ಕುಡ್ಲದ ಸುದ್ದಿ | Mangalore News

ಮುಲ್ಕಿದ ಕನ್ಯಾನ ಸದಾಶಿವ ಶೆಟ್ಟಿ ಕಾಂಪ್ಲೆಕ್ಸ್ ‌ಗ್ ಶಶಿಧರ ಶೆಟ್ಟಿ ಬರೋಡಾ 1.25 ಕೋಟಿ ರೂ. ದೇಣಿಗೆ

Mar 25, 2026

2 ನೇ ಹಂತದ ಕಾಮಗಾರಿಗ್ ಚಾಲನೆ, ವಿಶೇಷ ಸಭೆ

ಮುಲ್ಕಿ : ನ್ಯಾಷನಲ್ ಹೈವೇ 66ತ್ತ ಕೈತಲ್ ನಿರ್ಮಾಣ ಆವೊಂದಿಪ್ಪುನ ಡಾ. ಕನ್ಯಾನ ಸದಾಶಿವ ಶೆಟ್ಟಿ ಕಾಂಪ್ಲೆಕ್ಸ್ ಡಿಸೆಂಬರ್‌ಡ್ ಪೂರ್ಣ ಆದ್ ಲೋಕಾರ್ಪಣೆ ಆವರೆ ಉಂಡು. ಸದಾಶಿವ ಶೆಟ್ಟಿ ಸಂಕೀರ್ಣಗ್ 1.25 ಕೋಟಿ ರೂಪಾಯಿ ನೆರವು ಕೊರೊಂದುಲ್ಲೆ. ಸಭಾಭವನ ಪೂರ್ಣ ಆವರೆ ಮಾತಾ ಬಂಧುಲೆನ ಸಹಕಾರ ಅಗತ್ಯ ಪಂದ್ ಒಕ್ಕೂಟದ ಮಹಾ ನಿರ್ದೇಶಕೆರ್ ಉದ್ಯಮಿ ಶಶಿಧರ ಶೆಟ್ಟಿ ಬರೋಡಾ ತೆರಿಪಾಯೆರ್.
ಆರ್ ಮುಲ್ಕಿದ ಪ್ರವೀಣ್ ಭೋಜ ಶೆಟ್ಟಿ ಸಂಕೀರ್ಣಡ್ ನಡತಿನ ಸದಾಶಿವ ಶೆಟ್ಟಿ ಸಂಕೀರ್ಣದ ರಡ್ಡನೇ ಹಂತದ ಬೇಲೆ ಪತ್ತುನ ಬಗೆಟ್ಟ್ ನಡತಿನ ವಿಶೇಷ ಮಹಾಸಭೆನ್ ದೀಪ ಅರ್ಲಾದ್ ಉದಿಪನ ಮಲ್ತ್ ಪಾತೆರಿಯೆರ್.
” ನನ 7-8 ತಿಂಗೊಲ್ದ ಉಲಯಿ ಸಭಾಭವನದ ನಿರ್ಮಾಣ ಆವೊಡು. ಈ ನಿಲೆಟ್ಟ್ ಸಮಾಜದ ದಾನಿಲು ಬೊಕ್ಕ ಪ್ರತಿಯೊರಿಲ ಕೈ ಜೋಡ್ಯಾವೊಡು.ಮಹಾದಾನಿ ಕನ್ಯಾನ ಸದಾಶಿವ ಶೆಟ್ರೆನ ಆಶಯ, ಆಶೀರ್ವಾದಡ್ ಏಸಿದ ಹಾಲ್ ಮಧ್ಯಮ ವರ್ಗರ್ದ್ ಪತಿನ ಸಮಾಜದ ಮಾತಾ ಜನಕ್ಲೆಗ್‌ಲ ಉಂದೆತ್ತ ಪ್ರಯೋಜನ ತಿಕ್ಕೊಡು ಪಂದ್ ಪಂಡೆರ್.
ಜಾಗತಿಕ ಬಂಟರ ಸಂಘದ ಒಕ್ಕೂಟದ ಅಧ್ಯಕ್ಷೆರ್ ಐಕಳ ಹರೀಶ್ ಶೆಟ್ಟಿ ಪಾತೆರ್ದ್, ಸಂಕೀರ್ಣದ ಕೆಲಸ ಆವೊಂದುಂಡು. ಶಶಿರೇಖಾ ಆನಂದ ಶೆಟ್ಟಿ ಪುದರ್‌ಡ್ ವೇದಿಕೆ ಉಂಡು. ಉಂದೆತ್ತ ಒಟ್ಟಿಗೇ ಕುಡೊಂಜಿ ಸಭಾಂಗಣ, ಧರ್ಮ ಚಾವಡಿ, ಪ್ರವೀಣ್ ಭೋಜ ಶೆಟ್ಟಿ ಆಡಳಿತ ಕಚೇರಿ ಉಂಡು. ಸಭಾಭವನ ನಿರ್ಮಾಣಗ್ ಮಸ್ತ್ ದಾನಿಲು ಕೊರ್ತೆರ್. ಅಕ್ಲೆನ್ ಮಾತಾ ಸಂಪರ್ಕ ಮಲ್ಪುವ. ಸಭಾಭವನಗ್ 5 ಲಕ್ಷ ರೂ. ಜಾಸ್ತಿ ಕೊರ್ನಕ್ಲೆನ ಭಾವಚಿತ್ರನ್ ಆಡಳಿತ ಕಚೇರಿಡ್ ಪಾಡುವ” ಪಂದ್ ತೆರಿಪಾಯೆರ್.
ಒಕ್ಕೂಟದ ಉಪಾಧ್ಯಕ್ಷೆರ್ ಕರ್ನಿರೆ ವಿಶ್ವನಾಥ ಶೆಟ್ಟಿ ಪಾತೆರ್ದ್, ಒಕ್ಕೂಟಗ್ ಒಂಜಿ ಎಕ್ರೆ ಜಾಗ ಕೊರ್ಪಿನ ಬದಲ್ ಸಭಾಭವನಗ್ 50 ಲಕ್ಷ ರೂಪಾಯಿ ದೇಣಿಗೆ ಕೊರ್ಪೆ” ಪಂದ್ ಪಂಡೆರ್.
ಲೇಸ್‌ಡ್ ಉದ್ಯಮಿ ರಾಕ್ಷಿ ಡೆವಲಪರ್ಸ್ ಆಡಳಿತ ನಿರ್ದೇಶಕೆರ್ ರಾಜೇಶ್ ಶೆಟ್ಟಿ, ಯುವ ವಿಭಾಗದ ಸಂಚಾಲಕೆರ್ ಗಿರೀಶ್ ಶೆಟ್ಟಿ ತೆಳ್ಳಾರ್, ಕಟ್ವಾಣದ ವಿನ್ಯಾಸಕಾರೆ ಎ ಜಿ ಭಟ್, ಪ್ರಧಾನ ಕಾರ್ಯದರ್ಶಿ ಜಯಕರ ಶೆಟ್ಟಿ ಇಂದ್ರಾಳಿ, ಜೊತೆ ಕಾರ್ಯದರ್ಶಿ ಚಂದ್ರಹಾಸ ಶೆಟ್ಟಿ ರಂಗೋಲಿ, ಉದ್ಯಮಿ ಹರೀಶ್ ಶೆಟ್ಟಿ ಮುಂಬೈ, ಸಂಚಾಲಕೆರ್ ಕೊಲ್ಲಾಡಿ ಬಾಲಕೃಷ್ಣ ರೈ, ಬೇತೆ ಬೇತೆ ಬಂಟರ ಸಂಘದ ಅಧ್ಯಕ್ಷೆರ್, ಪದಾಧಿಕಾರಿಲು ಇತ್ತೆರ್.
ಅನೂಪ್ ಶೆಟ್ಟಿ ಸುರತ್ಕಲ್ ಪ್ರಾರ್ಥನೆ ಮಲ್ತೆರ್. ಚಂದ್ರಹಾಸ ಶೆಟ್ಟಿ ಸೊಲ್ಮೆ ಸಂದಾಯೆರ್. ಜಯಕರ ಶೆಟ್ಟಿ ಇಂದ್ರಾಳಿ ಕಾರ್ಯಕ್ರಮ‌ ನಿರೂಪಣೆ ಮಲbantsangha್ತೆರ್.

