Mon. Nov 23rd, 2026

ಕುಡ್ಲದ ಸುದ್ದಿ | Mangalore News

ಮುಲ್ಕಿದ ಜಾಗತಿಕ ಬಂಟರ ಸಂಘದ ಒಕ್ಕೂಟದ ಜಾಗೆಡ್ ಡ್ ತೋನ್ಸೆ ಶಶಿರೇಖಾ ಆನಂದ ಶೆಟ್ಟಿ ಓಪನ್ ಏರ್ ಗಾರ್ಡನ್

ಕುಡ್ಲ: ಜಾಗತಿಕ ಬಂಟರ ಸಂಘಗಳ ಒಕ್ಕೂಟದ ಮಹತ್ವಕಾಂಕ್ಷಿ ಯೋಜನೆಯಾಯಿನ ಮುಲ್ಕಿ ರಾಷ್ಟ್ರೀಯ ಹೆದ್ದಾರಿ ಕೈತಲ್ ಇಪ್ಪುನ ಕನ್ಯಾನ ಸದಾಶಿವ ಶೆಟ್ಟಿ ಸಂಕೀರ್ಣಡ್ ಪೊಣ್ಣ ನಿಚ್ಚಯ, ಮದಿರೆಂಗಿ, ಮದಿಮೆ,ತೊಡಮನೆ, ಪುಟ್ಟುಪರ್ಬ ಬೊಕ್ಕ ಬೇತೆ ಸಾಂಸ್ಕೃತಿಕ ಕಾರ್ಯಕ್ರಮಲೆನ್ ನಡಪಾಯೆರೆ ಅನುಕೂಲ ಆಪಿನಂಚ ತೋನ್ಸೆ ಶಶಿರೇಖಾ ಆನಂದ ಶೆಟ್ಟಿ ಮೆರೆನ ಪುದರ್ ದ ಓಪನ್ ಏರ್ ಗಾರ್ಡನ್ ನಿರ್ಮಾಣ ಆವರೆ ಉಂಡು.

ಈ ಓಪನ್ ಏರ್ ಗಾರ್ಡನ್ ಸಂಪೂರ್ಣ ಪ್ರಾಯೋಜಕತೆನ್ ಒಕ್ಕೂಟದ ವಿಶೇಷ ಮಹಾ- ನಿರ್ದೇಶಕೆರಾಯಿಮ ಬೊಂಬೈದ ಆರ್ಗಾನಿಕ್ ಗ್ರೂಪ್ ಆಫ್ ಇಂಡಸ್ಟ್ರೀಸ್ ನೆತ್ತ ಸಿ. ಎಂ. ಡಿ. ತೋನ್ಸೆ ಆನಂದ್ ಎಂ. ಶೆಟ್ಟಿ ಬೊಕ್ಕ ಶಶಿರೇಖಾ ಆನಂದ ಎಂ.ಶೆಟ್ಟಿ
ಒಯಿಸೊಂದೆರ್.
ಈ ನಿಲೆಟ್ಟ್ ಜಾಗತಿಕ ಬಂಟರ ಸಂಘಗಳ ಒಕ್ಕೂಟದ ಪರವಾದ್ ಗುರ್ಕಾರ್ಲು ಅಯಿನ ಐಕಳ ಹರೀಶ್ ಶೆಟ್ಟಿ ವಿಶೇಷ ಮಹಾ ನಿರ್ದೇಶಕರಾಯಿನ ಪ್ರವೀಣ್ ಭೋಜ ಶೆಟ್ಟಿ ಬೊಕ್ಕ ಕೋಶಾಧಿಕಾರಿ ಉಳ್ತೂರು ಮೋಹನದಾಸ ಶೆಟ್ಟಿ ಒಟ್ಟಿಗೆ ಸೇರ್ದ್ ಗೌರವ ಪೂರ್ವಕವಾದ್ ಸೊಲ್ಮೆ ಸಂದಾಯ ಮಲ್ತೆರ್.

ಓಪನ್ ಏರ್ ಗಾರ್ಡನ್ ಯೋಜನೆದ ಪೂರ್ತಿ ಜವಾಬ್ದಾರಿನ್ ಬೊಕ್ಕ ಅವೆತ್ತ ಕೆಲಸ ಕಾರ್ಯಲೆನ್ ತನ್ನ ಯೋಚನೆದ ಪ್ರಕಾರದಂಚ ಮಲ್ತ್ ದ್ ಈ ವರ್ಷ 2024 ಡಿಸೆಂಬರ್ ಅಕೇರಿಡ್ ಒಕ್ಕೂಟಗ್ ಒಪ್ಪಿಸಾವೆ ಪಂದ್ ತೋನ್ಸೆ ಆನಂದ ಶೆಟ್ಟಿ ಪಂತೆರ್.

ಈ ಯೋಜನೆಗ್ ಸಹಕಾರ ಕೊರ್ನ ತೋನ್ಸೆ ಶಶಿರೇಖಾ ಆನಂದ ಎಂ. ಶೆಟ್ಟಿ ಮೇರೆಗ್ ಒಕ್ಕೂಟದ ಮಹಾದಾನಿ ಕನ್ಯಾನ ಸದಾಶಿವ ಶೆಟ್ಟಿ ಉಪಾಧ್ಯಕ್ಷೆರ್ ಕರ್ನಿರೆ ವಿಶ್ವನಾಥ ಶೆಟ್ಟಿ, ಗೌರವ ಪ್ರಧಾನ ಕಾರ್ಯದರ್ಶಿ, ಇಂದ್ರಾಳಿ ಜಯಕರ ಶೆಟ್ಟಿ, ಜೊತೆ -ಕಾರ್ಯದರ್ಶಿ ಚಂದ್ರಹಾಸ್ ಡಿ, ಶೆಟ್ಟಿ ರಂಗೋಲಿ ಬೊಕ್ಕ ಮಹಾ ನಿರ್ದೇಶಕೆರ್ ನಿರ್ದೇಶಕೆರ್, ಮಹಾ-ಪೋಷಕೆರ್, ಪೋಷಕೆರ್, ದಾನಿಲು, ಕಾರ್ಯಕಾರಿ ಸಮಿತಿ ಸದಸ್ಯೆರ್ ಸರ್ವ ಸದಸ್ಯೆರ್ ಸೊಲ್ಮೆ ಸಂದಾಯ ಮಲ್ತೆರ್.

