Sat. Nov 21st, 2026

ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News

ಫಾಝಿಲ್ ನ್ ಕೆರ್ತಿನ ಕೇಸ್: ಆರೋಪಿಗ್ ಜಾಮೀನ್ ಕೊರಿಯರೆ ನಿರಾಕರಿಸಿನ ಕೋರ್ಟ್

ಕುಡ್ಲ: ಸುರತ್ಕಲ್‌ ದ ಫಾಝಿಲ್ ಕೆರ್ತಿನ ಕೇಸ್ ದ ಆರೋಪಿಗ್ ಜಾಮೀನ್ ಕೊರ್ಯೆರೆ ಕುಡ್ಲದ ನಾಲ್ ನೇ ಜಿಲ್ಲೆ ಬೊಕ್ಕ ಸತ್ರ ಕೋರ್ಟ್ ನಿರಾಕರಣೆ ಮಲ್ದ್ಂಡ್.


ಈ ಬಗೆಟ್ ಅಜಿತ್ ಕ್ರಾಸ್ತಾ ಕೋರ್ಟ್ ಗ್ ಅರ್ಜಿ ಸಂದಾದಿತ್ತೆರ್. ಆಂಡ ಕೋರ್ಟ್ ಅರ್ಜಿನ್ ನಿರಾಕರಣೆ ಮಲ್ದ್ಂಡ್. ಮೇರ್ ಕೊಲೆ ಮಲ್ಪರೆ ಗಲಸಿನ ಕಾರ್ ದ ಮಾಲಕೆ. ಈ ಕೇಸ್ ದ ಏಳ್ ನೇ ಆರೋಪಿ.

ಬೊಲ್ತೇರ್: ಸರಕಾರಿ ಆಸ್ಪತ್ರೆಡ್ ಸರಿ ಆಯಿನ ಚಿಕಿತ್ಸೆ ಇಜ್ಜಿ ಪಂದ್ ದೂರು: ದಿಢೀರ್ ಭೇಟಿ ಕೊರ್ನ ತಹಶೀಲ್ದಾರ್

ಬೊಲ್ತೇರ್: ಬೊಲ್ತೇರ್ ತಾಲೂಕ್ ದ ಆಸ್ಪತ್ರೆಡ್ ರೋಗಿಲೆಗ್ ಸರಿಯಾಯಿನ ಚಿಕಿತ್ಸೆ ಕೊರೊಂದು ಇಜ್ಜೆರ್ ಪಂದ್ ಬೊಲ್ತೇರ್ ತಹಶೀಲ್ದಾರ್ ಕಚೇರಿಗ್ ದೂರು ಬತ್ತ್ ದ್ ಇತ್ತ್ಂಡ್. ಈ ಬಗೆಟ್ ಬೊಲ್ತೇರ್ ತಹಶೀಲ್ದಾರ್ ಪೃಥ್ವಿ ಸಾನಿಕಾಂ ಇನಿ ಆಸ್ಪತ್ರೆಗ್ ದಿಢೀರ್ ಭೇಟಿ ಕೊರ್ತೆರ್.

ಈ ಪೊರ್ತುಡು ಇನ್ ವಾಟರ್ ಸಮಸ್ಯೆ ಇಪ್ಪುನವು ಗೊತ್ತಾತ್ಂಡ್. ಬೊಕ್ಕ ವೈದ್ಯಾಧಿಕಾರಿ ಚಂದ್ರಕಾಂತ್ ಬೊಕ್ಕ ಸಿಬ್ಬಂದಿನ್ ಲೆತ್ತ್ ದ್, ನೆರ್ತೆರ್. ಅವ್ವತ್ತಂದೆ ಏಜೆನ್ಸಿಗ್ ಕೂಡ್ಲೆ ಪತ್ರ ಬರೆದ್ ಸಮಸ್ಯೆ ಸರಿ ಮಲ್ಪೆರೆ ಪಂತೆರ್.

ಈ ಪೊರ್ತುಡು ಮೇರೆನ ಟೀಮ್ ಬೊಕ್ಕ ಕಂದಾಯ ನಿರೀಕ್ಷಕೆರ್ ಪ್ರತೀಶ್ ಬೊಕ್ಕ ಚಾಲಕೆರ್ ಸಂತೋಷ್ ಒಟ್ಟಿಗೆ ಇತ್ತೆರ್.

ಹೆಲ್ಮೆಟ್ ಪಾಡಿಜೆರ್ ಪಂದ್ ಕಾರ್ ಡ್ರೈವರ್‌ ಗ್ ನೋಟಿಸ್ ಕಡಪಾಯಿನ ಟ್ರಾಫಿಕ್ ಪೊಲೀಸೆರ್…!

