Uncategorized

ಅರಣ್ಯ ಇಲಾಖೆಡ್ 540 ಬೇಲೆ

ಕರ್ನಾಟಕ ಅರಣ್ಯ ಇಲಾಖೆಡ್ ಖಾಲಿ ಇಪ್ಪುನ 540 ಅರಣ್ಯ ರಕ್ಷಕ ಗ್ರೂಪ್ ಸಿ ಬೇಲೆದ ನೇಮಕಾತಿಗ್ ಅಧಿಸೂಚನೆ ಪ್ರಕಟ ಮಲ್ದ್ಂಡ್.

ಆಸಕ್ತಿ ಇತ್ತಿನ ಅಭ್ಯರ್ಥಿಲು ಡಿ.1-30 ಮುಟ್ಟ ಆನ್ ಲೈನ್ ಮುಖೇನ ಅರ್ಜಿ ಸಂದಾಯೆರೆ ಅವಕಾಶ ಉಂಡು. ನೇಮಕ ಆಪುನ ಅರಣ್ಯ ರಕ್ಷಕೆರೆಗ್ ಪಿಂಚಣಿ ಸೌಲಭ್ಯ ಬೊಕ್ಕ ಇಸೇಸ ಸಂಬಳದೊಟ್ಟಿಗೆ ತಿಂಗೊಲ್ ಗ್ 18600 ರೂ.ರ್ದ್ 32600 ರೂ. ಮುಟ್ಟ ಸಂಬಳ ಕೊರ್ಪುಂಡು.

262 ಅಂಬ್ಯುಲೆನ್ಸ್ ಸೇವೆಗ್ ಚಾಲನೆ ಕೊರಿನ ಸಿಎಂ ಸಿದ್ದರಾಮಯ್ಯ

ರಾಜ್ಯದ ಆರೋಗ್ಯ ಇಲಾಖೆದ ಪೊಸ 262 ಆಂಬ್ಯುಲೆನ್ಸ್ ಗ್ ಸಿಎಂ ಸಿದ್ದರಾಮಯ್ಯ ಮೇರ್ ಬೆಂಗ್ಲೂರ್ ಡ್ ಇನಿ ಚಾಲನೆ ಕೊರಿಯೆರ್.

ಈ ಬಗೆಟ್ಟ್ ಮೇರ್ ಪಾತೆರ್ದ್, ನಾಡ್ ದ ಜನಕ್ಲೆಗ್ ಗುಣಮಟ್ಟದ ಆರೋಗ್ಯ ಸೇವೆನ್ ಕೊರಿಯೆರೆ ಸರ್ಕಾರ ತಯಾರಾತ್ಂಡ್. ತುರ್ತು ಸೇವೆಗ್ ಈ ಆಂಬ್ಯುಲೆನ್ಸ್ ಪ್ರಾಥಮಿಕ ಚಿಕಿತ್ಸೆಡ್ ಮಹತ್ವದ ಪಾತ್ರ ಒಯಿಸೊನೊಡು. ಬಡವೆರೆನ್ ತಾರತಮ್ಯ ಇಜ್ಜಂದೆ ಎಡ್ಡೆ ಆರೋಗ್ಯ ಸೇವೆ ಕೊರಿಯೆರೆ ದುಂಬಾವೊಡು ಪಂದ್ ಸಲಹೆ ಕೊರಿಯೆರ್.

ಈ ಪೊರ್ತುಡು ಡಿಸಿಎಂ ಡಿ.ಕೆ ಶಿವಕುಮಾರ್, ಸಚಿವೆರ್ ದಿನೇಶ್ ಪಾಲ್ ಪಡೆಯೆರ್.

ರೇಡಿಯೊ ಮಣಿಪಾಲ್ ಆರೋಗ್ಯ ದರ್ಶನ ಸರಣಿ ಲೇಸ್

ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಮಣಿಪಾಲ್ ಇನ್ಸ್ಟಿಟ್ಯೂಟ್ ಆಫ್ ಕಮ್ಯುನಿಕೇಶನ್ ಬೊಕ್ಕ ಕಸ್ತೂರ್ಬಾ ಆಸ್ಪತ್ರೆ ಮಣಿಪಾಲದ ಒಟ್ಟುಸೇರಿಗೆಡ್ ನ.29 ಬುಧಾರ ಬಯ್ಯಗ್ 5 ಗಂಟೆಗ್ ಆರೋಗ್ಯ ದರ್ಶನ ಸರಣಿ ಲೇಸ್ ಡ್ ಮೂತ್ರಪಿಂಡದ ಪೋಷಣೆದ ಬಗೆಟ್ಟ್ ವಿಶೇಷ ಪೊಲಬು ಪ್ರಸಾರ ಆಪುಂಡು.

