಭಿನ್ನವಾದ್‌ ದಾದಾಂಡಲ ಸಾಧನೆ ಮಲ್ತ್‌ದ್‌ ತೋಜಾವೊಡು ಪಂಡ್‌ದ್‌ ಸ್ವ ಇಚ್ಛೆಡ್‌ ಫ್ರಾನ್ಸ್‌ಗ್‌ ಪೋದು ಮಲ್ಲ ಸಾಧನೆ ಮಲ್ದಿನ ಈ ಜವನನ ಬಗೆಟ್ಟ್ ತುಳುನಾಡ್‌ದ ಎಚ್ಚಿನ ಜನಕ್ಲೆಗ್‌ ಗೊತ್ತಿಜ್ಜಾಂಡಲಾ ಅಂತರಾಷ್ಟ್ರೀಯ ಮಟ್ಟಡ್‌ ತನ್ನ ಛಾಪುನ್‌ ಮೂಡಿಸಾಯಿನ ಪ್ರಸಿದ್ಧ ರೂಪದರ್ಶಿ.
ಆರೇ ನಮ್ಮ ತುಳುನಾಡ್‌ದ ಜವನೆ ಭ್ರಣಾಲ್‌ ಶೆಟ್ಟಿ. ಕುಡ್ಲದ ಜಪ್ಪು ನಿವಾಸಿಯಾಯಿನ ಮೇರ್‌ ಕುಡ್ಲದ ರಾಮ್ಸ್‌ ಟೈಲರ್ಸ್‌ ಬೊಕ್ಕ ಟೆಕ್ಸ್‌ಟೈಲ್ಸ್‌ ಮಾಲೀಕೆರಾಯಿನ ಪ್ರದೀಪ್‌ ಶೆಟ್ಟಿ ಬೊಕ್ಕ ಶಿಕ್ಷಕಿ ಸಂಧ್ಯಾ ಪಿ ಶೆಟ್ಟಿ ಮೊಕಲೆನ ಸುಪುತ್ರೆ. ಮೆರೆಗ್ ಡಾ. ಮಿಥಾಲಿ ಶೆಟ್ಟಿ ಪನ್ಪಿನ ಒರ್ತಿ ಮೆಗ್ದಿ ಇತ್ತ್‌ದ್‌, ಆರ್‌ ವೃತ್ತಿಡ್‌ ವೈದ್ಯೆಯಾದುಲ್ಲೆರ್.
ಕುಡ್ಲದ ಸಂತ ತೆರೆಸಾ ಶಾಲೆಡ್‌ ತನ್ನ ಪ್ರಾಥಮಿಕ ಬೊಕ್ಕ ಪ್ರೌಢಶಾಲಾ ಶಿಕ್ಷಣ ಬೊಕ್ಕ ಮಹೇಶ್‌ ಕಾಲೇಜ್‌ಡ್‌ ಪದವಿ ಪೂರ್ವ ಶಿಕ್ಷಣ ಮುಗಿತ್‌ದ್‌, ತನ್ನ 18ನೇ ವರ್ಷ ಪ್ರಾಯಡ್‌ ಪ್ಯಾರೀಸ್‌ದ ಐಎಫ್ಎ ಕಾಲೇಜ್‌ಡ್‌ ಫ್ಯಾಷನ್‌ ಡಿಸೈನ್‌ ಬೊಕ್ಕ ಟೆಕ್ನಾಲಜಿ ಪದವಿನ್‌ ಮಲ್ಪೆರೆ ಪಿದಾಡ್ದಿತ್ತೆರ್. ಆಂಡ ಅಪಗ ಅರೆನ ತಾದಿ ಸುಗಮವಾದಿಜ್ಜಾಂಡ್. ಪೊಸ ಜಾಗೆ, ಪೊಸ ಭಾಷೆ, ಪೊಸ ಜನಕ್ಲೆನ ನಡುಟು ತನ್ನತನನ್‌ ಒರಿತೊಂದು, ಪೊಸತನನ್‌ ಬುಳೆಪಾವೊಂದು ತನ್ನ ಪದವಿನ್‌ ಮುಗಿಪುನ ಪೊರ್ತುಡೇ ಮಾಡೆಲಿಂಗ್‌ ಕ್ಷೇತ್ರೊಗು ಪಾದಾರ್ಪಣೆ ಮಲ್ಪುನ ಅವಕಾಶನ್‌ ಸಮರ್ಪಕವಾದ್‌ ಬಳಸೊಂದು ಆ ಸಾದಿಡ್‌ ಯಶಸ್ಸ್‌ನ್‌ ಪಡೆಯಿನವು ವಿಶೇಷ. ಇನಿ ಭೃಣಾಲ್‌ ಶೆಟ್ಟಿ ಒರಿ ಪ್ರಬುದ್ಧ ಅಂತರಾಷ್ಟ್ರೀಯ ಮಾಡೆಲ್‌ ಪಂಡ್‌ದ್‌ ಪನ್ಪಿನವು ಪರ್ಮೆದ ವಿಷಯ.
