ಕಳವಾರುದ ಬಾಳ ಶ್ರೀ ಬೆಂಕಿನಾಥೇಶ್ವರ ಕೃಪಾಪೋಷಿತ ದಶಾವತಾರ ಯಕ್ಷಗಾನ ಮಂಡಳಿದಕ್ಲೆರ್ದ್ (ಡಿ.25) ಇನಿ ರಾತ್ರೆ ಮಾಣಿಮಜಲು ಜೋಡುಸಾನ ಕೈತಲ್ದ ಭವ್ಯ ಮಂಟಪಡ್ ಸತ್ಯೊದ ಸ್ವಾಮಿ ಕೊರಗಜ್ಜ ಆಟ ನಡಪರೆ ಉಂಡು.
ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್ ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಇನ್ನಂಜೆ ಕಲ್ಯಾಲು ನಡಿಬೆಟ್ಟು ಜುಮಾದಿ ಬಂಟ ದೈವೊಲ್ಯಡ್ ಇನಿ ನೇಮ ನಡಪರೆ ಉಂಡು.
ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್ ದೈವೊಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ನೆತ್ತೋಡಿ ಹೊಸ ಕನಸು ಸೇವಾ ಟ್ರಸ್ಟ್ (ರಿ.) ದಕುಲು ಹನ್ನೆರಡು ಕವಲು ದೇವಲ್ಯಡ್ ಇಸೇಸ ಏಸಡ್ ಡಿ.26-28 ಮುಟ್ಟ ನಿಧಿ ಸಂಗ್ರಹಣೆ ಮಲ್ಪೆರೆ ಉಲ್ಲೆರ್.
ಕೋಟೆಬಾಗಿಲುದ ಬಾಡಿಗೆ ಇಲ್ಲಡುಪ್ಪುನ ಬಡಕುಟುಂಬದ ಅಮಿತಾ ಮೆರೆನ 8 ವರ್ಷದ ಮಗೆ ಸುಪ್ರೀತ್ ವಿಚಿತ್ರ ಚರ್ಮದ ಸೀಕ್ ರ್ದ್ ನರಲೊಂದು ಉಲ್ಲೆರ್. ಈ ಸೀಕ್ ರ್ದಾವೆರ ಬಾಲೆದ ಅಮ್ಮೆರ್ ಮೊಕ್ಲೆನ್ ಬುಡ್ತೆರ್. ಅಂಚಾದ್ ಬಾಲೆದ ಚಿಕಿತ್ಸೆಗ್ ಲಕ್ಷ ಗಟ್ಟಲೆ ಕರ್ಚಾಪುಂಡು ಪಂದ್ ವೈದ್ಯೆರ್ ತೆರಿಪಾದೆರ್. ಇತ್ತೆನೇ ಮೇರ್ ಇತ್ತಿನ ಬಂಗಾರ್ ಬೊಕ್ಕ ಕಾಸ್ ನ್ ಕರ್ಚಿ ಮಲ್ದೆರ್. ಮೆರೆಗ್ ನನ ಚಿಕಿತ್ಸೆ ಕೊರಿಯೆರೆ ಆವಂದಿನ ಕಾರಣ ನೆತ್ತೋಡಿ ಹೊಸ ಕನಸು ಸೇವಾ ಟ್ರಸ್ಟ್ ದಕುಲು ಇಸೇಸ ಏಸ ಪಾಡ್ದ್ ಡಿ.26-28 ಮುಟ್ಟ ಹನ್ನೆರಡು ಕವಲು ದೇವಲ್ಯಡ್ ನಡಪುನ ಬ್ರಹ್ಮಕಲಶ ಉಚ್ಚಯಡ್ ನಿಧಿ ಸಂಗ್ರಹಣೆ ಮಲ್ಪೆರೆ ಉಲ್ಲೆರ್. ನೆಕ್ಕ್ ದಾನಿಲು ಮಾತೆರ್ಲಾ ಸಹಕಾರ ಕೊರೊಡು ಪಂದ್ ಕೂಟದಕುಲು ಬಿನ್ನಾಪು ಮಲ್ತೊಂದೆರ್.
