ಕರ್ನಾಟಕ ಅರಣ್ಯ ಇಲಾಖೆಡ್ ಖಾಲಿ ಇಪ್ಪುನ 540 ಅರಣ್ಯ ರಕ್ಷಕ ಗ್ರೂಪ್ ಸಿ ಬೇಲೆದ ನೇಮಕಾತಿಗ್ ಅಧಿಸೂಚನೆ ಪ್ರಕಟ ಮಲ್ದ್ಂಡ್.
ಆಸಕ್ತಿ ಇತ್ತಿನ ಅಭ್ಯರ್ಥಿಲು ಡಿ.1-30 ಮುಟ್ಟ ಆನ್ ಲೈನ್ ಮುಖೇನ ಅರ್ಜಿ ಸಂದಾಯೆರೆ ಅವಕಾಶ ಉಂಡು. ನೇಮಕ ಆಪುನ ಅರಣ್ಯ ರಕ್ಷಕೆರೆಗ್ ಪಿಂಚಣಿ ಸೌಲಭ್ಯ ಬೊಕ್ಕ ಇಸೇಸ ಸಂಬಳದೊಟ್ಟಿಗೆ ತಿಂಗೊಲ್ ಗ್ 18600 ರೂ.ರ್ದ್ 32600 ರೂ. ಮುಟ್ಟ ಸಂಬಳ ಕೊರ್ಪುಂಡು.
ರಾಜ್ಯದ ಆರೋಗ್ಯ ಇಲಾಖೆದ ಪೊಸ 262 ಆಂಬ್ಯುಲೆನ್ಸ್ ಗ್ ಸಿಎಂ ಸಿದ್ದರಾಮಯ್ಯ ಮೇರ್ ಬೆಂಗ್ಲೂರ್ ಡ್ ಇನಿ ಚಾಲನೆ ಕೊರಿಯೆರ್.
ಈ ಬಗೆಟ್ಟ್ ಮೇರ್ ಪಾತೆರ್ದ್, ನಾಡ್ ದ ಜನಕ್ಲೆಗ್ ಗುಣಮಟ್ಟದ ಆರೋಗ್ಯ ಸೇವೆನ್ ಕೊರಿಯೆರೆ ಸರ್ಕಾರ ತಯಾರಾತ್ಂಡ್. ತುರ್ತು ಸೇವೆಗ್ ಈ ಆಂಬ್ಯುಲೆನ್ಸ್ ಪ್ರಾಥಮಿಕ ಚಿಕಿತ್ಸೆಡ್ ಮಹತ್ವದ ಪಾತ್ರ ಒಯಿಸೊನೊಡು. ಬಡವೆರೆನ್ ತಾರತಮ್ಯ ಇಜ್ಜಂದೆ ಎಡ್ಡೆ ಆರೋಗ್ಯ ಸೇವೆ ಕೊರಿಯೆರೆ ದುಂಬಾವೊಡು ಪಂದ್ ಸಲಹೆ ಕೊರಿಯೆರ್.
ಈ ಪೊರ್ತುಡು ಡಿಸಿಎಂ ಡಿ.ಕೆ ಶಿವಕುಮಾರ್, ಸಚಿವೆರ್ ದಿನೇಶ್ ಪಾಲ್ ಪಡೆಯೆರ್.
ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಮಣಿಪಾಲ್ ಇನ್ಸ್ಟಿಟ್ಯೂಟ್ ಆಫ್ ಕಮ್ಯುನಿಕೇಶನ್ ಬೊಕ್ಕ ಕಸ್ತೂರ್ಬಾ ಆಸ್ಪತ್ರೆ ಮಣಿಪಾಲದ ಒಟ್ಟುಸೇರಿಗೆಡ್ ನ.29 ಬುಧಾರ ಬಯ್ಯಗ್ 5 ಗಂಟೆಗ್ ಆರೋಗ್ಯ ದರ್ಶನ ಸರಣಿ ಲೇಸ್ ಡ್ ಮೂತ್ರಪಿಂಡದ ಪೋಷಣೆದ ಬಗೆಟ್ಟ್ ವಿಶೇಷ ಪೊಲಬು ಪ್ರಸಾರ ಆಪುಂಡು.
ಈ ಲೇಸ್ ಡ್ ಕಸ್ತೂರ್ಬಾ ಆಸ್ಪತ್ರೆ ಮಣಿಪಾಲದ ಕ್ಲಿನಿಕಲ್ ನ್ಯೂಟ್ರಿಷಿಯನ್ ಬೊಕ್ಕ ಡಯಾಟಾಟಿಕ್ಸ್ ವಿಭಾಗಡ್ ಪಥ್ಯಾಹಾರ ತಜ್ಞೆರಾಯಿನ ಅಶ್ವಿತ ಪಾಲ್ ಪಡೆಯೆರೆ ಉಲ್ಲೆರ್. ನ.30 ಕ್ಕ್ ಮಧ್ಯಾಹ್ನ 12.15 ಕ್ಕ್ ಕುಡೊರ ಪ್ರಸಾರ ಆಪುಂಡು. ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.