ಆಜಿ ಅಡಿ ಎತ್ತರದ ಆಕರ್ಷಕ ಮೈಕಟ್ಟ್‌ದ ಭೃಣಾಲ್‌ ಮಾಡೆಲಿಂಗ್‌ ಕ್ಷೇತ್ರಗ್‌ ಪಂಡ್‌ದ್‌ ಮಲ್ಪಾಯಿನ ವ್ಯಕ್ತಿತ್ವ. ಅಂಚಾದ್‌ ಫ್ರಾನ್ಸ್‌ ಫ್ಯಾಷನ್‌ ಲೋಕೊಡು ಬೇಗ ಚಿರ ಪರಿಚಿತರಾಯೆರ್. ಭಾರತೀಯ ರೂಪದರ್ಶಿಲು ಜಾಸ್ತಿಯಾದ್‌ ಇಪ್ಪಂದಿನ ಫ್ರಾನ್ಸ್‌ ನೆಲಟ್‌ ಒರಿ ಭಾರತೀಯೆ, ಕೆಲವು ಪ್ರಖ್ಯಾತ ಐಷಾರಾಮಿ ಬ್ರಾಂಡ್‌ಗ್‌ ಮಾಡೆಲ್‌ ಆದ್‌ ಕೆಲಸ ಮಲ್ಪುನವು ಶ್ಲಾಘನೀಯ.
ಗುಚಿ, ಲೋರಿಯಲ್‌ ಇಂಚಿನ ಬ್ರಾಂಡೆಡ್‌ ಉತ್ಪನ್ನಲೆಗ್‌ ರೂಪದರ್ಶಿ ಆಪಿನೆತೊಟ್ಟುಗು ಅಂತರಾಷ್ಟ್ರೀಯ ಪುದರ್‌ ಪೋಯಿನ ಪತ್ರಿಕೆಲೆಡ್‌ಲಾ ತೋಜೊಂದುಲ್ಲೆರ್. ಇಂದೆತೊಟ್ಟುಗು ಫ್ಯಾಷನ್‌ ಡಿಸೈನರ್‌ ಆದ್‌ ಕೆಲಸ ಮಲ್ತಿನ ಅನುಭವಲಾ ಉಂಡು.
ತುಳುನಾಡ್‌ದ ಜವನೆ ಭ್ರಣಾಲ್‌ ಶೆಟ್ಟಿ ಪನ್ಪಿನ ಪ್ರಕಾರ “ಎನ್ನಲೆಕನೆ ಕೆಲಸ ಮಲ್ಪೆರೆ ಸುರುಕು ಆ ವೃತ್ತಿಡ್‌ ನಮಕ್‌ ಪ್ರೀತಿ ಬೊಕ್ಕ ಶ್ರದ್ಧೆ ಬೊಕ್ಕ ಶಿಸ್ತು ಬಾರೀ ಅಗತ್ಯ. ರೂಪದರ್ಶಿ ಆಪುನವು, ಆಯಿಟ್‌ ಪಳಗುನವು ಆತ್‌ ಸುಲಭ ಇಜ್ಜಿ. ನಿಯಮಿತ ವ್ಯಾಯಾಮ, ನಿಗದಿತ ತೆನಸ್‌, ಕಠಿಣ ಪರಿಶ್ರಮ ಬೊಕ್ಕ ಶ್ರದ್ಧೆದೊಟ್ಟುಗು ಶಿಸ್ತು ಇಂದು ಎನನ್‌ ರೂಪದರ್ಶಿಯಾದ್‌ ಬುಳೆಯೆರೆ ಮುಖ್ಯ ಕಾರಣ. ಜಾಗತಿಕ ಮಾರುಕಟ್ಟೆಡ್‌ ಏತೋ ದುಬಾರಿ ವಸ್ತುಲೆನ ಜಾಹೀರಾತುಲೆನ ಪ್ರಚಾರಗಾದ್‌ ಪುರುಷ ರೂಪದರ್ಶಿಲೆನ ಅಗತ್ಯ ಮಸ್ತ್‌ ಉಂಡು. ಆಯಿಕ್‌ ಯಾನ್‌ ಕಮರ್ಷಿಯಲ್‌ ರೂಪದರ್ಶಿಯಾದ್‌ ಬೊಕ್ಕ ಫ್ಯಾಷನ್‌ ರೂಪದರ್ಶಿಯಾದ್‌ ಕೆಲಸ ಮಲ್ತೊಂದುಲ್ಲೆ. ಆಯಿಟ್‌ ಎಂಕ್‌ ತೃಪ್ತಿ, ಖುಷಿ ಬೊಕ್ಕ ಪೆರ್ಮೆ ಉಂಡು. ಎನ್ನ ಅಭಿರುಚಿತ ಕೆಲಸೊನೇ ನನಲಾ ಮುಂದುವರಿಸೊಂದು ಪೋಪಿನೆತೊಟ್ಟುಗು ಕುಡ್ಲಡ್‌ ಇತ್ತೆನೇ ಪುದರ್‌ ಮಲ್ತಿನ ʼರಾಮ್ಸ್‌ʼ ಸಂಸ್ಥೆನ್‌ ಮುಂದುವರಿಸೊಂದು ಪೋಪುನ ಇಚ್ಛೆಲಾ ಉಂಡು” ಪಂಡ್‌ದ್ ಆರ್ ಪನೊಂದೆರ್.