ಕುಡ್ಲ: ಬಂದಾರ್ ಟೆಂಪೋ ಚಾಲಕ ಬೊಕ್ಕ ಮಾಲಕರ ಸಂಘ (ರಿ.) ದ ಮುತಾಲಿಕೆಡ್ ಇಂಡಿಯನ್ ರೆಡ್ ಕ್ರಾಸ್ ಸೊಸೈಟಿ ಬ್ಲಡ್ ಬ್ಯಾಂಕ್, ಲೇಡಿಗೋಶನ್ ಆಸ್ಪತ್ರೆ ಕುಡ್ಲ, ಲಯನ್ಸ್ ಕ್ಲಬ್ ಅಶೋಕ ನಗರದ ಒಟ್ಟುಸೇರಿಗೆಡ್ ನೆತ್ತೆರ್ ಉಂಬೊಲಿ ಡಿ.17 ಕ್ಕ್ ಕಸೈಗಲ್ಲಿ ಶಾಲೆದ ಚಾವಡಿಡ್ ನಡಪರೆ ಉಂಡು.
ಈ ಲೇಸ್ ಗ್ ಮಲ್ಲ ಬಿನ್ನೆರಾದ್ ಬಂದಾರ್ ಪೊಲೀಸ್ ಇನ್ಸ್ ಪೆಕ್ಟರ್ ಅಝ್ಮ್ ತ್ ಅಲಿ, ಕುಡ್ಲ ಮಹಾನಗರ ಪಾಲಿಕೆದ ಕಾರ್ಪೊರೇಟರ್ ಝೀನತ್ ಶಂಸುದ್ದೀನ್, ಪೂರ್ಣಿಮಾ, ಅಶೋಕ ನಗರ ಲಯನ್ಸ್ ಕ್ಲಬ್ ದ ಗುರ್ಕಾರೆ ಚರಣ್ ಆಳ್ವ, ಬಂದಾರು ದ.ಕ.ಜಿ.ಪಂ ಸರಕಾರಿ ಉರ್ದು ಪ್ರಾಥಮಿಕ, ಪ್ರೌಢ ಶಾಲೆದ ಗುರ್ಕಾರೆ ಬಿ. ಮುಹಮ್ಮದ್ ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ಗುರ್ಕಾರೆ ಮಕ್ಬೂಲ್ ಅಹ್ಮದ್, ಪ್ರಧಾನ ಕಾರ್ಯದರ್ಶಿ ದೇವದಾಸ್ ಎನ್ ಪೂಜಾರಿ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಸುಬ್ರಹ್ಮಣ್ಯ: ಭಾರತೀಯ ಬಾಹ್ಯಾಕಾಶ ಸಂಸ್ಥೆದ ಟೆಲಿಮೆಟ್ರಿ ಟ್ರ್ಯಾಕಿಂಗ್ ಆಂಡ್ ಕಮಾಂಡ್ ನೆಟ್ವರ್ಕ್ ನಿರ್ದೇಶಕೆರ್ ಬಿ.ಎನ್. ರಾಮಕೃಷ್ಣ ಬುಧವಾರ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ಕ್ಷೇತ್ರಗ್ ಭೇಟಿ ಕೊರಿಯೆರ್.
ಕ್ಷೇತ್ರಗ್ ಭೇಟಿ ಕೊರ್ನ ಆರ್ ಶ್ರೀ ದೇವೆರ್ನ ದರ್ಶನ ಮಲ್ತ್ ದ್ ಪ್ರಾರ್ಥನೆ ಸಲ್ಲಿಸಾದ್ ಪ್ರಸಾದ ಸ್ವೀಕಾರ ಮಲ್ತೆರ್.
ದೇವಸ್ಥಾನದ ವ್ಯವಸ್ಥಾಪನಾ ಸಮಿತಿ ಸದಸ್ಯೆರಾಯಿನ ವನಜಾ ವಿ.ಭಟ್, ಶೋಭಾ ಗಿರಿಧರ್, ಕುಮಾರಸ್ವಾಮಿ ವಿದ್ಯಾಸಂಸ್ಥೆದ ಗುರ್ಕಾರ್ಲು ಗಣೇಶ್ ಪ್ರಸಾದ್, ಪ್ರಾಂಶುಪಾಲೆರ್ ಸಂಕೀರ್ತ್ ಹೆಬ್ಬಾರ್, ದೇವಸ್ಥಾನದ ಶಿಷ್ಟಾಚಾರ ಅಧಿಕಾರಿ ಜಯರಾಮ ರಾವ್ ಬೊಕ್ಕ ಪ್ರಮೋದ್ ಕುಮಾರ್ ಈ ಪೊರ್ತುಡು ಇತ್ತೆರ್.