ಕುಡ್ಲ ತುಳು ಭವನಡ್ ಇನಿ ಅಮೃತ ನುಡಿನಮನ: ಪಾಲ್ ಪಡೆಯೆರೆ ಉಲ್ಲೆರ್ ಮಾಜಿ ಸಿಎಂ ವೀರಪ್ಪ ಮೊಯ್ಲಿ

ಇಂಚಿಪಗ್ ದೇವೆರೆ ಪಾದೊ ಸೇರಿನ ಮಲ್ಲ ವಿದ್ವಾಂಸೆರ್, ಸಾಹಿತಿ, ಶಿಕ್ಷಕೆರ್ ಪ್ರೊ.ಅಮೃತ ಸೋಮೇಶ್ವರ ಅರೆಗ್ ನುಡಿ ನಮನ ಸಂದಾವುನ ಲೇಸ್ ಜ.13 ಸನಿವಾರ ಮದ್ಯಾಹ್ನ 3.00 ಗಂಟೆಗ್ ಉರ್ವಾಸ್ಟೋರ್ ದ ತುಳು ಭವನಡ್ ನಡಪೆರೆ ಉಂಡು.

ನುಡಿನಮನ ಕಾರ್ಯಕ್ರಮಡ್ ಸ್ಪೀಕರ್ ಯು.ಟಿ ಖಾದರ್, ಮಾಜಿ ಮುಖ್ಯಮಂತ್ರಿ ಎಂ.ವೀರಪ್ಪ ಮೊಯ್ಲಿ, ಸಂಸದೆರ್ ನಳಿನ್ ಕುಮಾರ್ ಕಟೀಲ್ , ಮೇಯರ್ ಸುಧೀರ್ ಶೆಟ್ಟಿ ಕಣ್ಣೂರು, ಶಾಸಕೆರಾಯಿನ ವೇದವ್ಯಾಸ ಕಾಮತ್, ವೈ.ಭರತ್ ಶೆಟ್ಟಿ, ಹರೀಶ್ ಕುಮಾರ್ , ಮಂಜುನಾಥ್ ಭಂಡಾರಿ, ಕುಡ್ಲ ವಿ.ವಿ.ಕುಲಪತಿ ಪ್ರೊ.ಜಯರಾಜ್ ಅಮೀನ್ ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ತುಳು ಪರಿಷತ್ ಪ್ರಕಟಣೆ ತೆರಿಪಾದ್ಂಡ್.

ತುಳುನಾಡ ಮಾಮಲ್ಲ ಸಾಹಿತಿ, ಯಕ್ಷಗಾನ ಪ್ರಸಂಗಕರ್ತೆರ್, ಜಾನಪದ ವಿದ್ವಾಂಸೆರ್ ಡಾ| ಅಮೃತ ಸೋಮೇಶ್ವರ ನನ ನೆಂಪು ಮಾತ್ರ

ತುಳುನಾಡ್ ದ ಪುಗರ್ತೆದ ಯಕ್ಷಗಾನ ಪ್ರಸಂಗಕರ್ತೆರ್, ಸಂಶೋಧಕೆರ್, ಅನುವಾದಕೆರ್, ವಿಮರ್ಶಕೆರ್, ಜಾನಪದ ತಜ್ಞೆರ್, ಕವಿ, ಕಥೆಗಾರೆರ್ ಅಮೃತ ಸೋಮೇಶ್ವರ (89) ಮೇರ್ ನನ ನಂಕ್ಕ್ ನೆಂಪು ಮಾತ್ರ. ಆರ್ ಶನಿಯಾರ ಅರೆನ ಇಲ್ಲಡ್ ದೇವೆರೆ ಪಾದೊ ಸೇರಿಯೆರ್.


ದಕ್ಷಿಣ ಕನ್ನಡ ಜಿಲ್ಲೆದ ಕೋಟೆಕಾರು ಕೈತಲ್ದ ಅಡ್ಯ ಪನ್ಪುನಲ್ಪ 1953 ಸೆಪ್ಟಂಬರ್ 27 ದಾನಿ ಅಮೃತ ಸೋಮೇಶ್ವರ ಪುಟ್ಟಿಯೆರ್. ಸುರುತ ಶಿಕ್ಷಣನ್ ಕೋಟೆಕಾರ್ ದ ಸ್ಟೆಲ್ಲಾ ಮೇರಿ ಕಾನ್ವೆಂಟ್‌ಡ್ ಮುಗಿಪಾದ್ ಬೊಕ್ಕ ಪ್ರೌಢ ಶಿಕ್ಷಣನ್ ಆನಂದಾಶ್ರಮಡ್ ಮಲ್ತ್ ದೆರ್. ಬೊಕ್ಕ ಕುಡ್ಲದ ಸೇಂಟ್ ಅಲೋಷಿಯಸ್ ಕಾಲೇಜ್ ಡ್ ಪದವಿ ಪಡೆದ್, ಮದ್ರಾಸ್ ವಿಶ್ವವಿದ್ಯಾಲಯಡ್ ಕಲಾ ವಿಭಾಗಡ್ ಪದವಿ ಪಡೆಯೆರ್. ತಾನ್ ಓದಿನ ಅಲೋಷಿಯಸ್ ಕಾಲೇಜ್ ಡೇ ಅಧ್ಯಾಪಕೆರಾದ್ ಬೇಲೆ ಸುರು ಮಲ್ತೆರ್. ಧಾರವಾಡದ ಕರ್ನಾಟಕ ವಿಶ್ವವಿದ್ಯಾನಿಲಯಡ್ ಎಂ.ಎ.ಪದವಿ ಪಡೆನ ಬೊಕ್ಕ ಪುತ್ತೂರುದ ಸೇಂಟ್ ಫಿಲೋಮಿನ ಕಾಲೇಜ್ ಡ್ ಉಪನ್ಯಾಸಕೆರಾದ್ ಬೊಕ್ಕ ಪುತ್ತೂರು ವಿವೇಕಾನಂದ ಕಾಲೇಜ್ ಡ್ ಕನ್ನಡ ವಿಭಾಗದ ಮುಖ್ಯಸ್ಥರಾದ್ ಸೇವೆ ಮಲ್ತ್ ದ್ 1993 ಟ್ಟ್ ನಿವೃತ್ತಿ ಪಡೆಯೊಂಡೆರ್.

