Sat. Nov 21st, 2026

ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News

ಜಗತ್ತ್‌ಡೇ ಬೇಲೆ ಕೊರ್ಪಿನ ಮಾಮಲ್ಲ ಸಂಸ್ಥೆ ಭಾರತದ ರಕ್ಷಣಾ ಸಚಿವಾಲಯ

ಜಗತ್ತ್‌ಡೇ ಮಲ್ಲ ಮಟ್ಟ್‌ಡ್ ಬೇಲೆ ಕೊರ್ಪಿನ ಸಂಸ್ಥೆ ಭಾರತದ ರಕ್ಷಣಾ ಸಚಿವಾಲಯ. ಬೇತೆ ಒವ್ವೆ ಐಟಿ ಕಂಪೆನಿ ಅತ್ತ್. ಭಾರತದ ರಕ್ಷಣಾ ಸಚಿವಾಲಯ 2.92 ಮಿಲಿಯನ್ ಜನಕ್ಲೆಗ್ ಬೇಲೆ ಕೊರ್ಪಿನ ಸಂಸ್ಥೆಯಾದ್ ಮಲ್ಲ ತಾನೊಡ್ ಉಂಡು ಪಂದ್ ಜರ್ಮನ್ ಮೂಲದ ಸ್ಟ್ಯಾಟಿಸ್ಟಾ ಕಂಪೆನಿ ವರದಿ ಮಲ್ತ್‌ದ್ಂಡ್.

ನನ ಯುಎಸ್ ಡಿಪಾರ್ಟ್ಮೆಂಟ್ ಆಫ್ ಡಿಫೆನ್ಸ್ 2.91 ಮಿಲಿಯನ್, ಚೀನಾ ಲಿಬರೇಶನ್ ಆರ್ಮಿ 2.55 ಮಿಲಿಯನ್, ವಲ್ಮಾರ್ಟ್ 2.30 ಮಿಲಿಯನ್ ಬೊಕ್ಕ ಅಮೆಜಾನ್ 1.61 ಮಿಲಿಯನ್ ತಾನೊಡ್ ಉಂಡು.

ಅ.30 : ಯುವವಾಹಿನಿ(ರಿ) ಬಂಟ್ವಾಳ ತಾಲೂಕ್ ಘಟಕದ ಮುತಾಲಿಕೆಡ್ ಪೊಳಲಿ ಶ್ರೀ ರಾಜರಾಜೇಶ್ವರಿ ಕ್ಷೇತ್ರಗ್ ಪಾದಯಾತ್ರೆ

ದ.ಕ. ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ಪಡೆತಿನ ಯುವವಾಹಿನಿ(ರಿ.)ದ ಬಂಟ್ವಾಳ ತಾಲೂಕ್ ಘಟಕದ ಮುತಾಲಿಕೆಡ್ ಪೊಳಲಿ ಶ್ರೀ ರಾಜರಾಜೇಶ್ವರಿ ಕ್ಷೇತ್ರಗ್ ಪಾದಯಾತ್ರೆ ಅ.30 ಐತಾರದಾನಿ ಬೊಲ್ಪುಗು 5 ಗಂಟೆಗ್ ಬಿ.ಸಿ ರೋಡ್ ಬ್ರಹ್ಮಶ್ರೀ ನಾರಾಯಣ ಗುರು ವೃತ್ತರ್ದ್ ಪಿದಡರೆ ಉಂಡು.

ಈ ಲೇಸ್ ಡ್ ಸಮಸ್ತ ಹಿಂದೂ ಸಮಾಜ ಬಾಂಧವೆರ್ ಹೆಚ್ಚಿನ ಸಂಖ್ಯೆಡ್ ಸೇರ್ದ್ ಶ್ರೀ ದೇವಿನ ಕೃಪೆಗ್ ಪಾತ್ರರಾವೋಡು ಪಂದ್ ಯುವವಾಹಿನಿ(ರಿ.) ಬಂಟ್ವಾಳ ಅಧ್ಯಕ್ಷೆರ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಏಳ್ ತಿಂಗೊಲ್ ಅಕಲ್ ದಾಂತೆ ಇತ್ತಿನ ಪೊಂಜೊವು ಪೊಣ್ಣು ಬಾಲೆ ಪೆದ್ದಿಯೆರ್ !!

