Mon. Nov 23rd, 2026

ಕುಡ್ಲದ ಸುದ್ದಿ | Mangalore News

ಬಪ್ಪನಾಡು ದೇವಸ್ಥಾನೊಗು ಭಕ್ತೆರೆರ್ದ್ ಪುದೆ ಕಾಣಿಕೆ ಸಮರ್ಪಣೆ

ಮೂಲ್ಕಿ ಒರ್ಂಬ ಮಾಗಣೆದ ಶ್ರೀ ಕ್ಷೇತ್ರ ದುರ್ಗಾಪರಮೇಶ್ವರಿ ದೇವಸ್ಥಾನದ ವರ್ಷಾವಧಿ ಜಾತ್ರೆದ ನಿಲೆಟ್ಟ್ ಸುಕ್ರಾರ ಬಯ್ಯಗ್ ಸಾರ್ವಜನಿಕೆರ್ ಪುದೆ ಕಾಣಿಕೆನ್ ಮಾಮಲ್ಲ ಮೆರವಣಿಗೆಡ್ ಕನತ್ ದ್ ಸಮರ್ಪಣೆ ಮಲ್ತೆರ್.

ಮೂಲ್ಕಿ ಟೂರಿಸ್ಟ್ ಕಾರ್ ಚಾಲಕ-ಮಾಲೀಕ ಸಂಘ, ಮೂಲ್ಕಿ ಹಿಂದೂ ಯುವ ಸೇನೆ ಘಟಕ ಬೊಕ್ಕ ಮಹಿಳಾ ಮಂಡಳಿ, ಮೂಲ್ಕಿ ಆಟೋರಿಕ್ಷಾ ಚಾಲಕ-ಮಾಲಕ ಸಂಘ ಅಂಚನೆ ಒರ್ಂಬ ಮಾಗಣೆದ ಭಕ್ತೆರೆನ ಮುತಾಲಿಕೆಡ್ ನಡತಿನ 3 ನೇ ವರ್ಷದ ಪುದೆಕಾಣಿಕೆ ಮೆರವಣಿಗೆರ್ದ್ ದುಂಬು ಮೂಲ್ಕಿ ಶಾರದಾ ಮಂಟಪ ಕೈತಲ್ ಬಪ್ಪನಾಡ್ ಕ್ಷೇತ್ರದ ಅರ್ಚಕೆರ್ ನರಸಿಂಹ ಭಟ್ ಪ್ರಾರ್ಥನೆ ಮಲ್ತೆರ್. ಕ್ಷೇತ್ರದ ಅನುವಂಶಿಕ ಬೊಕ್ಕ ಆಡಳಿತ ಮೊಕ್ತೇಸರೆರ್ ಎನ್.ಎಸ್.ಮನೋಹರ ಶೆಟ್ಟಿ, ಧರ್ಮದರ್ಶಿ ಡಾ. ಹರಿಕೃಷ್ಣ ಪುನರೂರು ಪುದೆಕಾಣಿಕೆದ ಮೆರವಣಿಗೆಗ್ ಚಾಲನೆ ಕೊರಿಯೆರ್.