ಕುಡ್ಲ ವಿಶ್ವವಿದ್ಯಾಲಯದ ಯಕ್ಷಗಾನ ಮಾಹಿತಿ ಕೇಂದ್ರದ ಸಂದರ್ಶಕ ಪ್ರಾಧ್ಯಾಪಕೆರಾದ್ ಕೆಲಕಾಲ ಕಾರ್ಯ ನಿರ್ವಹಿಸಾದಿತ್ತೆರ್.
ಯಕ್ಷಗಾನಡ್ ಪ್ರಸಂಗ ಕರ್ತೃಗ್ ಸ್ವಾತಂತ್ರ್ಯ ಇಪ್ಪುನು ಕಡಿಮೆನೆ. ಆಂಡಲ ಕಲೆತ ಮೂಲಕ ವೈಚಾರಿಕತೆನ್ಲ ಪ್ರತಿಪಾದಿಸಾದ್ ಯಕ್ಷಗಾನ ಪ್ರಸಂಗಲೆಗ್ ಪೊಸ ಹೊಸ ಆಯಾಮ ಕೊರಿಯೆರ್.

ಅಮರ ಶಿಲ್ಪಿ ವೀರ ಕಲ್ಕುಡ, ಘೋರ ಮಾರಕ, ಸಹಸ್ರ ಕವಚ ಮೋಕ್ಷ, ಕಾಯಕಲ್ಪ, ಅಮರ ವಾಹಿನಿ, ತ್ರಿಪುರ ಮಥನ, ಆದಿಕವಿ ವಾಲ್ಮೀಕಿ, ಚಾಲುಕ್ಯ ಚಕ್ರೇಶ್ವರ ಇಂಚ ಮುಪ್ಪೆರ್ದ್ ಎಚ್ಚ ಪ್ರಸಂಗ ಬರೆತೆರ್.

ಕನ್ನಡ ಸಂಘ, ಯಕ್ಷಗಾನ ಸಂಘ ಇಂಚಿನ ಕೂಟಲೆನ್ ಸುರು ಮಲ್ತ್ ತುಳು ಭಾಷೆದ ಬುಲೆಚ್ಚಿ ಲ್ ಗಾದ್ ಪುನೆದೆರ್ .

ಮೇರೆನ ಪೊಪ್ಪ ಮುಂಬೈಡ್ ಜರ್ಮನ್ ರಾಯಭಾರಿ ಕಚೇರಿದ ಒರಿ ಅಧಿಕಾರಿನ ಗಾಡಿದ ಡ್ರೈವರ್ ಆದಿತ್ತೆರ್. ಮೇರ್ ಶಾಲಾ ಶಿಕ್ಷಣ ಪಡೆದ್ ಇಜ್ಜಿಂಡಲ, ಕುತೂಹಲ ಬೊಕ್ಕ ಸ್ವಪ್ರಯತ್ನರ್ದ್ 12 ಭಾಷೆ ಕಲ್ತ್ ದ್ ಇತ್ತೆರ್. ಅಮೃತೆರ್ನ ಅಪ್ಪೆ ಗೃಹಿಣಿಯಾದಿತ್ತೆರ್, ಮಲೆಯಾಳ ಜನಪದ ಕಥನ ಕಾವ್ಯಲೆನ್ ಪನೊಂದಿತ್ತೆರ್.

ದೇವೆರೆ ಪಾದೋ ಸೇರಿನ ತುಳುನಾಡ್ ದ ಬೊಳ್ಳಿ ಪ್ರೊ. ಅಮೃತ ಸೋಮೇಶ್ವರ

ಕುಡ್ಲ: ತುಳುನಾಡ ಮಲ್ಲ ಬೊಳ್ಳಿ ಅಮೃತ್ ಸೋಮೇಶ್ವರ್ ಇನಿ ಕಾಂಡೆ ದೇವೆರೊ ಪಾದ ಸೇರಿಯೆರ್.

ತುಳುನಾಡ್ ದ ಒರಿ ಪುಗರ್ತೆದ ಸಾಹಿತಿ ಅತ್ತಂದೆ ಜಾನಪದ ವಿದ್ವಾಂಸೆರ್, ತುಳುಟು ತಂಬಿಲ ರಂಗೀತ ಪನ್ಪಿನ ಕವನ ಸಂಕಲನ ಸುಮಾರ್ ನಾಟಕೊಲು, ಅನುವಾದ ಗ್ರಂಥೊಲು, ಪಾಡ್ದನ ಸಂಗ್ರಹ, ತುಳು ಜಾನಪದ ಲೇಖನೊಲು, ಯಕ್ಷಗಾನ ಗ್ರಂಥೊಲೆನ್ ಬರೆತೆರ್.