ಕಮ್ಮಿಡ್ಲ 7 ತಿಂಗೊಲ್ ಮುಟ್ಟ ಕೋಮಾ ಸ್ಥಿತಿಟ್ಟ್ ಇತ್ತಿನ ಬಂಜಿನಾರ್ ಒರ್ತಿ ಪೊಣ್ಣು ಬಾಲೆನ್ ಪೆದ್ದಿನ ಘಟನೆ ಉತ್ತರ ಪ್ರದೇಶದ ಬುಲಂದ್ ಶೆಹರ್‌ಡ್ ನಡತ್ಂಡ್.

ಮಾರ್ಚ್ 31 ಕ್ಕ್ ಕಂಡನಿನೊಟ್ಟುಗ್ ಬೈಕ್‌ಡ್ ಪೋವೊಂದಿಪ್ಪುನಗ ತಿರ್ತ್ ಬೂರ್ದ್ ತರೆಕ್ಕ್ ಮಸ್ತ್ ಪೆಟ್ಟಾದ್ ಅಕಲ್ ದಾಂತೆ ಇತ್ತೆರ್. ಅಪಗ ಆರ್ 2 ತಿಂಗೊಲ್‌ದ ಬಂಜಿನಾಲ್ ಆದಿತ್ತೆರ್. ಇಂಚಾದ್ ಇಲ್ಲದಕುಲು ಏಮ್ಸ್‌ಡ್ 7 ತಿಂಗೊಲ್‌ದ ಕಾಲ ಚಿಕಿತ್ಸೆ ಕೊರ್ದು ಬಾಲೆನ್ ಒರಿಪಾದೆರ್. ಪೊಣ್ಣು ಬಾಲೆನ್ ಪೆದಿ ಬೊಕ್ಕಲ ಆರ್ ಕೋಮಾಡೇ ಉಲ್ಲೆರ್.

ಥಾಣೆಡ್ ಇನಿ ಯಕ್ಷಗುರು ಅಜೆಕಾರು ಬಾಲಕೃಷ್ಣ ಶೆಟ್ರೆನ ನಿರ್ದೇಶನಡ್ ಆದಿಶಕ್ತಿ ವಿಜಯ ಯಕ್ಷಗಾನ ಬಯಲಾಟ

ಥಾಣೆ : ಅಜೆಕಾರ್ ಕಲಾಭಿಮಾನಿ ಬಳಗ (ರಿ.) ಬೊಂಬೈದ ಸದಸ್ಯೆರೆರ್ದ್ ಯಕ್ಷಗುರು ಅಜೆಕಾರು ಬಾಲಕೃಷ್ಣ ಶೆಟ್ರ್ ನ ನಿರ್ದೇಶನಡ್ ಆದಿಶಕ್ತಿ ವಿಜಯ ಯಕ್ಷಗಾನ ಬಯಲಾಟ ಅ.29 ಶನಿಯಾರ 2:30 ಗು ಥಾಣೆ ನವೋದಯ ಜೂನಿಯರ್ ಕಾಲೇಜ್ ದ ಚಾವಡಿಡ್ ನಡಪರೆ ಉಂಡು.


