Uncategorized

ಮೀರಾ ಭಯಂದರ್ ದ ಹೋಟೆಲ್ ಕ್ರೌನ್ ಸಭಾಂಗಣಡ್ ಶ್ರೀ ದೇವಿ ಮಹಾತ್ಮೆ ಆಟ

ಯುವ ಬ್ರಿಗೇಡ್ ಮೀರಾ ಭಯಂದರ್ ಮುತಾಲಿಕೆಡ್, ತ್ರಿರಂಗ ಸಂಗಮದ ಒಟ್ಟುಸೇರಿಗೆಡ್, ಪಟ್ಲ ಸತೀಶ್ ಶೆಟ್ಟಿ ಮೆರೆನ ಸಾರಥ್ಯಡ್, ಪಾವಂಜೆ ಜ್ಞಾನ ಶಕ್ತಿ ಸುಬ್ರಮಣ್ಯ ಸ್ವಾಮಿ ಕೃಪಾಪೋಷಿತ ಯಕ್ಷಗಾನ ಮಂಡಳಿದ ಕಲಾವಿದೆರೆರ್ದ್ ಶ್ರೀ ದೇವಿ ಮಹಾತ್ಮೆ ಆಟ ಮೀರಾ ಭಯಂದರ್ ದ ಹೋಟೆಲ್ ಕ್ರೌನ್ ಸಭಾಂಗಣಡ್ ನಡತ್ಂಡ್.

ಅಂಚೆನೆ ಬೊಕ್ಕ ಲೇಸ್ ದ ಯಶಸ್ಸಿಗ್ ಸೇವೆ ಮಲ್ತಿನ ಮತ ಸೇವಕೆರೆಗ್ ಸೊಲ್ಮೆ ಸಂದಾವುನ ಧನ್ಯೋಸ್ಮಿ ಲೇಸ್ ನಡತ್ಂಡ್. ಈ ಪೊರ್ತುಡು ಅರುಣ್ ಶೆಟ್ಟಿ ಪಣಿಯೂರು, ಸಚ್ಚಿದಾನಂದ ಶೆಟ್ಟಿ ಮುನ್ನಲಾಯಿ ಗುತ್ತು, ಭಾಸ್ಕರ್ ಶೆಟ್ಟಿ, ಉದಯ್ ಶೆಟ್ಟಿ ಪೆಲತ್ತೂರು, ಅರುಣೋದಯ ರೈ, ರಮೇಶ್ ಶೆಟ್ಟಿ ಸಿದ್ದಕಟ್ಟೆ, ಶಿವರಾಮ್ ಶೆಟ್ಟಿ ಡೆಲ್ಟ, ದಿನೇಶ್ ಶೆಟ್ಟಿ, ಸುರೇಶ್ ಶೆಟ್ಟಿ ಗಂಧರ್ವ ಪಾಲ್ ಪಡೆದಿತ್ತೆರ್.

ಪೇರೂರು ಜಾರು ಬರೆತಿನ ಕನ್ನಡ ಕಣ್ಮಣಿ ಡಾ. ರಾಜ್ ಕುಮಾರ್ ಮಹಾಕಾವ್ಯ ಬುಡುಗಡೆ

ಪತ್ರಿಕೋದ್ಯಮಡ್ ಮಸ್ತ್ ವರ್ಷ ಸೇವೆ ಮಲ್ತೊಂದಿಪ್ಪುನ ಪೇರೂರು ಜಾರು ಮೇರ್ ಡಾ. ರಾಜ್ ಕುಮಾರ್ ಮೆರೆನ ಬಗೆಟ್ಟ್ ಬರೆತಿನ ಅಪರೂಪದ ಒಂಜಿ ಬೂಕು ಬುಡುಗಡೆ ಆತ್ಂಡ್.

ಡಾ. ರಾಜ್ ಬಗೆಟ್ಟ್ ಇಡೆ ಮುಟ್ಟ ಸುಮಾರ್ ಬೂಕು ಬೈದ್ಂಡ್. ನನಲ ಬರೊಂದೇ ಉಂಡು. ಅವು ಮಾತ ಗದ್ಯ ರೂಪಡ್ ಉಂಡು. ಆಂಡ ಪೇರೂರು ಜಾರು ಮೇರ್ ಸುಮಾರ್ ರಡ್ಡರೆ ವರ್ಷ ಡಾ. ರಾಜ್ ಕುಮಾರ್ ಬಗೆಟ್ಟ್ ಅಧ್ಯಯನ ಮಲ್ತ್ ದ್ ಆರೆನ ಜೀವನ ಬೊಕ್ಕ ಸಾಧನೆದ ಬಗೆಟ್ಟ್ ಕನ್ನಡ ಕಣ್ಮಣಿ ಡಾ. ರಾಜಕುಮಾರ್ ಪನ್ಪಿನ ಮಹಾಕಾವ್ಯನ್ ಬರೆತೆರ್.