ಸುಬ್ರಹ್ಮಣ್ಯ: ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನದ ಚಂಪಾ ಷಷ್ಠಿ ಮಹೋತ್ಸವದ ಅಂಗವಾದ್ ಡಿ. 12 ತಾನಿ ಲಕ್ಷದೀಪೋತ್ಸವ, ಕುಣಿತ ಭಜನೆ ನಡಪೆರೆ ಉಂಡು.
ಐತಾರ ಕೊಪ್ಪರಿಗೆ ಏರುನ ಮುಖೆನ ಈ ವರ್ಷದ ಚಂಪಾಷಷ್ಠಿ ಮಹೋತ್ಸವ ಸುರು ಆಂಡ್, ಅನಿ ರಾತ್ರೆ ಶೇಷವಾಹನಯುಕ್ತ ಬಂಡಿ ಉತ್ಸವ ನಡತ್ಂಡ್.
ಡಿ. 12 ತಾನಿ ಕಾಚುಕುಜುಂಬ ದೈವ ಬೊಕ್ಕ ಶ್ರೀ ದೇವೆರ್ನ ಭೇಟಿದ ಬೊಕ್ಕ ಚಂದ್ರ ಮಂಡಲ ರಥಡ್ ಸುಬ್ರಹ್ಮಣ್ಯ ದೇವೆರ್ನ ಉತ್ಸವ ನಡಪೆರೆ ಉಂಡು.
ರಥಬೀದಿರ್ದ್ ಕಾಶಿಕಟ್ಟೆ ಮುಟ್ಟ ಲಕ್ಷ ತಿಬಿಲದ ಬೊಲ್ಪುನು ಕೊರಿಯೆರೆ ಉಂಡು. ಸವಾರಿ ಮಂಟಪಡ್ ಕ್ಷೇತ್ರದ ದೈವ ಹೊಸಳಿಗಮ್ಮನ ದೈವದರ್ಶನ ಬೊಕ್ಕ ನರ್ತನ ಸೇವೆ ನಡಪೆರೆ ಉಂಡು.
ಬೊಕ್ಕ ಕಾಶಿಕಟ್ಟೆಗ್ ಬತ್ತ್ ದ್ ದೇವೆರೆಗ್ ಮಹಾಗಣಪತಿ ಸನ್ನಿಧಾನಡ್ ಗುರ್ಜಿ ಪೂಜೆ ನಡಪರೆ ಉಂಡು. ರಾಜಗೋಪುರದ ಕೈತಲ್ ರ್ದ್ ರಥಬೀದಿ, ಅಡ್ಡಬೀದಿಡ್ ಕುಣಿತ ಭಜನ ಸಂಭ್ರಮ ನಡಪರೆ ಉಂಡು. ಮೈಸೂರು ರಾಮಚಂದ್ರ ಆಚಾರ್ ಬೊಕ್ಕ ತಂಡದಕ್ಲೆರ್ದ್ ಭಜನೆ ಕಾರ್ಯಕ್ರಮ ನಡಪಾದ್ ಕೊರಿಯೆರೆ ಉಲ್ಲೆರ್.
ಕುಡ್ಲ: ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರದ ದೇವೆರೆನ ಗುರ್ಜಿ ಉಚ್ಚಯ ಡಿ.12 ಕ್ಕ್ ರಾತ್ರೆ ನಡಪರೆ ಉಂಡು ಪಂದ್ ದೇವಲ್ಯದ ಗುರ್ಕಾರೆ ಎಚ್ ಎಸ್ ಸಾಯಿರಾಂ ತೆರಿಪಾದೆರ್.
ರಾತ್ರೆ ಮಹಾಪೂಜೆದ ಬೊಕ್ಕ ದೇವೆರೆನ್ ಪಲ್ಲಕ್ಕಿಡ್ ದೀದ್ ಗುರ್ಜಿ ಪೇಟೆ ಸವಾರಿ ಸುರು ಆಪುಂಡು. ನ್ಯೂ ಚಿತ್ರಾ ಟಾಕೀಸ್ ದ ಕೈತಲ್ ನಿರ್ಮಾಣ ಆಯಿನ ಗುರ್ಜಿಡ್ ಪೂಜೆ ಮುಗಿತ್ ದ್ ಶ್ರೀ ಕ್ಷೇತ್ರಗ್ ಬರಿಯೆರೆ ಉಂಡು ಪಂದ್ ಗುರ್ಕಾರೆ ಪ್ರಕಟಣೆಡ್ ತೆರಿಪಾದೆರ್.
