ಉಡುಪಿದ ಸುದ್ದಿ | Udupi News

ಡಾ| ಎಂ.ಎನ್.ರಾಜೇಂದ್ರ ಕುಮಾರ್ ಮೆರೆಗ್ “ಮದರ್ ತೆರೇಸಾ ಮೆಮೋರಿಯಲ್ ನ್ಯಾಷನಲ್ ಅವಾರ್ಡ್”

ಕುಡ್ಲ: ನ್ಯಾಷನಲ್ ಪ್ರೆಸ್ ಕೌನ್ಸಿಲ್ ಆಫ್ ಇಂಡಿಯಾ ಅಂಚನೆ ದಿ ನ್ಯೂಸ್ ಪೇಪರ್ಸ್ ಅಸೋಷಿಯೇಷನ್ ಆಫ್ ಕರ್ನಾಟಕ-ಬೆಂಗ್ಳೂರ್ ಮೊಕುಲೆನ ಮುತಾಲಿಕೆಡ್ ಕೊರ್ಪುನಂಚಿತ್ತಿನ “ಮದರ್ ತೆರೇಸಾ ಮೆಮೋರಿಯಲ್ ನ್ಯಾಷನಲ್ ಅವಾರ್ಡ್” ಗ್ ದಕ್ಷಿಣ ಕನ್ನಡ ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್ ಅಂಚನೆ ಕರ್ನಾಟಕ ರಾಜ್ಯ ಸಹಕಾರ ಮಾರಾಟ ಮಂಡಳದ ಅಧ್ಯಕ್ಷೆರ್ ಡಾ|ಎಂ.ಎನ್ ರಾಜೇಂದ್ರ ಕುಮಾರ್ ಆಯ್ಕೆ ಆತೆರ್.

ಬೆಂಗ್ಳೂರ್‌ದ ರವೀಂದ್ರ ಕಲಾ ಕ್ಷೇತ್ರಡ್ ಜೂ 6 ಕ್ಕ್ ನಡಪುನ ಅಂತಾರಾಷ್ಟ್ರೀಯ ದಾದಿಯೆರ್‍ನ ದಿನಾಚರಣೆದ ಪೊರ್ತುಡು ಪ್ರಶಸ್ತಿ ಪಟ್ಟುನ ಲೇಸ್ ನಡಪರೆ ಉಂಡು. 29 ವರ್ಷರ್ದ್ ಸಹಕಾರ ಕ್ಷೇತ್ರಡ್ ಸಾಧನೆ ಮಲ್ತಿನ ಡಾ| ಎಂ.ಎನ್.ರಾಜೇಂದ್ರ ಕುಮಾರ್ ಸಹಕಾರಿ ಬ್ಯಾಂಕ್‌ನ್ ಜನಸ್ನೇಹಿಯಾದ್ ರೂಪಿಸಾದೆರ್.

ಒಡಿಪುಡು ಯಶ್ಪಾಲ್ ಸುವರ್ಣ ನಾಮಪತ್ರ

ಒಡಿಪು: ಒಡಿಪು ವಿಧಾನಸಭಾ ಕ್ಷೇತ್ರದ ಬಿಜೆಪಿ ಅಭ್ಯರ್ಥಿ ಯಶ್ಪಾಲ್ ಸುವರ್ಣ ಮೇರ್ ಇನಿ ಮಸ್ತ್ ಕಾರ್ಯಕರ್ತೆರ್‌ನೊಟ್ಟುಗು ಒಡಿಪು ತಾಲೂಕು ಕಚೇರಿಗ್ ಪೋದು ಚುನಾವಣಾ ಆದಿಕಾರಿ ಸೀತಾ ಮೆರೆಗ್ ನಾಮಪತ್ರ ಸಂದಾಯೆರ್.

ಕಾಂಡೆ ಒಡಿಪು ಕೃಷ್ಣ ಮಠಗ್ ಪೋದು ಗೋಪೂಜೆ ಸಂದಾಯೆರ್. ಅಯಿರ್ದ್ ಬೊಕ್ಕ ಅಯ್ಯಪ್ಪ ಸ್ವಾಮಿ ಮಂದಿರ ಕಡಿಯಾಳಿ ದೇವಲ್ಯಗ್ ಭೇಟಿ ಕೊರಿಯೆರ್. ಉಂದುವೇ ಪೊರ್ತುಡು ಬಿಜೆಪಿ ಹಿರಿಯ ಮುಖಂಡೆರ್ ಸೋಮಶೇಖರ್ ಭಟ್ ಮೆರೆನ ಇಲ್ಲಗ್ ಪೋದು ಆಶೀರ್ವಾದ ಪಡೆಯೆರ್.