ರಾಜ್ಯ ಮಾನವ ಹಕ್ಕು ಆಯೋಗದ ಗುರ್ಕಾರೆಯಾದ್ ನಾರಾಯಣ ಸ್ವಾಮಿ ನೇಮಕ

ರಾಜ್ಯ ಮಾನವ ಹಕ್ಕು ಆಯೋಗದ ಗುರ್ಕಾರೆಯಾದ್ ಹಿಮಾಚಲ ಪ್ರದೇಶ ಹೈಕೋರ್ಟ್ ದ ನಿವೃತ್ತ ನ್ಯಾಯಮೂರ್ತಿ ಎಲ್ ನಾರಾಯಣ ಸ್ವಾಮಿ ನೇಮಕ ಆತೆರ್.

ಮೆರೆನೊಟ್ಟಿಗೆ ನಿವೃತ್ತ ಜಿಲ್ಲಾ ನ್ಯಾಯಾಧೀಶೆರ್ ಎಸ್ ಕೆ. ವಂಟಿಗೋಡಿ ಬೊಕ್ಕ ಕೆಪಿಎಸ್ ಸಿ ಮಾಜಿ ಗುರ್ಕಾರೆ ಟಿ. ಶ್ಯಾಂ ಭಟ್ ಮೇರ್ ಆಯೋಗದ ಸದಸ್ಯೆರಾದ್ ನೇಮಕ ಆಯೆರ್. ಈ ಮೂಜಿ ಜನತ್ತ ಅಧಿಕಾರಾವಧಿ 5 ವರ್ಷ ಅತ್ತಂಡ 70 ವರ್ಷ ಪ್ರಾಯ ಆಪುನ ಮುಟ್ಟ ಇಪ್ಪುಂಡು.

ಕುಡ್ಲ ಫ್ಲ್ಯಾಟ್ ಡ್ ತೂ ಪೊತ್ತ್ ದ್ ತೀರ್ ಪೋಯಿನ ಪೊಂಜೋವ್

ಕುಡ್ಲ: ಅತ್ತಾವರದ ಫ್ಲ್ಯಾಟ್ ಒಂಜೆಟ್ಟ್ ತೂ ಪೊತ್ತ್ ದ್ ಪೊಂಜೋವು ತೀರ್ ಪೋಯಿನ ನಡಕೆ ನಡತ್ಂಡ್.

ಸಹೈನ್ ಮುಸಾಬ್ (57) ತೀರ್ ಪೋಯಿನಾರ್ ಪಂದ್ ತೆರಿದ್ ಬೈದ್ಂಡ್. ಬೊಲ್ಪುಗು ಶಾರ್ಟ್ ಸರ್ಕ್ಯಿಟ್ ರ್ದ್ ಈ ಘಟನೆ ನಡತ್ಂಡ್. ಆ ಪೊರ್ತುಡು ಇಲ್ಲಲ್ ಇತ್ತಿನಕುಲು ಪಿದಾಯಿ ಬೈದೆರ್. ಆಂಡ ಮುಸಾಬ್ ಶೌಚಾಲಯಡ್ ಇತ್ತಿನೆರ್ದಾವರ ಪಿದಾಯಿ ಬರಿಯೆರೆ ಅವಂದೆ ಮತಿ ತತ್ತ್ ದೆರ್. ಅರೆನ್ ಕೂಡ್ಲೆ ಆಸ್ಪತ್ರೆಗ್ ಸಾಗಾದ್ ಚಿಕಿತ್ಸೆ ಕೊರ್ತೆರ್. ಆಂಡ ಚಿಕಿತ್ಸೆ ಫಲಕಾರಿ ಅವಂದೆ ತೀರ್ ಪೋತೆರ್ ಪಂದ್ ತೆರಿದ್ ಬೈದ್ಂಡ್.

