ಕಾಸ್ರೋಡ್ ಸುದ್ದಿ | Kasargod News

ಬಂಟವಾಳದ ಅಜ್ಜಿಬೆಟ್ಟು ಕಾಪುಡು ತೋಜಿದ್ ಬತ್ತ್ಂಡ್ ಒಂಜಿಸಾರತ್ತ ನಾಲ್ನೂತ್ತ ಪದಿನೆಡ್ಮ ವರ್ಷ ಪಿರಾಕ್‌ದ ಶಿವಲಿಂಗ

ಬಂಟವಾಳ: ಅಜಿಲ ಅರಸೆರ್ನ ಸೀಮೆದ ಏಳ್ ಮಾಗಣೆಗ್ ಸಂಬಂಧಪಟ್ಟಿನ ಈಸ್ವರ ದೇವೆರ್ನ ೪ ಕ್ಷೇತ್ರೊಲೆನ ಪೈಕಿಡ್ ಒಂಜಾಯಿನ ಮಹತೋಭಾರ ಶ್ರೀ ಉಮಾಮಹೇಶ್ವರ ದೇವೆರ್‍ನ ಶಿವಲಿಂಗ ವಾಮದಪದವುದ ಅಜ್ಜಿಬೆಟ್ಟು ಗ್ರಾಮದ ಕಾಡ್‌ದ ನಡುಟ್ಟು ಉಪ್ಪುನ ಕಾಪು ಪನ್ಪಿನ ಜಾಗೆಡ್ ತೋಜಿದ್ ಬೈದ್ಂಡ್.

ಈ ಶಿವಲಿಂಗ ೧೪೧೮ ವರ್ಷ ಪಿರಾಕ್‌ದವು. ಈ ಶಿವಲಿಂಗೊಗುಲ ಅಜ್ಜಿಬೆಟ್ಟು ಶ್ರೀ ದುರ್ಗಾಪರಮೇಶ್ವರಿ ದೇವಲ್ಯೊಗುಲ ಸಂಬಂಧ ಉಂಡು ಪಂದ್ ತೆರಿದ್‌ಬೈದ್ಂಡ್. ರಾಜವಂಶ್ಥೆರರ್ನ ಕಾಲೊಡು ಕಲ್ಲ್ ಪಾದೆದ ನಡುಟ್ಟಿತ್ತಿನ ಜಾಗೆಡ್ ದೇವಲ್ಯ ನಿರ್ಮಾಣ ಮಲ್ತ್ ದ್ ೭೪೪ ವರ್ಷ ಮುಟ್ಟ ಬಾರಿ ಗರ್ದ್‌ಡೆ ಪೂಜೆ, ಉಚ್ಚಯ ನಡತ್‌ದಿತ್ತ್ಂಡ್. ಆಂಡ ೫೭೮ ವರ್ಷೊರ್ದು ಇಂಚೊಗು ಮುಟ್ಟಲ ಗಾಳಿ ಬರ್ಸದ ಪೆಟ್ಟ್‌ಗ್ ಅನ್ಯಧರ್ಮೀಯೆರ್‍ನ ದಾಳಿರ್ದಾತ್ರ ಈ ದೇವಲ್ಯ ಸಂಪೂರ್ಣ ನಾಶ ಆದಿತ್ತ್ಂಡ್.
ಅಜ್ಜಿಬೆಟ್ಟು, ಚೆನ್ನೈತೋಡಿ, ಪಿಲಿಮೊಗರು,ಕೊಡಂಬೆಟ್ಟು, ಮೂಡುಪಡುಕೋಡಿ, ಇರ್ವತ್ತೂರು, ಪಿಲಾತಬೆಟ್ಟು ಗ್ರಾಮದ ಭಕ್ತೆರೆನ ಆರಾಧನಾ ಕ್ಷೇತ್ರವಾದುಂಡು.ಒಂಜಿ ಕಾಲೊಡು ವೈಭವೊಡು ಮೆರೆಯಿನ ಈ ಕ್ಷೇತ್ರ ನಾಶ ಆದಿತ್ತಿನೆರ್ದಾವರ ದೇವೆರ್‍ನ ಕೋಪದ ಕಾರಣೊಡು ಊರುದಕ್ಲೆಗ್ ಹುಷಾರ್‌ದಾಂತೆ ಪೋಪಿನಿ, ಬೇಗ ತೀರ್‌ಪೋಪಿನಿ, ಮನಸ್‌ಗ್ ನೆಮ್ಮದಿ ದಾಂತೆ ಪೋಪಿನಿ ಇಂಚಿನ ಮಾತಾ ಸಮಸ್ಯೆಲೆನ ಒಟ್ಟುಗೆ ಪ್ರಕೃತಿ ವಿಕೋಪ ಇಂಚಿನ ಮಾತ ಮಲ್ಲ ಮಲ್ಲ ಸಮಸ್ಯೆಲು ತೋಜಿದ್ ಬರೊಂದಿತ್ತ್ಂಡ್. ಈ ವಿಚಾರೊಡು ಅಷ್ಟಮಂಗಲ ಪ್ರಸ್ನೆ ದೀನಗ, ಭಕ್ತೆರ್ ಮಾತೆರ್‍ಲ ಒಂಜೇ ಮನಸ್‌ಡ್ ದೇವಲ್ಯ ಜೀರ್ಣೋದ್ಧಾರ ಮಲ್ತ್ಂಡ ಮಾತೆರೆಗ್ಲ ಎಡ್ಡೆ ಆಪುಂಡು ಪಂದ್ ತೆರಿದ್ ಬೈದ್ಂಡ್. ಅಂಚೆನೆ ವಾ ರೀತಿ ದೇವಲ್ಯ ನಿರ್ಮಾಣ ಆವೊಡು, ಪರಿವಾರ ದೇವೆರ್ ಏರ್ ಉಂದೆತ್ತ ವಿಚಾರಲ ಅಷ್ಟಮಂಗಲ ಪ್ರಸ್ನೆಡ್ ಗೊತ್ತಾತ್ಂಡ್.