ಈ ಪೊರ್ತುಡು ಶಾಸಕೆರ್ ರಘುಪತಿ ಭಟ್, ವೀಣಾ ನಾಯ್ಕ್, ರಿಧಿ ಮೊಕುಲು ಇತ್ತೆರ್.

ಯಕ್ಷಗಾನದ ಪರಂಪರೆ ಒರಿಪರೆ ಪ್ರಯತ್ನ ಮಲ್ತೊಂದುಲ್ಲ : ಡಿ.ಹರ್ಷೇಂದ್ರ ಹೆಗ್ಗಡೆರ್ ಸುರತ್ಕಲ್ ಡ್ ಯಕ್ಷಬ್ರಹ್ಮ ಅಗರಿ ಶ್ರೀನಿವಾಸ ಭಾಗವತೆರ್ನ ನೆಂಪುದ ಪ್ರಶಸ್ತಿ ಪ್ರದಾನ

ಸುರತ್ಕಲ್ : ಶ್ರೀ ಕ್ಷೇತ್ರ ಧರ್ಮಸ್ಥಳದ ಪ್ರತಿನಿಧಿಯಾದ್ ಯಾನ್ ಕರ್ತವ್ಯ ಮಲ್ತೊಂದುಲ್ಲೆ. ಧರ್ಮಸ್ಥಳ ಯಕ್ಷಗಾನ ಮೇಳದ ಜಬದಾರಿ ಒಯಿಸೊಂದು ಸಾಧ್ಯ ಆಯಿನಾತ್ ಮಟ್ಟ್ ಗ್ ಯಕ್ಷಗಾನದ ಪರಂಪರೆ ಒರಿತೊಂದು ಬರಿಯರೆ ಪ್ರಯತ್ನ ಬರೊಂದುಲ್ಲ ಪಂದ್ ಧರ್ಮಸ್ಥಳದ ಮೇಳದ ಡಿ.ಹರ್ಷೇಂದ್ರ ಕುಮಾರ್ ತೆರಿಪಾಯೆರ್.

ಆರ್ ಸುರತ್ಕಲ್ ಗೋವಿಂದದಾಸ ಕಾಲೇಜಿಡ್ ಶನಿವಾರ ನಡತಿನ ಯಕ್ಷಬ್ರಹ್ಮ ಅಗರಿ ಶ್ರೀನಿವಾಸ ಭಾಗವತೆರ್ ಅಂಚೆನೆ ರಘುರಾಮ ಭಾಗವತೆರ್ನ ನೆಂಪು ಲೇಸ್ ಡ್ ಅಗರಿ ಪ್ರಶಸ್ತಿ ಸ್ವೀಕಾರ ಮಲ್ತ್ ದ್ ಪಾತೆರಿಯೆರ್.

ಪುಲ್ಯ ಮುಟ್ಟ ಆಟ ತೂವರೆ ಜನಕುಲು ಇಜ್ಜಾಂದಿನ ಪೊರ್ತುಡು ಮಾತೆರ್ಡಲ ಚರ್ಚೆ ಮಲ್ತ್ ದ್ ನಾಲ್ ವರ್ಷೊರ್ದು ಬೊಕ್ಕ ಯಕ್ಷಗಾನನ್ ಕಾಲಮಿತಿಗ್ ಕನವೊಡಾಂಡ್. ಇತ್ತೆ ಕಟೀಲ್ ಮೇಳ ಸೇರ್ದ್ ಮಾತ ಮೇಳಲ ಅವೆನ್ ಅನುಸರಿಸೊಂದುಂಡು.