ಭಾಗವತೆರಾದ್ ದೇವಿಪ್ರಸಾದ್ ಆಳ್ವ ತಲಪಾಡಿ ಬೊಕ್ಕ ಹರೀಶ್ ಶೆಟ್ಟಿ ಕಟೀಲ್, ಮದ್ದಳೆಡ್ ಆನಂದ ಶೆಟ್ಟಿ ಇನ್ನ ಬೊಕ್ಕ ಹರೀಶ್ ಸಾಲ್ಯಾನ್, ಚೆಂಡೆಡ್ ಪ್ರಶಾಂತ್ ಶೆಟ್ಟಿ ವಗೆನಾಡು ಅಂಚೆನೆ ಪಾತ್ರಧಾರಿಲಾದ್ ರೇಷ್ಮ ಶೆಟ್ಟಿ, ಸುಜಲಾ ಶೆಟ್ಟಿ, ಸತೀಶ್ ಶೆಟ್ಟಿ ಕೊಟ್ರಪಾಡಿ, ಅವಕಾಶ್ ಜೈನ್, ಶ್ರುತಿ ಪೂಜಾರಿ, ಕವಿತ ಕುಂದರ್, ಕೃತಿಕ ಶೆಟ್ಟಿ, ಶ್ರೇಯ ಪೂಜಾರಿ, ತನಿಶ್ಕಾ ಶೆಟ್ಟಿ, ರಾಜೇಶ್ ಮೊಯಿಲಿ,ಗೀತಾ ಪೂಜಾರಿ, ಬಾಲಕೃಷ್ಣ ಸುವರ್ಣ, ಅಮಿತ್ ಪೂಜಾರಿ, ಶ್ರೇಯಸ್ ಜೈನ್, ರಮ್ಯ ಪೂಜಾರಿ, ಶ್ರಾವ್ಯ ಶೆಟ್ಟಿ ಉಲ್ಲೆರ್.
ಈ ಪೊರ್ತುಡು ರಾಜು ಶೆಟ್ಟಿ ಮೇರ್ ಬರೆತಿನ ಶ್ರೀ ಶನೀಶ್ವರ ಮಹಾತ್ಮೆ ಗ್ರಂಥನ್ ಗಣ್ಯೆರ್ ಬುಡುಗಡೆ ಮಲ್ಪೆರೆ ಉಲ್ಲೆರ್. ಬೊಕ್ಕ ಅಜೆಕಾರ್ ಕಲಾಭಿಮಾನಿ ಬಳಗದ ಸದಸ್ಯೆರ್, ಯಕ್ಷಗಾನ, ನೃತ್ಯ ಕಲಾವಿದೆ ಶ್ರುತಿ ಪೂಜಾರಿ ಮೇರೆಗ್ ಗಣ್ಯೆರೆನ ಎದುರು ತಮ್ಮನ ಕಾರ್ಯಕ್ರಮ ನಡಪುಂಡು. ಅಂಚನೆ ಈ ಲೇಸ್ ಗ್ ನವೋದಯ ಕನ್ನಡ ಸೇವಾ ಸಂಘ, ಥಾಣೆದ ಅಧ್ಯಕ್ಷೆರ್ ಬೊಕ್ಕ ಪದಾಧಿಕಾರಿಲು ಸಹಕಾರ ಕೊರ್ಪೆರ್ ಪಂದ್ ಯಕ್ಷಗುರು ಅಜೆಕಾರ್ ಬಾಲಕೃಷ್ಣ ಶೆಟ್ಟಿ ಲೆಪ್ಪೋಲೆಡ್ ತೆರಿಪಾದೆರ್.

ಅ.31ರ್ದ್ ಕುಡ್ಲ ಏರ್ ಪೋರ್ಟುಗು ಕೆಎಸ್‌ಆರ್‌ಟಿಸಿ ಬಸ್ ಸಂಚಾರ ಸುರು 

ಕುಡ್ಲ: ಬಜ್ಪೆ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಗ್ ಮಣಿಪಾಲ ಬೊಕ್ಕ ಕುಡ್ಲರ್ದ್ ಕೆಎಸ್‌ಆರ್‌ಟಿಸಿ ಬಸ್ ಅ.31 ಜೆಡ್ದ್ ಸವಾರಿ ಮಲ್ಪರೆ ಉಂಡು.

ಈ ಪಿರವು ಪಂಡಿಲೆಕ್ಕ ಅ.27 ಕ್ಕ್ ಬಸ್ ಸವಾರಿ ಸುರು ಆವೊಡಿತ್ತ್ಂಡ್. ಕೆಲ ತಾಂತ್ರಿಕ ಕಾರಣರ್ದಾವರ ಆಯಿಜಿ ಪಂದ್ ಕೆಎಸ್‌ಆರ್‌ಟಿಸಿ ಮೂಲ ತೆರಿಪಾದ್ಂಡ್. ಕುಡ್ಲ ರೈಲ್ ನಿಲ್ದಾಣರ್ದ್ ವಿಮಾನ ನಿಲ್ದಾಣಗ್ ಕಾಂಡೆ 6.30, 8.45, 11.10 ಅಂಚೆನೆ ಮಧ್ಯಾಹ್ನ 3, ಬಯ್ಯ 5.15, 7.30 ಕ್ಕ್ ಬಸ್ ಪಿದಡ್ಯರೆ ಉಂಡು.

ಎಸ್‌ಎಚ್‌ಆರ್‌ಎಫ್‌ಡ್ ತುಡರ್ ಪರ್ಬದ ಗೌಜಿ

ಕೋಟ : ಸಾಲಿಗ್ರಾಮದ ಡಿವೈನ್ ಪಾರ್ಕ್‌ದ ಅಂಗ ಸಂಸ್ಥೆಯಾಯಿನ ಕೋಟ ಮೂಡು ಗಿಳಿಯಾರ್ ದ ಯೋಗಬನಟ್ಟ್ ಇಪ್ಪುನ ಸರ್ವಕ್ಷೇಮ ಆಸ್ಪತ್ರೆ ಬೊಕ್ಕ ಸಂಶೋಧನಾ ಪ್ರತಿಷ್ಠಾನ ಕೇಂದ್ರಡ್ ತುಡರ್ ಪರ್ಬನ್ ಭಾರೀ ಗೌಜಿಡ್ ಆಚರಣೆ ಮಲ್ತೆರ್. ಪ್ರತಿಷ್ಠಾನದ ಕೇಂದ್ರದ ಸುತ್ತಲ ತುಡರ್‌ರ್ದ್ ಮಿನ್ಕೊಂದಿತ್ತ್‌ಂಡ್. ತೂವರೆ ಪೊರ್ಲು ಆದಿತ್ತ್ಂಡ್.

