ಬಂಗ್ರಮಂಜೇಶ್ವರದ ಪೊಯ್ಯಕಂಡದ ಪರಿಸರದ ನಡುಟ್ಟ್ ನೆಲೆಯಾಯಿನ ಶ್ರೀ ಮಲರಾಯ ದೈವಸ್ಥಾನಡ್ ಶ್ರೀ ಮಲರಾಯ ಬಂಟ ಬೊಬ್ಬರ್ಯ ದೈವದ ವರ್ಷಾವಧಿ ಉಚ್ಚಯ ಏ.6 – 8 ಮುಟ್ಟ ಭಾರೀ ಗೌಜಿಡ್ ನಡಪರೆ ಉಂಡು.
ಪಿರಾಕ್ ದ ಕಥೆ:
ಮೊಗವೀರ ಸಮುದಾಯದ ಪ್ರಮುಖ ಭಗ್ ತಿದ ಕೇಂದ್ರವಾಯಿನ ಪೊಯ್ಯೆಕಂಡ ಶ್ರೀ ಮಲರಾಯ ದೈವಸ್ಥಾನಗ್ ಸುಮಾರ್ 400 ವರ್ಷರ್ದ್ ಲ ಮಸ್ತ್ ಇತಿಹಾಸ ಉಂಡು. ಈ ಕಾಲಡ್ ಮಲರಾಯ ಬಂಟ ದೈವಲು ಇಡೆಗ್ ಬತ್ತಿನವ್ವೇ ಒಂಜಿ ವಿಶೇಷವಾತ್ಂಡ್.
ಮೀನುಗಾರಿಕೆ ಪನ್ಪಿನವ್ ಮೊಗವೀರೆರ್ನ ಜೀವನದ ಸಾದಿ. ಕಡಲ್ ದ ಬರಿಟ್ಟ್ ಕಡಲ್ ದ ಅಮ್ಮನ್ ನಂಬುದ್ ಬದುಕೊಂದ್ ಇಪ್ಪುನ ಮೊಗವೀರ ಸಮುದಾಯ ಪಿರಾಕ್ ದ ಕಾಲರ್ದೆ ಸಾಂಪ್ರದಾಯಿಕವಾಯಿನ ಬೇಲೆನ್ ಮಲ್ತೊಂದು ಜೀವನ ಮಲ್ತೊಂದ್ ಉಲ್ಲೆರ್. ಜವನ್ಯೆರ್, ಪೊಂಜೊಕುಲು ಅಕ್ಲೆನ ವೃತ್ತಿಡ್ ಸರಿಯಾದ್ ಬೇಲೆ ಮಲ್ತೊಂದುಲ್ಲೆರ್. ಆ ಕಾಲಡ್ ಅಲ್ಪದ ರಡ್ಡ್ ಪೊಂಜೊವ್ ನಕುಲು ಇಲ್ಲ್ ಇಲ್ಲಗ್ ಮೀನ್ ಮಾರೊಂದು ಪೊವೊಂದಿಪ್ಪುನಗ ಕೇರಳ ಕರ್ನಾಟಕ ಗಡಿ ಪ್ರದೇಶವಾಯಿನ ಮಲಾರು ಪನ್ಪಿನ ಜಾಗೆಗ್ ಬರ್ಪೆರ್. ಮಲಪುರಾಯನ ಊರ್ ಆಯಿನ ಮಲರಾಯನ ಮಲಾರ್ ಡ್ ಅಪಗ ಜಾತ್ರೆದ ಗೌಜಿ. ಜಾತ್ರೆಡ್ ಪಾಲ್ ಪಡೆಯಿನ ನಾಗಮ್ಮ ಪನ್ಪಿನ ಪೊಂಜೊಕುಲು ಅಲ್ಪದ ಸ್ಥಾನಗ್ ಪೋದ್ ಗೌರವಾರ್ದ್ ದೈವದ ಪ್ರಸಾದನ್ ಸ್ವೀಕಾರಾ ಮಲ್ತೆರ್. ಪಾಡ್ದಿನ ಸೀರೆದ ಸೆರಂಗ್ ಡ್ ಪ್ರಸಾದನ್ ದೆತೊನುನ ಪೊರ್ತುಡ್ ಮಲರಾಯ ಬಂಟ ದೈವ ಸೆರಂಗ್ ನ್ ಸೇರ್ದ್ಂಡ್. ಇಂದೆನ್ ತೆರಿಯಂದಿನ ನಾಗಮ್ಮ, ಬಾಳಮ್ಮ ಇಲ್ಲಗ್ ಪೋದ್ ಪ್ರಸಾದನ್ ದೇವೆರ್ನ ಕೋಣೆಡ್ ದೀದ್ ಅಕ್ಲೆನ ಬೇಲೆಗ್ ಪೋಯೆರ್.