ನಟೆ, ನಿರ್ದೇಶಕೆರ್ ರಿಷಬ್ ಶೆಟ್ಟಿ ಅಭಿನಯ ಮಲ್ತ್ ದ್, ನಿರ್ದೇಶನ ಮಲ್ತಿನ ಕಾಂತಾರ ಪಿಕ್ಚರ್ ಗ್ ಗೋವಾಡ್ ನಡತೊಂದು ಇಪ್ಪುನ 52ನೇ ಇಂಟರ್ ನ್ಯಾಷನಲ್ ಫಿಲ್ಮ್ ಫೆಸ್ಟಿವಲ್ ಡ್ ಎಡ್ಡೆ ಪಿಕ್ಚರ್ ಪನ್ಪುನ ಪುಗರ್ತೆನ್ ಪಡೆತೆನ್.
ಇತಿಹಾಸ ಸೃಷ್ಠಿ ಮಲ್ತಿನ ಕಾಂತಾರ ಪಿಕ್ಚರ್ ದ ಕಾಂತಾರ ಅಧ್ಯಯ-1 ತ್ತ ಮೂರ್ತ ಮಲ್ತಿನ ಬೆರಿಕ್ಕೆ ಈ ಪಿಕ್ಚರ್ ಗ್ ಫಿಲ್ಮ್ ಫೆಸ್ಟಿವಲ್ ಡ್ ಪುಗರ್ತೆದ ಸಿಲ್ವರ್ ಪಿಕಾಕ್ ಪ್ರಶಸ್ತಿ ಬೈದ್ಂಡ್. ಈ ಪಿಕ್ಚರ್ ನ್ ಹೊಂಬಾಳೆ ಫಿಲ್ಮ್ ನಿರ್ಮಾಣ ಮಲ್ದ್ಂಡ್.a
ತೆಲಂಗಾಣ ವಿಧಾನಸಭೆಕ್ಕ್ ಎಲ್ಲೆ ಮತದಾನ ನಡಪರೆ ಉಂಡು.
ಬೊಲ್ಪುರ್ದ್ ಬಯ್ಯ ಮುಟ್ಟ ನಡಪುನ ವೋಟುಗು ಚುನಾವಣಾ ಆಯೋಗ ಮಾತ ತಯಾರಿ ಮಲ್ದ್ಂಡ್.
3.26 ಕೋಟಿ ಜನ 35655 ವೋಟುದ ಬೂತುಡು ವೋಟು ಪಾಡಿಯೆರೆ ಉಲ್ಲೆರ್. 2290 ಅಭ್ಯರ್ಥಿಲೆನ ಭವಿಷ್ಯ ಇವಿಎಂಡ್ ದಾಖಲಾತ್ಂಡ್. 1.40 ಲಕ್ಷ ಜನ ವೋಟುದ ಕೆಲಸಡ್ ಪಾಲ್ ಪಡೆಯೆರೆ ಉಲ್ಲೆರ್. ಮಾತ 5 ರಾಜ್ಯಲೆನ ಚುನಾವಣಾ ಫಲಿತಾಂಶ ಡಿ.3 ಕ್ಕ್ ಪ್ರಕಟ ಆಪುಂಡು.
ಕರ್ನಾಟಕ ಜಾನಪದ ಪರಿಷತ್ ಬೆಂಗ್ಲೂರ್ ಜಿಲ್ಲಾ ಘಟಕದ ಮುತಾಲಿಕೆಡ್ ಜಾನಪದ ಕಡಲೋತ್ಸವ, ಜಾನಪದ ಪ್ರದರ್ಶನ ಆಹಾರ ಮೇಳ ಬೊಕ್ಕ ಜಾನಪದ ಸ್ಪರ್ಧಾಕೂಟ ಡಿ.11 ಕ್ಕ್ ಕುಡ್ಲ ಪುರಭವನಡ್ ನಡಪರೆ ಉಂಡು.
ಈ ಲೇಸ್ ಡ್ ಪಾಲ್ ಪಡೆಪುನಕುಲು ಡಿ.6 ತ್ತೊಲಯಿ ನೊಂದಣಿ ಮಲ್ಪೊಡು. ಎಚ್ಚದ ಪೊಲಬುಗಾದ್ ಅವಿನಾಶ್ 9980358774, ಶಿವಪ್ರಸಾದ್ ಕೊಕ್ಕಡ 9880176555, ವಿಜಯ ಕುಮಾರ್ ಜೈನ್ 6362686372 ನಂಬರ್ ಗ್ ಕಾಲ್ ಮಲ್ಪೊಲಿ.