ಹಳೆಯಂಗಡಿ: ಇಂಚೊಗು ಭಾರಿ ಗೌಜಿಡ್ ಬ್ರಹ್ಮ ಕಲಶ ಆದ್ ಕಲೆಕಾರ್ಣಿಕ ದಿಂಜಿನ ತೋಕೂರು ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನಡ್ ಡಿ.10 ಐತಾರ ಧೃಢಕಲಶಾಭಿಷೇಕ ನಡತ್ಂಡ್.
ಬೊಲ್ಪುಗು ಬ್ರಹ್ಮಶ್ರೀ ಶಿಬರೂರು ಗೋಪಾಲಕೃಷ್ಣ ತಂತ್ರಿಲೆನ ಮುತಾಲಿಕೆಡ್ ಪ್ರಾಯಶ್ಚಿತ ಹೋಮ, ಗಣಯಾಗ, ಕಲಶಾಧಿವಾಸ, ಪ್ರಧಾನ ಹೋಮ ಅಂಚೆನೆ ಮಕರ ಲಗ್ನಡ್ ದೃಢ ಕಲಶಾಭಿಷೇಕ, ಪ್ರಸನ್ನ ಪೂಜೆ, ಪ್ರಸಾದ ವಿತರಣೆ ಇಂಚಿನ ಪುಣ್ಯ ಕಾರ್ಯೊಲು ನಡತ್ಂಡ್.
ದೇವಸ್ಥಾನದ ಪ್ರಧಾನ ಅರ್ಚಕೆರ್ ಮಧುಸೂದನ್ ಆಚಾರ್ಯ, ವ್ಯವಸ್ಥಾಪನ ಸಮಿತಿದ ಅಧ್ಯಕ್ಷೆರ್ ಹರಿದಾಸ್ ಭಟ್ ಬೊಕ್ಕ ಸಮಿತಿ ಸದಸ್ಯೆರ್, ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರ್, ಧರ್ಮದರ್ಶಿ ಹರಿಕೃಷ್ಣ ಪುನರೂರು, ಉಪಾಧ್ಯಕ್ಷೆರ್ ಮೋಹನ್ ದಾಸ್ ಬೊಕ್ಕ ಸಮಿತಿದ ಸದಸ್ಯೆರ್, ಉಪ ತಹಶೀಲ್ದಾರ್ ದಿಲೀಪ್ ರೋಡ್ಕರ್, ಜಿಲ್ಲಾ ಧಾರ್ಮಿಕ ಪರಿಷತ್ ದ ಮಾಜಿ ಸದಸ್ಯೆರ್ ಭುವನಾಭಿರಾಮ ಉಡುಪ, ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಮಿಥುನ್ ರೈ, ಜಿಲ್ಲಾ ಪಂಚಾಯತ್ ಮಾಜಿ ಉಪಾಧ್ಯಕ್ಷೆರ್ ಕಸ್ತೂರಿ ಪಂಜ, ಪಡುಪಣಂಬೂರು ಗ್ರಾಮ ಪಂಚಾಯತ್ ಉಪಾಧ್ಯಕ್ಷೆರ್ ಹೇಮನಾಥ ಅಮೀನ್ ಬೊಕ್ಕ ಗ್ರಾಮ ಪಂಚಾಯತ್ ಸದಸ್ಯೆರ್ ಸಂತೋಷ್ ಕುಮಾರ್ ಜೀರ್ಣೋದ್ಧಾರ ಸಮಿತಿದ ಸದಸ್ಯೆರ್ ಗುರುರಾಜ್ ಎಸ್ ಪೂಜಾರಿ, ಪುರುಷೋತ್ತಮ ಕೋಟ್ಯಾನ್, ಬೊಕ್ಕ ಸ್ಥಳೀಯ ಸಂಘ ಸಂಸ್ಥೆಲೆನ ಅಧ್ಯಕ್ಷೆರ್ ಬೊಕ್ಕ ಸದಸ್ಯೆರ್, ಗ್ರಾಮಸ್ಥೆರ್, ದೇವಸ್ಥಾನದ ಸಿಬ್ಬಂದಿ ವರ್ಗ, ಭಕ್ತೆರ್ ಈ ಲೇಸ್ ಡ್ ಪಾಲ್ ಪಡೆಯೆರ್.