ಮೆರೆಗ್‌ ಇಪ್ಪುನ ನನೊಂಜಿ ಕ್ರೇಜ್ ಪಂಡ ಅಡಿಗೆ, ಖಾದ್ಯ ತೆನಸ್‌ ಬೊಕ್ಕ ಪಾನೀಯಲೆನ ತಯಾರಿಕೆಡ್‌ ಓಲು ಇಜ್ಜಾಂದಿನ ಆಸಕ್ತಿ, ಅಭಿರುಚಿ. ಕುಡ್ಲದ ಸಾಂಪ್ರದಾಯಿಕ ಅಡಿಗೆಡ್‌ ಪೊಸ ಪ್ರಯೋಗ ಮಲ್ತ್‌ದ್‌ ಈ ವಿಭಿನ್ನ ರುಚಿನ್‌ ತನ್ನವೇ ಶೈಲಿಡ್‌ ಪೊಸ ಜನಕ್ಲೆಗ್‌ ತಿನ್ಪಾವುನ ಇಚ್ಛೆಡ್‌ ʼಕೋರಿ ರೊಟ್ಟಿʼ ಪನ್ಪುನ ಪುದರ್‌ರ್ದೇ ಪ್ಯಾರೀಸ್‌ಡ್‌ ಇವೆಂಟ್‌ ಸುರು ಮಲ್ತ್‌ದ್‌ ಪೊಸ ಜಾಗೆ, ಪೊಸ ಜನಕ್ಲೆನ ಮಧ್ಯೊಡು ಅವೆನ್‌ ಯಶಸ್ವಿಯಾದ್‌ ನಡಪಾಯಿನ ಹೆಗ್ಗಳಿಕೆಲಾ ಉಂಡು. ಈ ಮೂಲಕ ಕುಡ್ಲದ ಸಾಂಪ್ರದಾಯಿಕ ಅಡಿಗೆನ್ ಬೊಕ್ಕ ವಿಭಿನ್ನ ರುಚಿತ ಮಿಶ್ರ ಪಾನೀಯನ್‌ (ಕಾಕ್‌ಟೈಲ್) ಕ್ರಿಯಾತ್ಮಕವಾದ್‌ ಪರಿಚಯ ಮಲ್ತ್‌ದೆರ್‌ ಪಂಡ್‌ದ್‌ ಪನಿಯೆರೆ ಖುಷಿ ಆಪುಂಡು.
ಭೃಣಾಲ್ ಶೆಟ್ರೆನ ಈ ಸಾಧನೆಗ್ ನನಾತ್ ಮಾನಾದಿಗೆ ತಿಕ್ಕಡ್ ಪನ್ಪಿನವು “ಟೈಮ್ಸ್ ಆಫ್ ಕುಡ್ಲ” ಪತ್ರಿಕೆದ ಆಶಯ.

