Uncategorized

Mithun Rai files nomination – Well wishers gather in huge numbers ಮಿಥುನ್ ರೈ ನಾಮಿನೇಶನ್ ಪಾಡುನೆಕ್ಕ್ ಭಾರಿ ಮಲ್ಲ ಸಂಖ್ಯೆಡ್ ಸೇರಿನ ಅಭಿಮಾನಿಲು

ಬೆದ್ರ-ಮುಲ್ಕಿ ವಿಧಾನಸಭೆ ಕ್ಷೇತ್ರದ ಕಾಂಗ್ರೆಸ್ ಅಭ್ಯರ್ಥಿ ಮಿಥುನ್ ರೈ ನಾಮಪತ್ರ ಸಂದಾಯೆರೆ ಭಾರಿ ಮಲ್ಲ ಸಮಾವೇಶ ಸೋಮಾರ ಸ್ವರಾಜ್ಯ ಮೈದಾನಡ್ ನಡತ್ಂಡ್.

ಕೆಪಿಸಿಸಿ ವಕ್ತಾರೆರ್, ಕೊಪ್ಪ ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷೆರ್ ಸುಧೀರ್ ಕುಮಾರ್ ಮರೋಳಿ ದಿಕ್ಸೂಚಿ ಭಾಷಣ ಮಲ್ತ್ ದ್, ‘ಬಿಜೆಪಿದಕ್ಲೆನ ಬಾಯಿ ಬಡಾಯಿ. ಪಾತೆರ್ನನೆನೆ ಜಾಸ್ತಿ, ಮಲ್ತಿನ ದಾಲ ಇಜ್ಜಿ.ಮಾತೆಕ್ಲಾ ಶ್ರಮ ಎಂಕ್ಲೆನ, ಫೋಟೋ ಮಾತ್ರ ಮೋದಿನ, ಅತ್ತಂದೆ ಕಾಂಗ್ರೆಸಿಗೆರೆನ ಉಡಲ್ ಡ್ ರಾಮ ಉಲ್ಲೆರ್, ಕೃಷ್ಣ ಉಲ್ಲೆರ್, ಯೇಸು ಉಲ್ಲೆರ್, ಅಲ್ಲಾಹ್ ಉಲ್ಲೆರ್. ಆಂಡ ಬಿಜೆಪಿದಕ್ಲೆನ ನೆತ್ತೆರ್ ಡ್ ದ್ವೇಷ ರಾಜಕಾರಣ ಮಾತ್ರ ಉಪ್ಪುನ ಪಂದ್ ಪಂಡೆರ್.

ಮಾಜಿ ಸಚಿವೆರ್ ಅಭಯಚಂದ್ರ ಜೈನ್ ಪಾತೆರ್ದ್, ಮಿಥುನ್ ರೈ ಮೆರೆನ್ ಬೆದ್ರಗ್ ಆಯ್ಕೆ ಮಲ್ದಿನಿ ಕೆಪಿಸಿಸಿ ಅತ್ತ್, ಕ್ಷೇತ್ರದ ಜನಕುಲೇ ಮಿಥುನ್ ರೈ ಮೆರೆನ್ ಆಯ್ಕೆ ಮಲ್ತ್ ದಿನಿ. ಮಿಥುನ್ ರೈಗ್ 40% ಕಮಿಷನ್ ದುಡ್ಡುದ ಅಗತ್ಯ ಇಜ್ಜಿ. ಅಂಚಿನ ಇಲ್ಲರ್ದ್ ಬತ್ತಿನಾರ್ ಮಿಥುನ್ ರೈ. ಕರಿನ 5 ವರ್ಷೊಲೆಡ್ ಬೆದ್ರ ಕ್ಷೇತ್ರಡ್ ಬಿಜೆಪಿ ಮಲ್ತಿನ ಭೃಷ್ಟಾಚಾರ ನೇರ್ದ್ ದುಂಬು ಏರ್ಲ ಮಲ್ತಿಜೆರ್. ಮಿಥುನ್ ರೈ ಗೆಲ್ತ್ಂಡ ನಮ ಮಾತೆರ್ಲಾ ಶಾಸಕೆರಾಯಿಲೆಕ್ಕನೇ ಪಂದ್ ಪಂಡೆರ್.