ಮೇಳದ ಯಜಮಾನೆರೆಗ್ ಮರಿಯಲಡ್ ಯಕ್ಷಗಾನದ ಡ್ರೆಸ್ ರೆಡಿ ಮಲ್ಪುನವು ಮಲ್ಲ ಸವಾಲ್ ಆದುಂಡು. ವೆಲ್ವೆಟ್ ದ ಕುಂಟು ಸೇರ್ದ್ ಸರಿಯಾಯಿನ ಸೊತ್ತುಲು ತಿಕ್ಕುಜಿ. ಚರ್ಮದ ಮದ್ದಳೆ ಮಲ್ಪುನ ಜನ ಇಜ್ಜಿ.ಕ್ಷೇತ್ರ ಮಹಾತ್ಮೆದ ಅಣಿ ದುಂಬು 6-7 ಕೆಜಿ ದುನ್ನ ಇತ್ತ್ಂಡ್. ಇತ್ತೆ ಹಳೆಯಂಗಡಿದ ಕಲಾವಿದೆರ್ ಅವೆನ್ ಫೈಬರ್ ಡ್ ಮಲ್ತ್ ಕೊರ್ತೆರ್. ಮೇಳೊಡು ಆಯಿನಾತ್ ಪರಂಪರೆ ಒರಿಪರೆ ಪ್ರಯತ್ನ ಮಲ್ಪುವ. ಅನಿವಾರ್ಯ ಆಂಡ ಮಾತ್ರ ಬದಲಾವಣೆ ಮಲ್ಪುವ ಪಂದ್ ಆರ್ ಪಂಡೆರ್.

ಅಗರಿ ಶ್ರೀನಿವಾಸ ಭಾಗವತೆರ್ ಬೊಕ್ಕ ರಘುರಾಮ ಭಾಗವತೆರ್ನ ನೆಂಪು ಲೇಸ್ ನಿರಂತರವಾದ್ ನಡಪೊಂದು ಉಪ್ಪೊಡು. ಅಗರಿ ಪ್ರಶಸ್ತಿಗ್ ಅಯಿತ್ತನೇ ಆಯಿನ ಗೌರವ ಉಂಡು. ಅಗರಿ ಶೈಲಿದ ಭಾಗವತ ಪರಂಪರೆ ದುಂಬರಿಯೊಡು ಪಂಡೆರ್.

ಕಟೀಲು ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನದ ಅನುವಂಶಿಕ ಮೊಕ್ತೇಸರೆರ್ ಲಕ್ಷ್ಮೀ ನಾರಾಯಣ ಅಸ್ರಣ್ಣೆರ್ ಲೇಸ್ ದ ಉದಿಪನ ಮಲ್ತ್ ದ್ ಗುರ್ಕಾರ್ಮೆನ್ ಒಯಿಸ್ ದಿತ್ತೆರ್.

ಪ್ರಸಂಗಕರ್ತೆರ್ ಅಂಚೆನೆ ಪುಗರ್ತೆದ ಭಾಗವತೆರ್ ಆದಿತ್ತಿನ ಅಗರಿ ಶ್ರೀನಿವಾಸ ಭಾಗವತೆರ್ನ ನೆಂಪು ಶಾಶ್ವತವಾದ್ ದೀಪಿನ ನಿಲೆಟ್ಟ್ ಪ್ರತಿ ವರ್ಷಲ ಕೊರೊಂದು ಬೈದಿನ ಅಗರಿ ಪ್ರಶಸ್ತಿನ್ ಈ ಸರ್ತಿ ಯಕ್ಷಗಾನದ ಮಹಾಪೋಷಕೆರ್ ಧರ್ಮಸ್ಥಳದ ಡಿ. ಹರ್ಷೇಂದ್ರ ಕುಮಾರ್ ಮೆರೆಗ್ ಪ್ರದಾನ ಮಲ್ತ್ ದ್ ಮಾನಾದಿಗೆ ಮಲ್ತೆರ್.