 

” ಒಂಜಿ ಪ್ರೊಫೆಶನ್‌ಡ್ ಯಶಸ್ವಿ ಆವೊಡಾಂಡ ಸುರುಕು ಆ ವೃತ್ತಿಡ್‌ ನಮಕ್‌ ಪ್ರೀತಿ , ಶ್ರದ್ಧೆ ಬೊಕ್ಕ ಶಿಸ್ತು ಬಾರೀ ಅಗತ್ಯ. ರೂಪದರ್ಶಿ ಆಪುನವು, ಆಯಿಟ್‌ ಪಳಗುನವು ಆತ್‌ ಸುಲಭ ಇಜ್ಜಿ. ನಿಯಮಿತ ವ್ಯಾಯಾಮ, ನಿಗದಿತ ತೆನಸ್‌, ಕಠಿಣ ಪರಿಶ್ರಮ ಬೊಕ್ಕ ಶ್ರದ್ಧೆದೊಟ್ಟುಗು ಶಿಸ್ತು ಉಂದು ಮಾತಾ ಎನನ್‌ ರೂಪದರ್ಶಿಯಾದ್‌ ಬುಳೆಯೆರೆ ಮುಖ್ಯ ಕಾರಣ”
✍️ ಭೃಣಾಲ್ ಶೆಟ್ಟಿ
ಅಂತಾರಾಷ್ಟ್ರೀಯ ಮಾಡೆಲ್ ಅಂಡ್ ಫ್ಯಾಷನ್ ಡಿಸೈನರ್

ತುಳು ರಂಗಭೂಮಿಡ್ ಪೊಸ ನಾಟಕದ ಪರ್ಬ

ನಾಗರ ಪಂಚೆಮಿದೊಟ್ಟುಗು ತುಳುನಾಡ್ಡ್ ಪರ್ಬೊಲು ಎಂಚ ಸುರು ಆಪುಂಡ ಅಂಚೆನೆ ರಂಗಭೂಮಿಡ್ ಪೊಸ ಪೊಸ ತುಳು ನಾಟಕದ ಪರ್ಬಲಾ ಸುರು ಆಪುಂಡು.
ಗಡಿನಾಡ್ದ ಪುಗಾರ್ತೆದ ರಡ್ಡ್‌ ನಾಟಕ ಕೂಟೊಲಾಯಿನ ಶಾರದ ಆರ್ಟ್ಸ್ ಕಲಾವಿದೆರ್ ಬೊಕ್ಕ ಐಸಿರಿ ಕಲಾವಿದೆರ್ ಮಂಜೇಶ್ವರ ಮೊಕ್ಲೆನ ಈ ವರ್ಷದ ಪೊಸ ನಾಟಕ “ಎನ್ನ ಫ್ಯಾಮಿಲಿ” ಬೊಕ್ಕ “ಎನಡ ಗೊಬ್ಬೊಡ್ಚಿ” ಗಡಿನಾಡ ಕಲಾನಿಧಿ ಕೃಷ್ಣ ಜಿ ಮಂಜೇಶ್ವರರೆನ ಮುತಾಲಿಕೆಡ್ ಈ ರಡ್ಡ್‌ ನಾಟಕ ವಿಭಿನ್ನ ದೇಖಿಡ್ ಕಲಾಭಿಮಾನಿಲೆನ ಮನಸ್ಸ್‌ ಗೆಂದೆರೆ ತಯಾರಾದುಂಡು. “ಕಲಾ ತೇಜಸ್ವಿ” ಸು ಫ್ರಂ ಸೋ ಪುಗಾರ್ತೆದ ಜೆ.ಪಿ ತೂಮಿನಾಡ್ ಬರೆದ್ ನಿರ್ದೇಶನ ಮಲ್ಪಿನ “ಎನ್ನ ಫ್ಯಾಮಿಲಿ” ಪನ್ಪಿನ ನಾಟಕಗ್ “ತುಳುನಾಡ ಕಲಾ ಕದಿಕೆ” ರಾಜೇಶ್ ಮುಗುಳಿ ಪೊರ್ಲುದ ಸಾಹಿತ್ಯನ್ ಬರೆತೆರ್, ಹಿನ್ನೆಲೆ ಸಂಗೀತ ಗಣೇಶ್ ಕೊಡಕ್ಕಲ್ ರೆನ ಕೈ ಚಲಕೊಡು ಮೂಡ್ದ್ ಬೈದಿನ ಈ ನಾಟಕೊಗು “ತುಳುವ ಸೌರಭ” ಪ್ರಕಾಶ್ ತೂಮಿನಾಡ್ ಸಲಹೆ ಸಹಕಾರೊನು ಕೊರ್ತೆರ್. ಈ ನಾಟಕದ ಸುರುತ್ತ ಪ್ರದರ್ಶನ ಕಾವೂರು ಪಂಜಿ ಮುಗೇರ್ ಶ್ರೀ ಗುರು ರಾಘವೇಂದ್ರ ಮಠೊಟು ಅಕ್ಟೋಬರ್ 11ನೇ ತಾರೀಕ್ದಾನಿ ಯಶಸ್ವಿ ಪ್ರದರ್ಶನ ನಡತ್ತುಂಡು. “ಕಥೆ ಎಡ್ಡೆಂಡು” ಸೂಪರ್ ಹಿಟ್ ನಾಟಕೊಡ್ದು ಬೊಕ್ಕ ನಾಟಕ ರಚನೆಗಾರೆ ನಿರ್ದೇಶಕೆ ಜೆ.ಪಿ ತೂಮಿನಾಡ್ರೆನ ಜಬದಾರಿ ಒಂಜಿ ಪಡಿ ಜಾಸ್ತಿ ಆತುಂಡು ಪಂಡ್ದ್ ಈ ನಾಟಕ ತೂನಗ ಗೊತ್ತಾಪುಂಡು. ಪ್ರತಿ ಒರಿಯನ ಫ್ಯಾಮಿಲಿಡ್ ನಡಪಿನ ಸನ್ನಿವೇಶನ್ ಸಂಪೂರ್ಣ ಹಾಸ್ಯಮಯವಾದ್ ಕೊನೊದು ಕಡೆಕ್ ಎಮೋಷನಲಿ ಟಚ್ ಕೊರಿನವು ನಿರ್ದೇಶಕನ ಚಾತುರ್ಪು ಪಂಡ ತಪ್ಪಾವಂದ್.