ಅತ್ತಂದೆ ಇಲ್ಲಲ್ ಇತ್ತಿನ ಸೊತ್ತುಲು ಕರೆಂಚಿದ್ಂಡ್. ನೆರ್ದ್ ಮಸ್ತ್ ನಷ್ಟ ಆತ್ಂಡ್. ಈ ಬಗೆಟ್ಟ್ ಪಾಂಡೇಶ್ವರ ಅಗ್ನಿಶಾಮಕ ದಳತ್ತಕುಲು ಕಾರ್ಯಾಚರಣೆ ನಡಪಾದೆರ್.

ಮಿಸ್ಟರ್ ಇಂಡಿಯಾ ಜಗದೀಶ್ ಪೂಜಾರಿಗ್ ದುಬೈಡ್ “ಮಯೂರ ಶ್ರೀ” ಪ್ರಶಸ್ತಿ

ಕೈಕಂಬ: ಕರ್ನಾಟಕ ಸಂಘ ಶಾರ್ಜಾದ ಮುತಾಲಿಕೆಡ್ ನ.18 ಕ್ಕ್ ಶಾರ್ಜಾ ಈವಾನ್ ಹೋಟೆಲ್ ಡ್ ಅಟ್ಟಣೆ ಮಲ್ತಿನ ಕರ್ನಾಟಕ ರಾಜ್ಯೋತ್ಸವ, ಕರ್ನಾಟಕ ಸಂಘ ಶಾರ್ಜಾದ 21ನೇ ವರ್ಷದ ಉಚ್ಚಯ ಬೊಕ್ಕ ಮಯೂರ ವಿಶ್ವಮಾನ್ಯ ಕನ್ನಡಿಗೆ ಪ್ರಶಸ್ತಿ ಪ್ರದಾನ ಲೇಸ್ ಡ್ ಅನಿವಾಸಿ ಭಾರತೀಯೆರೆಗ್ ನಡಪುನ ರಾಷ್ಟ್ರ ಮಟ್ಟದ ದೇಹರ್ದಾಡ್ಯ ಪಂತೊಗು ಮುಖ್ಯ ತೀರ್ಪುಗಾರೆರಾದ್ ಕುಡ್ಲರ್ದ್ ಮಿಸ್ಟರ್ ಇಂಡಿಯಾ ಜಗದೀಶ್ ಪೂಜಾರಿ ಮೆರೆನ್ ಲೆತ್ತ್ ದ್ ಇತ್ತೆರ್.

ಈ ಲೇಸ್ ದ ಪೊರ್ತುಡು ಚಾವಡಿಡ್ ಪ್ರದರ್ಶನ ಕೊರ್ನ ಅನಿವಾಸಿ ಕನ್ನಡಿಗೆ ದೇಹರ್ದಾಡ್ಯ ಕಲಿಲೆನ ಅಂಗ ಸೌಷ್ಟವ್ಯಗ್ ತೀರ್ಪು ಕೊರ್ನ ಬೊಕ್ಕ ಸ್ವತಃ ಜಗದೀಶ್ ಪೂಜಾರಿ ಚಾವಡಿಡ್ ದೇಹರ್ದಾಡ್ಯದ‌ ಪ್ರದರ್ಶನ ಕೊರಿಯೆರ್.

ಜಗದೀಶ್ ಪೂಜಾರಿ ಮೆರೆನ ಸಾಧನೆಗ್ ಕರ್ನಾಟಕ ಸಂಘ ಶಾರ್ಜಾ ವತಿರ್ದ್ ಮಯೂರ ಶ್ರೀ ಬಿರ್ದ್ ಕೊರ್ದು ಸನ್ಮಾನ ಮಲ್ತೆರ್.

ಜಗದೀಶ್ ಕರ್ನಾಟಕದ ತುಳುನಾಡ್ ದ ಕುಡ್ಲ ಅಡ್ಯಾರ್ ಪದವುದ ಲಿಂಗಪ್ಪ ಪೂಜಾರಿ ಬೊಕ್ಕ ಯಮುನಾ ಪೂಜಾರಿ ದಂಪತಿಲೆನ ಮಗೆ. ಅಂಗ ವೈಕಲ್ಯತೆ ಇತ್ತ್ಂಡಲ ಕಠಿಣ ದೈಹಿಕ ಕಸರತ್ತು ಮಲ್ತ್ ದ್ ರಾಷ್ಟ್ರದ ಗಮನ ಸೆಳೆಯಿನ ಛಲವಾದಿ. ಜಿಲ್ಲೆ, ರಾಜ್ಯ, ರಾಷ್ಟ್ರಮಟ್ಟದ ದೇಹರ್ದಾಡ್ಯ ಪಂತೊಡು ಪಾಲ್ ಪಡೆತೆರ್.