ಯಕ್ಷಗಾನ ವಿದ್ವಾಂಸೆರ್ ಡಾ.ಎಂ.ಪ್ರಭಾಕರ ಜೋಷಿ ಮೇರ್ ಅಭಿನಂದನಾ ಭಾಷಣ ಮಲ್ತ್ ದ್, ಹರ್ಷೇಂದ್ರ ಹೆಗ್ಗಡೆರ್ನ ಮುತಾಲಿಕೆಡ್ 40 ವರ್ಷೊರ್ದಿಂಚಿ ಯಕ್ಷಗಾನ ಮೇಳ ಯಶಸ್ವಿಯಾದ್ ನಡತ್ ಬರೊಂದುಂಡು ಪಂಡೆರ್. ಅಂಚೆನೆ ಅಗರಿ ಶ್ರೀ ನಿವಾಸರಾಯೆರ್ ಭಾಗವತೆರ್ ಮಾತ್ರ ಅತ್ತ್, ನಾಟಕ ಬೊಕ್ಕ ಭಜನೆದ ಸಂಗೀತಗಾರೆರಾದಿತ್ತೆರ್. ಕಲಂಕ್ ದಾಂತಿನ ಹೃದಯ ಅರೆನವು. ಸ್ಪಷ್ಟ ಬೊಕ್ಕ ದಿಟ್ಟ ನಿಲುವು ಇತ್ತಿನ ಭಾಗವತೆರ್ ಅಗರಿ ಶ್ರೀನಿವಾಸ ಭಾಗವತೆರ್ ಪಂದ್ ನೆಂಪು ಮಲ್ತೆರ್.

ಈ ಸರ್ತಿದ “ಅಗರಿ ಶೈಲಿ” ಪ್ರಶಸ್ತಿನ್ ಶ್ರೀ ಗೆಜ್ಜೆಗಿರಿ ಮೇಳದ ಪ್ರಧಾನ ಭಾಗವತೆರ್ ಗಿರೀಶ್ ರೈ ಕಕ್ಕೆಪದವು ಮೆರೆಗ್ ಕೊರ್ದು ಮಾನಾದಿಗೆ ಮಲ್ತೆರ್. ಅವ್ವತ್ತಾಂದೆ ಅಗರಿ ಭಾಗವತೆರ್ ಬರೆತಿನ ದೇವಿ ಮಹಾತ್ಮೆ ಪ್ರಸಂಗದ ಮಿತ್ತ್ ಪ್ರಬಂಧ ಬರೆದ್ ಪ್ರಶಸ್ತಿ ಪಡೆದಿನ ಕಟೀಲ್ ಮೇಳದ ಕಲಾವಿದೆರ್, ಬೆದ್ರದ ಎಕ್ಸಲೆಂಟ್ ಕಾಲೇಜಿದ ಉಪನ್ಯಾಸಕೆರ್ ಡಾ.ವಾದಿರಾಜ ಕಲ್ಲೂರಾಯ ಮೆರೆಗ್ “ಅಗರಿ ವಿಶೇಷ ಸಮ್ಮಾನ” ಮಲ್ತೆರ್.

ಮಿತ್ತರ್ಮೆಡ್ ಮಲ್ಲ ಬಿನ್ನೆರಾದ್ ಯಕ್ಷ ಕಲಾ ರಂಗ ಒಡಿಪು ಕಾರ್ಯದರ್ಶಿ ಮುರಲೀ ಕಡೆಕಾರ್, ಬೆದ್ರ ಧನಲಕ್ಷ್ಮಿ ಕ್ಯಾಶ್ಯೂ ಇಂಡಸ್ಟ್ರಿ ದ ಶ್ರೀಪತಿ ಭಟ್ ಬೊಕ್ಕ ಗೋವಿಂದದಾಸ್ ಕಾಲೇಜಿದ ಪ್ರಿನ್ಸಿಪಾಲ್ ಪ್ರೊ. ಕೃಷ್ಣಮೂರ್ತಿ ಲೇಸ್ ಡ್ ಪಾಲ್ ಪಡೆದೆರ್.

ಅಗರಿ ಶ್ರೀನಿವಾಸ ಭಾಗವತರ ಸಂಸ್ಮರಣ ವೇದಿಕೆದ ಅಧ್ಯಕ್ಷೆರ್ ಅಗರಿ ರಾಘವೇಂದ್ರ ರಾವ್ ಪ್ರಸ್ತಾವಿಕವಾದ್ ಪಾತೆರ್ದ್ ಬಿನ್ನೆರೆನ್ ಎದ್ಕೊಂಡೆರ್. ಅಗರಿ ಅಜ್ಜೆರ್ ಬರೆತಿನ ಶ್ರೀ ದೇವಿ ಮಹಾತ್ಮೆ ಯಕ್ಷಗಾನ ಪ್ರಸಂಗ 1.5 ಲಕ್ಷ ರ್ದ್ ಎಚ್ಚ ಪ್ರದರ್ಶನ ಆದ್ ಗಿನ್ನಿಸ್ ರೆಕಾರ್ಡ್ ಗ್ ಅರ್ಹತೆ ಪಡೆದ್ಂಡ್. ಅವೆನ್ ದಾಖಲ್ ಮಲ್ಪುನ ಬೇಲೆ ಆವೊಡು ಪಂದ್ ಪಂಡೆರ್.