Religious & Cultural News ಮಾತ ಧರ್ಮದ ಸುದ್ದಿ ಊರ್ದ ಸುದ್ದಿ Regional News ಕುಡ್ಲದ ಸುದ್ದಿ | Mangalore News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ಮುಲ್ಕಿ

ಸಸಿಹಿತ್ಲು ಸಾರಂತಾಯ ಗರೋಡಿ ಉಳ್ಳಾಯ ದೈವಸ್ಥಾನಡ್ ಗೌಜಿದ ಕಾಲಾಧಿದ ನೇಮೋತ್ಸವ

Mar 24, 2026

ಸಸಿಹಿತ್ಲು : ಶ್ರೀ ಸಾರಂತಾಯ ಗರೋಡಿ ಉಳ್ಳಾಯ ದೈವಸ್ಥಾನಡ್ ಕಾಲಾಧಿದ ನೇಮೋತ್ಸವ ಮಾರ್ಚ್ 20 ಶುಕ್ರವಾರರ್ದ್ ಮಾ.24 ಅಂಗಾರೆ ಮುಟ್ಟ ಭಾರಿ ಗೌಜಿಡ್ ನಡತ್ಂಡ್.
ಮಾ.21 ಶನಿವಾರ ಕಾಂಡೆ ನಾಗದೇವೆರೆಗ್ ತನು ತಂಬಿಲ, ಬ್ರಹ್ಮೆರೆಗ್ ತಂಬಿಲ ಸೇವೆ, ರಕ್ತೇಶ್ವರಿ ದೇವಿಗ್ ಪೂತ್ತ ಪೂಜೆ ಆಯಿ ಬೊಕ್ಕ ದೈವೊಲೆನ ಶುದ್ಧ ಮಲ್ತ್‌ದ್, ದೃಢಕಲಶ ಮಲ್ತ್‌ದ್ ರಾತ್ರೆ ಶ್ರೀ ಕ್ಷೇತ್ರ ಕಾಂತುಲಕಣ ಗಡಿಪ್ರದಾನೆರ್ನ ಭಂಡಾರದಿಲ್ಲಡ್ ತಂಬಿಲ ಸೇವೆ ನಡತ್ಂಡ್. ಅಂಚೆನೆ ಕಾಂತಾಬಾರೆ ಬೂದಾಬಾರೆರೆಗ್ ಅನ್ನ ನೈವೇದ್ಯ, ಅಗೇಲ್ ಸೇವೆ, ಮಾಣಿಬಾಲೆ ಬೊಕ್ಕ ಮಾಯಂದಾಲ್ ದೇವಿಗ್ ಅಗೆಲ್ ಸೇವೆ, ಪ್ರಸಾದ ವಿತರಣೆ ಬೊಕ್ಕ
ಅನ್ನಸಂತರ್ಪಣೆ ನಡತ್ಂಡ್.
ಮಾ.22 ಐತಾರ ಬಯ್ಯಡ್ 4 ಗಂಟೆಗ್ ದೊಂಪ ಏರ್‌ದ್ ರಾತ್ರೆ ಶ್ರೀ ಕ್ಷೇತ್ರ ಕಂಡೇವು ಧರ್ಮರಸು ಉಳ್ಳಾಯ ಬೊಕ್ಕ ಸಪರಿವಾರ ದೈವೊಲೆನ
ಭಂಡಾರ ಬತ್ತ್‌ದ್ ಇಂಚಿಡ್ ಕಾಂತುಲಕಣ ಗಡಿಪ್ರದಾನೆರ್ನ ಇಲ್ಲದ ದೈವೊಲೆನ ಭಂಡಾರ ಬತ್ತ್‌ದ್ ಕೊಡಿ ಏರ್‌ದ್ ಬೊಕ್ಕ ಅನ್ನಸಂತರ್ಪಣೆ ನಡತ್ಂಡ್.
ಮಾ. 23 ಸೋಮವಾರ ಕಾಂಡೆ ಉಳ್ಳಾಯ ದೇವೆರ್ನ ನೇಮೋತ್ಸವ ನಡತ್ಂಡ್. ಅಯಿರ್ದ್ ಬೊಕ್ಕ ಇಷ್ಟದೇವತೆ, ಮೂಲ ಮೈಸಂದಾಯ,
ಬಬ್ಬರ್ಯ ಬೊಕ್ಕ ಪರಿವಾರ ದೈವೊಲೆನ ನೇಮ ನಡತ್ಂಡ್. ಬೊಕ್ಕ ಕಾಂತಾಬಾರೆ
ಬೂದಾಬಾರೆರೆಗ್, ಮಾಯಂದಾಲ್ ಶಕ್ತಿಗ್ ಪಂಚಕಜ್ಜಾಯ ಸೇವೆ ಆದ್ ಅನ್ನಸಂತರ್ಪಣೆ ನಡತ್ಂಡ್. ಬಯ್ಯಡ್ 4 ಗಂಟೆರ್ದ್ ಓಡ್ಯಂತಾಯ ದೈವದ ನೇಮೋತ್ಸವ ನಡತ್ಂಡ್.

ರಾತ್ರೆ 9 ಗಂಟೆಗ್ ಜಾರಂದಾಯ,ಬಂಟ, ಜುಮಾದಿ, ಬಂಟ, ಕೊಡಮಣಿತ್ತಾಯ, ಕಂಡೇವು ಬೂಡುದ
ಕಾಂತೇರಿ ಜುಮಾದಿ, ಪಿಲಿಚಾಮುಂಡಿ ದೈವೊಲೆಗ್ ನೇಮ ನಡತ್ಂಡ್.

ಮಾ. 24 ಅಂಗಾರೆ ಕಾಂಡೆ 5 ಗಂಟೆಗ್ ಕೊಡಿ ಜಾದ್ ಕಾಂತುಲಕಣ ಗಡಿಪ್ರದಾನೆರೆನ ಇಲ್ಲಗ್ ಅಂಚೆನೆ ಕಂಡೇವು ಬೂಡುಗು ಭಂಡಾರ ಪಿರ ಪೋಂಡು. ಈ ನೇಮೋತ್ಸವದ ಸಂದರ್ಭೊಡು ಶ್ರೀ ಕ್ಷೇತ್ರದ ಆಡಳಿತ ಸಮಿತಿ, ಮುಂಬೈ ಸಮಿತಿ ಬೊಕ್ಕ ಮಹಿಳಾ ಸಮಿತಿದ ಅಧ್ಯಕ್ಷೆರ್ ಬೊಕ್ಕ ಪದಾಧಿಕಾರಿಲು, ಸರ್ವ ಸದಸ್ಯೆರ್, ಕಾಂತುಲಕಣ ಗಡಿಪ್ರಧಾನೆರ್ ಯಾನೆ ಪಠೇಲರ ಮನೆತನದಕುಲು, ತೋಚೋಡಿ ಮನೆತನದಕುಲು,ಅರ್ಚಕ ವಿಭಾಗದಕುಲು, ಕಡಪುರ ಮನೆತನದಕುಲು, ಮುಕ್ಕ ಮಿತ್ರಪಟ್ನ, ಕದಿಕೆ ಮೊಗವೀರ ಸಭಾದ ಸದಸ್ಯೆರ್ ಅಂಚೆನೆ ನಾಲ್ ಕರೆತ್ತ ಪತ್ತ್ ಸಮಸ್ತೆರ್ ಪಾಲ್ ಪಡೆದ್ ಶ್ರೀ ಉಳ್ಳಾಯ ದೇವೆರ್ ಬೊಕ್ಕ ಪರಿವಾರ ದೈವೊಲೆನ ಗಂಧ ಪುರ್ಸಾದ ದೆತೊಂಡೆರ್.

Religious & Cultural News ಮಾತ ಧರ್ಮದ ಸುದ್ದಿ ಊರ್ದ ಸುದ್ದಿ Regional News ಕುಡ್ಲದ ಸುದ್ದಿ | Mangalore News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ರಪಕ್ಕ ಸುದ್ದಿ Flash News

ಅತ್ತಾವರ ಶ್ರೀ ಅಯ್ಯಪ್ಪ ಸ್ವಾಮಿ ಕ್ಷೇತ್ರಡ್ ಬ್ರಹ್ಮಕಲಶ ಉಚ್ಚಯದ ಲೆಪ್ಪೋಲೆ ಬುಡುಗಡೆ

Mar 23, 2026

ನೂದೆರ್ದ್ ಎಚ್ಚ ವರ್ಷಲೆನ ಇತಿಹಾಸ ಇಪ್ಪುನ ಶ್ರೀ ಅಯ್ಯಪ್ಪ ಸ್ವಾಮಿ ಕ್ಷೇತ್ರದ ಬ್ರಹ್ಮ ಕಲಶಾಭಿಷೇಕ ಎ.19-23 ಮುಟ್ಟ ನಡಪರೆ ಉಂಡು.