ಕ್ಷೇತ್ರದ ಜಾಗೆಡ್ ಮೂಲ ಶಿವಲಿಂಗ ಉಂಡು, ಅಂಚೆನೆ ದೇವೆರ್‍ನ ಗುಂಡಿಡ್ ಪಿರಾಕ್‌ದ ಕುಡೊಂಜಿ ಶಿವಲಿಂಗ ಉಂಡು ಪಂದ್ ತೆರಿದ್ ಬೈದಿತ್ತ್ಂಡ್. ಅವೇ ಪ್ರಕಾರ ಊರುದಕುಲು ೨೦೨೨ನೇ ಜನವರಿ ೧೦ ತಾರಿಕ್‌ದಾನಿ ಗ್ರಾಮಸ್ಥೆರ್ ಮಾಗಣೆದ ಭಕ್ತೆರ್ ಮಾತಾ ಸೇರ್ದ್ ವಾಸ್ತುಶಾಸ್ತ್ರಜ್ಞೆರ್ ಸುಬ್ರಹ್ಮಣ್ಯ ಅವಧಾನಿ, ತಂತ್ರಿಲಾಯಿನ ಶ್ರೀಪಾದ ಪಾಂಗಾಣ್ಣಾಯ ಮೊಕ್ಲೆನ ಮುತಾಲಿಕೆಡ್ ದೇವೆರ್ನ ಮೂಲ ಜಾಗೆಡ್ ಶೋಧನೆ ಮಲ್ಪುನಗ ಮೂಲ ಮಹಾಶಿವಲಿಂಗ ಅಂಚೆನೆ ದೇವೆರ್ನ ಕುಡೊಂಜಿ ಶಿವಲಿಂಗ ಗೋಚರ ಆದಿತ್ತ್ಂಡ್. ಅವೆನ್ ಶುದ್ಧ ಮಲ್ತ್‌ದ್ ಜನವರಿ ೨೭ ತಾರೀಕ್‌ದಾನಿ ಬಾಲಾಲಯೊಡು ಪ್ರತಿಷ್ಠೆ ಮಲ್ಪುನ ನಿರ್ಧಾರ ಮಲ್ತ್‌ದೆರ್.