ಕೃಷ್ಣ ಪ್ರಕಾಶ್ ಉಳಿತ್ತಾಯ ಸಭೆ ಸುಧಾರಿಕೆ ಮಲ್ತೆರ್. ಪ್ರಕಾಶ್ ಸುವರ್ಣ ಸೊಲ್ಮೆ ಸಂದಾಯೆರ್.

ಬೊಕ್ಕ ಪೂರ್ಣಿಮಾ ಯತೀಶ್ ರೈ ಮೆರೆನ ಕೂಟದಕ್ಲೆರ್ದ್ ಯಕ್ಷ ಬ್ರಹ್ಮ ಅಗರಿ ಭಾಗವತೆರ್ ಬರೆತಿನ “ಶ್ರೀ ದೇವಿ ಮಹಿಷಮರ್ದಿನಿ” ಯಕ್ಷಗಾನ ಪ್ರದರ್ಶನ ನಡತ್‌ಂಡ್.

ಕುಡ್ಲ: ಸೂಕ್ಷ್ಮ ಪ್ರದೇಶಡ್ ಪಥ ಸಂಚಲನ ಮಲ್ತಿನ ಸಿಆರ್‌ಪಿಎಫ್ ಬೊಕ್ಕ ಪೊಲೀಸೆರ್‍ನ ಕೂಟ

ಕುಡ್ಲ: ವಿಧಾನಸಭಾ ವೋಟುದ ನಿಲೆಟ್ ದಕ್ಷಿಣ ಕನ್ನಡ ಜಿಲ್ಲಾ ಪೊಲೀಸ್ ಘಟಕದ ವ್ಯಾಪ್ತಿಡ್ ಸುರುತ್ತ ಪಂತೆಡ್ 4 ಸಿಆರ್‌ಪಿಎಫ್ ಕೂಟ ಬತ್ತಿತ್ತ್‌ದ್, ಪೊಲೀಸ್ ಅಧೀಕ್ಷಕೆರ್‍ನ ಮುತಾಲಿಕೆಡ್ ಸಿಆರ್‌ಪಿಎಫ್ ಅಂಚನೆ ಅಧಿಕಾರಿಲು ಪಥ ಸಂಚಲನ ಮಲ್ತೆರ್.

ಸುಳ್ಯ ಪೊಲೀಸ್ ಠಾಣೆ, ಪುತ್ತೂರ್ ಗ್ರಾಮಾಂತರ ಠಾಣೆ, ಬೊಲ್ತೇರ್ ಪೊಲೀಸ್ ಠಾಣೆ, ಬಂಟ್ವಾಳ ಟೌನ್, ಬಂಟ್ವಾಳ ಗ್ರಾಮಾಂತರ ಪೊಲೀಸ್ ಠಾಣೆದ ವ್ಯಾಪ್ತಿಡ್ ಸೂಕ್ಷ್ಮ ಅಂಚೆನೆ ಪ್ರಮುಖ ಜಾಗೆಲೆಡ್ ಒಂಜೊಂಜಿ ಸಿಆರ್‌ಪಿಎಫ್ ಕೂಟ ಬೊಕ್ಕ ಪೊಲೀಸ್ ಅಧಿಕಾರಿಲೆರ್ದ್ ಪಥ ಸಂಚಲನ ಮಲ್ತ್‌ದ್, ಸಾರ್ವಜನಿಕೆರೆಡ ಶಾಂತಿಯುತ ಚುನಾವಣೆ ನಡಪಾವುನ ನಿಲೆಟ್ ಆತ್ಮ ವಿಶ್ವಾಸ ಪುಟ್ಟಾಯೆರ್.