ರಘುನಾಥ ಎಂ. ವರ್ಕಾಡಿ ಬರೆಯಿನ “ಸೂರ್ಯೆ ಚಂದ್ರೆ ಸಿರಿ” ತುಳು ಜನಪದ ಕಥೆತ್ತ ಬೂಕು ಬುಡುಗಡೆ

ಕುಡ್ಲ ಆಕೃತಿ ಆಶಯ ಪ್ರಕಾಶನ ಮೊಕ್ಲೆನ ಮುತಾಲಿಕೆಡ್ ರಘುನಾಥ ಎಂ. ವರ್ಕಾಡಿ ಬರೆಯಿನ “ಸೂರ್ಯೆ ಚಂದ್ರೆ ಸಿರಿ” ತುಳು ಜನಪದ ಕಥೆತ್ತ ಬೂಕು ಬುಡುಗಡೆ ಲೇಸ್ ಜ. 4 ಗುರುವಾರ ಕುಡ್ಲದ ಪತ್ರಿಕಾ ಭವನಡ್ ನಡತ್ಂಡ್.

ಶ್ರೀನಿವಾಸ ವಿಶ್ವವಿದ್ಯಾನಿಲಯ ಮುಕ್ಕದ ಪ್ರೊ.ಎಂ.ಎಸ್.ಕೋಟ್ಯಾನ್ ಅಧ್ಯಕ್ಷತೆಡ್ ಬಂಟ್ವಾಳದ ರಾಣಿ ಅಬ್ಬಕ್ಕ ತುಳು ಅಧ್ಯಯನ ಕೇಂದ್ರದ ಸ್ಥಾಪಕ ಅಧ್ಯಕ್ಷೆರ್ ಡಾ. ತುಕಾರಾಮ ಪೂಜಾರಿ ಕೃತಿ ಲೋಕಾರ್ಪಣೆ ಮಲ್ತೆರ್. ಅವೆರ್ದ್ ಬೊಕ್ಕ ಪಾತೆರಿನ ಆರ್, ಈ ಬೂಕುಡ್ ಸುಮಾರ್ 30 ದಾತ್ ತುಳು ಕಥೆಕ್ಕುಲು ಉಂಡು. ರಘುನಾಥ ಎಂ. ವರ್ಕಾಡಿ ಮೇರ್ ತುಳು ಬಾಸೆದ ಮಲ್ಲ ಅಭಿಮಾನಿ. ಮೆರೆನ ಕಥೆಕ್ಕುಲು ಜನಕ್ಲೆನ ಮನಸ್ಸ್‌ನ್ ಒಯ್ಪುಂಡು. ನನಾತ್ ತುಳು ಬೂಕುನ್ ಮೇರ್ ಬುಡುಗಡೆ ಮಲ್ಪುಲೆಕ್ಕ ಆವಡ್ ಪಂದ್ ಪಂಡೆರ್.

 

ಈ ಪೊರ್ತುಡು ನಮ್ಮ ಕುಡ್ಲ ಚಾನೆಲ್‌ದ ನಿರ್ದೇಶಕೆರ್ ಸುರೇಶ್ ಬಿ. ಕರ್ಕೇರ, ಪ್ರಗತಿಪರ ಕೃಷಿಕೆರ್ ಬೊಕ್ಕ ನಾರಾಯಣ ಗುರು ಯುವ ವೇದಿಕೆ ಕುಡ್ಲದ ಸಲಹಾ ನಿರ್ದೇಶಕೆರ್ ನೀಲಯಂ ಯಂ. ಅಗರಿ ಬೊಕ್ಕ ರಘುನಾಥ ಎಂ. ವರ್ಕಾಡಿ ಇತ್ತೆರ್.

 

ಮಂಗಳೂರು ಪ್ರೆಸ್ ಕ್ಲಬ್ ಸಮಾಚಾರ” ಇ ಪೇಪರ್ ಬುಡುಗಡೆ ಲೇಸ್

ಕುಡ್ಲ: ಕುಡ್ಲ ಪ್ರೆಸ್ ಕ್ಲಬ್‌ದ ಗೃಹ ಪತ್ರಿಕೆ “ಮಂಗಳೂರು ಪ್ರೆಸ್ ಕ್ಲಬ್ ಸಮಾಚಾರ” ಇ-ಪೇಪರ್ ಬುಡುಗಡೆ ಲೇಸ್ ಜನವರಿ 4 ಕ್ಕ್ ಕುಡ್ಲದ ಪತ್ರಿಕಾ ಭವನಡ್ ನಡತ್ಂಡ್.

ಶಾಸಕೆರ್ ಡಿ.ವೇದವ್ಯಾಸ ಕಾಮತ್ ಈ ಪತ್ರಿಕೆನ್ ಬುಡುಗಡೆ ಮಲ್ತೆರ್. ಅವೆರ್ದ್ ಬೊಕ್ಕ ಪಾತೆರಿನ ಆರ್, ಮಸ್ತ್ ವರ್ಷರ್ದ್ ಕುಡ್ಲ ಪ್ರೆಸ್ ಕ್ಲಬ್‌ರ್ದ್ ಪತ್ರಕರ್ತೆರ್ ಪೂರ ಸೇರ್ದ್ ಬೇತೆ ಬೇತೆ ಕಾರ್ಯಕ್ರಮದ ಮುಕೇನ ಸಾಧನೆ ಮಲ್ತಿನಕ್ಲೆನ್ ಗುರ್ತಿಸಾವೊಂದು ಬರೊಂದುಲ್ಲೆರ್. ಈ ಮಾತ ಕಾರ್ಯಕ್ರಮ ದಾಖಲೆ ಮಲ್ಪುನ ಅಗತ್ಯತೆ ಉಂಡು. ಉಂದು ಒಂಜಿ ಭಾರೀ ಎಡ್ಡೆ ಬೇಲೆ ಪಂದ್ ಪಂಡೆರ್.