ಕುಡ್ಲ : ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿಗ್ ಕೂಡ್ಲೆ ಅಧ್ಯಕ್ಷೆರ್ ಬೊಕ್ಕ ಪದುಕೆರೆನ್ ನೇಮಕ ಮಲ್ಪೊಡು ಪಂದ್ ಅಖಿಲ ಭಾರತ ತುಳು ಕೂಟಲೆನ ಒಕ್ಕೂಟ ಒತ್ತಾಯ ಮಲ್ದ್ಂಡ್.
ಕಾವೂರುದ ಮುಗ್ರೋಡಿ ಎನ್ ಕ್ಲೇವ್ ದ ಚಾವಡಿಡ್ ಐತಾರ (ಡಿ.10) ನಡತಿನ ಅಖಿಲ ಭಾರತ ತುಳು ಕೂಟಲೆನ ಒಕ್ಕೂಟದ ವಾರ್ಷಿಕ ಮಹಾಸಭೆಟ್ಟ್ ಮಾತ ಸದಸ್ಯೆರ್ ಲ ಒಂಜೇ ಮನಸ್ ಡ್ ಒತ್ತಾಯ ಮಲ್ತೆರ್.
ತುಳು ಭಾಷೆನ್ ಕರ್ನಾಟಕ ರಾಜ್ಯದ ರಡ್ಡನೇ ಅಧಿಕೃತ ಭಾಷೆ ಮಲ್ಪುನ ವಿಚಾರೊಡು ಡಾ.ಮೋಹನ್ ಆಳ್ವ ಸಮಿತಿದ ವರದಿನ್ ಜಾರಿ ಮಲ್ಪುನ ನಿಲೆಟ್ಟ್ ರಾಜ್ಯಸಭಾಧ್ಯಕ್ಷೆರ್ ಯು.ಟಿ.ಖಾದರ್ ಮುತಾಲಿಕೆಡ್ ಬೆಂಗಳೂರುಗು ಒಕ್ಕೂಟದ ನಿಯೋಗ ಪೋವರೆ ಉಂಡು ಪಂದ್ ಒಕ್ಕೂಟದ ಅಧ್ಯಕ್ಷೆರ್ ಎ.ಸಿ. ಭಂಡಾರಿ ಮೇರ್ ಪಂಡೆರ್.
ತುಳು ಅಧಿಕೃತ ಮಲ್ಪರೆ ಬಾಕಿ 3 ಇಲಾಖೆದ ಅನುಮೋದನೆ ದೆತೊನ್ನ ಜಬದಾರಿನ್ ತುಳು ಸಾಹಿತ್ಯ ಅಕಾಡೆಮಿದ ಪೊಸ ಅಧ್ಯಕ್ಷೆರೆಗ್ ಕೊರ್ತುಂಡು ಪನ್ಪಿನ ವಿಚಾರೊನು ಬೆಂಗಳೂರು ತುಳುಕೂಟದ ಅಧ್ಯಕ್ಷೆರ್ ಪುರುಷೋತ್ತಮ ಚೇಂಡ್ಲಾ ಪಂಡೆರ್. ಅಯಿಕ್ ಬಲ ಕೊರ್ದು ಪಾತೆರ್ನ
ಒಕ್ಕೂಟದ ಸಂಘಟನಾ ಕಾರ್ಯದರ್ಶಿ ಕದ್ರಿ ನವನೀತ ಶೆಟ್ರ್, ತುಳು ಸಾಹಿತ್ಯ ಅಕಾಡೆಮಿದ ಮಾತಾ ಚಟುವಟಿಕೆ ಮಸ್ತ್ ತಿಂಗೊಲುರ್ದಿಂಚಿ ಉಂತುಂದುಂಡು. ಅಂಚಾದ್ ಸುರುಟ್ಟು ಅಕಾಡೆಮಿಗ್ ಪೊಸ ಅಧ್ಯಕ್ಷೆರ್ನ ಬೊಕ್ಕ ಪದುಕೆರ್ನ ನೇಮಕ ಆಯಿನಾತ್ ಬೇಗ ಆವೊಡು ಪಂಡೆರ್. ನೆಕ್ಕ್ ಒಕ್ಕೂಟದ ಮಾತಾ ಪದುಕೆರ್ಲ ಒಂಜೇ ಸೊರಟ್ಟ್ ಬೆರಿಬಲ ಕೊರಿಯೆರ್.