ಕುಡ್ಲ: ಬಜಪೆ ಶ್ರೀ ವಿಶ್ವಕರ್ಮ ಸಮಾಜ ಸೇವಾ ಸಂಘ (ರಿ.) ದ ಮುತಾಲಿಕೆಡ್ ಡಿ.3 ಐತಾರ ಬಜಪೆ ಶ್ರೀ ವಿಶ್ವಕರ್ಮ ಕಲಾಮಂದಿರಡ್ ಸುರುತ್ತ ವರ್ಷದ ವರ್ಧಂತಿ ಉಚ್ಚಯದ ಲೆಕ್ಕೊಡು ನವಕ ಪ್ರಧಾನ ಕಲಶಾಭಿಷೇಕ ಬೊಕ್ಕ ಆಶ್ಲೇಷಾಬಲಿ ಸೇವೆ ನಡಪರೆ ಉಂಡು.
ಬೊಲ್ಪುಗು ಸಾಮೂಹಿಕ ಪ್ರಾರ್ತನೆ, ಸಂಕಲ್ಪ, ಪುಣ್ಯಾಹವಾಚನ, ತತ್ವಹೋಮ, ಕಲಾಹೋಮ, ಸರ್ಪಶಾಂತಿ, ಕುಂಭಾಭಿಷೇಕ, ಅಲಂಕಾರ ಪೂಜೆ, ಆಶ್ಲೇಷಾಬಲಿ, ಮಧ್ಯಾಹ್ನ ಮಹಾಪೂಜೆ, ಪ್ರಸಾದ ಪಟ್ಟಿ ಬೊಕ್ಕ ನುಪ್ಪು ಪ್ರಸಾದ ಸೇವೆ ನಡಪರೆ ಉಂಡು.
ಈ ಲೇಸ್ ಡ್ ಮಾತೆರ್ಲಾ ಕುಟುಂಬ ಸಮೇತೆರಾದ್ ಬತ್ತ್ ದ್, ಸಿರಿಮುಡಿ ಗಂಧ ಪ್ರಸಾದ ದೆತೊಂದು, ಶ್ರೀ ನಾಗದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಬಜಿಪೆ ಶ್ರೀ ವಿಶ್ವ ಬ್ರಾಹ್ಮಣ ಸಮಾಜ ಸೇವಾ ಸಂಘ (ರಿ.) ಬೊಕ್ಕ ವಿಶ್ವಬ್ರಾಹ್ಮಣ ಶ್ರೀ ಯಶಸ್ವಿನಿ ಮಹಿಳಾ ಮಂಡಳಿದ ಗುರ್ಕಾರೆ, ಒತ್ತು ಗುರ್ಕಾರೆ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಯುವ ಬ್ರಿಗೇಡ್ ಮೀರಾ ಭಯಂದರ್ ಮುತಾಲಿಕೆಡ್, ತ್ರಿರಂಗ ಸಂಗಮದ ಒಟ್ಟುಸೇರಿಗೆಡ್, ಪಟ್ಲ ಸತೀಶ್ ಶೆಟ್ಟಿ ಮೆರೆನ ಸಾರಥ್ಯಡ್, ಪಾವಂಜೆ ಜ್ಞಾನ ಶಕ್ತಿ ಸುಬ್ರಮಣ್ಯ ಸ್ವಾಮಿ ಕೃಪಾಪೋಷಿತ ಯಕ್ಷಗಾನ ಮಂಡಳಿದ ಕಲಾವಿದೆರೆರ್ದ್ ಶ್ರೀ ದೇವಿ ಮಹಾತ್ಮೆ ಆಟ ಮೀರಾ ಭಯಂದರ್ ದ ಹೋಟೆಲ್ ಕ್ರೌನ್ ಸಭಾಂಗಣಡ್ ನಡತ್ಂಡ್.
ಅಂಚೆನೆ ಬೊಕ್ಕ ಲೇಸ್ ದ ಯಶಸ್ಸಿಗ್ ಸೇವೆ ಮಲ್ತಿನ ಮತ ಸೇವಕೆರೆಗ್ ಸೊಲ್ಮೆ ಸಂದಾವುನ ಧನ್ಯೋಸ್ಮಿ ಲೇಸ್ ನಡತ್ಂಡ್. ಈ ಪೊರ್ತುಡು ಅರುಣ್ ಶೆಟ್ಟಿ ಪಣಿಯೂರು, ಸಚ್ಚಿದಾನಂದ ಶೆಟ್ಟಿ ಮುನ್ನಲಾಯಿ ಗುತ್ತು, ಭಾಸ್ಕರ್ ಶೆಟ್ಟಿ, ಉದಯ್ ಶೆಟ್ಟಿ ಪೆಲತ್ತೂರು, ಅರುಣೋದಯ ರೈ, ರಮೇಶ್ ಶೆಟ್ಟಿ ಸಿದ್ದಕಟ್ಟೆ, ಶಿವರಾಮ್ ಶೆಟ್ಟಿ ಡೆಲ್ಟ, ದಿನೇಶ್ ಶೆಟ್ಟಿ, ಸುರೇಶ್ ಶೆಟ್ಟಿ ಗಂಧರ್ವ ಪಾಲ್ ಪಡೆದಿತ್ತೆರ್.