ಕೊಲ್ಲಂ: ಹೆಲ್ಮೆಟ್ ಪಾಡಂದಿನ ಕಾರ್ ಡ್ರೈವರ್ ಗ್ ಕೊಲ್ಲಂ ಟ್ರಾಫಿಕ್ ಪೊಲೀಸೆರ್ ನೋಟಿಸ್ ಕಡಪದೆರ್‌.


ಚಡಯಮಂಗಲಂ ಕೂರಿ ಮೂಲದ ಸಜೀವ್ ಕುಮಾರ್ ಮೇರೆಗ್ ಈ ನೋಟಿಸ್ ಬೈದ್ಂಡ್. ಮೇರ್ ಕರಿನ ಮೇ ತಿಂಗೊಲ್ ಡ್ ಹೆಲ್ಮೆಟ್ ಪಾಡಂದೆ ಗಾಡಿ ಕೊನೊತೆರ್ ಪಂದ್ ಸಂಚಾರಿ ಪೊಲೀಸೆರ್ ನೋಟಿಸ್ ಕಡಪಾದೆರ್. ಕೆಎಲ್ 24 ಎಂ 3474 ನಂಬರ್ ದ ಸಜೀವ್ ಕುಮಾರ್ ಮೇರೆನ ಸ್ವಿಫ್ಟ್ ಕಾರ್ ದ ಪುದರ್ ಡ್ ನೋಟಿಸ್ ಬೈದ್ಂಡ್. ದಂಡ ಪಾವತಿ ಮಲ್ಪೊಡು ಪಂದ್ ನೋಟಿಸ್‌ಡ್ ಉಂಡು. ನೆಕ್ ಸಜೀವ್ ಎಂಕ್ ಬೈಕ್ ಕೊನೊಯೆರೆ ಬರ್ಪುಜಿ ಪಂದ್ ಪಂತೆರ್. ಈ ಬಗೆಟ್ ಪ್ರತಿಕ್ರಿಯೆ ಕೊರ್ನ ಸಂಚಾರ ಪೊಲೀಸೆರ್, ಟೈಪಿಂಗ್ ಮಿಸ್ಟೇಕ್ ಆದಿಪ್ಪು, ಕಾರ್ ಡ್ ಸೀಟ್ ಬೆಲ್ಟ್ ಪಾಡಂದಿನ ಕಾರಣ ಸಜೀವ್ ಗ್ ನೋಟಿಸ್ ಕಡಪಾದೆರ್ ಪಂದ್ ಪಂಡೆರ್.

ಕಂಡಗ್ ಮರ್ದ್ ಬುಡೊಂದಿಪ್ಪುನಗ ಕರೆಂಟ್ ದ ಕೇಬಲ್ ತಾಗ್‌ದ್ ತೀರ್ ಪೋಯಿನ 3 ಜನ ಕೃಸಿಕೆರ್

ತಿರುಪತಿ: ಕಂಡಗ್ ಮರ್ದ್ ಪಾಡೊಂದಿಪ್ಪುನ ಪೊರ್ತುಡು ಕರೆಂಟ್ ತಾಗ್‌ದ್ ಮೂಜಿ ಬೆನ್ಪಿ ಬೆನ್ಪುನಕುಲು ಜಾಗೆಡೆ ತೀರ್ ಪೋಯಿನ ಘಟನೆ ಆಂಧ್ರಪ್ರದೇಶದ ಕಡಪಾ ಜಿಲ್ಲೆದ ಚಾಪಡು ಮಂಡಲ ಚಿಯ್ಯಪಡು ಪನ್ಪಿನಲ್ಪ ನಡತ್ಂಡ್.

ಪೆದ್ದಿರೆಡ್ಡಿ ಓಬಳ ರೆಡ್ಡಿ(65), ಬಾಲ ಓಬಳ ರೆಡ್ಡಿ (60).ಬಿ.ಮಲ್ಲಿಕಾರ್ಜುನ ರೆಡ್ಡಿ (23) ತೀರ್ ಪೋಯಿನಕುಲು ಪಂದ್ ಗುರ್ತಿಸಾದೆರ್. ಕಂಡಗ್ ಮರ್ದ್ ಬುಡೊಂದಿಪ್ಪುನಗ ಒರಿ ತಿರ್ತ್‌ಡ್ ನೇಲೊಂದಿತ್ತಿನ ಕರೆಂಟ್ ಕೇಬಲ್ ತಾಗ್‌ದ್ಂಡ್. ಉಂದೆನ್ ತೂದು ನನ ರಡ್ಡ್ ಜನ ಆಯೆನ್ ಬುಡ್ಪಾವರೆ ಪೋಯರೆ. ಅಕುಲೆಗ್ಲ ಕರೆಂಟ್ ತಾಗ್‌ದ್ ಮೂಜಿ ಜನ ಜಾಗೆಡೇ ತೀರ್ ಪೋತೆರ್ ಪಂದ್ ಪೊಲೀಸೆರ್ ಮಾಹಿತಿ ಕೊರ್ತೆರ್.

