ಹಾಕಿ ಮಾಂತ್ರಿಕೆ ಮೇಜರ್ ಧ್ಯಾನ್ ಚಂದ್ ಮೆರೆನ ಪುಟ್ಟುದಿನತ್ತ ನೆಂಪುಗಾದ್ ಇನಿ ಭಾರತಡ್ ರಾಷ್ಟ್ರೀಯ ಗೊಬ್ಬುದ ದಿನ ಆದ್ ಆಚರಣೆ ಮಲ್ಪುವೆರ್.
1905 ಆಗಸ್ಟ್ 29 ಕ್ಕ್ ಪುಟ್ಟಿನ ಧ್ಯಾನ್ ಚಂದ್, 1928, 1932 ಬೊಕ್ಕ 1936 ಟ್ಟ್ ಭಾರತಗ್ ಒಲಿಂಪಿಕ್ ಹಾಕಿಡ್ ಬಂಗಾರ್ ಪದಕನ್ ಗೆಂದ್ ದ್ ಕನತ್ ಕೊರ್ತಿನಾರ್. ಮೆರೆನ ಗೊಬ್ಬು ತೂದು ಜರ್ಮನಿದ ಸರ್ವಾಧಿಕಾರಿ ಆದಿತ್ತಿನ ಹಿಟ್ಲರ್ ಕುಸಿ ಆದಿತ್ತೆರ್ ಪಂದ್ ಉಲ್ಲೇಖ ಉಂಡು. 2012 ಟ್ಟ್ ಭಾರತಡ್ ಸುರುತ್ತ ಸರ್ತಿ ರಾಷ್ಟ್ರೀಯ ಕ್ರೀಡಾದಿನನ್ ಆಚರಣೆ ಮಲ್ಪರೆ ಸುರು ಮಲ್ತೆರ್.
ಒಡಿಪು: ಕಾಸ್ ಡಬ್ಬಲ್ ಮಲ್ಪುನ ಬಗೆಟ್ಟ್ ವಾಟ್ಸ್ ಆ್ಯಪ್ ಮೆಸೇಜ್ ನ್ ನಂಬೂದು ಪೊಣ್ಣು ಒರ್ತಿ 1.1 ಲಕ್ಷ ರೂ. ಕಳೆವೊಂಡಿನ ಘಟನೆ ಒಡಿಪುಡ್ ನಡತ್ಂಡ್.
ಪೊಣ್ಣುಯೊರ್ತಿಗ್ ವಾಟ್ಸ್ ಆ್ಯಪ್‌ಡ್ 9122931451 ನೇ ನಂಬ್ರರ್ದ್ ಕಾಸ್ ನ್ ಜಾಸ್ತಿ ಮಲ್ಪುನ ಬಗೆಟ್ಟ್ ಮೆಸೇಜ್ ಬೈದ್ಂಡ್. ಈ ಮೊಬೈಲ್‌ ನಂಬರ್‌ಗ್ ಸಂಪರ್ಕ ಮಲ್ಪುನಗ ಕಾಸ್ ಜಾಸ್ತಿ ಮಲ್ಪುನ ಬಗೆಟ್ಟ್ ತೆರಿಪಾದೆರ್. ನೆನ್ ನಂಬಿನ ಪೊಣ್ಣು ಆ.9 ರ್ದ್ 10 ಮುಟ್ಟ ಬೇತೆ ಬೇತೆ ದಿನೊಟ್ಟು 1,01,000/- ರೂ. ಕಾಸ್ ನ್ ಖದೀಮೆರ್ ಕೊರ್ತಿನ ಫೋನ್‌ ಪೇ ಐಡಿ, ಬೊಕ್ಕ ಅಕೌಂಟ್ ಗ್ ಪಾಡ್ದೆರ್.
ಆಂಡ ಆರೋಪಿಲು ಕಾಸ್ ಜಾಸ್ತಿ ಮಲ್ಪಂದೆ, ವರ್ಗಾವಣೆ ಮಲ್ತಿನ ಕಾಸ್ ನ್ ವಾಪಸ್ ಕೊರಂದೆ ಮೋಸ ಮಲ್ತಿನ ಬಗೆಟ್ಟ್ ದೂರು ಕೊರ್ತೆರ್. ಈ ಬಗೆಟ್ಟ್ ಸೆನ್ ಅಪರಾಧ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.