ಮಾಜಿ ಎಂಎಲ್‌ಸಿ ಕ್ಯಾ.ಗಣೇಶ್ ಕಾರ್ಣಿಕ್ “ಮಂಗಳೂರು ಪ್ರೆಸ್ ಕ್ಲಬ್ ಸಮಾಚಾರ” ಪತ್ರಿಕೆಗ್ ಎಡ್ಡೆಪ್ಪುನು ಬಯಕ್ಯೆರ್.

ಈ ಪೊರ್ತುಡು ಕುಡ್ಲ ಪ್ರೆಸ್ ಕ್ಲಬ್‌ದ ಅಧ್ಯಕ್ಷೆರ್ ಪಿ.ಬಿ.ಹರೀಶ್ ರೈ, ವಾರ್ತಾ ಇಲಾಖೆದ ಹಿರಿಯ ಸಹಾಯಕ ನಿರ್ದೇಶಕೆರ್ ಖಾದರ್ ಶಾ, ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ಅಧ್ಯಕ್ಷೆರ್ ಶ್ರೀನಿವಾಸ ನಾಯಕ್ ಇಂದಾಜೆ, ಪತ್ರಿಕಾ ಭವನ ಟ್ರಸ್ಟ್ ಅಧ್ಯಕ್ಷೆರ್ ರಾಮಕೃಷ್ಣ ಆರ್ ಲೇಸ್‌ಡ್ ಪಾಲ್ ಪಡೆದ್ ಇತ್ತೆರ್.

ಸಸಿಹಿತ್ಲು ಭಾಸ್ಕರ ಸುವರ್ಣರೆಗ್ ವಿಶ್ವೇಶತೀರ್ಥ ಜೀವಮಾನ ಪ್ರಶಸ್ತಿ

ಕುಡ್ಲ : ಸಮಾಜಡ್ ಎಡ್ಡೆ ಬೇಲೆ ಮಲ್ತಿನ ಸಜ್ಜನ ಮಹೋದಯರೆನ್ ಗುರುತಿಸಾದ್ ಕಲ್ಕೂರ ಪ್ರತಿಷ್ಠಾನ ಪ್ರತಿವರ್ಷ ಕೊರ್ಪಿನ “ಪೇಜಾವರ ಶ್ರೀ ವಿಶ್ವೇಶತೀರ್ಥ ಜೀವಮಾನ ಪ್ರಶಸ್ತಿ”ನ್ ಬೊಂಬೈದ ಪುಗರ್ತೆದ ರಂಗನಟೆ, ಸಮಾಜ ಸೇವಕೆರ್ ಭಾಸ್ಕರ ಸುವರ್ಣ ಸಸಿಹಿತ್ಲು ಪಡೆಯೊಂದೆರ್.

ಕಲ್ಕೂರ ಪ್ರತಿಷ್ಠಾನ ಒಡಿಪುದ ಪೇಜಾವರ ಸ್ವಾಮಿಲೆನ ಕೈರ್ದ್ ಪ್ರಶಸ್ತಿನ್ ಪಡೆನ ಭಾಸ್ಕರ ಸುವರ್ಣ ಸಸಿಹಿತ್ಲು ಮೇರೆಗ್ ಶ್ರೀಕೃಷ್ಣ ಪರಮಾತ್ಮನ ಆಶೀರ್ವಾದದೊಟ್ಟಿಗೆ ಪ್ರಶಸ್ತಿನ್ ಹಸ್ತಾಂತರ ಮಲ್ತೆರ್.

ಮಸ್ತ್ ಸಂಘಟೆನೆದೊಟ್ಟುಗೆ ತನ್ನನ್ ತಾನ್ ತೊಡಗಿಸಿಸಾವೊಂದು ನಾಡು -ನುಡಿ ಸೇವೆಗೆ ತನ್ನನ್ ಅರ್ಪಣೆ ಮಲ್ತೊಂದು ಬತ್ತಿನಾರ್ ಭಾಸ್ಕರ್ ಸುವರ್ಣ.

ಈ ಪ್ರಶಸ್ತಿ ವಿತರಣೆದ ಪೊರ್ತುಡು ಚಾವಡಿಡ್ ಶ್ರೀ ಪೇಜಾವರ ವಿಶ್ವಪ್ರಸನ್ನ ತೀರ್ಥ ಸ್ವಾಮೀಜಿ, ಶಿರೂರು ಮಠದ ಸ್ವಾಮೀಜಿ, ಸಂಘಟಕೆರ್ ಡಾ. ಎಂ ಮೋಹನ‌ ಆಳ್ವ, ಶಾಸಕೆರ್ ವೇದವ್ಯಾಸ ಕಾಮತ್, ಕುಡ್ಲ ನಗರದ ಮೇಯರ್ ಸುಧೀರ್ ಶೆಟ್ಟಿ ಕಣ್ಣೂರು, ಕೇಂದ್ರ ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ ಪಡೆನ ಲಕ್ಮೀಶ ತೋಳ್ಪಾಡಿ,ಕಲ್ಕೂರ ಪ್ರತಿಷ್ಠಾನದ ಮುಖ್ಯಸ್ಥೆರ್ ಪ್ರದೀಪ ಕುಮಾರ್ ಕಲ್ಕೂರ ಇತ್ತೆರ್.