ರೈಲ್ ದ ಪಟ್ಟೆಡ್ ಜೈದಿನಾರೆನ್ ಲೆತೊಂದು ಪೋಯಿನ ಪೊಲೀಸೆರ್

ಪುತ್ತೂರ್ : ಮುರಾ ಪನ್ಪಿನ ಜಾಗೆಡ್ ರೈಲ್ ದ ಪಟ್ಟೆಡ್ ಜೈದಿನ ಪಡ್ಡೆಯೂರು ನಿವಾಸಿ, ದಿನೇಶ್ ಪನ್ಪಿನಾರೆನ್ ರೈಲ್ವೆ ಪೊಲೀಸೆರ್ ಲೆತೊಂದು ಪೋದು ದಂಡ ಪಾಡ್ದ್, ಕೋರ್ಟ್ ಗು ಹಾಜರ್ ಮಲ್ದೆರ್.


ಕೂಲಿ ಕೆಲಸ ಮಲ್ತೊಂದು ಇತ್ತಿನ ಮೇರ್ ರಾತ್ರೆ ರೈಲ್ ಪಟ್ಟೆದ ಮಿತ್ತ್ ಜೆತ್ತ್ ದಿತ್ತೆರ್. ಈ ಪೊರ್ತುಡು ರೈಲ್ ಬೈದ್ಂಡ್. ರೈಲ್ ದ ಶಬ್ದ ಕೇನ್ದ್ ಕೈತಲಿತ್ತಿನಕುಲು ದಿನೇಶ್ ನ್ ಲಕ್ಕಾದೆರ್.
ಈ ಘಟನೆ ಸಾಮಾಜಿಕ ಜಾಲತಾಣಡ್ ವೈರಲ್ ಆತ್ಂಡ್. ನೆನ್ ಸಾಮಾಜಿಕ ಕಾರ್ಯಕರ್ತೆರ್ ಒರಿ ರೈಲ್ವೆ ಸೇವಾ ಕೇಂದ್ರಗ್ ಟ್ವೀಟ್ ಮಲ್ದೆರ್.

ಜಗತ್ತ್ ದ ಮಾಮಲ್ಲ ಶಿವ ಮೂರ್ತಿ ಇನಿ ಉದಿಪನ

ರಾಜಸ್ಥಾನ : ಜಗತ್ತ್ ಡೇ ಅತಿ ಎತ್ತರದ ಶಿವನ ಮೂರ್ತಿ “ವಿಶ್ವಾಸ ಸ್ವರೂಪಂ’ ಇನಿ ಉದಿಪನ ಆವರೆ ಉಂಡು.

ರಾಜಸ್ಥಾನದ ರಾಜಸ್‌ಮಂಡ್‌ ಜಿಲ್ಲೆದ ನಾಥ್‌ದ್ವಾರ ಪೇಂಟೆಡ್ ಈ ಪ್ರತಿಮೆ ಸ್ಥಾಪನೆ ಆತ್ಂಡ್. ಆಧ್ಯಾತ್ಮಿಕ ನಾಯಕೆರ್ ಮೊರಾರಿ ಬಾಪು ಈ ಮೂರ್ತಿನ್ ಲೋಕಾರ್ಪಣೆ ಮಲ್ಪೆರೆ ಉಲ್ಲೆರ್. ಈ ಪೊರ್ತುಡು ಸಿಎಂ ಅಶೋಕ್‌ ಗೆಹ್ಲೋಟ್‌, ಸ್ಪೀಕರ್‌ ಸಿ.ಪಿ. ಜೋಷಿ ಪಾಲ್ ಪಡೆಯೆರೆ ಉಲ್ಲೆರ್. ಉದಯಪುರರ್ದ್ 45 ಕಿ.ಮೀ. ದೂರಡ್ ಧ್ಯಾನ ಮಲ್ಪುನ ಶಿವನ ಪ್ರತಿಮೆ ನಿರ್ಮಾಣ ಆತ್ಂಡ್. ಈ ಪ್ರತಿಮೆ ಲೋಕಾರ್ಪಣೆ ಆಯಿನ ಬೊಕ್ಕ ಅ. 29 ರ್ದ್ ನ. 6 ಮುಟ್ಟ 9 ದಿನ ಸರಣಿ ಧಾರ್ಮಿಕ, ಆಧ್ಯಾತ್ಮಿಕ ಬೊಕ್ಕ ಸಾಂಸ್ಕೃತಿಕ ಲೇಸ್ ನಡಪುಂಡು. 250 ವರ್ಷ ಬಾಳಿಕೆ ಬರ್ಪುಲೆಕ್ಕ ಬೊಕ್ಕ ಗಂಟೆಗ್ 250 ಕಿ.ಮೀ. ಬೀಸ್ ಡ್ ಗಾಳಿ ಬೀಜಿಂಡಲ ತಡೆಪುನ ಸಾಮರ್ಥ್ಯ ಇಪ್ಪುನ ಪ್ರತಿಮೆ ಉಂದು.ಈ ಪ್ರತಿಮೆದ ಎತ್ತರ- 369 ಅಡಿ ಪ್ರತಿಮೆ ತೂಕ – 30,000 ಟನ್‌ ಬಳಕೆ ಆಯಿನ ಕರ್ಬ – 3000 ಟನ್‌ ಗಲಸಿನ ಕಾಂಕ್ರೀಟ್‌- 2.5 ಲಕ್ಷ ಕ್ಯೂಬಿಕ್‌ ಟನ್‌, ಈ ಮೂರ್ತಿ 20 ಕಿ.ಮೀ. ದೂರೊಗುಲ ತೋಜುಂಡು. ನೆತ್ತ ಬೇಲೆಗ್ 10 ವರ್ಷ ದೆತೊಂದುಂಡು.