ಒಂತೆ ಪೊರ್ತುಡೇ ದೇವೆರ್ನ ಕೋಣೆರ್ದೆ ಕೊಂಬು ವಾದ್ಯದ ಶಬ್ದಲು ಅಂಚನೆ ಅಶರೀರವಾಣಿ ಕೇನರ ಸುರು ಆನಗ ಇಲ್ಲದಕುಲ್ ಆಯಿನ ಬಂಗೇರ ಕುಟುಂಬಸ್ಥೆರ್ ಒಟ್ಟು ಸೇರ್ದ್ ಪ್ರಶ್ನೆ ದೀದ್ ವಿಚಾರಣೆ ಮಲ್ತೆರ್.
ಈ ಪೊರ್ತುಡ್ ತೆರಿದ್ ಬತ್ತಿನ ದಾದ ಪಂಡ ಇಲ್ಲಗ್ ದೈವಲೆನ ಆಗಮನ ಆತ್ಂಡ್. ಅವೆನ್ ಶ್ರದ್ದೆ ಅಂಚನೆ ಭಕ್ತಿರ್ದ್ ಆರಾಧನೆ ಮಲ್ಪುಲೆಕ್ಕ ಆದೇಶ ಆಂಡ್. ಅಂಚನೆ ಬಂಗೇರ ಕುಟುಂಬಸ್ಥೆರ್ ಮಲರಾಯ ಬಂಟ ದೈವಲೆನ್ ಶ್ರದ್ಧೆ, ಭಕ್ತಿರ್ದ್ ಆರಾಧನೇ ಮಲ್ಪರೆ ಸುರು ಮಲ್ತೆರ್. ಕಾಲ ಕ್ರಮೇಣ ಮೊಗವೀರ ಸಮುದಾಯದಕುಲು ಒಟ್ಟು ಸೇರ್ದ್ ಸಂಘಟಿತೆರಾದ್ ದೈವಸ್ಥಾನನ್ ನಿರ್ಮಾಣ ಮಲ್ತ್ ದ್, ಈ ಮಲರಾಯ ಬಂಟ ದೈವನ್ ಅಂಚನೇ ಮೀನುಗಾರಿಕೆದ ದೈವವಾಯಿನ ಬೊಬ್ಬರ್ಯ ದೈವನ್ ಮುಲು ಕನತ್ ದ್ ಪ್ರತಿಷ್ಠಾಪನೆ ಮಲ್ತೆರ್. ನಾಗದೇವೆರ್ ಬೊಕ್ಕ ಗುಳಿಗನ ಸಾನಿಧ್ಯಲ ಮುಲ್ಪ ಉಂಡು.
ಸುಮಾರ್ 21 ವರ್ಷದ ಪಿರವು ಮುಲ್ಪ ಬ್ರಹ್ಮಕಲಶೋಚ್ಚಯ ಭಾರೀ ಗೌಜಿಡ್ ಆದಿತ್ತ್ ದ್, ಈ ಪೊರ್ತುಡ್ ಸುರುಟ್ಟ್ ಕಾಕಜಿಡ್ ನಿರ್ಮಾಣ ಆಯಿನ ಮೊಗತ್ತ ರೂಪನ್ ಕಂಚ್ ದ ಮೊಗ ಆದ್ ಬೇತೆ ಮಲ್ತ್ ದ್, ಇತ್ತೆ ಬೊಳ್ಳಿದ ರೂಪಡ್ ಉಂಡು. ಏಳು ವರ್ಷದ ಪಿರ ಆಯಿನ ನವೀಕೃತ ಬ್ರಹ್ಮಕಲಶೋತ್ಸವದ ಪೊರ್ತುಡ್ ದೇವಲ್ಯ ನಾನಾತ್ ಎಡ್ಡೆ ರೀತಿಡ್ ಅಭಿವೃದ್ಧಿ ಆತ್ಂಡ್.