ಅಶಕ್ತರೆಗ್ ಎಂ.ಆರ್.ಜಿ. ಗ್ರೂಪ್ ರ್ದ್ 4 ಕೋಟಿ ರೂ. ನೆರವು : ಕೆ. ಪ್ರಕಾಶ್ ಶೆಟ್ಟಿ

ಕುಡ್ಲ: “ಎನ್ನ ಆದಾಯದ ಒಂಜಿ ಭಾಗನ್ ಸಮಾಜಗ್ ಮೀಸಲ್ ದೀದ್ ಅಶಕ್ತೆರ್ ಬೊಕ್ಕ ಆರ್ಥಿಕವಾದ್ ಕಷ್ಟ ಇಪ್ಪುನಕ್ಲೆಗ್ ಶಿಕ್ಷಣ, ಅರೋಗ್ಯ ಕೊರ್ಪಿನ ಉದ್ದೇಶಡ್ ಎಂ.ಆರ್.ಜಿ. ಗ್ರೂಪ್ ಮುಖೆನ ಪ್ರತಿವರ್ಷ ನೆರವು ಪಟ್ಟುನ ಕಾರ್ಯಕ್ರಮಗ್ ಚಾಲನೆ ಕೊರ್ತೆ ಉಲ್ಲ. ಸುರುಟ್ಟು 1 ಕೋಟಿ 25 ಲಕ್ಷ ರೂ. ನೆರವು ಕೊರ್ದು ಇತ್ತ. ಈ ಸರ್ತಿ 4 ಕೋಟಿ ರೂ. ನೆರವು ಕೊರಿಯೆರೆ ಎದುರು ಬೈದ. ಒಡಿಪು ಬೊಕ್ಕ ದಕ್ಷಿಣ ಕನ್ನಡ ಜಿಲ್ಲೆದ ಮಾತ ಸಂಘ ಸಂಸ್ಥೆಲೆಗ್ ನೆತ್ತ ಅರ್ಜಿ ನಮೂನೆನ್ ಕಡಪಾದ್ ಪ್ರತೀ ಭಾಗರ್ದ್ 25 ದಾತ್ ಅರ್ಜಿನ್ ಸ್ವೀಕಾರ ಮಲ್ತ್ ಅವೆನ್ ಪರಿಶೀಲಿಸಾದ್ 2000 ಅರ್ಜಿಡ್ 1800 ಅರ್ಜಿಲೆನ್ ಸ್ವೀಕಾರ ಮಲ್ತ್ ದ. ಸಮಾಜಡ್ ಬೇನೆ ಪಡೆನಕುಲು ಅಶಕ್ತೆರೆಗ್ ನೆರವು ಕೊರ್ಪಿನ ಉದ್ದೇಶರ್ದ್ ಈ ಕಾರ್ಯಕ್ರಮ ದೀಯೊಂದ ಪಂದ್ ಎಂ.ಆರ್.ಜಿ. ಗ್ರೂಪ್ ಚೇರ್ ಮೆನ್ ಕೆ. ಪ್ರಕಾಶ್ ಶೆಟ್ಟಿ ಪತ್ರಿಕಾಗೋಷ್ಠಿಡ್ ಮಾಹಿತಿ ಕೊರಿಯೆರ್.

“ಆಶಾ ಪ್ರಕಾಶ್ ಶೆಟ್ಟಿ ಸಹಾಯ ಹಸ್ತ ಯೋಜನೆದ ನೆರವು ಪ್ರದಾನ ಕಾರ್ಯಕ್ರಮ ಡಿಸೆಂಬರ್ 25 ಬಯ್ಯಗ್ 3 ಗಂಟೆಗ್ ಕುಡ್ಲದ ಗೋಲ್ಡ್ ಫಿಂಚ್ ಸಿಟಿಟ್ ನಡಪೆರೆ ಉಂಡು. ಕಾರ್ಯಕ್ರಮಡ್ ಚಲನಚಿತ್ರ ನಟೆ, ನಿರ್ದೇಶಕೆರ್ ರಮೇಶ್ ಅರವಿಂದ್, ಆಳ್ವಾಸ್ ಶಿಕ್ಷಣ ಪ್ರತಿಷ್ಠಾನದ ಗುರ್ಕಾರ್ಲು ಡಾ.ಎಂ.ಮೋಹನ್ ಆಳ್ವ, ಕಾಪು ಶಾಸಕೆರ್ ಗುರ್ಮೆ ಸುರೇಶ್ ಶೆಟ್ಟಿ, ಆಡಳಿತ ನಿರ್ದೇಶಕೆರ್ ಗೌರವ್ ಪಿ. ಶೆಟ್ಟಿ ಮಲ್ಲ ಬಿನ್ನೆರಾದ್ ಪಾಲ್ ಪಡೆಯೆರೆ ಉಲ್ಲೆರ್.

ನೆರವು ಪಟ್ಟುನ ಲೇಸ್ ಡ್ 25 ಕೌಂಟರ್ ಇಪ್ಪುಂಡು. ಅಲ್ಪ ಫಲಾನುಭವಿಲು ತಮ್ಮ ಪುದರ್ ಪಂದ್ ಬೊಕ್ಕ ವಿತರಣೆ ಮಲ್ತಿನ ಟೋಕನ್ ತೊಜಪಾದ್ ಚೆಕ್ ದೆತೊನೊಲಿ ಪಂದ್ ಪಂಡೆರ್.

ಮಾನವೀಯ ನೆರವು:

ಬೆಂಗ್ಲೂರುಡು ಕಂಬುಲ ತೂದು ಊರುಗ್ ಪಿರ ಬನ್ನಗ ಆಕ್ಸಿಡೆಂಡ್ ಆದ್ ತೀರ್ ಪೋಯಿನ ಕುಟುಂಬದಕ್ಲೆಗ್ ಬೊಕ್ಕ ಗಾಯ ಆಯಿನಕ್ಲೆಗ್ ಮಾನವೀಯ ನಿಲೆಟ್ಟ್ ನೆರವು ಕೊರೊಂದು ಉಲ್ಲ ಪಂದ್ ಆರ್ ಪಂಡೆರ್.

