ಕುಡ್ಲದ ಸುದ್ದಿ | Mangalore News

ಕುಡೊರ ಕೈಲ್ ಪಾಡ್ಂಡ್ ಕಡ್ತಿನ ಬಾರೆ

ಕಿನ್ನಿಗೋಳಿ ಕೈತಲ್ದ ದಾಮಸ್ ಕಟ್ಟೆ ಕೋಲ್ಬೆಟ್ಟು ಮುಲ್ಪದ ಧೃತಿ ನಿಲಯದ ಪವಿತ್ರ ಮೇರೆನ ಇಲ್ಲಡ್ ಒರ ಕೈಲ್ ಪಾಡಿನ ಬಾರೆನ್ ಕಡ್ತ್ ದ್ ಒಂಜಿ ತಿಂಗೊಲು ಆಯಿಬೊಕ್ಕ ಮುದೆಲ್ ಡ್ ಕುಡ ಕೈಲ್ ಪಾಡ್ದ್ಂಡ್.

ಕುಡ್ಲ: ಫೆ.2-4 ಮುಟ್ಟ ಕುಡುಂಬೂರು ನಡುಗಿರಿ ಜಾರಂದಾಯ, ಪರಿವಾರ ದೈವಲೆನ ವರ್ಷಾವಧಿ ನೇಮೋಚ್ಚಯ

ಕುಡ್ಲ: ಪೇಂಟೆದ ಬೈಕಂಪಾಡಿ ಕೈಗಾರಿಕಾ ವಲಯಡ್ ಇಪ್ಪುನ ಕುಡುಂಬೂರು ನಡುಗಿರಿ ಗ್ರಾಮದೈವ ಜಾರಂದಾಯ ಅಂಚನೆ ಸಪರಿವಾರ ದೈವಲೆನ ವರ್ಷಾವಧಿ ನೇಮೋಚ್ಚಯ ಫೆ.2-4 ಮುಟ್ಟ ನಡಪರೆ ಉಂಡು.

ಫೆ.2 ಕ್ಕ್ ಕಾಂಡೆ 8 ಗಂಟೆರ್ದ್ ಅನ್ನಪೂರ್ಣೇಶ್ವರಿ ಅಮ್ಮ ಮೆರೆನ ವಿಶೇಷ ಪೂಜೆ, ಹೊಳ್ಳರ ಚಾವಡಿಡ್ ಜಾರಂದಾಯ ಸಪರಿವಾರ ದೈವಲೆಡ ಪ್ರಾರ್ಥನೆ ಅಂಚನೆ ನಾಗದೇವೆರೆಗ್ ತಂಬಿಲ ಸೇವೆ ನಡಪರೆ ಉಂಡು. ಬಯ್ಯ 4 ಗಂಟೆಗ್ ದೈವಸ್ಥಾನಗ್ ಬಂಗಾರ್-ಬೊಲ್ಲಿದ ರೂಪಡ್ ಬತ್ತಿನ ಪರಕೆ ಅಂಚನೆ ಪುದೆಕಾಣಿಕೆ ಕುಡುಂಬೂರು ಕಲ್ಲುರ್ಟಿ ದೈವಸ್ಥಾನರ್ದ್ ಕುಡುಂಬೂರು ನಡುಗಿರಿ ದೈವಸ್ಥಾನಗ್ ಮೆರವಣಿಗೆ ನಡಪರೆ ಉಂಡು. ಬಯ್ಯ 5 ಗಂಟೆಗ್ ದೈವದ ಭಂಡಾರ ಏರ್ದ್ ರಾತ್ರೆ 8 ಗಂಟೆಗ್ ಮೈಸಂದಾಯ ದೈವದ ನೇಮೋಚ್ಚಯ, ರಾತ್ರೆ 9.30 ಗಂಟೆಗ್ ಕಾಂತೇರಿ ಜುಮಾದಿ, ಸರಳ ಜುಮಾದಿ ಬಂಟ ದೈವದ ನೇಮೋಚ್ಚಯ ನಡಪರೆ ಉಂಡು.

ಫೆ.3 ಕ್ಕ್ ಮಧ್ಯಾಹ್ನ12 ಗಂಟೆಗ್ ಅನ್ನಪೂರ್ಣೇಶ್ವರಿ ಅಮ್ಮನ ವಿಶೇಷ ಅಲಂಕಾರ ಪೂಜೆ, ಮಧ್ಯಾಹ್ನ 12.30-3 ಮುಟ್ಟ ಸಾರ್ವಜನಿಕ ಮಹಾ ಅನ್ನಸಂತರ್ಪಣೆ ನಡಪರೆ ಉಂಡು. ಬಯ್ಯ 7 ಗಂಟೆಗ್ ಧಾರ್ಮಿಕ ಸಭಾ ಕಾರ್ಯಕ್ರಮಡ್ ಗುರುಪುರ ವಜ್ರದೇಹಿ ಮಠತ್ತ ಶ್ರೀ ರಾಜಶೇಖರಾನಂದ ಸ್ವಾಮೀಜಿ ಮೇರೆರ್ದ್ ಆಶೀರ್ವಚನ, ವಿದ್ವಾನ್ ಪಂಜ ಭಾಸ್ಕರ್ ಭಟ್ ಮೆರೆರ್ದ್ ಧಾರ್ಮಿಕ ಉಪನ್ಯಾಸ ನಡಪರೆ ಉಂಡು. ಸೋಮಯಾಜಿ ಎಸ್ಟೇಟ್ಸ್ ಮಾಲಕೆರ್ ರಘುನಾಥ್ ಸೋಮಯಾಜಿ ಸಭಾಧ್ಯಕ್ಷೆರಾದ್ ಪಾಲ್ ಪಡೆಯರೆ ಉಲ್ಲೆರ್. ಈ ಪೊರ್ತುಡು ಕೈಗಾರಿಕಾ ಬೊಕ್ಕ ವಾಣಿಜ್ಯ ಇಲಾಖೆದ ಜಂಟಿ ನಿರ್ದೇಶಕೆರ್ ಗೋಕುಲ್ ದಾಸ್ ನಾಯಕ್ ಮೆರೆನ್ ಮಾನಾದಿಗೆ ಮಲ್ಪರೆ ಉಂಡು. ರಾತ್ರೆ 9 ಗಂಟೆಗ್ ಜಾರಂದಾಯ ಬಂಟ ದೈವದ ನೇಮೋಚ್ಚಯ ನಡಪರೆ ಉಂಡು.