ಕಾರ್ಣಿಕದ ಪುಗರ್ತೆದ ಜಾಗೆ
ಪೊಯ್ಯಕಂಡದ ಬಂಟ ದೈವ ಮೂಗ ದೈವ ಆದಿತ್ತ್ ದ್, ಈ ದೈವನ್ ಪಾತೆರುನ ಭಾಷೆಡ್ “ಪೊಟ್ಟಂತೈಯ್ಯಂ” ಪಂದ್ ಲೆಪ್ಪುವೆರ್. ಭಾರೀ ಕಾರಣಿಕಗ್ ಪ್ರಸಿದ್ಧವಾಯಿನ ಈ ದೈವಸ್ಥಾನಗ್ ಜಾತಿ,ಮತ, ಭೇದ ಇಜ್ಜಂದೆ ಜನಕುಲು ಬರ್ಪೆರ್ ಪನ್ಪಿನವ್ ಮುಲ್ಪದ ವೈಶಿಷ್ಟ್ಯವಾತ್ಂಡ್. ಈ ಕ್ಷೇತ್ರದ ಸಿದ್ದಿರ್ದ್ ಕೈತಲ್ ದ ಅವೆತ್ತೋ ಜನ ಬಾಯಿ ಬರಂದಿನಕುಲು ಮುಲ್ಪ ಪ್ರಾರ್ಥನೆ ಮಲ್ತಿನ ಫಲವಾದ್ ಇತ್ತೆ ಪಾತೆರೊಂದು ಉಲ್ಲೆರ್.
ಮಸ್ತ್ ಸಾಂಪ್ರದಾಯಿಕ ಕಟ್ಟುಕಟ್ಟಳೆಲ ಈ ದೈವಸ್ಥಾನಗ್ ಉಂಡು. ಭಾರಿ ಕಾರಣಿಕದ ಪುಗರ್ತೆದ ಮುಲ್ಪದ ದೈವನ್ ಮೊಗವೀರ ಸಮಾಜದ ಜನಕುಲು ಭಕ್ತಿ, ಭಾವಡ್ ಆರಾಧನೆ ಮಲ್ಪುವೆರ್. ಉಚ್ಚಯ ಇಪ್ಪುನ ಮೂಜಿ ದಿನತ್ತ ಕಾಲ ಮುಲ್ಪದ ಜನಕುಲು ಅಕುಲೆನ ವೃತ್ತಿಯಾಯಿನ ಮೀನ್ ಪತ್ತರೆ ಪೋಪುಜೆರ್. ಈ ನಿಲೆಟ್ಟ್ ಉಂದೊಂಜಿ ಮಾತೆರ್ನಲ ನಿಲುವಾತ್ಂಡ್. ಉಚ್ಚಯ ಆಪಿನ ಪೊರ್ತುಡ್ ಪೊಯ್ಯೆ ಕಂಡಡ್ ಮಲರಾಯ ಒಲಸರಿ ಅಂಚನೆ ಬಂಟ ಒಲಸರಿ ಭಾರಿ ಗೌಜಿಡ್ ವಿಶೇಷವಾದ್ ನಡಪುಂಡ್.
ರಡ್ಡ್ ದಿನತ್ತ ಕಾಲ ಕತ್ತಲೆಗ್ ನಡಪುನ ಒಲಸರಿಗ್ ಭಾರೀ ಸಂಖ್ಯೆಡ್ ಜನಕುಲು ಸೇರುವೆರ್. ಶತಮಾನರ್ದ್ ಲ ಚಾಲ್ತಿಡ್ ಇಪ್ಪುನ ಮುಲ್ಪದ ನನೊಂಜಿ ಸಂಪ್ರದಾಯ ಪಂಡ ಜಾತ್ರೆದ ಪೊರ್ತುಡ್ ಭಂಡಾರ ಇಲ್ಲಗ್ ಪೇರ್ ಪರ್ರ ಪೋಪುಂಡ್. ಸುರುಕ್ಕ್ ಮಲರಾಯ ಬಂಟ ದೈವ ಬತ್ತ್ ದ್ ಸೇರಿನವ್ ಉಂದುವೇ ಇಲ್ಲಡ್ ಪನ್ಪಿನವ್ ನನೊಂಜಿ ವೈಶಿಷ್ಟ್ಯವಾತ್ಂಡ್.