ಅತ್ತಂದೆ ಮಿಸ್ಟರ್ ಕದಂಬ, ಮಿಸ್ಟರ್ ವಜ್ರದೇಹಿ, ಕರ್ನಾಟಕ ಭೂಷಣ, ಮಿಸ್ಟರ್ ಕಾಸರಗೋಡು, ಮಿಸ್ಟರ್ ಕರಾವಳಿ, ಮಿಸ್ಟರ್ ಸರ್ವೋತ್ತಮ ಸಾಧಕ, ಮಿಸ್ಟರ್ ಸ್ವಾಭಿಮಾನ್, ಮಡಿಲು ಸನ್ಮಾನ 2019, ಬೆದ್ರ ಕ್ಲಾಸಿಕ 2022, ಕರ್ನಾಟಕ ಅಚೀವರ್ಸ್ ಬುಕ್ ಅಫ್ ರೆಕಾರ್ಡ್, ಫ್ಯೂಚರ್ ಕಲಾಂ ಯೂನಿವರ್ಸಲ್ ಬುಕ್ ಅಫ್ ರೆಕಾರ್ಡ್ಸ್ ಪ್ರಶಸ್ತಿನ್ ಪಡೆತೆರ್.

ಇತ್ತೆ ಸಹ್ಯಾದ್ರಿ ಇಂಜಿನಿಯರಿಂಗ್ ಕಾಲೇಜ್ ಡ್ ಕಲ್ಪಾರ್ಥಿಯಾದ್ ಜಿಮ್ ಟ್ರೈನರ್ ಆದ್ ಬೇಲೆ ಮಲ್ತೊಂದು ಉಲ್ಲೆರ್.

ಕನ್ನಡ ಸಂಕಲನ ಪತ್ರಿಕೆದ ಬೊಲ್ಲಿ ಪರ್ಬ, ಕನ್ನಡ ರಾಜ್ಯೋತ್ಸವ

ನವಿ ಬೊಂಬೈ ಕನ್ನಡ ಸಂಘ (ರಿ.) ದ ಮುತಾಲಿಕೆಡ್ ಕನ್ನಡ ಸಂಕಲನ ಮಾಸಿಕ ಪತ್ರಿಕೆದ ರಜತ ಮಹಾ ಉಚ್ಚಯ, ಕನ್ನಡ ರಾಜ್ಯೋತ್ಸವ ಲೇಸ್, ಕಬಿಗೋಷ್ಠಿ, ಭಾವಗೀತೆ, ಸ್ಥಾಪಕ ಸದಸ್ಯೆರೆಗ್ ಮಾನಾದಿಗೆ ಲೇಸ್ ನ.26 ಎಂ.ಬಿ ಕುಕ್ಯಾನ್ ಸಭಾಗೃಹಡ್ ನಡತ್ಂಡ್.

ಈ ಲೇಸ್ ದ ಗುರ್ಕಾರ್ಮೆನ್ ಗೋಪಾಲ್ ವೈ ಶೆಟ್ಟಿ ಒಯಿಸ್ ದಿತ್ತೆರ್. ಗೌರವ ಉಪಸ್ಥಿತಿಡ್ ಬಿ.ಎಚ್ ಕಟ್ಟಿ ಪಾಲ್ ಪಡೆದಿತ್ತೆರ್. ಮಲ್ಲ ಬಿನ್ನೆರಾದ್ ಮಾನೇಶ್ವರ್ ನಾಯಕ್ ಪಾಲ್ ಪಡೆಯೆರ್. ಮಾನಾದಿಗೆದ ಬಿನ್ನೆರಾದ್ ಕೆ. ಶಿವಪ್ರಕಾಶ್ ಪಾಲ್ ಪಡೆತೆರ್. ಬೊಕ್ಕ ರಾಜ್ಯೋತ್ಸವದ ಪೊರ್ತುಡು ಕನ್ನಡ ಗೀತೆಲು, ಸಂಘದ ಸದಸ್ಯೆರೆರ್ದ್ ಸಾಂಸ್ಕೃತಿಕ ಲೇಸ್ ನಡತ್ಂಡ್. ಅಂಚೆನೆ ಅಕೇರಿಗ್ ಈ ಲೇಸ್ ವನಸ್ ದೊಟ್ಟಿಗೆ ಮುಗಿತಲ ಆಂಡ್.