ಸಂಸ್ಥೆದ ಕ್ರೆಡಿಟ್ ಸೊಸೈಟಿಗ್ ಮಾತೆರ್ನಲ ಸಹಕಾರ ಇಪ್ಪಡ್: ಶಶಿಧರ್ ಕೆ. ಶೆಟ್ಟಿ ಇನ್ನಂಜೆ
ಬೊಂಬೈ: ವಸಯಿ ಪರಿಸರಡ್ ಯಕ್ಷಗಾನದ ಮೂಜಿ ಸಂಸ್ಥೆಲು ಬುಲೆವೊಂದು ಉಂಡು. ಈ ಸಂಸ್ಥೆಲೆಡ್ ನೂದೆರ್ದ್ ಎಚ್ಚ ಯುವ ಪ್ರತಿಭೆಲು ಉಲ್ಲೆರ್. ಊರುದ ಯುವ ಪ್ರತಿಭೆಲೆನ್ ಇಡೆಗ್ ಬರ್ಪುಲೆಕ್ಕ ಮಲ್ತ್ ದ್, ಅಕ್ಲೆನ ಪ್ರತಿಭೆನ್ ಮುಲ್ಪ ತೂಪಾವುಲೆಕ್ಕ ಮಲ್ತ್ಂಡ, ಮುಲ್ಪದ ಯುವ ಪ್ರತಿಭೆಗ್ ಎಚ್ಚದ ಸ್ಪೂರ್ತಿ ತಿಕಿಲೆಕ್ಕ ಆಪುಂಡು. ನೆಕ್ಕ್ ಪ್ರೋತ್ಸಾಹ ಕೊರೊಂದು ಇಪ್ಪುನ ತುಳು ಕೂಟ ಫೌಂಡೇಶನ್ ದ ತನ್ನ ಅಲ್ಪಾವಧಿದ ಸಮಾಜ ಸೇವೆದೊಟ್ಟಿಗೆ ಸದ್ಯಡೇ ನಮ್ಮ ಸಂಸ್ಥೆದ ಕೋ ಆಪರೇಟಿವ್ ಕ್ರೆಡಿಟ್ ಸೊಸೈಟಿ ಸ್ಥಾಪನೆ ಆಯರೆ ಉಂಡು. ಆಂಚಾದ್ ಜೋಕುಲೆಗ್ ಶೈಕ್ಷಣಿಕವಾದ್ ಎಚ್ಚದ ಸಕಾಯ ಮಲ್ಪರೆ ಸಾಧ್ಯ ಆಪುಂಡು ಪಂದ್ ತುಳುಕೂಟ ಫೌಂಡೇಶನ್ ನಾಲಾಸೋಪಾರದ ಅಧ್ಯಕ್ಷೆರ್ ಶಶಿಧರ್ ಕೆ. ಶೆಟ್ಟಿ ಇನ್ನಂಜೆ ಪಂಡೆರ್.
ಮೇರ್ ಆ.13 ಕ್ಕ್ ನಾಲಾಸೋಪಾರ (ಪ) ಹೋಟೆಲ್ ಗ್ಯಾಲಕ್ಸಿದ ಸಭಾಂಗಣಡ್ ನಡತಿನ, ಸಿರಿ ಚಾವಡಿ ಸಂಘಟನಾ ಪುರಸ್ಕಾರ ಪಡೆಯಿನ ತುಳುಕೂಟ ಫೌಂಡೇಶನ್ ನಾಲಾಸೋಪಾರದ ಪೊಂಜೋವ್ ಲೆನ ವಿಭಾಗ ಆಯೋಜನೆ ಮಲ್ತಿನ ಅಟಿಡೊಂಜಿ ದಿನ ಲೇಸ್ ದ ಗುರ್ಕಾರ್ಮೆನ್ ಒಯಿಸೊಂದು, ಪಾತೆರ್ದ್, ಸರ್ವಸದಸ್ಯೆರೆನ ಪರಿಶ್ರಮರ್ದ್ ತುಳು ಕೂಟ ಫೌಂಡೇಶನ್ ದ ಮಾತ ಕಜ್ಜೊಲು ಎಡ್ಡೆ ರೀತಿಡ್ ನಡತೊಂದು ಉಂಡು. ಅಟಿಡೊಂಜಿ ದಿನನ್ ಪೊರ್ಲುಡೇ ನಡಪಾದ್ ಕೊರ್ನ ಪೊಂಜೋವ್ ಲೆನ ವಿಭಾಗಗ್, ಪ್ರತ್ಯಕ್ಷ ಬೊಕ್ಕ ಪರೋಕ್ಷವಾದ್ ಸಹಕಾರ ಮಲ್ತಿನ ಮಾತೆರೆಗ್ಲಾ ಅಭಿನಂದನೆ ಸಂದಾಯೆರ್.