ಸುರುರ್ದೆ ಮಂಜೇಶ್ವರ ಶ್ರೀ ಮದನಂತೇಶ್ವರ ಕ್ಷೇತ್ರಗ್ ಲ ಮುಲ್ಪದ ಮೊಗವೀರೆರ್ನ ನುಡುಟ್ಟ್ ಲ ಒಂಜಿ ವಿಶೇಷವಾಯಿನ ಸಂಬಂಧ ಉಂಡು. ಮುಲ್ಪದ ರಥೋಚ್ಚಯದ ಪೊರ್ತುಡ್ ಬ್ರಹ್ಮರಥನ್ ಮೊಗವೀರೆರೆ ಒಯಿಪೊಡ್ ಪನ್ಪಿನ ಸಂಪ್ರದಾಯಲ ಮುಲ್ಪ ಉಂಡು. ಆತ್ ಮಾತ್ರ ಅತ್ತಂದೆ ಕನಿಲ ಶ್ರೀ ಭಗವತಿ ಕ್ಷೇತ್ರದ ಭರಣಿ ಉಚ್ಚಯದ ಪೊರ್ತುಡ್ ಮೊಗವೀರ ಸಮುದಾಯದಕುಲ್ ಪಾಲ್ ಪಡೆಯುನೆಡ್ದವಾರ ಕೊಡಿ ಏರುನ ಸಂಪ್ರದಾಯ ಇತ್ತ್ ದ್, ಇತ್ತೆಲ ಅವ್ವ ಸಂಪ್ರದಾಯಲೆಕ್ಕನೆ ದುಂಬರಿದ್ಂಡ್.
ಇತ್ತೆ ಪುರಾಣ ಪ್ರಸಿದ್ಧ ಶ್ರೀ ಮಲರಾಯ ದೈವಸ್ಥಾನಡ್ ವರ್ಷಾವಧಿ ಉಚ್ಚಯದ ಗೌಜಿ. ಪಚ್ಚೆ ಪಜಿರುದ ನಡುಟ್ ಪ್ರಕೃತಿ ರಮಣೀಯ ತಾಣಡ್ ಕೋಲದ ಗೌಜಿ. ದೂರ ಇತ್ತಿನ ಮೊಗವೀರ ಸಮಾಜದ ಜನಕುಲು ಒಟ್ಟು ಸೇರುನ ಅಪರೂಪವಾಯಿನ ಪೊರ್ತು. ಆಯಿತೊಟ್ಟುಗ್ ಜಾತಿ, ಮತ, ಭೇದ ಇಜ್ಜಂದೆ ಉಚ್ಚಯಡ್ ಪಾಲ್ ಪಡೆದ್ ಸಿರಿಮುಡಿ ಗಂಧ ಪ್ರಸಾದನ್ ದೆತ್ತೊಂದ್ ಪುನೀತರಾಪೆರ್.
ಕಾರ್ಯಕ್ರಮದ ವಿವರ
ಏ.6 ಬುಧಾರ ಕಾಂಡೆ 8 ಗಂಟೆಗ್ ಬಡಾಜೆ ತಂತ್ರಿಲೆಡ್ದ್ ಗಣಹೋಮ, ರಾತ್ರಿ 8.30 ಗಂಟೆಗ್ ಶ್ರೀ ದೈವದ ಭಂಡಾರ ಏರುನವ್.
ಏ.7 ಗುರುವಾರ ಕಾಂಡೆ 9 ಗಂಟೆಗ್ ಶ್ರೀ ಮಲರಾಯ ದೈವಲೆನ ನೇಮೋಚ್ಚಯ, ಮಧ್ಯಾಹ್ನ 1 ಗಂಟೆರ್ದ್ 3 ಗಂಟೆ ಮುಟ್ಟ ನುಪ್ಪು ಸೇವೆ, ಬಯ್ಯಗ್ 4 ಗಂಟೆಗ್ ಶ್ರೀ ಬಂಟ ದೈವಲೆನ ನೇಮೋಚ್ಚಯ, ರಾತ್ರಿ 10 ಗಂಟೆಗ್ ಶ್ರೀ ಮಲರಾಯ ದೈವದ ಒಲಸರಿ.
ಏ.8 ಸುಕ್ರಾರ ರಾತ್ರಿ 12 ಗಂಟೆಗ್ ಶ್ರೀ ಬಂಟ ದೈವದ ಒಲಸರಿ, ರಾತ್ರಿ 2 ಗಂಟೆಗ್ ಬೊಬ್ಬರ್ಯ ದೈವದ ಕೋಲ ನಡಪರೆ ಉಂಡು.