ಗೋಪಾಲಕೃಷ್ಣ ಭಟ್ ಬಪ್ಪನಾಡು, ಅವಿಭಜಿತ ದಕ್ಷಿಣ ಕನ್ನಡ ಬೊಕ್ಕ ಒಡಿಪು ಜಿಲ್ಲೆದ ವಿಶ್ವಕರ್ಮ ಒಕ್ಕೂಟದ ಅಧ್ಯಕ್ಷೆರ್ ಮಧು ಆಚಾರ್ಯ, ಮೂಲ್ಕಿ ಬಿಲ್ಲವ ಸಂಘದ ಅಧ್ಯಕ್ಷೆರ್ ಪ್ರಕಾಶ್ ಸುವರ್ಣ, ಉದ್ಯಮಿ ಚೇತನ್ ಶೆಟ್ಟಿ ಕೊಲ್ನಾಡು, ಸುಜಿತ್ ಸಾಲ್ಯಾನ್, ಲಿಂಗಪ್ಪ ಶೆಟ್ಟಿ, ನಾಗೇಶ್ ಬಪ್ಪನಾಡು, ಚಂದ್ರಶೇಖರ ಸುವರ್ಣ, ಲತಾ ಶೇಖರ್, ಭಾನುಮತಿ ಶೆಟ್ಟಿ, ಶೇಖರ್ ಸಾಲ್ಯಾನ್ ಕೊಲ್ನಾಡು, ಶೀನ ಪೂಜಾರಿ ಪಡುಬಿದ್ರೆ, ರಾಧಿಕಾ ಯಾದವ ಕೋಟ್ಯಾನ್, ದಯಾವತಿ ಅಂಚನ್, ಹರ್ಷರಾಜ ಶೆಟ್ಟಿ, ಸುಭಾಷ್ ಶೆಟ್ಟಿ, ಸತೀಶ್ ಅಂಚನ್, ಪ್ರಶಾಂತ್ ಕಾಂಚನ್, ರಂಗನಾಥ ಶೆಟ್ಟಿ, ಅಶೀಕ್ ಕುಮಾರ್ ಶೆಟ್ಟಿ, ಕಿಶೋರ್ ಶೆಟ್ಟಿ ಬಪ್ಪನಾಡು, ದೇವಣ್ಣ ನಾಯಕ್, ಚಂದ್ರಶೇಖರ್, ಉದಯ ಕುಮಾರ್ ಶೆಟ್ಟಿ ಅದಿಧನ್, ಡಾ. ಹರಿಶ್ಚಂದ್ರ ಪಿ. ಸಾಲ್ಯಾನ್, ಶಿವರಾಮ ಅಮೀನ್, ರಂಗ ಕೋಟ್ಯಾನ್, ರಮೇಶ್ ಅಮೀನ್ ಕೊಕ್ಕರಕಲ್, ದಿನೇಶ್ ಹೆಗ್ಡೆ ಮಾನಂಪಾಡಿ, ಸಾಧು ಅಂಚನ್ ಮಟ್ಟು, ಮೂಲ್ಕಿ ಹಿಂದೂ ಯುವ ಸೇನೆ ಅಧ್ಯಕ್ಷೆರ್ ದಿನೇಶ್ ಕೊಲ್ನಾಡ್, ರಿಕ್ಷಾ ಚಾಲಕೆರ್ ಮಾಲಕೆರ್ನ ಸಂಘದ ಅಧ್ಯಕ್ಷೆರ್ ದೇವರಾಜ್ ಕೊಲಕಾಡಿ, ಅಶ್ವತ್ಥ ಕೊಲಕಾಡಿ ಈ ಪೊರ್ತುಡು ಇತ್ತೆರ್.

ಅವೆದ್ ಬೊಕ್ಕ ಮೆರವಣಿಗೆದ ಮುಕೇನ ದೇವಸ್ಥಾನಗ್ ಪುದೆಕಾಣಿಕೆ ಸಮರ್ಪಣೆ ಮಲ್ತೆರ್.

ದ.ಕ. ಲೋಕಸಭಾ ಚುನಾವಣೆ: ಮುಲ್ಕಿ- ಬೆದ್ರ ವಿಧಾನಸಭಾ ಕ್ಷೇತ್ರದ ವೀಕ್ಷಕೆರಾದ್ ಎಚ್. ವಸಂತ ಬರ್ನಾಡ್ ನೇಮಕ

ಮುಲ್ಕಿ: ಕರ್ನಾಟಕ ಪ್ರದೇಶ ಕಾಂಗ್ರೆಸ್ ಸಮಿತಿದ ಸದಸ್ಯೆರಾಯಿನ ಎಚ್ ವಸಂತ ಬರ್ನಾಡ್ ಮೆರೆನ್ 2024 ತ್ತ ಲೋಕಸಭಾ ಚುನಾವಣೆಗ್ ಪೂರಕವಾದ್ ಬೆದ್ರ ಕ್ಷೇತ್ರದ ಕಾಂಗ್ರೆಸ್ ಚುನಾವಣಾ ಉಸ್ತುವಾರಿಯಾದ್ ನೇಮಕ ಮಲ್ತ್‌ದ್ ದಕ್ಷಿಣ ಕನ್ನಡ ಜಿಲ್ಲಾ ಕಾಂಗ್ರೆಸ್ ಸಮಿತಿದ ಅಧ್ಯಕ್ಷೆರ್ ಹರೀಶ್ ಕುಮಾರ್ ಮೇರ್ ಆದೇಶ ಪಾಡ್ದೆರ್.