ಅ.30 ಮುಟ್ಟ ಪ್ರತಿದಿನಲ ಸಾರ್ವಜನಿಕೆರೆಗ್ ರಾತ್ರೆ 7-8 ಮುಟ್ಟ ಉಂದೆನ್ ತೂಯರೆ ಅವಕಾಶ ಉಂಡು. ಜನಕುಲು ಉಂದೆತ್ತ ಸದುಪಯೋಗ ಪಡೆಯೊನೊಲಿ ಪಂದ್ ಸಂಸ್ಥೆದ ವೈದ್ಯಕೀಯ ಆಡಳಿತ ನಿರ್ದೇಶಕೆರ್ ಡಾ. ವಿವೇಕ್ ಉಡುಪ ಪ್ರಕಟಣೆಡ್ ತೆರಿಪಾದೆರ್.

ರಷ್ಯಾ ರಾಜಧಾನಿಡ್ 7 ಲಕ್ಷ ಆಂಜೋವುಲು ಮಿಸ್ಸಿಂಗ್..!!

ರಷ್ಯಾ ರಾಜಧಾನಿಡ್ ಪೇಂಟೆದ ಸಾದಿ ಆಂಜೋವುಲು ಇಜ್ಜಂದೆ ಕಾಲಿ ಆತ್ಂಡ್. ಕರಿನ ಮೂಜಿ ವಾರಡ್ ಸುಮಾರು 7 ಲಕ್ಷ ಆಂಜೋವುಲು ಬರಿತ್ತ ದೇಶಲೆಗ್ ವಲಸೆ ಪೋತೆರ್. ಉಂದೆಕ್ಕ್ ಕಾರಣ ರಷ್ಯಾ-ಉಕ್ರೇನ್ ಯುದ್ಧ. ತನ್ನ ಸೈನ್ಯದ ಬಲನ್ ಗಟ್ಟಿ ಮಲ್ಪರೆ ಪುಟಿನ್, ಲಕ್ಷಾಂತರ ಜವನೆರೆನ್ ನೇಮಕ ಮಲ್ಪರೆ ದುಂಬು ಬೈದೆರ್. ಇಂಚಾದ್ ಜವನೆರ್ ದೇಶ ಬುಡ್ದ್ ಪೋತೆರ್ ಪಂದ್ ನ್ಯೂಯಾರ್ಕ್ ಟೈಮ್ಸ್ ವರದಿ ಮಲ್ತ್‌ದ್ಂಡ್.

ಮಜ್ಲಿ ಸ್ ಗಾಣೆಮಾರ್ ಲೆಕ್ಕೊಡು ಫಾದರ್ ಮುಲ್ಲರ್ ಆಸ್ಪತ್ರೆ ಒಟ್ಟು ಸೇರಿಗೆಡ್ ನೆತ್ತೆರ್ ದಾನ ಮಲ್ಪುನ ಲೇಸ್

ಬಂಟ್ವಾಳ : ಮಜ್ಲಿ ಸ್ ಗಾಣೆಮಾರ್ ಬೊಕ್ಕ ಫಾದರ್ ಮುಲ್ಲರ್ ಆಸ್ಪತ್ರೆ ಒಟ್ಟು ಸೇರಿಗೆಡ್ ನೆತ್ತೆರ್ ದಾನ ಮಲ್ಪುನ ಲೇಸ್ ನಡತ್ಂಡ್. ಗುರ್ಕಾರ್ಮೆ ವಹಿಸೊನಿನ ರಹಿನ ಅಬ್ದುಲ್ ಮಜೀದ್ ಸಖಾಫಿ ಅಲ್ ಫಾಳಿಲ್ ಲೇಸ್‌ನ್ ಉದಿಪನ ಮಲ್ತೆರ್.