ಈ ಲೇಸ್ ದ ಲೆಕ್ಕೊಡು ಲೆಪ್ಪೋಲೆ ಬುಡುಗಡೆನ್ ಮಾ.22 ಕ್ಕ್ ಶ್ರೀ ಅಯ್ಯಪ್ಪ ಸ್ವಾಮಿ ಕ್ಷೇತ್ರಡ್ ಕುಡ್ಲ ದಕ್ಷಿಣ ಶಾಸಕೆರ್ ವೇದವ್ಯಾಸ ಕಾಮತ್ ಮಲ್ತೆರ್. ಬೊಕ್ಕ ಪಾತೆರ್ದ್, ದಕ್ಷಿಣ ಕನ್ನಡ ಜಿಲ್ಲೆದ ಸುರುತ್ತ ಅಯ್ಯಪ್ಪ ದೇವಸ್ಥಾನದ ಬ್ರಹ್ಮಕಲಶಡ್ ಪಾಲ್ ಪಡೆಪುನ ಸೌಭಾಗ್ಯ ತಿಕಿನವು ಪುಣ್ಯದ ಫಲ, ಒಂಜಿ ಊರಿಡ್ ಬ್ರಹ್ಮಕಲಶ ನಡತ್ಂಡ ಆ ಊರುದ ಉದ್ದಾರಗ್ ಕಾರಣ ಆಪುಂಡು. ಊರುಗು ಸಂಕಷ್ಟ ಬರ್ಪುಜಿ. ಈ ದೇವೆರೆನ ಕಾರ್ಯಡ್ ಊರುದ ಪರವೂರುದ ಮಾತೆರ್ಲಾ ಪಾಲ್ ಪಡೆದ್, ಪೊರ್ಲುಡು ಬ್ರಹ್ಮಕಲಶ ನಡಪುಲೆಕ್ಕ ಪ್ರತಿಯೊರಿಲ ಅಳಿಲು ಸೇವೆ ಮಲ್ಪುನ ಮುಕೇನ ಪಾಲ್ ಪಡೆವೊಡು ಪಂದ್ ಪಂಡೆರ್.

ಮಲ್ಲ‌ ಬಿನ್ನೆರಾದ್ ಸ್ವಾಗತ ಸಮಿತಿದ ಗೌರವಾಧ್ಯಕ್ಷೆರ್ ರತೀಂದ್ರ ನಾಥ, ಬ್ರಹ್ಮಕಲಶ ಸಮಿತಿದ ಅಧ್ಯಕ್ಷೆರ್ ಸೂರಜ್ ರಾಘವನ್, ಕಾರ್ಯಾಧ್ಯಕ್ಷೆರ್ ಗೋಕುಲದಾಸ್ ಬೊಕ್ಕ ಮುರುಳಿಧರ್, ಗೌರವ ಕೋಶಾಧಿಕಾರಿ ಸಂತೋಷ ಶೆಟ್ಟಿ, ಸ್ವಾಗತ ಸಮಿತಿದ ಅಧ್ಯಕ್ಷೆರ್ ರಾಜರತ್ನ ಸನಿಲ್, ಗೌರವ ಕಾರ್ಯದರ್ಶಿ ಜನಾರ್ಧನ್ ಅತ್ತಾವರ, ಅಯ್ಯಪ್ಪ ದೇವಸ್ಥಾನ ಪಡೀಲ್ ದ ಅಧ್ಯಕ್ಷೆರ್ ಮೋಹನ್ ಪಡೀಲ್, ಆತ್ಮಶಕ್ತಿ ಕೋ ಆಪರೇಟಿವ್ ಸೊಸೈಟಿ ಚೇರ್ ಮ್ಯಾನ್ ಚಿತ್ತ ರಂಜನ್, ಕರುಣ್ ಇನ್ಫ್ರಾಸ್ಟ್ರಕ್ಚರ್ ಎಸ್ ಮಾಲಕೆರ್ ಕರುಣಾಕರ್, ಹಿಮಾಲಯ ರೋಡ್ ಲೈನ್ ಕುಡ್ಲ ಮಾಲೀಕೆರ್ ಅಶೋಕ್ ಯೆಯ್ಯಾಡಿ, ಉದ್ಯಮಿ ಸುರೇಶ್ ಪೂಜಾರಿ ಕಣ್ಣೂರು, ಶಶಿಧರ್, ರಾಮಪ್ರಸಾದ್ ಅರ್ಥ್ ಮೂವರ್ಸನ ಅಜಿತ್, ಗುತ್ತಿಗೆದಾರೆರ್ ಕೇಶವ ಬಲರಾಜ್, ಉಪಾಧ್ಯಕ್ಷೆರ್ ಪದ್ಮನಾಭನ್, ಪ್ರಧಾನ ಕಾರ್ಯದರ್ಶಿ ಕ್ಷಿತಿ ಮಮ್ಲೂರು, ಅಭಿವೃದ್ಧಿ ಸಮಿತಿದ ಅಧ್ಯಕ್ಷೆರ್ ಸೂರ್ಯಕಾಂತ್ ಬೊಕ್ಕ ಪದುಕೆರ್ ಪಾಲ್ ಪಡೆದಿತ್ತೆರ್.

ಸಾಹಿತಿ, ಅಮೃತ ಪ್ರಕಾಶ ಪತ್ರಿಕೆ ಸಂಪಾದಕಿ, ಬ್ರಹ್ಮ ಕಲಶ ಸಮಿತಿದ ಉಪಾಧ್ಯಕ್ಷೆರ್ ಡಾ.ಮಾಲತಿ ಶೆಟ್ಟಿ ಮಾಣೂರು ಎದ್ಕೊನಿಯೆರ್. ರಘುವೀರ್ ಬಾಬುಗುಡ್ಡೆ ಲೇಸ್ ನ್ ಸುಧಾರಿಕೆ ಮಲ್ತ್ ದ್, ಸೊಲ್ಮೆ ಸಂದಾಯೆರ್.

ಕುಡ್ಲದ ಸುದ್ದಿ | Mangalore News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ಫ್ಲ್ಯಾಶ್ ನ್ಯೂಸ್ / ರಪಕ್ಕ ಸುದ್ದಿ | Flash News

ಅಖಿಲ ಭಾರತೀಯ ಸಾಹಿತ್ಯ ಪರಿಷತ್ ಅಭಾಸಾಪ ದ.ಕ ಜಿಲ್ಲಾಧ್ಯಕ್ಷೆರಾದ್ ವೀಣಾ ಆಯ್ಕೆ

Mar 17, 2026

ಕುಡ್ಲ: ಅಖಿಲ ಭಾರತೀಯ ಸಾಹಿತ್ಯ ಪರಿಷತ್ ದ ದ.ಕ ಜಿಲ್ಲಾ ಘಟಕದ ಅಧ್ಯಕ್ಷೆರಾದ್ ಗೋವಿಂದ ದಾಸ ಕಾಲೇಜ್ ದ ಪೆರ್ಮೆದ ಹಳೆ ವಿದ್ಯಾರ್ಥಿನಿ ವೀಣಾ ಟಿ ಶೆಟ್ಟಿ ಮೇರ್ ಆಯ್ಕೆ ಆತೆರ್.

ಕಾರ್ಯದರ್ಶಿಯಾದ್ ಗೀತಾ ಲಕ್ಷ್ಮೀಶ, ಶ್ರೀಲಕ್ಷೀ ಮಠತ್ತಮೂಲೆ, ಕೋಶಾಧಿಕಾರಿಯಾದ್ ರತ್ನಾವತಿ ಬೈಕಾಡಿ ಆಯ್ಕೆ ಆತೆರ್.