ದಕ್ಷಿಣ ಕನ್ನಡ ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್ ನಿ. ಬೊಕ್ಕ ನವೋದಯ ಗ್ರಾಮ ವಿಕಾಸ ಚಾರಿಟೇಬಲ್ ಟ್ರಸ್ಟ್ (ರಿ.) ಕುಡ್ಲದ ಒಟ್ಟುಸೇರಿಗೆಡ್ ಜಿಲ್ಲಾ ಮಟ್ಟದ ಕ್ರೀಡಾಕೂಟ ನ.30 ಗುರುವಾರ ಪುತ್ತೂರ್ ಕೊಂಬೆಟ್ಟು ಸಹಕಾರಿ ಪದವಿ ಪೂರ್ವ ಕಾಲೇಜ್ ಡ್ ನಡಪರೆ ಉಂಡು.
ಈ ಕ್ರೀಡಾಕೂಟಡ್ ಪೊಂಜೋವುನಕ್ಲೆಗ್ ಬೊಕ್ಕ ಆಂಜೋವುನಕ್ಲೆಗ್ 100 ಮೀಟರ್ ಬಲಿಪೆರೆ, ಶಾಟ್ ಪುಟ್ ದಕ್ಕೆರೆ ಬೊಕ್ಕ ಬಲ್ಲ್ ಒಯಿಪುನ ಪಂತೊ ನಡಪರೆ ಉಂಡು. ಈ ಕ್ರೀಡಾಕೂಟಡ್ ಸಹಕಾರಿ ಸಂಘಲೆನ ಸದಸ್ಯೆರ್, ಸಿಬ್ಬಂದಿಲು, ನವೋದಯ ಸ್ವಸಹಾಯ ಸಂಘಲೆನ ಸದಸ್ಯೆರ್, ಪ್ರೇರಕೆರ್, ದಕ್ಷಿಣ ಕನ್ನಡ ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್ ದ ಸಿಬ್ಬಂದಿ ವರ್ಗದಕುಲು ಸೇರಿನಂಚೆನೆ ಜಿಲ್ಲೆದ ಬೇತೆ ಬೇತೆ ತಾಲೂಕ್ ದ ಕ್ರೀಡಾಪಟುಕ್ಕುಲು ಪಾಲ್ ಪಡೆಯೆರೆ ಉಲ್ಲೆರ್.
ಪತ್ರಿಕೋದ್ಯಮಡ್ ಮಸ್ತ್ ವರ್ಷ ಸೇವೆ ಮಲ್ತೊಂದಿಪ್ಪುನ ಪೇರೂರು ಜಾರು ಮೇರ್ ಡಾ. ರಾಜ್ ಕುಮಾರ್ ಮೆರೆನ ಬಗೆಟ್ಟ್ ಬರೆತಿನ ಅಪರೂಪದ ಒಂಜಿ ಬೂಕು ಬುಡುಗಡೆ ಆತ್ಂಡ್.
ಡಾ. ರಾಜ್ ಬಗೆಟ್ಟ್ ಇಡೆ ಮುಟ್ಟ ಸುಮಾರ್ ಬೂಕು ಬೈದ್ಂಡ್. ನನಲ ಬರೊಂದೇ ಉಂಡು. ಅವು ಮಾತ ಗದ್ಯ ರೂಪಡ್ ಉಂಡು. ಆಂಡ ಪೇರೂರು ಜಾರು ಮೇರ್ ಸುಮಾರ್ ರಡ್ಡರೆ ವರ್ಷ ಡಾ. ರಾಜ್ ಕುಮಾರ್ ಬಗೆಟ್ಟ್ ಅಧ್ಯಯನ ಮಲ್ತ್ ದ್ ಆರೆನ ಜೀವನ ಬೊಕ್ಕ ಸಾಧನೆದ ಬಗೆಟ್ಟ್ ಕನ್ನಡ ಕಣ್ಮಣಿ ಡಾ. ರಾಜಕುಮಾರ್ ಪನ್ಪಿನ ಮಹಾಕಾವ್ಯನ್ ಬರೆತೆರ್.