ಕಾರ್ಯಕ್ರಮ ಸಮಿತಿದ ಕಾರ್ಯಾಧ್ಯಕ್ಷೆರ್ ಗಣೇಶ್ ವಿ ಸುವರ್ಣ ಪಾತೆರ್ದ್, ಇನಿತ್ತ ಮಾತ ಲೇಸ್ ಲು ಪೊರ್ಲುಡು ನಡತ್ಂಡ್. ನೆಕ್ಕಾದ್ ಮಾತ ಪೊಂಜೋವ್ ನಕ್ಲೆಗ್ ಅಭಿನಂದನೆ ಸಂದಾವೊಡಾಪುಂಡು. ಊರುದ ಬೊಕ್ಕ ಪರವೂರುದ ಪ್ರತಿಭೆನ್ ಗುರುತಿಸಾದ್ ಮುಲ್ಪ ಸನ್ಮಾನ ಮಲ್ದ. ಅವೆನ್ ತೂದು ನಮ್ಮ ಜೋಕುಲು ನನಲ ಎಚ್ಚದ ಮಟ್ಟಡ್ ಉಮೇದ್ ಪಡೆಯೆರೆ ಸಾಧ್ಯ ಪಂದ್ ಪಂಡೆರ್.
ಚಾವಡಿಡ್ ಇತ್ತಿನ ಬಿನ್ನೆರ್ ತುಡರ್ ಅರ್ಲಾದ್ ಲೇಸ್ ದ ಉದಿಪನ ಮಲ್ತೆರ್. ಯಶೋದಾ ಕೋಟ್ಯಾನ್, ಮಲ್ಲಿಕಾ ಆರ್. ಪೂಜಾರಿ ಬೊಕ್ಕ ಸುಜಾತಾ ಶೆಟ್ಟಿ ಪ್ರಾರ್ತನೆ ಮಲ್ತೆರ್.
ಉಪಾನ್ಯಾಸಕಿ ಅರ್ಪಿತಾ ಪ್ರಶಾಂತ್ ಶೆಟ್ಟಿ ಕಟಪಾಡಿ ಮೇರ್ ಪೆಲಕಾಯಿ ತುಂಡು ಮಲ್ತ್ ದ್ ಲೇಸ್ ಗ್ ಚಾಲನೆ ಕೊರ್ದು, ಆಟಿದ ಬಗೆಟ್ಟ್ ಪಾತೆರ್ದ್, ಆಟಿ ಕಾಲಿ ಒಂಜಿ ದಿನಕ್ಕ್ ಮಾತ್ರ ಸೀಮಿತ ಆವಂದೆ ತಿಂಗೊಲ್ದ 31 ದಿನಲ ಆಟಿ ಉಂಡು. ತುಳುನಾಡ್ ದ ಸಂಸ್ಕೃತಿನ್ ಮಸ್ತ್ ಪೊರ್ಲುಡು ಮುಲ್ಪದ ಜನಕ್ಲೆಗ್ ತೆರಿಪುಲೆಕ್ಕ, ಯೋಚನೆನ್ ಮಸ್ತ್ ಅರ್ಥಪೂರ್ಣವಾದ್ ಆಯೋಜನೆ ಮಲ್ದರ್ ಪಂದ್ ಪಂಡೆರ್.
ಈ ಪೊರ್ತುಡು ಯುವ ಭಾಗವತೆರ್, ಯಕ್ಷ ಮಾಣಿಕ್ಯ ಕು. ಚಿಂತನ ಹೆಗಡೆ ಮಾಳಕೋಡ್ ಮೆರೆಗ್ ಸನ್ಮಾನ ಮಲ್ತೆರ್.ಮಹಿಳಾ ವಿಭಾಗದ ಕಾರ್ಯದರ್ಶಿ ಮಲ್ಲಿಕಾ ಆರ್. ಪೂಜಾರಿ ಸನ್ಮಾನ ಪತ್ರ ಓದಿಯೆರ್.