ಕುಡ್ಲದ ಸುದ್ದಿ | Mangalore News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ರಪಕ್ಕ ಸುದ್ದಿ Flash News

ಸಾಂಪ್ರದಾಯಿಕ ಅಟಿಲ್‌ಗ್ ಪ್ರೇರಣೆ ಕೊರ್ನ ಪ್ರದೀಪ್ ಕುಮಾರ್ ಕಲ್ಕೂರ

Mar 13, 2026

ಕುಡ್ಲ :ಹೋಟೆಲ್‌ದಕಲೆಗ್ ಗ್ಯಾಸ್‌ದ ಕೊರತೆ ಆಯಿನ ಈ ಪೊರ್ತುಡು ಇಲ್ಲದಕುಲುಲ ದಿಕ್ಕೆಲ್ಡ್ ಅಟಿಲ್ ಮಲ್ಪರೆ ಸುರು ಮಲ್ದೆರ್.
ಆಧುನಿಕ ಜೀವನ ಶೈಲಿಡ್ ಗ್ಯಾಸ್ ಸ್ಟೌ, ಸೌರ ಒಲೆ ಬೊಕ್ಕ ಕರೆಂಟ್‌ದ ಸ್ಟೌ ಇಂಚಿನ ಮಾತ ಗಲಸೊಂದಿತ್ತಿನ ಇತ್ತೆದ ಜನಕುಲು ಎಲ್‌ಪಿಜಿ ಗ್ಯಾಸ್ ತಿಕ್ಕಂದಿನ ನಿಲೆಟ್ಟ್ ಪಿರಾಕ್‌ದ ಕಾಲದ ಸಾಂಪ್ರದಾಯಿಕ ಕನಕ್‌ದ ದಿಕ್ಕೆಲ್‌ದ ಕೈತಲ್ ಕುಲ್ದೆರ್.
ದ.ಕ ಜಿಲ್ಲಾ ಕನ್ನಡ ಸಾಹಿತ್ಯ ಪರಿಷತ್ತ್‌ದ ಮಾಜಿ ಅಧ್ಯಕ್ಷೆರ್ ಎಸ್.ಪ್ರದೀಪ ಕುಮಾರ ಕಲ್ಕೂರ ಮೇರ್‌ ತನ್ನ ಕದ್ರಿದ ಇಲ್ಲಡ್ ಕನಕ್‌ದ ದಿಕ್ಕೆಲ್‌‌ಡ್ ಅಟಿಲ್ ಮಲ್ಪರೆ ಸುರು ಮಲ್ದೆರ್.
ಪಿದಯಿ ದೇಸೊಡು ಲಡಾಯಿ ಆನಗ ಪೆಟ್ರೋಲಿಯಂ ಉತ್ಪನ್ನದ ಪೂರೈಕೆಗ್ ಅಡ್ಡಿ ಆಪಿನಿ ಸಹಜ. ಅಪಗ ನಮ್ಮ ದೇಶೊಡು ಅಯಿತ್ತ ಪರಿಣಾಮ ಆಪಿನೆರ್ದ್ ದುಂಬೇ ನಮ ಜಾಗ್‌ರ್ತೆ ವಹಿಸೊನ್ನವು ಎಡ್ಡೆ ಪನ್ಪಿನ ಸಂದೇಶನ್ ಪ್ರದೀಪ್ ಕಲ್ಕೂರ ಕೊರ್ತೆರ್.
ಪೇಂಟೆಡ್‌ಲ ಜಾಗೆ ಇತ್ತಿನಕುಲು ಕೈಕ್ಕ್ ತಿಕ್ಕುನ ಮುರ್ಪರೆನ್ ಗಲಸ್‌ದ್ ದಿಕ್ಲೆಲ್ಡೇ ಅಟಿಲ್ ಮಲ್ಪುನ ಎಡ್ಡೆ ಪನ್ಪಿನವು ಅರೆನ ಅಭಿಪ್ರಾಯ.
ಕೊರೋನಾ ಕಿರಿಕಿರಿದ ಪೊರ್ತುಡು ಪ್ರದೀಪ್ ಕುಮಾರ್ ಮೇರ್ ತನ್ನ ಇಲ್ಲದ ತೋಟಡ್ ಬುಳೆಪಿನ ಬಾರೆದ ಇರೆಟ್ಟೇ ವನಸ್ ಮಲ್ಪರೆ ಸುರು ಮಲ್ದಿನಾರ್. ಇತ್ತೆ ಕೋಡು ದಿಕ್ಕೆಲ್ ಸಹಿತವಾಯಿನ ಪೊಸತ್ತೊಂಜಿ ಮಣ್ಣ್‌ದ ದಿಕ್ಕೆಲ್‌ನ್ ಮಲ್ದೆರ್.
ಈ ಮುಕೇನ ನಮ್ಮ ಪಿರಾಕ್‌ದ ತಲೆಮಾರ್‌ದಕುಲು ಸಾಂಪ್ರದಾಯಿಕವಾದ್ ಒಲೆಟ್ಟ್ ತಯಾರ್ ಮಲ್ದಿನ ನುಪ್ಪು, ಸಾರ್, ಕಜಿಪುನು ತನ್ನನೇ ಇಲ್ಲದ ಬಾರೆದ ಇರೆಟ್ಟ್ ಉನ್ಪಿನ ಪದ್ಧತಿನ್ ಕುಡೊರ ಮುನ್ನೆಲೆಗೆ ಕನಪಿನ ಮುಕೇನ ಪ್ರದೀಪ ಕಲ್ಕೂರ ಮೇರ್ ಬೇತೆಕ್ಲೆಗ್ ಮಾದರಿ ಆತೆರ್.

ಊರ್ದ ಸುದ್ದಿ Regional News ಕುಡ್ಲದ ಸುದ್ದಿ | Mangalore News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ಮುಲ್ಕಿ