ಅಭ್ಯರ್ಥಿ ಮಿಥುನ್ ರೈ ಪಾತೆರ್ದ್, ‘ಅಭಯಚಂದ್ರ ಜೈನ್ ಮೇರ್ ಮಲ್ತಿನ ತ್ಯಾಗನ್ ಎಂಕುಲು ಏಪಲ ಮದಪರೆ ಬಲ್ಲಿ. ಯುವ ಕಾಂಗ್ರೆಸ್ ದಿನರ್ದಿಂಚ ಇಡೆ ಮುಟ್ಟ ಒಟ್ಟಿಗೆ ಉಂತಿನ ಮಾತ ಕಾಂಗ್ರೆಸ್ ಕಾರ್ಯಕರ್ತೆರೆಗ್, ತಿದ್ದ್ ದ್ ಬುಲೆಯೆರೆ ಕಾರಣ ಆಯಿನ ಪೆರಿಯೆರೆಗ್, ರಾಜಕೀಯವಾದ್ ಬುಲೆಪಾಯಿನ ಮತೆರೆನ್ಲಾ ನೆಂಪು ಮಲ್ಪುವೇ ಪಂದ್ ಪಂಡೆರ್. ಅತ್ತಂದೆ ಮಿಥುನ್ ರೈ ಅಭಯ ಚಂದ್ರೆರೆನ ನಡುಟ್ ಘರ್ಷಣೆ ಆತ್ಂಡ್ ಪಂದ್ ವಿರೋಧ ಪಕ್ಷದಕುಲು ಅಪಪ್ರಚಾರ ಮಲ್ತೊಂದು ಉಲ್ಲೆರ್. ಅಭಯಚಂದ್ರೆರ್ ಶ್ರೀಕೃಷ್ಣಲೆಕ್ಕ ನಮ್ಮ ಸಾರಥಿ ಆತೆರ್. ಮೇರ್ ಏಪಲ ನಮ್ಮೊಟ್ಟಿಗೆ ಇಪ್ಪುನಾರ್. ಅರೆಗ್ಲಾ ಎಂಕ್ಲೆಗ್ಲ ಘರ್ಷಣೆ ಆವರೆ ಏಪಲ ಸಾಧ್ಯ ಇಜ್ಜಿ ಪಂದ್ ಪಂಡೆರ್.

ವಿಧಾನ ಪರಿಷತ್ ಸದಸ್ಯೆರ್ ಬಿ. ಹರೀಶ್ ಪಾತೆರ್ದ್,ಮಾತ ಕಾರ್ಯಕರ್ತೆರ್ ನನ ವೋಟುಗು ಒರಿನ 24 ದಿನ ಬೆಂದ್ ದ್, 25 ಸಾರರ್ದ್ ಎಚ್ಚ ವೋಟುದ ಅಂತರಡ್ ಮಿಥುನ್ ರೈ ಮೆರೆನ್ ಗೆಂದಾಲೆ, 5 ವರ್ಷ ಮಿಥುನ್ ರೈ ನ್ ಕ್ಷೇತ್ರಗಾದ್ ಬೆನ್ಪುನ ಅವಕಾಶ ಮಲ್ತ್ ಕೊರೊಡು ಪಂದ್ ಪಂಡೆರ್.