ಐಲೇಸಾ ಪದ ಪಂತೊಡು ಪ್ರಕಾಶ್ ಪಾವಂಜೆ, ಶೃದ್ಧಾ ಬಂಗೇರ ಮೊಕ್ಲೆಗ್ ಪ್ರಶಸ್ತಿ

ಐಲೇಸಾ ರಡ್ಡನೇ ಪುಟ್ಟು ಪರ್ಬದ ಲೆಕ್ಕೊಡು ನಡತಿನ ಐಲೇಸಾ ಪದ ಪಂತಡ್ ಬೊಂಬೈದ ಶ್ರದ್ಧಾ ಬಂಗೇರಾ ಬೊಕ್ಕ ಬೆಂಗ್ಲೂರ್ ದ ಪ್ರಕಾಶ್ ಪಾವಂಜೆ ಪತ್ತ್ ಸಾವಿರ ನಗದ್ ಬೊಕ್ಕ ಐಲೇಸಾ ಐಸಿರಿ ಬೊಕ್ಕ ಐಲೇಸಾ ಐಸಿರ ಗೌರವಗ್ ಆಯ್ಕೆ ಆತೆರ್.

ಮೊಕ್ಲೆನ್ ಕನ್ನಡ ಸಿನಿಮಾದ ಪುಗರ್ತೆದ ಗೀತೆ ರಚನೆಕಾರೆರ್ ಕೆ. ಕಲ್ಯಾಣ್ ಬೊಂಬೈದ ಸಂಗೀತ ದಿಗ್ಗಜೆರ್ ಪದ್ಮನಾಭ ಸಸಿಹಿತ್ಲು ಬೊಕ್ಕ ರಂಗನಟೆ ಅವಿನಾಶ್ ಕಾಮತ್, ಕುಡ್ಲದ ಖ್ಯಾತ ಸಂಗೀತಗಾರೆ ಬೊಕ್ಕ ಪ್ರೋತ್ಸಾಹಕೆರ್ ಸದಾಶಿವ ದಾಸ್ ಪಾಂಡೇಶ್ವರ್, ದುಬೈದ ಗಾಯಕೆರ್ ನವೀದ್ ಮಾಗುಂಡಿ ಆಯ್ಕೆ ಮಲ್ದೆರ್.