ಅಂಚೆನೆ ಜೈ ಭಜರಂಗ ಬಲಿ ಪನ್ಪಿನ ಯಶಸ್ವಿ ನಾಟಕೊಡ್ದ್ ಬೊಕ್ಕ ಐಸಿರಿ ಕಲಾವಿದೆರ್ ಮಂಜೇಶ್ವರ ಕೂಟೊಗು ತಂಡದ ಗುರ್ಕಾರೆ “ಗಡಿನಾಡ ಕಲಾನಿಧಿ” ಕೃಷ್ಣ ಜಿ ಮಂಜೇಶ್ವರ್ ಬರೆಯಿನ ಈ ವರ್ಷದ ಪೊಸ ನಾಟಕ “ಎನಡ ಗೊಬ್ಬೊಡ್ಚಿ” ವಿಭಿನ್ನ ಕಥೆತೊಟ್ಟು ಉಂದುವೆ ಅಕ್ಟೋಬರ್ ತಿಂಗೊಲುದ 15ನೇ ತಾರೀಕ್ದಾನಿ ಕಾವೂರು ಪಂಜಿ ಮುಗೇರ್ ಶ್ರೀ ಗುರು ರಾಘವೇಂದ್ರ ಮಠೊಟು ಸುರುತ್ತ ಪ್ರದರ್ಶನ ಕೊರಿಯೆರೆ ತಯಾರಾದುಂಡು. ” ಕಲಾ ಮಾಣಿಕ್ಯ” ವಿಕ್ರಂ ದೇವಾಡಿಗ ಚಿತ್ರಾಪುರ ಮೆರೆನ ನಿರ್ದೇಶನೊಡು ಎಲ್ ಇ ಡಿ ತಂತ್ರಜ್ಞಾನೊಡು ವಿಭಿನ್ನ ರೀತಿಡ್ ಮೂಡ್ದು ಬರಿಯೆರೆ ಉಪ್ಪುನ ಈ ನಾಟಕೊಡು “ಗಡಿನಾಡಬೊಳ್ಳಿ” ಸುರೇಶ್ ಮಂಜೇಶ್ವರ “ತುಳುನಾಡ ರಂಗಭೂಷಣ” ಪುಷ್ಪರಾಜ್ ಬೊಳ್ಳಾರ್ ಬೊಕ್ಕ “ತುಳುನಾಡ ರಂಗಬೊಳ್ಳಿ” ರವಿ ರಾಮಕುಂಜ ಅಭಿನಯ ಮಲ್ಪೆರೆ ಉಲ್ಲೆರ್. ಅಂಚೆನೆ ಈ ನಾಟಕೊಗದ ಹಿನ್ನೆಲೆ ಸಂಗೀತದ ಜಬದಾರಿನ್ ಪ್ರವೀಣ್ ಕಣಿಯೂರ್ ವಹಿಸೊಂದೆರ್. ಶಾರದ ಆರ್ಟ್ಸ್ ಕೂಟದ ಈ ರಡ್ಡ್ ನಾಟಕೊಲ ಯಶಸ್ವಿ ಪ್ರದರ್ಶನ ಕೊರ್ದು ರಂಗಭೂಮಿಡ್ ಪೊಸ ದಾಖಲೆ ಬರೆಯಡ್ ಪಂಡ್ದ್ ನಟ್ಟೊನುಗ.