ಯುಟಿ ಖಾದರ್ ಪಾತೆರ್ದ್, ‘ಇನಿ ಅಧಿಕಾರಗಾದ್, ಟಿಕೆಟ್ ಗಾದ್ ಸಂಘರ್ಷ ನಡಪುನ ಪೊರ್ತುಡು ಹಿರಿಯೆರ್ ಯುವ ನಾಯಕೆರಾದುಪ್ಪುನ ಮಿಥುನ್ ರೈ ಮೆರೆಗ್ ಅವಕಾಶ ಕೊರ್ದು ರಾಜ್ಯಗ್ ಮಾದರಿ ಆತೆರ್. ಇನಿ ಮಿಥುನ್ ರೈ ಮೆರೆನ್ ಗೆಂದಾವುನ ಮಾತ್ರ ಅತ್ತ್, ರಾಜ್ಯಡ್ ಇಪ್ಪುನ ಜನವಿರೋಧಿ ಬಿಜೆಪಿನ್ ಸೋಪಾದ್ ರಾಜ್ಯಡ್ ಕಾಂಗ್ರೆಸ್ ಸರಕಾರ ಕನಪುನ ದಿಟ್ಟಿಡ್ ಗೆಂದಾವೊಡು ಪಂದ್ ಪಂಡೆರ್. ಬಿಜೆಪಿ ಸರಕಾರ ಜನಕುಲು ಗಲಸುನ ಉಪ್ಪುದ ಮಿತ್ತ್ ಟ್ಯಾಕ್ಸ್, ಪ್ರತಿಯೊಂಜೆತ್ತ ಮಿತ್ತ್ ಲ ಟ್ಯಾಕ್ಸ್ ಪಾಡ್ದ್ ಭೃಷ್ಟಾಚಾರದ ಪರಮಾವಧಿದ ಆಡಳಿತ ಮಲ್ದ್ಂಡ್. ಅತ್ತಂದೆ ಗ್ಯಾಸ್ ಬಿಲೆ ಎಚ್ಚ, ಅಡಿಗೆ ಎಣ್ಣೆದ ಬಿಲೆ ಎಚ್ಚ, ಬಂಗಾರ್ ದ ಬಿಲೆ ಎಚ್ಚ ಮಾತಲ ಎಚ್ಚ ಮಲ್ತ್ ದ್ ಜನಕ್ಲೆಗ್ ಬದ್ಕೆರೆ ಕಷ್ಟ ಆತ್ಂಡ್ ಪಂದ್ ಪಂಡೆರ್.

ಕುಡ್ಲ ಕಾರ್ಪೋರೇಟರ್ ಎಸಿ ವಿನಯರಾಜ್ ಪಾತೆರ್ದ್, ಮುಲ್ಕಿ-ಬೆದ್ರ ಕ್ಷೇತ್ರ ಬಿಜೆಪಿಗ್ ಇಪ್ಪುನ ಕ್ಷೇತ್ರ ಪಂದ್ ಬಿಜೆಪಿದಕುಲು ಯೋಚನೆ ಮಲ್ಪರೆ ಬಲ್ಲಿ. ಈ ಕ್ಷೇತ್ರ ಕಾಂಗ್ರೆಸ್ಸ್ ದ ನೆಲೆ ಪಂದ್ ಬಿಜೆಪಿದಕುಲು ತೆರಿವೊನೊಡು ಪಂದ್ ಪಂಡೆರ್.

ಮಮತಾ ಗಟ್ಟಿ ಪಾತೆರ್ದ್, ಮಿಥುನ್ ರೈ ಪನ್ಪುನ ದಕ್ಷ ಯುವ ನಾಯಕಗ್ ಅವಕಾಶ ಕೊರ್ನ ಅಭಯಚಂದ್ರ ಜೈನ್ ಮೆರೆನ್ ಅಭಿನಂದಿಸಾವೆ ಪಂದ್ ಪಂಡೆರ್. ಅತ್ತಂದೆ ಇನಿ 1,200 ರೂ ಕೊರ್ದು ಗ್ಯಾಸ್ ಕನನಗ ಪೊಂಜೋವ್ ನಕ್ಲೆಗ್ ಏತ್ ಸಂಕಷ್ಟ ಆಪುಂಡು ಪಂದ್ ಗೊತ್ತು. ಅಂಚಾದ್ ಈ ಸರ್ತಿ ಪೊಂಜೋವ್ ನಕುಲು ಬಿಜೆಪಿನ್ ಸೋಪಾವುನ ಬೇಲೆನ್ ಮಲ್ಪುವೆರ್ ಪಂದ್ ಮಮತಾ ಗಟ್ಟಿ ಪಂಡೆರ್.