ತೋಕೂರುಡು ವಿಶ್ವ ಮಹಿಳಾ ದಿನಾಚರಣೆ ಅಂಗವಾದ್ ‘ನಾರಿ ನಮನ’ ಕಾರ್ಯಕ್ರಮ

Mar 12, 2026

ಹಳೆಯಂಗಡಿ: ಭಾರತ ಸರ್ಕಾರದ ಯುವ ಕಾರ್ಯ ಬೊಕ್ಕ ಕ್ರೀಡಾ ಸಚಿವಾಲಯದ ಮೇರಾ ಯುವ ಭಾರತ್ (ಮೈ ಭಾರತ್) ದಕ್ಷಿಣ ಕನ್ನಡ ಜಿಲ್ಲೆ, ತಾಲೂಕು ಬೊಕ್ಕ ಜಿಲ್ಲಾ ಯುವಜನ ಒಕ್ಕೂಟದ ಮಾರ್ಗದರ್ಶನಡ್ ದಕ್ಷಿಣ ಕನ್ನಡ ಜಿಲ್ಲಾ ಅಂಚೆನೆ ರಾಜ್ಯ ಮಟ್ಟದ ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತ ಶ್ರೀ ಸುಬ್ರಹ್ಮಣ್ಯ ಮಹಾಗಣಪತಿ ಸ್ಪೋರ್ಟ್ಸ್ ಕ್ಲಬ್(ರಿ), ತೋಕೂರು ಮೊಕ್ಲೆನ ಮಹಿಳಾ ಕಾರ್ಯಕಾರಿ ಸಮಿತಿ ಆಶ್ರಯಡ್ ಮಾರ್ಚ್ 8 ತಾನಿ ವಿಶ್ವ ಮಹಿಳಾ ದಿನಾಚರಣೆ ಅಂಗವಾದ್ ‘ನಾರಿ ನಮನ’ ಕಾರ್ಯಕ್ರಮ ನಡತ್ಂಡ್
ಸಂಸ್ಥೆದ ಗುರ್ಕಾರ್ಲು ಸುರೇಶ್ ಶೆಟ್ಟಿ ಕಾರ್ಯಕ್ರಮಗ್ ಚಾಲನೆ ಕೊರ್ದು ಪಾತೆರ್ದ್ ಸಾಮಾನ್ಯವಾದ್ ಸಮಾಜಡ್ ವಿಶೇಷ ಸಾಧನೆ ಮಲ್ತಿನಕ್ಲೆನ್ ಮಾನಾದಿಗೆ ಮಲ್ಪುನ ಪದ್ಧತಿ ಇತ್ತ್ಂಡಲ , ಕುಟುಂಬದ ಸುಖ ಸಂತೋಷ ಬೊಕ್ಕ ಸಮಾಜದ ಮೌಲ್ಯದ ಬುಲೆಚ್ಚಿಲ್ ಗ್ ತನ್ನ ಜೀವನನ್ ಮುಡಿಪಾದ್ ದೀಪುನ ಸಾಮಾನ್ಯ ಪೊಂಜುವುಲೆನ ಕೊಡುಗೆ ಅಮೂಲ್ಯ. ಅವೆಕ್ ಅಕುಲು ಗೌರವ ಮಲ್ಪುನ ಉದ್ದೇಶಡ್ ತೋಕೂರು ಗ್ರಾಮದ ನಾಲ್ ಜನ ಹಿರಿಯ ಪೊಂಜೊವುಲೆನ್ ಸಾಂಕೇತಿಕವಾದ್ ಮಾನಾದಿಗೆ ಮಲ್ತ್ ದ್ ಮಹಿಳಾ ದಿನಾಚರಣೆನ್ ಆಚರಣೆ ಮಲ್ದ ಪಂಡೆರ್ .
ಈ ಪೊರ್ತುಡು ಊರುದ ಹಿರಿಯ ಪೊಂಜೊವುಲೆನ ಜಲಜ, ಸುಶೀಲ, ಗುಲಾಬಿ ಅಂಚೆನೆ ಶಾಂತಿ ದೇವಾಡಿಗ ಮೊಕುಲೆನ ಇಲ್ಲಗ್ ಮಾನಾದಿಗೆ ಮಲ್ತೆರ್.
ಅಂಚೆನೆ ಅನಾರೋಗ್ಯಡ್ ಇಪ್ಪುನ ತೋಕೂರುದ ಕುಮಾರಿ ಸಾಕ್ಷಿ ಪನ್ಪುನ ಪೊಣ್ಣನ ಮರ್ದ್ ದ ಸಾಯ ಪಣವುದ ಸಾಯ ಮಲ್ತೆರ್.
ಈ ಪೊರ್ತುಡು ಸಂಸ್ಥೆದ ಗೌರವಾಧ್ಯಕ್ಷ ಯೋಗೀಶ್ ಕೋಟ್ಯಾನ್, ಪಡುಪಣಂಬೂರು ಗ್ರಾಮ ಪಂಚಾಯತ್ ಮಾಜಿ ಸದಸ್ಯ ಸಂತೋಷ್ ಕುಮಾರ್, ಪ್ರಧಾನ ಕಾರ್ಯದರ್ಶಿ ಸಂತೋಷ್ ದೇವಾಡಿಗ, ನಿಕಟ ಪೂರ್ವ ಗೌರವ ಅಧ್ಯಕ್ಷ ಪ್ರಶಾಂತ್ ಕುಮಾರ್ ಬೇಕರ್, ಸಮಿತಿ ಸದಸ್ಯ ಧರ್ಮಾನಂದ ಶೆಟ್ಟಿಗಾರ್, ಗೌರವ ಸಲಹೆಗಾರ ಗಣೇಶ್ ಪೂಜಾರಿ (ಬೆಂಗಳೂರು), ಮಹಿಳಾ ಕಾರ್ಯಾಧ್ಯಕ್ಷೆ ಸುರೇಖಾ ಕಲ್ಲಾಪು, ಮಹಿಳಾ ಕಾರ್ಯದರ್ಶಿ ಶೈಲಾ ಶೆಟ್ಟಿಗಾರ್, ಸಾಂಸ್ಕೃತಿಕ ಕಾರ್ಯದರ್ಶಿ ನೀಮಾ ಸನಿಲ್ ಬೊಕ್ಕ ಪೊಂಜೊವುಲೆನ ಪದುಕೆರ್ ಉಪಸ್ಥಿತರಿತ್ತೆರ್

ಊರ್ದ ಸುದ್ದಿ Regional News ಕುಡ್ಲದ ಸುದ್ದಿ | Mangalore News ಗೌಜಿ ಗಮ್ಮತ್ ದ ಸುದ್ದಿ | Events & Functions ಜೋಕುಲೆ ಚಾವಡಿ | Children's Corner ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News

ತುಲುವೆರೆ ಕಲ ಜೋಕುಲ್ನ ಪದೊ, ಕತೆ ಪಂತೊ

Mar 12, 2026

ಕುಡ್ಲ: ತುಲುವೆರೆ ಕಲ ಟ್ರಸ್ಟ್(ರಿ.) ಮಂಗಳೂರು ಉಂದೆತ್ತ ಮೂಜನೇ ವರ್ಸೊಚ್ಚಯದ ಸಲಾದ್ ಜೋಕುಲ್ನ ತುಲು ಪದೊ ಅಂಚೆನೇ ಜೋಕುಲ್ನ ತುಲು ಕತೆ ಪಂತೊ ಅಟ್ಟಣೆ ಮಲ್ತ್‌ದ್ಂಡ್. ಪಂತೊಡು ಏರೆಗ್ಲಾ ಪಾಲ್ ಪಡೆವೊಲಿ. ಪದೊ 12 ಸಾಲ್, ಕತೆ 250 ಪದೊಕ್ಲೆನ್ ಮೀರಿಯರೆ ಬಲ್ಲಿ. ಸ್ವಂತ ಬರವುಲಾದಿಪ್ಪೊಡು. ಈ ದುಂಬು ಅಚ್ಚಿ ಆದುಪ್ಪರೆ ಬಲ್ಲಿ, ಓಲುಲಾ ಪಸೆರ್‍ದಿಪ್ಪೆರೆ ಬಲ್ಲಿ. ಪದೊ ಬೊಕ್ಕ ಕತೆ ರಡ್ಡ್ ಎಗ್ಗೆಡ್ಲಾ ಊಂಚಿದ ಮೂಜಿ ಬರವುಲೆಗ್ ಸುರುತ್ತ, ರಡ್ಡನೆ ಬೊಕ್ಕ ಮೂಜನೇ ಪನವುದ ಇನಾಮುಲೆನ್ ಮೇ ತಿಂಗೊಲ್ಡು ನಡಪುನ ತುಲುವೆರೆ ಕಲೊತ್ತ ವರ್ಸೊಚ್ಚಯದ ಲೇಸ್‌ಡ್ ಪಟ್ಟ್‌ದ್ ಮಾನಾದಿಗೆ ಮಲ್ಪೆರುಂಡು. ಅಜತ್ತ್ ಬತ್ತಿನ ಬರವುಲು ಮಸ್ತಿರೆಡ್ ಅಚ್ಚಿ ಆಪುಂಡು. ಬರವುಲೆನ್ ಅಶೋಕ ಎನ್.ಕಡೇಶಿವಾಲಯ- 7760041895 ಅತ್ತ್ಂಡ ವಿಶ್ವನಾಥ ಕುಲಾಲ್ ಮಿತ್ತೂರು- 9900380301 ಒವ್ವಾಂಡಲಾ ಒಂಜಿ ವಾಟ್ಸ್ಯಾಪ್ ನಂಬರ್‌ಗ್ ಮಾ.31ತ್ತ ಉಲಯಿ ಟೈಪ್ ಮಲ್ತ್ ಕಡಪುಡೊಡು ಪಂಡ್ದ್ ಕಲತ್ತ ಗುರ್ಕಾರ್ದಿ ಗೀತಾ ಲಕ್ಷ್ಮೀಶ್ ತೆರಿಪಾದೆರ್.