✍️ ಸಂದೇಶ್ ಕರ್ಕೇರ

ಅ.18 : “ತುಳು ಭಗವದ್ಗೀತೆ” ಜಗತ್ತ್‌ದ ಮಾತಾ ಕಡೆಟ್ಲ ಬಿಡುಗಡೆ

ಕುಡ್ಲ : ಟೀಂ ಐಲೇಸಾ ತಂಡ ಬೊಕ್ಕ ಇಸ್ಕಾನ್ ಸಂಸ್ಥೆದ ಮುತಾಲಿಕೆಡ್ ರಚನೆ ಆಯಿನ “ತುಳು ಭಗವದ್ಗೀತೆ” ಅಕ್ಟೋಬರ್ 18 ತಾರೀಕ್‌ಗ್ ಶಾಸ್ತ್ರೀಯವಾದ್ ಬಿಡುಗಡೆ ಆವರೆ ಉಂಡು.
ಐಲೇಸಾ ಕೂಟ “ತುಳುವ ಜಾಲ್ಡ್ ಕೃಷ್ಣ ಪಾರ್ದನ” ಪನ್ಪಿನ ಅಮೋಘ ಧಾರ್ಮಿಕ ಕಾರ್ಯಕ್ರಮನ್ 2021 ಟ್ಟ್ ಸತತ ಏಳ್ ದಿನ ಝೂಮ್ ವೇದಿಕೆಡ್ ಮಲ್ಪುನಗ ಅಯಿಕ್ ತಿಕಿನ ಬೆಂಬಲ ಭಾರಿ ಮಲ್ಲ. ಕೆಲವು ಧಾರ್ಮಿಕ ಮುಖ್ಯಸ್ಥೆರ್‌ನ ಪಾಲ್‌ದಾರಿಕೆಡ್ ಆನಿದ ಕೊರೊನಾ ಕಾಲಡ್ ಸಂಜೀವಿನಿ ಲೆಕ ಒದಗಿ ಬೈದಿನಿ ಆ ಭಾಗವತ ಸಪ್ತಾಹ.
ಐಲೇಸಾ ಏರ್ಪಾಡ್ ಮಲ್ದಿನ ತುಳು ಭಾಷಿಗೆರೆನ ಭಾಗವತ ಸಪ್ತಾಹದ ಅಭಿಮಾನಗ್
ಮನಸ್ ಮರ್ಲಾಯಿನ ಇಸ್ಕಾನ್ ಸಂಸ್ಥೆ ಆನಿಯೇ ತುಳುಟ್ಟು ಭಗವದ್ಗೀತೆನ್ ಪ್ರಪಂಚದಾದ್ಯಂತ ಪ್ರಕಟನೆ ಮಲ್ಪುನ ಭರವಸೆ ಕೊರ್ದಿತ್ತ್ಂಡ್.
ಆ ಭರವಸೆ ಇತ್ತೆ ಸಾಕಾರ ಆವೊಂದುಂಡು.
ಸುಮಾರ್ ಐನ್ ವರ್ಷ ಮುಟ್ಟ ಕನ್ನಡದ ಭಗವದ್ಗೀತೆದ ತುಳು ಅನುವಾದಗ್ ಉಮೇದ್ ಕೊರ್ದು ಅವೆನ್ ಶ್ರದ್ದೆಡ್ ಮಲ್ತ್ ಮುಗಿತಿನ ಮುಂಬೈದ ಚಂದ್ರಾವತಿ, ಬೆಂಗಳೂರುದ ಕೃಷ್ಣದಾಸ, ಅಮೇರಿಕಾದ ಶ್ರೀವಲ್ಲಿ ರೈ ಬೊಕ್ಕ ನಿಟ್ಟೆ ವಿಶ್ವವಿದ್ಯಾಲಯದ ಡಾ.ಸಾಯಿಗೀತಾ ಮೊಕುಲು ಈ ಭವ್ಯ ಯಶಸ್ಸ್‌ದ ಪಾಲುದಾರೆರ್. ನೆತ್ತ ದೀಕ್ಷೆನ್ ತುಂಬೊಂದಿನ ಇಸ್ಕಾನ್ ಸಂಸ್ಥೆದ ಪ್ರಸಾದೇಶ್ವರ ಕೃಷ್ಣದಾಸೆರ್ನ ಭಗೀರಥ ಪ್ರಯತ್ನ ಮೆಚ್ಚೊಡಾಯಿನ. ದೇಶ ವಿದೇಶಡ್‌ಲ ಪ್ರಸಾರ ಪ್ರಚಾರ ಸಮಿತಿಲೆನ್ ಮಲ್ತ್‌ದ್ ಅವುಲುಲ ತುಳು ಭಗವದ್ಗೀತೆ ಬಿಡುಗಡೆ ಮಲ್ತ್‌ದ್ ವಿಶ್ವದ ಮಾತಾ ಕಡೆಟ್‌ಲ ತುಳುವೆರೆನ ಇಲ್ಲ್ ಇಲ್ಲಗ್ ಮುಟ್ಟರೆ ಉಂಡು ಪಂದ್ “ಟೀಂ ಐಲೇಸಾ* ತೆರಿಪಾದ್ಂಡ್.