ಕಾಪು ಶಾಲೆಡ್ ಶಿಕ್ಷಕೆರ್ನ ನೇಮಕ:

ಸಮಾಜ ಸೇವಾ ರತ್ನ ದಿ. ಕಾಪು ಲೀಲಾಧರ ಶೆಟ್ರ್ ನಡಪಾವೊಂದು ಇತ್ತಿನ ಶಾಲೆಡ್ ಶಿಕ್ಷಕರ ಕೊರತೆ ಇಪ್ಪುನೆದಾತ್ರ ಶಿಕ್ಷಕೆರ್ನ ನೇಮಕ ಮಲ್ತ್ ಖರ್ಚಿನ್ ಆರೇ ತೂವೊಂದಿನ ನಿಲೆಟ್ಟ್ ನನ ದುಂಬಗ್ ಶಿಕ್ಷಕೆರೆಗ್ ಸಂಬಳದ ಸಮಸ್ಯೆ ಆವೆರೆ ಬಲ್ಲಿ ಪಂದ್ ಬೊಕ್ಕ ಜೋಕುಲು ವಿದ್ಯಾ ವಂಚಿತ ಆವೆರೆ ಬಲ್ಲಿ ಪಂದ್ ಎಂದು ಈ ನೆರವು ಕೊರೊಂದು ಉಲ್ಲ ಪಂದ್ ತೆರಿಪಾಯೆರ್.

ಡಿಜಿಟಲ್ ಗ್ಯಾಪ್ ನಿವಾರಣೆ:
ಬಂಟ್ವಾಳದ ಒಂಜಿ ಶಾಲೆಗ್ ಕಂಪ್ಯೂಟರ್ ಕೊರ್ಪುನ ಮುಖೆನ ಅಲ್ಪದ ಜೋಕ್ಲೆನ್ ಕಂಪ್ಯೂಟರ್ ಸಾಕ್ಷರೆರಾದ್ ಮಲ್ಪುನ ಪ್ರಯತ್ನ ಮಲ್ತೊಂದು ಉಲ್ಲ.

ಶೌಚಾಲಯ ನೆರವು:

ಕಾಪು ಕೈಪುಂಜಾಲ್ ಒಡಿಪು ಶ್ರೀ ಪೇಜಾವರ ಮಠದ ಶ್ರೀ ವಿಶ್ವ ಪ್ರಸನ್ನ ತೀರ್ಥ ಸ್ವಾಮೀಜಿ ಗುರ್ಕಾರ್ಲು ಆದ್ ಇಪ್ಪುನ ವಿದ್ಯಾ ಸಾಗರ ಎಜ್ಯುಕೇಶನ್ ಟ್ರಸ್ಟ್ ಶಾಲೆಡ್ ಶೌಚಾಲಯ ನಿರ್ಮಾಣ.

ಕ್ರೀಡಾ ಪ್ರೋತ್ಸಾಹ:
ಅಂತಾರಾಷ್ಟ್ರೀಯ ಮಟ್ಟಡ್ ದೇಶನ್ ಪ್ರತಿನಿಧಿಸಾಯಿನ ನಮ್ಮ ಜಿಲ್ಲೆದ ಕ್ರೀಡಾಳು ಆಯುಷ್ ಶೆಟ್ಟಿ ಅಮೆರಿಕಾಡ್ ನಡತ್ತಿನ ವಿಶ್ವ ಜ್ಯೂನಿಯರ್ ಚಾಂಪಿಯನ್ ಶಿಪ್ ಡ್ ಕಂಚ್ ದ ಪದಕ ಪಡೆಯೊಂದೆರ್. ವಿಶ್ವ ಚಾಂಪಿಯನ್ ಶಿಪ್ ಡ್ ಭಾರತದ ಪತ್ತನೇ ಶಟ್ಲರ್ ಬೊಕ್ಕ ವಿಶ್ವ ಚಾಂಪಿಯನ್ ಶಿಪ್ ಡ್ ಪದಕ ಪಡೆನ ಕರ್ನಾಟಕ ಸುರುತ ಶಟ್ಲರ್ ಅರ್ಜುನ್ ಶೆಟ್ಟಿ. ಅರೆಗ್ ನೆರವು ಕೊರೊಂದುಲ್ಲ

ಶೈಕ್ಷಣಿಕ ಸಾಧಕೆರೆಗ್ ವಿದ್ಯಾರ್ಥಿ ವೇತನ:

ಪಿ.ಯು.ಸಿ.ಡ್ 600/600 ಅಂಕ ದೆತ್ತೊನ್ನ ಅನನ್ಯ ಬೊಕ್ಕ ಎಸ್.ಎಸ್.ಎಲ್.ಸಿ.ಡ್ 625/625 ಅಂಕ ಪಡೆನ ವೀಕ್ಷಿತಾ ಮೊಕ್ಲೆಗ್ ಶೈಕ್ಷಣಿಕ ಸಾಧನೆಗಾದ್ ವಿದ್ಯಾರ್ಥಿ ವೇತನ ಕೊರೊಂದುಲ್ಲ.

ಪುರುಷೋತ್ತಮ ಭಂಡಾರಿ ಲೇಸ್ ದ ಸುದಾರಿಕೆ ಮಲ್ತೆರ್.

ಡಿ.22-30: ಉರ್ವ ಶ್ರೀ ರಾಮ ಭಜನಾ ಮಂದಿರಡ್ ಏಕಾಹ ಭಜನೋಚ್ಚಯ

ಶ್ರೀ ರಾಮ ಭಜನಾ ಮಂದಿರ ಶ್ರೀ ಕೊರಗಜ್ಜ ಕ್ಷೇತ್ರ ಉರ್ವ ಬೋಳೂರು ಮೂಲು ಡಿ.22 ರ್ದ್ 30 ಮುಟ್ಟ 27ನೇ ವಾರ್ಷಿಕ ಏಕಾಹ ಭಜನೋಚ್ಚಯ ಉರ್ವ ಶ್ರೀ ರಾಮ‌ ಮಂದಿರಡ್ ನಡಪೆರೆ ಉಂಡು.