ಕು.ಚಿಂತನ ಹೆಗಡೆ ಬೊಕ್ಕ ಕೂಟದಕ್ಲೆರ್ದ್ “ಯಕ್ಷಚಿಂತನಾನುರಾಗ” ಲೇಸ್ ನಡತ್ಂಡ್. ಈ ಲೇಸ್ ಡ್ ಅಕ್ಲೆನೊಟ್ಟಿಗೆ ಚಿನ್ಮಯ್ ಹೆಗಡೆ (ಚೆಂಡೆ) ಬೊಕ್ಕ ರಾಜಾರಾಂ ಹೆಗ್ಡೆ (ಮದ್ದಳೆ) ಡ್ ಸಹಕಾರ ಮಲ್ತೆರ್. ಯಕ್ಷಗಾನದ ಹಿರಿಯ ಕಲಾವಿದೆ ಉದಯ್ ಹೆಗಡೆ ಲೇಸ್ ದ ಸುಧಾರಿಕೆ ಮಲ್ತೆರ್.
ಚಾವಡಿಡ್ ಸಂಸ್ಥೆದ ಗೌರವಾಧ್ಯಕ್ಷೆರ್ ಒ ಪಿ. ಪೂಜಾರಿ, ಹರೀಶ್ ಶೆಟ್ಟಿ ಗುರ್ಮೆ, ಉಪಾಧ್ಯಕ್ಷೆರ್ ಮಂಜುನಾಥ ಶೆಟ್ಟಿ ಕೊಡ್ಲಾಡಿ, ಜಗನ್ನಾಥ್ ಶೆಟ್ಟಿ ಪಳ್ಳಿ, ರಾಜೇಶ್ ವೈ ಕರ್ಕೇರ, ಮಹಿಳಾ ವಿಭಾಗದ ಕೋಶಾಧಿಕಾರಿ ನಳಿನಿ ಪೂಜಾರಿ, ಸಂಚಾಲಕಿ ಜಯ ಎ. ಶೆಟ್ಟಿ, ಜೊತೆ ಕಾರ್ಯದರ್ಶಿ ಸುರೇಖಾ ಬಂಗೇರ, ಯುವ ವಿಭಾಗದ ಉಪಕಾರ್ಯಧ್ಯಕ್ಷೆರ್ ದರ್ಶನ್ ಪೂಜಾರಿ ಬೊಕ್ಕ ಪದಾಧಿಕಾರಿಲು ಇತ್ತೆರ್.
ಮಹಿಳಾ ವಿಭಾಗದ ಕಾರ್ಯಾಧ್ಯಕ್ಷೆರ್ ಉಮಾ ಸತೀಶ್ ಶೆಟ್ಟಿ ಮಾತೆರೆನ್ಲಾ ಎದ್ಕೊನಿಯೆರ್. ಸದಸ್ಯೆರೆರ್ದ್ ಬೇತೆ ಬೇತೆ ಸಾಂಸ್ಕೃತಿಕ ವೈಭವ ನಡತ್ಂಡ್. ಸಾಂಸ್ಕೃತಿಕ ಲೇಸ್ ನ್ ಕುಮಾರಿ ಕೀರ್ತಿ ಸುಧಾರಿಕೆ ಮಲ್ತೆರ್. ಸಭಾ ಲೇಸ್ ನ್ ಪ್ರವೀಣ್ ಶೆಟ್ಟಿ ಕಣಂಜಾರ್ ಸುಧಾರಿಕೆ ಮಲ್ತೆರ್. ಯಶೋದಾ ಕೋಟ್ಯಾನ್ ಸೊಲ್ಮೆ ಸಂದಾಯೆರ್.
ಕರ್ನಾಟಕ ರಾಜ್ಯ ಪರಿವರ್ತನಾ ಸಂಸ್ಥೆದ (ಯೋಜನಾ ಮಂಡಳಿ) ಉಪಾಧ್ಯಕ್ಷೆರಾದ್ ರಾಜ್ಯಸಭೆತ್ತ ಮಾಜಿ ಸದಸ್ಯೆರ್ ಎಂ.ವಿ. ರಾಜೀವ್ ಗೌಡ ನೇಮಕ ಆತೆರ್.