ಮುಲ್ಕಿಟೂರಿಸ್ಟ್ ಕಾರ್ ಬೊಕ್ಕ ಟೆಂಪೋ ಚಾಲಕರ ಬೊಕ್ಕ ಮಾಲಕರ ಸಂಘದ 2026-27 ನೇ ವರ್ಸದ ನೂತನ ಪೊಸ ಗುರ್ಕಾರ್ಲು ಆದ್ ನಾರಾಯಣ ನ್ಯಾಕ್ ಆಯ್ಕೆ

ಮುಲ್ಕಿ:ಟೂರಿಸ್ಟ್ ಕಾರ್ ಬೊಕ್ಕ ಟೆಂಪೋ ಚಾಲಕರ ಬೊಕ್ಕ ಮಾಲಕರ ಸಂಘದ 2026-27 ನೇ ವರ್ಸದ ಪೊಸ ಗುರ್ಕಾರ್ಲು ಆದ್ ನಾರಾಯಣ ನ್ಯಾಕ್ ಸರ್ವಾನುಮತಟ್ ಆಯ್ಕೆಯಾತೆರ್ .
ಸಂಘದ ಪೊಸ ಒತ್ತು ಗುರ್ಕಾರ್ಲು ಆದ್ ಮೋಹನ್ ಕುಂದರ್ ಬೊಕ್ಕ ಜಗನ್ನಾಥ, ಕಾರ್ಯದರ್ಶಿಯಾದ್ ಮಂಜುನಾಥ್ ಶೆಟ್ಟಿ, ಒತ್ತು ಕಾರ್ಯದರ್ಶಿಯಾದ್ ವಿಜಯ ಮಾನಂಪಾಡಿ ಬೊಕ್ಕ ಅನಿಲ್ ಕುಮಾರ್, ಕೋಶಾಧಿಕಾರಿಯಾದ್ ನಿತಿನ್ ದೇವಾಡಿಗ ಬೊಕ್ಕ ಕಾರ್ಯಕಾರಿ ಸಮಿತಿ ಸದಸ್ಯರಾದ್ ಪಿ.ಆರ್ ರಾಜೇಶ್, ದೇವಣ್ಣ ನಾಯಕ್, ಲತೀಶ್ ಕುಂದರ್, ಚಂದ್ರಶೇಖರ್ ರಾವ್, ಸಂತೋಷ್ ಶೆಟ್ಟಿ ಚಿತ್ರಾಪು, ಸಂತೋಷ್ ಪೂಜಾರಿ, ಸುರೇಶ್ ದೇವಾಡಿಗ, ಮೋಹನ್ ಶೆಟ್ಟಿ, ಶೆಕ್ ಫಹಾದ್ (ಪಪ್ಪು), ಆಯ್ಕೆಯಾತೆರ್ .
ಸಭೆಟ್ ಸಂಘದ ಸದಸ್ಯೆರೆನ ಜೋಕುಲೆಗ್ ವಿದ್ಯಾರ್ಥಿವೇತನ ಕೊರಿಯೆರ್.
ಪೊಸ ಗುರ್ಕಾರ್ಲು ಬೊಕ್ಕ ಪದಾಧಿಕಾರಿಲೆಗ್ ಬೆಂಗಳೂರುದ ಆಧ್ಯಾತ್ಮಿಕ ಗುರು ಶ್ರೀ ಚಂದ್ರಶೇಖರ ಸ್ವಾಮೀಜಿ ಎಡ್ಡೆಪ್ಪುಲು ಬಯಕಿಯೆರ್

ಗೋಳಿಜೋರಡ್ 18ನೇ ವರ್ಷದ ಮಾರ್ನೆಮಿ ಪಿಲಿವೇಷದ ಊದು ಪೂಜೆ ಲೇಸ್

ಮುಲ್ಕಿ: ಗೋಳಿಜೋರ ಫ್ರೆಂಡ್ಸ್, ಆಶ್ರಯಡ್ ಮಾರ್ನೆಮಿ ನಿಟ್ಟ್‌ಡ್ ಅಟ್ಟನೆ ಮಲ್ದಿನ 18ನೇ ವರ್ಷದ ದಸರಾ ಪಿಲಿವೇಷದ ಊದು ಪೂಜೆ ಲೇಸ್ ನ್ ಜಯಕೃಷ್ಣ ಕೋಟ್ಯಾನ್ ಬೊಲ್ಪು ಅರ್ಲಾದ್ ಚಾಲನೆ ಕೊರಿಯೆರ್ .