ಇಸೇಸ ಸ್ವರ ಬೊಕ್ಕ ಪ್ರಸ್ತುತಿಗಾದ್ ಹುಬ್ಬಳಿದ ಕನ್ನಡ ಗಾಯಕಿ ಡಾ. ರಂಜನಾ ರಾನಡೆ ಬೊಕ್ಕ ತಮಿಳುನಾಡ್ ದ ಡಾ. ಪಲ್ಲವಿ ಶ್ಯಾಮ್ ಸುಂದರ್ ಮೊಕಲೆನ್ ಐಲೇಸಾ ಇಸೇಸ ಗಾಯಕಿ ಪಂದ್ ಆಯ್ಕೆ ಮಲ್ದೆರ್. ಬೊಕ್ಕ ಸೋಕುಡು ಪದ್ಯ ಪಂಡಿನ 12 ಗಾಯಕ ಗಾಯಕಿರೆನ್ ಶ್ರೀನಿವಾಸ್ ಅಂಗರಕೋಡಿ ಬೆಂಗ್ಲೂರ್, ಶೀಲಾ ಪಡೀಲ್, ಪೂರ್ಣಿಮಾ ಬಂಟ್ವಾಳ, ಪ್ರತೀಕ್ ರವೀಂದ್ರ ಜತ್ತನ್ ಪೂನ, ಜಯಲಕ್ಷ್ಮಿ ಪ್ರಸಾದ್ ಶೆಟ್ಟಿ ಬೊಂಬೈ, ಶ್ವೇತಾ ಹೆಬ್ಬಾರ್ ಕುಂಬ್ಳೆ, ಗ್ರೀಶ್ಮಾ ಕಟೀಲ್, ಅಕ್ಷತಾ ಪ್ರವೀಣ್ ಶೆಟ್ಟಿ ಸಿಡ್ನಿ, ಕೀರ್ತಿ ಹರೀಶ್ ಶೆಟ್ಟಿ ಥಾಣೆ ಬೊಂಬೈ, ಶ್ರೀವಲ್ಲಿ ರೈ ಮಾರ್ಟೆಲ್, ಫ್ಲೋರಿಡಾ, ಸುಜಾತ ರೈ ಬದಿಯಡ್ಕ, ಸನತ್ ಕೆ ಎಂ ಮೊಕುಲೆನ್ ಐಲೇಸಾದ ಭವಿಷ್ಯದ ಪದ್ಯಪನ್ಪುನಕುಲು ಪಂದ್ ಆಯ್ಕೆ ಮಲ್ತೆರ್.

ನನದ ಐಲೇಸಾದ ಪದ್ಯಲೆನ್ ಮೊಕುಲೆನ ಸ್ವರಟ್ ಪನ್ಪಯೆರೆ ಐಲೇಸಾ ದುಂಬಾತ್ಂಡ್. ಬಿನ್ನೆರಾದ್ ಕೆ.ಕಲ್ಯಾಣ್ ಪಾತೆರ್ದ್ ಆಯ್ಕೆ ಪನ್ಪುನವು ಒಂಜಿ ಪ್ರಕ್ರಿಯೆ ಆತೆ, ತುಳು ಭಾಷೆ ಬರಂದೆ ಇಪ್ಪುನೆರ್ದಾವರ ಮೊಕುಲೆನ ಸ್ವರತ ಬಗೆಟ್ ಮನಸ್ ದೀದ್ ಕೇನಿಯೆರೆ ಸಾಧ್ಯ ಆಂಡ್. ಮಾತೆರ್ಲಾ ಸಂಗೀತನ್ ಮೋಕೆಡ್ ಪಂಡೆರ್. ಅಂಚಾದ್ ಮಾತ 14 ಜನಕುಲ ಭವಿಷ್ಯದ ಪದ್ಯಗಾರೆರಾದ್ ಆಪೆರ್. ಬೊಕ್ಕ ನಮ್ಮ ನನದ ಯೋಜನೆಲೆಡ್ ಮೊಕಲೆನ ಸ್ವರ ನಮ್ಮ ಗಮನಡ್ ಇಪ್ಪುಂಡು ಪಂದ್ ಬೆರಿ ಬೊಟ್ಟಿಯೆರ್.

ಮಲ್ಲ ಸಂಗೀತ ನಿರ್ದೇಶೆಕೆರ್ ಪದ್ಮನಾಭ ಸಸಿಹಿತ್ಲು ಪಾತೆರ್ದ್ ಸಂಗೀತ ನಮ್ಮ ಮಾತ ಬೇನೆನ್ಲಾ ಮದಪಾವುನ ಮರ್ದ್, ಅವು ಜೀವನನ್ ಸರಾಗ ಮಲ್ಪುಂಡು. ಎನ್ನ ಶಿಷ್ಯೆರ್ ಸುಮಾರ್ ಜನ ಈ ಕೂಟಡ್ ಪಾಲ್ ಪಡೆನವು ಎಂಕ್ ಖುಷಿ ಆತ್ಂಡ್. ಎನ್ನ ಕೂಟದ ಒರಿ ತೀರ್ಪುಗಾರೆ ಪನ್ಪುನವು ಅಕೆರಿ ಮುಟ್ಟಲ ಗೌಪ್ಯವಾದೆ ದೀದಿತ್ತೆ. ಕೂಟಡ್ ಗೆಂದುನೆರ್ದ್ ಪಾಲ್ ಪಡೆಪುನೆಕ್ ಅಕುಲೆಗ್ ಅಭಿನಂದನೆಲು, ನನದ ಇಂಚಿನ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆವೊಡು ಪಂದ್ ಪಂಡೆರ್.