ಸಭೆಟ್ಟ್ ಒಕ್ಕೂಟದ ಬೈಲಾ ತಿದ್ದುಪಡಿ, ಶಾಶ್ವತ ನಿಧಿ ಮಲ್ಪುನ ಅಂಚೆನೆ ಉಲ್ಲಾಳದ ನರಿಂಗಾನ ಗ್ರಾಮಪಂಚಾಯಿ ವ್ಯಾಪ್ತಿಡ್ ರಾಜ್ಯ ಸರ್ಕಾರ ಕೊರ್ತಿನ 1 ಎಕರೆ ಜಾಗೆಡ್ ತುಳು ಗ್ರಾಮ ಮಲ್ಪುನ ವಿಚಾರೊಲು ಸಭೆಟ್ಟ್ ಚರ್ಚೆಗ್ ಬತ್ತ್ಂಡ್.
ತುಳುನಾಡ ರಕ್ಷಣಾ ವೇದಿಕೆದ ಅಧ್ಯಕ್ಷೆರ್ ಯೋಗೀಶ್ ಶೆಟ್ಟಿ ಜಪ್ಪು , ಪಮ್ಮಿ ಕೊಡಿಯಾಲ್ ಬೈಲ್, ಮೋಹನ್ ದಾಸ್ ದೇವಾಡಿಗ, ಚಂದ್ರಶೇಖರ ಸುವರ್ಣ,
ಪುತ್ತೂರು ತುಳುಕೂಟದ ಪ್ಯಾಟ್ರಿಕ್ ಸಿಪ್ರಿಯಾನ್ ಮಸ್ಕರೇನಸ್, ಮಡಿಕೇರಿ ತುಳುಕೂಟದ ಐತಪ್ಪ ರೈ, ಶಮೀನಾ ಆಳ್ವ ಮೊಕುಲು ಮಾತ ಅಭಿಪ್ರಾಯ ಪಟ್ಟೊಂಡೆರ್.
ಸಭೆತ್ತ ಗುರ್ಕಾರ್ಮೆನ್ ಎ.ಸಿ.ಭಂಡಾರಿ ಒಯಿಸ್ ದಿತ್ತೆರ್.
ಮತ್ತರ್ಮೆಡ್ ಒಕ್ಕೂಟದ ಉಪಾಧ್ಯಕ್ಷೆರಾಯಿನ ಜಯಕರ ಶೆಟ್ಟಿ ಇಂದ್ರಾಳಿ, ವಿಜಯಲಕ್ಷ್ಮಿ ಶೆಟ್ಟಿ ಇತ್ತೆರ್.
ಪ್ರಧಾನ ಕಾರ್ಯದರ್ಶಿ ಮುಲ್ಕಿ ಕರುಣಾಕರ ಶೆಟ್ರ್ ಒಕ್ಕೂಟದ ಕರಿನ ವರ್ಷದ ಮಹಾಸಭೆತ್ತ ವರದಿ ಓದಿಯೆರ್. ಜತೆ ಕಾರ್ಯದರ್ಶಿ ಪಿ.ಎ.ಪೂಜಾರಿ ಅಜೆಂಡಾ ಓದುಪಂಡೆರ್. ಕೋಶಾಧಿಕಾರಿ ಚಂದ್ರಹಾಸ ದೇವಾಡಿಗ ಲೆಕ್ಕಪತ್ರ ಓದಿಯೆರ್. ಸಂಘಟನಾ ಕಾರ್ಯದರ್ಶಿ ಡಾ.ರಾಜೇಶ್ ಆಳ್ವ ಸೊಲ್ಮೆ ಸಂದಾಯೆರ್.