ಒಡಿಪು ಕೃಷ್ಣ ಮಠಕ್ಕ್ ಬೈದಿನ ಪೊಂಜೊವುನ 8.5 ಲಕ್ಷ ಬಿಲೆತ್ತ ಬಂಗಾರ್‌ ಕಂಡಿನ ಕಲ್ವೆರ್

ಒಡಿಪು: ಕೃಷ್ಣ ಮಠಗ್ ಪೋವೊಂದಿಪ್ಪುನಗ ಪೊಂಜೋವು ಒರ್ತಿನ 8.5 ಲಕ್ಷ ಬಿಲೆತ್ತ ಬಂಗಾರ್‌ನ್ ಕಲ್ವೆರ್ ಕಂಡಿನ ಘಟನೆ ಒಡಿಪುಡ್ ನಡತ್ಂಡ್.

ಹೈದರಾಬಾದ್‌ರ್ದ್ ಧಾರ್ಮಿಕ ಕ್ಷೇತ್ರದ ಭೇಟಿಗ್ ಕಂಡನ್ಯನೊಟ್ಟುಗು ಬತ್ತಿನ ತಾಡುರಿ ಪದ್ಮಜಾ ಪನ್ಪಿನರೆನ 8.5 ಲಕ್ಷ ರೂ ಬಿಲೆತ್ತ ಬಂಗಾರ್ ಶ್ರೀ ಕೃಷ್ಣ ಮಠತ್ತ ದೇವೆರೆನ ದರ್ಶನಗ್ ಪಂದ್ ಪೋವೊಂದಿಪ್ಪುನಗ ಕಂಡ್‌ದ್ ಪೋತ್ಂಡ್. ಕೇಸ್ ದಾಖಲ್ ಮಲ್ತಿನ ನಗರ ಪೊಲೀಸೆರ್ ತನಿಖೆ ಮಲ್ತೊಂದುಲ್ಲೆರ್.

ಎ.8 : ಸುರತ್ಕಲ್ ಡ್ ಅಗರಿ ಶ್ರೀನಿವಾಸ ಭಾಗವತೆರ್ನ ನೆಂಪು, ಪ್ರಶಸ್ತಿ ಕೊರ್ಪಿನ ಲೇಸ್

ಸುರತ್ಕಲ್ : ಯಕ್ಷಬ್ರಹ್ಮ ಅಗರಿ ಶ್ರೀನಿವಾಸ ಭಾಗವತೆರ್ನ ನೆಂಪುದ ಲೇಸ್ ಅಂಚೆನೆ ಅಗರಿ ಪ್ರಶಸ್ತಿ ಪಟ್ಟುನ ಲೇಸ್ ಉಂದುವೇ ಏ.8 ಸನಿಯಾರ ಬಯ್ಯಡ್ 5 ಗಂಟೆಗ್ ಸುರತ್ಕಲ್ ಗೋವಿಂದ ದಾಸ್ ಕಾಲೇಜಿದ ಚಾವಡಿಡ್ ನಡಪರೆ ಉಂಡು ಪಂದ್ ಅಗರಿ ಶ್ರೀನಿವಾಸ ಭಾಗವತರ ಸಂಸ್ಮರಣ ವೇದಿಕೆ ಅಧ್ಯಕ್ಷೆರ್ ಅಗರಿ ರಾಘವೇಂದ್ರ ರಾವ್ ತೆರಿಪಾಯೆರ್.

ಆರ್ ಸುರತ್ಕಲ್ ಶುಭಗಿರಿ ನಿವಾಸಡ್ ಗುರುವಾರ ನಡತಿನ ಸುದ್ದಿಗೋಷ್ಠಿಡ್ ಈ ವಿಷಯ ತೆರಿಪಾಯೆರ್.

ಪ್ರಸಂಗಕರ್ತೆರ್ ಅಂಚೆನೆ ಪುಗರ್ತೆದ ಭಾಗವತೆರ್ ಆದಿತ್ತಿನ ಅಗರಿ ಶ್ರೀನಿವಾಸ ಭಾಗವತೆರ್ನ ನೆಂಪು ಶಾಶ್ವತವಾದ್ ದೀಪಿನ ನಿಲೆಟ್ಟ್ ಕರಿನ 11 ವರ್ಷೊರ್ದಿಂಚಿ ಪ್ರತಿ ವರ್ಷಲ ಕೊರೊಂದು ಬೈದಿನ ಅಗರಿ ಪ್ರಶಸ್ತಿನ್ ಈ ಸರ್ತಿ ಯಕ್ಷಗಾನದ ಮಹಾಪೋಷಕೆರ್ ಧರ್ಮಸ್ಥಳದ ಡಿ. ಹರ್ಷೇಂದ್ರ ಕುಮಾರ್ ಮೆರೆಗ್ ಪ್ರದಾನ ಮಲ್ತೊಂದುಲ್ಲ. ಲೇಸ್ ದ ಗುರ್ಕಾರ್ಮೆ ನ್ ಕಟೀಲು ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನದ ಅನುವಂಶಿಕ ಮೊಕ್ತೇಸರೆರ್ ಲಕ್ಷ್ಮೀ ನಾರಾಯಣ ಅಸ್ರಣ್ಣೆರ್ ಒಯಿಸೊಂದುಲ್ಲೆರ್ ಪಂದ್ ಪಂಡೆರ್.