ರಂಗ ಭೂಮಿ ನಟೆ ಅವಿನಾಶ್ ಕಾಮತ್ ಪಾತೆರ್ದ್, ನಿರಂತರ ಸಂಗೀತದ ಸಂಪರ್ಕ ಇಪ್ಪುನೆರ್ದಾವರ ಎನನ್ ಬಹುಶಃ ತೀರ್ಪುಗಾರೆರಾದ್ ಆಯ್ಕೆ ಮಲ್ತ್ ದ್ ಇಪ್ಪೊಡು. ಸಂಗೀತ ಬದ್ ಕ್ ಗ್ ಒಂಜಿ ಲಯ ಕೊರ್ಪುಂಡು. ಅಂಚಾದ್ ಸಂಗೀತ ಕಲ್ಪುನ ಅವಕಾಶನ್ ಏಪಲ ಕಳೆವೊನೊರ್ಚಿ ಪಂದ್, ತನ್ನ ಬಾಲ್ಯದ ನೆಂಪುಡು ನಾಸಿರುದ್ದೀನ್ ಷಾ ಬೊಕ್ಕ ಓಂಪುರಿ ಮೊಕುಲು ಸಂಗೀತ ಕಲ್ಪಾದಿನೆನ್ ಕಲ್ಪಂದೆ ದುಂಬುದ ಪಶ್ಚತ್ತಾಪನ್ ತನ್ನ ಅಪ್ಪಡ ಪಂಡಿನೆನ್ ನೆಂಪು ಮಲ್ತೆರ್.