ತೀಯಾ ಸಂಘಲೆನ ಅಧ್ಯಕ್ಷೆರ್, ಏಳೂರ ಗುರಿಕಾರೆರ್, ದೇವಲ್ಯದ ಚಾಕಿರಿದಕ್ಲೆಗ್ ಸನ್ಮಾನ

Mar 10, 2026

ಸಸಿಹಿತ್ಲು ಶ್ರೀ ಭಗವತೀ ದೇವಸ್ಥಾನದ ಬ್ರಹ್ಮಕಲಶೋತ್ಸವದ 5 ನೇ ದಿನತ್ತ ಧರ್ಮ ಸಭೆ

ಸಸಿಹಿತ್ಲು : ಶ್ರೀ ಭಗವತೀ ದೇವಸ್ಥಾನದ ಬ್ರಹ್ಮಕಲಶೋತ್ಸವದ 5 ನೇ ದಿನತ್ತ ಧರ್ಮ ಸಭೆ
ಬಹ್ಮಕಲಶೋತ್ಸವ ಸಮಿತಿದ ಅಧ್ಯಕ್ಷೆರ್ ನಳಿನ್ ಕುಮಾರ್ ಕಟೀಲ್ ಮೆರೆನ ಅಧ್ಯಕ್ಷತೆಡ್ ಮಾ.8 ಐತಾರ ನಡತ್ಂಡ್.
ಈ ವೇದಿಕೆಡ್ ಬೇತೆ ಬೇತೆ ಕಡೆತ್ತ ತೀಯಾ ಸಂಘದ ಪ್ರತಿನಿಧಿನಕ್ಲೆಗ್ ಮಾನಾದಿಗೆ ನಡತ್ಂಡ್. ಅಂಚೆನೆ ಏಳೂರ ಗುರಿಕಾರೆರ್, ದೇವಸ್ಥಾನದ ಚಾಕಿರಿದಕ್ಲೆಗ್ ಬಂಗಾರ್‌ದ ಪದಕ ಸಮೇತ ಸನ್ಮಾನ ನಡತಿನವು ವಿಶೇಷ.
ಅವ್ವತ್ತಾಂದೆ ಕ್ಷೇತ್ರದ ಗರ್ಭ ಗುಡಿತ್ತ ದ್ವಾರಗ್ ಬೊಳ್ಳಿ ಮುಚ್ಚಾದಿನಕ್ಲೆಗ್, ಮಹಾದ್ವಾರಗ್ ಕಂಚಿದ ಸೇವೆ ಕೊರ್ತಿನಕ್ಲೆಗ್, 22 ದೇವೆರ್ನ ಮೂರ್ತಿ ಮಲ್ತಿನ ಶಿಲ್ಪಿ ಸುಧಾಕರ್ ಪತಿ, ಗೋಪುರದ ಕಂಟ್ರ್ಯಾಕ್ಟರ್ ಅಭಿಲಾಷ್ ಶೆಟ್ಟಿ, ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಸಂಸ್ಥೆ ಯೋಜನಾಧಿಕಾರಿ ದಿನೇಶ್, ಕರ್ಣಾಟಕ ಬ್ಯಾಂಕ್‌ದ ಪ್ರತಿನಿಧಿ ರಮೇಶ್ ಬಂಗೇರ ಮೊಕ್ಲೆಗ್ ಸಮ್ಮಾನ ನಡತ್ಂಡ್.
ಈ ಪೊರ್ತುಡು ದೇವಸ್ಥಾನದ ಗರ್ಭಗುಡಿಕ್ಕ್ ಬೊಳ್ಳಿದ ಸೇವೆ ಕೊರ್ತಿನ ಉದ್ಯಮಿ ಸೂರಜ್ ಬಂಗೇರ ಮೆರೆಗ್ ಮಾನಾದಿಗೆ ನಡತ್ಂಡ್.
ಮಿತ್ತ ಚಾವಡಿಡ್ ಬಿನ್ನೆರಾದ್ ವೇದಮೂರ್ತಿ ಶ್ರೀಪತಿ ಭಟ್ ಪೊಯ್ಯೆದಗುಡ್ಡೆ,
ಶಾಸಕೆರಾಯಿನ ಡಾ.ವೈ. ಭರತ್ ಶೆಟ್ಟಿ, ಭಾಗೀರಥಿ ಮರುಳ್ಯ, ಡಾ.ದೇವಿ ಪ್ರಸಾದ್ ಶೆಟ್ಟಿ ಬೆಳಪು, ಮುಂಬೈ ಕಲೀನಾ ಭಗವತಿ ದೇವಸ್ಥಾನ ಆಡಳಿತಾಧಿಕಾರಿ
ಕುಮಾರಸ್ವಾಮಿ
ಉಳ್ಳಾಲ ಶ್ರೀ ಚೀರುಂಭ ಭಗವತಿ ಕ್ಷೇತ್ರದ ಚಂದ್ರಹಾಸ್ ಉಳ್ಳಾಲ್,
ಜೈಕೃಷ್ಣ ಪರಿಸರ ಪ್ರೇಮಿ ಸಮಿತಿದ ಅಧ್ಯಕ್ಷೆರ್ ಜೈ ಕೃಷ್ಣ ಶೆಟ್ಟಿ ಶೆಟ್ಟಿ, ಮುಂಬೈ ಉದ್ಯಮಿ
ಏಕನಾಥ್ ಅಮೀನ್ ,ಉಪ್ಪಳ ಭಗವತೀ ಕ್ಷೇತ್ರದ ಸುಕುಮಾರ್ ಉಪ್ಪಳ, ಉದ್ಯಮಿ ಆರ್ ಮೋಹನ್ ಕೋಟ್ಯಾನ್, ಸಸಿಹಿತ್ಲು ದೇವಸ್ಥಾನದ
ಆಡಳಿತ ಮೊಕ್ತೇಸರೆರ್ ಚಂದ್ರಶೇಖರ ಬೆಳ್ಚಡ, ಮುಂಬೈ ಸಮಿತಿದ ವೇದಪ್ರಕಾಶ್ ಶ್ರೀಯಾನ್,ಪದ್ಮನಾಭ ಬಂಗೇರ ಮೊಕುಲು ಮಾತ ಇತ್ತೆರ್.
ಅನ್ನಸಂತರ್ಪಣೆ ಸಮಿತಿದ ಸದಾಶಿವ ಶೆಟ್ಟಿ ಮುರ, ಕಾರ್ಯಾಲಯ ಸಮಿತಿದ ನವೀನ್ ಚಂದ್ರ ಪೂಜಾರಿ, ಉಗ್ರಾಣ ಸಮಿತಿದ ಮೋಹನ್ ಶೆಟ್ಟಿಗಾರ್, ಧಾರ್ಮಿಕ ಸಭಾ ಸಮಿತಿದ ಸೋಂದಾ ಭಾಸ್ಕರ ಭಟ್ ಇತ್ತೆರ್.
ತೋನ್ಸೆ ಪುಷ್ಕಳ್ ದೇವೆರೆನ್ ಸುಗಿತೆರ್.
ಆಡಳಿತ ಸಮಿತಿದ ಅಧ್ಯಕ್ಷೆರ್ ವಾಮನ ಇಡ್ಯಾ ಬಿನ್ನೆರೆನ್ ಎದ್ಕೊಂಡೆರ್.
ರಾಜೇಂದ್ರ ಪ್ರಸಾದ್ ಎಕ್ಕಾರ್ ನಿರೂಪಣೆ ಮಲ್ತೆರ್.

ಕಾರ್ನವೆರೆಗ್ ಬಂಗಾರ್‌ದ ಬಳೆ, ಕಟೀಲ್‌ಗ್ ಬೊಳ್ಳಿದ ಕಿರೀಟ

ಸಸಿಹಿತ್ಲು ಭಗವತಿ ಕ್ಷೇತ್ರದ ಪ್ರಧಾನ ಅರ್ಚಕೆರ್ ಶ್ರೀನಿವಾಸ ಯಾನೆ ಅಪ್ಪು ಪೂಜಾರಿ ಬೊಕ್ಕ ಲಕ್ಷ್ಮೀ ದಂಪತಿಗ್ ಬಂಗಾರ್‌ದ ಬಲೆ ಪಾಡ್ಧ್ ಮಾನಾದಿಗೆ ಮಲ್ತೆರ್. ಅಂಚೆನೆ ಬ್ರಹ್ಮಕಲಶೋತ್ಸವ ಸಮಿತಿದ ಅಧ್ಯಕ್ಷೆರ್ ನಳಿನ್ ಕುಮಾರ್ ಕಟೀಲ್ ಮೆರೆಗ್ “ಬೊಳ್ಳಿದ ಕಿರೀಟ” ದೀದ್ ಸನ್ಮಾನ ಮಲ್ತೆರ್. ಆಡಳಿತ ಸಮಿತಿ ಅಧ್ಯಕ್ಷೆರ್ ವಾಮನ ಇಡ್ಯಾ ಬೊಕ್ಕ ಸತ್ಯವತಿ ದಂಪತಿಲೆಗ್ ಬೊಳ್ಳಿದ ಕಲಶ ಕೊರ್ದು ಮಾನಾದಿಗೆ ಮಲ್ತೆರ್.