ಮೇರ್ ಕರಿನ ವಿಧಾನಸಭಾ ವೋಟುಡು ಕಾಂಗ್ರೆಸ್ ಪಕ್ಷದ ಅಭ್ಯರ್ಥಿ ಮಿಥುನ್ ರೈ ಮೆರೆನ ಚುನಾವಣಾ ಏಜೆಂಟ್ ಆದ್ ಕರ್ತವ್ಯ ಮಲ್ತೊಂದಿತ್ತೆರ್.

ಕುಡ್ಲ: ಮೀನ್ ಪತ್ತರೆ ಪೋದು ನೀರ್‌ಪಾಲ್ ಆಯಿನ ಆಣ್

ಕುಡ್ಲ: ಮೀನ್ ಪತ್ತರೆ ಪೋಯಿನ ಆಣ್ ಗಾಳಿದ ಬಿರ್ಸ್‌ಗ್ ಕಡಲ್ ಪಾಲ್ ಆಯಿನ ಘಟನೆ ಪೇಂಟೆದ ತೋಟ ಬೆಂಗ್ರೆ ಕೈತಲ್ ನಡತ್ಂಡ್.

ಮಿಥುನ ಪನ್ಪಿನರೆನ ಮಗೆ ಪ್ರಜೀತ್ ಎಂ. ತಿಂಗಳಾಯ ತೀರ್ ಪೋಯಿನ ಆಣ್ ಪಂದ್ ಗುರ್ತಿಸಾದೆರ್. ಇಲ್ಲಡ್ ಮಸ್ತ್ ಬಡತನ್ ಅಂಚನೆ ತನ್ನ ವಿದ್ಯಾಭ್ಯಾಸದ ವ್ಯವಸ್ಥೆಗ್ ತನ್ನ ಅಮ್ಮೆರೆನ ಒಟ್ಟಿಗೆ ಕೋಡೆ ಬಯ್ಯ 5.30 ಗಂಟೆಗ್ ಬೆಂಗ್ರೆ ಕಡಲ್‌ಡ್ ಮೀನುಗಾರಿಕೆಗ್ ಪಂದ್ ಪೋಯಿನ ಪೊರ್ತುಡು ಗಾಳಿದ ಬಿರ್ಸ್‌ಗ್ ತಿಕ್ಕೊಂದು ನೀರ್‌ಪಾಲ್ ಆತೆರ್. ಬಯ್ಯ 6.50 ಗ್ ಪುನ ಸಿರೆತ್ತ ಬಿರ್ಸ್‌ಗ್ ಮಿತ್ತ್ ಮಿತ್ತ್ ಬತ್ತ್‌ದಿತ್ತ್‌ದ್ ಕೈತಲ್‌ದಕುಲ್ ಮಿತ್ತ್ ದೆರ್ತ್‌ದ್ ಆಂಬುಲೆನ್ಸ್ ಮುಕೇನ ಆಸ್ಪತ್ರೆಗ್ ಕೊನತೆರ್.