ಮಲ್ಲ ವಿದ್ವಾಂಸೆರ್ ಡಾ.ಎಂ.ಪ್ರಭಾಕರ ಜೋಷಿ ಮೇರ್ ಅಭಿನಂದನಾ ಭಾಷಣ ಮಲ್ಪುವೆರ್. ಅಂಚೆನೆ “ಅಗರಿ ಶೈಲಿ” ಪ್ರಶಸ್ತಿನ್ ಈ ಸರ್ತಿ ಶ್ರೀ ಗೆಜ್ಜೆಗಿರಿ ಮೇಳದ ಭಾಗವತೆರ್ ಗಿರೀಶ್ ರೈ ಕಕ್ಕೆಪದವು ಮೆರೆಗ್ ಕೊರೊಂದುಲ್ಲ. ಅವ್ವತ್ತಾಂದೆ ಬೆದ್ರದ ಎಕ್ಸಲೆಂಟ್ ಕಾಲೇಜಿದ ಉಪನ್ಯಾಸಕೆರ್, ಕಟೀಲ್ ಮೇಳದ ಕಲಾವಿದೆರ್ ಡಾ.ವಾದಿರಾಜ ಕಲ್ಲೂರಾಯ ಮೆರೆಗ್ “ಅಗರಿ ವಿಶೇಷ ಸಮ್ಮಾನ” ಮಲ್ಪರೆ ಉಂಡು.ಮಲ್ಲ ಬಿನ್ನೆರಾದ್ ಯಕ್ಷ ಕಲಾ ರಂಗ ಒಡಿಪು ಕಾರ್ಯದರ್ಶಿ ಮುರಲೀ ಕಡೆಕಾರ್, ಬೆದ್ರ ಧನಲಕ್ಷ್ಮಿ ಕ್ಯಾಶ್ಯೂ ಇಂಡಸ್ಟ್ರಿ ದ ಶ್ರೀಪತಿ ಭಟ್ ಬೊಕ್ಕ ಗೋವಿಂದದಾಸ್ ಕಾಲೇಜಿದ ಪ್ರಿನ್ಸಿಪಾಲ್ ಕೃಷ್ಣಮೂರ್ತಿ ಲೇಸ್ ಡ್ ಪಾಲ್ ಪಡೆವೆರ್. ಬಯ್ಯಡ್ 7 ಗಂಟೆಗ್ ಪೂರ್ಣಿಮಾ ಯತೀಶ್ ರೈ ಮೆರೆನ ಕೂಟದಕ್ಲೆರ್ದ್ ಯಕ್ಷ ಬ್ರಹ್ಮ ಅಗರಿ ಭಾಗವತೆರ್ ಬರೆತಿನ “ಶ್ರೀ ದೇವಿ ಮಹಿಷಮರ್ದಿನಿ” ಯಕ್ಷಗಾನ ಪ್ರದರ್ಶನ ನಡಪರೆ ಉಂಡು ಪಂಡೆರ್.

ಸುದ್ದಿಗೋಷ್ಠಿಡ್ ವೇದಿಕೆದ ಉಪಾಧ್ಯಕ್ಷೆರಾಯಿನ ಶೇಷಶಯನ ಕಾರಿಂಜ, ಗಿರೀಶ್ ನಾವಡ, ಜತೆಕಾರ್ಯದರ್ಶಿ ಕಿರಣ್, ಪತ್ರಕರ್ತೆರ್ ರಜನ್ ಕುಮಾರ್ ಇತ್ತೆರ್.