ಹಿಂದೂ ಸಮಾಜ ಕಡಲ್‌ದಾತ್ ವಿಸ್ತಾರ : ಚಕ್ರವರ್ತಿ ಸೂಲಿಬೆಲೆ

Mar 9, 2026

ಸಸಿಹಿತ್ಲುದ ಈ ಪೊರ್ಲ ಜಾಗೆಗ್ ಶ್ರೀ ಭಗವತೀ ದೇವಿ ಪರಿವಾರ ಸಮೇತ ಬೈದಿನಿ ಈ ಕಡಲ ಸಾದಿಡ್. ಆನಿ ಕಡಲ್ಡ್ ಬೈದಿನ ನೆಂಪುಗಾದ್ “ಗಂಗಾರತಿ” ಕಾರ್ಯಕ್ರಮ ಆಯೋಜನೆ ಆತ್ಂಡ್ ಪಂದ್ ಚಿಂತಕೆರ್ ಚಕ್ರವರ್ತಿ ಸೂಲಿಬೆಲೆ ಪಂಡೆರ್.
ಆರ್ ಸಸಿಹಿತ್ಲು ಭಗವತೀ ದೇವಸ್ಥಾನಡ್ ಬ್ರಹ್ಮಕಲಶೋತ್ಸವದ ಅಂಗವಾದ್ ಐತಾರ ಕಡಲ ಬರಿಟ್ಟ್ ನಡತಿನ ಗಂಗಾರತಿ ಕಾರ್ಯಕ್ರಮನ್ ಉದ್ದೇಶಿಸಾದ್ ಪಂಡೆರ್.
ಪೊಸ ಭಾರತ ಲಕ್‌ದ್ ಉಂತುದುಂಡು. ಪರಿಸರದ ರಕ್ಷಣೆ ನಮ್ಮ ಕರ್ತವ್ಯ. ಶಾಂತಿ ಬೊಕ್ಕ ಬಲಿಷ್ಟವಾಯಿನ ಭಾರತ ಇನಿತ್ತ ಯುದ್ಧದ ಸಂದರ್ಭಡ್‌ಲ ಶಾಂತಿಡದ ಉಪ್ಪರೆ ಸಾಧ್ಯವಾರೆ ಕಾರಣ ನಮ್ಮ ಸಂಸ್ಕೃತಿ, ಸಂಸ್ಕಾರ ಪಂದ್ ತೆರಿಪಾಯೆರ್.
ಆರ್ತಿಕತೆಡ್ ನನ ಆಜಿ ತಿಂಗೊಲುಡು ಮೂಜನೇ ಸ್ಥಾನನ್ ಪಡೆವುನ ಈ ನಮ್ಮ ದೇಶಡ್ ಮುಸ್ಲಿಮೆರ್ ನೆಮ್ಮದಿಡ್ ರಂಜಾನ್ ಆಚರಣೆ ಮಲ್ತೊಂದುಲ್ಲೆರ್. ಆಂಡ ಮುಸ್ಲಿಂ ಆಡಳಿತದ ಕೊಲ್ಲಿ ರಾಷ್ಟ್ರಡ್ ಇನಿ ಬಾಂಬುದ ಬರ್ಸ ಬೂರೊಂದುಂಡು. ಇನಿ ನಮ ನೆಮ್ಮದಿದ ಜೀವನ ಮಲ್ತೊಂದುಲ್ಲ ಪಂಡ ಅಯಿಟ್ ನಮ್ಮ ಹಿರಿಯೆರ್‌ನ ಪೊರ್ಂಬಾಟ ಉಂಡು.
ಬಂಟ ಬಿಲ್ಲವ ಬ್ರಾಹ್ಮಣ ಇಂಚ ಜಾತಿಲೆನ್ ನಮ್ಮ ನಮ್ಮ ಇಲ್ಲದ ಉಲಯಿ ಉಪ್ಪಡ್. ಪಿದಯಿ ಬನ್ನಗ ನಮ ಮಾತ ಹಿಂದೂ ಪನ್ಪಿನ ಒಗ್ಗಟ್ಟು ಉಪ್ಪಡ್ ಪಂದ್ ಪಂಡೆರ್.
ಈ ಪೊರ್ತುಡು ಕಡಲಬರಿತ್ತ ಪತ್ತ್ ವೇದಿಕೆಡ್ ಗಂಗಾರತಿ ನಡತ್ಂಡ್. ಸಾರ ಸಾರ ಭಕ್ತೆರ್ ಈ ಪೊರ್ತುಡು ಪಾಲ್ ಪಡೆದಿತ್ತೆರ್.
ವೇದಿಕೆಡ್ ಬ್ರಹ್ಮಕಲಶೋತ್ಸವ ಸಮಿತಿ ಅಧ್ಯಕ್ಷೆರ್ ನಳಿನ್ ಕುಮಾರ್ ಕಟೀಲ್,ದೇವಸ್ಥಾನದ ಮೊಕ್ತೇಸರೆರ್ ಚಂದ್ರಶೇಖರ ಬೆಳ್ಚಡ,ಮುಂಬೈ ಸಮಿತಿದ ವೇದ ಪ್ರಕಾಶ್ ಶ್ರಿಯಾನ್
ನರೇಶ್ ಶೆಣೈ ಮಂಗಳೂರು ಬೊಕ್ಕ ಸಮಿತಿದ ಪದಾಧಿಕಾರಿಲು ಇತ್ತೆರ್.
ರಾಜೇಂದ್ರ ಪ್ರಸಾದ್ ಎಕ್ಕಾರು ನಿರೂಪಣೆ ಮಲ್ತೆರ್.

Religious & Cultural News ಮಾತ ಧರ್ಮದ ಸುದ್ದಿ ಊರ್ದ ಸುದ್ದಿ Regional News ಕುಡ್ಲದ ಸುದ್ದಿ | Mangalore News ಗೌಜಿ ಗಮ್ಮತ್ ದ ಸುದ್ದಿ | Events & Functions ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ಮುಲ್ಕಿ

ಸಸಿಹಿತ್ಲು ಶ್ರೀ ಭಗವತೀ ಅಮ್ಮನ ಬ್ರಹ್ಮಕಲಶೋತ್ಸವದ 4 ನೇ ದಿನತ್ತ ಧರ್ಮಸಭೆ

Mar 9, 2026

ಅಮ್ಮನ ಉದ್ಧಾರ ಆಂಡ ನಮ್ಮ ಉದ್ಧಾರ: ಶ್ರೀ ರಾಜಶೇಖರ ಸ್ವಾಮೀಜಿ

ಸಸಿಹಿತ್ಲು : ಭಗವತೀ ಆಟ್ಟಂ ಪನ್ಪಿನ ಕಲಾ ಪ್ರಕಾರಡ್ ಭಗವತೀ ಅಮ್ಮನ ಬಗೆಟ್ಟ್ ನಿರೂಪಣೆ ಉಂಡು. ನಮ್ಮ ಉದ್ಧಾರಗಾದೇ ಭಗವತೀ ದೇವಿ ಕೇರಳರ್ದ್ ದೈಬಿತ್ತ್‌ಲ್‌ಗ್ ಬೈದೆರ್. ಬ್ರಹ್ಮಕಲಶದ ನಿಲೆಟ್ಟ್
ಅಮ್ಮನ ಉದ್ಧಾರ ಆಂಡ ನಮ್ಮ ಉದ್ಧಾರ ಆಪುಂಡು” ಪಂದ್ ಗುರುಪುರ ವಜ್ರದೇಹಿ ಮಠತ್ತ ಶ್ರೀ ರಾಜಶೇಖರಾನಂದ ಸ್ವಾಮೀಜಿ ಪಂಡೆರ್.

ಆರ್ ಸಸಿಹಿತ್ಲು ಶ್ರೀ ಭಗವತೀ ದೇವಸ್ಥಾನದ ಬ್ರಹ್ಮಕಲಶೋತ್ಸದ 4 ನೇ ದಿನತ್ತ ಧರ್ಮಸಭೆಟ್ಟ್ ಆಶೀರ್ವಚನ ಮಲ್ತ್ ಪಾತೆರಿಯೆರ್.
“ನಮ ಕಾಲಿ ಜಾತಿ ಸಂಘಟನೆಲೆಗ್ ಸೀಮಿತ ಆವಂದೆ ಒಟ್ಟುಗು ಹಿಂದೂ ಸಮಾಜದ ಗಟ್ಟಿತನನ್ ಒರಿತೊನೊಡು.ಅಂಚಾಙಡ ನಮನ್ ಬೇತೆ ಏರೆಗ್ಲ ಸೋಪಾವರೆ ಆಪುಜಿ”. ವಂದೇ ಮಾತರಂ ಪನ್ಪಿನ ಗೀತೆಡ್ ಅಮ್ಮನನೇ ವರ್ಣನೆ ಉಂಡು. ಇಂಚ ಮಾತಾ ಅಮ್ಮನಕ್ಲೆನ ಸಹಕಾರೊಡು ಹಿಂದೂ
ಸಮಾಜನ್ ಗಟ್ಟಿ ಮಲ್ಪುಗ” ಪಂದ್ ಪಂಡೆರ್.