ಸಾಂತಕ್ರೂಸ್ ಬಿಲ್ಲವರ ಅಸೋಸಿಯೇಶನ್ ಡ್ ಕೋಟಿ ಚೆನ್ನಯ ತುಳು ಆಟ

ಬೊಂಬೈ ಗುರು ನಾರಾಯಣ ಯಕ್ಷಗಾನ ಮಂಡಳಿದ ಕಲಾವಿದೆರೆರ್ದ್ ಕೋಟಿ ಚೆನ್ನಯ ತುಳು ಆಟ ನ.25 ಸನಿಯಾರ ಬಯ್ಯಗ್ ಸಾಂತಕ್ರೂಸ್ ಬಿಲ್ಲವರ ಅಸೋಸಿಯೇಶನ್ ಡ್ ನಡತ್ಂಡ್.

ಈ ಲೇಸ್ ಡ್ ಮಾತೆರ್ಲಾ ಎಚ್ಚದ ಸಂಖ್ಯೆಡ್ ಪಾಲ್ ಪಡೆದ್, ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರಿಯೆರ್.

ಡಿ.16: ಬೊಂಬೈದ ಮಿಂಟ್ ರೋಡ್ ಕಾನ್ಜಿ ಖೆತ್ಸಿ ಚಾರಿಟೀಸ್ ಸಭಾಗೃಹಡ್ ಶನಿಪೂಜೆ

ವೆಸ್ಟರ್ನ್ ಇಂಡಿಯಾ ಶ್ರೀ ಶನಿಮಹಾತ್ಮಾ ಸೇವಾ ಸಮಿತಿ (ರಿ.) ದ 79ನೇ ವರ್ಷದ ಶನಿಪೂಜೆ ಡಿ.16 ಸನಿಯಾರ ಪೋರ್ಟ್ ಬೊಂಬೈದ ಮಿಂಟ್ ರೋಡ್ ಡ್ ಇಪ್ಪುನ ಕಾನ್ಜಿ ಖೆತ್ಸಿ ಚೇರಿಟಿಸ್ ಸಭಾಗೃಹಡ್ ನಡಪರೆ ಉಂಡು.

ಬೊಲ್ಪುಗು ಗಣಹೋಮ, ಪ್ರಾರ್ತನೆ, ಶ್ರೀ ಸತ್ಯನಾರಾಯಣ ಮಹಾಪೂಜೆ, ಭಜನೆ, ಶನಿದೇವೆರೆಗ್ ಕಲಶ ಪ್ರತಿಷ್ಠೆ, ಮಧ್ಯಾಹ್ನ ಭಜನೆ, ಶ್ರೀಶನೀಶ್ವರ ಮಹಾತ್ಮೆ ಯಕ್ಷಗಾನ ತಾಳಮದ್ದಳೆ, ನುಪ್ಪು ಪ್ರಸಾದ ಸೇವೆ, ಬಯ್ಯಗ್ ಧಾರ್ಮಿಕ ಸಭಾ ಲೇಸ್, ಮಹಾಮಂಗಳಾರತಿ, ತೀರ್ಥ ಪ್ರಸಾದ ಬೊಕ್ಕ ನುಪ್ಪು ಪ್ರಸಾದ ಸೇವೆ ನಡಪರೆ ಉಂಡು.

ಈ ಲೇಸ್ ಗ್ ಭಕ್ತಾದಿಲು ಮಾತೆರ್ಲಾ ಪಾಲ್ ಪಡೆದ್, ತೀರ್ಥ ಪ್ರಸಾದ ದೆತೊಂದು, ಶ್ರೀ ಶನಿ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಮಾನಾದಿಗೆದ ಗುರ್ಕಾರೆ ಹರೀಶ್ ಜಿ. ಅಮೀನ್, ಗುರ್ಕಾರೆ ರವಿ ಎಲ್ ಬಂಗೇರ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಮಿಜಾರ್ ತುಳುನಾಡ ಪೊರ್ಲು ಚಾರಿಟೇಬಲ್ ಟ್ರಸ್ಟ್ ದ ಮುತಾಲಿಕೆಡ್ ಬಡಪತ್ತ್ ದ ಕುಟುಂಬಗ್ ಪನವುದ ಸಕಾಯ

ಮಿಜಾರ್ ತುಳುನಾಡ ಪೊರ್ಲು ಚಾರಿಟೇಬಲ್ ಟ್ರಸ್ಟ್ (ರಿ.) ದ 34ನೇ ಸೇವಾ ಯೋಜನೆದ ಮುತಾಲಿಕೆಡ್ ಬಡಪತ್ತ್ ದ ಕುಟುಂಬಗ್ ಪನವುದ ಸಕಾಯನ್ ಮಲ್ತೆರ್.