ಅಂಚನೆ ನಗರ ಭಜನೆ, ನೃತ್ಯ ಬಲಿ ಸೇವೆ, ಪಲ್ಲಕ್ಕಿ ಉತ್ಸವ, ತುಳಸಿ ಅರ್ಚನೆ, ಯಕ್ಷಗಾನ ಬಯಲಾಟ ನಡಪೆರೆ ಉಂಡು.

ಬೇತೆ ಬೇತೆ ಭಜನಾ ತಂಡೊಲು ಪಾಲ್ ಪಡೆದ್ ಈ ಭಜನೋಚ್ಚಯಡ್ ಪಾಲ್ ಪಡೆಯೆರೆ ಉಲ್ಲೆರ್.

ಮಾತ ಭಕ್ತಾದಿಲು ಎಚ್ಚಿನ ಸಂಖ್ಯೆಡ್ ಪಾಲ್ ಪಡೆದ್, ತನು, ಮನ, ಧನದೊಟ್ಟಿಗೆ ಸಹಕಾರ ಮಲ್ತ್, ಶ್ರೀ ಹರಿನಾಮ ಸಂಕೀರ್ಣಡ್ ಪಾಲ್ ಪಡೆದ್, ಶ್ರೀ ರಾಮ ದೇವೆರ್ನ ಪ್ರಸಾದನ್ ಸ್ವೀಕಾರ ಮಲ್ಪೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.

ಒಡಿಪು: ಪುತ್ತಿಗೆ ಪರ್ಯಾಯಗ್ ಧಾನ್ಯ ಮುರ್ತ

ಒಡಿಪುದ ಅಷ್ಟಮಠಟ್ ಒಂಜಿ ಆಯಿನ ಪುತ್ತಿಗೆ ಮಠದ ಶ್ರೀಸುಗುಣೇಂದ್ರತೀರ್ಥ ಶ್ರೀಪಾದೆರ್ ಶ್ರೀಕೃಷ್ಣ ಪೂಜೆದ ದ್ವೈವಾರ್ಷಿಕ ಪರ್ಯಾಯ ನಿಲೆಟ್ಟ್ ನಾಲನೇ ಸರ್ತಿ ಜ.18 2024 ತಾನಿ ಸರ್ವಜ್ಞ ಪೀಠಡ್ ಪರ್ಯಾಯ ಪೂರ್ವಭಾವಿ ನಾಲನೇ ಬೊಕ್ಕ ಲಾಸ್ಟ್ ದ ಧಾನ್ಯ ಮೂರ್ತ ಬುಧವಾರ ನಡತ್ಂಡ್.

ಧಾನ್ಯ ಮೂರ್ತ ಅಂಗವಾದ್ ಪುತ್ತಿಗೆ ಮಠದ ವಿಠಲ ದೇವೆರೆಗ್ ಮಹಾಪೂಜೆ ಸಲ್ಲಿಸಾದ್ ದೇವತಾ ಪ್ರಾರ್ಥನೆ ಮಲ್ತೆರ್. ಬೊಕ್ಕ ಮೆರವಣಿಗೆದ ಮುಖೇನ ಚಂದ್ರೇಶ್ವರ, ಅನಂತೇಶ್ವರ, ಶ್ರೀಕೃಷ್ಣ ಮುಖ್ಯಪ್ರಾಣ, ಗರುಡ, ಮಧ್ವ, ಸರ್ವಜ್ಞ ಸಿಂಹಾಸನ, ಭೋಜನ ಶಾಲೆ ಪ್ರಾಣ ದೇವರು, ಸುಬ್ರಹ್ಮಣ್ಯ ಗುಡಿ, ನವಗ್ರಹ ಗುಡಿ, ವೃಂದಾವನ, ಗೋ ಶಾಲೆಗೆ ಪೋದು ಪ್ರಾರ್ಥನೆ ಮಲ್ತೆರ್.

ಭುವನಾಭಿರಾಮ ಉಡುಪ, ಹರಿಕೃಷ್ಣ ಪುನರೂರು, ಜಯಕರ ಶೆಟ್ಟಿ, ರಂಜನ್ ಕಲ್ಕೂರ, ಬಿ. ಗೋಪಾಲಾಚಾರ್ಯ, ಮುರಳೀಧರ ಆಚಾರ್ಯ, ಪ್ರಸನ್ನ ಆಚಾರ್ಯ, ಮಂಜುನಾಥ ಉಪಾಧ್ಯ, ನಾಗೇಶ್ ಹೆಗ್ಡೆ, ವಿ.ಜಿ.ಶೆಟ್ಟಿ, ಕೆ.ಉದಯ ಕುಮಾರ್ ಶೆಟ್ಟಿ, ಅಶೋಕ್ ಕುಮಾರ್ ಕೊಡವೂರು, ದಿನೇಶ್ ಪುತ್ರನ್, ಸುಬ್ರಹ್ಮಣ್ಯ ಉಪಾಧ್ಯ, ರಾಘವೇಂದ್ರ ಭಟ್, ಮಧ್ವರಮಣ ಆಚಾರ್, ರಾಘವೇಂದ್ರ ತಂತ್ರಿ, ಶ್ರೀಧರ‌ ಉಪಾಧ್ಯ, ವಿದ್ವಾನ್ ಹೆರ್ಗ ಹರಿಪ್ರಸಾದ್ ಈ ಪೊರ್ತುಡು ಇತ್ತೆರ್.

ಧಾನ್ಯ ಮೂರ್ತದ ಧಾರ್ಮಿಕ ವಿಧಿ ವಿಧಾನ ರಾಘವೇಂದ್ರ ಕೊಡಂಚ ನೇತೃತ್ವಡ್ ನಡತ್ಂಡ್.

ಈ ಸಂದರ್ಭ ಮಧ್ವ ಸರೋವರದ ಕೈತಲ್ ನಿರ್ಮಾಣ ಮಲ್ತಿನ ರಥಕ್ಕ್ ಶಿಖರನ್ ದೀಯೆರ್.

You Missed