ಸಸಿಹಿತ್ಲು ಶ್ರೀ ಭಗವತೀ ದೇವಸ್ಥಾನದ ಅನುವಂಶಿಕ ಮೊಕ್ತೇಸರೆರ್ ಶ್ರೀನಿವಾಸ ಯಾನೆ ಅಪ್ಪು ಪೂಜಾರಿ ಮೇರ್ ಪಾತೆರ್ದ್, 1995ನೇ ಇಸ್ವಿರ್ದ್ 2026 ನೇ ವರ್ಷಡ್ ಈ ಕ್ಷೇತ್ರಡ್ ನಡಪುನ ಮೂಜಿನೇ ಬ್ರಹ್ಮಕಲಶ ಉಂದು. ಸರ್ವೆರೆನ ಸಹಕಾರಡ್ ಇತ್ತೆ ಕ್ಷೇತ್ರದ ಚಿತ್ರಣನೇ ಬದಲಾತಂಡ್ ಪಂದ್ ಪಂಡೆರ್.
ಮಿತ್ತರ್ಮೆಡ್ ಮುಂಬೈ ಸಮಿತಿದ ಅಧ್ಯಕ್ಷೆರ್ ವೇದಪ್ರಕಾಶ್ ಶ್ರೀಯಾನ್, ಸಸಿಹಿತ್ಲು ಶ್ರೀ ಸಾರಂತಾಯ ಗರೊಡಿ ಬ್ರಹ್ಮಕಲಶೋತ್ಸವದ ಸಮಿತಿದ ಅಧ್ಯಕ್ಷೆರ್ ಸಿ.ಬಿ.ಕರ್ಕೇರ, ಮುಂಬೈ ಮೊಗವೀರ ವ್ಯವಸ್ಥಾಪನ ಮಂಡಳಿದ ಅಧ್ಯಕ್ಷೆರ್ ಗಣೇಶ್ ಕಾಂಚನ್,
ಮುಂಬೈ ಮೊಗವೀರ ಮಹಾಜನ ಸೇವಾ ಸಂಘದ
ಸಂತೋಷ್ ಪುತ್ರನ್, ಅಖಿಲ ಭಾರತ ಬಿಲ್ಲವ ಮಹಾ ಮಂಡಲದ ಅಧ್ಯಕ್ಷೆರ್ ಸೂರ್ಯಕಾಂತ್ ಜೆ ಸುವರ್ಣ, ದೇವಾಡಿಗ ಮಹಾಮಂಡಲದ ಅಧ್ಯಕ್ಷೆರ್ ಧರ್ಮಪಾಲ್ ಯು ದೇವಾಡಿಗ,
ನಿವೃತ್ತ ಆರ್ ಬಿಐ ಅಧಿಕಾರಿ ಚಂದ್ರಕಾಂತ ಎಸ್ ಪುತ್ರನ್,
ಮುಂಬೈ ಬಿಲ್ಲವರ ಅಸೋಸಿಯೇಷನ್‌ದ ಗೌರವಾಧ್ಯಕ್ಷೆರ್
ಎಲ್ ವಿ ಅಮೀನ್,
ರವೀಂದ್ರನಾಥ್ ಎಲ್ ಕರ್ಕೇರ,ಉದ್ಯಮಿ
ಜಯ ಸಾಲ್ಯಾನ್, ಮೊಗವೀರ ವ್ಯವಸ್ಥಾಪಕ ಮಂಡಳಿ ಮುಂಬೈ ಅಜಿತ್ ಸುವರ್ಣ ಮೊಕುಲು ಮಾತ ಇತ್ತೆರ್.
ಆಡಳಿತ ಸಮಿತಿ ಅಧ್ಯಕ್ಷೆರ್ ವಾಮನ್ ಇಡ್ಯಾ, ಚಂದ್ರಶೇಖರ ಸಾಲ್ಯಾನ್ ಮೊಕುಲು ಮಾತ ಇತ್ತೆರ್.
ಬ್ರಹ್ಮಕಲಶೋತ್ಸವ ಉಪ ಸಮಿತಿದ ಸುನಿಲ್ ಆಳ್ವ, ವಿನಯಾನಂದ ಜೋಗಿ, ಜಗನ್ನಾಥ ಆರ್. ಕೋಟ್ಯಾನ್, ಅರವಿಂದ ಸಾಲ್ಯಾನ್, ಶೋಭೇಂದ್ರ ಸಸಿಹಿತ್ಲು, ವಿಕೆ ಯಾದವ್ ಎಸ್ ಆರ್ ಪ್ರದೀಪ್ ಮೊಕುಲು ಮಾತ ಇತ್ತೆರ್.
ಈ ಪೊರ್ತುಡು ಸಾಧಕೆರಾಯಿನ ಚಂದ್ರಶೇಖರ ಸಾಲ್ಯಾನ್, ಧರ್ಮಪಾಲ ದೇವಾಡಿಗ, ಎಲ್.ವಿ. ಅಮೀನ್ ಮೊಕ್ಲೆಗ್ ವಿಶೇಷ ಮಾನಾದಿಗೆ ನಡತ್ಂಡ್. ಅಂಚೆನೆ ಮಂಗಲ್ಪಾಡಿ
ಅಡ್ಕ ಶ್ರೀ ಭಗವತೀ ಕ್ಷೇತ್ರದ ಕೃಷ್ಣ ಕಾರ್ನವೆರ್ ಮೆರೆಗ್ ಗೌರವ ಮಲ್ತೆರ್.
ಗುಲಾಬಿ ನೀಲಯ ಕೋಟ್ಯಾನ್ ಮೆರೆಗ್ ಸನ್ಮಾನ ನಡತ್ಂಡ್. ಅಂಚೆನೆ ಸಂದೀಪ್ ಸಸಿಹಿತ್ಲು, ದಿನೇಶ್ ಶೆಟ್ಟಿಗಾರ್, ರಜತ್ ಸಸಿಹಿತ್ಲು, ಲ್ಯಾನ್ಸಿ ಡಿಸೋಜ, ಯೋಗೀಶ್ ರಾಮನಗರ ಅಂಚೆನೆ
ಸ್ವಚ್ಚತೆದ ಬೇಲೆ ಮಲ್ಪುನ
ಯಶೋಧ ಬಂಗೇರ, ಪುಷ್ಪಾ,ಸುಶೀಲ, ಜೋತಿ, ಜಯಾ ಚಂಪಾ ಮೊಕ್ಲೆಗ್ ಮಾನಾದಿಗೆ ನಡತ್ಂಡ್.
ಅಂಚೆನೆ ಮುಂಬೈಡ್ ನಿಧಿ ಸಂಗ್ರಹ ಮಲ್ದಿನಕ್ಲೆಗ್ ಮಾನಾದಿಗೆ ನಡತ್ಂಡ್. ಮುಂಬೈ ಸಮಿತಿದ ವಿಶ್ವನಾಥ್ ಪಟ್ಟಿ ಓದಿಯೆರ್.
ಪೂಜಾ ಸುನಿಲ್ ಕೂಟದಕುಲು ಪ್ರಾರ್ಥನೆ ಮಲ್ತೆರ್. ದೇವಸ್ಥಾನದ ಆಡಳಿತ ಮೊಕ್ತೇಸರೆರ್ ಚಂದ್ರಶೇಖರ ಬೆಳ್ಚಡ ಸ್ವಾಗತ ಮಲ್ತೆರ್. ನವೀನ್ ಎಡ್ಮೆಮಾರ್ ನಿರೂಪಣೆ ಮಲ್ತ್‌ದ್ ಸೊಲ್ಮೆ ಸಂದಾಯೆರ್.

ಬೊಳ್ಳಿ ಕಿರೀಟ ಮಾನಾದಿಗೆ

ಮುಂಬೈ ಸಮಿತಿದ ಅಧ್ಯಕ್ಷೆರ್ ವೇದಪ್ರಕಾಶ್ ಶ್ರೀಯಾನ್ ಬೊಕ್ಕ ಕವಿತಾ ದಂಪತಿಲು ಶ್ರೀ ಕ್ಷೇತ್ರದ ಅಭಿವೃದ್ಧಿಗಾದ್ ಕೊರ್ತಿನ ವಿಶೇಷ ಕೊಡುಗೆಗಾದ್ ಆಡಳಿತ “ಬೊಳ್ಳಿ ಕಿರೀಟ” ದೀದ್ ಸನ್ಮಾನ ಮಲ್ತೆರ್.