Mithun Rai files nomination – Well wishers gather in huge numbers

Moodbidri: Congress candidate for Moodbidri Mulki constituency Sri Mithun Rai filed his nomination on Monday . A rally was organised at Swaraj Maidan Moodbidri that drew a huge crowd of well wishers and party workers. Many senior leaders of the Congress including Abhaya Chandra Jain, UT Kadhar, Vidhana Parishad member B Harish amongst others.

Congress starts drive to register ” Guarantee” card ಕಾಂಗ್ರೆಸ್ “ಗ್ಯಾರಂಟಿ”ಲೆನ ನೋಂದಣಿಗ್ ಅಭಿಯಾನ ಸುರು ಮಲ್ತಿನ ಇನಾಯತ್ ಅಲಿ

ಕುಡ್ಲ: “ಕಾಂಗ್ರೆಸ್ ಪಕ್ಷ ಘೋಷಣೆ ಮಲ್ತಿನ ಗೃಹಲಕ್ಷ್ಮಿ ಬೊಕ್ಕ ಗೃಹಜ್ಯೋತಿ ಗ್ಯಾರಂಟಿಲೆನ್ ದೆತೊನರೆ ಜನಕುಲೆನ್ ನೋಂದಣಿ ಮಲ್ಪುನ ಇಸೇಸ ಅಭಿಯಾನನ್ ಇನಿರ್ದೆ ಸುರು ಮಲ್ಪುವ” ಪಂದ್ ಕರ್ನಾಟಕ ಪ್ರದೇಶ ಕಾಂಗ್ರೆಸ್ ಸಮಿತಿದ ಪ್ರಧಾನ ಕಾರ್ಯದರ್ಶಿ ಇನಾಯತ್ ಅಲಿ ಪತ್ರಿಕಾಗೋಷ್ಠಿಡ್ ತೆರಿಪಾಯೆರ್.

“ಸಾಮಾನ್ಯ ಜನಕ್ಲೆನ ಬದ್ ಕ್ ನ್ ಸುಗಮ ಮಲ್ಪರೆ ಯಾನ್ ಬೊಕ್ಕ ಎನ್ನ ಕೂಟದಕುಲು ಕುಡ್ಲ ಉತ್ತರ ವೊಧಾನಸಭೆ ಕ್ಷೇತ್ರದ ಪ್ರತಿ ಇಲ್ಲ ಬಾಕಿಲ್ ಗ್ ಪೋದು ಕಾಂಗ್ರೆಸ್ ಪಕ್ಷ ಕೊರ್ನ ಗ್ಯಾರಂಟಿಲೆನ ಪೊಲಬುನು ಜನಕ್ಲೆಗ್ ಎತ್ತಾವ. ಎಂಕ್ಲೆನ ಕೂಟ ಕಾಂಗ್ರೆಸ್ ಪಕ್ಷ ಬುಡುಗಡೆ ಮಲ್ತಿನ ಗ್ಯಾರಂಟಿಲೆನ ಬಗ್ಗೆ ಜನಕ್ ತೆರಿಪಾವುನ ಮೊಬೈಲ್ ಅಪ್ಲಿಕೇಶನ್ ಅಭಿವೃದ್ಧಿ ಮಲ್ದ್ಂಡ್. ಕ್ಷೇತ್ರದ ಭೇಟಿದ ಪೊರ್ತುಡು ಪುದರ್, ಪ್ರಾಯ, ಮೊಬೈಲ್ ನಂಬರ್,ಅಡ್ರೆಸ್ ಈ ಪೊಲಬುನ್ ಪಡೆದ್ ಕಾಂಗ್ರೆಸ್ ಪಕ್ಷದ ಗ್ಯಾರಂಟಿಲೆಗ್ ನೋಂದಣಿ ಮಲ್ಪುವ” ಪಂದ್ ಪಂಡೆರ್.