ದಾಖಲೀಕರಣದ ಬೇಲೆ ಆವರೆ ಉಂಡು

ಆಶುಕವಿಲ ಆದಿತ್ತಿನ ಅಗರಿ ಶ್ರೀನಿವಾಸ ಭಾಗವತೆರ್ 35 ರ್ದ್ ಲ ಎಚ್ಚ ಯಕ್ಷಗಾನ ಪ್ರಸಂಗಲೆನ್ ಬರೆತೆರ್. ಆರ್ ಬರೆತಿನ ಶ್ರೀ ದೇವಿ ಮಹಾತ್ಮೆ ಪ್ರಸಂಗ ಗಿನ್ನಿಸ್ ದಾಖಲೆ ಮಲ್ದ್ಂಡ್. ಆಂಡ ಅಪಗ ಪ್ರಸಂಗಕರ್ತೆರ್ನ ಪುದರ್ ನ್ ಬರೆಪಿನ ಪದ್ಧತಿ ಇಜ್ಜಾಂಡ್. ಅಂಚಾದ್ ಅಗರಿ ಭಾಗವತೆರ್ನ ಪುದರ್ ಅಯಿಟ್ಟ್ ಅಚ್ಚಿ ಆತಿಜಿ. ಅರೆನ ಪ್ರಸಂಗದ ದಾಖಲೀಕರಣ ಆವರೆ ಉಂಡು. ಅಯಿಕ್ಕ್ ಸರಿಯಾಯಿನ ಜನ ತಿಕ್ಂಡ ಆ ಬೇಲೆ ಆಯಿನಾತ್ ಬೇಗ ಆವು ಪಂದ್ ಅಗರಿ ಭಾಗವತೆರ್ನ ಪುಲ್ಲಿ ಆಯಿನ ಅಗರಿ ರಾಘವೇಂದ್ರ ರಾವ್ ತೆರಿಪಾಯೆರ್.

ಮಣಿಪಾಲ: ಸರಿಯಾಯಿನ ದಾಖಲಾತಿ ಇಜ್ಜಂದೆ 100 ಬಾರ್‌ದ ಗೋಣಿ ವಶಕ್ಕ್

ಮಣಿಪಾಲ: ಸರಿಯಾಯಿನ ದಾಖಲಾತಿ ಇಜ್ಜಂದೆ ಕೊನೊವೊಂದಿತ್ತಿನ 100 ಮೂಟೆ ಬಾರ್‌ದ ಗೋಣಿ ಚೀಲನ್ ಮಣಿಪಾಲ ಠಾಣೆದ ಪೊಲೀಸೆರ್ ವಶಕ್ಕ್ ದೆತೊಂದೆರ್.

ಕರ್ನಾಟಕ ವಿಧಾನಸಭಾ ವೋಟುದ ಪೊರ್ತುಡು ಎಂ ಐ ಟಿ ಜಂಕ್ಷನ್ ಕೈತಲ್ ಪರ್ಕಳ-ಒಡಿಪು ರಾ.ಹೆ.169 ಡ್ ಮಣಿಪಾಲ ಪೊಲೀಸ್ ಠಾಣೆದ ಪೊಲೀಸ್ ಉಪನಿರೀಕ್ಷೆಕೆರ್ ರುಕ್ಮ ನಾಯ್ಕ್ ಗಾಡಿನ್ ತಪಾಸಣೆ ಮಲ್ತ್‌ದೆರ್. ಈ ಪೊರ್ತುಡು ಪರ್ಕಳರ್ದ್ ಮಣಿಪಾಲದಂಚಿ ಪೊವೊಂದಿತ್ತಿನ KA-31-4536 ಲಾರಿದ ಡ್ರೈವರ್ ಡೇನಿಲ್ ಅಂತೋನಿ ಪನ್ಪಿನಾರ್ ಹಳಿಯಾಳರ್ದ್ ಬೊಲ್ತೇರ್ ತಾಲೂಕ್‌ದ ಮಾರುತಿಪುರದ ಅರಿತ್ತ ಮಿಲ್‌ಗ್ ಒವ್ವೇ ದಾಖಲೆ ಇಜ್ಜಂದೆ 100 ಮೂಟೆ ಬಾರ್‌ನ್ ಕೊನವೊಂದಿತ್ತೆರ್. ಈ ಚೀಲನ್ ಮಣಿಪಾಲ ಠಾಣೆದ ಪೊಲೀಸೆರ್ ವಶಕ್ಕ್ ದೆತೊಂದೆರ್.