ಕುಡ್ಲದ ದಾಸ್ ಇವೆಂಟ್ಸ್ ನೆತ್ತ ಸ್ಥಾಪಕೆರ್ ಸದಾಶಿವ ದಾಸ್ ಪಾತೆರ್ದ್, ಐಲೇಸಾ ಕ್ರಿಯಾತ್ಮಕ ಕೂಟ. ಆಯಿತ ಒಟ್ಟಿಗೆ ಇಪ್ಪುನ ಒಡನಾಟ ಪೊಸತ್ ದಕುಲೆಗ್ ದಾರಿದೀಪ ಅಪುನೆಟ್ಟ್ ಸಂಶಯ ಇಜ್ಜಿ. ನಮ್ಮ ಕಾಲಡ್ ಇಂಚಿನ ವೇದಿಕೆಲು ಇಜ್ಜಂಡ್, ದುಡ್ಡುದಂಚಿ ತೂವಂದೆ ಎಂಕುಲು ಸಂತೃಪ್ತಿಗೋಸ್ಕರ ಸಂಗೀತ ಕ್ಷೇತ್ರಡ್ ಸೇರೊಂಡ, ಐಲೇಸಾದ ಪದ್ಯಲು ಪದ್ಯ ಪನ್ಪುನಕುಲೆಗ್ ಅನುಕೂಲ ಅಪುನಂಚಿನ ಪದ್ಯಲು ಉಂಡು. ರಾಗ ಬೊಕ್ಕ ತಾಳಲೆನ್ ಪೊಪ್ಪ ಅಮ್ಮಲೆಕ್ಕ ಮೋಕೆ ಮಲ್ಪಿ, ಮಾತೆರ್ಲಾ ಈ ಪದ್ಯಲೆನ್ ಖುಷಿರ್ದ್ ಕೇನ್ದ್ ಉಪಯೋಗ ಮಲ್ತೊನೊಡು ಪಂದ್ ಪಂಡೆರ್. ದುಬೈದ ಸಂಗೀತ ಕಲಾವಿದೆರ್ ನವೀದ್ ಮಾಗುಂಡಿ ಪಾತೆರ್ದ್, ಐಲೇಸಾದ ಪದ್ಯಲೆನ್ ಬೇತೆ ಬೇತೆ ಸ್ವರಟ್ ಕೇನ್ನಾಗ ಇಸೇಸವಾದ್ ಕೇನ್ಡ್. ಹೃದಯರ್ದ್ ಕೇನ್ದ್ ಎಂಕುಲೆನ ಅಭಿಪ್ರಾಯ ತೆರಿಪಾದ ಮಾತೆರೆಗ್ಲಾ ಎಡ್ಡೆ ಅವಡ್ ಪಂದ್ ಪಂಡೆರ್. ಈ ಲೇಸ್ ಡ್ ನೈಜಿರೀಯಾದ ಶರತ್ರ ಪಡುಪಳ್ಳಿ ಪ್ರಾರ್ಥನೆ ಮಲ್ತೆರ್. ವಿವೇಕ್ ಮಂಡಕರೆ ಐಲೇಸಾದ ಈ ಸರ್ತಿದ ಲೇಸ್ ದ ಬಗೆಟ್ ಪ್ರಸ್ತಾಪನೆ ಮಲ್ತೆರ್, ಸುಧಾಕರ್ ಐಲೇಸಾದ ರೂವಾರಿ ದಿವಂಗತ ವಿದ್ಯಾರಣ್ಯ ಮೇರೆನ್ ನೆಂಪು ಮಲ್ತೆರ್. ಸುರೇಂದ್ರ ಮಾರ್ನಾಡ್ ಸ್ಪರ್ಧಿಲೆನ ಉತ್ಸಾಹಗ್ ಅಭಿನಂದನೆ ಬೊಕ್ಕ ಕೃತಜ್ಞತೆ ಸಂದಾಯೆರ್. ತೀರ್ಪುಗಾರರೆನ ಪರಿಚಯ ಸಾಧನೆನ್ ತುಳು-ಕನ್ನಡ ಕವಿ ಶಾಂತರಾಮ ಶೆಟ್ಟಿ ನಡಪಾದ್ ಕೊರ್ಯೆರ್. ಲೇಸ್ ಡ್ ಸುಬ್ರಾಯ ಚೊಕ್ಕಾಡಿ ಮೇರ್ ವಯೋಸಮ್ಮಾನ್ ಗೌರವದ ತುಣುಕುಲೆನ್ ಪ್ರದರ್ಶನ ಮಲ್ತೆರ್. ರಮೇಶ್ಚಂದ್ರ, ನವೀದ್ ಕಲ್ಯಾಣ್ ಮೊಕುಲೆನ ರಚನೆಲೆನ್ ಪದ್ಯ ಪಂಡೆರ್. ಶಿವುಸಾಲಿಯಾನ್ ನಿರೂಪಣೆ ಮಲ್ತೆರ್. ವಿಶ್ವನಾಥ್ ಪಳ್ಳಿ ಸೊಲ್ಮೆ ಸಂದಾಯೆರ್. ಗೋಪಾಲ್ ಪಟ್ಟೆ ತಾಂತ್ರಿಕ ನಿರ್ವಹಣೆ ಮಲ್ತೆರ್. ಈ ಪೊರ್ತುಡು ಕತಾರ್ ದ ರವಿ ಶೆಟ್ಟಿ, ಅಬುದಾಬಿದ ಸರ್ವೋತ್ತಮ ಶೆಟ್ಟಿ ಬೊಂಬೈ ಯೂನಿವರ್ಸಟಿದ ಡಾ. ಪೂರ್ಣಿಮಾ ಶೆಟ್ಟಿ, ಸೌದಿ ಅರೇಬಿಯಾದ ನರೇಂದ್ರ ಶೆಟ್ಟಿ, ರಮೇಶ್ ಕಿದಿಯೂರು, ಆಟ-ಅಮೇರಿಕಾದ ಭಾಸ್ಕರ ಶೇರಿಗಾರ್ ಇತ್ತೆರ್.

ಕಾಸ್ರೋಡ್: ತುಂಡಾದ್ ಬೂರ್ಂಡ್ ಕಟೊಂದಿತ್ತಿನ ಸಂಕ: ಬೇಲೆದಾಯಗ್ ಒರಿಯಗ್ ಮಲ್ಲ ಪೆಟ್ಟ್

ಕಾಸ್ರೋಡ್: ರಾಷ್ಟ್ರೀಯ ಹೆದ್ದಾರಿ ಅಭಿವೃದ್ದಿ ಬಗೆಟ್ ನಿರ್ಮಾಣ ಆವೊಂದಿತ್ತಿನ ಸಂಕದ ಕಾಂಕ್ರೀಟ್ ತುಂಡಾದ್ ಬೂರಿನ ಘಟನೆ ಕಾಸ್ರೋಡ್‌ದ ಪೆರಿಯಡ್ ಇನಿ ಕಾಂಡೆ ನಡತ್ಂಡ್.