ಕುಡ್ಲ: ಮತದಾರೆರ್‍ನ ಜಾಗೃತಿ ಅಭಿಯಾನಗ್ ಚಾಲನೆ

ಕುಡ್ಲ: ಜಿಲ್ಲಾಡಳಿತ, ಜಿಲ್ಲಾ ಪಂಚಾಯತ್, ಕುಡ್ಲ ಮಹಾನಗರ ಪಾಲಿಕೆ ಅಂಚನೆ ವಿಶ್ವವಿದ್ಯಾನಿಲಯ ಕಾಲೇಜ್‌ದ ಸಂಯುಕ್ತಾಶ್ರಯಡ್ ಪೇಂಟೆದ ವಿಶ್ವವಿದ್ಯಾನಿಲಯ ಕಾಲೇಜ್ ಜಾಗೆದ ರವೀಂದ್ರ ಕಲಾಭವನಡ್ ಸ್ವೀಪ್ ಸಮಿತಿರ್ದ್ ಅಟ್ಟನೆ ಮಲ್ತಿನ ಮತದಾನ ಜಾಗೃತಿ ಅಭಿಯಾನನ್ ಜಿಲ್ಲಾ ಚುನಾವಣಾಧಿಕಾರಿಲು ಆಯಿನ ಜಿಲ್ಲಾಧಿಕಾರಿ ಮುಲ್ಲೈ ಮುಗಿಲನ್ ಎಂ.ಪಿ ಉದಿಪನ ಮಲ್ತೆರ್.

ಈ ಪೊರ್ತುಡು ಜಿಲ್ಲಾ ಪಂಚಾಯತ್ ಮುಖ್ಯ ಕಾರ್ಯನಿರ್ವಾಣಾಧಿಕಾರಿ ಡಾ. ಆನಂದ್ ಕೆ., ಕುಡ್ಲ ಮಹಾನಗರ ಪಾಲಿಕೆ ಆಯುಕ್ತೆರ್ ಆನಂದ್ ಸಿ.ಎಲ್., ಕಾಲೇಜು ಪ್ರಾಂಶುಪಾಲೆರ್ ಆಯಿನ ಅನುಸೂಯ ರೈ, ಜಿಲ್ಲೆದ ಚುನಾವಣಾ ಐಕಾನ್ ಕಲಾವಿದೆರ್ ಅರವಿಂದ್ ಬೋಳಾರ್ ಅಂಚನೆ ಮಸ್ತ್ ಬಿನ್ನೆರ್ ಇತ್ತೆರ್.

ಈ ಪೊರ್ತುಡು ಪುಗರ್ತೆದ ವ್ಯಂಗ್ಯಚಿತ್ರಗಾರೆರ್ ಜಾನ್ ಚಂದ್ರನ್ ಮೇರ್ ಮತದಾರೆರೆಡ ಜಾಗೃತಿ ಮೂಡಿಸಾಯರೆ ರಚನೆ ಮಲ್ತಿನ ವ್ಯಂಗ್ಯಚಿತ್ರ ಪ್ರದರ್ಶನನ್ ಜಿಲ್ಲಾಧಿಕಾರಿ ಉದಿಪನ ಮಲ್ತೆರ್.

ಪೆರ್ಣಂಕಿಲ ದೇವಸ್ಥಾನದ ಬ್ರಹ್ಮಕಲಶೋತ್ಸವದ ಧಾರ್ಮಿಕ ಸಭೆ ಪರಿಶುದ್ಧ ಇಪ್ಪುನಲ್ಪ ಭಗವಂತನ ಸಾನಿಧ್ಯ ಇಪ್ಪುಂಡು: ಶ್ರೀ ವಿಶ್ವಪ್ರಸನ್ನತೀರ್ಥ ಶ್ರೀಪಾದೆರ್

ಒಡಿಪು: ಪಿರವುದ ಕಾಲಡ್ ಋಷಿ ಮುನಿಕುಲು ಪರಿಶುದ್ಧಿಗ್ ಮಸ್ತ್ ಮಹತ್ವ ಕೊರ್ಪುನ ಉದ್ದೇಶಡ್ ಕಾಡ್ , ಗುಹೆ, ಪರ್ವತಗ್ ಪೋದು ತಪ್ಪಸ್ಸ್ ಮಲ್ತೊಂದಿತ್ತೆರ್. ದೇವಸ್ಥಾನದ ಪಾವಿತ್ರ್ಯತೆಗ್ ದೇವಸ್ಥಾನದ ಉಲಯಿ ಬೊಕ್ಕ ಪಿದಯಿ ಸ್ವಚ್ಛತೆನ್ ಕಾಪುನವು ಮುಖ್ಯ. ಬ್ರಹ್ಮಕಲಶೋತ್ಸವದ ಪೊರ್ತುಡು ನಡಪರೆ ಇತ್ತಿನ ಮಾತ ಧಾರ್ಮಿಕ ಪ್ರಕ್ರಿಯೆಲು ಪರಿಶುದ್ಧಿ ಬೊಕ್ಕ ಸ್ವಚ್ಛತೆರ್ದ್ ನಡತ್ಂಡ ಅಲ್ಪ ದೇವೆರೆನ ಸಾನಿಧ್ಯ ಇಪ್ಪುಂಡು ಪಂದ್ ಶ್ರೀ ಪೇಜಾವರ ಮಠಾಧೀಶೆರ್ ಆಯಿನ ಶ್ರೀ ವಿಶ್ವಪ್ರಸನ್ನತೀರ್ಥ ಶ್ರೀಪಾದೆರ್ ಪಂಡೆರ್.