“ಎಂಕ್ಲೆನೊಟ್ಟಿಗೆ ನೋಂದಣಿ ಮಲ್ತಿನ ಜನತ್ತ ಆದ್ಯತೆದ ಮಿತ್ತ್ ಕಾಂಗ್ರೆಸ್ ಗ್ಯಾರಂಟಿದ ಪ್ರಯೋಜನ ದೆತೊನುನೆನ್ ತೆರಿವೊನರೆ “IAM” ಫೌಂಡೇಶನ್ ಕೊರ್ನ ಆದ್ಯತೆದ ಕಾರ್ಡ್‌ದೊಟ್ಟಿಗೆ ನಮ ಕಾಂಗ್ರೆಸ್ ಪಕ್ಷ ಕೊರ್ನ ಗ್ಯಾರಂಟಿ ಕಾರ್ಡ್ ಲೆನ್ ಜನಕ್ ಕೊರ್ಪ ಪಂದ್ ಪಂಡೆರ್.

ಅತ್ತಂದೆ ಕಾಂಗ್ರೆಸ್ ಪಕ್ಷ ಅಧಿಕಾರಗ್ ಬರ್ಪುಂಡು. ಎಂಕ್ಲೆ ಸರ್ಕಾರ ರಚನೆ ಮಲ್ಪುವ. ಅವ್ವೇ ಪೊರ್ತುಡು ಎಂಕುಲು ಈ ಇಸೇಸವಾಯಿನ ಇಲ್ಲ್-ಇಲ್ಲ್ ಅಭಿಯಾನನ್ ಸುರು ಮಲ್ಪುವ” ಇನಾಯತ್ ಅಲಿ ಮೇರ್ ಪಂಡೆರ್. ಅತ್ತಂದೆ ನೋಂದಣಿ ಅಭಿಯಾನಡ್ ಎಚ್ಚ ಸಂಖ್ಯೆಡ್ ಜನ ಪಾಲ್ ಪಡೆವೊಡು ಪಂದ್ ಜನಕ್ಲೆಡ ಬಿನ್ನಾಪು ಮಲ್ತೆರ್.

ಕಾಂಗ್ರೆಸ್ ಪಕ್ಷ ಘೋಷಣೆ ಮಲ್ತಿನ ಗೃಹಜ್ಯೋತಿ ಗ್ಯಾರಂಟಿ ಮುಖೇನ ಪ್ರತಿ ಇಲ್ಲಗ್ 200 ಯೂನಿಟ್ ಕರೆಂಟ್ ಧರ್ಮಗ್ ಕೊರ್ಪುಂಡು. ಅತ್ತಂದೆ ಕಾಂಗ್ರೆಸ್ ಪಕ್ಷದ ಗೃಹಲಕ್ಷಿ ಗ್ಯಾರಂಟಿಯಡಿ ಪ್ರತಿ ಕುಟುಂಬದ ಯಜಮಾನ್ದಿಗ್ ತಿಂಗೊಲುಗು 2000 ರೂ. ಕೊರ್ರೆ ಉಲ್ಲ. ‌ಕಾಂಗ್ರೆಸ್ ಪಕ್ಷ ಸಮಾಜದ ಕಲ್ಯಾಣ ಬೊಕ್ಕ ಪ್ರಗತಿಪರ ಬುಲೆಚ್ಚಿಲ್ ದ ರಾಜಕೀಯನ್ ನಂಬೂಂಡು. ಸಾಮಾನ್ಯ ಜನಕುಲು ಎದುರಿಸಾವೊಂದು ಇಪ್ಪುನ ಸಮಸ್ಯೆಲೆನ್ ಸರಿ ಮಲ್ಪುನ ಉದ್ದೇಶರ್ದ್ ಪಕ್ಷ ಈ ಗ್ಯಾರಂಟಿನ್ ಘೋಷಣೆ ಮಲ್ದ್ಂಡ್” ಪಂದ್ ಪಂಡೆರ್.

Congress starts drive to register ” Guarantee” card

Mangalore: A special drive to register for guarantee card under the Gruhalakshmi and Gruhajyothi scheme will be started in Mangalore today said Inayat Ali chief secretary of Karnataka Pradesh Congress Samithi.