ರಾಜೀವ್ ಮೆರೆಗ್ ಸಂಪುಟ ದರ್ಜೆದ ಸಚಿವೆರೆ ತಾನ ಕೊರ್ದು, ಸರ್ಕಾರ ಆದೇಶ ಕೊರ್ತುಂಡು. ಆರ್ಥಿಕ ಬೊಕ್ಕ ಶಿಕ್ಷಣ ತಜ್ಞೆರಾಯಿನ ಮೇರ್ ಬೆಂಗ್ಲೂರ್ ದ ಐಐಎಂ ಪ್ರಾಧ್ಯಾಪಕೆರಾದ್, ಸಾರ್ವಜನಿಕ ನೀತಿ ಕೇಂದ್ರದ ಮುಖ್ಯಸ್ಥೆರಾದ್, ಆರ್ ಬಿಐ ಕೇಂದ್ರ ಮಂಡಳಿ ನಿರ್ದೇಶಕೆರಾದ್ ಸೇವೆ ಸಂದಾದೆರ್. ಕಾಂಗ್ರೆಸ್ ದ ವೋಟುದ ಪ್ರಣಾಳಿಕೆದ ಸಂಚಾಲಕೆರಾದಿತ್ತೆರ್.
ದ.ಕ.ಜಿಲ್ಲಾಡಳಿತದ ಮುತಾಲಿಕೆಡ್ ಉಸ್ತುವಾರಿ ಸಚಿವೆರಾಯಿನ ದಿನೇಶ್ ಗುಂಡೂರಾವ್ 77 ನೇ ಸ್ವಾತಂತ್ರೋತ್ಸವದ ಧ್ವಜಾರೋಹಣ ಮಲ್ತ್ ದ್ ಸಂದೇಶದ ಭಾಷಣನ್ ಮಲ್ತೆರ್.
ಈ ಪೊರ್ತುಡು ರಾಷ್ಟ್ರೀಯ ವೈದ್ಯಕೀಯ ದಿನಾಚರಣೆದ ದಿನತಾನಿ ವೈದ್ಯಕೀಯ ಕ್ಷೇತ್ರಡ್ ಅತ್ಯುತ್ತಮ ಸಾದನೆ ಮಲ್ತಿನ ವೆನ್ಲಾಕ್ ಆಸ್ಪತ್ರೆದ ಖ್ಯಾತ ಮೂತ್ರ ರೋಗ ತಜ್ಞೆರ್ ಬೊಲ್ತೆರ್‌ದ ಡಾ.ಸದಾನಂದ ಪೂಜಾರಿ ಬೊಕ್ಕ ಪುತ್ತೂರು ಸರಕಾರಿ ಆಸ್ಪತ್ರೆದ ಮೂಳೆ ತಜ್ಞೆರಾಯಿನ, ಇಂಚೊಗು ಬಿ.ಸಿ.ರಾಯ್ ಪ್ರಶಸ್ತಿ ಪಡೆದಿನ ಅಜಯ್ ಎಮ್.ಬಿ. ಮೇರೆಗ್ ಸ್ವಾತಂತ್ರ‍್ಯ ದಿನತಾನಿ ಕುಡ್ಲಡ್ ಉಸ್ತುವಾರಿ ಸಚಿವೆರ್ ಗೌರವಿಸಾದ್ ಅಭಿನಂದನೆ ಸಲ್ಲಿಸಾಯೆರ್.
ಈ ಪೊರ್ತುಡು ವಿಧಾನ ಪರಿಷತ್ ಶಾಸಕೆರ್ ಕೆ.ಹರೀಶ್ ಕುಮಾರ್, ಜಿಲ್ಲಾಧಿಕಾರಿಲು, ಉಸ್ತುವಾರಿ ಸಚಿವರ ಆಪ್ತ ಕಾರ್ಯದರ್ಶಿ.ಕೆ.ಎ. ಹಿದಾಯಿತುಲ್ಲ ,ಅಪರ ಜಿಲ್ಲಾಧಿಕಾರಿಲು, ಕುಡ್ಲದ ಪೋಲಿಸ್ ಕಮಿಷನರ್, ಜಿಲ್ಲಾ ಪೋಲಿಸ್ ವರಿಷ್ಠಾಧಿಕಾರಿಲು ,ಜಿಲ್ಲಾ ಆರೋಗ್ಯಾಧಿಕಾರಿಲು, ಸಹಾಯಕ ಕಮಿಷನರ್, ಬೊಕ್ಕ ಇಲಾಖಾಧಿಕಾರಿಲು ಪಾಲ್ ಪಡೆದಿತ್ತೆರ್.