ಪೆರ್ಣಂಕಿಲ ಶ್ರೀ ಮಹಾಲಿಂಗೇಶ್ವರ ಶ್ರೀ ಮಹಾಗಣಪತಿ ದೇವಸ್ಥಾನಡ್ ಬ್ರಹ್ಮಕಲಶೋತ್ಸವದ ಅಂಗವಾದ್ ನಡತಿನ ಧಾರ್ಮಿಕ ಸಭೆಟ್ಟ್ ಶ್ರೀಪಾದೆರ್ ಆಶೀರ್ವಚನ ಕೊರಿಯೆರ್.

ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರ್ ವಿ| ಹರಿದಾಸ ಭಟ್ ಅಧ್ಯಕ್ಷತೆ ವಹಿಸೊಂದು ಇತ್ತೆರ್. ವಿ| ಪಂಜ ಭಾಸ್ಕರ ಭಟ್ ಧಾರ್ಮಿಕ ಉಪನ್ಯಾಸ ಕೊರಿಯೆರ್. ಪೇಜಾವರ ಮಠದ ದಿವಾನ ಎಂ. ರಘುರಾಮ ಆಚಾರ್ಯ, ಕಾರ್ಯನಿರ್ವಹಣಾಧಿಕಾರಿ ಸುಬ್ರಹ್ಮಣ್ಯ ಭಟ್, ಜೀರ್ಣೋದ್ಧಾರ ಸಮಿತಿ ಪ್ರಧಾನ ಕಾರ್ಯದರ್ಶಿ ಶ್ರೀಶ ನಾಯಕ್, ಮಾರ್ಗದರ್ಶಕೆರ್ ಆಯಿನ ವಿ| ಮಧುಸೂದನ ತಂತ್ರಿ, ಸುಬ್ರಹ್ಮಣ್ಯ ಅವಧಾನಿ, ಸಮಿತಿ ಸಂಘಟನೆದ ಕಾರ್ಯದರ್ಶಿ ಸದಾನಂದ ಪ್ರಭು ಈ ಪೊರ್ತುಡು ಪಾಲ್ ಪಡೆದ್ ಇತ್ತೆರ್.

ಉಪಾಧ್ಯಕ್ಷೆರ್ ಶ್ರೀಕಾಂತ್ ನಾಯಕ್ ಅಲೆವೂರು ಬತ್ತಿನ ಬಿನ್ನೆರೆನ್ ಎದ್ಕೊನಿಯೆರ್. ಕಾರ್ಯದರ್ಶಿ ಉಮೇಶ್ ನಾಯಕ್ ಲೇಸ್ ಸುದಾರಿಕೆ ಮಲ್ತ್‌ದ್ ಸೊಲ್ಮೆ ಸಂದೈತ ಮಲ್ತೆರ್.

ದ.ಕ., ಒಡಿಪು ಮಾರ್ಗಡ್ 2 ವರ್ಷಡ್ ಆಕ್ಸಿಡೆಂಟ್ ಡ್ 1,113 ಜನ ಖಲಾಸ್!

ಕುಡ್ಲ: ಒಡಿಪು ಬೊಕ್ಕ ದಕ್ಷಿಣ ಕನ್ನಡ ಜಿಲ್ಲೆಡ್ ಕರಿನ ವರ್ಷಡ್ ಮಾರ್ಗ ಅಪಘಾತಡ್ ಜೂವ ಕಳೆಯೊನಿನ ಸಂಖ್ಯೆ ಸಾರ ಕಡತ್ಂಡ್.