ಈ ಲೇಸ್ ಡ್ ಕಸ್ತೂರ್ಬಾ ಆಸ್ಪತ್ರೆ ಮಣಿಪಾಲದ ಕ್ಲಿನಿಕಲ್ ನ್ಯೂಟ್ರಿಷಿಯನ್ ಬೊಕ್ಕ ಡಯಾಟಾಟಿಕ್ಸ್ ವಿಭಾಗಡ್ ಪಥ್ಯಾಹಾರ ತಜ್ಞೆರಾಯಿನ ಅಶ್ವಿತ ಪಾಲ್ ಪಡೆಯೆರೆ ಉಲ್ಲೆರ್. ನ.30 ಕ್ಕ್ ಮಧ್ಯಾಹ್ನ 12.15 ಕ್ಕ್ ಕುಡೊರ ಪ್ರಸಾರ ಆಪುಂಡು. ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.

ಕಾಂತಾರಗ್ ಸಿಲ್ವರ್ ಪಿಕಾಕ್ ಪ್ರಶಸ್ತಿ

ನಟೆ, ನಿರ್ದೇಶಕೆರ್ ರಿಷಬ್ ಶೆಟ್ಟಿ ಅಭಿನಯ ಮಲ್ತ್ ದ್, ನಿರ್ದೇಶನ ಮಲ್ತಿನ ಕಾಂತಾರ ಪಿಕ್ಚರ್ ಗ್ ಗೋವಾಡ್ ನಡತೊಂದು ಇಪ್ಪುನ 52ನೇ ಇಂಟರ್ ನ್ಯಾಷನಲ್ ಫಿಲ್ಮ್ ಫೆಸ್ಟಿವಲ್ ಡ್ ಎಡ್ಡೆ ಪಿಕ್ಚರ್ ಪನ್ಪುನ ಪುಗರ್ತೆನ್ ಪಡೆತೆನ್.

ಇತಿಹಾಸ ಸೃಷ್ಠಿ ಮಲ್ತಿನ ಕಾಂತಾರ ಪಿಕ್ಚರ್ ದ ಕಾಂತಾರ ಅಧ್ಯಯ-1 ತ್ತ ಮೂರ್ತ ಮಲ್ತಿನ ಬೆರಿಕ್ಕೆ ಈ ಪಿಕ್ಚರ್ ಗ್ ಫಿಲ್ಮ್ ಫೆಸ್ಟಿವಲ್ ಡ್ ಪುಗರ್ತೆದ ಸಿಲ್ವರ್ ಪಿಕಾಕ್ ಪ್ರಶಸ್ತಿ ಬೈದ್ಂಡ್. ಈ ಪಿಕ್ಚರ್ ನ್ ಹೊಂಬಾಳೆ ಫಿಲ್ಮ್ ನಿರ್ಮಾಣ ಮಲ್ದ್ಂಡ್.a

ಎಲ್ಲೆ ತೆಲಂಗಾಣಡ್ ವೋಟು

ತೆಲಂಗಾಣ ವಿಧಾನಸಭೆಕ್ಕ್ ಎಲ್ಲೆ  ಮತದಾನ ನಡಪರೆ ಉಂಡು.

ಬೊಲ್ಪುರ್ದ್ ಬಯ್ಯ ಮುಟ್ಟ ನಡಪುನ ವೋಟುಗು ಚುನಾವಣಾ ಆಯೋಗ ಮಾತ ತಯಾರಿ ಮಲ್ದ್ಂಡ್.

3.26 ಕೋಟಿ ಜನ 35655 ವೋಟುದ ಬೂತುಡು ವೋಟು ಪಾಡಿಯೆರೆ ಉಲ್ಲೆರ್. 2290 ಅಭ್ಯರ್ಥಿಲೆನ ಭವಿಷ್ಯ ಇವಿಎಂಡ್ ದಾಖಲಾತ್ಂಡ್. 1.40 ಲಕ್ಷ ಜನ ವೋಟುದ ಕೆಲಸಡ್ ಪಾಲ್ ಪಡೆಯೆರೆ ಉಲ್ಲೆರ್. ಮಾತ 5 ರಾಜ್ಯಲೆನ ಚುನಾವಣಾ ಫಲಿತಾಂಶ ಡಿ.3 ಕ್ಕ್ ಪ್ರಕಟ ಆಪುಂಡು.