ಅಮೃತಸಂಜೀವಿನಿ (ರಿ.) ಕುಡ್ಲ ನೆತ್ತ 8ನೇ ವರ್ಷೊದ ಉಚ್ಚಯ, ಸಭಾ ಲೇಸ್ ಬೊಕ್ಕ 13 ಬಡಪತ್ತ್ ಕುಟುಂಬಗ್ ಪನವುದ ಸಕಾಯ ಪಟ್ಟುನ ಲೇಸ್ ಆ.20 ಐತಾರ ಬೊಲ್ಪುಗು 11 ಗಂಟೆಗ್ ಗುರುಪುರ ವಜ್ರದೇಹಿ ಮಠಟ್ಟ್ ನಡಪರೆ ಉಂಡು.
ಈ ಲೇಸ್ ಡ್ ಶ್ರೀ ರಾಜಶೇಖರಾನಂದ ಸ್ವಾಮೀಜಿ ಪಾಲ್ ಪಡೆದ್ ಆಶೀರ್ವಚನ ಕೊರಿಯೆರೆ ಉಲ್ಲೆರ್.
ಅಂಚೆನೆ ಈ ಕೂಟ ನೆರ್ದ್ ದುಂಬು 353 ಸೇವಾ ಯೋಜನೆ, 252 ತುರ್ತು ಯೋಜನೆ, 605 ಬಡಪತ್ತ್ ಕುಟುಂಬಗ್ 1 ಕೋಟಿ 48 ಲಕ್ಷದಾತ್ ಪನವುದ ಸಕಾಯನ್ ಕೊರ್ತುಂಡು ಪಂದ್ ಅಮೃತಸಂಜೀವಿನಿ (ರಿ.) ಕುಡ್ಲ ನೆತ್ತ ಕೂಟದಕುಲು ಲೆಪ್ಪೋಲೆಡ್ ತೆರಿಪಾದೆರ್.
ಬೊಲ್ತೇರ್ : 2023-24ನೇ ಸಾಲ್ ದ ತಿರುಗಾಟಗ್ ತಯಾರ್ ಆವೊಂದಿಪ್ಪುನ ಶ್ರೀ ಗೆಜ್ಜೆಗಿರಿ ಮೇಳದ ಪೊಸ (ಕನ್ನಡ-ಪೌರಾಣಿಕ) ಪ್ರಸಂಗ “ಪ್ರಚಂಡ ಮಹಿಷಾಸುರ” ದ ಲೆಪ್ಪೋಲೆ ಬುಡುಗಡೆ ಇಂಚೊಗು ಕನ್ಯಾಡಿದ ಆಶ್ರಮಡ್ ನಡತ್ಂಡ್.
ಈ ಲೆಪ್ಪೋಲೆನ್ ಕನ್ಯಾಡಿದ ಸ್ವಾಮೀಜಿ ಬುಡುಗಡೆ ಮಲ್ತೆರ್. ಪ್ರಚಂಡ ಮಹಿಷಾಸುರ ಪ್ರಸಂಗೊಡು ನವ ಶಕ್ತಿಯೆರೆನ ವೈಭವನ್ ತೊಜಪಾವುನ ಇಸೇಸ ಕಥೆ ಉಂಡು ಪಂದ್ ಮೇಳದ ಪ್ರಕಟಣೆಡ್ ತೆರಿಪಾದ್ಂಡ್.
ಮಿಜಾರ್ ತುಳುನಾಡ ಪೊರ್ಲು ಚಾರಿಟೇಬಲ್ ಟ್ರಸ್ಟ್ (ರಿ.) ವತಿರ್ದ್ ಒಂಜಿ ಬಡಪತ್ತ್ ದ ಕುಟುಂಬಗ್ ಪನವುದ ಸಕಾಯ ಮಲ್ತೆರ್.