ಒಡಿಪು ಜಿಲ್ಲೆಡ್ ಕರಿನ ರಡ್ಡ್ ವರ್ಷಡ್ 498 ಜನ ತೀರ್ ಪೋತೆರ್. ಕುಡ್ಲ ಪೊಲೀಸ್ ಕಮಿಷನರೆಟ್ ವ್ಯಾಪ್ತಿ ಸೇರ್ದ್ ದ.ಕ. ಜಿಲ್ಲೆಡ್ 615 ಜನ ತೀರ್ ಪೋತೆರ್. ಈ ರಡ್ಡ್ ವರ್ಷಡ್ ರಡ್ಡ್ ಜಿಲ್ಲೆಡ್ ಅಪಘಾತಗ್ ತೀರ್ ಪೋಯಿನಕ್ಲೆನ ಒಟ್ಟು ಸಂಖ್ಯೆ 1,113. ಉಂದುವೇ ಪೊರ್ತುಡು ಒಡಿಪು ಜಿಲ್ಲೆಡ್ 2,922 ಜನ ಅಂಚನೆ ದ.ಕ.ಜಿಲ್ಲೆಡ್ 2,716 ಜನಕ್ಲೆಗ್ ಪೆಟ್ಟಾತ್ಂಡ್.

ಮಾ.26, 27: ಕಾಪುದ ಮೂಜಿ ಮಾರಿಗುಡಿಟ್ಟ್ ಸುಗ್ಗಿದ ಮಾರಿ ಪೂಜೆ

ಕಾಪು: ಕಾಪು ಶ್ರೀ ಹಳೇ ಮಾರಿಗುಡಿ ದೇವಸ್ಥಾನ, ಶ್ರೀ ಹೊಸ ಮಾರಿಗುಡಿ ದೇವಸ್ಥಾನ ಬೊಕ್ಕ ಶ್ರೀ ಮೂರನೇ ಮಾರಿಗುಡಿ ದೇವಸ್ಥಾನಡ್ ಒಂಜೇ ಪೊರ್ತುಡು ನಡಪುನ ಕಾಲಾವಧಿ ಸುಗ್ಗಿ ಮಾರಿಪೂಜೆ ಮಾ.26 ಬೊಕ್ಕ 27 ಕ್ಕ್ ನಡಪರೆ ಉಂಡು.

ಸುಗ್ಗಿ ಮಾರಿಪೂಜೆಗ್ ಒಡಿಪು ಮಾತ್ರ ಅತ್ತಂದೆ ದಕ್ಷಿಣ ಕನ್ನಡ, ಉತ್ತರ ಕನ್ನಡ, ಚಿಕ್ಕಮಗಳೂರು, ಶಿವಮೊಗ್ಗ, ಕಾಸರಗೋಡು, ಬೆಂಗ್ಲೂರ್, ಬೊಂಬಾಯಿ ಅಂಚನೆ ದೇಶ-ವಿದೇಶಲೆರ್ದ್ ಲಕ್ಷಾಂತರ ಭಕ್ತೆರ್ ಬತ್ತ್‌ದ್ ದೇವಿನ ದರ್ಶನ ಪಡೆದ್ ಪರಕೆ, ಸೇವೆಲೆನ್ ಸಂದಾಯರೆ ಉಲ್ಲೆರ್.

ಮಾ.26 ಕ್ಕ್ ರಾತ್ರೆ ಹಳೇ ಮಾರಿಗುಡಿಕ್ಕ್ ವೆಂಕಟರಮಣ ದೇವಸ್ಥಾನರ್ದ್ ಅಂಚನೆ ಪೊಸ ಮಾರಿಗುಡಿ ಬೊಕ್ಕ ಮೂಜನೇ ಮಾರಿಗುಡಿಕ್ಕ್ ಶ್ರೀ ಲಕ್ಷ್ಮೀಜನಾರ್ದನ ದೇವಸ್ಥಾನರ್ದ್ ಮಾರಿಯಮ್ಮ ದೇವಿನ ಬಿಂಬ ಬೊಕ್ಕ ಬಂಗಾರ್‌ನ್ ಮೆರವಣಿಗೆಡ್ ಕನತ್ತ್‌ದ್ ಗದ್ದುಗೆ ಏರ್ದ್ ಮಾರಿಪೂಜೆಗ್ ಚಾಲನೆ ಕೊರಿಯರೆ ಉಲ್ಲೆರ್.