ಫೆ.4 ಕ್ಕ್ ರಾತ್ರೆ 7 ಕ್ಕ್ ಪಿಲಿಚಂಡಿ ದೈವದ ಎಣ್ಣೆಬೂಲ್ಯ ಕೊರ್ದು, ರಾತ್ರೆ 10 ಗಂಟೆಗ್ ಪಿಲಿಚಂಡಿ ದೈವದ ನೇಮೋಚ್ಚಯ ನಡಪರೆ ಉಂಡು ಪಂದ್ ದೈವಸ್ಥಾನದ ಆಡಳಿತ ಮಂಡಳಿದಕುಲು ಪ್ರಕಟಣೆಡ್ ತೆರಿಪಾದೆರ್.

ಫೆ.3 : ಐಕಳಬಾವ ಕಂಬಳೋಚ್ಚಯ ಡಾ| ಎಂ.ಎನ್. ರಾಜೇಂದ್ರ ಕುಮಾರ್ ಮೆರೆಗ್ “ಕರಾವಳಿ ರತ್ನ ಪ್ರಶಸ್ತಿ”

ಕುಡ್ಲ: ಐಕಳಬಾವ ಕಾಂತಾ ಬಾರೆ-ಬೂದಾಬಾರೆ ಜೋಡುಕರೆ ಕಂಬಳೋಚ್ಚಯ ಫೆ. 3ಕ್ಕ್ ನಡಪರೆ ಉಂಡು. 400 ವರ್ಷ ಪರಪೋಕು ಇಪ್ಪುನ ಐಕಳ ಕಂಬಳನ್ ಜಾನಪದ ಕ್ರೀಡಾಮೇಳದೊಟ್ಟಿಗೆ “ಐಕಳೋಚ್ಚಯ” ರೀತಿಡ್ ಆಯೋಜನೆ ಮಲ್ತ್‌ದೆರ್. ಈ ಪೊರ್ತುಡು ದಕ್ಷಿಣ ಕನ್ನಡ ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್ ಅಂಚನೆ ಕರ್ನಾಟಕ ರಾಜ್ಯ ಸಹಕಾರ ಮಾರಾಟ ಮಹಾಮಂಡಳದ ಅಧ್ಯಕ್ಷೆರ್ ಡಾ| ಎಂ.ಎನ್. ರಾಜೇಂದ್ರ ಕುಮಾರ್ ಮೆರೆಗ್ “ಕರಾವಳಿ ರತ್ನ” ಪ್ರಶಸ್ತಿ ಕೊರಿಯರೆ ಉಂಡು ಪಂದ್ ಕಂಬಳೋಚ್ಚಯ ಸಮಿತಿದ ಅಧ್ಯಕ್ಷೆರ್ ಐಕಳಬಾವ ದೇವಿಪ್ರಸಾದ್ ಶೆಟ್ಟಿ ಬೆಳಪು ತೆರಿಪಾದೆರ್.

30 ವರ್ಷರ್ದ್ ಎಸ್‌ಸಿಡಿಸಿಸಿ ಬ್ಯಾಂಕ್ ಅಧ್ಯಕ್ಷೆರ್ ಆದಿಪ್ಪುನ ಡಾ| ರಾಜೇಂದ್ರ ಕುಮಾರ್ ಸಹಕಾರಿ ಬ್ಯಾಂಕಿಂಗ್ ಕ್ಷೇತ್ರಡ್ ಬದಲಾವಣೆ ಕನತೆರ್. ಅಂಚಾದ್ ಅರೆನ ನಾಯಕತ್ವಡ್ ಎಸ್‌ಸಿಡಿಸಿಸಿ ಬ್ಯಾಂಕ್ ಇನಿ ಜನಸ್ನೇಹಿ ಬ್ಯಾಂಕ್ ಆದ್ ಪುಗರ್ತೆ ಪಡೆತ್ಂಡ್. ಸರಿಯಾಯಿನ ಗಾಡಿಡ್ ಮೊಬೈಲ್ ಬ್ಯಾಂಕ್ ಸೇವೆನ್ ರಾಜ್ಯದ ಸಹಕಾರಿ ರಂಗಡ್ ಸುರುತ್ತ ಸರ್ತಿ ಪರಿಚಯ ಮಲ್ತ್ ಕೊರ್ತಿನಾರ್. ಕಂಬುಲನ್ ಮಲ್ತ್ ಇಷ್ಟ ಪಡೆಯುನ ರಾಜೇಂದ್ರ ಕುಮಾರ್ ಕಂಬುಲಗ್‌ಲ ಉಂದೆತ್ತ ಕ್ರೀಡೆದ ಪ್ರೋತ್ಸಾಹಕೆರ್‌ಗ್‌ಲ ಮಾರ್ಗದರ್ಶಕೆರ್ ಆತೆರ್ ಪಂದ್ ದೇವಿಪ್ರಸಾದ್ ತೆರಿಪಾಯೆರ್.