ಅಂಚನೆ ಅಮ್ಮುoಜೆ ಪಂಚಾಯತ್ ಅಧ್ಯಕ್ಷೆರ್ ವಾಮನ ನಾಯಕ್, ಕರಿಯಂಗಳದ ಪಂಚಾಯತ್ ಅಧ್ಯಕ್ಷೆರ್ ಚಂದ್ರಹಾಸ್ ಪಲ್ಲಿಪ್ಪಾಡಿ, ಬಡಕಬೈಲ್ ಪಲ್ಲಿದ ಅಧ್ಯಕ್ಷೆರ್ ರಾಯಿನಾ ನವಾಝ್ ಬಡಕಬೈಲ್, ಚಂದ್ರ ಪ್ರಕಾಶ್ ಶೆಟ್ಟಿ ತುಂಬೆ, ಅಬ್ದುಲ್ ಹಕೀಮ್ ತಾಳಿಪ್ಪಾಡಿ, ಸುಕೇಶ್ ಕುಮಾರ್ ಬಡಕ ಬೈಲ್, ಇಲ್ಯಾಸ್ ಸಹದಿ, ಜಲೀಲ್ ಮೊಗರು, ಸಿದ್ಧಿಖ್ ಬಜ್ಪೆ ಸೇರ್ದ್ ಮಸ್ತ್ ಬಿನ್ನೆರ್ ಲೇಸ್‌ಡ್ ಪಾಲ್ ಪಡೆದಿತ್ತೆರ್.

ಪುನೀತ್ ರಾಜ್‌ ಸಮಾಧಿ ತೂಯರೆ ಬತ್ತಿನಕ್ಲೆಗ್ ನುಪ್ಪುಸೇವೆ

ಬೆಂಗ್ಲೂರು: ಚಿತ್ರ ನಟೆ ಪುನೀತ್ ರಾಜ್‌ಕುಮಾರ್ ತೀರ್ ಪೋದು ಇನಿಕ್ಕ್ ಒಂಜಿ ವರ್ಷ ಆಯಿನ ಕಾರಣ ರಾಜ್ಯದ ಮಸ್ತ್ ಅಭಿಮಾನಿಲು ಅಲ್ಪ ಅಲ್ಪ ವಿಶೇಷ ಲೇಸ್‌ನ್ ಅಟ್ಟನೆ ಮಲ್ತ್‌ದೆರ್ .

ಅಂಚೆನೆ ಅಪ್ಪು ಸಮಾಧಿದ ಕೈತಲ್ ಮಸ್ತ್ ಜನ ಸೇರುನ ನಿರೀಕ್ಷೆ ಇತ್ತ್‌ದ್ ಅಕಲೆಗ್ ನುಪ್ಪು ಸೇವೆದ ವ್ಯವಸ್ಥೆನ್ ಮಲ್ತ್‌ದೆರ್. ಅವ್ವತ್ತಾಂದೆ ಸಂಗೀತ ನಿರ್ದೇಶಕೆರ್ ಸಾಧುಕೋಕಿಲ ಮುತಾಲಿಕೆಡ್ ಸುಕ್ರಾರ ನಡುರಾತ್ರೆ 12 ಗಂಟೆರ್ದ್ 24 ಗಂಟೆ ಮುಟ್ಟ ಗೀತ ನಮನ ಲೇಸ್‌ಲ ಅಪ್ಪು ಸಮಾಧಿದ ಕೈತಲ್ ನಡಪರೆ ಉಂಡು.

ಸುಳ್ಯ ಸರಕಾರಿ ಪದವಿ ಪೂರ್ವ ಕಾಲೇಜ್ ಡ್ ಕೋಟಿ ಕಂಠ ಗಾಯನ

ಸುಳ್ಯ : ಕರ್ನಾಟಕದ 67ನೇ ಕನ್ನಡ ರಾಜ್ಯೋತ್ಸವದ ಅಂಗವಾದ್ ಅ.28 ದಾನಿ ಕನ್ನಡ ಸಂಸ್ಕೃತಿ ಇಲಾಖೆ ವತಿರ್ದ್ ಕೋಟಿ ಕಂಠ ಗಾಯನ ಕಾರ್ಯಕ್ರಮ ಸುಳ್ಯದ ಸರಕಾರಿ ಪದವಿ ಪೂರ್ವ ಕಾಲೇಜ್ ಡ್ ನಡತ್ಂಡ್.


ಈ ಲೇಸ್ ಡ್ ವಿದ್ಯಾರ್ಥಿಲು, ಶಿಕ್ಷಕೆರ್ ಪಾಲ್ ಪಡೆದ್ ಲೇಸ್ ನ್ ಪೊರ್ಲು ಮಲ್ತೆರ್.
ವರದಿ: ಜೆ.ಹೆಚ್.ಎಸ್

You Missed