ಈ ಪೊರ್ತುಡು ಮೂಲ್ಕಿ ಮೂಡುಬಿದಿರೆ ಕ್ಷೇತ್ರ ಶಾಸಕ ಉಮಾನಾಥ್ ಕೋಟ್ಯಾನ್, ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಮಿಥುನ್ ಎಂ. ರೈ , ಡಾ. ಸರಳ ರಮೇಶ್ ಕುಂದರ್, ಕಿನ್ನಿಗೋಳಿ ಪಟ್ಟಣ ಪಂಚಾಯತ್ ಗುರ್ಕಾರ್ಲು ಗುರುರಾಜ್ ಮಲ್ಲಿಗೆಯಂಗಡಿ, ಮೂಲ್ಕಿ ಮಾನಂಪಾಡಿ ಶ್ರೀ ವೀರಭದ್ರ ಮಹಮ್ಮಾಯಿ ದೇವಸ್ಥಾನದ ಆಡಳಿತ ಮೊಕ್ತೇಸೆರೆರ್ ಪುರಂದರ ಶೆಟ್ಟಿಗಾರ್, ಕಿನ್ನಿಗೋಳಿ ಪಟ್ಟಣ ಪಂಚಾಯತ್ ಪದುಕೆರ್ ಪ್ರಣಿಕ್ ಕಿನ್ನಿಗೋಳಿ , ಗೋಪಾಲಕೃಷ್ಣ ಪುನರೂರು, ಉದ್ಯಮಿ ಜಗನ್ನಾಥ್ ಬರ್ಕೆ ಮನೆ, ಶಿಮಂತೂರು, ಮುಲ್ಕಿ ಬ್ಲಾಕ್ ಕಾಂಗ್ರೆಸ್ ಗುರ್ಕಾರ್ಲು ಮೋಹನ್ ಕೊಟ್ಯಾನ್, ಮುಲ್ಕಿ ಮೂಡಬಿದ್ರೆ ಕ್ಷೇತ್ರದ ಯುವ ಕಾಂಗ್ರೆಸ್ ಗುರ್ಕಾರ್ಲು ಶಯನ್ ಕುಮಾರ್ ಶೆಟ್ಟಿಗಾರ್, ಮುಲ್ಕಿ ಬ್ಲಾಕ್ ಯುವ ಕಾಂಗ್ರೆಸ್ ಗುರ್ಕಾರ್ಲು ರಕ್ಷಿತ್ ಪೂಜಾರಿ, ಮೋಹಿನಿ ಕಲಾ ಸಂಪದ ಮಾಲಕ ಗಂಗಾಧರ್ ಶೆಟ್ಟಿಗಾರ್ , ಹರಿಹರ ಶ್ರೀ ರಾಮ ಭಜನಾ ಮಂದಿರದ ಗುರ್ಕಾರ್ಲು ಬೊಕ್ಕ ಪದಾಧಿಕಾರಿಲು, ಸರ್ವ ಸದಸ್ಯೆರ್ ಬೊಕ್ಕ ಅಪಾರ ಸಂಖ್ಯೆದ ಭಕ್ತಾಭಿಮಾನಿಲು ಉಪಸ್ಥಿತರಿತ್ತೆರ್.
ಊದು ಪೂಜೆಯ ಬೊಕ್ಕ ಸೇವಕರ್ತೆರ್ ಅಂಕಿತ ಶಯನ್ ಶೆಟ್ಟಿಗಾರ್, ಶ್ರೀಯಾನ್, ತನಿಷ್ಕಾ, ಸತೀಶ್ ಪೂಜಾರಿ ಕೊಡೆತ್ತೂರು, ಆಶಿರ್ವಾದ್ ಗೋಳಿಜೋರ, ರಂಜಿತಾ ನವನೀತ್, ಮಾಸ್ಟರ್ ದರ್ಶಿಲ್ ಗೋಳಿಜೋರ, ಕವಿತಾ ಜಗದೀಶ್ ಶೆಟ್ಟಿಗಾರ್ ಕುಜಿಂಗಿರಿ, ದೀಪ್ತಿ ಸನತ್ ಗೋಳಿಜೋರ, ಇಂಡಿಯನ್ ಆರ್ಮಿ ಹರೀಶ್ ಮುಲ್ಕಿ, ಸೇವಂತಿ ಚಾರಿಟೇಬಲ್ ಟ್ರಸ್ಟ್ ಮುಲ್ಕಿ ಮೊಕುಲೆರ್ದ್ ನುಪ್ಪುಪ್ರಸಾದ ನಡತ್ಂಡ್.

You Missed