ಬೆದ್ರ ಬಿರಾವು ನಿವಾಸಿ ಆಯಿನ ಪ್ರಥ್ವಿ ಪ್ರಸಾದ್ ಮೇರ್ ಲ್ಯೂಕೆಮಿಯಾ (ನೆತ್ತೆರ್ ದ ಕ್ಯಾನ್ಸರ್) ಸೀಕ್ ಡ್ ಕುಡ್ಲದ (ಕೃಷ್ಣ ನರ್ಸಿಂಗ್ ಹೋಮ್) ಆಸ್ಪತ್ರೆಡ್ ಚಿಕಿತ್ಸೆ ಪಡೆವೊಂದು ಇತ್ತೆರ್. ಮುಲ್ಪ ಚಿಕಿತ್ಸೆ ಫಲಕಾರಿ ಆವಂದೆ ತೀರ್ ಪೋಯೆರ್. ಮೆರೆನ ಚಿಕಿತ್ಸೆಗಾದ್ ಇಲ್ಲದಕುಲು ಸಾಲ ಮಲ್ತಿನೆರ್ದಾವೆರ ತುಳುನಾಡ ಪೊರ್ಲು ಚಾರಿಟೇಬಲ್ ಟ್ರಸ್ಟ್ ಗ್ ಬಿನ್ನಾಪು ಮಲ್ತ್ ದ್ ಇತ್ತೆರ್. ಈ ಬಿನ್ನಾಪುಗ್ ಸ್ಪಂದಿಸಾಯಿನ ಈ ಕೂಟ 15 ಸಾರ ರೂ.ನ್ ದಕ್ಷಿಣ ಕನ್ನಡ ಬಿಜೆಪಿದ ಜಿಲ್ಲಾಧ್ಯಕ್ಷೆರ್ ಸುದರ್ಶನ್ ಎಂ ಬೆದ್ರ ಮೆರೆನ ಮುಖೇನ ಅಯ್ಯಪ್ಪ ಮಂದಿರ ಮಾರಿಗುಡಿ ಬೆದ್ರಡ್ ಸಹಾಯಧನದ ಚೆಕ್ ನ್ ಕೊರಿಯೆರ್.
ಈ ಪೊರ್ತುಡು ಕೂಟದ ಪದಾಧಿಕಾರಿಲು ಬೊಕ್ಕ ಪನವುದ ಸಕಾಯ ಮಲ್ತಿನಕುಲು ಇತ್ತೆರ್.
ಮಣಿಪಾಲ: ರೇಡಿಯೋ ಮಣಿಪಾಲ್ 90.4 Mhz ಸಮುದಾಯ ಬಾನುಲಿ ಕೇಂದ್ರ ಕನ್ನಡ ಸಾಹಿತ್ಯ ಪರಿಷತ್ ಒಡಿಪು ಜಿಲ್ಲೆ, ಬೊಕ್ಕ ತಾಲೂಕ್ ಘಟಕದ ಒಟ್ಟುಸೇರಿಗೆಡ್ ಕಥೆ ಕೇಳೋಣ ಸರಣಿ ಲೇಸ್ ದ 65 ನೇ ಸಂಚಿಕೆ ಜುಲೈ 29 ಸನಿಯಾರ ಬಯ್ಯಗ್ 4.30 ಕ್ಕ್ ಪ್ರಸಾರ ಆಪುಂಡು.
ಈ ಲೇಸ್ ಡ್ ಸಾಹಿತ್ಯಾಸಕ್ತೆರ್, ಕಲ್ಪಾರ್ಥಿ ವಸುಧಾ ಅಡಿಗ ನೀಲಾವರ ಪಾಲ್ ಪಡೆಯೆರೆ ಉಲ್ಲೆರ್. ಜುಲೈ 30 ಮಧ್ಯಾಹ್ನ 12.30 ಕ್ಕ್ ಕುಡೊರ ಪ್ರಸಾರ ಆಪುಂಡು.
ಕುಡ್ಲ: ಮೂಲತ್ವ ಫೌಂಡೇಶನ್ ಚಾರಿಟೆಬಲ್ ಟ್ರಸ್ಟ್ ವತಿರ್ದ್ ಆಟಿಡೊಂಜಿ ದಿನ ಲೇಸ್ ಜು. 30 ಕ್ಕ್ ಬೊಲ್ಪುಗು 11 ಗಂಟೆಗ್ ಕುಡ್ಲ ಪೇಂಟೆದ ತಾರೆತೋಟದ ಮೂಲತ್ವ ಸಿ 105 ಸುವರ್ಣ ರೆಸಿಡೆನ್ಸಿಡ್ ನಡಪರೆ ಉಂಡು.
ತುಳು ಸಾಹಿತ್ಯ ಅಕಾಡೆಮಿದ ಮಾಜಿ ಅಧ್ಯಕ್ಷೆರ್ ದಯಾನಂದ ಜಿ. ಕತ್ತಲ್‌ ಸಾರ್ ಈ ಲೇಸ್ ದ ಉದಿಪನ ಮಲ್ಪೆರೆ ಉಲ್ಲೆರ್.