ಪೆರಿಯ ಪೇಂಟೆದ ಕೈತಲ್ ನಿರ್ಮಾಣ ಆವೊಂದಿತ್ತಿನ ಸಂಕದ ಕಾಂಕ್ರೀಟ್ ಬೂರ್ದಿತ್ತ್‌ದ್ ಒರಿ ಬೇಲೆದಾರೆಗ್ ಪೆಟ್ಟಾತ್ಂಡ್. ಈ ಪೊರ್ತುಡು ಆ ಜಾಗೆಡ್ 5 ಕಾರ್ಮಿಕೆರ್ ಇತ್ತೆರ್. ರಾತ್ರೆದ ಪೊರ್ತುಡುಲ ಈ ಸಂಕದ ಬೇಲೆ ನಡತೊಂದು ಇತ್ತ್ಂಡ್. ಬೇಲೆ 4 ಜನ ಅಪಾಯರ್ದ್ ಬಚಾವ್ ಆತೆರ್.

ಕೋಲಾರಡ್ ಮೆದುಳು ಜ್ವರ ಪತ್ತೆ : ಆರೋಗ್ಯ ಇಲಾಖೆರ್ದ್ ಅಲರ್ಟ

ಕೋಲಾರ ಜಿಲ್ಲೆದ ತೊಟ್ಲಿ ಗ್ರಾಮಡ್ ಮೆದುಳು ಜ್ವರ ಪ್ರಕರಣ ಪತ್ತೆಯಾತ್ಂಡ್. ಅಂಚಾದ್ ಆರೋಗ್ಯ ಇಲಾಖೆರ್ದ್ ಅಲರ್ಟ್ ಘೋಷಣೆ ಮಲ್ತ್‌ದೆರ್.

ಉಂದೊಂಜಿ ಸಾಂಕ್ರಾಮಿಕ ರೋಗವಾಯಿನ ಬಗೆಟ್ ಜನಕ್ಲೆಡ ಪೋಡಿಗೆ ಎಚ್ಚಾತ್ಂಡ್. ಜ್ವರ, ತರೆಬೇನೆ, ಚರ್ಮಡ್ ಗುಳ್ಳೆಲು, ಬಡವು ಇಜ್ಜಂದೆ ಇಪ್ಪುನವ್, ಚಳಿ, ಬೊಲ್ಪುಗು ಕಣ್ಣ್ ಬುಡ್ಪಾಯರೆ ಆವಂದಿನವ್ ಉಂದೆತ್ತ ಲಕ್ಷಣ ಆದುಂಡು.

ಸರ್ಕಾರಿ ವೈದ್ಯೆರೆಗ್ 3 ಸರ್ತಿ ಬಯೋ ಮೆಟ್ರಿಕ್ ಹಾಜರಿ ಕಡ್ಡಾಯ; ಸುಧಾಕರ್

ಮೈಸೂರ್: ಸರ್ಕಾರಿ ವೈದ್ಯೆರ್ ಅಕ್ಲೆನ ಬೇಲೆದ ಪೊರ್ತುಡು ಖಾಸಗಿ ಆಸ್ಪತ್ರೆ ಅತ್ತ್ಂಡ ಕ್ಲಿನಿಕ್ ಲೆಡ್ ಬೇಲೆ ಮಲ್ತೊಂದು ಉಲ್ಲೆರ್. ಅಂಚಿತ್ನಕ್ಲೆನ ವಿರುದ್ಧ ಸರಿಯಾಯಿನ ಕ್ರಮ ದೆತೊನ್ಯರೆ ಉಂಡು ಅಂಚನೆ ಬಯೋಮೆಟ್ರಿಕ್ ಹಾಜರಿದ ಪದ್ದತಿನ್ ಜಾರಿ ಮಲ್ಪರೆ ನಿರ್ಧಾರ ಮಲ್ತ್‌ದ ಪಂದ್ ಆರೋಗ್ಯ ಸಚಿವೆರ್ ಡಾ.ಕೆ. ಸುಧಾಕರ್ ಪಂಡೆರ್.

 

ಸುದ್ದಿಗಾರೆರ್‍ನೊಟ್ಟುಗು ಪಾತೆರ್ದಿನ ಆರ್, ವೈದ್ಯೆರ್ ನಕುಲು ಅಕ್ಲೆನ ಬೇಲೆದ ಪೊರ್ತುಡು ಖಾಸಗಿ ಕ್ಲಿನಿಕ್‌ಡ್ ಬೇಲೆ ಮಲ್ತೊಂದಿಪ್ಪುನ ದೂರು ಕೇಂದ್ ಬೈದ್ಂಡ್ ಉಂದೆನ್ ಉಂತಾಯರೆ ಕಾಂಡೆ, ಮಧ್ಯಾಹ್ನ ಬೊಕ್ಕ ಬಯ್ಯ ಮೂಜಿ ಸರ್ತಿ ಬಯೋಮೆಟ್ರಿಕ್ ಹಾಜರಿ ಪಾಡುನವ್ ಕಡ್ಡಾಯ ಪಂದ್ ಪಂಡೆರ್.

You Missed