ಕುಡ್ಲ ತಾಲೂಕ್ ದ ಕುಪ್ಪೆಪದವು ಕಿಲೆಂಜಾರು ಗ್ರಾಮದ ದೊಡ್ಡಲಿಕೆ ನಿವಾಸಿ ಮನೋಹರ್ ಮೆರೆನ ಜೋಕುಲು ವಿಕಲಚೇತನರಾತೆರ್. ಮಲ್ಲ ಮಗೆ ನಿದೀಶ್ ಬೊಕ್ಕ ಎಲ್ಯ ಮಗೆ ಧನುಷ್ ಮೊಕ್ಲೆಗ್ ಸಕ್ಕರೆ ಖಾಯಿಲೆ ಉಂಡು. ಮೊಕುಲು ಸ್ಪೂರ್ತಿ ವಿದ್ಯಾಲಯ ಬೆದ್ರ ಶಾಲೆಗ್ ಪೋವೊಂದು ಉಲ್ಲೆರ್. ಈ ಜೋಕುಲೆಗ್ ವ್ಯಾನ್ ಬಾಡಿಗೆಗ್ ತಿಂಗೊಲ್ ಗ್ 2500 ರೂ. ಬೊಕ್ಕ ರಡ್ಡ್ ಜನತ್ತ ಚಿಕಿತ್ಸೆಗ್ ತಿಂಗೊಲ್ ಗ್ 5000 ರೂ.ಮೆಡಿಸಿನ್ ಗ್ ಖರ್ಚ್ ಉಂಡು. ಬಡವೆರಾಯಿನ ಮೇರ್ ಕೂಲಿ ಕೆಲಸ ಮಲ್ತ್ ದ್ ಜೀವನ ಸಾಗವೊಂದು ಉಲ್ಲೆರ್. ಆಂಚಾದ್ ಜೋಕುಲೆನ ನನದ ಚಿಕಿತ್ಸೆಗ್ ಬೊಕ್ಕ ಜೀವನ ನಿರ್ವಹಣೆಗ್ ಸಹಕಾರ ಮಲ್ಪೊಡು ಪಂದ್ ಮಿಜಾರ್ ಕೂಟಗ್ ಬಿನ್ನಾಪು ಮಲ್ತ್ ದ್ ಇತ್ತೆರ್. ಈ ಬಿನ್ನಾಪು ಗ್ ಸ್ಪಂದಿಸಾಯಿನ ಕೂಟ 20,000/- ರೂಪಾಯಿದ ಚೆಕ್ ನ್ ಶ್ರೀ ದುರ್ಗೇಶ್ವರಿ ದೇವಿ ದೇವಲ್ಯ ಕುಪ್ಪೆಪದವುಡ್ ಪ್ರಧಾನ ಅರ್ಚಕೆರ್ ಗುರುಪ್ರಸಾದ್ ಕಾರಂತ ಮೆರೆನ ಮುಖೇನ ಕೊರಿಯೆರ್. ಅಂಚೆನೆ ಕೂಟದ ಸಲಹೆಗಾರೆ ಅಶ್ವತ್ ಶೆಟ್ಟಿ ಸಿದ್ದಕಟ್ಟೆ ಮೇರ್ ತನ್ನ ವೈಯಕ್ತಿಕ ನಿಲೆರ್ದ್ 10,000/- ರೂಪಾಯಿನ್ ಪನವುದ ಸಕಾಯನ್ ಕೊರ್ದು ಸಹಕಾರ ಮಲ್ತೆರ್. ಈ ಪೊರ್ತುಡು ಪದುಕೆರ್ ಬೊಕ್ಕ ಬಡಜನ ಸೇವಾ ಟ್ರಸ್ಟ್ ದ ಮುನೀರ್ ನಡುಪಲ್ಲ ಪಾಲ್ ಪಡೆದಿತ್ತೆರ್.