ಡಿ.11: ಕುಡ್ಲ ಪುರಭವನಡ್ ಜಾನಪದ ಸ್ಪರ್ಧಾಕೂಟ

ಕರ್ನಾಟಕ ಜಾನಪದ ಪರಿಷತ್ ಬೆಂಗ್ಲೂರ್ ಜಿಲ್ಲಾ ಘಟಕದ ಮುತಾಲಿಕೆಡ್ ಜಾನಪದ ಕಡಲೋತ್ಸವ, ಜಾನಪದ ಪ್ರದರ್ಶನ ಆಹಾರ ಮೇಳ ಬೊಕ್ಕ ಜಾನಪದ ಸ್ಪರ್ಧಾಕೂಟ ಡಿ.11 ಕ್ಕ್ ಕುಡ್ಲ ಪುರಭವನಡ್ ನಡಪರೆ ಉಂಡು.

ಈ ಲೇಸ್ ಡ್ ಪಾಲ್ ಪಡೆಪುನಕುಲು ಡಿ.6 ತ್ತೊಲಯಿ ನೊಂದಣಿ ಮಲ್ಪೊಡು. ಎಚ್ಚದ ಪೊಲಬುಗಾದ್ ಅವಿನಾಶ್ 9980358774, ಶಿವಪ್ರಸಾದ್ ಕೊಕ್ಕಡ 9880176555, ವಿಜಯ ಕುಮಾರ್ ಜೈನ್ 6362686372 ನಂಬರ್ ಗ್ ಕಾಲ್ ಮಲ್ಪೊಲಿ.

ಡಿ.3: ಬಜಪೆ ಶ್ರೀ ವಿಶ್ವಕರ್ಮ ಕಲಾಮಂದಿರಡ್ ನವಕ ಪ್ರಧಾನ ಕಲಶಾಭಿಷೇಕ, ಆಶ್ಲೇಷಾಬಲಿ ಸೇವೆ

ಕುಡ್ಲ: ಬಜಪೆ ಶ್ರೀ ವಿಶ್ವಕರ್ಮ ಸಮಾಜ ಸೇವಾ ಸಂಘ (ರಿ.) ದ ಮುತಾಲಿಕೆಡ್ ಡಿ.3 ಐತಾರ ಬಜಪೆ ಶ್ರೀ ವಿಶ್ವಕರ್ಮ ಕಲಾಮಂದಿರಡ್ ಸುರುತ್ತ ವರ್ಷದ ವರ್ಧಂತಿ ಉಚ್ಚಯದ ಲೆಕ್ಕೊಡು ನವಕ ಪ್ರಧಾನ ಕಲಶಾಭಿಷೇಕ ಬೊಕ್ಕ ಆಶ್ಲೇಷಾಬಲಿ ಸೇವೆ ನಡಪರೆ ಉಂಡು.

ಬೊಲ್ಪುಗು ಸಾಮೂಹಿಕ ಪ್ರಾರ್ತನೆ, ಸಂಕಲ್ಪ, ಪುಣ್ಯಾಹವಾಚನ, ತತ್ವಹೋಮ, ಕಲಾಹೋಮ, ಸರ್ಪಶಾಂತಿ, ಕುಂಭಾಭಿಷೇಕ, ಅಲಂಕಾರ ಪೂಜೆ, ಆಶ್ಲೇಷಾಬಲಿ, ಮಧ್ಯಾಹ್ನ ಮಹಾಪೂಜೆ, ಪ್ರಸಾದ ಪಟ್ಟಿ ಬೊಕ್ಕ ನುಪ್ಪು ಪ್ರಸಾದ ಸೇವೆ ನಡಪರೆ ಉಂಡು.

ಈ ಲೇಸ್ ಡ್ ಮಾತೆರ್ಲಾ ಕುಟುಂಬ ಸಮೇತೆರಾದ್ ಬತ್ತ್ ದ್, ಸಿರಿಮುಡಿ ಗಂಧ ಪ್ರಸಾದ ದೆತೊಂದು, ಶ್ರೀ ನಾಗದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಬಜಿಪೆ ಶ್ರೀ ವಿಶ್ವ ಬ್ರಾಹ್ಮಣ ಸಮಾಜ ಸೇವಾ ಸಂಘ (ರಿ.) ಬೊಕ್ಕ ವಿಶ್ವಬ್ರಾಹ್ಮಣ ಶ್ರೀ ಯಶಸ್ವಿನಿ ಮಹಿಳಾ ಮಂಡಳಿದ ಗುರ್ಕಾರೆ, ಒತ್ತು ಗುರ್ಕಾರೆ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.