ಮಾ.27 ಕ್ಕ್ ಬಯ್ಯಗ್ ದರ್ಶನ ಸೇವೆರ್ದ್ ಬೊಕ್ಕ ದೇವಿನ ಬಿಂಬ ವಿಸರ್ಜಿಸರೆ ಉಲ್ಲೆರ್ ಪಂದ್ ಶ್ರೀ ಹಳೇ ಮಾರಿಗುಡಿತ್ತ ಆಡಳಿತ ಮೊಕ್ತೇಸರ ಪ್ರಸಾದ್ ಜಿ.ಶೆಣೈ, ಹೊಸ ಮಾರಿಗುಡಿ ದೇವಸ್ಥಾನದ ಆಡಳಿತಾಧಿಕಾರಿ ಪ್ರಶಾಂತ್ ಕುಮಾರ್ ಶೆಟ್ಟಿ ಬೊಕ್ಕ ಕಾರ್ಯ ನಿರ್ವಹಣಾಧಿಕಾರಿ ರವಿಕಿರಣ್ ಕೆ. ಅಂಚನೆ ಮೂಜನೇ ಮಾರಿಗುಡಿತ್ತ ಕಾರ್ಯನಿರ್ವಹಣಾದಿಕಾರಿ ಅರುಣ್ ಕುಮಾರ್ ಬಿ.ಕೆ ಪ್ರಕಟನೆಡ್ ತೆರಿಪಾದೆರ್.

ಕುಡ್ಲ, ಮುಲ್ಕಿ, ಸುರತ್ಕಲ್‌ಡ್ ಪುಲ್ಯ ಕಾಂಡೆ ಸುರೂತ್ತ ಬರ್ಸ

ಕುಡ್ಲ: ದೊಂಬುಗ್ ಬೆಗರೊಂದು ಇತ್ತಿನ ತುಳುನಾಡ್‌ದ ಜನಕ್ಲೆಗ್ ಸುಕ್ರಾರ ಬರ್ಸ ಬೈದ್ ಒಂತೆ ತಂಪಾದ್ ಇಪ್ಪುಲೆಕ್ಕ ಆತ್ಂಡ್.

ಹವಾಮಾನ ಇಲಾಖೆದ ಮುನ್ಸೂಚನೆದೆಲಕನೆ ದಕ್ಷಿಣ ಕನ್ನಡ, ಒಡಿಪು ಸೇರ್ದ್ ತುಳುನಾಡ್ ಅಂಚನೆ ದಕ್ಷಿಣ ಒಳನಾಡ್‌ದ ಕೆಲ ಕಡೆಟ್ಟ್ ಬರ್ಸ ಬೈದ್ಂಡ್. ಪುಲ್ಯ ಕಾಂಡೆ ಕುಡ್ಲ, ಮುಲ್ಕಿ, ಸುರತ್ಕಲ್ ಇಂಚ ಕೆಲವು ಕಡೆಟ್ಟ್ ಬರ್ಸ ಬೈದ್ಂಡ್. ಸುಮಾರ್ 10 ತೆರ್ದ್ ಎಚ್ಚದ ಜಿಲ್ಲೆಲೆಡ್ ಮೂಜಿ ದಿನ ಬರ್ಸ ಬರ್ಪುಂಡು ಪಂದ್ ಹವಾಮಾನ ಇಲಾಖೆ ಮುನ್ಸೂಚನೆ ಕೊರ್ದಿತ್ತೆರ್.