ಮಡಿಕೇರಿ, ಕಾಸ್ರೋಡು, ಬೆಂಗಳೂರು ಸೇರ್ದ್ ಬೇತೆ ಬೇತೆ ಕಡೆತ್ತ ತುಳು ಸಂಘಟನೆದ ಪ್ರತಿನಿಧಿನಕುಲು ಸಭೆಟ್ಟ್ ಪಾಲ್ ಪಡೆದಿತ್ತೆರ್.
ಗುಜರಾತ್ ದ ಗಾಂಧಿ ನಗರದ ಮಹಾತ್ಮ ಮಂದಿರ ಕನ್ವೆನ್ಷನ್ ಬೊಕ್ಕ ಎಕ್ಸಿಬಿಷನ್ ಸೆಂಟರ್ಡ್ ಡಿ.2 ರ್ದ್ 5 ಮುಟ್ಟ ನಡತ್ತಿನ 82ನೇ ವಾರ್ಷಿಕ ಸಭೆಟ್ ಶಾರದಾ ಇನ್ಫ್ರಾ ಡಿಸೈನ್ ಇಂಡಿಯಾ ಪ್ರೈವೇಟ್ ಲಿಮಿಟೆಡ್ ನೆತ್ತ ಆಡಳಿತ ನಿರ್ದೇಶಕೆರ್ ಅಸೋಸಿಯೇಷನ್ ಆಫ್ ಸಿವಿಲ್ ಇಂಜಿನಿಯರ್ಸ್ ಮೂಲ್ಕಿ ನೆತ್ತ ಸ್ಥಾಪಕ ಅಧ್ಯಕ್ಷೆರ್ ಬೊಕ್ಕ ಇಂಡಿಯನ್ ರೋಡ್ ಕಾಂಗ್ರೆಸ್ (IRC) ಸದಸ್ಯೆರ್ ಮೂಲ್ಕಿ ಜೀವನ್ ಕೆ.ಶೆಟ್ಟಿ ಪಾಲ್ ಪಡೆಯೆರ್.
ಮೂಲ್ಕಿದ ಹೆದ್ದಾರಿದ 5 ಡೇಂಜರ್ ಝೋನ್ದ ಬಗ್ಗೆ ವಿವರಿಸಾದ್ ಪರ್ಯಾಯ ವ್ಯವಸ್ಥೆಗಾದ್ ಅಂಡರ್ ಪಾಸ್ ಬೊಕ್ಕ ಬಪ್ಪನಾಡು ಶಾಂಭವಿ ಸಂಕರ್ದ್ ಕೊಲ್ನಾಡು ಜಂಕ್ಷನ್ ಮುಟ್ಟ ಸರ್ವಿಸ್ ರೋಡ್ ಅವಶ್ಯಕತೆ ಉಂಡು ಪಂದ್ ತೆರಿಪಾದ್ ಸೆಕ್ರೆಟರಿ ಜನರಲ್- ಇಂಡಿಯನ್ ರೋಡ್ ಕಾಂಗ್ರೆಸ್ ಬೊಕ್ಕ ಡೈರೆಕ್ಟರ್ ಜನರಲ್, ಮಿನಿಸ್ಟ್ರಿ ಆಫ್ ರೋಡ್ ಟ್ರಾನ್ಸ್ ಪೋರ್ಟ್ ಆಂಡ್ ಹೈವೇಸ್ (MORTH)ಎಸ್. ಕೆ. ನಿರ್ಮಲ್ ಅರೆಗ್ ಮನವಿ ಸಲ್ಲಿಸಾಯೆರ್. ನೆಕ್ಕ್ ಸ್ಪಂದಿಸಾಯಿನ ಆರ್ ಚೇರ್ ಮೆನ್- ಎನ್ ಹೆಚ್ಎಐ (NHAI) ಮೊಕ್ಲೆನ ಗಮನಗ್ ಕನಪ ಪಂದ್ ಭರವಸೆ ಕೊರಿಯೆರ್. ಈ ಪೊರ್ತುಡು ಪಂಕಜ್ ಅಗರ್ವಾಲ್,ಚೀಫ್ ಇಂಜಿನಿಯರ್, ಮಿನಿಸ್ಟ್ರಿ ಆಫ್ ರೋಡ್ ಟ್ರಾನ್ ಸ್ಪೋರ್ಟ್ ಬೊಕ್ಕ ಹೈವೇಸ್ ಇತ್ತೆರ್.