ಕೊಲ್ಲೂರು ದೇವಲ್ಯಗ್ ಶಿವಮೊಗ್ಗ ಲೋಕಸಭಾ ಕ್ಷೇತ್ರದ ಕಾಂಗ್ರೆಸ್ ಅಭ್ಯರ್ಥಿ ಗೀತಾ ಶಿವರಾಜ್ ಕುಮಾರ್ ಭೇಟಿ

ಒಡಿಪು: ಕೊಲ್ಲೂರು ಮೂಕಾಂಬಿಕಾ ದೇವಲ್ಯಗ್ ಶಿವಮೊಗ್ಗ ಲೋಕಸಭಾ ಕ್ಷೇತ್ರದ ಕಾಂಗ್ರೆಸ್ ಅಭ್ಯರ್ಥಿ ಗೀತಾ ಶಿವರಾಜ್ ಕುಮಾರ್ ಬೊಕ್ಕ ಪಿಚ್ಚರ್ ಆಕ್ಟರ್ ಶಿವರಾಜ್ ಕುಮಾರ್ ಭೇಟಿ ಕೊರಿಯೆರ್.

ದೇವಲ್ಯಡ್ ವಿಶೇಷ ಪೂಜೆ ಸಂದಾಯಿನ ಗೀತಾ ಶಿವರಾಜ್ ಕುಮಾರ್, ಶಿವಮೊಗ್ಗ ಲೋಕಸಭಾ ಕ್ಷೇತ್ರ ವ್ಯಾಪ್ತಿದ ಬೈಂದೂರ್‌ಡ್ ಚುನಾವಣಾ ಪ್ರಚಾರ ಮಲ್ತೆರ್.

ಸಚಿವೆರ್ ಮಧು ಬಂಗಾರಪ್ಪ, ಮಾಜಿ ಶಾಸಕೆರ್ ಗೋಪಾಲ ಪೂಜಾರಿ, ಬಿ.ಎಂ ಸುಕುಮಾರ ಶೆಟ್ಟಿ ಈ ಪೊರ್ತುಡು ಇತ್ತೆರ್. ಉಂದುವೇ ಪೊರ್ತುಡು ದೇವಲ್ಯದ ವತಿರ್ದ್ ನಟೆ ಶಿವರಾಜ್ ಕುಮಾರ್ ರೆಗ್ ವಿಶೇಷ ಗೌರವ ಸಂದಾಯೆರ್.

ಕುಡ್ಲ: 3 ಲಕ್ಷ ಬಿಲೆತ್ತ1.65 ಕೆಜಿ ಡ್ರಗ್ ವಶಕ್ಕ್

ಕುಡ್ಲ: ಲೋಕಸಭಾ ಚುನಾವಣೆದ ನೀತಿ ಸಂಹಿತೆ ಜಾರಿಯಾಯಿನ ದಿನರ್ದ್ ಮಾರ್ಚ್ 20 ಮುಟ್ಟ 12,300 ರೂಪಾಯಿ ಬಿಲೆತ್ತ 21.34 ಲೀಟರ್ ಗಂಗಸರ ಜಪ್ತಿ ಮಲ್ತ್‌ದೆರ್. 3,13,500ರೂಪಾಯಿ ಬಿಲೆತ್ತ 1.65 ಕೆಜಿ ಡ್ರಗ್ಸ್‌ನ್ ವಶಕ್ಕ್ ದೆತೊಂದೆರ್ ಪಂದ್ ಜಿಲ್ಲಾಧಿಕಾರಿಲೆನ ಕಚೇರಿ ತೆರಿಪಾದೆರ್.

2024 ಲೋಕಸಭಾ ಚುನಾವಣೆಗ್ ಸಂಬಂಧಿಸಾದ್ ಚುನಾವಣಾ ಅಕ್ರಮನ್ ತಡೆಯೊನರೆ ಜಿಲ್ಲೆಡ್ ಒಟ್ಟು 8 ಕರ್ಚಿ ವೆಚ್ಚದ ಪರೀವೀಕ್ಷಕೆರೆನ್, 72 ಪ್ಲೈಯಿಂಗ್ ಸ್ಟ್ಯಾಡ್ (ಎಫ್.ಎಸ್.ಟಿ), 69 ಎಸ್.ಎಸ್.ಟಿ ಕೂಟಲು ಬೊಕ್ಕ 8 ಅಬಕಾರಿ ತಂಡಲೆನ್ ಜಿಲ್ಲೆಡ್ ನಿಯೋಜನೆ ಮಲ್ತ್‌ದೆರ್.

You Missed